This file is a result of SARIT (Search and Retrieval of Indic Texts). This revision, 2011-07-07, is due to Dominik Wujastyk. For more information about this document, please visit http://sarit.indology.info/top.shtml.

INDOLOGY: Resources for Indological Scholarship

SARIT—Search and Retrieval of Indic Texts

Carakasaṃhitā [a machine-readable transcription]

Author Caraka and Agniveśa (revised Dominik Wujastyk) 2011

Table of contents

1. sūtrasthānam /

1.1. prathamo+adhyāyaḥ /

athāto dīrghañjīvitīyamadhyāyaṃ vyākhyāsyāmaḥ //

iti ha smāha bhagavānātreyaḥ //

dīrghaṃ jīvitamanvicchanbharadvāja upāgamat /
indramugratapā buddhvā śaraṇyamamareśvaram //
brahmaṇā hi yathāproktamāyurvedaṃ pajāpatiḥ /
jagrāha nikhilenādāvaśvinau tu punastataḥ //
aśvibhyāṃ bhagavāñchakraḥ pratipede ha kevalam /
ṛṣiprokto bharadvājastasmācchakramupāgamat //
vighnabhūtā yadā rogāḥ prādurbhūtāḥ śarīriṇām /
tapopavāsādhyayanabrahmacaryavratāyuṣām //
tadā bhūteṣvanukrośaṃ puraskṛtya maharṣayaḥ /
sametāḥ puṇyakarmāṇaḥ pārśve himavataḥ śubhe //
aṅgirā jamadagniśca vasiṣṭhaḥ kaśyapo bhṛguḥ /
ātreyo gautamaḥ sāṅkhyaḥ pulastyo nārado+asitaḥ //
agastyo vāmadevaśca mārkaṇḍeyāśvalāyanau /
pārikṣirbhikṣurātreyo bharadvājaḥ kapiñjalaḥ [Note: kapiṣṭhalaḥ] //
viśvāmitrāśmarathyau ca bhārgavaścyavano+abhijit /
gārgyaḥ [Note: -kauṇḍinyau-]śāṇḍilyakauṇḍilyauvārkṣirdevalagālavau //
sāṅkṛtyo baijavāpiśca kuśiko bādarāyaṇaḥ /
baḍiśaḥ śaralomā ca kāpyakātyāyanāvubhau //
kāṅkāyanaḥ kaikaśeyo dhaumyo mārīcakāśyapau /
śarkarākṣo hiraṇyākṣo lokākṣaḥ paiṅgireva ca //
śaunakaḥ śākuneyaśca maitreyo maimatāyaniḥ /
vaikhānasā vālakhilyāstathā cānye maharṣayaḥ //
brahmajñānasya nidhayo [Note: yamasya]damasya niyamasya ca /
tapasastejasā dīptā hūyamānā ivāgnayaḥ //
sukhopaviṣṭāste tatra puṇyāṃ cakruḥ kathāmimām /
dharmārthakāmamokṣāṇāmārogyaṃ mūlamuttamam //
rogāstasyāpahartāraḥ śreyaso jīvitasya ca /
prādurbhūto manuṣyāṇāmantarāyo mahānayam //
kaḥ syātteṣāṃ śamopāya ityuktvā dhyānamāsthitāḥ /
atha te śaraṇaṃ śakraṃ dadṛśurdhyānacakṣuṣā //
sa vakṣyati śamopāyaṃ yathāvadamaraprabhuḥ /
kaḥ sahasrākṣabhavanaṃ gacchet praṣṭuṃ śacīpatim //
ahamarthe niyujyeyamatreti prathamaṃ vacaḥ /
bharadvājo+abravīttasmādṛṣibhiḥ sa niyojitaḥ //
sa śakrabhavanaṃ gatvā surarṣigaṇamadhyagam /
dadarśa balahantāraṃ dīpyamānamivānalam //
so+abhigamya jayāśīrbhirabhinandya sureśvaram /
provāca vinayāddhīmānṛsīṇāṃ vākyamuttamam //
vyādhayo hi samutpannāḥ sarvaprāṇibhayaṅkarāḥ /
tadbrūhi me śamopāyaṃ yathāvadamaraprabho //
tasmai provāca bhagavānāyurvedaṃ śatakratuḥ /
padairalpairmatiṃ buddhvā vipulāṃ paramarṣaye //
hetuliṅgauṣadhajñānaṃ svasthāturaparāyaṇam /
trisūtraṃ śāśvataṃ puṇyaṃ bubudhe yaṃ pitāmahaḥ //
so+anantapāraṃ triskandhamāyurvedaṃ mahāmatiḥ /
yathāvadacirāt sarvaṃ bubudhe tanmanā muniḥ //
tenāyuramitam lebhe bharadvājaḥ sukhānivitam /
ṛṣibhyo+anadhikam tacca śaśaṃsānavaśeṣayan //
ṛṣayaśca bharadvājājjagṛhustaṃ prajāhitam /
dīrghamāyuścikīrṣanto vedaṃ vardhanamāyuṣaḥ //
maharṣayaste daḍrśuryathāvajjñānacakṣuṣā /
sāmānyaṃ ca viśeṣaṃ ca guṇān dravyāṇi karma ca //
samavāyaṃ ca yajjñātvā tantroktaṃ vidhimāsthitāḥ /
lebhire paramaṃ śarma jīvitaṃ cāpyanitvaram //
atha maitrīparaḥ puṇyamāyurvedaṃ punarvasuḥ /
śiṣyebhyo dattavān ṣaḍbhyaḥ sarvabhūtānukampayā //
agniveśaśca [Note: bheḍaśca]bhelaśca jatūkarṇaḥ parāśaraḥ /
hārītaḥ kṣārapāṇiśca jagṛhustanmunervacaḥ //
buddherviśeṣastatrāsīnnopadeśāntaraṃ muneḥ /
tantrasya kartā prathamamagniveśo yato+abhavat //
atha bhelādayaścakruḥ svaṃ svaṃ tantraṃ kṛtāni ca /
śrāvayāmāsurātreyaṃ sarṣisaṅghaṃ sumedhasaḥ //
śrutvā sūtraṇamarthānāmṛṣayaḥ puṇyakarmaṇām /
yathāvatsūtritamiti prahṛṣṭāsta+anumenire //
sarva evāstuvaṃstāṃśca sarvabhūtahitaiṣiṇaḥ /
sādhu bhūteṣvanukrośa ityuccairabruvan samam //
taṃ puṇyaṃ śuśruvuḥ śabdaṃ divi devarṣayaḥ sthitāḥ /
sāmarāḥ paramarṣīṇaṃ śrutvā mumudire param //
aho sādhviti nirghoṣo lokāṃstrīnanvavādayat [Note: -nādayat] /
nabhasi snigdhagambhīro harṣādbhūtairudīritaḥ //
śivo vāyurvavau sarvā bhābhirunmīlitā diśaḥ /
nipetuḥ sajalāścaiva divyāḥ kusumavṛṣṭayaḥ //
athāgniveśapramukhān viviśurjñānadevatāḥ /
buddhiḥ siddhiḥ smṛtirmedhā dhṛtiḥ kīrtiḥ kṣamādayā //
tāni cānumatānyeṣāṃ tantrāṇi paramarṣibhiḥ /
[Note: bhāvāya]]bhavāya bhūtasaṅghānāṃ pratiṣṭhāṃ bhuvi lebhire //
hitāhitaṃ sukhaṃ dukhamāyustasya hitāhitam /
mānaṃ ca tacca yatroktamāyurvedaḥ sa ucyate //
śarīrendriyasattvātmasaṃyogo dhāri jīvitam /
nityagaścānubandhaśca paryāyairāyurucyate //
tasyāyuṣaḥ puṇyatamo vedo vedavidāṃ mataḥ /
vakṣyate yanmanuṣyāṇāṃ lokayorubhayorhitam //
sarvadā sarvabhāvānāṃ sāmānyaṃ vṛddhikāraṇam /
hrāsaheturviśeṣaśca pravṛttirubhayasya tu //
sāmānyamekatvakaraṃ viśeṣastu pṛthaktvakṛt /
tulyārthatā hi sāmānyaṃ viśeṣastu viparyayaḥ //
sattvamātmā śarīraṃ ca trayametattridaṇḍavat /
lokastiṣṭhati saṃyogāttatra sarvaṃ pratiṣṭhitam //
sa pumāṃścetanaṃ tacca taccādhikaraṇaṃ smṛtam /
vedasyāsya tadarthaṃ hi vedo+ayaṃ saṃprakāśitaḥ //
khādīnyātmā manaḥ kālo diśaśca dravyasaṃgrahaḥ /
sendriyaṃ cetanaṃ dravyaṃ nirindriyamacetanam //
sārthā gurvādayo buddhiḥ prayatnāntāḥ parādayaḥ /
guṇāḥ proktāḥ prayatnādi karma ceṣṭitamucyate //
samavāyo+apṛthagbhāvo bhūmyādīnāṃ guṇairmataḥ /
sa nityo yatra hi dravyaṃ na tatrāniyato guṇaḥ //
yatrāśritāḥ karmaguṇāḥ kāraṇaṃ samavāyi yat /
taddravyaṃ samavāyī tu niśceṣṭaḥ kāraṇaṃ guṇaḥ //
saṃyoge ca vibhāge ca kāraṇaṃ dravyamāśritam /
kartavyasya kriyā karma karma nānyadapekṣate //
ityuktaṃ kāraṇaṃ kāryaṃ dhātusāmyamihocyate /
dhātusāmyakriyā coktā tantrasyāsya prayojanam //
kālabuddhīndriyārthānāṃ yogo mithyā na cāti ca /
dvayāśrayāṇāṃ vyādhīnāṃ trividho hetusaṃgrahaḥ //
śarīraṃ sattvasaṃjñaṃ ca vyādhīnāmāśrayo mataḥ /
tathā sukhānāṃ yogastu sukhānāṃ kāraṇaṃ samaḥ //
nirvikāraḥ parastvātmā sattvabhūtaguṇendriyaiḥ /
caitanye kāraṇaṃ nityo draṣṭā paśyati hi kriyāḥ //
vāyuḥ pittaṃ kaphaścoktaḥ śārīro doṣasaṃgrahaḥ /
mānasaḥ punaruddiṣṭo rajaśca tama eva ca //
praśāmyatyauṣadhaiḥ pūrvo daivayuktivyapāśrayaiḥ /
mānaso jñānavijñānadhairyasmṛtisamādhibhiḥ //
rūkṣaḥ śīto laghuḥ sūkṣmaścalo+atha viśadaḥ kharaḥ /
viparītaguṇairdravyairmārutaḥ saṃpraśāmyati //
sasnehamuṣṇaṃ tīkṣṇaṃ ca dravamamlaṃ saraṃ kaṭu /
viparītaguṇaiḥ pittaṃ dravyairāśu praśāmyati //
guruśītamṛdusnigdhamadhurasthirapicchilāḥ /
śleṣmaṇaḥ praśamaṃ yānti viparītaguṇairguṇāḥ //
viparītaguṇairdeśamātrākālopapāditaiḥ /
bheṣajairvinivartante vikārāḥ sādhyasaṃmatāḥ //
sādhanaṃ na tvasādhyānāṃ vyādhīnāmupadiśyate /
bhūyaścāto yathādravyaṃ guṇakarmāṇi vakṣyate //
rasanārtho rasastasya dravyamāpaḥ kṣitistathā /
nirvṛttau ca viśeṣe ca pratyayāḥ khādayastrayaḥ //
svāduramlo+atha lavaṇaḥ kaṭukastikta eva ca /
kaṣāyaśceti ṣaṭko+ayaṃ rasānāṃ saṃgrahaḥ smṛtaḥ //
svādvamlalavaṇā vāyuṃ kaṣāyasvādutiktakāḥ /
jayanti pittaṃ śleṣmāṇaṃ kaṣāyakaṭutiktakāḥ //
kaṭvamlalavaṇāḥ pittaṃ svadvamlalavaṇāḥ kapham /)
(kaṭutiktakaṣāyāśca kopayanti samīraṇam //)
kiṃciddoṣapraśamanaṃ kiṃciddhātupradūṣaṇam /
svasthavṛttau mataṃ kiṃcittrividhaṃ dravyamucyate //
tat punastrividhaṃ proktaṃ jaṅgamaudbhidapārthivam /
madhūni gorasāḥ pittaṃ vasā majjā+asṛgāmiṣam //
viṇmūtracarmaretosthisnāyuśṛṅganakhāḥ khurāḥ /
jaṅgamebhyaḥ prayujyante keśā lomāni rocanāḥ //
suvarṇaṃ samalāḥ pañca lohāḥ sasikatāḥ sudhā /
manaḥśilāle maṇayo lavaṇaṃ gairikāñjane //
bhaumamauṣadhamuddiṣṭamaudbhidaṃ tu caturvidham /
vanaspatistathā vīrudvānaspatyastathauṣadhiḥ //
phalairvanaspatiḥ puṣpairvānaspatyaḥ phalairapi /
oṣadhyaḥ phalapākāntāḥ pratānairvīrudhaḥ smṛtāḥ //
mūlatvaksāraniryāsanālasvarasapallavāḥ [Note: -nāḍasva-] /
kṣārāḥ kṣīraṃ phalaṃ puṣpaṃ bhasma tailāni kaṇṭakāḥ //
patrāṇi śuṅgāḥ kandāśca prarohāścaudbhido gaṇaḥ /
mūlinyaḥ ṣoḍaśaikonā phalinyo viṃśatiḥ smṛtāḥ //
mahāsnehāśca catvāraḥ pañcaiva lavaṇāni ca /
aṣṭau mūtrāṇi saṃkhyātānyaṣṭāveva payāṃsi ca //
śodhanārthāśca ṣaḍ vṛkṣāḥ punarvasunidarśitāḥ /
ya etān vetti saṃyoktuṃ vikāreṣu sa vedavit //
hastidantī haimavatī śyāmā trivṛdadhoguḍā /
saptalā śvetanāmā ca pratyakśreṇī gavākṣyapi //
jyotiṣmatī ca bimbī ca śaṇapuṣpī viṣāṇikā /
ajagandhā dravantī ca kṣīriṇī cātra ṣoḍaśī //
śaṇapuṣpī ca bimbī ca cchardane haimavatyapi /
śvetā jyotiṣmatī caiva yojyā śīrṣavirecane //
ekādaśāvaśiṣṭā yāḥ prayojyāstā virecane /
ityuktā nāmakarmabhyāṃ mūlinyaḥ phalinīḥ śṛṇu //
śaṅkhinyatha viḍaṅgāni trapuṣaṃ madanāni ca /
dhāmārgavamathekṣvāku jīmūtaṃ kṛtavedhanam /
ānūpaṃ sthalajaṃ caiva klītakaṃ dvididhaṃ smṛtam //
prakīryā codakīryā ca pratyakpuṣpā tathā+abhayā /
antaḥkoṭarapuṣpī ca hastiparṇyāśca śāradam //
kampillakāragvadhayoḥ phalaṃ yat kuṭajasya ca /
dhāmārgavamathekṣvāku jīmūtaṃ kṛtavedhanam //
madanaṃ kuṭajaṃ caiva trapuṣaṃ hastiparṇinī /
etāni vamane caiva yojyānyāsthāpaneṣu ca //
nastaḥ pracchardane caiva pratyakpuṣpā vidhīyate /
daśa yānyavaśiṣṭāni tānyuktāni virecane //
nāmakarmabhiruktāni phalānyekonaviṃśatiḥ /
sarpistailaṃ vasā majjā sneho diṣṭaścaturvidhaḥ //
pānābhyañjanabastyarthaṃ nasyārthaṃ caiva yogataḥ /
snehanā jīvanā varṇyā balopacayavardhanāḥ //
snehā hyete ca vihitā vātapittakaphāpahāḥ /
sauvarcalaṃ saindhavaṃ ca viḍamaudbhidameva ca //
sāmudreṇa sahaitāni pañca syurlavaṇāni ca /
snighdānyuṣṇāni tīkṣṇāni dīpanīyatamāni ca //
ālepanārthe yujyante snehasvedavidhau tathā /
adhobhāgordhvabhāgeṣu nirūheṣvanuvāsane //
abhyañjane bhojanārthe śirasaśca cirecane /
śastrakarmaṇi vartyarthamañjanotsādaneṣu ca //
ajīrṇānāhayorvāte gulme śūle tathodare /
uktāni &lavaṇānyūrdhvaṃ mūtrāṇyaṣṭau nibodha me //
mukhyāni yāni diṣṭāni sarvāṇyātreyaśāsane /
avimūtramajāmūtraṃ gomūtraṃ māhiṣaṃ ca yat //
hastimūtramathoṣṭrasya hayasya ca kharasya ca /
uṣṇaṃ tīkṣṇamatho+arūkṣaṃ kaṭukaṃ lavaṇānvitam //
mūtramutsādane yuktaṃ yuktamālepaneṣu ca /
yuktamāsthāpane mūtraṃ yuktaṃ cāpi virecane //
svedeṣvapi ca tadyuktamānāheṣvagadeṣu ca /
udareṣvatha cārśaḥsu gulmikuṣṭhikilāsiṣu //
tadyuktamupanāheṣu pariṣeke tathaiva ca /
dīpanīyaṃ viṣaghnaṃ ca krimighnaṃ copadiśyate //
pāṇḍurogopasṛṣtānāmuttamaṃ śarma cocyate /
śleṣmāṇaṃ śamayet pītaṃ mārutaṃ cānulomayet //
karṣet pittamadhobhāgamityasmin guṇasaṃgrahaḥ /
sāmānyena mayoktastu pṛthaktvena pravakṣyate //
avimūtraṃ satiktaṃ syāt snigdhaṃ pittāvirodhi ca /
ājaṃ kaṣāyamadhuraṃ pathyaṃ doṣānnihanti ca //
gavyaṃ samadhuraṃ kiṃciddoṣaghnaṃ krimikuṣṭhanut /
kaṇḍūṃ ca śamayet pītaṃ samyagdoṣodare hitam //
arśaḥśophodaraghnaṃ tu sakṣāraṃ māhiṣaṃ saram /
hāstikaṃ lavaṇaṃ mūtraṃ hitaṃ tu krimikuṣṭhinām //
praśastaṃ baddhaviṇmūtraviṣaśleṣmāmayārśasām /
satiktaṃ śvāsakāsaghnamarśoghnaṃ cauṣṭramucyate //
vājināṃ tiktakaṭukaṃ kuṣṭhavraṇaviṣāpaham /
kharamūtramapasmāronmādagrahavināśanam //
itīhoktāni mūtrāṇi yathāsāmarthyayogataḥ /
ataḥ kṣīrāṇi vakṣyante karma caiṣāṃ guṇāśca ye //
avikṣīramajākṣīraṃ gokṣīraṃ māhiṣaṃ ca yat /
uṣṭrīṇāmatha nāgīnāṃ vaḍavāyāḥ striyāstathā //
prāyaśo madhuraṃ snigdhaṃ śītaṃ stanyaṃ payo matam /
prīṇanaṃ bṛṃhaṇaṃ vṛṣyaṃ medhyaṃ balyaṃ manaskaram //
jīvanīyaṃ śramaharaṃ śvāsakāsanibarhaṇam /
hanti śoṇitapittaṃ ca sandhānaṃ vihatasya ca //
sarvaprāṇābhṛtāṃ sātmyaṃ śamanaṃ śodhanaṃ tathā /
tṛṣṇāghnaṃ dīpanīyaṃ ca śreṣṭhaṃ kṣīṇakṣateṣu ca //
pāṇḍuroge+amlapitte ca śoṣe gulme tathodare /
atīsāre jvare dāhe śvayathau ca viśeṣataḥ //
yoniśukrapradoṣeṣu mūtreṣvapracureṣu ca /
purīṣe grathite pathyaṃ vātapittavikāriṇām //
nasyālepāvagāheṣu vamanāsthāpaneṣu ca /
virecane snehane ca payaḥ sarvatra yujyate //
yathākramaṃ kṣīraguṇānekaikasya pṛthak pṛthak /
annapānādike+adhyāye bhūyo vakṣyāmyaśeṣataḥ //
athāpare trayo vṛkṣāḥ pṛthagye phalamūlibhiḥ /
snuhyarkāśmantakāsteṣāmidaṃ karma pṛthak pṛthak //
vamane+aśmantakaṃ vidyāt snuhīkṣīraṃ virecane /
kṣīramarkasya vijñeyaṃ vamane savirecane //
imāṃstrīnaparān vṛkṣānāhuryeṣāṃ hitāstvacaḥ /
pūtīkaḥ kṛṣṇagandhā ca tilvakaśca tathā taruḥ //
virecane prayoktavyaḥ pūtīkastilvakastathā /
kṛṣṇagandhā parīsarpe śotheṣvarśaḥṣu cocyate //
dadruvidradhigaṇḍeṣu kuṣṭheṣvapyalajīṣu ca /
ṣaḍvṛkṣāñchodhanānetānapi vidyādvicakṣaṇaḥ //
ityuktāḥ phalamūlinyaḥ snehāśca lavaṇāni ca /
mūtraṃ kṣīrāṇi vṛkṣāśca ṣaḍ ye diṣṭapayastvacaḥ //
oṣadhīrnāmarūpābhyāṃ jānate hyajapā vane /
avipāścaiva gopāśca ye cānye vanavāsinaḥ //
na nāmajñānamātreṇa rūpajñānena vā punaḥ /
oṣadhīnāṃ parāṃ prāptiṃ kaścidveditumarhati //
yogavittvapyarūpajñastāsāṃ tattvaviducyate /
kiṃ punaryo vijānīyādoṣadhīḥ sarvathā bhiṣak //
yogamāsāṃ tu yo vidyāddeśakālopapāditam /
puruṣaṃ puruṣaṃ vīkṣya sa jñeyo bhiṣaguttamaḥ //
yathā viṣaṃ yathā śastraṃ yathā+agniraśaniryathā /
tathauṣadhamavijñātaṃ vijñātamamṛtaṃ yathā //
auṣadhaṃ hyanabhijñātaṃ nāmarūpaguṇaistribhiḥ /
vijñātaṃ cāpi duryuktamanarthāyopapadyate //
yogādapi viṣaṃ tīkṣṇamuttamaṃ bheṣajaṃ bhavet /
bheṣajaṃ cāpi duryuktaṃ tīkṣṇaṃ saṃpadyate viṣam //
tasmānna bhiṣajā yuktaṃ yuktibāhyena bheṣajam /
dhīmatā kiṃcidādeyaṃ jīvitārogyakāṅkṣiṇā //
kuryānnipatito mūrdhni saśeṣaṃ vāsavāśaniḥ /
saśeṣamāturaṃ kuryānnatvajñamatamauṣadham //
duḥkhitāya śayānāya śraddadhānāya rogiṇe /
yo bheṣajamavijñāya prājñamānī prayacchati //
tyaktadharmasya pāpasya mṛtyubhūtasya durmateḥ /
naro narakapātī syāttasya saṃbhāṣaṇādapi //
varamāśīviṣaviṣaṃ kvathitaṃ tāmrameva vā /
pītamatyagnisantaptā bhakṣitā vā+apyayoguḍāḥ //
natu śrutavatāṃ veśaṃ bibhratā śaraṇāgatāt /
gṛhītamannaṃ pānaṃ vā vittaṃ vā rogapīḍitāt //
bhiṣagbubhūṣurmatimānataḥ svaguṇasampadi /
paraṃ prayatnamātiṣṭhet prāṇadaḥ syādyathā nṛṇām //
tadeva yuktaṃ bhaiṣajyaṃ yadārogyāya kalpate /
sa caiva bhiṣajāṃ śreṣṭho rogebhyo yaḥ pramocayet //
samyakprayogaṃ sarveṣāṃ siddhirākhyāti karmaṇām /
siddhirākhyāti sarvaiśca guṇairyuktaṃ bhiṣaktamam //
tatra ślokāḥ
āyurvedāgamo heturāgamasya pravartanam /
sūtraṇasyābhyanujñānamāyurvedasya nirṇayaḥ //
saṃpūrṇaṃ kāraṇaṃ kāryamāyurvedaprayojanam /
hetavaścaiva doṣāśca bheṣajaṃ saṃgraheṇa ca //
rasāḥ sapratyayadravyāstrividho dravyasaṃgrahaḥ /
mūlinyaśca phalinyaśca snehāśca lavaṇāni ca //
mūtraṃ kṣīrāṇi vṛkṣāśca ṣaḍ ye kṣīratvagāśrayāḥ /
karmāṇi caiṣāṃ sarveṣāṃ yogāyogaguṇāguṇāḥ //
vaidyāpavādo yatrasthāḥ sarve ca bhiṣajāṃ guṇāḥ /
sarvametat samākhyātaṃ pūrvādhyāye maharṣiṇā //

ityagniveśakṛte tantre carakapratisaṃskṛte sūtrasthāne dīrghañjīvitīyo nāma prathamo+adhyāyaḥ /

1.2. dvitīyo+adhyāyaḥ/

athāto+apāmārgataṇḍulīyamadhyāyaṃ vyākhyāsyāmaḥ//

iti ha smāha bhagavānātreyaḥ//

apāmārgasya bījāni pippalīrmaricāni ca/
viḍaṅgānyatha śigrūṇi sarṣapāṃstumburūṇi ca//
ajājīṃ [Note: `cājamodāṃ ca' iti pā-]cājagandhāṃ ca pīlūnyelāṃ hareṇukām/
pṛthvīkāṃ surasāṃ śvetāṃ kuṭherakaphaṇijjhakau//
śirīṣabījaṃ laśunaṃ haridre lavaṇadvayam/
jyotiṣmatīṃ nāgaraṃ ca dadyācchīrṣavirecane//
gaurave śirasaḥ śūle pīnase+ardhāvabhedake/
krimivyādhāvapasmāre ghrāṇanāśe pramohake//
madanaṃ madhukaṃ nimbaṃ jīmūtaṃ kṛtavedhanam/
pippalīkuṭajekṣvākūṇyelāṃ dhāmārgavāṇi ca//
upasthite śleṣmapitte vyādhāvāmāśayāśraye/
vamanārthaṃ prayuñjīta bhiṣagdehamadūṣayan//
trivṛtāṃ triphalāṃ dantīṃ nīlinīṃ saptalāṃ vacām/
kampillakaṃ gavākṣīṃ ca kṣīriṇīmudakīryakām//
pīlūnyāragvadhaṃ drākṣāṃ dravantīṃ niculāni ca/
pakvāśayagate doṣe virekārthaṃ prayojayet//
[Note: `pāṭaliṃ' iti pā-]pāṭalāṃ cāgnimanthaṃ ca bilvaṃ śyonākameva ca/
kāśmaryaṃ śālaparṇīṃ ca pṛśniparṇīṃ nidigdhikām//
balāṃ śvadaṃṣṭrāṃ bṛhatīmeraṇḍaṃ sapunarnavam/
yavān kulatthān kolāni guḍūcīṃ madanāni ca//
palāśaṃ kattṛṇaṃ caiva snehāṃśca lavaṇāni ca/
udāvarte vibandheṣu yuñjyādāsthāpaneṣu ca//
ata evauṣadhagaṇāt saṃkalpyamanuvāsanam/
mārutaghnamiti proktaḥ saṃgrahaḥ pāñcakarmikaḥ//
tānyupasthitadoṣāṇāṃ snehasvedopapādanaiḥ/
pañcakarmāṇi kurvīta mātrākālau vicārayan//
mātrākālāśrayā yuktiḥ, siddhiryuktau pratiṣṭhitā/
tiṣṭhatyupari yuktijño dravyajñānavatāṃ sadā//
ata ūrdhvaṃ pravakṣyāmi yavāgūrvividhauṣadhāḥ/
vividhānāṃ vikārāṇāṃ tatsādhyānāṃ nivṛttaye//
pippalīpippalīmūlacavyacitrakanāgaraiḥ/
yavāgūrdīpanīyā syācchūlaghnī copasādhitā//
dadhitthabilvacāṅgerītakradāḍimasādhitā/
pācanī grāhiṇī, peyā savāte pāñcamūlikī//
śālaparṇībalāvilvaiḥ pṛśniparṇyā ca sādhitā/
dāḍimāmlā hitā peyā pittaśleṣmātisāriṇām//
payasyardhodake cchāge hrīverotpalanāgaraiḥ/
peyā raktātisāraghnī pṛśniparṇyā ca sādhitā//
dadyāt sātiviṣāṃ [Note: `peyāmāme' iti pā-]]peyāṃ sāme sāmlāṃ sanāgarām/
śvadaṃṣṭrākaṇṭakārībhyāṃ mūtrakṛcchre saphāṇitām//
viḍaṅgapippalīmūlaśigrubhirmaricena ca/
takrasiddhā [Note: `atra takraṃ jalasthāne bodhyaṃ' iti gaṅgādharaḥ] yavāgūḥ syāt krimighnī sasuvarcikā//
mṛdvīkāsārivālajapippalīmadhunāgaraiḥ/
pipāsāghnī, viṣaghnī ca somarājīvipācitā//
siddhā varāhaniryūhe yavāgūrbṛṃhaṇī matā/
gavedhukānāṃ bhṛṣṭānāṃ karśanīyā samākṣikā//
sarpiṣmatī bahutilā snehanī lavaṇānvitā/
kuśāmalakaniryūhe śyāmākānāṃ& virukṣaṇī//
daśamūlīśṛtā kāsahikkāśvāsakaphāpahā/
yamake madirāsiddhā pakvāśayarujāpahā//
śākairmāṃsaistilairmāṣaiḥ siddhā varco nirasyati/
jambvāmrāsthidadhitthāmlabilvaiḥ sāṅgrāhikī matā//
kṣāracitrakahiṅgvamlavetasairbhedinī matā/
abhayāpippalīmūlaviśvairvātānulomanī [Note: `-bilvai-' iti pā-]//
takrasiddhā yavāgūḥ syādghṛtavyāpattināśinī/
tailavyāpadi śastā syāttakrapiṇyākasādhitā//
gavyamāṃsarasaiḥ sāmlā viṣamajvaranāśinī/
kaṇṭhyā yavānāṃ yamake pippalyāmalakaiḥ śṛtā//
tāmracūḍarase siddhā retomārgarujāpahā/
samāṣavidalā vṛṣyā ghṛtakṣīropasādhitā//
upodikādadhibhyāṃ tu siddhā madavināśinī/
kṣudhaṃ hanyādapāmārgakṣīragodhārasaiḥ śṛtā//
tatra ślokaḥ ---
aṣṭāviṃśatirityetā yavāgvaḥ parikīrtitāḥ/
pañcakarmāṇi cāśritya prokto bhaiṣajyasaṃgrahaḥ//
pūrvaṃ mūlaphalajñānahetoruktaṃ yadauṣadham/
pañcakarmāśrayajñānahetostat kīrtitaṃ punaḥ//
smṛtimān hetuyuktijO jitātmā pratipattimān/
bhiṣagauṣadhasaṃyogaiścikitsāṃ kartumarhati//

ityagniveśakṛte tantre carakapratisaṃskṛte ślokasthāne+apāmārgataṇḍulīyo nāma dvitīyo+adhyāyaḥ//2//

1.3. tṛtīyo+adhyāyaḥ/

athāta āragvadhīyamadhyāyaṃ vyākhyāsyāmaḥ//

iti ha smāha bhagavānātreyaḥ//

āragvadhaḥ saiḍagajaḥ karañjo vāsā guḍūcī madanaṃ haridre/
śryāhvaḥ surāhvaḥ khadiro dhavaśca nimbo viḍaṅgaṃ karavīrakatvak//
granthiśca bhaurjo laśunaḥ śirīṣaḥ salomaśo guggulukṛṣṇagandhe/
phaṇijjhako vatsakasaptaparṇau pīlūni kuṣṭhaṃ sumanaḥpravālāḥ//
vacā hareṇustrivṛtā nikumbho bhallātakaṃ gairikamañjanaṃ ca/
manaḥśilāle gṛhadhūma elā kāśīsalodhrārjunamustasarjāḥ//
ityardharūpairvihitāḥ ṣaḍete gopittapītāḥ punareva piṣṭāḥ/
siddhāḥ paraṃ sarṣapatailayuktāścūrṇapradehā bhiṣajā prayojyāḥ//
kuṣṭhāni kṛcchrāṇi navaṃ kilāsaṃ sureśaluptaṃ kiṭibhaṃ sadadru/
bhagandarārśāṃsyapacīṃ sapāmāṃ hanyuḥ prayuktāstvacirānnarāṇām//
kuṣṭhaṃ haridre surasaṃ paṭolaṃ nimbāśvagandhe suradāruśigrū/
sasarṣapaṃ tumburudhānyavanyaṃ caṇḍāṃ ca cūrṇāni samāni kuryāt//
taistakrapiṣṭaiḥ prathamaṃ śarīraṃ tailāktamudvartayituṃ yateta/
tenāsyakaṇḍūḥ piḍakāḥ sakoṭhāḥ kuṣṭhāni śophāśca śamaṃ vrajanti//
kuṣṭhāmṛtāsaṅgakaṭaṅkaṭerīkāsīsakampillakamustalodhrāḥ/
saugandhikaṃ sarjaraso viḍaṅgaṃ manaḥśilāle karavīrakatvak//
tailāktagātrasya kṛtāni cūrṇānyetāni dadyādavacūrṇanārtham/
dadrūḥ sakaṇḍūḥ kiṭibhāni pāmā vicarcikā caiva tathaiti śāntim//
manaḥśilāle maricāni tailamārkaṃ payaḥ kuṣṭhaharaḥ pradehaḥ/
tutthaṃ viḍaṅgaṃ maricāni kuṣṭhaṃ lodhraṃ ca tadvat samanaḥśilaṃ syāt//
rasāñjanaṃ saprapunāḍabījaṃ yuktaṃ kapitthasya rasena lepaḥ/
karañjabījaiḍagajaṃ sakuṣṭhaṃ gomūtrapiṣṭaṃ ca paraḥ pradehaḥ//
ubhe haridre kuṭajasya bījaṃ karañjabījaṃ sumanaḥpravālān/
tvacaṃ samadhyāṃ hayamārakasya lepaṃ tilakṣārayutaṃ vidadhyāt//
manaḥśilā tvak kuṭajāt sakuṣṭhāt salomaśaḥ saiḍagajaḥ karañjaḥ/
granthiśca bhaurjaḥ karavīramūlaṃ cūrṇāni sādhyāni tuṣodakena//
palāśanirdāharasena cāpi karṣoddhṛtānyāḍhakasaṃmitena/
darvīpralepaṃ pravadanti lepametaṃ paraṃ kuṣṭhanisūdanāya//
parṇāni piṣṭvā caturaṅgulasya takreṇa parṇānyatha kākamācyāḥ/
tailāktagātrasya narasya kuṣṭhānyudvartayedaśvahanacchadaiśca//
kolaṃ kulatthāḥ suradārurāsnāmāṣātasītailaphāni kuṣṭham/
vacā śatāhvā yavacūrṇamamlamuṣṇāni vātāmayināṃ pradehaḥ//
ānūpamatsyāmiṣavesavārairuṣṇaiḥ pradehaḥ pavanāpahaḥ syāt/
snehaiścaturbhirdaśamūlamiśrairgandhauṣadhaiścānilahaḥ pradehaḥ//
takreṇa yuktaṃ yavacūrṇamuṣṇaṃ sakṣāramartiṃ jaṭhare nihanyāt/
kuṣṭhaṃ śatāhvāṃ savacāṃ yavānāṃ cūrṇaṃ satailāmlamuśanti vāte//
ubhe śatāhve madhukaṃ madhūkaṃ balāṃ priyālaṃ ca kaśerukaṃ ca/
ghṛtaṃ vidārīṃ ca sitopalāṃ ca kuryāt pradehaṃ pavane sarakte//
rāsnā guḍūcī madhukaṃ bale dve sajīvakaṃ sarṣabhakaṃ payaśca/
ghṛtaṃ ca siddhaṃ madhuśeṣayuktaṃ raktānilārtiṃ praṇudet pradehaḥ//
vāte sarakte saghṛtaṃ pradeho godhūmacūrṇaṃ chagalīpayaśca/
natotpalaṃ candanakuṣṭhayuktaṃ śirorujāyāṃ saghṛtaṃ pradehaḥ//
prapauṇḍarīkaṃ suradāru kuṣṭhaṃ yaṣṭyāhvamelā kamalotpale ca/
śirorujāyāṃ saghṛtaḥ pradeho lohairakāpadmakacorakaiśca//
rāsnā haridre naladaṃ śatāhve dve devadārūṇi sitopalā ca/
jīvantimūlaṃ saghṛtaṃ satailamālepanaṃ pārśvarujāsu koṣṇam//
śaivālapadmotpalavetratuṅgaprapauṇḍarīkāṇyamṛṇālalodhram/
priyaṅgukāleyakacandanāni nirvāpaṇaḥ syāt saghṛtaḥ pradehaḥ//
sitālatāvetasapadmakāni yaṣṭyāhvamaindrī nalināni dūrvā/
yavāsamūlaṃ kuśakāśayośca nirvāpaṇaḥ syājjalamerakā ca//
śaileyamelāguruṇī sakuṣṭhe caṇḍā nataṃ tvak suradāru rāsnā/
śītaṃ nihanyādacirāt pradeho viṣaṃ śirīṣastu sasindhuvāraḥ//
śirīṣalāmajjakahemalodhraistvagdoṣasaṃsvedaharaḥ pragharṣaḥ/
patrāmbulodhrābhayacandanāni śarīradaurgandhyaharaḥ pradehaḥ//
tatra ślokaḥ ---
ihātrijaḥ siddhatamānuvāca dvātriṃśataṃ siddhamaharṣipūjyaḥ/
cūrṇapradehān vividhāmayaghnānāragvadhīye jagato hitārtham//

ityagniveśakṛte tantre carakapratisaṃskṛte ślokasthāne āragvadhīyo nāma tṛtīyo+adhyāyaḥ//3//

1.4. caturtho+adhyāyaḥ/

athātaḥ ṣaḍvirecanaśatāśritīyamadhyāyaṃ [Note: `ṣaḍvirecanaśatīyaṃ' iti pā-] vyākhyāsyāmaḥ//

iti ha smāha bhagavānātreyaḥ//

iha khalu ṣaḍ virecanaśatāni bhavanti, ṣaḍ virecanāśrayāḥ, pañca kaṣāyayonayaḥ, pañcavidhaṃ kaṣāyakalpanaṃ, pañcāśanmahākaṣāyāḥ, pañca kaṣāyaśatāni, iti saṃgrahaḥ//

ṣaḍ virecanaśatāni, iti yaduktaṃ tadiha saṃgraheṇodāhṛtya vistareṇa kalpopaniṣadi vyākhyāsyāmaḥ; (&tatra) trayastriṃśadyogaśataṃ praṇītaṃ phaleṣu, ekonacatvāriṃśajjīmūtakeṣu yogāḥ, pañcacatvāriṃśadikṣvākuṣu, dhāmārgavaḥ ṣaṣṭidhā bhavati yogayuktaḥ, kuṭajastvaṣṭādaśadhā yogameti, kṛtavedhanaṃ ṣaṣṭidhā bhavati yogayuktaṃ, śyāmātrivṛdyogaśataṃ praṇītaṃ daśāpare cātra bhavanti yogāḥ, caturaṅgulo dvādaśadhā yogameti, lodhraṃ vidhau ṣoḍaśayogayuktaṃ, mahāvṛkṣo bhavati viṃśatiyogayuktaḥ, ekonacatvāriṃśat saptalāśaṅkhinyoryogāḥ, aṣṭacatvāriṃśaddantīdravantyoḥ, iti ṣaḍvirecanaśatāni//

ṣaḍ virecanāśrayā iti kṣīramūlatvakpatrapuṣpaphalānīti//

pañca kaṣāyayonaya iti madhurakaṣāyo+amlakaṣāyaḥ kaṭukaṣāyastiktakaṣāyaḥ kaṣāyakaṣāyaśceti tantre saṃjñā//

pañcavidhaṃ kaṣāyakalpanamiti tadyathā --- svarasaḥ, kalkaḥ, śṛtaḥ, śītaḥ, phāṇṭaḥ, kaṣāya iti/

(&yantraniṣpīḍitāddravyādrasaḥ svarasa ucyate/

yaḥ piṇḍo rasapiṣṭānāṃ sa kalkaḥ parikīrtitaḥ//

vahnau tu kvathitaṃ dravyaṃ śṛtamāhuścikitsakāḥ/

dravyādāpotthitāttoye pratapte niśi saṃsthitāt//

kaṣāyo yo+abhiniryāti sa śītaḥ samudāhṛtaḥ/

kṣiptvoṣṇatoye mṛditaṃ tat phāṇṭaṃ parikīrtitam//) teṣāṃ yathāpūrvaṃ balādhikyam; ataḥ kaṣāyakalpanā vyādhyāturabalāpekṣiṇī; na tvevaṃ khalu sarvāṇi sarvatropayogīni bhavanti//

`pañcāśanmahākaṣāyā' iti yaduktaṃ tadanuvyākhyāsyāmaḥ; tadyathā --- jīvanīyo bṛṃhaṇīyo lekhanīyo bhedanīyaḥ sandhānīyo dīpanīya iti ṣaṭkaḥ kaṣāyavargaḥ; balyo varṇyaḥ kaṇṭhyo hṛdya iti catuṣkaḥ kaṣāyavargaḥ; tṛptighno+arśoghraḥ kuṣṭhaghnaḥ kaṇḍūghnaḥ krimighno viṣaghna iti ṣaṭkaḥ kaṣāyavargaḥ; stanyajananaḥ stanyaśodhanaḥ śukrajananaḥ śukraśodhana iti catuṣkaḥ kaṣāyavargaḥ; snehopagaḥ svedopago vamanopago virecanopaga āsthāpanopago+anuvāsanopagaḥ śirovirecanopaga iti saptakaḥ kaṣāyavargaḥ; chardinigrahaṇastṛṣṇānigrahaṇo hikkānigrahaṇa iti trikaḥ kaṣāyavargaḥ; purīṣasaṃgrahaṇīyaḥ purīṣavirajanīyo mūtrasaṃgrahaṇīyo mūtravirajanīyo mūtravirecanīya iti pañcakaḥ kaṣāyavargaḥ; kāsaharaḥ śvāsaharaḥ śothaharo jvaraharaḥ śramahara iti pañcakaḥ kaṣāyavargaḥ; dāhapraśamanaḥ śītapraśamana udardapraśamano+aṅgamardapraśamanaḥ śūlapraśamana iti pañcakaḥ kaṣāyavargaḥ; śoṇitasthāpano vedanāsthāpanaḥ saṃjñāsthāpanaḥ prajāsthāpano vayaḥsthāpana iti pañcakaḥ kaṣāyavargaḥ; iti pañcāśanmahākaṣāyā mahatāṃ ca kaṣāyāṇāṃ lakṣaṇodāharaṇārthaṃ vyākhyātā bhavanti/

teṣāmekaikasmin mahākaṣāye daśa daśāvayavikān kaṣāyānanuvyākhyāsyāmaḥ; tānyeva pañca kaṣāyaśatāni bhavanti//

tadyathā --- jīvakarṣabhakau medā mahāmedā kākolī kṣīrakākolī &mudgaparṇīmāṣaparṇyau jīvantī madhukamiti daśemāni jīvanīyāni bhavanti(1), kṣīriṇī rājakṣavakāśvagandhākākolīkṣīrakākolīvāṭhyāyanībhadraudanībhāradvājīpayasyarṣyagandhā iti daśemāni bṛṃhaṇīyāni bhavanti(2), mustakuṣṭhaharidrādāruharidrāvacātiviṣākaṭurohiṇīcitrakacirabilvahaimavatya iti daśemāni lekhanīyāni bhavanti(3), &suvahārkorubukāgnimukhīcitrācitrakacirabilvaśaṅkhinīśakulādanīsvarṇakṣīriṇya iti daśemāni bhedanīyāni bhavanti(4), madhukamadhuparṇīpṛśniparṇyambaṣṭhakīsamaṅgāmocarasadhātakīlodhrapriyaṅgukaṭphalānīti daśemāni sandhānīyāni bhavanti(5), pippalīpippalīmūlacavyacitrakaśṛṅgaverāmlavetasamaricājamodābhallātakāsthihiṅguniryāsā iti daśemāni dīpanīyāni bhavanti(6), iti ṣaṭkaḥ kaṣāyavargaḥ//

aindryṛṣabhyatirasarṣyaproktāpayasyāśvagandhāsthirārohiṇībalātibalā iti daśemāni balyāni bhavanti(7), candanatuṅgapadmakośīramadhukamañjiṣṭhāsārivāpayasyāsitālatā iti daśemāni varṇyāni bhavanti(8), sārivekṣumūlamadhukapippalīdrākṣāvidārīkaiṭaryahaṃsapādībṛhatīkaṇṭakārikā iti daśemāni kaṇṭhyāni bhavanti(9), āmrāmrātakalikucakaramardavṛkṣāmlāmlavetasakuvalabadaradāḍimamātuluṅgānīti daśemāni hṛdyāni bhavanti(10), iti catuṣkaḥ kaṣāyavargaḥ//

gāgaracavyacitrakaviḍaṅgamūrvāguḍūcīvacāmustapippalīpaṭolānīti daśemāni tṛptighnāni bhavanti(11), kuṭajabilvacitrakanāgarātiviṣābhayādhanvayāsakadāruharidrāvacācavyānīti daśemānyarśoghnāni bhavanti(12), khadirābhayāmalakaharidrāruṣkarasaptaparṇāragvadhakaravīraviḍaṅgajātīpravālā iti daśemāni kuṣṭhaghnāni bhavanti(13), candananaladakṛtamālanaktamālanimbakuṭajasarṣapamadhukadāruharidrāmustānīti daśemāni kaṇḍūghnāni bhavanti(14), akṣīvamaricagaṇḍīrakebukaviḍaṅganirguṇḍīkiṇihīśvadaṃṣṭrāvṛṣaparṇikākhuparṇikā iti daśemāni krimighnāni bhavanti(15), haridrāmañjiṣṭhāsuvahāsūkṣmailāpālindīcandanakatakaśirīṣasindhuvāraśleṣmātakā iti daśemāni viṣaghnāni bhavanti(16), iti ṣaṭkaḥ kaṣāyavargaḥ//

vīraṇaśāliṣaṣṭikekṣuvālikādarbhakuśakāśagundretkaṭakattṛṇamūlānīti daśemāni stanyajananāni bhavanti(17), pāṭhāmahauṣadhasuradārumustamūrvāguḍūcīvatsakaphalakirātatiktakakaṭurohiṇīsārivā iti daśemāni stanyaśodhanāni bhavanti(18), jīvakarṣabhakakākolīkṣīrakākolīmudgaparṇīmāṣaparṇīmedāvṛddharuhājaṭilākuliṅgā iti daśemāni śukrajananāni bhavanti(19), kuṣṭhailavālukakaṭphalasamudraphenakadambaniryāsekṣukāṇḍekṣvikṣurakavasukośīrāṇīti daśemāni śukraśodhanāni bhavanti(20), iti catuṣkaḥ kaṣāyavargaḥ//

mṛdvīkāmadhukamadhuparṇīmedāvidārīkākolīkṣīrakālolījīvakajīvantīśālaparṇya iti daśemāni snehopagāni bhavanti(21), śobhāñjanakairaṇḍārkavṛścīrapunarnavāyavatilakulatthamāṣabadarāṇīti daśemāni svedopagāni bhavanti(22), madhumadhukakovidārakarbudāranīpavidulabimbīśaṇapuṣpīsadāpuṣpāpratyakpuṣpā iti daśemāni vamanopagāni bhavanti(23), drākṣākāśmaryaparūṣakābhayāmalakabibhītakakuvalabadarakarkandhupīlūnīti daśemāni virecanopagāni bhavanti(24), trivṛdbilvapippalīkuṣṭhasarṣapavacāvatsakaphalaśatapuṣpāmadhukamadanaphalānīti daśemānyāsthāpanopagāni bhavanti(25), rāsnāsuradārubilvamadanaśatapuṣpāvṛścīrapunarnavāśvadaṃṣṭrāgnimanthaśyonākā iti daśemānyanuvāsanopagāni bhavanti(26), jyotiṣmatīkṣavakamaricapippalīviḍaṅgśigrusarṣapāpāmārgataṇḍulaśvetāmahāśvetā iti daśemāni śirovirecanopagāni bhavanti(27), iti saptakaḥ kaṣāyavargaḥ//

jambvāmrapallavamātuluṅgāmlabadaradāḍimayavayaṣṭikośīramṛllājā iti daśemāni chardinigrahaṇāni bhavanti(28), nāgaradhanvayavāsakamustaparpaṭakacandanakirātatiktakaguḍūcīhrīveradhānyakapaṭolānīti daśemāni tṛṣṇānigrahaṇāni bhavanti(29), śaṭīpuṣkaramūlabadarabījakaṇṭakārikābṛhatīvṛkṣaruhābhayāpippalīdurālabhākulīraśṛṅgyā iti daśemāni hikkānigrahaṇāni bhavanti(30), iti trikaḥ kaṣāyavargaḥ//

priyaṅgvanantāmrāsthikaṭvaṅgalodhramocarasasamaṅgādhātakīpuṣpapadmāpadmakeśarāṇīti daśemāni purīṣasaṃgrahaṇīyāni bhavanti(31), jambuśallakītvakkacchurāmadhūkaśālmalīśrīveṣṭakabhṛṣṭamṛtpayasyotpalatilakaṇā iti daśemāni purīṣavirajanīyāni bhavanti(32), jambvāmraplakṣavaṭakapītanoḍumbarāśvatthabhallātakāśmantakasomavalkā iti daśemāni mūtrasaṃgrahaṇīyāni bhavanti(33), padmotpalanalinakumudasaugandhikapuṇḍarīkaśatapatramadhukapriyaṅgudhātakīpuṣpāṇīti daśemāni mūtravirajanīyāni bhavanti(34), vṛkṣādanīśvadaṃṣṭrāvasukavaśirapāṣāṇabhedadarbhakuśakāśagundretkaṭamūlānīti daśemāni mūtravirecanīyāni bhavanti(35), iti pañcakaḥ kaṣāyavargaḥ//

drākṣābhayāmalakapippalīdurālabhāśṛṅgīkaṇṭakārikāvṛścīrapunarnavātāmalakya iti daśemāni kāsaharāṇi bhavanti(36), śaṭīpuṣkaramūlāmlavetasailāhiṅgvagurusurasātāmalakījīvantīcaṇḍā iti daśemāni śvāsaharāṇi bhavanti(37), pāṭalāgnimanthaśyonākabilvakāśmaryakaṇṭakārikābṛhatīśālaparṇīpṛśniparṇīgokṣurakā iti daśemāni śvayathuharāṇi bhavanti(38), sārivāśarkarāpāṭhāmañjiṣṭhādrākṣāpīluparūṣakābhayāmalakabibhītakānīti daśemāni jvaraharāṇi bhavanti(39), drākṣākharjūrapriyālabadaradāḍimaphalguparuṣakekṣuyavaṣaṣṭikā iti daśemāni śramaharāṇi bhavanti(40), iti pañcakaḥ kaṣāyavargaḥ//

lājācandanakāśmaryaphalamadhūkaśarkarānīlotpalośīrasārivāguḍūcīhriberāṇīti daśemāni dāhapraśamanāni bhavanti(41), tagarāgurudhānyakaśṛṅgaverabhūtīkavacākaṇṭakāryagnimanthaśyonākapippalya iti daśemāni śītapraśamanāni bhavanti(42), tindukapriyālabadarakhadirakadarasaptaparṇāśvakarṇāśvakarṇārjunāsanārimedā iti daśemānyudardapraśamanāni bhavanti(43), vidārīgandhāpṛśniparṇībṛhatīkaṇṭakārikairaṇḍakākolīcandanośīrailāmadhukānīti daśemānyaṅgamardapraśamanāni bhavanti(44), pippalīpippalīmūlacavyacitrakaśṛṅgaveramaricājamodājagandhājājīgaṇḍīrāṇīti daśemāni śūlapraśamanāni bhavanti(45), iti pañcakaḥ kaṣāyavargaḥ//

madhumadhukarudhiramocarasamṛtkapālalodhragairikarpiyaṅguśarkarālājā iti daśemāni śoṇitasthāpanāni bhavanti(46), śālakaṭphalakadambapadmakatumbamocarasaśirīṣavañjulailavālukāśokā iti daśemāni vedanāsthāpanāni bhavanti(47), hiṅgukaiṭaryārimedāvacācorakavayasthāgolomījaṭilāpalaṅkaṣāśokarohiṇya iti daśemāni saṃjñāsthāpanāni bhavanti(48), aindrībrāhmīśatavīryasahasravīryā+amoghā+avyathāśivā+ariṣṭāvāṭyapuṣpīviṣvaksenakāntā iti daśemāni prajāsthāpanāni bhavanti(49), amṛtā+abhayādhātrīmuktāśvetājīvantyatirasāmaṇḍūkaparṇīsthirāpunarnavā iti daśemāni vayaḥsthāpanāni bhavanti(50), iti pañcakaḥ kaṣāyavargaḥ//

iti pañcakaṣāyaśatānyabhisamasya pañcāśanmahākaṣāyā mahatāṃ ca kaṣāyāṇāṃ lakṣaṇodāharaṇārthaṃ vyākhyātā bhavanti//

nahi vistarasya pramāṇamasti, na cāpyatisaṃkṣepo+alpabuddhīnāṃ sāmarthyāyopakalpate, tasmādanatisaṃkṣepeṇānativistareṇa copadiṣṭāḥ/

etāvanto hyalamalpabuddhīnāṃ vyavahārāya, buddhimatāṃ ca svālakṣaṇyānumānayuktikuśalānāmanuktārthajñānāyeti//

evaṃvādinaṃ bhagavantamātreyamagniveśa uvāca --- naitāni bhagavan! pañca kaṣāyaśatāni pūryante, tāni tāni hyevāṅgānyupaplavante& teṣu teṣu mahākaṣāyeṣvati//

tamuvāca bhagavānātreyaḥ --- naitadevaṃ buddhimatā draṣṭavyamagniveśa/

eko+api hyanekāṃ saṃñjāṃ labhate kāryāntarāṇi kurvan, tadyathā --- puruṣo bahūnāṃ karmaṇāṃ karaṇe samartho bhavati, sa yadyat karma karoti tasya tasya karmaṇaḥ kartṛ-karaṇa-kāryasaṃprayuktaṃ tattadgauṇaṃ nāmaviśeṣaṃ prāpnoti, tadvadauṣadhadravyamapi draṣṭavyam/

yadi caikameva kiṃciddravyamāsādayāmastathāguṇayuktaṃ yat sarvakarmaṇāṃ karaṇe samarthaṃ syāt, kastato+anyadicchedupadhārayitumupadeṣṭuṃ vā śiṣyebhya iti//

tatra ślokāḥ ---

yato yāvanti yairdravyairvirecanaśatāni ṣaṭ/
uktāni saṃgraheṇeha tathaivaiṣāṃ ṣaḍāśrayāḥ//
rasā lavaṇavarjyāśca kaṣāya iti saṃjñitāḥ/
&tasmāt pañcavidhā yoniḥ kaṣāyāṇāmudāhṛtā//
tathā kalpanamapyeṣāmuktaṃ pañcavidhaṃ punaḥ/
mahatāṃ ca kaṣāyāṇāṃ pañcāśat parikīrtitā//
pañca cāpi kaṣāyāṇāṃ śatānyuktāni bhāgaśaḥ/
lakṣaṇārthaṃ, pramāṇaṃ hi vistarasya na vidyate//
na cālamatisaṃkṣepaḥ sāmarthyāyopakalpate/
alpabuddherayaṃ tasmānnātisaṃkṣepavistaraḥ//
mandānāṃ vyavahārāya, budhānāṃ buddhivṛddhaye/
pañcāśatko hyayaṃ vargaḥ kaṣāyāṇāmudāhṛtaḥ//
teṣāṃ karmasu bāhyeṣu yogamābhyantareṣu ca/
saṃyogaṃ ca prayogaṃ ca yo veda sa bhiṣagvaraḥ//

ityagniveśakṛte tantre carakapratisaṃskṛte ślokasthāne ṣaḍvirecanaśatāśritīyo nāma caturtho+adhyāyaḥ//4//

iti bheṣajacatuṣkaḥ//1//

1.5. pañcamo+adhyāyaḥ/

athāto mātrāśitīyamadhyāyaṃ vyākhyāsyāmaḥ//

iti ha smāha bhagavānātreyaḥ//

mātrāśī syāt/

āhāramātrā punaragnibalāpekṣiṇī//

yāvaddhyasyāśanamaśitamanupahatya prakṛtiṃ yathākālaṃ jarāṃ gacchati tāvadasya mātrāpramāṇaṃ veditavyaṃ bhavati//

tatra śāliṣaṣṭikamudgalāvakapiñjalaiṇaśaśaśarabhaśambarādīnyāhāradravyāṇi prakṛtilaghūnyapi mātrāpekṣīṇi bhavanti/

tathā piṣṭekṣukṣīravikṛtilamāṣānūpaudakapiśitādīnyāhāradravyāṇi prakṛtigurūṇyapi mātrāmevāpekṣante//

na caivamukte dravye gurulāghavamakāraṇaṃ manyeta, laghūni hi dravyāṇi vāyvagniguṇabahulāni bhavanti; pṛthvīsomaguṇabahulānītarāṇi, tasmāt svaguṇādapi laghūnyagnisandhukṣaṇasvabhāvānyalpadoṣāṇi cocyante+api sauhityopayuktāni, gurūṇi punarnāgnisandhukṣaṇasvabhāvānyasāmānyāt, ataścātimātraṃ doṣavanti sauhityopayuktānyanyatra vyāyāmāgnibalāt; saiṣā bhavatyagnibalāpekṣiṇī mātrā//

na ca nāpekṣate dravyaṃ; dravyāpekṣayā ca tribhāgasauhityamardhasauhityaṃ vā gurūṇāmupadiśyate, laghūnāmapi ca nātisauhityamagneryuktyartham//

mātrāvaddhyaśanamaśitamanupahatya prakṛtiṃ balavarṇasukhāyuṣā yojayatyupayoktāramavaśyamiti//

bhavanti cātra ---

guru piṣṭamayaṃ tasmāttaṇḍulān pṛthukānapi/
na jātu bhuktavān khādenmātrāṃ khādedbubhukṣitaḥ//
vallūraṃ śuṣkaśākāni śālūkāni bisāni ca/
nābhyasedgauravānmāṃsaṃ kṛśaṃ naivopayojayet//
matsyān dadhi ca māṣāṃśca yavakāṃśca na śīlayet//
piṣṭikāñchālimudgāṃśca saindhavāmalake yavān/
āntarīkṣaṃ payaḥ sarpirjāṅgalaṃ madhu cābhyaset//
tacca nityaṃ prayuñjīta svāsthyaṃ yenānuvartate/
ajātānāṃ vikārāṇāmanutpattikaraṃ ca yat//
ata ūrdhvaṃ śarīrasya kāryamakṣyañjanādikam/
svasthavṛttimabhipretya guṇataḥ saṃpravakṣyate//
sauvīramañjanaṃ nityaṃ hitamakṣṇoḥ prayojayet/
pañcarātre+aṣṭarātre vā srāvaṇārthe rasāñjanam//
cakṣustejomayaṃ tasya viśeṣācchleṣmato bhayam/
tataḥ śleṣmaharaṃ karma hitaṃ dṛṣṭeḥ prasādanam//
divā tanna prayoktavyaṃ netrayostīkṣṇamañjanam/
virekadurbalā dṛṣṭirādityaṃ prāpya sīdati//
tasmāt srāvyaṃ niśāyāṃ tu dhruvamañjanamiṣyate/
yathā hi kanakādīnāṃ &malināṃ vividhātmanām//
dhautānāṃ nirmalā śuddhistailacelakacādibhiḥ/
evaṃ netreṣu martyānāmañjanāścyotanādibhiḥ//
dṛṣṭirnirākulā bhāti nirmale nabhasīnduvat/
hareṇukāṃ priyaṅguṃ ca pṛthvīkāṃ keśaraṃ nakham//
hrīveraṃ candanaṃ patraṃ tvagelośīrapadmakam/
dhyāmakaṃ madhukaṃ māṃsī guggulvaguruśarkaram//
nyagrodhodumbarāśvatthaplakṣalodhratvacaḥ śubhāḥ/
vanyaṃ sarjarasaṃ mustaṃ śaileyaṃ kamalotpale//
śrīveṣṭakaṃ śallakīṃ ca śukaṣarhamathāpi ca/
piṣṭvā limpecchareṣīkāṃ tāṃ vartiṃ yavasannibhām//
aṅguṣṭhasaṃmitāṃ kuryādaṣṭāṅgulasamāṃ bhiṣak/
śuṣkāṃ nigarbhāṃ tāṃ vartiṃ dhūmanetrārpitāṃ naraḥ//
snehāktāmagnisaṃpluṣṭāṃ pibet prāyogikīṃ sukhām/
vasāghṛtamadhūcchiṣṭairyuktiyuktairvarauṣadhaiḥ//
vartiṃ madhurakaiḥ kṛtvā snaihikīṃ dhūmamācaret/
śvetā jyotiṣmatī caiva haritālaṃ manaḥśilā//
gandhāścāgurupatrādyā dhūmaṃ mūrdhavirecane&/
gauravaṃ śirasaḥ śūlaṃ pīnasārdhāvabhedakau//
karṇākṣiśūlaṃ kāsaśca hikkāśvāsau galagrahaḥ/
dantadaurbalyamāsrāvaḥ śrotraghrāṇākṣidoṣajaḥ//
pūtirghrāṇāsyagandhaśca dantaśūlamarocakaḥ/
hanumanyāgrahaḥ kaṇḍūḥ krimayaḥ pāṇḍutā mukhe//
śleṣmapraseko vaisvaryaṃ galaśuṇḍyupajihvikā/
&khālityaṃ piñjaratvaṃ ca keśānāṃ patanaṃ tathā//
kṣavathuścātitandrā ca buddhermoho+atinidratā/
dhūmapānāt praśāmyanti balaṃ bhavati cādhikam//
śiroruhakapālānāmindriyāṇāṃ svarasya ca/
na ca vātakaphātmāno balino+apyūrdhvajatrujāḥ//
&dhūmavaktrakapānasya vyādhayaḥ syuḥ śirogatāḥ/
prayogapāne tasyāṣṭau kālāḥ saṃparikīrtitāḥ//
vātaśleṣmasamutkleśaḥ kāleṣveṣu hi lakṣyate/
snātvā bhuktvā samullikhya kṣutvā dantānnighṛṣya ca//
nāvanāñjananidrānte cātmavān dhūmapo bhavet/
tathā vātakaphātmāno na bhavantyūrdhvajatrujāḥ//
rogāstasya tu peyāḥ syurāpānāstristrayastrayaḥ/
paraṃ dvikālapāyī syādahnaḥ kāleṣu buddhimān//
prayoge, snaihike tvekaṃ, vairecyaṃ tricatuḥ pibet/
hṛtkaṇṭhendriyasaṃśuddhirlaghutvaṃ śirasaḥ śamaḥ//
yatheritānāṃ doṣāṇāṃ samyakpītasya lakṣaṇam/
bādhiryamāndhyamūkatvaṃ raktapittaṃ śirobhramam//
akāle cātipītaśca dhūmaḥ kuryādupadravān/
tatraeṣṭaṃ sarpiṣaḥ pānaṃ nāvanāñjanatarpaṇam//
snaihikaṃ dhūmaje doṣe vāyuḥ pittānigo yadi/
śītaṃ tu raktapitte syācchleṣmapitte virūkṣaṇam//
paraṃ tvataḥ pravakṣyāmi dhūmo yeṣāṃ vigarhitaḥ/
na viriktaḥ pibeddhūmaṃ na kṛte bastikarmaṇi//
na raktī na viṣeṇārto na &śocanna ca garbhiṇī/
na śrame na made nāme na pitte na prajāgare//
na mūrcchābhramatṛṣṇāsu na kṣīṇe nāpi ca kṣate/
na &madyadugdhe pītvā ca na snehaṃ na ca mākṣikam//
dhūmaṃ na bhuktvā &dadhnā ca na rūkṣaḥ kruddha eva ca/
na tāluśoṣe timire śirasyabhihite na ca//
na śaṅkhake na rohiṇyāṃ na mehe na madātyaye/
eṣu dhūmamakāleṣu mohāt pibati yo naraḥ//
rogāstasya pravardhante dāruṇā dhūmavibhramāt/
dhūmayogyaḥ pibeddoṣe śiroghrāṇākṣisaṃśraye//
ghrāṇenāsyena kaṇṭhasthe mukhena ghrāṇapo vamet/
āsyena dhūmakavalān piban ghrāṇena nodvamet//
pratilomaṃ gato &hyāśu dhūmo hiṃsyāddhi cakṣuṣī/
ṛjvaṅgacakṣustaccetāḥ sūpaviṣṭastriparyayam//
pibecchidraṃ pidhāyaikaṃ nāsayā dhūmamātmavān/
caturviṃśatikaṃ netraṃ &svāṅgulībhirvirecane//
dvātriṃśadaṅgulaṃ snehe prayoge+adhyardhamiṣyate/
&ṛju trikoṣāphalitaṃ kolāsthyagrapramāṇitam//
bastinetrasamadravyaṃ dhūmanetraṃ praśasyate/
dūrādvinirgataḥ parvacchinno nāḍītanūkṛtaḥ//
nendriyaṃ bādhate dhūmo mātrākālaniṣevitaḥ/
yadā coraśca kaṇṭhaśca śiraśca laghutāṃ vrajet//
kaphaśca tanutāṃ prāptaḥ supītaṃ dhūmamādiśet/
aviśuddhaḥ svaro yasya kaṇṭhaśca sakapho bhavet//
stimito mastakaścaivamapītaṃ dhūmamādiśet/
tālu mūrdhā ca kaṇṭhaśca śuṣyate paritapyate//
tṛṣyate muhyate jantū raktaṃ ca sravate+adhikam/
śiraśca bhramate+atyarthaṃ mūrcchā cāsyopajāyate//
indriyāṇyupatapyante dhūme+atyarthaṃ niṣevite/
&varṣe varṣe+aṇutailaṃ ca kāleṣu triṣu nā caret//
prāvṛṭśaradvasanteṣu gatameghe nabhastale/
nasyakarma yathākālaṃ yo yathoktaṃ niṣevate//
na tasya cakṣurna ghrāṇaṃ na śrotramupahanyate/
na syuḥ śvetā na kapilāḥ keśāḥ śmaśrūṇi vā punaḥ//
na ca keśāḥ &pramucyante vardhante ca viśeṣataḥ/
manyāstambhaḥ śiraḥśūlamarditaṃ hanusaṃgrahaḥ//
pīnasārdhāvabhedau ca śiraḥkampaśca śāmyati/
sirāḥ śiraḥkapālānāṃ sandhayaḥ snāyukaṇḍarāḥ//
nāvanaprīṇitāścāsya labhante+abhyadhikaṃ balam/
mukhaṃ prasannopacitaṃ svaraḥ snigdhaḥ sthiro mahān//
sarvendriyāṇāṃ vaimalyaṃ balaṃ bhavati cādhikam/
na cāsya rogāḥ sahasā prabhavantyūrdhvajatrujāḥ//
jīryataścottamāṅgeṣu& jarā na labhate balam/
candanāguruṇī patraṃ dārvītvaṅmadhukaṃ balām//
prapauṇḍarīkaṃ sūkṣmailāṃ viḍaṅgaṃ bilvamutpalam/
hrīberamabhayaṃ vanyaṃ tvaṅmustaṃ sārivāṃ sthirām//
jīvantīṃ pṛśniparṇīṃ ca suradāru& śatāvarīm/
hareṇuṃ bṛhatīṃ vyādhrīṃ surabhīṃ padmakeśaram//
vipācayecchataguṇe māhendre vimale+ambhasi/
tailāddaśaguṇaṃ śeṣaṃ kaṣāyamavatārayet//
tena tailaṃ kaṣāyeṇa daśakṛtvo vipācayet/
athāsya daśame pāke &samāṃśaṃ chāgalaṃ payaḥ//
dadyādeṣo+aṇutailasya nāvanīyasya saṃvidhiḥ/
asya mātrāṃ prayuñjīta tailasyārdhapalonmitām//
snigdhasvinnottamāṅgasya picunā nāvanaistribhiḥ/
tryahāttryahācca saptāhametata karma samācaret//
nivātoṣṇasamācārī& hitāśī niyatendriyaḥ/
tailametattridoṣaghnamindriyāṇāṃ balapradam//
prayuñjāno yathākālaṃ yathoktānaśnute guṇān/
āpothitāgraṃ dvau kālau kaṣāyakaṭutiktakam//
bhakṣayeddantapavanaṃ dantamāṃsānyabādhayan/
nihanti gandhaṃ vairasyaṃ jihvādantāsyajaṃ malam//
niṣkṛṣya rucimādhatte sadyo dantaviśodhanam/
karañjakaravīrārkamālatīkakubhāsanāḥ//
śasyante dantapavane ye cāpyevaṃvidhā drumāḥ/
suvarṇarūpyatāmrāṇi trapurītimayāni ca//
jihvānirlekhanāni syuratīkṣṇānyanṛjūni ca/
jihvāmūlagataṃ yacca malamucchvāsarodhi ca//
daurgandhyaṃ bhajate tena tasmājjihvāṃ vinirlikhet/
dhāryāṇyāsyena vaiśadyarucisaugandhyamicchatā//
jātīkaṭukapūgānāṃ lavaṅgasya phalāni ca/
kakkolasya phalaṃ patraṃ tāmbūlasya śubhaṃ tathā/
tathā karpūraniryāsaḥ sūkṣmailāyāḥ phalāni ca//
hanvorbalaṃ svarabalaṃ vadanopacayaḥ paraḥ/
syāt paraṃ ca rasajñānamanne ca ruciruttamā//
na cāsya kaṇṭhaśoṣaḥ syānnauṣṭhayoḥ sphuṭanādbhayam/
na ca dantāḥ kṣayaṃ yānti dṛḍhamūlā bhavanti ca//
na śūlyante na cāmlena hṛṣyante bhakṣayanti ca/
parānapi kharān bhakṣyāṃstailagaṇḍūṣadhāraṇāt//
nityaṃ snehārdraśirasaḥ śiraḥśūlaṃ na jāyate/
na khālityaṃ na pālityaṃ na keśāḥ prapatanti ca//
balaṃ śiraḥkapālānāṃ viśeṣeṇābhivardhate/
dṛḍhamūlāśca dīrghāśca kṛṣṇāḥ keśā bhavanti ca//
indriyāṇi prasīdanti sutvagbhavati cānanam&/
nidrālābhaḥ sukhaṃ ca syānmūrdhni tailaniṣevaṇāt//
na karṇarogā vātotthā na manyāhanusaṃgrahaḥ/
noccaiḥ śrutirna vādhiryaṃ syānnityaṃ karṇatarpaṇāt//
snehābhyaṅgādyathā kumbhaścarma snehavimardanāt/
bhavatyupāṅgādakṣaśca dṛḍhaḥ kleśasaho yathā//
tathā śarīramabhyaṅgāddṛḍhaṃ sutvak ca jāyate/
praśāntamārutābādhaṃ kleśavyāyāmasaṃsaham//
sparśane+abhyadhiko vāyuḥ sparśanaṃ ca tvagāśritam/
tvacyaśca &paramabhyaṅgastasmāttaṃ śīlayennaraḥ//
na cābhighātābhihataṃ gātramabhyaṅgasevinaḥ/
vikāraṃ bhajate+atyarthaṃ balakarmaṇi vā kvacit//
susparśopacitāṅgaśca balavān priyadarśanaḥ/
bhavatyaṅganityatvānnaro+alpajara eva ca//
kharatvaṃ stabdhatā& raukṣyaṃ śramaḥ suptiśca pādayoḥ/
sadya evopaśāmyanti pādābhyaṅgaviṣevaṇāt//
jāyate saukumāryaṃ ca balaṃ sthairyaṃ ca pādayoḥ/
dṛṣṭiḥ prasādaṃ labhate mārutaścopaśāmyati//
na ca &syādgṛdhrasīvātaḥ pādayoḥ sphuṭanaṃ na ca/
na sirāsnāyusaṃkocaḥ pādābhyaṅgena pādayoḥ//
daurgandhyaṃ gauravaṃ tandrāṃ kaṇḍūṃ malamarocakam/
svedabībhatsatāṃ hanti śarīraparimārjanam//
pavitraṃ vṛṣyamāyuṣyaṃ &śramasvedamalāpaham/
śarīrabalasandhānaṃ snānamojaskaraṃ param//
kāmyaṃ yaśasyamāyuṣyamalakṣmīghnaṃ praharṣaṇam/
śrīmat pāriṣadaṃ śastaṃ nirmalāmbaradhāraṇam//
vṛṣyaṃ saugandhyamāyuṣayaṃ kāmyaṃ puṣṭibalapradam/
saumanasyamalakṣmīghraṃ gandhamālyaniṣevaṇam//
dhanyaṃ maṅgalyamāyuṣyaṃ śrīmadvyasanasūdanam/
harṣaṇaṃ kāmyamojasyaṃ ratnābharaṇadhāraṇam//
medhyaṃ pavitramāyuṣyamalakṣmīkalināśanam/
pādayormalamārgāṇāṃ śaucādhānamabhīkṣṇaśaḥ//
pauṣṭikaṃ vṛṣyamāyuṣyaṃ śuci rūpavirājanam/
keśaśmaśrunakhādīnāṃ kalpanaṃ saṃprasādhanam//
cakṣuṣyaṃ spraśanahitaṃ pādayorvyasanāpaham/
balyaṃ parākramasukhaṃ vṛṣyaṃ pādatradhāraṇam//
&īteḥ praśamanaṃ balyaṃ guptyāvaraṇaśaṅkaram/
gharmānilarajombughnaṃ chatradhāraṇamucyate//
skhalataḥ saṃpratiṣṭhānaṃ śatrūṇāṃ ca niṣūdanam/
avaṣṭambhanamāyuṣyaṃ bhayaghnaṃ daṇḍadhāraṇam//
nagarī nagarasyeva rathasyeva rathī yathā/
svaśarīrasya medhāvī kṛtyeṣvavahito bhavet//
bhavati cātra --- vṛttyupāyānniṣeveta ye syurdharmāvirodhinaḥ/
śamamadhyayanaṃ caiva sukhamevaṃ samaśnute//
tatra ślokāḥ --- mātrā dravyāṇi mātrāṃ saṃśritya gurulāghavam/
dravyāṇāṃ garhito+abhyāso yeṣāṃ, yeṣāṃ ca śasyate//
añjanaṃ dhūmavartiśca trividhā vartikalpanā/
dhūmapānaguṇāḥ kālāḥ pānamānaṃ ca yasya yat//
vyāpatticihnaṃ bhaiṣajyaṃ dhūmo yeṣāṃ vigarhitaḥ/
peyo yathā yanmayaṃ ca netraṃ yasya ca yadvidham//
nasyakarmaguṇā nastaḥkāryaṃ yacca yathā yadā/
bhakṣayeddantapavanaṃ yathā yadyaṅguṇaṃ ca yat//
yadarthaṃ yāni cāsyena dhāryāṇi kavalagrahe/
tailasya ye guṇā &diṣṭāḥ śirastailaguṇāśca ye//
karṇataile tathā+abhyaṅge pādābhyaṅge+aṅgamārjane/
snāne vāsasi śuddhe ca saugandhye ratnadhāraṇe//
śauce saṃharaṇe lomnāṃ pādatracchatradhāraṇe/
guṇā mātrāśitīye+asmiṃstathoktā& daṇḍadhāraṇe//

ityagniveśakṛte tantre carakapratisaṃskṛte ślokasthāne mātrāśitīyo nāma pañcamo+adhyāyaḥ samāptaḥ//5//

1.6. ṣaṣṭho+adhyāyaḥ /

athātastasyāśitīyamadhyāyaṃ vyākhyāsyāmaḥ //

iti ha smāha bhagavānātreyaḥ //

tasyāśitādyādāhārādbalaṃ varṇaśca vardhate /

yasyartusātmyaṃ viditaṃ ceṣṭāhāravyapāśrayam //

iha khalu saṃvatsaraṃ ṣaḍaṅgamṛtuvibhāgena vidyāt /

tatrādityasyodagayanamādānaṃ ca trīnṛtūñchiśirādīn grīṣmāntān vyavasyet varṣādīn punarhemantāntān dakṣiṇāyanaṃ visargaṃ ca //

visarge punarvāyavo nātirūkṣāḥ pravānti itare punarādāne somaścāvyāhatabalaḥ śiśirābhirbhābhirāpūrayañjagadāpyāyayati śaśvat ato visargaḥ saumyaḥ /

ādānaṃ punarāgneyaṃ tāvetāvarkavāyū somaśca kālasvabhāvamārgaparigṛhītāḥ kālarturasadoṣadehabalanirvṛttipratyayabhūtāḥ samupadiśyante //

tatra ravirbhābhirādadāno jagataḥ snehaṃ vāyavastīvrarūkṣāścopaśoṣayantaḥ śiśiravasantagrīṣmeṣu yathākramaṃ raukṣyamutpādayanto rūkṣān rasāṃstiktakaṣāyakaṭukāṃścābhivardhayanto nṛṇāṃ daurbalyamāvahanti //

varṣāśaraddhemanteṣu tu dakṣiṇābhimukjhe+arke kālamārgameghavātavarṣābhihatapratāpe śaśini cāvyāhatabale māhendrasalilapraśāntasantāpe jagati arūkṣā rasāḥ pravardhante+amlalavaṇamadhurā yathākramaṃ tatra balamupacīyate nṛṇāmiti //

bhavati cātra

ādāvante ca daurbalyaṃ visargādānayornṛṇām /
madhye madhyabalaṃ tvante śreṣṭhamagre ca nirdiśet //
śīte śītānilasparśasaṃrūddho balināṃ balī /
paktā bhavati hemante mātrādravyagurukṣamaḥ //
sa yadā nendhanaṃ yuktaṃ labhate dehajaṃ tadā /
rasaṃ hinastyato vāyuḥ śītaḥ śīte prakupyati //
tasmāttuṣārasamaye snigdhāmlalavaṇān rasān /
audakānūpamāṃsānāṃ medyānāmupayojayet //
bileśayānāṃ māṃsāni prasahānāṃ bhṛtāni ca /
bhakṣayenmadirāṃ śīdhuṃ madhu cānupibennaraḥ //
gorasānikṣuvikṛtīrvasāṃ tailaṃ navaudanam /
hemante+abhyasyatastoyamuṣṇaṃ cāyurna hīyate //
abhyaṅgotsādanaṃ mūrdhni tailaṃ jentākamātapam /
bhajedbhūmigṛhaṃ coṣṇamuṣṇaṃ garbhagṛhaṃ tathā //
śīteṣu saṃvṛtaṃ sevyaṃ yānaṃ śayanamāsanam /
prāvārājinakauṣeyapraveṇīkuthakāstṛtam //
gurūṣṇavāsā digdhāṅgo guruṇā+aguruṇā sadā /
śayane pramadāṃ pīnāṃ viśālopacitastanīm //
āliṅgyāgurudigdhāṅgīṃ supyāt samadamanmathaḥ /
prakāmaṃ ca niṣeveta maithunaṃ śiśirāgame //
varjayedannapānāni vātalāni laghūni ca /
pravātaṃ pramitāhāramudamanthaṃ himāgame //
hemantaśiśirau tulyau śiśire+alpaṃ viśeṣaṇam /
raukṣyamādānajaṃ śītaṃ meghamārutavarṣajam //
tasmāddhaimantikaḥ sarvaḥ śiśire vidhiriṣyate /
nivātamuṣṇaṃ tvadhikaṃ śiśire gṛhamāśrayet //
kaṭutiktakaṣāyāṇi vātalāni laghūni ca /
varajayedannapānāni śiśire śītalāni ca //
vasante nicitaḥ śleṣmā dinakṛdbhābhirīritaḥ /
kāyāgniṃ bādhate rogāṃstataḥ prakurute bahūn //
tasmādvasante karmāṇi vamanādīni kāreyet /
gurvamlasnigdhamadhuraṃ divāsvapnaṃ ca varjayet //
vyāyāmodvartanaṃ dhūmaṃ kavalagrahamañjanam /
sukhāmbunā śaucāvidhiṃ śīlayet kusumāgame //
candanāgurudigdhāṅgo yavagodhūmabhojanaḥ /
śārabhaṃ śāśamaiṇeyaṃ māṃsaṃ lāvakapiñjalam //
bhakṣayennirgadaṃ sīdhuṃ pibenmādhvīkameva vā /
vasante+anubhavet strīṇāṃ kānanānāṃ ca yauvanam //
mayūkhairjagataḥ snehaṃ grīṣme pepīyate raviḥ /
svādu śītaṃ dravaṃ snigdhamannapānaṃ tadā hitam //
śītaṃ saśarkaraṃ manthaṃ jāṅgalānmṛgapakṣiṇaḥ /
ghṛtaṃ payaḥ saśālyannaṃ bhajan grīṣme na sīdati //
madyamalpaṃ na vā peyamathavā subahūdakam /
lavaṇāmlakatūṣṇāni vyāyāmaṃ ca vivarjayet //
divā śītagṛhe nidrāṃ niśi candrāṃśuśītalaiḥ /
sevyamāno bhajedāsyāṃ muktāmaṇivibhūṣitaḥ //
vyajanaiḥ pāṇisaṃsparśaiścandanodakaśītalaiḥ /
sevyamāno bhajedāsyāṃ muktāmaṇivibhūṣitaḥ //
kānanāni ca śītāni jalāni kusumāni ca /
grīṣmakāle niṣeveta maithunādvirato naraḥ //
ādānadurbale dehe paktā bhavati durbalaḥ /
sa varṣāsvanilādīnāṃ dūṣaṇairbādhyate punaḥ //
bhūbāṣpānmeghanisyandāt pākādamlājjalasya ca /
varṣāsvagnibale kṣīṇe kupyanti pavanādayaḥ //
tasmāt sādhāraṇaḥ sarsvo vidhirvarṣāsu śasyate /
udamanthaṃ divāsvapnamavaśyāyaṃ nadījalam //
vyāyāmamātapaṃ caiva vyavāyaṃ cātra varjayet /
pānabhojanasaṃskārān prāyaḥ kṣaudrānvitān bhajet //
vyaktāmlalavaṇasnehaṃ vātārṣākule+ahani /
viśeṣaśīte bhoktavyaṃ varṣāsvanalaśāntaye //
agnisaṃrakṣaṇavatā yavagodhūmaśālayaḥ /
purāṇā jāṅgalaiarmāṃsairbhojyā yūṣaiśca saṃskṛtaiḥ //
pibet kṣaudrānvitaṃ cālpaṃ mādhvīkāriṣṭamambu vā /
māhendraṃ taptaśītaṃ vā kaupaṃ sārasameva vā //
pragharṣodvartanasnānagandhamālyaparo bhavet /
laguśuddhāmbaraḥ sthānaṃ bhajedakledi vārṣikam //
varṣāśītocitāṅgānāṃ sahasaivārkaraśmibhiḥ /
taptānāmācitaṃ pittaṃ prāyaḥ śaradi kupyati //
tatrānnapānaṃ madhuraṃ laghu śītaṃ satiktakam /
pittapraśamanaṃ sevyaṃ mātrayā suprakāṅkṣitaiḥ //
lāvān kapiñjalāneṇānurabhrāñchrabhān śaśān /
śālīn sayavagodhūmān sevyānāhurdhanātyaye //
tiktasya sarpiṣaḥ pānaṃ vireko raktamokṣaṇam /
dhārādharātyaye kāryamātapasya ca varjanam //
vasāṃ tailamavaśyāyamaudakānūpamāmiṣam /
kṣāraṃ dadhi divāsvapnaṃ prāgvātaṃ cātra varjayet //
divā sūryāṃśusaṃtaptaṃ niśi candrāṃśuśītalam /
kālena pakvaṃ nirdoṣamagastyenāviṣīkṛtam //
haṃsodakamiti khyātaṃ śāradaṃ vimalaṃ śuci /
snānapānāvagāheṣu hitamambu yathā+amṛtam //
śāradāni ca mālyāni vāsāṃsi vimalāni ca /
śaratkāle praśasyante pradoṣe cenduraśmayaḥ //
ityuktamṛtusātmyaṃ yacceṣṭāhāravyapāśrayam /
upaśete yadaucityādokaḥsātmyaṃ&{ṅ.okasātmyaṃ} taducyate //
deśānāmāmayānāṃ ca viparītaguṇaṃ guṇaiḥ /
sātmyamicchanti sātmyajñāśeceṣṭitaṃ cādyameva ca //
tatra ślokaḥ
ṛtāvṛtau nṛbhiḥ sevyamasevyaṃ yacca kiṃcana /
tasyāśitīye nirdiṣṭaṃ hetumat sātmyameva ca //

ityagniveśakṛte tantre carakapratisaṃskṛte ślokasthāne tasyāśitīyo nāma ṣaṣṭho+adhyāyaḥ //6//

1.7. saptamo+adhyāyaḥ /

athāto navegāndhāraṇīyamadhyāyaṃ vyākhyāsyāmaḥ //

iti ha smāha bhagavānātreyaḥ //

na vegān dhārayeddhīmāñjātān mūtrapurīṣayoḥ /
na retaso na vātasya na chardyāḥ kṣavathorna ca //
nodgārasya na jṛmbhāyā nā vegān kṣutpipāsayoḥ /
nā bāṣpasya na nidrāyā niḥśvāsasya śrameṇa ca //
etān dhārayato jātān vegān rogā bhavanti ye /
pṛthakpṛthakcikitsārthaṃ tānme nigadataḥ śṛṇu //
bastimehanayoḥ śūlaṃ mūtrakṛcchraṃ śirorujā /
vināmo vaṃkṣaṇānāhaḥ syālliṅgaṃ mūtranigrahe //
svedāvagāhanābhyaṅgān sarpiṣaścāvapīḍakam /
mūtre pratihate kuryāttrividhaṃ bastikarma ca //
pakvāśayaśiraḥśūlaṃ vātavarco+apravartanam /
piṇḍikodveṣṭanādhmānaṃ purīṣe syādvidhārite //
svedābhyaṅgāvagāhāśca vartayo bastikarma ca /
hitaṃ pratihate varcasyannapānaṃ pramāthi ca //
meḍhre vṛṣaṇayoḥ śūlamaṅgamardo hṛdi vyathā /
bhavet pratihate śukre vibaddhaṃ mūtrameva ca //
tatrābhyaṅgo+avagāhaśca madirā caraṇāyudhāḥ /
śāliḥ payo nirūhaśca śastaṃ maithunameva ca //
saṅgo viṇmūtravātānāmādhmānaṃ vedanā klamaḥ /
jaṭhare vātājāścānye rogāḥ syurvātanigrahāt //
snehasvedavidhistatra vartayo bhojanāni ca /
pānāni bastayaścaiva śastaṃ vātānulomanam //
kaṇḍūkoṭhārucivyaṅgaśothapāṇḍvāmayajvarāḥ /
kuṣṭhahṛllāsavīsarpāśchardinigrahajā gadāḥ //
bhuktvā pracchardanaṃ dhūmo laṅghanaṃ raktamokṣaṇam /
rūkṣānnapānaṃ vyāyāmo virekaścātra śasyate //
manyāstambhaḥ śiraḥśūlamarditārdhāvabhedakau /
indriyāṇāṃ ca daurbalyaṃ kṣavathoḥ syādvidhāraṇāt //
tatrordhvajatruke+abhyaṅgaḥ svedo dhūmaḥ sanāvanaḥ /
hitaṃ vātaghnamādhyaṃ ca ghṛtaṃ cauttarabhaktikam //
hikkā śvāso+aruciḥ kampo vibandho hṛdayorasoḥ /
udgāranigrahāttatra hikkāyāstulyamauṣadham //
vināmākṣepasaṃkocāḥ suptiḥ kampaḥ pravepanam /
jṛmbhāyā nigrahāttatra sarvaṃ vātaghnamauṣadham //
kārśaydaurbalyavaivarṇyamaṅamardo+arucirbhramaḥ /
kṣudveganigrahāttatra snigdhoṣṇaṃ laghu bhojanam //
kaṇṭhāsyaśoṣo bādhiryaṃ śramaḥ sādo hṛdi vyathā /
pipāsānigrahāttatra śītaṃ tarpaṇamiṣyate //
pratiśyāyo+akṣirogaśca hṛdrogaścārucirbhramaḥ /
baṣpanigrahaṇāttatra svapno madyaṃ priyāḥ kathāḥ //
jṛmbhā+aṅgamardastandrā ca śirorogo+akṣigauravam /
nidrāvidhāraṇāttatra svapnaḥ saṃvāhanāni ca //
gulmahṛrogasaṃmohāḥ śramaniḥśvāsadhāraṇāt /
jāyante tatra viśrāmo vātadhnyaśca kriyā hitāḥ //
vegānigrahajā rogā ya ete parikīrtitāḥ /
icchaṃsteṣāmanutpattiṃ vegānetānna dhārayet //
imāṃstu dhārayedvegān hitārthī pretya ceha ca /
sāhasānāmaścastānāṃ manovākkāyakarmaṇām //
lobhaśokabhayakrodhamānavegān vidhārayet /
nairlajjyerṣyātirāgāṇāmabhidhyāyāśca buddhimān //
puruṣāssyātimātrasya sūcakasyānṛtasya ca /
vākyasyākālayuktasya dhārayedvegamutthitam //
dehapravṛttiryā kācidvidyate parapīḍayā /
strībhogasteyahiṃsādyā tasyāvegānvidhārayet //
puṇyaśabdo vipāpatvānmanovākkāyakarmaṇām /
dharmārthakāmān puruṣaḥ sukhī bhuṅkte cinoti ca //
śarīraceṣṭā yā ceṣṭā sthairyārthā balavardhinī /
dehavyāyāmasaṃkhyātā mātrayā tāṃ samācaret //
lāghavaṃ karmasāmarthyaṃ sthairyaṃ duḥkhasahiṣṇutā /
doṣakṣayo+agnivṛddhiśca vyāyāmādupajāyate //
śramaḥ klamaḥ kṣayastṛṣṇā raktapittaṃ pratāmakaḥ /
ativyāyāmataḥ kāso jvaraśchardiśca jāyate //
(svedāgamaḥ śvāsavṛddhirgātrāṇāṃ lāghavaṃ tathā /)
(hṛdayādyuparodhaśca iti vyāyāmalakṣaṇam //)
vyāyāmahāsyabhāṣyādhvagrāmyadharmaprajāgarān /
nocitānapi seveta buddhimānatimātrayā //
etānevaṃvidhāṃścānyān yo+atimātraṃ niṣevate /
gajaṃ siṃha ivākarṣan sahasā sa vinaśyate //
(ativyavāyabhārādhvakarmabhiścātikarśitāḥ /
(krodhaśokabhayāyāsaiḥ krāntā ye cāpi mānavāḥ //)
(bālavṛddhapravātāśca ye coccairbahubhāṣakāḥ /)
(te varjayeyurvyāyāmaṃ kṣudhitāstṛṣitāśca ye //)
ucitādahitāddhīmān kramaśo viramennaraḥ /
hitaṃ krameṇa seveta kramaścātropadiśyate //
prakṣepāpacaye tābhyāṃ kramaḥ pādāṃśiko bhavet /
ekāntaraṃ tataścordhvaṃ dvyantaraṃ tryantaraṃ tathā //
krameṇāpacitā doṣāḥ krameṇopacitā guṇāḥ /
santo yāntyapunarbhāvamaprakampyā bhavanti ca //
samapittānilakaphāḥ kecidgarbhādi mānavāḥ /
dṛśyante vātalāḥ kecitpittalāḥ śleṣmalāstathā //
teṣāmanāturāḥ pūrve vātalādyāḥ sadāturāḥ /
doṣānuśayitā hyeṣāṃ dehaprakṛtirucyate //
viparītaguṇasteṣāṃ svasthavṛttervidhirhitaḥ /
samasarvarasaṃ sātmyaṃ samadhāto praśasyate //
dve adhaḥ sapta śirasi khāni svedamukhāni ca /
malāyanāni bādhyante duṣṭairmātrādhikairmalaiḥ //
malabuddhiṃ gurutayā lāghavānmalasaṃkṣayam /
malāyanānāṃ budhyeta saṅgotsargādatīva ca //
tān doṣaliṅgairādiśya vyādhīn sādhyānupācaret /
vyādhihetupratidvandhvairmātrākālau tvicārayan //
viṣamasvasthavṛttānāmete rogāstathā+apare /
jāyante+anāturāstasmāt svasthavṛttaparo bhavet //
mādhvaprathame māsi nabhasyaprathame punaḥ /
sahasyaprathame caiva hārayeddoṣasaṃcayam //
snigdhasvinnaśarīrāṇāmūrdhvaṃ cādhaśca nityaśaḥ /
bastikarma tataḥ kuryānnasyakarma ca buddhimān //
yathākramaṃ yathāyogyamata ūrdhvaṃ prayojayet /
rasāyanāni siddhāni vṛṣyayogāsṃśca kālavit //
rogāstathā na jāyante prakṛtistheṣu dhātuṣu /
dhātavaścābhivardhante jarā māndyamupaiti ca //
vidhireṣa vikārāṇāmanutpatau nidarśitaḥ /
nijānāmitareṣāṃ tu pṛthagevopadekṣyate //
ye bhūtaviṣavāyvagnisaṃprahārādisaṃbhavāḥ /
nṛṇāmāgantavo rogāḥ prajñā teṣvaparādhyati //
īrṣyāśokabhayakrodhamānadveṣādayaśca ye /
manovikārāste+apyuktāḥ sarve prajñāparādhajāḥ //
tyāgaḥ prajñāparādhānāmindriyopaśamaḥ smṛtiḥ /
deśakālātmavijñānaṃ sadvṛttasyānuvartanam //
āgantūnāmanutpattāveṣa mārgo nidarśitaḥ /
prājñaḥ prāgeva tat kruyāddhitaṃ vidyādyadātmanaḥ //
āptopadeśaprajñānaṃ pratipattiśca kāraṇam /
vikārāṇāmanutpattāvutpannānāṃ ca śāntaye //
pāpavṛttavacaḥsattvāḥ sūcakāḥ kalahapriyāḥ /
marmopahāsino lubdhāḥ paravṛddhidviṣaḥ śaṭhāḥ //
parāpavādaratayaścapalā ripusevinaḥ /
nirghṛṇāstyaktadharmāṇaḥ parivarjyā narādhamāḥ //
buddhividyāvayaḥśīladhairyasmṛtisamādhibhiḥ /
vṛddhopasevino vṛddhāḥ svabhāvajñā gatavyathāḥ //
sumukhāḥ sarvabhūtānāṃ praśāntāḥ śaṃsitavratāḥ /
sevyāḥ sanmārgavaktāraḥ puṇyaśravaṇadarśanāḥ //
āhārācāraceṣṭāsu sukhārthī pretya ceha ca /
paraṃ prayatnamātiṣṭhedbuddhimān hitasevane //
na naktaṃ dadhi bhuñjīta na cāpyaghṛtaśarkaram /
nāmudgayūṣaṃ nākṣaudraṃ noṣṇaṃ nāmalakairvinā //
jvarāsṛkpittavīsarpakuṣṭhapāṇḍvāmayabhramān /
prāpnuyātkāmalāṃ cogrāṃ vidhiṃ hitvā dadhipriyaḥ //
tatra ślokāḥ
vegā vegasamutthāśca rogāsteṣāṃ ca bheṣajam /
yeṣāṃ vegā vidhāryāśca yadarthaṃ yaddhitāhitam //
ucite cāhite varjye sevye cānucite kramaḥ /
yathāprakṛti cāhāro malāyanagadauṣadham //
bhaviṣyatāmanutpattau rogāṇāmauṣadhaṃ ca yat /
varjyāḥ sevyāśca puruṣā dhīmatā+ātmasukhārthinā //
vidhinā dadhi sevyaṃ ca yena yasmāttadatrijaḥ /
navegāndhāraṇe+adhyāye sarvamevāvadanmuniḥ //

ityagniveśakṛte tantre carakapratisaṃskṛte ślokasthāne navegāndhāraṇīyo nāma saptamo+adhyāyāḥ //

1.8. aṣṭamo+adhyāyaḥ /

athāta indriyopakramaṇīyamadhyāyaṃ vyākhyāsyāmaḥ //

iti ha smāha bhagavānātreyaḥ //

iha khalu pañcendriyāṇi pañcendriyadravyāṇi pañcendriyādhiṣṭhānāni pañcendriyārthāḥ pañcendriyabuddhayo bhavanti ityuktamindriyādhikāre //

atīndriyaṃ punarmanaḥ sattvasaṃjñakaḥ cetaḥ ityāhureke tadarthātmasaṃpadāyattaceṣṭaṃ ceṣṭāpratyayabhūtamindriyāṇām //

svārthendriyārthasaṅkalpavyabhicaraṇāccānekamekasmin puruṣe sattvaṃ rajastamaḥsattvaguṇayogācca na cānekatvaṃ [Note: na cānekaṃ hy] nahyekaṃ hyekakālamanekeṣu pravartate tasmānnaikakālā sarvendriyapravṛttiḥ //

yadguṇaṃ cābhīkṣṇaṃ puruṣamanuvartate sattvaṃ tatsattvamevopadiśanti munayo bāhulyānuśayāt //

manaḥ puraḥsarāṇīndriyāṇyarthagrahaṇasamarthāni bavanti //

tatra cakṣuḥ śrotraṃ ghrāṇaṃ rasanaṃ sparśanamiti pañcendriyāṇi //

pañcendriyadravyāṇi khaṃ vāyurjyotirāpo bhūriti //

pañcendriyādhiṣṭhānāni akṣiṇī karṇau nāsike jihvā tvak ceti //

pañcendriyārthāḥ śabdasparśarūparasagandhāḥ //

pañcendriyabuddhayaḥ cakṣurbuddhyādikāḥ tāḥ punarindriyendriyārthasattvātmasannikarṣajāḥ kṣaṇikā niścayātmikāśca ityetat pañcapañcakam //

mano manortho buddhirātmā cetyadhyātmadravyaguṇasaṃgrahaḥ śubhāśubhapravṛttinivṛttihetuśca dravyāśritaṃ ca karma yaducyate kriyeti //

tatrānumānagamyānāṃ pañcamahābhūtavikārasamudāyātmakānāmapi satāmindriyāṇāṃ tejaścakṣuṣi khaṃ śrotre ghrāṇe kṣitiḥ āpo rasane sparśane+anilo viśeṣeṇopapadyate /

tatra yadyadātmakamindriyaṃ viśeṣāttattadātmakamevārthamanugṛhṇāti tatsvabhāvādvibhutvācca //

tadarthātiyogāyogamithyāyogāt samanaskamindriyaṃ vikṛtimāpadyamānaṃ yathāsvaṃ buddhyupaghātāya saṃpadyate sāmarthyayogāt punaḥ prakṛtimāpadyamānaṃ yathāsvaṃ buddhimāpyāyayati //

manasastu cintyamartham /

tatra manaso manobuddheśca ta eva samānātihīnamithyāyogāḥ prakṛtivikṛtihetavo bhavanti //

tatrendriyāṇāṃ samanaskānāmanupataptānāmanupatāpāya prakṛtibhāve prayatitavyamebhirhetubhiḥ tadyathā sātmayendriyārthasaṃyogena buddhyā samyagavekṣyāvekṣya karmaṇāṃ samyak pratipādanena deśakālātmaguṇaviparītopāsanena ceti /

tasmādātmahitaṃ cikīrṣatā sarveṇa sarvaṃ sarvadā smṛtimāsthāya sadvṛttamanuṣṭheyam //

taddhyanutiṣṭhan yugapat saṃpādayatyarthadvayamārogyamindriyavijayaṃ ceti; tat sadvṛttamakhilenopadekṣayāmo+agniveśa&! tadyathā --- devagobrāhmaṇaguruvṛddhasiddhācāryānarcayet, agnimupacaret, oṣadhīḥ praśastā dhārayet, dvau kālāvupasprśet, malāyaneṣvabhīkṣṇaṃ pādayośca vaimalyamādadhyāt, triḥ pakṣasya keśaśmaśrulomanakhān saṃhārayet, nityamanupahatavāsāḥ& &sumanāḥ sugandhiḥ syāt, sādhuveśaḥ, prasiddhakeśaḥ&, mūrdhaśrotraghrāṇapādatailanityaḥ, dhūmapaḥ, pūrvābhibhāṣī, sumukhaḥ, dargeṣvabhyupapattā, hotā, yaṣṭā, dātā, catuṣpathānāṃ namaskartā, balīnāmupahartā, atithīnāṃ pūjakaḥ, pitṛbhyaḥ piṇḍadaḥ, kāle hitamitamadhurārthavādī, vaśyātmā, dharmātmā, hetāvīrṣyuḥ, phale nerṣyuḥ, niścintaḥ, nirbhīkaḥ, hrīmān, dhīmān, mahotsāḥ, dakṣaḥ, kṣamāvān, dhārmikaḥ, āstikaḥ, &vinayabuddhividyābhijanavayovṛddhasiddhācāryāṇāmupāsitā, chatrī daṇḍī &maulī sopānatko &yugamātradṛgvicaret, maṅgalācāraśīlaḥ, kucelāsthikaṇṭakāmedhyakeśatuṣotkarabhasmakapālasnānabalibhūmīnāṃ parihartā, prāk śramād vyāyāmavarjī syāt, sarvaprāṇiṣu bandhubhūtaḥ syāt, kruddhānāmanunetā, bhītānāmāśvāsayitā, dīnānāmabhyupapattā, satyasaṃdhaḥ, sāmapradhānaḥ&, paraparuṣavacanasahiṣṇuḥ, amarṣaghnaḥ, praśamaguṇadarśī, rāgadveṣahetūnāṃ hantā ca //

nānṛtaṃ brūyāt, nānyasvamādadīta, nānyastriyamabhilaṣennānyaśriyaṃ, na vairaṃ rocayet, na kuryāt pāpaṃ, na pāpe+api &pāpī syāt, nānyadoṣān brūyāt, nānyarahasyamāgamayen, nādhārmikairna narendradviṣṭaiḥ sahāsīta nonmattairna patitairna bhrūṇahantṛbhirna kṣudrairna duṣṭaiḥ, na duṣṭayānānyāroheta, na &jānusamaṃ kaṭhinamāsanamadhyāsīta, nānāstīrṇamanupahitamaviśālamasamaṃ vā śayanaṃ prapadyeta, na giriviṣamamastakeṣvanucaret, na drumamārohet, na jalogravegamavagāheta, na &kulacchāyāmupāsīta, nāgnyutpātamabhitaścaret, nocchairhaset, na śabdavantaṃ mārutaṃ muñcet, nānāvṛtamukho& jṛmbhāṃ kṣavathuṃ hāsyaṃ vā pravartayet, na nāsikāṃ kuṣṇīyāt, na dantān vighaṭṭayet, na nakhān vādayet, nāsthīnyabhihanyāt, na bhūmiṃ vilikhet, na chindyāttṛṇaṃ, na loṣṭaṃ mṛdgīyāt, na viguṇamaṅgaiśceṣṭeta, jyotīṃṣyaniṣṭamamedhyamaśastaṃ ca nābhivīkṣeta, na huṃkuryācchavaṃ&, na caityadhvajagurupūjyāśastacchāyāmākrāmet, na kṣapāsvamarasadanacaityacatvaracatyuṣpathopavanaśmaśānāghātanānyāseveta&, naikaḥ śūnyagṛhaṃ na cāṭavīmanupraviśet, na pāpavṛttān strīmitrabhṛtyān bhajeta, nottamairvirudhyeta, nāvarānupāsīta, na jihmaṃ rocayet, nānāryamāśrayet, na bhayamutpādayet, na sāhasātisvapnaprajāgarasnānapānāśanānyāseveta, nordhvajānuściraṃ tiṣṭhet, na vyālānupasarpenna daṃṣṭriṇo na viṣāṇinaḥ, purovātātapāvaśyāyātipravātāñjahyāt, kaliṃ nārabheta, nāsunibhṛto&+agnimupāsīta nocchiṣṭaḥ, nādhaḥ kṛtvā pratāpayet, nāvigataklamo nānāplutavadano na nagna upaspṛśet, na snānaśāṭyā spṛśeduttamāṅgaṃ, na keśāgrāṇyabhihanyāt, nopaspṛśya te eva vāsasī bibhṛyāt, nāspṛṣṭvā ratnājyapūjyamaṅgalasumanaso+abhiniṣkrāmet, na pūjyamaṅgalānyapasavyaṃ gacchennetarāṇyanudakṣiṇam //

nāratnapāṇirnāsnāto nopahatavāsā nājapitvā nāhutvā devatābhyo nānirūpya pitṛbhyo nādattvā gurubhyo nātithibhyo nopāśritebhyo nāpuṇyagandho nāmālī nāprakṣālitapāṇipādavadano nāśuddhamukho nodaṅmukho na vimanā nābhaktāśiṣṭāśucikṣudhitaparicaro na pātrīṣvamedhyāsu nādeśe nākāle nākīrṇe nādattvā+agramagnaye nāprokṣitaṃ prokṣaṇodakairna mantrairanabhimantritaṃ na kutsayanna kutsitaṃ na pratikūlopahitamannamādadīta, na paryuṣitamanyatra māṃsaharitakaśuṣkaśākaphalabhakṣyebhyaḥ, nāśeṣabhuk syādanyatra dadhimadhulavaṇasaktusarpibhyaḥ, na naktaṃ dadhi bhuñjīta, na saktūnekānaśnīyānna niśi na bhuktvā na bahūnna dvirnodakāntaritāt, na chittvā dvijairbhakṣayet //

nānṛjuḥ kṣuyānnādyānna śayīta, na vegito+anyakāryaḥ syāt, na vāyvagnisalilasomārkadvijagurupratimukhaṃ &niṣṭhīvikāvarcomūtrāṇyutsṛjet, na panthānamavamūtrayenna janavati nānnakāle, na japahomādhyayanabalimaṅgalākriyāsu śleṣmasiṅghāṇakaṃ muñcet //

na striyamavajānīta, nātiviśrambhayet, na guhyamanuśrāvayet, nādhikuryāt /

na rajasvalāṃ nāturāṃ nāmedhyāṃ nāśastāṃ nāniṣṭarūpācāropacārāṃ nādakṣāṃ nādakṣiṇāṃ nākāmāṃ nānyakāmāṃ nānyastriyaṃ nānyayoniṃ nāyonau na caityacatvaracatuṣpathopavanaśmaśānāghātanasalilauṣadhidvijagurusurālayeṣu na sandhyayornātithiṣu nāśucirnājagdhabheṣajo nāpraṇītasaṅkalpo nānupasthitapraharṣo nābhuktavānnātyaśito na viṣamastho na mūtroccārapīḍito na śramavyāyāmopavāsaklamābhihato nārahasi vyavāyaṃ gacchet //

na sato na gurūn parivadet nāśucirabhicārakarmacaityapūjyapūjādhyayanamabhinirvartayet //

na vidyutsvanārtavīṣu nābhyuditāsu dikṣu nāgnisaṃplave na bhūmikampe na mahotsave nolkāpāte na mahāgrahopagamane na naṣṭacandrāyāṃ tithau na sandhyayornāmukhādgurornāvapatitaṃ nātimātraṃ na tāntaṃ na visvaraṃ nānavasthitapadaṃ nātidrutaṃ na vilambitaṃ nātiklībaṃ nātyuccarinātinīcaiḥ svarairadhyayanamabhyasyet //

nātisamayaṃ jahyāt, na niyamaṃ bhindyāt, na naktaṃ nādeśe caret, na sandhyāsvabhyavahārādhyayanastrīsvapnasevī syāt, na bālavṛddhalubdhamūrkhakliṣṭaklībaiḥ saha sakhyaṃ kuryāt, na madyadyūtaveśyāprasaṅgaruciḥ syāt, na guhyaṃ vivṛṇuyāt, na kañcidavajānīyāt, nāhaṃmānī syānnādakṣo nādakṣiṇo nāsūyakaḥ, na &brāhmaṇān parivadet, na gavāṃ daṇḍamudyacchet, na vṛddhānna gurūnna gaṇānna nṛpān vā+adhikṣipet, na cātibrūyāt, na bāndhavānuraktakṛcchradvitīyaguhyajñān bahiṣkuryāt //

nādhīro nātyucchritasattvaḥ syāt, nābhṛtabhṛtyaḥ, nāviśrabdhasvajanaḥ, naikaḥ sukhī, na duḥkhaśīlācāropacāraḥ, na sarvaviśrambhī, na sarvābhiśaṅkī, na sarvakālavicārī //

na kāryakālamatipātayet, nāparīkṣitamabhiniviśet, nendriyavaśagaḥ syāt, na cañcalaṃ mano+anubhrāmayet, na buddhīndriyāṇāmatibhāramādadhyāt, na cātidīrghasūtrī syāt, na krodhaharṣāvanuvidadhyāt, na śokamanuvaset, na siddhāvutsekaṃ& yacchennāsiddhau dainyaṃ, prakṛtimabhīkṣṇaṃ smaret, hetuprabhāvaniścitaḥ syāddhetvārambhanityaśca, na kṛtamityāśvaset, na vīryaṃ jahyāt, nāpavādamanusmaret //

nāśuciruttamājyākṣatatilakuśasarṣapairagniṃ juhuyādātmānamāśīrbhirāśāsānaḥ, agnirme &nāpagaccheccharīrādvāyurme prāṇānādadhātu viṣṇurme balamādadhātu indro me vīryaṃ śivā māṃ praviśantvāpa āpohiṣṭhetyapaḥ spṛśet, dviḥ parimṛjyoṣṭhau pādau cābhyukṣya &mūrdhani khāni copaspṛśedadbhirātmānaṃ hṛdayaṃ śiraśca //

brahmacaryajñānadānamaitrīkāruṇyaharṣopekṣāpraśamaparaśca syāditi //

tatra ślokāḥ

pañcapañcakamuddiṣṭaṃ mano hetucatuṣṭayam /
indriyopakrame+adhyāye sadvṛttamakhilena ca //
svasthavṛttaṃ yathoddiṣṭaṃ yaḥ samyaganutiṣṭhati /
sa samāḥ śatamavyādhirāyuṣā na viyujyate //
nṛlokamāpūrayate yaśasā sādhusaṃmataḥ /
dharmārthāveti bhūtānāṃ bandhutāmupagacchati //
parān sukṛtino lokān puṇyakarmā prapadyate /
tasmādvṛttamanuṣṭheyamidaṃ sarveṇa sarvadā //
yaccānyadapi kiṃcit syādanuktamiha pūjitam /
vṛttaṃ tadapi cātreyaḥ sadaivābhyanumanyate //

ityagniveśakṛte tantre carakapratisaṃskṛte ślokasthāne indriyopakramaṇīyo nāmāṣṭamo+adhyāyaḥ //8//

iti svasthacatuṣko dvitīyaḥ //2//

1.9. navamo+adhyāyaḥ /

athātaḥ khuḍḍākacatuṣpādamadhyāyaṃ vyākhyāsyāmaḥ //

iti ha smāha bhagavānātreyaḥ //

bhiṣagdravyāṇyupasthātā rogī pādacatuṣṭayam /
guṇavat kāraṇaṃ jñeyaṃ vikāravyupaśāntaye //
vikāro dhātuvaiṣamyaṃ sāmyaṃ prakṛtirucyate /
sukhasaṃjñakamārogyaṃ vikāro duḥkhameva ca //
caturṇāṃ bhiṣagādīnāṃ śastānāṃ dhātuvaikṛte /
pravṛttirdhātusāmyārthā cikitsetyabhidhīyate //
śrute paryavadātatvaṃ bahuśo dṛṣṭakarmatā /
dākṣyaṃ śaucamiti jñeyaṃ vaidye guṇacatuṣṭayam //
bahutā tatrayogyatvamanekavidhakalpanā /
saṃpacceti catuṣko+ayaṃ dravyāṇāṃ guṇa ucyate //
upacārajñatā dākṣyamanurāgaśca bhartari /
śaucaṃ ceti catuṣko+ayaṃ guṇaḥ paricare jane //
smṛtirnirdeśakāritvamabhīrutvamathāpi ca /
jñāpakatvaṃ ca rogāṇāmāturasya guṇāḥ smṛtāḥ //
kāraṇaṃ ṣoḍaśaguṇaṃ siddhau pādacatuṣṭayam /
vijñātā śāsitā yoktā pradhānaṃ bhiṣagatra tu //
paktau hi kāraṇaṃ pakturyathā pātrendhanānalāḥ /
vijeturvijaye bhūmiścamūḥ praharaṇāni ca //
āturādyāstathā siddhau pādāḥ kāraṇasaṃjñitāḥ /
vaidyasyātaścikitsāyāṃ pradhānaṃ kāraṇaṃ bhiṣak //
mṛddaṇḍacakrasūtrādyāḥ kumbhakārādṛte yathā /
nāvahanti guṇaṃ vaidyādṛte pādatrayaṃ tathā //
gandharvapuravannāśaṃ yadvikārāḥ sudāruṇāḥ /
yānti yaccetare vṛddhimāśūpāyapratīkṣiṇaḥ //
sati pādatraye jñājñau bhiṣajāvatra kāraṇam /
varamātmā huto+ajñena na cikitsā pravartitā //
pāṇicārādyathā+acakṣurajñānādbhītabhītavat /
naurmārutavaśevājño bhiṣak carati karmasu //
yadṛcchayā samāpannamuttārya niyatāyuṣam /
bhiṣaṅmānī nihantyāśu śatānyaniyatāyuṣām //
tasmācchāstre+arthavijñāne pravṛttau karmadarśane /
bhiṣak catuṣṭaye yuktaḥ prāṇābhisara ucyate //
hetau liṅge praśamane rogāṇāmapunarbhave /
jñānaṃ caturvidhaṃ yasya sa rājārho bhiṣaktamaḥ //
śastraṃ śāstrāṇi salilaṃ guṇadoṣapravṛttaye /
pātrāpekṣīṇyataḥ prajñāṃ cikitsārthaṃ viśodhayet //
vidyā vitarko vijñānaṃ smṛtistatparatā kriyā /
yasyaite ṣaḍguṇāstasya na sādhyamativartate //
vidyā matiḥ karmadṛṣṭirabhyāsaḥ siddhirāśrayaḥ /
vaidyaśabdābhiniṣpattāvalamekaikamapyataḥ //
yasya tvete guṇāḥ sarve santi vidyādayaḥ śubhāḥ /
sa vaidyaśabdaṃ sadbhūtamarhan prāṇisukhapradaḥ //
śāstraṃ jyotiḥ prakāśārthaṃ darśanaṃ buddhirātmanaḥ /
tābhyāṃ bhiṣak suyuktābhyāṃ cikitsannāparādhyati //
cikitsite trayaḥ pādā yasmādvaidyavyapāśrayaḥ /
tasmāt prayatnamātiṣṭhedbhiṣak svaguṇasaṃpadi //
maitrī kāruṇyamārteṣu śakye prītirupekṣaṇam /
prakṛtistheṣu bhūteṣu vaidyavṛttiścaturvidheti //
tatra ślokau
bhiṣagjitaṃ catuṣpādaṃ pādaḥ pādaścaturguṇāḥ /
bhiṣak pradhānaṃ pādebhyo yasmādvaidyastu yadguṇaḥ //
jñānāni buddhirbrāhmī ca bhiṣajāṃ yā caturvidhā /
sarvametaccatuṣpāde khuḍḍāke saṃprakāśitamiti //

ityagniveśakṛte tantre carakapratisaṃskṛte ślokasthāne khuḍḍākacatuṣpādo nāma navamo+adhyāyaḥ //9//

1.10. daśamo+adhyāyaḥ /

athāto mahācatuṣpādamadhyāyaṃ vyākhyāsyāmaḥ //

iti ha smāha bhagavānātreyaḥ //

catuṣpādaṃ ṣoḍaśakalaṃ bheṣajamiti bheṣajo bhāṣante, yaduktaṃ pūrvādhyāye ṣoḍaśaguṇamiti, tadbheṣajaṃ yuktiyuktamalamārogyāyeti bhagavān punarvasurātreyaḥ //

neti maitreyaḥ, kiṃ kāraṇaṃ dṛśyante hyāturāḥ kecidupakaraṇavantaśca paricārakasaṃpannāścātmavantaśca kuśalaiśca bhiṣagbhiranuṣṭhitāḥ& samuttiṣṭhamānāḥ, tathāyuktāścāpare mriyamāṇāḥ; tasmādbheṣajamakiṃcitkaraṃ bhavati, tadyathā --- śvabhre sarasi ca prasiktamalpamudakaṃ, nadyāṃ vā syandamānāyāṃ pāṃsudhāne vā pāṃsumuṣṭiḥ prakīrṇa iti; tathā+apare dṛśyante+anupakaraṇāścāparicārakāścānātmavantaścākuśalaiśca bhiṣagbhiranuṣṭhitāḥ samuttiṣṭhamānāḥ, tathāyuktā mriyamāṇāścāpare /

yataśca pratikurvan sidhyati, pratikurvan mriyate; apratikurvan sidhyati, apratikurvan mriyate; tataścintyate bheṣajamabheṣajenāviśiṣṭamiti& //

maitreya&! mithyā cintyata ityātreyaḥ; kiṃ kāraṇaṃ, ye hyāturāḥ ṣoḍaśaguṇasamuditenānena bheṣajenopapadyamānā mriyanta ityuktaṃ tadanupapannaṃ, na hi bheṣajasādhyānāṃ vyādhīnāṃ bheṣajamakāraṇaṃ bhavati; ye punarāturāḥ kevalādbheṣajādṛte samuttiṣṭhante, na teṣāṃ saṃpūrṇabheṣajopapādanāya &samutthānaviśeṣo &nāsti; yathā hi patitaṃ puruṣaṃ samarathamutthānāyotthāpayan puruṣo balamasyopādadhyāt, sa kṣiprataramaparikliṣṭa evottiṣṭhet, tadvat saṃpūrṇabheṣajopalambhādāturāḥ; ye cāturāḥ kevalādbheṣajādapi mriyante, na ca sarva eva te bheṣajopapannāḥ samutthiṣṭheran, nahi sarve vyādhayo bhavantyupāyasādhyāḥ, na copāyasādhyānāṃ vyādhīnāmanupāyena siddhirasti, na cāsādhyānāṃ vyādhīnāṃ &bheṣajasamudāyo+ayamasti, na hyalaṃ jñānavān bhiṣaṅmumūrṣumāturamutthāpayituṃ; parīkṣyakāriṇo hi kuśalā bhavanti, yathā hi yogajño+abhyāsanitya iṣvāso dhanurādāyeṣumasyannātiviprakṛṣṭe mahati kāye nāparādhavān bhavati, saṃpādayati ceṣṭakāryaṃ, tathā bhiṣak svaguṇasaṃpanna upakaraṇavān vīkṣya karmārabhamāṇaḥ sādhyarogamanaparādhaḥ saṃpādayatyevāturamārogyeṇa; tasmānna bheṣajamabheṣajenāviśiṣṭaṃ bhavati //

idaṃ ca& naḥ pratyakṣaṃ---yadanātureṇa bheṣajenāturaṃ cikitsāmaḥ&, kṣāmamakṣāmeṇa, kṛśaṃ ca durbalamāpyāyayāmaḥ, sthūlaṃ medasvinamapatarpayāmaḥ, śītenoṣṇābhibhūtamupacarāmaḥ, śītābhibhūtamuṣṇena, nyūnān dhātūn pūrayāmaḥ, vyatiriktān hrāsayāmaḥ, vyādhīn mūlaviparyayeṇopacarantaḥ samyak prakṛtau sthāpayāmaḥ; teṣāṃ nastathā kurvatāmayaṃ bheṣajasamudāyaḥ kāntatamo bhavati //

bhavanti cātra

sādhyāsādhyavibhāgajño jñānapūrvaṃ cikitsakaḥ /
kāle cārabhate karma yattat sādhayati dhruvam //
&arthavidyāyaśohānimupakrośamasaṃgraham& /
prāpnuyānniyataṃ vaidyo yo+asādhyaṃ samupācaret //
sukhasādhyaṃ mataṃ sādhyaṃ kṛcchrasādhyamathāpi ca /
dvividhaṃ cāpyasādhyaṃ syādyāpyaṃ yaccānupakramam //
sādhyānāṃ trividhaścālpamadhyamotkṛṣṭatāṃ prati /
vikalpo na tvasādhyānāṃ niyatānāṃ vikalpanā //
hetavaḥ pūrvarūpāṇi rūpāṇyalpāni yasya ca /
na ca tulyaguṇo dūṣyo na doṣaḥ prakṛtirbhavet //
na ca kālaguṇastulyo na deśo durupakramaḥ /
gatirekā navatvaṃ ca rogasyopadravo na ca //
doṣaścaikaḥ samutpattau dehaḥ sarvauṣadhakṣamaḥ /
catuṣpādopapattiśca sukhasādhyasya lakṣaṇam //
nimittapūrvarūpāṇāṃ rūpāṇāṃ madhyame bale /
kālaprakṛtidūṣyāṇāṃ sāmānye+anyatamasya ca //
garbhiṇīvṛddhabālānāṃ nātyupadravapīḍitam /
śastrakṣārāgnikṛtyānāmanavaṃ kṛcchradeśajam //
vidyādekapathaṃ rogaṃ nātipūrṇacatuṣpadam /
dvipathaṃ nātikālaṃ vā kṛcchrasādhyaṃ dvidoṣajam //
śeṣatvādāyuṣo yāpyamasādhyaṃ pathyasevayā /
labdhālpasukhamalpena hetunā+āśupravartakam //
gambhīraṃ bahudhātusthaṃ marmasandhisamāśritam /
nityānuśāyinaṃ rogaṃ dīrghakālamavasthitam //
vidyāddvidoṣajaṃ tadvat pratyākhyeyaṃ tridoṣajam /
kriyāpathamatikrāntaṃ sarvamārgānusāriṇam //
autsukyāratisaṃmohakaramindriyanāśanam /
durbalasya susaṃvṛddhaṃ vyādhiṃ sāriṣṭameva ca //
bhiṣajā prāk parīkṣyaivaṃ vikārāṇāṃ svalakṣaṇam /
paścātkarmasamārambhaḥ kāryaḥ sādhyeṣu dhīmatā //
sādhyāsādhyavibhāgajño yaḥ samyakpratipattimān /
na sa maitreyatulyānāṃ mithyābuddhiṃ prakalpayet //
tatra ślokau
ihauṣadhaṃ pādaguṇāḥ prabhavo bheṣajāśrayaḥ /
ātreyamaitreyamatī matidvaividhyaniścayaḥ //
caturvidhavikalpāśca vyādhayaḥ svasvalakṣaṇāḥ /
uktā mahācatuṣpāde yeṣvāyattaṃ bhiṣagjitam //

ityagniveśakṛte tantre carakapratisaṃskṛte ślokasthāne mahācatuṣpādo nāma daśamo+adhyāyaḥ //

1.11. ekādaśa+adhyāyaḥ

athātastisraiṣanīyamadhyāyaṃ vyākhyāsyāmaḥ /

iti ha smāha bhagavānātreyaḥ //

iha khalu puruṣeṇānupahatasattvabuddhipauruṣaparākrameṇa hitamiha cāmuṣmiṃśca loke samanupaśyatā tisra eṣaṇāḥ paryeṣṭavyā bhavanti /

tadyathā---prāṇaiṣaṇāḥ, dhanaiṣaṇā, paralokaiṣaṇeti //

āsāṃ tu khalveṣaṇānāṃ prāṇaiṣaṇāṃ tāvat pūrvataramāpadyeta /

kasmāt prāṇaparityāge hi sarvatyāgaḥ /

tasyānupālanaṃ---svasthasya svasthavṛttānuvṛttiḥ, āturasya vikārapraśamane+apramādaḥ, tadubhayametaduktaṃ vakṣyate ca; tadyathoktamanauvartamānaḥ prāṇānupālanāddīrghamāyuravāpnotīti prathamaiṣaṇā vyākhyātā bhavati //

atha dvitīyāṃ dhanaiṣaṇāmāpadyeta, prāṇebhyo hyanantaraṃ dhanameva paryeṣṭavyaṃ bhavati&; na hyataḥ pāpāt pāpīyo+asti yadanupakaraṇasya dīrghamāyuḥ, tasmādupakaraṇāni paryeṣṭuṃ yateta /

tatropakaraṇopāyānanuvyākhyāsyāmaḥ; tadyathā---kṛṣipāśupālyavāṇijyarājopasevādīni, yāni cānyānyapi satāmavigarhitāni karmāṇi vṛttipuṣṭikarāṇi vidyāttānyārabheta kartuṃ; tathā kurvan dīghajīvitaṃ jīvatyanavāmataḥ puruṣo &bhavati /

iti dvitīyā dhanaiṣaṇā vyākhyātā bhavati //

atha tṛtīyāṃ paralokaiṣaṇāmāpadyeta /

saṃśayaścātra kathaṃ bhaviṣyāma itaścyutā naveti; kutaḥ punaḥ saṃśaya iti, ucyate---santi hyeke pratyakṣaparāḥ parokṣatvāt punarbhavasya nāstikyamāśritāḥ, santi cāgamapratyayādeva punarbhavamicchanti; śrutibhedācca--- `mātaraṃ pitaraṃ caike manyante janmakāraṇam /

svabhāvaṃ paranirmāṇaṃ yadṛcchāṃ cāpare janāḥ // iti /' ataḥ saṃśayaḥ---kiṃ nu khalvasti punarbhavo na veti //

tatra buddhimānnāstikyabuddhiṃ jahyādviciktsāṃ ca /

kasmāt pratyakṣaṃ hyalpam; analpamapratyakṣamasti, yadāgamānumānayuktibhirupalabhyate; yaireva tāvadindiryaiḥ pratyakṣamupalabhyate, tānyeva santi cāpratyakṣāṇi //

satāṃ ca rūpāṇāmatisannikarṣādativiprakarṣādāvaraṇāt karaṇadaubalyānamanonavasthānāt samānābhihārādabhibhavādatisaukṣmyācca pratyakṣānupalabdhiḥ; tasmādaparīkṣitametaducyate pratyakṣamevāsti, nānyadastīti //

śrutayaścaitā na kāraṇaṃ yuktivirodhāt /

ātmā mātuḥ piturvā yaḥ so+apatyaṃ yadi saṃcaret /
divvidhaṃ saṃcaredātmā sarvovā+avayavena vā //
sarvaścet saṃcarenmātuḥ piturvā maraṇaṃ bhavet /
nirantaraṃ nāvayavaḥ kaścitsūkṣmasya cātmanaḥ //
buddhirmanaśca nirṇīte yathaivātmā tathaiva te /
yeṣāṃ caiṣā matisteṣāṃ yonirnāsti caturvidhā //
vidyāt svābhāvikaṃ ṣaṇṇāṃ dhātūṇāṃ yat svalakṣaṇam /
saṃyoge ca viyoge ca teṣāṃ karmaiva kāraṇam //
anādeścetanādhātorneṣyate paranirmitiḥ /
para ātmā sa ceddheturiṣṭo+astu paranirmitiḥ //
na parīkṣā na parīkṣyaṃ na kartā kāraṇaṃ na ca /
na devā narṣayāḥ siddhāḥ karma karmaphalaṃ na ca //
nāstikasyāsti naivātmā yadṛcchopahatātmanaḥ /
pātakebhyaḥ paraṃ caitat pātakaṃ nāstikagrahaḥ //
tasmānmatiṃ vimucyaitāmamārgapraṣrtāṃ budhaḥ /
satāṃ buddhipradīpena paśyetsarvaṃ yathātatham //

dvividhameva khalu sarvaṃ saccāsacca tasya caturvidhā parīkṣā āptopadeśaḥ pratyakṣam anumānaṃ yuktiścet //

āptāstāvat

rajastamobhyāṃ nirmuktāstapojñānabalena ye /
yeṣāṃ vikālamamalaṃ jñānamavyāhataṃ sadā //
āptāḥ śiṣṭā vibuddhāste teṣāṃ vākyamasaṃśayam /
satyaṃ vakṣyanti te kasmādasatyaṃ nīrajastamāḥ //
ātmendriyamanorthānāṃ sannikarṣāt pravartate /
vyaktā tadātve yā buddhiḥ pratyakṣaṃ sā nirucyate //
pratyakṣapūrvaṃ tirividhaṃ trikālaṃ cānumīyate /
vahnirnigūḍho dhūmena maithunaṃ garbhadarśanāt //
evaṃ vyavasyantyatītaṃ bījāt phalamanāgatam /
dṛṣṭvā bījāt phalaṃ jātamihaiva sadṛśaṃ budhāḥ //
jalakarṣaṇabījartusaṃyogāt sasyasaṃbhavaḥ /
yuktiḥ ṣaḍdhātusaṃyogādgarbhāṇāṃ saṃbhavastathā //
&mathyamanthanamanthānāsaṃyhogādagnisaṃbhavaḥ /
yuktiyuktā catuṣpādasaṃpadvyādhinibarhaṇī //
buddhiḥ paśyati yā bhāvān bahukāraṇayogajān /
yuktistrikālā sā jñeyā trivargaḥ sādhyate yayā //
eṣā parīkṣā nāstyanyā yayā sarvaṃ parīkṣyate /
parīkṣyaṃ sadasaccaivaṃ tayā cāsti punarbhavaḥ //

&tatrāptāgamastāvadvedaḥ, yaścānyo+api kaścidvedārthādaviparītaḥ parīkṣakaiḥ praṇītaḥ śiṣṭānumato lokānugrahapravṛttaḥ śāstravādaḥ, sa cā+āptāgamaḥ; āptāgamādupalabhyatedānata poyajñasatyāhiṃsābrahmacaryāṇyabhyudayaniḥśreyasakarāṇīti //

na cānativṛttasattvadoṣāṇāmadoṣairapunarbhavo dharmadvāreṣūpadiśyate //

dharmadvārāvahitaiśca vyapagatabhayarāgadveṣalobhamohamānairbrahmaparairāptaiḥ karmavidbhiranupahatasattvabuddhipracāraiḥ pūrvaiḥ pūrvataraimaharṣibhirdivyacakṣubhirdṛṣṭvopadiṣṭaḥ punarbhava iti vyavasyedevam //

pratyakṣamapi copalabhyate --- mātāpitrorvisadṛśānyapatyāni, tulyasaṃbhavānāṃ varṇasvarākṛtisattvabuddhibhāgyaviśeṣāḥ, pravarāvarakulajanma, dāsyaiśvaryaṃ, sukhāsukhamāyuḥ, āyuṣo vaiṣamyam, iha akṛtasyāvāptiḥ, aśikṣitānāṃ ca ruditastanapānahāsatrāsādīnāṃ pravṛttiḥ, lakṣaṇotpattiḥ, &karmasādṛśye phalaviśeṣaḥ, medhā kvacit kvacit karmaṇyamedhā, jātismaraṇam --- ihāgamanamitaścyutānāmiti&, samadarśane priyāpriyatvam //

ata evānumīyate --- yat --- svakṛtamaparīhāryamavināśi paurvadehikaṃ daivasaṃjñakamānubandhikaṃ karma, tasyaitat phalam; itaścānyadbhaviṣyatīti; phalādbījamanumīyate, phalaṃ ca bījāt //

yuktiścaiṣā --- ṣaḍdhātusamudayādgarbhajanma, kartṛkaraṇasaṃyogāt kriyā; kṛtasya karmaṇaḥ phalaṃ nākṛtasya, nāṅkṛrotpattirabījāt; karmasadṛśaṃ phalaṃ, nānyasmādbījādanyasyotpattiḥ; iti yuktiḥ //

evaṃ pramāṇaiścaturbhirupadiṣṭe punarbhave dharmadvāreṣvavadhīyeta; tadyathā --- guruśuśrūṣāyāmadhyayane vratacaryāyāṃ dārakriyāyāmapatyotpādane bhṛtyabharaṇe+atithipūjāyāṃ dāne+anabhidhyāyāṃ tapasyanasūyāyāṃ dehavāṅimānase karmaṇyakliṣṭe dehendriyamanorthabuddhyātmaparīkṣāyāṃ manaḥsamādhāviti; yāni cānyānayapyevaṃvidhāni karmāṇi satāmavigarhitāni svargyāṇi vṛttipuṣṭikarāṇi vidyāttānyārabheta kartuṃ; tathā kurvanniha caiva yaśo labhate pretya ca svargam /

iti tṛtīyā paralokaiṣaṇā vyākhyātā bhavati //

atha khalu traya upastambhāḥ, trividhaṃ balaṃ, trīṇyāyatanāni, trayo rogāḥ, trayo rogamārgāḥ, trividhā bhiṣajaḥ, trividhamauṣadhamiti //

traya upastambhā iti --- āhāraḥ, svapno, brahmacaryamiti; ebhistribhiryuktiyuktairupastabdhamupastambhaiḥ śarīraṃ balavarṇopacayopacitamanuvartate yāvadāyuḥsaṃskārāt &saṃskāramahitamanupasevamānasya, ya ihaivopadekṣyate //

trividhaṃ balamiti --- sahajaṃ, kālajaṃ, yuktikṛtaṃ ca /

sahajaṃ yaccharīrasattvayoḥ prākṛtaṃ, kālakṛtamṛtuvibhāgajaṃ vayaḥkṛtaṃ ca, yuktikṛtaṃ punastadyadāhāraceṣṭāyogajam //

trīṇy āyatanānīti --- arthānāṃ karmaṇaḥ kālasya cātiyogāyogamithyāyogāḥ /

tatrātiprabhāvatāṃ dṛśyānām atimātraṃ darśanam atiyogaḥ, sarvaśo+adarśanam ayogaḥ, &atiśliṣṭa.ativiprakṛṣṭa.raudra.bhairava.adbhuta.dviṣṭa.bībhatsana.vikṛta.vitrāsana.ādirūpadarśanaṃ mithyāyogaḥ; {ṃ.darśanam} tathā+atimātrastanitapaṭahotkruṣṭādīnāṃ śabdānām atimātraṃ śravaṇam atiyogaḥ, sarvaśo+aśravaṇam ayogaḥ, paruṣeṣṭavināśopaghātapradharṣaṇabhīṣaṇādiśabdaśravaṇaṃ mithyāyogaḥ; {ṃ.śravaṇam} tathā+atitīkṣṇogrābhiṣyandināṃ gandhānām atimātraṃ ghrāṇamatiyogaḥ, sarvaśo+aghrāṇamayogaḥ, pūtidviṣṭāmedhyaklinnaviṣapavanakuṇapagandhādighrāṇaṃ mithyāyogaḥ; {ṃ.ghrāṇam} tathā rasānām atyādānam atiyogaḥ, sarvaśo+anādānam ayogaḥ, mithyāyogo rāśivarjyoṣv āhāravidhiviśeṣāyataneṣūpadekṣyate; {ṃ.ādānam} tathā+atiśītoṣṇānāṃ spṛśyānāṃ snānābhyaṅgotsādanādīnāṃ cātyupasevanam atiyogaḥ, sarvaśo+anupasevanam ayogaḥ, snānādīnāṃ śītoṣṇādīnāṃ ca spṛśyānām anānupūrvyopasevanaṃ viṣamasthānābhighātāśucibhūtasaṃsparśādayaś ceti mithyāyogaḥ {ṃ.upasevanam} //

tatraikaṃ &sparśanamindriyāṇāmindriyavyāpakaṃ, cetaḥsamavāyi, sparśanavyāptervyāpakamapi ca cetaḥ; tasmāt sarvendriyāṇāṃ vyāpakasparśakṛto yo bhāvaviśeṣaḥ, so+ayamanupaśayāt pañcavidhastrividhavikalpo bhavatyasātmyendriyārthasaṃyogaḥ; sātmyārtho hyupaśayārthaḥ //

karma vāṅmanaḥśarīrapravṛttiḥ /

tatra vāṅmanaḥśarīrātipravṛttiratiyogaḥ; sarvaśo+apravṛttirayogaḥ; vegadhāraṇodīraṇaviṣamaskhalanapatanāṅgapraṇidhānāṅgapradūṣaṇaprahāramardanaprāṇoparodhasaṃkleśanādiḥśarīro mithyāyogaḥ, sūcakānṛtākālakalahāpriyābaddhānupacāraparuṣavacanādirvāṅmithyāyogaḥ, bhayaśokakrodhalobhamohamānerṣyāmithyādarśanādirmānaso mithyāyogaḥ //

saṃgraheṇa cātiyogāyogavarjaṃ karma vāṅmanaḥśarīrajamahitamanupadiṣṭaṃ yattacca mithyāyogaṃ vidyāt //

iti trividhavikalpaṃ trividhameva karma prajñāparādha iti vyavasyet //

śītoṣṇavarṣalakṣaṇāḥ punarhemantagrīṣmavarṣāḥ saṃvatsaraḥ, sa kālaḥ /

tatrātimātrasvalakṣaṇaḥ kālaḥ kālātiyogaḥ, hīnasvalakṣaṇaḥ {ā.kālaḥ}&kālāyogaḥ, yathāsvalakṣaṇaviparītalakṣaṇastu {ā.kālaḥ}&kālamithyāyogaḥ /

kālaḥ punaḥ pariṇāma ucyate //

ityasātmyendriyārthasaṃyogaḥ, prajñāparādhaḥ, pariṇāmaśceti trayastrividhavikalpā hetavo vikārāṇāṃ; samayogayuktāstu prakṛtihetavo bhavanti //

sarveṣāmeva bhāvānāṃ bhāvābhāvau nāntareṇa yogāyogātiyogamithyāyogān samupalabhyete; yathāsvayuktyapekṣiṇau hi bhāvābhāvau //

trayo rogā iti nijāgantumānasāḥ /

tatra nijaḥ śārīradoṣasamutthaḥ, āganturbhūtaviṣavāyvagnisaṃprahārādisamutthaḥ, mānasaḥ punariṣṭasya lābhāllābhācāniṣṭasyopajāyate //

tatra buddhimatā mānasavyādhiparītenāpi satā buddhyā hitāhitamavekṣyāvekṣya dharmārthakāmānāmahitānāmanupasevane hitānāṃ copasevane prayatitavyaṃ, na hyantareṇa loke trayametanmānāsaṃ kiṃcinniṣpadyate sukhaṃ vā duḥkhaṃ vā; tasmādetaccānuṣṭheyaṃ --- &tadvidyānāṃ copasevane prayatitavyam, ātmadeśakulakālabalaśaktijñāne yathāvacceti //

bhavati cātra

mānasaṃ prati bhaiṣajyaṃ trivargasyānvavekṣaṇam /
tadvidyasevā vijñānamātmādīnāṃ ca sarvaśaḥ //

trayo rogamārgā iti --- śākhā, marmāsthisandhayaḥ, koṣṭhaśca /

tatra śākhā raktādayo dhātavastvak ca, sa bāhyo rogamārgāḥ; marmāṇi punarbastihṛdayamūrdhādīni, asthisandhayo+asthisaṃyogāstatropanibaddhāśca snāyukaṇḍarāḥ&, sa madhyamo rogamārgaḥ; koṣṭhaḥ punarucyate mahāsrotaḥ śarīramadhyaṃ mahānimnamāmapakvāśayaśceti paryāyaśabdaistantre, sa rogamārga ābhyantaraḥ //

tatra, gaṇḍapiḍakālajyapacīcarmakīlādhimāṃsamaṣakakuṣṭhavyaṅgādayo vikārā bahirmārgajāśca visarpaśvayathugulmārśovidradhyādayḥ śākhānusāriṇo bhavanti rogāḥ; pakṣavadhagrahāpatānakārditaśoṣarājayakṣmāsthisandhiśūlagudabhraṃśādayaḥ śirohṛdbastirogādayaśca madhyamamārgānusāriṇo bhavanti rogāḥ; jvarātīsāracchardyalasakavisūcikākāsaśvāsahikkānāhocaraplīhādayo+antarmārgajāśca visarpaśvayathugulmārśovidradhyādayaḥ koṣṭhānusārino bhavanti rogāḥ //

trividhā bhiṣaja iti

bhiṣakchadmacarāḥ santi santyeke siddhasādhitāḥ /
santi vaidyaguṇairyuktāstrividhā bhiṣajo bhuvi //
vaidyabhāṇḍauṣadhaiḥ pustaiḥ pallavairavalokanaiḥ /
labhante ye bhiṣakśabdamajñāste pratirūpakāḥ //
śiṛyaśojñānasiddhānāṃ vyapadeśādatadvidhāḥ /
vaidyaśabdaṃ labahnte ye jñeyāste siddhasādhitāḥ //
prayogajñānavijñānasiddhisiddhāḥ sukhapradāḥ /
jīvitābhisarāste syurvaidyatvaṃ teṣvavasthitamiti //

trividhamauṣadhamiti --- daivavyapāśrayaṃ, yuktivyapāśrayaṃ, sattvāvajayaśca /

tatra daivavyapāśrayaṃ --- mantrauṣadhimaṇimaṅgalabalyupahārahomaniyamaprāyaścittopavāsasvastyayanapraṇipātagamanādi, yuktivyapāśrayaṃ --- punarāhārauṣadhadravyāṇāṃ yojanā, sattvāvajayaḥ --- punarahitebhyo+arthebhyo manonigrahaḥ //

śarīradoṣaprakope khalu śarīramevāśritya prāyaśastrividhamauṣadhamicchanti --- antaḥparimārjanaṃ, bahiḥparimārjanaṃ, śastrapraṇidhānaṃ ceti /

tatrāntaḥparimārjanaṃ yadantaḥśarīramanupraviśyauṣadhamāhārajātavyādhīn pramārṣṭi, yatpunarbahiḥsparśamāśrityābhyaṅgasvedapradehapariṣekonmardanādyairāmayān pramārṣṭi tadbahiḥparimārjanaṃ, śastrapraṇidhānaṃ punaśchedanabhedanavyadhanadāraṇalekhanospāṭanapracchanasīvanaiṣaṇakṣārajalaukasaśceti //

bhavanti cātra

prājño roge samutpanne bāhyenābhyantareṇa vā /
karmaṇā labhate śarma śastropakramaṇena vā //
bālastu khalu mohādvā pramādādvā na budhyate /
utpadyamānaṃ prathamaṃ rogaṃ śatrumivābudhaḥ //
aṇurhi prathamaṃ bhūtvā rogaḥ paścādvivardhate /
sa jātamūlo muṣṇāti balamāyuśca durmateḥ //
na mūḍho labhate saṃjñāṃ tāvadyāvanna pīḍyate /
pīḍitastu matiṃ paścāt kurute vyādhinigrahe //
atha putrāṃśca dārāṃśca jñātīṃścāhūya bhāṣate /
sarvasvenāpi me kaścidbhiṣagānīyatāmiti //
tathāvidhaṃ ca kaḥ śakto durbalaṃ vyādhipīḍitam /
kṛśaṃ kṣīṇendriyaṃ dīnaṃ paritrātuṃ gatāyuṣam //
sa trātāramanāsādya bālastyajati jīvitam /
godhā lāṅgūlabaddhevākṛṣyamāṇā balīyasā //
tasmāt prāgeva rogebhyo rogeṣu taruṇeṣu vā /
bheṣajaiḥ pratikurvīta ya icchet sukhamātmanaḥ //
tatra ślokau
eṣaṇāḥ samupastambhā balaṃ kāraṇamāmayāḥ /
tisraiṣaṇīye mārgāśca bhiṣajo bheṣajāni ca //
tritvenāṣtau samuddiṣṭāḥ kṛṣṇātreyeṇa dhīmatā /
bhāvā bhāveṣvasaktena yeṣu sarvaṃ pratiṣṭhitam //

ityagniveśakṛte tantre carakapratisaṃskṛte ślokasthāne tisraiṣaṇīyo nāmaikādaśo+adhyāyaḥ //

1.12. dvādaśo+adhyāyaḥ /

athāto vātakalākalīyamadhyāyaṃ vyākhyāsyāmaḥ //

iti ha smāha bhagavānātreyaḥ //

vātakalākalājñānamadhikṛtya parasparamatāni jijñāsamānāḥ samupaviśya maharṣayaḥ papracchuranyo+anyaṃ kiṃguṇo vāyuḥ, kimasya prakopaṇam, upaśamanāni vā+asya kāni, kathaṃ cainamasaṅghātavanatamanavasthitamanāsadya prakopaṇapraśamanāni prakopayanti praśamayanti vā, kāni cāsya kupitākupitasya śarīrāśarīracarasya śarīreṣu carataḥ karmāṇi bahiḥśarīrebhyo veti //

atrovāca kuśaḥ sāṅkṛtyāyanaḥ rūkṣalaghuśītadāruṇakharaviśadāḥ ṣaḍime vātaguṇā bhavanti //

tacchrutvā vākyaṃ kumāraśirā bharadvāja uvāca evametadyathā bhagavānāha, eta eva vātaguṇā bhavanti, sa tvevaṃguṇairevaṃdravyairevaṃprabhāvaiśca karmabhirabhyasyamānairvāyuḥ prakopamāpadyate, samānaguṇābhyāso hi dhātūnāṃ vṛddhikāraṇamiti //

tacchrutvā vākyaṃ kāṅkāyano bāhlīkabhiṣaguvāca evametadyathā bhagavānāha, etānyeva vātaprakopaṇāni bhavanti ato viparītāni vātasya praśamanāni bhavanti, prakopaṇaviparyayo hi dhātūnāṃ praśamakāraṇamiti //

tacchrutvā vākyaṃ baḍiśo dhāmārgava uvāca evametadyathā bhagavānāha, etānyeva vātaprakopapraśamanāni bhavanti /

yathā hyenamasaṅghātamanavasthitamanāsādya prakopaṇapraśamanāni prakopayanti praśamayanti vā, tathā+anuvyākhyāsyāmaḥ vātaprakopaṇāni khalu rūkṣalaghuśītadāruṇakharaviśadaśuṣirakarāṇi śarīrāṇāṃ, tathāvidheṣu śarīreṣu vāyurāśrayaṃ gatvā+āpyāyamānaḥ prakopamāpadyate; vātapraśamanāni punaḥ snighdagurūṣṇaślakṣṇamṛdupicchilaghanakarāṇi śarīrāṇāṃ tathāvidheṣu śarīreṣu vāyurasajyamānaścaran praśāntimāpadyate //

tacchrutvā baḍiśavacanamavitathamṛṣigaṇairanumatamuvāca vāryovido rājarṣiḥ evameta sasrvamanapavādaṃ yathā bhagavānāha /

yāni tu khalu vāyoḥ kupitākupitasya śarīrāśarīracarasya śarīreṣu carataḥ karmāṇi bahiḥśarīrebhyo vā bhavanti, teṣāmavayavān pratyakṣānumānopadeśaiḥ sādhayitvā namaskṛtya vāyave yathāśakti pravakṣyāmaḥ vāyustantrayantradharaḥ, prāṇodānasamānavyānāpānātmā, pravartakaśceṣṭānāmuccāvacānāṃ, niyantā praṇetā ca manasaḥ, sarvendriyāṇāmudyojakaḥ, sarvendriyārthānāmabhivoḍhā, sarvaśarīradhātuvyūhakaraḥ, sandhānakaraḥ śarīrasya, pravartako vācaḥ, prakṛtiḥ sparśaśabdayoḥ, śrotrasparśanayormūlaṃ, harṣotsāhayoryoniḥ, samīraṇo+agneḥ, doṣasaṃśoṣaṇaḥ&, kṣeptā bahirmalānāṃ, sthūlāṇusrotasāṃ bhettā, kartā garbhākṛtīnām, āyuṣo+anuvrṛttipratyayabhūto bhavatyakupitaḥ /

kupitastu khalu śarīre śarīraṃ nānāvidhairvikārairupatapati balavarṇasukhāyuṣāmupaghātāya&, mano vyāharṣayati&, sarvendriyāṇyupahanti, vinihanti garbhān vikṛtimāpādayatyatikālaṃ vā dhārayati, bhayaśokamohadainyātipralāpāñjanayati, prāṇāṃścoparuṇaddhi /

prakṛtibhūtasya khalvasya loke carataḥ karmāṇīmāni bhavanti; tadyathā dharaṇīdhāraṇaṃ, jvalanojjvālanam, ādityacanddranakṣatragrahagaṇānāṃ santānagatividhānaṃ, sṛṣṭiśca meghānām, apāṃ visargaḥ, pravartanaṃ srotasāṃ, puṣpaphalānāṃ cābhinirvartanam, udbhedanaṃ caudbhidānām, ṛtūnāṃ pravibhāgaḥ, vibhāgo dhātūnāṃ, dhātumānasaṃsthānavyaktiḥ, bījābhisaṃskāraḥ, śasyābhivardhanamavikledopaśoṣaṇe&, avaikārikavikāraśceti /

prakupitasya svalvasya lokeṣu carataḥ karmāṇīmāni bhavanti; tadyathā śikhariśikharāvamathanam, unmathanamanokahānām, utpīḍanaṃ sāgarāṇām, udvartanaṃ sarasāṃ, pratisaraṇamāpagānām, ākampanaṃ ca bhūmeḥ, ādhamanamambudānāṃ&, nīhāranirhrrādapāṃśusikatāmatsyabhekoragakṣārarudhirāśmāśanivisargaḥ, vyāpādanaṃ ca ṣaṇṇāmṛtūnāṃ, śasyānāmasaṅghātaḥ, bhūtānāṃ copasargaḥ, bhāvānāṃ cābhāvakaraṇaṃ, caturyugāntakarāṇāṃ meghasūryānalānilānāṃ visargaḥ; sa hi bhagavān prabhavaścāvyayaśca, bhūtānāṃ bhāvābhāvakaraḥ, sukhāsukhayorvidhātā, mṛtyuḥ, yamaḥ, niyantā, prajāpatiḥ, aditiḥ, viśvakarmā, viśvarūpaḥ, sarvagaḥ, sarvatantrāṇāṃ vidhātā, bhāvānāmaṇuḥ, vibhuḥ, viṣṇuḥ krāntā, lokānāṃ vāyureva bhagavāniti //

tacchrutvā vāryovidavaco marīcaruvāca yadyapyevametat, kimarthasyāsya vacane vijñāne vā &sāmarthyamasti bhiṣagvidyāyāṃ; bhiṣagvidyāmadhikṛtyeyaṃ kathā &pravṛtteti //

vāryovida uvāca bhiṣak pavanamatibalamatiparuṣamatiśīghrakāriṇamātyayikaṃ cennānuniśamyet, asahasā prakupitamatiprayataḥ kathamagre+abhirakṣitumabhidhāsyati prāgevainamatyayabhayāt; vāyoryathārthā stutirapi bhavatyārogyāya balavarṇavivṛddhaye varcasvitvāyopacayāya jñānopapattaye paramāyuḥprakarṣāya ceti //

marīcirūvāca agnireva śarīre pittāntargataḥ kupitākupitaḥ śubhāśubhāni karoti; tadyathā paktimapaktiṃ darśanamadarśanaṃ mātrāmātratvamūṣmaṇaḥ prakṛtivikṛtivikṛtivarṇau śauryaṃ bhayaṃ krodhaṃ harṣaṃ mohaṃ prasādamityevamādīni cāparāṇi dvandvānīti //

tacchrutvā marīcivacaḥ kāpya uvāca soma eva śarīre śleṣmāntargataḥ kupitākupitaḥ śubhāśubhāni karoti; tadyathā daṛḍhyaṃ śaithilyamupacayaṃ kārśyamutsāhamālasyaṃ vṛṣatāṃ klībatāṃ jñānamajñanaṃ buddhiṃ mohamevamādīni cāparāṇi dvandvānīti //

tacchrutvā kāpyavaco bhagavān punarvasurātreya uvāca sarva eva bhavantaḥ samyagāhuranyatraikāntikavacanāt; sarva eva khalu vātapittaśleṣmāṇaḥ prakṛtibhūtāḥ puruṣamavyāpannendriyaṃ balavarṇasukhopapannamāyuṣā mahatopapādayanti samyagevācaritā dharmārthakāmā iva niḥśreyasena mahatā puruṣamiha cāmuṣmiśca loke; vikṛtāstvenaṃ mahatā viparyayeṇopapādayanti ṛtavastraya eva vikṛtimāpannā lokamaśubhenopaghātakāla iti //

tadṛṣayaḥ sarva evānumenire vacanamātreyasya bhagavato+abhinananduśceti //

bhavati cātra

tadātreyavacaḥ śrutvā sarva evānumenire /
kṛṣayo+abhinananduśca yathendravacanaṃ surāḥ //
tatra ślokau
guṇāḥ ṣaḍ dvividho heturvividhaṃ karma yat punaḥ /
vāyoścaturvidhaṃ karma pṛthak ca kaphapittayoḥ //
maharṣīṇāṃ matiryā yā punarvasumatiśca yā /
kalākalīye vātasya tat sarvaṃ saṃprakāśitam //

ityagniveśakṛte tantre carakapratisaṃskṛte ślokasthāne vātakalākalīyo nāma dvādaśo+adhyāyaḥ samāptaḥ //12//

iti nirdeśacatuṣkaḥ //3//

1.13. trayodaśo+adhyāyaḥ /

athātaḥ snehādhyāyaṃ vyākhyāsyāmaḥ //

iti ha smāha bhagavānātreyaḥ //

sāṃkhyaiḥ saṃkhyātasaṃkhyeyaiḥ sahāsīnaṃ punarvasum/
jagaddhitārthaṃ papraccha vahniveśaḥ svasaṃśayam //
kiṃyonayaḥ kati snehāḥ ke ca snehaguṇāḥ pṛthak/
kālānupāne ke kasya kati kāśca vicāraṇāḥ//
kati mātrāḥ kathaṃmānāḥ kā ca keṣūpadiśyate/
kaśca kebhyo hitaḥ snehaḥ prakarṣaḥ snehane ca kaḥ//
snehyāḥ ke ke na ca snigdhāsnigdhātisnigdhalakṣaṇam/
kiṃ pānāt prathamaṃ pīte jīrṇe kiṃca hitāhitam//
ke mṛdukrūrakoṣṭhāḥ kā vyāpadaḥ siddhayaśca kāḥ/
acche saṃśodhane caiva snehe kā vṛttiriṣyate//
vicāraṇāḥ keṣu yojyā vidhinā kena tat prabho!/
snehasyāmitavijñāna jñānamicchāmi veditum//
atha tatsaṃśayacchettā pratyuvāca punarvasuḥ/
snehānāṃ dvividhā saumya yoniḥ sthāvarajaṅgamā//
tilaḥ priyālābhiṣukau bibhītakaścitrābhayairaṇḍamadhūkasarṣapāḥ/
kusumbhabilvārukamūlakātasīnikocakākṣoḍakarañjaśigrukāḥ//
snehāśayāḥ sthāvarasaṃjñitāstathā syurjaṅgamā matsyamṛgāḥ sapakṣiṇaḥ/
teṣāṃ dadhikṣīraghṛtāmiṣaṃ vasā sneheṣu majjā ca tathopadiśyate//
sarveṣāṃ tailajātānāṃ tilatailaṃ viśiṣyate/
balārthe snehane cāgryamairaṇḍaṃ tu virecane//
(kaṭūṣṇaṃ tailamairaṇḍaṃ vātaśleṣmaharaṃ guru/
kaṣāyasvādutiktaiśca yojitaṃ pittahantrapi//1//)
sarpistailaṃ vasā majjā sarvasnehottamā matāḥ/
eṣu caivottamaṃ sarpiḥ saṃskārasyānuvartanāt//
ghṛtaṃ pittānilaharaṃ rasaśukraujasāṃ hitam/
nirvāpaṇaṃ mṛdukaraṃ svaravarṇaprasādanam//
mārutaghnaṃ na ca śleṣmavardhanaṃ balavardhanam/
tvacyamuṣṇaṃ sthirakaraṃ tailaṃ yoniviśodhanam//
viddhabhagnāhatabhraṣṭayonikarṇaśiroruji/
pauruṣopacaye snehe vyāyāme ceṣyate vasā//
balaśukrarasaśleṣmamedomajjavivardhanaḥ/
majjā viśeṣato+asthnāṃ ca balakṛt snehane hitaḥ//
sarpiḥ śaradi pātavyaṃ vasā majjā ca mādhave/
tailaṃ prāvṛṣi nātyuṣṇaśīte snehaṃ pibennaraḥ//
vātapittādhiko rātrāvuṣṇe cāpi pibennaraḥ/
śleṣmādhiko divā śīte pibeccāmalabhāskare//
atyuṣṇe vā divā pīto vātapittādhikena va/
mūrcchāṃ pipāsāmunmādaṃ kāmalāṃ vā samīrayet//
śīte rātrau piban snehaṃ naraḥ śleṣmādhiko+api vā/
ānāhamaruciṃ śūlaṃ pāṇḍutāṃ vā samṛcchati//
jalamuṣṇaṃ ghṛte peyaṃ yūṣastaile+anu śasyate/
vasāmajjñostu maṇḍaḥ syāt sarveṣūṣṇamathāmbu vā//
odanaśca vilepī ca raso māṃsaṃ payo dadhi/
yavāgūḥ sūpaśākau ca yūṣaḥ kāmbalikaḥ khaḍaḥ//
saktavastilapiṣṭaṃ ca madyaṃ lehāstathaiva ca/
bhakṣyamabhyañjanaṃ bastistathā cottarabastayaḥ//
gaṇḍūṣaḥ karṇatailaṃ ca nastaḥkarṇākṣitarpaṇam/
caturviṃśatirityetāḥ snehasya pravicāraṇāḥ&//
acchapeyastu yaḥ sneho na tāmāhurvicāraṇām/
snehasya sa bhiṣagdṛṣṭaḥ& kalpaḥ prāthamakalpikaḥ//
rasaiścopahitaḥ snehaḥ samāsavyāsayogibhiḥ/
ṣaḍbhistriṣaṣṭidhā saṃkhyāṃ prāpnotyekaśca kevalaḥ//
evametāścatuḥṣaṣṭiḥ snehānāṃ pravicāraṇā&/
okartuvyādhipuruṣān prayojyā jānatā bhavet//
ahorātramahaḥ kṛtsnamardhāhaṃ ca pratīkṣate/
pradhānā madhyamā hrasvā snehamātrā jarāṃ prati//
iti tisraḥ samuddiṣṭā mātrāḥ snehasya mānataḥ/
tāsāṃ prayogān vakṣyāmi puruṣaṃ puruṣaṃ prati//
prabhūtasnehanityā ye kṣutpipāsāsahā narāḥ/
pāvakaścottamabalo yeṣāṃ ye cottamā bale//
gulminaḥ sarpadaṣṭāśca visarpopahatāśca ye/
unmattāḥ kṛcchramūtrāśca gāḍhavarcasa eva ca//
pibeyuruttamāṃ mātrāṃ tasyāḥ pāne guṇāñchṛṇu/
vikārāñchamayatyeṣā śīghraṃ samyakprayojitā//
doṣānukarṣiṇī mātrā sarvamārgānusāriṇī/
balyā punarnavakarī śarīrendriyacetasām//
aruṣkasphoṭapiḍakākaṇḍūpamābhirarditāḥ/
kuṣṭhinaśca pramīḍhāśca vātaśoṇitikāśca ye//
nātibahvāśinaścaiva mṛdukoṣṭhāstathaiva ca/
pibeyurmadhyamāṃ mātrāṃ madhyamāścāpi ye bale//
mātraiṣā mandavibhraṃśā na cātibalahāriṇī/
sukhena ca snehayati śodhanārthe ca yujyate//
ye tu vṛddhāśca bālāśca sukumārāḥ sukhocitāḥ/
riktakoṣṭhatvamahitaṃ yeṣāṃ mandāgnayaśca ye//
jvarātīsārakāsāśca yeṣāṃ cirasamutthitāḥ/
snehamātrāṃ pibeyuste hrasvāṃ ye cāvarā bale//
parihāre sukhā caiṣā mātrā snehanabṛṃhaṇī/
vṛṣyā balyā nirābādhā ciraṃ cāpyanuvartate//
vātapittaprakṛtayo vātapittavikāriṇaḥ/
cakṣuḥkāmāḥ kṣatāḥ kṣīṇā vṛddhā bālāstathā+abalāḥ//
āyuḥprakarṣakāmāśca balavarṇasvarārthinaḥ/
puṣṭikāmāḥ prajākāmāḥ saukumāryārthinaśca ye//
dīptyojaḥsmṛtimedhāgnibuddhīndriyabalārthinaḥ/
pibeyuḥ sarpirārtāśca dāhaśastraviṣāgnibhiḥ//
pravṛddhaśleṣmamedaskāścalasthūlagalodarāḥ/
vātavyādhibhirāviṣṭā vātaprakṛtayaśca ye//
balaṃ tanutvaṃ laghutāṃ dṛḍhatāṃ sthiragātratām&/
snigdhaślakṣṇatanutvaktāṃ ye ca kāṅkṣanti dehinaḥ//
kṛmikoṣṭhāḥ krūrakoṣṭhāstathā nāḍībhirarditāḥ/
pibeyuḥ śītale kāle tailaṃ tailocitāśca ye//
vātātapasahā ye ca rūkṣā bhārādhvakarśitāḥ/
saṃśuṣkaretorudhirā niṣpītakaphamedasaḥ//
asthisandhisirāsnāyumarmakoṣṭhamahārujaḥ/
balavānmāruto yeṣāṃ khāni cāvṛtya tiṣṭhati//
mahaccāgnibalaṃ yeṣāṃ vasāsātmyāśca ye narāḥ/
teṣāṃ snehayitavyānāṃ vasāpānaṃ vidhīyate//
dīptāgnayaḥ kleśasahā ghasmarāḥ snehasevinaḥ/
vātārtāḥ krūrakoṣṭhāśca snehyā majjānamāpnuyuḥ//
yebhyo yebhyo hito yo yaḥ snehaḥ sa parikīrtitaḥ/
snehanasya prakarṣau tu saptarātratrirātrakau//
svedyāḥ śodhayitavyāśca rūkṣā vātavikāriṇaḥ/
vyāyāmamadyastrīnityāḥ snehyāḥ syurye ca cintakāḥ//
saṃśodhanādṛte yeṣāṃ rūkṣaṇaṃ saṃpravakṣyate/
na teṣāṃ snehanaṃ śastamutsannakaphamedasām//
abhiṣyaṇṇānanagudā nityamandāgnayaśca ye/
tṛṣṇāmūrcchāparītāśca garbhiṇyastāluśoṣiṇaḥ//
annadviṣaśchardayanto jaṭharāmagarārditāḥ/
durbalāśca pratāntāśca snehaglānā madāturāḥ//
na snehyā vartamāneṣu na nastobastikarmasu/
snehapānāt prajāyante teṣāṃ rogāḥ sudāruṇāḥ//
purīṣaṃ grathitaṃ rūkṣaṃ vāyurapraguṇo mṛduḥ/
paktā kharatvaṃ raukṣyaṃ ca gātrasyāsnigdhalakṣaṇam//
vātānulomyaṃ dīpto+agnirvarcaḥ snigdhamasaṃhatam/
mārdavaṃ snigdhatā cāṅge snigdhānāmupajāyate//
pāṇḍutā &gauravaṃ jāḍyaṃ purīṣasyāvipakvatā/
tandrīrarucirutkeśaḥ syādatisnigdhalakṣaṇam//
dravoṣṇamanabhiṣyandi bhojyamannaṃ pramāṇataḥ/
nātisnigdhamasaṃkīrṇaṃ śvaḥ snehaṃ pātumicchatā//
pibet saṃśamanaṃ snehamannakāle prakāṃkṣitaḥ/
śuddhyarthaṃ punarāhāre naiśe jīrṇe pibennaraḥ//
uṣṇodakopacārī syādbrahmacārī kṣapāśayaḥ&/
śakṛnmūtrānilodgārānudīrṇāṃśca &na dhārayet//
vyāyāmamuccairvacanaṃ krodhaśokau himātapau/
varjayedapravātaṃ ca seveta śayanāsanam//
snehaṃ& pītvā naraḥ snehaṃ pratibhuñjāna eva ca/
snehamithyopacārāddhi jāyante dāruṇā gadāḥ//
mṛdukoṣṭhastrirātreṇa snihyatyacchopasevayā/
snihyati krūrakroṣṭhastu saptarātreṇa mānavaḥ//
guḍamikṣurasaṃ mastu kṣīramulloḍitaṃ dadhi/
pāyasaṃ kṛśarāṃ sarpiḥ kāśmaryatriphalārasam//
drākṣārasaṃ pīlurasaṃ jalamuṣṇamathāpi vā/
madyaṃ vā taruṇaṃ pītvā mṛdukoṣṭho viricyate//
virecayanti naitāni krūrakoṣṭhaṃ kadācana/
bhavati krūrakoṣṭhasya grahaṇyatyulbaṇānilā//
udīrṇapittā+alpakaphā grahaṇī mandamārutā/
mṛdukoṣṭhasya tasmāt sa suvirecyo naraḥ smṛtaḥ//
udīrṇapittā grahaṇī yasya cāgnibalaṃ mahat/
bhasmībhavati tasyāśu snehaḥ pīto+agnitejasā//
sa jagdhvā snehamātrāṃ tāmojaḥ prakṣārayan balī/
snehāgniruttamāṃ tṛṣṇāṃ sopasargāmudīrayet//
nālaṃ snehasamṛddhasya śamāyānnaṃ sugurvapi/
sa cet suśītaṃ salilaṃ nāsādayati dahyate/
yathaivāśīviṣaḥ kakṣamadhyagaḥ svaviṣāgninā//
ajīrṇe yadi tu snehe tṛṣṇā syācchardayedbhiṣak/
śītodakaṃ punaḥ pītvā bhuktvā rūkṣānnamullikhet//
na sarpiḥ kevalaṃ pitte sāme viśeṣataḥ/
sarvaṃ &hyanurajeddehaṃ hantvā saṃjñāṃ ca mārayet//
&tandrā sotkleśa ānāho jvaraḥ stambho visaṃjñatā/
kuṣṭhāni kaṇḍūḥ pāṇḍutvaṃ śophārśāṃsyarucistṛṣā//
jaṭharaṃ grahaṇīdoṣāḥ staimityaṃ vākyanigrahaḥ/
śūlamāmapradoṣāśca jāyante snehavibhramāt//
tatrapyullekhanaṃ śastaṃ svedaḥ kālapratīkṣaṇam/
prati prati vyādhibalaṃ buddhvā sraṃsanameva ca//
takrāriṣṭaprayogaśca rūkṣapānānnasevanam/
mūtrāṇāṃ triphalāyāśca snehavyāpattibheṣajam//
akāle cāhitaścaiva mātrayā na ca yojitaḥ/
sneho mithyopacārācca vyāpadyetātisevitaḥ//
snehāt praskandanaṃ jantustrirātroparataḥ pibet/
snehavaddravamuṣṇaṃ ca tryahaṃ bhuktvā rasaudanam//
ekāhoparatastadvadbhuktvā pracchardanaṃ pibet/
syāttvasaṃśodhanārthīye vṛttiḥ snehe viriktavat//
snehadviṣaḥ snehavityā mṛdukoṣṭhāśca ye narāḥ/
kleśāsahā madyanityāsteṣāmiṣṭā vicāraṇā//
lāvataittiramāyūrahāṃsavārāhakaukkuṭāḥ/
gavyājairabhramātsyāśca rasāḥ syuḥ snehane hitāḥ//
yavakolakulatthāśca snehāḥ saguḍaśarkarāḥ/
dāḍimaṃ dadhi savyoṣaṃ rasasaṃyogasaṃgrahaḥ//
snehayanti tilāḥ pūrvaṃ jagdhāḥ sasnehaphāṇitāḥ/
kṛśarāścabahusnehāstilakāmbalikāstathā//
phāṇitaṃ śṛṅgaveraṃ ca tailaṃ ca surayā saha/
pibedrūkṣo bhṛtairmāṃsairjīrṇe+aśnīyācca bhojanam//
tailaṃ surāyā maṇḍena vasāṃ majjānameva vā/
piban saphāṇitaṃ kṣīraṃ naraḥ snihyati vātikaḥ//
dhāroṣṇaṃ snehasaṃyuktaṃ pītvā saśarkaraṃ payaḥ/
naraḥ snihyati pītvā vā saraṃ dadhnaḥ saphāṇitam//
pāñcaprasṛtikī peyā pāyaso māṣamiśrakaḥ/
kṣīrasiddho bahusnehaḥ snehayedacirānnaram//
sarpistailavasāmajjātaṇḍulaprasṛtaiḥ śṛ(kṛ)tā/
pāñcaprasṛtikī peyā peyā snehanamicchatā//
(śaukaro vā rasaḥ snigdhaḥ sarpirlavaṇasaṃyutaḥ/
pīto dvirvāsare yatnāt snehayedacirānnaram//1//)
grāmyānūpaudakaṃ māṃsaṃ guḍaṃ dadhi payastilān/
kuṣṭhī śothī pramehī ca snehane na prayojayet//
snehairyathārhaṃ tān siddhaiḥ snehayedavikāribhiḥ/
pippalībhirharītakyā siddhaistriphalayā+api vā//
drākṣāmalakayūṣābhyāṃ dadhnā cāmlena sādhayet/
vyoṣagarbhaṃ bhiṣak snehaṃ pītvā snihyati taṃ naraḥ//
yavakolakulatthānāṃ rasāḥ kṣāraḥ surā dadhi/
kṣīrasarpiśca tat siddhaṃ snehanīyaṃ ghṛtottamam//
tailamajjavasāsarpirbadaratriphalārasaiḥ/
yoniśukrapradoṣeṣu sādhayitvā prayojayet//
&gṛhṇātyambu yathā vastraṃ prasravatyadhikaṃ yathā/
yathāgni jīryati snehastathā sravati cādhikaḥ//
yathā vā++ākledya mṛtpiṇḍamāsiktaṃ tvarayā jalam/
sravati sraṃsate snehastathā tvaritasevitaḥ//
lavaṇopahitāḥ snehāḥ snehayantyacirānnaram/
taddhyabhiṣyandyarūkṣaṃ ca sūkṣmamuṣṇaṃ vyavāyi ca//
snehamagre prayuñjīta tataḥ svedamanantaram/
snehasvedopapannasya saṃśodhanamathetarat&//
tatra ślokaḥ--- snehāḥ snehavidhiḥ kṛtsnavyāpatsiddhiḥ sabheṣajā/
&yathāpraśnaṃ bhagavatā vyāhṛtaṃ cāndrabhāginā//

ityagniveśakṛte tantre carakapratisaṃskṛte ślokasthāne snehādhyāyo nāma trayodaśo+adhyāyaḥ//13//

1.14. caturdaśa+adhyāyaḥ/

athātaḥ svedādhyāyaṃ vyākhyāsyāmaḥ//

iti ha smāha bhagavānātreyaḥ//

ataḥ svedāḥ pravakṣyante yairyathāvatprayojitaiḥ/
svedasādhyāḥ praśāmyanti gadā vātakaphātmakāḥ//
snehapūrvaṃ prayuktena svedenāvajite+anile/
purīṣamūtraretāṃsi na sajjanti kathaṃcana//
śuṣkāṇyapi hi kāṣṭhāni snehasvedopapādanaiḥ/
namayanti yathānyāyaṃ kiṃ punarjīvato narān//
rogartuvyādhitāpekṣo nātyuṣṇo+atimṛdurna ca/
dravyavān kalpito deśe svedaḥ kāryakaro mataḥ//
vyādhau śīte śarīre ca mahān svedo mahābale/
durbale durbalaḥ svedo madhyame madhyamo hitaḥ//
vātaśleṣmaṇi vāte vā kaphe vā sveda iṣyate/
snigdharūkṣastathā snigdho rūkṣaścāpyupakalpitaḥ//
āmāśayagate vāte kaphe pakvāśayāśrite/
rūkṣapūrvo hitaḥ svedaḥ snehapūrvastathaiva ca//
vṛṣaṇau hṛdayaṃ dṛṣṭī svedayenmṛdu naiva vā/
madhyamaṃ vaṃkṣaṇau śeṣamaṅgāvayavamiṣṭataḥ//
suśuddhairnaktakaiḥ piṇḍyā godhūmānāmathāpi vā/
padmotpalapalāśairvā svedyaḥ saṃvṛtya cakṣuṣī//
muktāvalībhiḥ śītābhiḥ śītalairbhājanairapi/
jalārdrairjalajairhastaiḥ svidyato hṛdayaṃ spṛśet//
śītaśūlavyuparame stambhagauravanigrahe/
saṃjāte mārdave svede svedanādviratirmatā//
pittaprakopo mūrcchā ca śarīrasadanaṃ tṛṣā/
dāhaḥ svarāṅgadaurbalyamatisvinnasya lakṣaṇam/
uktastasyāśitīye yo graiṣmikaḥ sarvaśo vidhiḥ/
so+atisvinnasya kartavyo madhuraḥ snigdhaśītalaḥ//
kaṣāyamadyanityānāṃ garbhiṇyā raktapittinām/
pittināṃ sātisārāṇāṃ rūkṣāṇāṃ madhumehinām/
vidagdhabhraṣṭabradhnānāṃ viṣamadyavikāriṇām/
śrāntānāṃ naṣṭasaṃjñānāṃ sthūlānāṃ pittamehinām//
tṛṣyatāṃ &kṣudhitānāṃ ca kruddhānāṃ śocatāmapi/
kāmalyudariṇāṃ caiva kṣatānāmāḍyarogiṇām//
durbalātiviśuṣkāṇāmupakṣīṇaujasāṃ tathā/
bhiṣak taimirikāṇāṃ ca na svedamavatārayet//
pratiśyāye ca kāse ca hikkāśvāseṣvalāghave/
karṇamanyāśiraḥśūle svarabhede galagrahe//
arditaikāṅgasarvāṅgapakṣāghāte vināmake/
koṣṭhānāhavibandheṣu mūtrāghāte& vijṛmbhake//
pārśvapṛṣṭhakaṭīkukṣisaṃgrahe gṛdhrasīṣu ca/
mūtrakṛcchre mahattve ca muṣkayoraṅgamardake//
pādajānūrujaṅghārtisaṃgrahe śvayathāvapi/
khallīṣvāmeṣu śīte ca vepathau vātakaṇṭake//
saṃkocāyāmaśūleṣu stambhagauravasuptiṣu&/
sarvāṅgeṣu vikāreṣu svedanaṃ hitamucyate//
tilamāṣakulatthāmlaghṛtatailāmiṣaudanaiḥ/
pāyasaiḥ kṛśarairmāṃsaiḥ piṇḍasvedaṃ prayojayet//
gokharoṣṭravarāhāśvaśakṛdbhiḥ satuṣairyavaiḥ/
sikatāpāṃśupāṣāṇakarīṣāyasapūṭakaiḥ//
ślaiṣmikān svedayet pūrvairvātikān samupācaret/
dravyāṇyetāni śasyante yathāsvaṃ prastareṣvapi//
bhūgṛheṣu ca jentākeṣūṣṇagarbhagṛheṣu ca/
vidhūmāṅgāratapteṣu svabhyaktaḥ svidyate sukham//
grāmyānūpaudakaṃ māṃsaṃ payo bastaśirastathā/
&varāhamadhyapittāsṛk snehavattilataṇḍulāḥ//
ityetāni samutkvāthya nāḍīsvedaṃ prayojayet/
&deśakālavibhāgajño yuktyapekṣo bhiṣaktamaḥ//
vāruṇāmṛtakairaṇḍaśigrumūlakasarṣapaiḥ/
vāsāvaṃśakarañjārkapatrairaśmantakasya ca//
śobhāñjanakasaireyamālatīsurasārjakaiḥ&/
patrairutkvāthya salilaṃ nāḍīsvedaṃ prayojayet//
bhūtīkapañcamūlābhyāṃ surayā dadhimastunā/
mūtrairamlaiśca sasnehairnāḍīsvedaṃ prayojayet//
eta eva ca niryūhāḥ prayojyā jalakoṣṭhake/
svedanārthaṃ ghṛtakṣīratailakoṣṭhāṃśca kārayet//
godhūmaśakalaiścūrṇairyavānāmamlasaṃyutaiḥ/
sasnehakiṇvalavaṇairupanāhaḥ praśasyate//
gandhaiḥ surāyāḥ kiṇvena jīvantyā śatapuṣpayā/
umayā kuṣṭhatailābhyāṃ yuktayā copanāhayet//
carmabhiścopanaddhavyaḥ salomabhirapūtibhiḥ/
uṣṇavīryairalābhe tu kauśeyāvikaśāṭakaiḥ//
rātrau baddhaṃ divā muñcenmuñcedrātrau divā kṛtam/
bidāhaparihārārthaṃ, syāt prakarṣastu śītale//
saṅkaraḥ prastaro nāḍī pariṣeko+avagāhanam/
jentāko+aśmaghanaḥ karṣūḥ kuṭī bhūḥ kumbhikaiva ca//
kūpo holāka ityete svedayanti trayodaśa/
tān yathāvat pravakṣyāmi sarvānevānupūrvaśaḥ//

tatra vastrāntaritairavastrāntaritairvā piṇḍairyathoktairupasvedanaṃ saṅkarasveda iti vidyāt//

śūkaśamīdhānyapulākānāṃ veśavārapāyasakṛśarotkārikādīnāṃ vā prastare kauśeyāvikottarapracchadepañcāṅgulorubūkārkapatrapracchade vā svabhyaktasarvagātrasya śayānasyopasvedanaṃ& prastarasveda iti vidyāt//

svedanadravyāṇāṃ punarmūlaphalapatraśuṅgādīnāṃ mṛgaśakunapiśitaśiraspadādīnāmuṣṇasvabhāvānāṃ vā yathārhamamlalavaṇasnehopasaṃhitānāṃ mūtrakṣīrādīnāṃ vā kumbhyāṃ bāṣpamanudvamantyāmutkvathitānāṃ nāḍyā śareṣīkāvaṃśadalakarañjārkapatrānyatamakṛtayā gajāgrahastasaṃsthānanā vyāmadīrghayā vyāmārdhadīrghayā vā vyāmacaturbhāgāṣṭabhāgamūlāgrapariṇṇāhasrotasā sarvato vātaharapatrasaṃvṛtacchidrayā dvistrirvā vināmitayā vātaharasiddhasnehābhyaktagātro bāṣpamupaharet; bāṣpo hyanṛjugāmī& vihatacaṇḍavegastvacamavidahan sukhaṃ svedayatīti nāḍīsvedaḥ//

vātikottaravātikānāṃ punarmūlādīnāmutkvāthaiḥ sukhoṣṇaiḥ kumbhīrvarṣaṇikāḥ& pranāḍīrvā pūrayitvā yathārhasiddhasnehābhyaktagātraṃ vastrāvacchannaṃ pariṣecayediti pariṣekaḥ//

vātaharotkvāthakṣīratailaghṛtapiśitarasoṣṇasalilakoṣṭhakāvagāhastu yathokta evāvagāhaḥ//

atha jentākaṃ cikīrṣurbhūmiṃ parīkṣeta --- tatra pūrvasyāṃ diśyuttarasyāṃ vā guṇavati praśaste bhūmibhāge kṛṣṇamadhuramṛttike suvarṇamṛttike vā parīvāpapuṣkariṇyādīnāṃ jalāśayānāmanyatamasya kūle dakṣiṇe paścime vā sūpatīrthe samasuvibhaktabhūmibhāge saptāṣṭau vā+aratnīrupakramyodakāt prāṅmukhamudaṅmukhaṃ vā+abhimukhatīrthaṃ kūṭāgāraṃ kārayet, utsedhavistārataḥ paramaratnīḥ ṣoḍaśa, samantāt suvṛttaṃ mṛtkarmasaṃpannamanekavātāyanam; asya kṛṭāgārasḥyāntaḥ samantato bhittimaratnivistārotsedhāṃ piṇḍikāṃ kārayedākapāṭāt, madhye cāsya kūṭāgārasya catuṣkiṣkumātraṃ puruṣapramāṇaṃ mṛnmayaṃ kandusaṃsthānaṃ bahusūkṣmacchidramaṅgārakoṣṭhakastambhaṃ sapidhānaṃ kārayet; taṃ ca khādirāṇāmāśvakarṇādīnāṃ vā kāṣṭhānāṃ pūrayitvā pradīpayet; sa yadā jānīyāt sādhu dagdhāni kāṣṭhāni gatadhūmānyavataptaṃ ca kevalamagninā tadagnigṛhaṃ svedayogyena coṣmaṇā yuktamiti, tatrainaṃ puruṣaṃ vātaharābhyaktagātraṃ vastrāvacchannaṃ praveśayaṃścainamanuśiṣyāt --- śaumya! praviśa kalyāṇāyārogyāya ceti, praviśya caināṃ piṇḍikāmadhiruhya pārśvāparapārśvābhyāṃ yathāsukhaṃ śayīthāḥ, na ca tvayā svedamūrcchāparītenāpi satā piṇḍikaiṣā vimoktavyā++āprāṇocchvāsāt, bhraśyamāno hyataḥ piṇḍivakāvakāśāddvāramanadhigacchan svedamūrcchāparītatayā sadyaḥ prāṇāñjahyāḥ, tasmāt piṇḍikāmenāṃ na kathaṃ cana muñcethāḥ; tvaṃ yadā jānīyāḥ --- vigatābhiṣyandamātmānaṃ samyakprasrutasvedapicchaṃ sarvasrotovimuktaṃ laghūbhūtamapagatavibandhastambhasuptivedanāgauravamiti, tatastāṃ piṇḍikāmanusaran dvāraṃ prapadyethāḥ, niṣkramya ca na sahasā cakṣuṣoḥ paripālanārthaṃ śītodakamupaspṛśethāḥ, apagatasantāpaklamastu muhūrtāt sukhoṣṇena vāriṇā yathānyāyaṃ pariṣikto+aśnīyāḥ; iti jentākasvedaḥ//

śayānasya pramāṇena ghanāmaśmamayīṃ śilām/
tāpayitvā mārutaghnairdārubhiḥ saṃpradīpitaiḥ//
vyapojjhya sarvānaṅgārān prokṣya caivoṣṇavāriṇā/
tāṃ śilāmatha kurvīta kauṣeyāvikasaṃstarām//
tasyāṃ svabhyaktasarvāṅgaḥ svapan svidyati nā sukham/
&kauravājinakauṣeyaprāvārādyaiḥ susaṃvṛtaḥ&//
ityukto+aśmaghanasvedaḥ, karṣūsvedaḥ pravakṣyate/
khānayecchayanasyādhaḥ karṣūṃ sthānavibhāgavit//
dīptairadhūmairaṅgāraistāṃ karṣūṃ pūrayettataḥ/
tasyāmupari śayyāyāṃ svapan svidyati nā sukham//
anatyutsedhavistārāṃ vṛttākārāmalocanām/
ghanabhittiṃ kuṭīṃ kṛtvā kuṣṭhādyaiḥ saṃpralepayet//
kuṭīmadhye bhiṣak śayyāṃ svāstīrṇāmupakalpayet/
prāvārājinakauśeyakuthakambalagolakaiḥ//
hasantikābhiraṅgārapūrṇābhistāṃ ca sarvaśaḥ/
parivāryāntarārohedabhyaktaḥ svidyate sukham//
ya evāśmaghanasvedavidhirbhūmau sa eva tu/
praśastāyāṃ nivātāyāṃ samāyāmupadiśyate//
kumbhīṃ vātaharakvāthapūrṇāṃ bhūmau nikhānayet/
ardhabhāgaṃ tribhāgaṃ vā śayanaṃ tatra copari//
sthāpayedāsanaṃ vā+api nātisāndraparicchadam/
atha kumbhyāṃ susantaptān prakṣipedayaso guḍān//
pāṣāṇān voṣmaṇā tena tatsthaḥ svidyati nā sukham/
susaṃvṛtāṅgaḥ svabhyaktaḥ snehairanilanāśanaiḥ//
kūpaṃ śayanavistāraṃ dviguṇaṃ cāpi vedhataḥ/
deśe nivāte śaste ca kuryādantaḥsumārjitam//
hastyaśvagokharoṣṭrāṇāṃ karīṣairdagdhapūrite/
svavacchannaḥ susaṃstīrṇe+abhyaktaḥ svidyati nā sukham//
dhītīkāṃ& tu karīṣāṇāṃ yathoktānāṃ pradīpayet/
śayanāntaḥpramāṇena śayyāmupari tatra ca//
sudagdhāyāṃ vidhūmāyāṃ yathoktāmupakalpayet/
svavacchannaḥ svapaṃstatrābhyaktaḥ svidyati nā sukham//
holākasveda ityeṣa sukhaḥ prokto maharṣiṇā/
iti trayodaśavidhaḥ svedo+agniguṇasaṃśrayaḥ//
vyāyāma uṣṇasadanaṃ guruprāvaraṇaṃ kṣudhā/
bahupānaṃ bhayakrodhāvupanāhāhavātapāḥ//
svedayanti daśaitāni naramagniguṇādṛte/
ityukto dvividhaḥ svedaḥ saṃyukto+agniguṇairna ca//
ekāṅgasarvāṅgataḥ snigdho rūkṣastathaiva ca/
ityetattrividhaṃ dvandvaṃ svedamuddiśya kīrtitam//
snigdhaḥ svedairupakramyaḥ svinnaḥ pathyāśano bhavet/
tadahaḥ svinnagātrastu vyāyāmaṃ varjayennaraḥ//
tatra ślokāḥ --- svedo yathā kāryakaro hito yebhyaśca yadvidhaḥ/
yatra deśe yathā yogyo deśo rakṣyaśca yo yathā//
svinnātisvinnarūpāṇi tathā+atisvinnabheṣajam/
asvedyāḥ svedayogyāśca svedadravyāṇi kalpanā//
trayodaśavidhaḥ svedo vinā daśavidho+agninā/
saṃgraheṇa ca ṣaṭ svedāḥ svedādhyāye nidarśitāḥ/
svedādhikāre &yadvācyamuktametanmaharṣiṇā/
śiṣyaistu pratipattavyamupadeṣṭā punarvasuḥ//

ityagniveśakṛte tantre carakapratisaṃskṛte ślokasthāne svedādhyāyo nāma caturdaśo+adhyāyaḥ//14//

1.15. pañcadaśo+adhyāyaḥ

athāta upakalpanīyamadhyāyaṃ vyākhyāsyāmaḥ //

iti ha smāha bhagavānātreyaḥ //

iha khalu rājānāṃ ājamātramanyaṃ vā vipuladravyaṃ vamanaṃ virecanaṃ vā pāyayitukāmena bhiṣajā prāgevaiṣadhapānāt saṃbhārā upakalpanīyā bhavanti samyakcaiva hi gacchatyauṣadhe pratibhogārthāḥ, na hi sannikṛṣṭe kāle prādurbhūtāyāmāpadi sataypi krayākraye sukaramāṃśu saṃbharaṇamauṣadhānāṃ yathāvaditi //

evaṃvādinaṃ bhagavantamātreyamagniveśa uvāca nanu bhagavan ādāveva jñānavatā tathā pratividhātavyaṃ yathā prativihite sidhyedevauṣadhamekāntena samyakprayoganimittā hi sarvakarmaṇāṃ siddhiriṣṭā vyāpaccāsamyakprayogānimittā atha samyagasamyak ca samārabdhaṃ karma siddhyaṃti vyāpadyate vā+aniyamena tulyaṃ bhavati jñānamajñaneneti //

tamuvāca bhagavānātreyaḥ śakyaṃ tathā pratividhātumasmābhirasmadvidharivā+apyagniveśa yathā prativihite sidhyedevauṣadhamekāntena tacca prayogasauṣṭhavamupadeṣṭuṃ yathāvat nahi kaścidasti ya etadevamupadiṣṭamupadhārayitumutsaheta upadhārya vā tathā pratipattuṃ prayoktuṃ vā; sūkṣmāṇi hi doṣabheṣajadeśakālabalaśarīrāhārasātmyasattvaprakṛtivayasāmavasthānatarāṇi yānyanucintyamānāni vimalavipulabuddherapi buddhimākulīkuryuḥ kiṃ punaralpabuddheḥ tasmādubhayametadyathāvadupadekṣyāmaḥ samyakprayogaṃ cauṣadhānāṃ vyāpannānāṃ ca vyāpatsādhanāni siddhiṣūttarakālam //

idānīṃ tāvat saṃbhārān vividhānapi samāsenopadekṣyāmaḥ tadyathā dṛḍhaṃ nivātaṃ pravātaikaeśaṃ sukhapravicāramanupatyakaṃ dhūmātapajalarajasāmanabhigamanīyamaniṣṭhānāṃ ca śabdasparśarasarūpagandhānāṃ sodapānodūkhalamusalavarcaḥssthānasnānabhūmimahānasaṃ vāstuvidyākuśalaḥ praśastaṃ gṛhameva tāvat pūrvamupakalpayet //

tataḥ śīlaśaucācārānurāgadākṣyaprādakṣiṇyopapannānupacārakuśalān sarvakarmasu paryavadātān sūpaudanapācakasnāpakasaṃvāhakotthāpakasaṃveśakauṣadhāpeṣakāṃśca paricārakān sarvakarmasvapratikūlān tathā gītavāditrollāpakaślokagāthākhyāyiketihāsapurāṇakuśalānabhiprāyajñānanumatāṃśca deśakālavidaḥ pāriṣadyāṃśca tathā lāvakapiñjalaśaśahariṇaiṇakālapucchakamṛgamātṛkorabhrān gāṃ dogdhrīṃ śīlavatīmanāturāṃ jīvadvatsāṃ suprativihitatṛṇaśaraṇapānīyāṃ, pātryācamanīyodakoṣṭhamaṇikaghaṭapiṭharaparyogakumbhīkumbhakuṇḍaśarāvadarvīkaṭodañcanaparipacanamanthānacarmacelasūtrakārpāsorṇādīni ca śayanāsanādīni copanyastabhṛṅgārapratigrāaṇi suprayuktāstaraṇottarapracchadopadhānāni sopāśrayāṇi saṃveśanopaveśanasnehasvedābhyaṅgapradehapariṣekānulepanavamanavirecanāsthāpanānuvāsanaśirovirecanamūtroccārakarmaṇāmupacārasukhāni suprakṣālitopadhānāśca suślakṣṇasvaramadhyamā dṛṣadaḥ, śastrāṇi copakaraṇārthāni dhūmanetraṃ ca bastinetraṃ cottarabastikaṃca kuśahastakaṃ ca tulāṃ ca mānabhāṇḍaṃ ca ghṛtatailavasāmajjakṣaudraphāṇitalavaṇendhanodakamadhusīdhusurāsauvīrakatuṣodakamaireyamedakadadhidadhimaṇḍodasviddhānyāmlamūtrāṇi ca tathā śāliṣaṣṭikamudgamāṣayavatilakulatthabadaramṛdvīkākāśmaryaparūṣakābhayāmalakabibhītakāni nānāvidhāni ca snehasvedopakaraṇāni dravyāṇi tathaivordhvaharānulomikobhayabhāñji saṃgrahanīyadīpanīyapācanīyopaśamanīyavātaharādisamākhyātāni cauṣadhāni; yaccānyadapi kiñcidvyāpadaḥ parisaṃkhyāya pratīkārārthamupakaraṇaṃ vidyāt yaccā pratibhogārthaṃ tattadupakalpayet //

tatastaṃ puruṣaṃ yathoktābhyāṃ snehasvedābhyāṃ yathārhamupapādayet taṃ cedasminnantare mānasaḥ śarīro vā vyādhiḥ kaścittīvrataraḥ sahasā+abhyāgacchettameya tāvadasyopāvartayituṃ yateta tatastamupāvartya tāvantamevainaṃ kālaṃ tathāvidhenaiva karmaṇopācaret //

tatastaṃ puruṣaṃ snehasvedopapannamanupahatamanasamabhisamīkṣya sukhoṣitaṃ suprajīrṇabhaktaṃ śiraḥsnātamanuliptagātraṃ sragviṇamanupahatavastrasaṃvītaṃ devatāgnidvijaguruvṛddhavaidyānarcitavantamiṣṭe nakṣatratithikaraṇamuhūrte kārayitvā brāhmaṇān svastivācanaṃ prayuktābhirāśīrbhirabhimantritāṃ madhumadhukasaindhavaphāṇitopahitāṃ madanaphalakaṣāyamātrāṃ pāyayet //

madanaphalakaṣāyamātrāpramāṇaṃ tu khalu sarvasaṃśodhanamātrāpramāṇāni ca pratipuruṣamapekṣitavyāni bhavanti yāvaddhi yasya saṃśodhanaṃ pītaṃ vaikārikadoṣaharaṇāyopapadyate na cātiyogāyogāya tāvadasya mātrāpramāṇaṃ veditavyaṃ bhavati //

pītavantaṃ tu khalvenaṃ muhūrtamanukāṃkṣeta tasya yadā jānīyāt svedaprādurbhāveṇa doṣaṃ pravilayanamāpadyamānaṃ lomaharṣeṇa ca sthānebhyaḥ pracalitaṃ kukṣisamādhmāpanena ca kukṣimanugataṃ hṛllāsāsyasravaṇābhyāmapi cordhvamukhībhūtām athāsmai jānusamamasaṃabādhaṃ suprayuktāstaraṇottarapracchadopadhānaṃ sopāśrayamāsanamupaveṣṭuṃ prayacchet pratigrahāṃścopacārayet lālāṭapratigrahe pārśvopagrahaṇe nābhiprapīḍane pṛṣṭhonmardane cānapatrapaṇīyāḥ suhṛdo+anumatāḥ prayateran //

athainamanuśiṣyāt vivṛtoṣṭhatālukaṇṭho nātimahatā vyāyāmena vegānudīrṇānudīrayan kiñcidavanamya grīvāmūrdhvaśarīramupavegamapravṛttān pravartayan suparilikhitanakhābhyāmaṅgulibhyāmutpalakumudasaugandhikanālairvā kaṇṭhamabhispṛśan sukhaṃ pravartayasveti sa tathāvidhaṃ kuryāt tato+asya vegān pratigrahagatānavekṣetāvahitaḥ vegaviśeṣadarśanāddhi kuśalo yogāyogātiyogaviśeṣānupalabheta vegaviśeṣānupalabheta vegaviśeṣadarśī punaḥ kṛtyaṃ yathārhamavabudhyeta lakṣaṇena tasmādvegānavekṣetāvahitaḥ //

tatrāmūnyayogayogātiyogaviśeṣajñānāni bhavanti tadyathā apravṛttiḥ kutaścit kevalasya vā+apyauṣadhasya vibhraṃśo vibandho vegānāmayogalakṣaṇāni bhavanti kāle pravṛttiranatimahatī vyathā yathākramaṃ doṣaharaṇaṃ svayaṃ cāvasthānamiti yogalakṣaṇāni bhavanti yogena tu doṣapramāṇaviśeṣeṇa tīkṣṇamṛdumadhyavibhāgo jñeyaḥ yogādhikyena tu phenilaraktācandrikopagamanamityatiyogalakṣaṇāni bhavanti /

tatrātiyogāyoganimittānimānupadravān vidyāt ādhmānaṃ parikartikā parisrāvo hṛdayogasaraṇamaṅgagraho jīvādānaṃ vibhraṃśaḥ stambhaḥ klamaścetyupadravāḥ //

yogena tu khalvenaṃ charditavantamabhisamīkṣya suprakṣālitapāṇipādāsyaṃ muhūrtamāśvāsya snaihikavairecanikopaśamanīyānāṃ dhūmānāmanyatamaṃ sāmarthyataḥ pāyayitvā punarevodakamupasparśayet //

upaspṛṣṭodakaṃ cainaṃ nivātamāgāramanupraveśya saṃveśya cānuśiṣyāt uccairbhāsyamatyāśanamatisthānamaticaṅgkramaṇaṃ krodhaśokahimātapāvaśyāyātipravātān yānayānaṃ grāmyadharmamasvapanaṃ niśi divā svapnaṃ viruddhājīrṇāsātmyākālapramitātihīnaguruviṣamabhojanavegasandhāraṇodīraṇamiti bhāvānetānmanasā+apyasevamānaḥ sarvamaho gamayasvetei /

sa tathā kuryāt //

athainaṃ sāyāhne pare vā+ahni sukhodakapariṣiktaṃ purāṇānāṃ lohitaśālitaṇḍulānāṃ svavaklinnāṃ maṇḍapūrvāṃ sukhoṣṇāṃ yavāgūṃ pāyayedagnibalamabhisamīkṣya evaṃ dvitīye tṛtīye cānnakāle caturthe tvannakāle tathāvidhānāmeva śālitaṇḍulānāmutsvinnāṃ vilepīmuṣṇodakadvitīyāmasnehalavaṇāmalpasnehalavaṇāṃ vā bhojayet evaṃ pañcame ṣaṣṭhe cānnakāle saptame tvannakāle tathāvidhānāmeva śālīnāṃ dviprasṛtaṃ susvinnamodanamuṣṇodakānupānaṃ tanunā tanusnehalavaṇopapannena mudgayūṣeṇa bhojayet, evamaṣṭame navame cānnakāle daśame tvannakāle lāvakapiñjalādīnāmanyatamasya māṃsarasenaudakalāvaṇikena nātisāravatā bhojayedusṇodakānupānam evamekādaśe dvādaśe cānnakāle ata ūrdhvamannaguṇān krameṇopabhuñjānaḥ saptarātreṇa prakṛtibhojanamāgacchet //

athainaṃ punareva snehasvedābhyāmupapādyānupahatmanasamabhisamīkṣya sukhoṣitaṃ suprajīrṇabhaktaṃ kṛtahomabalimaṅgalajapaprāyaścittamiṣṭe tithinakṣatrakaraṇamuhūrte brāhmaṇān svasti vācayitvā trivṛtkalkamakṣamātraṃ yathārhāloḍanaprativinītaṃ pāyayet prasamīkṣya doṣabheṣajadeśakālabalaśarīrāhārasātmyasattvaprakṛtivayasāmavasthāntarāṇi vikārāṃśca samyak viriktaṃ cainaṃ vamanoktena dhūmavarjena vidhinopapādayedābalavarṇaprakṛtilābhāt, balavarṇopapannaṃ cainamanupahatamanasamabhisamīkṣya sukhoṣitaṃ suprajīrṇabhaktaṃ śiraḥsnātamanuliptagātraṃ sragviṇamanupahatavasgrasaṃvītamanurūpālaṅkārālaṅkṛtaṃ suhṛdyāṃ darśayitvā jñātīnāṃ darśayet athainaṃ kāmeṣvavasṛjet //

bhavanti cātra

anena vidhinā rājā rājamātro+athavā punaḥ /
yasya vā vipulaṃ dravyaṃ sa saṃśodhanamarhati //
daridrastvāpadaṃ prāpya prāptakālaṃ viśodhanam /
pibet kāmamasaṃbhṛtya saṃbhārānapi durlabhān //
na hi sarvamanuṣyāṇāṃ santi sarve paricchadāḥ /
na ca rogā na bādhante daridrānapi dāruṇāḥ //
yadyacchakyaṃ manuṣyeṇa kartumauṣadhamāpadi /
tattat sevyaṃ yathāśakti vasanānyaśanāni ca //
malāpahaṃ rogaharaṃ balavarṇaprasādanam /
pītvā saṃśodhanaṃ samyagāyuṣā yujyate ciram //
tatra ślokāḥ
īśvarāṇāṃ vasumatāṃ vamanaṃ savirecanam /
saṃbhārā ye yadarthaṃ ca samānīya prayojayet //
yathā prayojyā mātrā yā yadayogasya lakṣaṇam /
yogātiyogayoryacca doṣā ye cāpyupadravāḥ //
yadasevyaṃ viśuddhena yaśca saṃsarjanakramaḥ /
tat sarvaṃ kalpanādhyāye vyājahāra punarvasuḥ //

ityagniveśakṛte tantre carakapratisaṃskṛte ślokasthāne upakalpanīyo nāma pañcadaśo+adhyāyaḥ //

1.16. ṣoḍaśo+adhyāyaḥ

athātaścikitsāprābhṛtīyamadhyāyaṃ vyākhyāsyāmaḥ //

iti ha smāha bhagavānātreyaḥ //

cikisāprābhṛto dhīmān śāstravān karmatatparaḥ /
naraṃ virecayati yaṃ sa yogāt sukhamaśnute //
yaṃ vaidyamānī tvavudho virecayati mānavam /
so+atiyogādayogācca mānavo duḥkhamaśnute //
daurbalyaṃ lāghavaṃ glānirvyādhīnāmaṇutā ruciḥ /
hṛdvarṇaśuddhiḥ kṣuttṛṣṇā kāle vegapravartanam //
buddhīndriyamanaḥśuddhirmārutasyānulomatā /
samyagviriktaliṅgāni kāyāgneścānuvartanam //
ṣṭhīvanaṃ hṛdayāśuddhirutkleśaḥ śleṣmapittayoḥ /
ādhmānamaruciśchirdiradaurbalyamalāghavam //
jaṅghorusadanaṃ tandrā staimityaṃ pīnasāgamaḥ /
lakṣaṇānyaviriktānāṃ mārutasya ca nigrahaḥ //
viṭpittakaphavātānāmāgatānāṃ yathākramam /
paraṃ sravati yadraktaṃ medomāṃsodakopamam //
niḥśleṣmapittamudakaṃ śoṇitaṃ kṛṣṇameva vā /
tṛṣyato mārutārtasya so+atiyogaḥ pramuhyataḥ //
vamane+atikṛte liṅgānyetānyeva bhavanti hi /
ūrdhvagā vātarogāśca vāggrahaścādhiko bhavet //
cikitsāprābhṛtaṃ tasmādupeyāccharaṇaṃ naraḥ /
yuñjyād ya enamatyantamāyuṣā ca sukhena ca //
avipāko+aruciḥ sthaulyaṃ pāṇḍutā gauravaṃ klamaḥ /
piḍakākoṭhakaṇḍūnāṃ saṃbhavo+aratireva ca //
ālasyaśramadaurbalyaṃ daurgandhyamavasādakaḥ /
śleṣmapittasamutkleśo nidrānāśo+atinidratā //
tandrā klaibyamabuddhitvamaśastasvapnadarśanam /
balavarṇapraṇāśaśca tṛṣyato bṛṃhaṇairapi //
bahudoṣasya liṅgāni tasmai saṃśodhanaṃ hitam /
ūrdhvaṃ caivānulomaṃ ca yathādoṣaṃ yathābalam //
evaṃ viśuddhakoṣṭhasya kāyāgnirabhivardhate /
vyādhayaścopaśāmyanti prakṛtiścānuvartate //
indriyāṇi manobuddhirvarṇaścāsya prasīdati /
balaṃ puṣṭirapatyaṃ ca vṛṣatā cāsya jāyate //
jarāṃ kṛcchreṇa labhate ciraṃ jīvatyanāmayaḥ /
tasmāt saṃśodhanaṃ kāle yuktiyuktaṃ pibennaraḥ //
doṣāḥ kadācit kupyanti jitā laṅghanapācanaiḥ /
jitāḥ saṃśodhanairye tu na teṣāṃ punarudbhavaḥ //
doṣāṇāṃ ca drumāṇāṃ ca mūle+anupahate sati /
rogāṇāṃ prasavānāṃ gatānāmāgatirdhruvā //
bheṣajakṣapitte pathyamāhāraireva bṛṃhaṇam /
ghṛtamāṃsarasakṣīrahṛdyayūṣopasaṃhitaiḥ //
abhyaṅgotsādanaiḥ snānairnirūhaiḥ sānuvāsanaiḥ /
tathā sa labhate śarma yujyate cāyuṣā ciram //
atiyogānubaddhānāṃ sarpiḥpānaṃ praśasyate /
tailaṃ madhurakaiḥ siddhamathavā+apyanuvāsanam //
yasya tvayogastaṃ snigdhaṃ punaḥ saṃśodhayennaram /
mātrākālabalāpekṣī smaran pūrvamanukramam //
snehane svedane śuddhau rogāḥ saṃsarjane ca ye /
jāyante+amārgavihite teṣāṃ siddhiṣu sādhanam //
jāyante hetuvaiṣamyādviṣamā dehadhātavaḥ /
hetusāmyāt samāsteṣāṃ svabhāvoparamaḥ sadā //
pravṛttiheturbhāvānāṃ na nirodhe+asti kāraṇam /
kecittatrāpi manyante hetuṃ hetoravartanam //
evamuktārthamācāryamagniveśo+abhyabhāṣata /
svabhāvoparame karma cikitsārpābhṛtasya kim //
bheṣajairviṣamān dhātūn kān samīkurute bhiṣak /
kā vā cikitsā bhagavan kimarthaṃ vā prayujyate //
ticchiṣyavacanaṃ śrutvā vyājahāra punarvasuḥ /
śrūyatāmatra yā somya yuktirdṛṣṭā maharṣibhiḥ //
na nāśakāraṇābhāvādbhāvānāṃ nāśakāraṇam /
jñāyate nityagasyeva kālasyātyayakāraṇam //
śīghragatvādyathā bhūtastathā bhāvo vipadyate /
nirodhe kāraṇaṃ tasya nāsti naivānyathākriyā //
yābhiḥ kriyābhirjāyante śarīre dhātavaḥ samāḥ /
sā cikitsā vikārāṇāṃ karma tadbhiṣajāṃ smṛtam //
kathaṃ śarīre dhātūnāṃ vaiṣamyaṃ na bhavediti /
samānāṃ cānubandhaḥ syādityarthaṃ kriyate kriyā //
tyāgādviṣamahetūnāṃ samānāṃ copasevanāt /
viṣamā nānubadhnanti jāyante dhātavaḥ samāḥ //
samaistu hetubhiryasmāddhātun saṃjanayet samān /
cikitsāprābhṛtastasmāddātā dehasukhāyuṣām //
dharmasyārthasya kāmasya nṛlokasyobhayasya ca /
dātā saṃpadyate vaidyo dānāddehasukhāyuṣām //
tatra ślokāḥ
cikitsāprābhṛtaguṇo doṣo yaścetarāśrayaḥ /
yogāyogātiyogānāṃ lakṣaṇaṃ śuddhisaṃśrayam //
bahudoṣasya liṅgāni saṃśodhanaguṇāśca ye /
cikitsāsūtramātraṃ ca siddhivyāpatisaṃśrayam //
yā ca yuktiścikitsāyāṃ yaṃ cārthaṃ kurute bhiṣak /
cikitsāprābhṛte+adhyāye tat sarvamavadanmuniḥ //

ityagniveśakṛte tantre carakapratisaṃskṛte ślokasthāne cikitsāprābhṛtīyo nāma ṣoḍaśo dhyāyaḥ //

samāptaḥ kalpanācatuṣkaḥ//4//

1.17. saptadaśo+adhyāyaḥ/

athātaḥ kiyantaḥśirasīyamadhyāyaṃ vyākhyāsyāmaḥ //

iti ha smāha bhagavānātreyaḥ //

kiyantaḥ śirasi proktā rogā hṛdi ca dehinām /
kati cāpyanilādīnāṃ rogā mānavikalpajāḥ //
kṣayāḥ kati samākhyātāḥ piḍakāḥ kati cānaga /
gatiḥ katividhā coktā doṣāṇāṃ doṣasūdana //
hutāśaveśasya vacastacchrutvā gururabravīt /
pṛṣṭavānasi yat saumya tanme śṛṇu savistaram //
ḍrṣṭāḥ pañca śirorogāḥ pañcaiva hṛdayāmayāḥ /
vyādhīnāṃ dvyadhikā ṣaṣṭirdoṣamānavikalpajā //
daśāṣṭau ca kṣayāḥ sapta piḍakā mādhumehikāḥ /
doṣāṇāṃ trividhā coktā gatirvistarataḥ śṛṇu //
saṃdhāraṇāddivāsvapnādrātrau jāgaraṇānmadāt /
uccairbhāṣyādavaśyāyāt prāgvātādatimaithunāt //
gandhādasātmyādāghrātādrajodhūmahimātapāt /
gurvamlaharitādānādati śītāmbusevanāt //
śiro+abhighātādduṣṭāmādrodanādvāṣpanigrahāt /
meghāgamānmanastāpāddeśakālaviparyayāt //
vātādayaḥ prakupyanti śirasyasraṃ ca duṣyati /
tataḥ śirasi jāyante rogā vividhalakṣaṇāḥ //
prāṇāḥ prāṇabhṛtāṃ yatra śritāḥ sarvendriyāṇi ca /
yaduttamāṅgamaṅgānāṃ śirastadabhidhīyate //
ardhāvabhedako vā syāt sarvaṃ vā rujyate śiraḥ /
pratiśyāmukhanāsākṣikarṇarogaśirobhramāḥ //
arditaṃ śirasaḥ kampo galamanyāhanugrahaḥ /
vividhāścāpare rogā vātādikrimisaṃbhavāḥ //
pṛthagdiṣṭāstu ye pañca saṃgrahe paramarṣibhiḥ /
śirogadāṃstāṅchṛṇu me yathāsvairhetulakṣaṇaiḥ //
uccairbhāṣyātibhāṣyābhyāṃ tīkṣṇapānāt prajāgarāt /
śītamārutasaṃsparśādvyavāyādveganigrahāt //
upavāsādabhīghātādvirekādvamanādati /
bāṣpaśokabhayatrāsādbhāramārgātikarśanāt //
śirogatāḥ sirā vṛddho vāyurāviśya kupyati /
tataḥ śūlaṃ mahattasya vātāt samupajāyate //
nistudyete bhṛśaṃ śaṅkhau ghāṭā saṃbhidyate tathā /
sabhrūmadhyaṃ lalāṭaṃ ca tapatīvātivedanam //
vadhyete svanataḥ śrotre niṣkṛṣyete ivākṣiṇī /
ghūrṇatīva śiraḥ sarvaṃ saṃdhibhya iva mucyate //
sphuratyati sirājālaṃ stabhyate ca śirodharā /
snigdhoṣṇamupaśete ca śiroroge+anilātmake //
kaṭvamlalavaṇakṣāramadyakrodhātapānalaiḥ /
pittaṃ śirasi saṃduṣṭaṃ śirorogāya kalpate //
dahyate rujyate tena śiraḥ śītaṃ suṣūyate /
dahyate cakṣuṣī tṛṣṇā bhramaḥ svedaśca jāyate //
āsyāsukhaiḥ svapnasukhairgurusnigdhātibhojanaiḥ /
ślṣmā śirasi saṃduṣṭaḥ śirorogāya kalpate //
śiro mandarūjaṃ tena suptaṃ stimitabhārikam /
bhavatyutpadyate tandrā tathā+ālasyamarocakaḥ //
vātācchūlaṃ bhramaḥ kampaḥ pittāddāho madastṛṣā /
kaphādgurutvaṃ tandrā ca śiroroge tridoṣaje //
tilakṣīraguḍājīrṇapūtisaṅkīrṇabhojanāt /
kledo+asṛkkaphamāṃsānāṃ doṣalasyopajāyate //
tataḥ śirasi saṃkledāt krimayaḥ pāpakarmaṇaḥ /
janayanti śirorogaṃ jāta bībhatsalakṣaṇam //
vyadhacchedarujākaṇḍūśophadaurgatyaduḥkhitam /
krimirogāturaṃ vidyāt krimīṇāṃ darśanena ca //
śokopavāsavyāyāmarūkṣaśuṣkālpabhojanaiḥ /
vāyurāviśya hṛdayaṃ janayatyuttamāṃ rujam //
vepathurveṣṭanaṃ stambhaḥ pramohaḥ śūnyatā daraḥ /
hṛdi vātāture rūpaṃ jīrṇe cātyarthavedanā //
uṣṇāmlalavaṇakṣārakaṭukājīrṇabhojanaiḥ /
madyakrodhātapaiścāśu hṛdi pittaṃ prakupyati //
hṛddāhastiktatā vaktre tiktāmlodgiraṇaṃ klamaḥ /
tṛṣṇā mūrcchā bhramaḥ svedaḥ pittahṛdrogakāraṇam //
atyādānaṃ gurusnigdhamacintanamaceṣṭanam /
nidrāsukhaṃ cābhyadhikaṃ kaphahṛdrogakāraṇam //
hṛdayaṃ kaphahdroge suptaṃ stimitabhārikam /
tandrāruciparītasya bhavatyaśmāvṛtaṃ yathā //
hetulakṣaṇasaṃsargāducyate sānnipātikaḥ /
(hṛdrogaḥ kaṣṭadaḥkaṣṭasādhya ukto maharṣibhiḥ //)
tridoṣaje tu hṛdroge yo durātmā niṣevate //
tilakṣīraguḍādīni granthistasyopajāyate /
marmaikadeśe saṃkledaṃ rasaścāsyopagacchati //
saṃkledāt krimayaścāsya bhavantyupahatātmanaḥ /
marmaikadeśe te jātāḥ sarpanto bhakṣayanti ca //
tudyamānaṃ sa hṛdayaṃ sūcībhiriva manyate /
chidyamānaṃ yathā śastrairjātakaṇḍūṃ mahārujam //
hṛdrogaṃ krimijaṃ tvetairliṅgairbuddhvā sudāruṇam /
tvareta jetuṃ taṃ vidvān vikāraṃ śīghrakāriṇam //
dvyulbaṇaikolbaṇaiḥ ṣaṭ syurhīnamadhyādhikaiśca ṣaṭ /
samaiścaiko vikārāste sannipātāstrayodaśa //
saṃsarge nava ṣaṭ tebhya ekavṛddhyā samaistrayaḥ /
pṛthak trayaśca tairvṛddhairvyādhayaḥ pañcaviṃśatiḥ //
yathā vṛddhaistathā kṣīṇairdoṣaiḥ syuḥ pañcaviṃśatiḥ /
vṛddhikṣayakṛtaścānyo vikalpa upadekṣyate //
vṛddhirekasya samatā caikasyaikasya saṃkṣayaḥ /
dvandvavṛddhiḥ kṣayaścaikasyaikavṛddhirdvayoḥ kṣayaḥ //
prakṛtisthaṃ yadā pittaṃ mārutaḥ śleṣmaṇaḥ kṣaye /
sthānādādāya gātreṣu yatra yatra visarpati //
tadā bhedaśca dāhaśca tatra tatrānavasthitaḥ /
gātradeśe bhavatyasya śramo daurbalyameva ca //
prakṛtisthaṃ kaphaṃ vāyuḥ kṣīṇe pitte yadā balī /
karṣet kuryāttadā śūlaṃ saśaityastambhagauravam //
yada+anilaṃ prakṛtigaṃ pittaṃ kaphaparikṣaye /
saṃruṇaddhi tadā dāhā śūlaṃ cāsyopajāyate //
śleṣmāṇaṃ hi samaṃ pittaṃ yadā vātaparikṣaye /
sannirundhyāttadā kuryāt satandrāgauravaṃ jvaram //
pravṛddho hi yadā śleṣmā pitte kṣīṇe samīraṇam /
rundhyāttadā prakurvīta śītakaṃ gauravaṃ rujam //
samīraṇe parikṣīṇe kaphaḥ pittaṃ samatvagam /
kurvīta sannirundhāno mṛdvagnitvaṃ śirograham //
nidrāṃ tandrām pralāpaṃ ca hṛdrogaṃ gātragauravam /
nakhādīnāṃ ca pītatvaṃ ṣṭhīvanaṃ kaphapittayoḥ //
hīnavātasya tu śleṣmā pittena sahitaścaran /
karotyarocakāpākau sadanaṃ gauravaṃ tathā //
hṛllāsamāsyasravaṇaṃ pāṇḍutāṃ dūyanaṃ madam /
virekasya ca vaiṣamyaṃ vaiṣamyamanalasya ca //
hīnapittasya tu śleṣmā mārutenopasaṃhitaḥ /
stambhaṃ śaityaṃ ca todaṃ ca janayatyanavasthitam //
gauravaṃ mṛdutāmagnerbhaktāśraddhāṃ pravepanam /
nakhādīnāṃ ca śuklatvaṃ gātrapāruṣyameva ca //
mārutastu kaphe hīne pittaṃ ca kupitaṃ dvayam /
karoti yāni liṅgāni śṛṇu tāni samāsataḥ //
bhramamudveṣṭanaṃ todaṃ dāhaṃ sphuṭanavepane /
aṅgamardaṃ parīśoṣaṃ dūyanaṃ dhūpanaṃ tathā //
vātapittakṣaye śleṣmā srotāṃsyapidadhadbhṛśam /
ceṣṭāpraṇāśaṃ mūrcchāṃ ca vāksaṅgaṃ ca karoti hi //
vātaśleṣmakṣaye pittaṃ dehaujaḥ sraṃsayaccaret /
glānimindriyadaurbalyaṃ tṛṣṇāṃ mūrcchāṃ kriyākṣayam //
pittaśelṣmakṣaye vāyurmarmāṇyatinipīḍayan /
praṇāśayati saṃjñāṃ ca vepayatyathavā naram //
doṣāḥ pravṛddhāḥ svaṃ liṅgaṃ darśayanti yathābalam /
kṣīṇā jahati liṅgaṃ svaṃ samāḥ svaṃ karma kurvate //
vātādīnāṃ rasādīnāṃ malānāmojasastathā /
kṣayāstatrānilādīnāmuktaṃ saṃkṣīṇalakṣaṇam //
ghaṭṭate sahate śabdaṃ noccairdravati śūlyate /
hṛdayaṃ tāmyati svalpaceṣṭasyāpi rasakṣaye //
puruṣā sphuṭitā mlānā tvagrūkṣā raktasaṃkṣaye /
māṃsakṣaye viśeṣeṇa sphiggrīvodaraśuṣkatā //
sandhīnāṃ sphuṭanaṃ glānirakṣṇorāyāsa eva ca /
lakṣaṇaṃ medasi kṣīṇe tanutvaṃ codarasya ca //
keśalomanakhaśmaśrudvijaprapatanaṃ śramaḥ /
jñeyamasthikṣaye liṅgaṃ sandhiśaithilyameva ca //
śīryanta iva cāsthīni durbalāni laghūni ca /
pratataṃ vātarogīṇi kṣīṇe majjani dehinām //
daurbalyaṃ mukhaśoṣaśca pāṇḍutvaṃ sadanaṃ śramaḥ /
klaibyaṃ śukrāvisargaśca kṣīṇaśukrasya lakṣaṇam //
kṣīṇe śakṛti cāntrāṇi pīḍayanniva mārutah /
rūkṣasyonnamayan kukṣīṃ tiryagūrdhvaṃ ca gacchati //
mūtrakṣaye mūtrakṛchraṃ mūtravaivarṇyameva ca /
pīāsā bādhate cāsya mukhaṃ ca pariśuṣyati //
malāyanāni cānyāni śūnyāni ca laghūni ca /
viśuṣkāṇi ca lakṣyante yathāsvaṃ malasaṃkṣaye //
bibheti durbalo+abhīkṣṇaṃ dhyāyati vyathitendriyaḥ /
duśchāyo durmanā rūkṣaḥ kṣāmaścaivaujasaḥ kṣaye //
hṛdi tiṣṭhati yacchuddhaṃ raktamīṣatsapītakam /
ojaḥ śarīre saṃkhyātaṃ tannāśānnā vinaśyati //
prathamaṃ jāyate hyojaḥ śarīre+asmiñcharīriṇām /
sarpirvarṇaṃ madhurasaṃ lājagandhi prajāyate //
(bhramaraiḥ phalapuṣpebhyo yathā sdaṃbhiryate madhu /)
(tadvadojaḥ svakarmabhyo guṇaiḥ saṃbhriyate nṛṇām //)
vyāyāmo+anaśanaṃ cintā rūkṣālpapramitāśanam /
vātātapau bhayaṃ śoko rūkṣapānaṃ prajāgaraḥ //
kaphaśoṇitaśukrāṇāṃ malānāṃ cātivartanam /
kālo bhūtopaghātaśca jñātavyāḥ kṣayahetavaḥ //
gurusnigdhāmlalavaṇānyatimātraṃ samaśnatām /
navamannaṃ ca pānaṃ ca nidrāmāsyāsukhāni ca //
tyaktavyāyāmacintānāṃ saṃśodhanamakurvatām/
śleṣmā pittaṃ ca medaśca māṃsaṃ cātipravardhate//
&tairāvṛtagatirvāyuroja ādāya gacchati/
yadā bastiṃ tadā kṛcchro madhumehaḥ pravartate//
sa mārutasya pittasya kaphasya ca muhurmuhuḥ/
darśayatyākṛtiṃ gatvā kṣayamāpyāyate punaḥ/
upekṣayā+asya &jāyante piḍakāḥ sapta dāruṇāḥ/
māṃsaleṣvavakāśeṣu marmasvapi ca saṃdhiṣu//
śarāvikā kacchapikā jālinī sarṣapī tathā/
alajī vinatākhyā ca vidradhī ceti saptamī//
antonnatā madhyanimnā śyāvā kledaruganvitā/
śarāvikā syāt piḍakā śarāvākṛtisaṃsthitā//
avagāḍhārtinistodā mahāvāstuparigrahā/
ślakṣṇā kacchapapṛṣṭhābhā piḍakā kacchapī matā//
stabdhā sirājālavatī snigdhāsrāvā mahāśayā/
rujānistodabahulā sūkṣmacchidrā ca jālinī//
piḍakā nātimahatīkṣiprapākā mahārujā/
sarṣapī sarṣapābhābhiḥ piḍakābhiścitā bhavet//
dahati tvacamutthāne tṛṣṇāmohajvarapradā/
visarpatyaniśaṃ duḥkhāddahatyagnirivālajī//
avagāḍharujākledā pṛṣṭhe vā+apyudare+api vā/
mahatī vinatā nīlā piḍakā vinatā matā//
vidradhiṃ dvividhāmāhurbāhyāmābhyantarīṃ tathā/
bāhyā tvaksnāyumāṃsotthā kaṇḍarābhā mahārujā//
śītakānnavidāhyuṣṇarūkṣaśuṣkātibhojanāt/
viruddhājīrṇasaṃkliṣṭaviṣamāsātmyabhojanāt//
vyāpannabahumadyatvādvegasaṃdhāraṇācchramāt/
jihmavyāyāmaśayanādatibhārādhvamaithunāt//
antaḥśarīre māṃsāsṛgāviśanti& yadā malāḥ/
tadā saṃjāyate granthirgambhīrasthaḥ sudāruṇaḥ//
hṛdaye klomni yakṛti plīhni kukṣau ca vṛkkayoḥ/
nābhyāṃ vaṃkṣaṇayorvā+api bastau vā tīvravedanaḥ//
duṣṭaraktātimātratvāt sa vai śīghraṃ vidahyate/
tataḥ śīghravidāhitvādvidradhītyabhidhīyate//
vyadhacchedabhramānāhaśabdasphuraṇasarpaṇaiḥ/
vātikīṃ, paittikīṃ tṛṣṇādāhamohamadajvaraiḥ//
jṛmbhotkleśārucistambhaśītakaiḥ ślaiṣmikīṃ viduḥ/
sarvāsu &ca mahacchūlaṃ vidradhīṣūpajāyate//
&śastrāstrairbhidyata iva colmukairiva dahyate/
vidradhī vyamlatā yātā vṛścikairiva daśyate//
tanu rūkṣāruṇaṃ śyāvaṃ phenilaṃ vātavidradhī/
tilamāṣakulatthodasannibhaṃ pittavidradhī//
ślaiṣmikī sravati śvetaṃ picchilaṃ bahalaṃ bahu/
lakṣaṇaṃ sarvamevaitadbhajate sānnipātikī//

athāsāṃ vidradhīnāṃ sādhyāsādhyatvaviśeṣajñānārthaṃ sthānakṛtaṃ liṅgaviśeṣamupadekṣyāmaḥ --- tatra pradhānamarmajāyāṃ vidradhyāṃ hṛdghaṭṭanatamakapramohakāsaśvāsāḥ, klomajāyāṃ pipāsāmukhaśoṣagalagrahāḥ, yakṛjjāyāṃ śvāsaḥ, plīhajāyāmucchvāsoparodhaḥ, kukṣijāyāṃ kukṣipārśvāntarāṃsaśūlaṃ, vṛkkajāyāṃ pṛṣṭhakaṭigrahaḥ, nābhijāyāṃ hikkā, vaṃkṣaṇajāyāṃ sakthisādaḥ, bastijāyāṃ &kṛcchrapūtimūtravarcastvaṃ ceti//

pakvaprabhinnāsūrdhvajāsu mukhāt srāvaḥ sravati, adhojāsu gudāt, ubhayatastu nābhijāsu//

āsāṃ hṛnnābhibastijāḥ paripakvāḥ sānnipātikī ca maraṇāya; śeṣāḥ punaḥ kuśalamāśupratikāriṇaṃ cikitsakamāsādyopaśāmyanti/

tasmādacirotthitāṃ vidradhīṃ śastrasarpavidyudagnitulyāṃ snehavirecanairāśvevopakramet sarvaśo gulmavacceti//

bhavanti cātra

vinā pramehamapyetā jāyante duṣṭamedasaḥ /
tāvaccaitā na lakṣyante yāvadvāstuparigrahaḥ //
śarāvikā kacchapikā jālinī ceti duḥsahāḥ /
jāyante tā hyatibalāḥ prabhūtaśleṣmamedasaḥ //
sarṣapī cālajī caiva vinatā vidradhī ca yāḥ /
sādhyāḥ pittolbaṇāstāstu saṃbhavantyalpamedasaḥ //
marmasvaṃse gude pāṇyoḥ stane sandhiṣu pādayoḥ /
jāyante yasya piḍakāḥ a pramehī na jīvati //
tathā+anyāḥ piḍakāḥ santi raktapītāsitāruṇāḥ /
pāṇḍurāḥ pāṇḍuvarṇāśca bhasmābhā mecakaprabhāḥ //
mṛdvyaśca kaṭhināścānyāḥ sthūlāḥ sūkṣmāstathā+aparāḥ /
mandavegā mahāvegāḥ svalpaśūlā mahārujaḥ //
tā buddhvā mārutādīnāṃ yathāsvairhetulakṣaṇaiḥ /
brūyādupacareccāśu prāgupadravadarśanāt //
tṛṭśvāsamāṃsasaṃkothamohahikkāmadajvarāḥ /
vīsarpamarmasaṃrodhāḥ piḍakānāmupadravāḥ //
kṣayaḥ sthānaṃ ca vṛddhiśca doṣāṇāṃ trividhā gatiḥ /
ūrdhvaṃ cādhaśca tiryakca vijñeyā trividhā+aparā //
trividhā cāparā koṣṭhaśākhāmarmāsthisandhiṣu /
ityuktā vidhibhedena doṣāṇāṃ trividhā gatiḥ //
cayaprakopapraśamāḥ pittādīnāṃ yathākramam /
bhavantyekaikaśaḥṣaṭsu kāleṣvabhrāgamādiṣu //
gatiḥ kālakṛtā caiṣā cayādyā punarucyate /
gatiśca dvividhā dṛṣṭā prākṛtī vaikṛtī ca yā //
pittādevoṣmaṇaḥ paktirnarāṇāmupajāyate /
tacca pittaṃ prakupitaṃ vikārān kurute bahūn //
prākṛtastu balaṃ śleṣmā vikṛto mala ucyate /
sa caivaujaḥ smṛtaḥ kāye sa ca pāpmopadiśyate //
sarvā hi ceṣṭā vātena sa prāṇaḥ prāṇināṃ smṛtaḥ /
tenaiva rogā jāyante tena caivoparudhyate //
nityaṃ sannihitāmitraṃ samīkṣyātmānamātmavān /
nityaṃ yuktaḥ paricaredicchannāyuranitvaram //
tatra ślokau
śirorogāḥ sahṛdrogā rogā mānavikalpajāḥ /
kṣayāḥ sapiḍakāścoktā doṣāṇāṃ gatireva ca //
kiyantaḥśirasīye+asminnadhyāye tattvadarśinā /
jñānārthaṃ bhiṣajā prajānāṃ ca hitaiṣiṇā //

ityagniveśakṛte tantre carakapratisaṃskṛte ślokasthāne kiyantaḥśirasīyo nāma saptadaśo+adhyāyaḥ //

1.18. aṣṭādaśo+adhyāyaḥ/

athātastriśothīyamadhyāyaṃ vyākhyāsyāmaḥ //

iti ha smāha bhagavānātreyaḥ //

trayaḥ śothā bhavanti vātapittaśleṣmanimittāḥ te punardvividhā nijāgantubhedena //

tatrāgantavaśchedanabhedanakṣaṇanabhañjanapicchanotpeṣaṇaprahāravadhabandhanaveṣṭanavyadhanapīḍanādibhirvā bhallātakapuṣpaphalarasātmaguptāśūkakrimiśūkāhitapatralatāgulmasaṃsparśanairvā svedanaparisarpaṇāvamūtraṇairvā viṣiṇāṃ saviṣaprāṇisaṃṣṭrādantaviṣāṇanakhanipātairvā sāgaraviṣavātahimadahanasaṃsparśanairvā śothāḥ samupajāyante //

te punaryathāsvaṃ hetuvyañjnairādāvupalabhyante nijavyañjanaikadeśaviparītaiḥ bandhamantrāgadapralepapratāpanirvāpaṇādibhiścopakramairupakramyamāṇāḥ praśāntimāpadyante //

nijāḥ punaḥ snehasvedavamanavirecanāsthāpanānuvāsanaśirovirecanānāmayathāvatprayogānmithyāsaṃsarjanādvā chardyalasakavisūcikāśvāsakāsātisāraśoṣapāṇḍurogodarajvarapradarabhagandarārśovikārātikarśanairvā kuṣṭhakaṇḍūpiḍakādibhirvā chardikṣavathūdgāraśukravātamūtrapurīṣavegadhāraṇairvā karmarogopavāsādhvakarśitasya vā sahasā+atigurvamlalavaṇapiṣṭānnaphalaśākarāgadadhiharitakamadyamandakavirūḍhanavaśūkaśamīdhānyānūpaudakapiśitopayogānmṛtpaṇkaloṣṭabhakṣaṇāllavaṇātibhakṣaṇādgarbhasāpīḍanādāmagarbhaprapatanāt prajātānāṃ ca mithyopacārādudīrṇadoṣatvācca śophāḥ prādurbhavanti ityuktaḥ sāmānyo hetuḥ //

ayaṃ tvatra viśeṣaḥ+asītarūkṣalaghuviśadaśramopavāsātikarśanakṣapaṇādibhirvāyuḥ prakupitastvaṅmāṃsaśoṇitādīnyabhibhūya śophaṃ janayati sa kṣiprotthānapraśamo bhavati tathā śyāmāruṇavarṇaḥ prakṛtivaṛno vā calaḥ spandanaḥ kharaparuṣabhinnatvagromā chidyata iva bhidyata iva pīḍyata iva sūcībhiriva tudyata iva pipīlikābhiriva saṃsṛpyate sarṣapakalkāvalipta iva cimicimāyate saṃkucyata āyamyata iveti vātaśothaḥ ;

uṣṇatīkṣṇakaṭukakṣāralavaṇāmlājīrṇabhojanairagnyātapapratāpaiśca pittaṃ prakupitaṃ tvaṅmāṃsaśoṇitānyabhihbūya śothaṃ janayati sa kṣiprotthānapraśamo bhavati kṛṣṇapītanīlatāmrāvabhāsa uṣṇo ṃrduḥ kapilatāmraromā uṣyate dūyate dhūpyate ūṣmāyate svidyate klidyate na ca sparśamuṣṇaṃ ca suṣūyata iti pittaśothaḥ ;

gurumadhuraśītasnigdhairatisvapnāvyāyāmādibhiśca śleṣmā prakupitastvaṅmāṃsaśoṇitādīnyabhibhūya śothaṃ janayati sa kṛcchrotthānapraśamo bhavati pāṇḍuśvetāvabhāso guruḥ snigdhaḥ ślakṣṇaḥ sthiraḥ styānaḥ śuklāgraromā sparśoṣṇasahaśceti śleṣmaśothaḥ;

yathāsvakāraṇākṛtisaṃsargāddvidoṣajāstrayaḥ śothā bhavanti yathāsvakāraṇākṛtisannipātāt sānnipātika ekaḥ; &evaṃ saptavidho bhedaḥ //

&prakṛtibhistābhistābhirbhidymāno dvividhastrividhaścaturvidhā saptavidho+aṣṭavidhaśca śotha upalabhyate &punaścaika evotsedhasāmānyāt //

bhavanti cātra

śūyante yasya gātrāṇi svapantīva rujanti ca /
pīḍitānyunnamāntyāśu vātaśothā tamādiśet //
yaścāpyaruṇavarṇābhaḥ śotho naktaṃ praṇaśyati /
snehoṣṇamardanābhyāṃ ca praṇaśyet sa ca vātikaḥ //
yaḥ pipāsājvarārtasya dūyate+atha vidahyate /
svidyati klidyate gandhī sa paittaḥ śvayatuḥ smṛtaḥ //
yaḥ pītanetravaktratvak pūrvaṃ madhyāt praśūyate /
tanutvak cātisārī ca pitaśothaḥ sa ucyate //
śītaḥ saktagatiryastu kaṇdūmān pāṇḍureva ca /
nipīḍito nonnamati śvayatuḥ sa kaphātmaḥ //
yasya śastrakuśacchinnācchoṇitaṃ na pravatate /
kṛcchreṇa picchā sravati sa cāpi kaphasaṃbhavaḥ //
nidānākṛtismāsargācchvayathuḥ syāddvidoṣajaḥ /
sarvākṛtiḥ sannipātācchotho vyāmiśrahetujaḥ //
ystu pādābhinirvṛttaḥ śothaḥ sarvāṅgago bhavaet /
jantoḥ sa ca sukaṣṭaḥ syāt prasṛtaḥ strīmukhācca yaḥ //
yaścāpi guhyaprabhavaḥ striyā vā puruṣasya vā /
sa ca kaṣṭatamo jñeyo yasya ca syurupadravāḥ //
chardiḥ śvāso+arucistṛṣṇā jvaro+atīsāra eva ca /
saptako+ayaṃ sadaurbalyaḥ śophopadaravasaṃgrahaḥ //
yasya śleṣmā prakupito jihvāmūle+avatiṣṭhate /
āśu saṃjanayecchothā jāyate+asyopajihvikā //
yasya śleṣmā prakupitaḥ kākale vyavatiṣṭhate /
āśu saṃjanayecchophaṃ karoti galaśuṇḍikām //
yasya śleṣmā prakupito galabāhye+avatiṣṭhate /
śanaiḥ saṃjanayecchophaṃ galagaṇḍo+asya jāyate //
yasya śleṣmā prakupitastiṣṭhatyantargale sthiraḥ /
āśu saṃjanayechophaṃ jāyate+asya galagrahaḥ //
yasay pittaṃ prakupitā saraktaṃ tvaci sarpapi /
śophaṃ sarāgām janayedvisarpastasya jāyate //
yasya pittaṃ prakupitaṃ tvaci rakte+avatiṣṭhate /
śothaṃ sarāgaṃ janayet piḍakā tasya jāyate //
yasya prakupitaṃ pittaṃ śoṇitaṃ prāpya śuṣyati /
tilakā piplavo vyaṅgā nīlikā tasya jāyate //
yasya pittaṃ prakupitā śaṅkhayoravatiṣṭhate /
śvaythuḥ śaṅkhako nāma dāruṇastasya jāyate //
yasya pittaṃ prakupitaṃ karṇamūle+avatiṣṭhate /
jvarānte durjayo+antāya śothastasyopajāyate //
vātaḥ plīhānamuddhūya kupito yasya tiṣṭhati /
śaniḥ paritudana pārśvaṃ plīhā tasyābhivardhate //
yasya vāyuḥ prakupito gulmasthāne+avatiṣṭhate /
śophaṃ saśūlaṃ janayan gulmastasyopajāyate //
yasya vāyuḥ prakupitaḥ śophaśūlakaraścaran /
vaṅkṣaṇādvṛṣaṇau yāti vṛddhistasyopajāyate //
yasya vātaḥ prakupitastvaṅmāṃsāntaramāśritaḥ /
śothaṃ saṃjanayet kukṣāvduaraṃ tasya jāyate //
yasya vātaḥ prakupitaḥ kukṣimāśritya tiṣṭhati /
nādho vrajati nāpyūrdhvamānāhastasya jāyae //
rogāścotsedhasāmānyadadhimāṃsārbudādayaḥ /
viśiṣṭā nāmarūpābhyāṃ nirdeśyāḥ śothasaṃgrahe //
vātapittakaphā yasya yugapat kupitāstrayaḥ /
jihvāmūle+avatiṣṭhante vidahantaḥ samucchiritāḥ //
janayanti bhṛśaṃ śothaṃ vedanāśca pṛthagvidhāḥ /
taṃ śīghrakāriṇaṃ rogaṃ rohiṇīti vinirdiśet //
trirātraṃ paramaṃ tasya jantorbhavati jīvitam /
kuśalena tvanukrāntaḥ kṣipraṃ saṃpadyate sukhī //
santi hyevaṃvidhā rogāḥ sādhyā dāruṇasaṃmatāḥ /
ye hanyuranupakrāntā mithyācāreṇa vā vā punaḥ //
sādhyāścāpyapare santi vyādhayo mṛdusaṃmatāḥ /
yatnāyatnakṛtaṃ yeṣu karma sidhyatyasaṃśayam //
asādhyāścāpare santi vyādhayo yāpyasaṃjñitāḥ /
susādhvapi kṛtaṃ yeṣu karma yātrākaraṃ bhavet //
santi cāpyapare rogā yeṣ karema na sidhyati /
api yatnakṛtaṃ vālairna tān vidvānupācaret //
sādhyāścaivāpyasādhyāśca vyādhayo dvividhāḥ smṛtāḥ /
mṛdudāruṇabhedena te bhavanti caturvidhāḥ //
ta evāparisaṃkhyeyā bhidyamānā bhavanti hi /
rujāvarṇasamutthānasthānasaṃsthānanāmabhiḥ //
vyavasthākaraṇaṃ teṣāṃ yathāsthūleṣu saṃgrahaḥ /
tathā prakṛtisāmānyaṃ vikāreṣūpadiśyate //
vikāranāmākuśalo na jihrīyāt kadācana /
na hi sarvavikārāṇāṃ nāmato+asti dhruvā sthitiḥ //
sa eva kupito doṣaḥ samutthānaviśeṣataḥ /
sthānāntaragataścaiva janayatyāmayān bahūn //
tasmādvikāraprakṛtīradhiṣṭhānāntarāṇi ca /
samutthānaviśeṣāṃśca buddhvā karma samācaret //
yo hyetastritayaṃ jñātvā karmāṇyārabhate bhiṣak /
jñānapūrvaṃ yathānyāyaṃ sa karmasu na muhyati //
nityāḥ prāṇabhṛtāṃ dehe vātapittakaphāstrayaḥ /
vikṛtāḥ prakṛtisthā vā tān bubhutseta paṇḍitaḥ //
utsāhocchvāsaniḥśvāsaceṣṭā dhātugatiḥ samā /
samo mokṣo gatimatāṃ vāyoḥ karmāvikārajam //
darśanaṃ paktirūṣmā ca kṣuttṛṣṇā dehamārdavam /
prabhā prasādo medhā ca pittakarmāvikārajam //
sneho bandhaḥ sthiratvaṃ ca gaurvaṃ vṛṣatā balam /
kṣamā dhṛtiralobhaśca kaphakarmāvikārajam //
vāte pitte kaphe caiva kṣīṇe lakṣaṇamucyate /
karmaṇaḥ prākṛtāddhānirvṛddhirvā+api virodhinām //
doṣaprakṛtivaiśeṣyaṃ niyataṃ vṛddhilakṣaṇam /
doṣāṇāṃ prakṛtirhānirvṛddhiścaivaṃ pakrīkṣyate //
tatra ślokāḥ
saṃkhyāṃ nimittaṃ rūpāṇi śothānāṃ sādhyatāṃ na ca /
teṣāṃ teṣāṃ vikārāṇāṃ śothāṃstāṃstāṃśca pūrvajān //
vidhibhedaṃ vikārāṇāṃ trividhā bodhyasaṃgraham /
prākṛtaṃ karma doṣāṇāṃ lakṣaṇaṃ hānivṛddhiṣu //
vītamoharajodoṣalobhamānamadaspṛhaḥ /
vyākhyātavāṃstriśothīye rogādhyāye punarvasuḥ //

ityagniveśakṛte tantre carakapratisaṃskṛte ślokasthāne triśothīyo nāmāṣṭādaśo+adhyāyaḥ //

1.19. ūnaviṃśo+adhyāyaḥ/

athāto+aṣṭodarīyamadhyāyaṃ vyākhyāsyāmaḥ //

iti ha smāha bhagavānātreyaḥ //

iha khalvaṣṭāvudarāṇi, aṣṭau mūtrāghātaḥ, aṣṭau kṣīradoṣāḥ, aṣṭau retodoṣāḥ; sapta kuṣṭhāni, sapta piḍakāḥ, sapta visarpāḥ; ṣaḍatīsārāḥ, ṣaḍudāvartāḥ, pañca gulmāḥ, pañca plīhadoṣāḥ, pañca kāsāḥ, pañca śvāsāḥ, pañca hikkāḥ, pañca tṛṣṇāḥ, pañca chardayaḥ, pañca bhaktasyānaśanasthānāni, pañca śirorogāḥ, pañca hṛdrogāḥ, pañca pāṇḍurogāḥ, pañconmādāḥ; catvāro+apasmārāḥ, catvāro+akṣirogāḥ, catvāraḥ karṇarogāḥ, catvāraḥ pratiśyāyāḥ, catvāro mukharogāḥ, catvāro grahaṇīdoṣāḥ, catvāro madāḥ, catvāro mūrcchāyāḥ, catvāraḥ śoṣāḥ, catvāri klaibyāni; trayaḥ śophāḥ, trīṇi kilāsāni, trividhaṃ lohitapittaṃ; dvau jvarau, dvau vraṇau, dvāvāyāmau, dve gṛdhrasyau, dve kāmale, dvididhamāmaṃ, dvividhaṃ vātaraktaṃ, dvividhānyarśāṃsi; eka ūrustambhaḥ, ekaḥ saṃnyāsaḥ, eko mahāgadaḥ; viṃśatiḥ krimijātayaḥ, viṃśatiḥ pramehāḥ, viṃśatiryonivyāpadaḥ; ityaṣṭacatvāriṃśadrogādhikaraṇānyasmin saṃgrahe samuddiṣṭāni //

etāni yathoddeśamabhinirdekṣyāmaḥ--- aṣṭāvudarāṇīti vātapittakaphasannipātaplīhabaddhacchidradakodarāṇi, aṣṭau mūtrāghātā iti vātapittakaphasannipātāśmarīśarkarāśukraśoṇitajāḥ, aṣṭau kṣīradoṣā iti vaivarṇyaṃ vaigandhyaṃ vairasyaṃ paicchilyaṃ phenasaṅghāto raukṣyaṃ gauravamatisnehaśca, aṣṭau retodoṣā iti tanu śuṣkaṃ phenilamaśvetaṃ pūtyatipicchalamanyadhātūpahitamavasādi ca (1);

sapta kuṣṭhānīti kapālodumbaramaṇḍalarṣyajihvapuṇḍarīkasidhmakākaṇāni, sapta piḍakā iti śarāvikā kacchapikā jālinī sarṣapyalajī vinatā vidradhī ca, sapta visarpā iti vātapittakaphāgnikardamakagranthisannipātākhyāḥ (2);

ṣaḍatīsārā iti vātapittakaphasannipātabhayaśokajāḥ, ṣaḍudāvartā iti vātamūtrapurīṣaśukracchardikṣavathujāḥ (3);

pañca gulmā iti vātapittakaphasannipātaśoṇitajāḥ, pañca plīhadoṣā iti gulmairvyākhyātāḥ, pañca kāsā iti vātapittakaphakṣatakṣayajāḥ, pañca śvāsā iti mahordhvacchinnatamakakṣudrāḥ, pañca hikkā iti mahatī gambhīrā vyapetā kṣudrā+annajā ca, pañca tṛṣṇā iti vātapittāmakṣayopasargātmikāḥ, pañca chardaya iti dviṣṭārthasaṃyogajā vātapittakaphasannipātodrekotthāśca&, pañca bhaktasyānaśanasthānānīti vātapittakaphasannipātadveṣāḥ, pañca śirorogā iti pūrvoddeśamabhisamasya vātapittakaphasannipātakrimijāḥ, pañca hṛdrogā iti śirorogairvyākhyātāḥ, pañca pāṇḍurogā iti vātapittakaphasannipātamṛdbhakṣaṇajāḥ, pañconmādā iti vātapittakaphasannipātāgantunimittāḥ (4);

catvāro+apasmārā iti vātapittakaphasannipātanimittāḥ, catvāro+akṣirogāścatvāraḥ karṇarogāścatvāraḥ pratiśyāyāścatvāro mukharogāścatvāro grahaṇīdoṣāścatvāro madāścatvāro mūrcchāyā ityapasmārairvyākhyātāḥ, catvāraḥ śoṣā iti sāhasasandhāraṇakṣayaviṣamāśanajāḥ, catvāri klaibyānīti bījopaghātāddhvajabhaṅgājjarāyāḥ śukrakṣayācca (5);

trayaḥ śothā iti vātapittaśleṣmanimittāḥ, trīṇi kilāsānīti raktatāmraśuklāni, trividhaṃ lohitapittamiti ūrdhvabhāgamadhobhāgamubhayabhāgaṃ ca (6);

dvau jvarāviti uṣṇābhiprāyaḥ śītasamutthaśca śītābhiprāyaścoṣṇasamutthaḥ, dvau vraṇāviti nijaścāgantujaśca, dvāvāyāmāviti bāhyaścābhyantaraśca, dve gṛdhrasyāviti vātādvātakaphācca, dve kāmale iti koṣṭhāśrayā śākhāśrayā ca, dvividhamāmamiti alasako visūcikā ca, dvividhaṃ vātaraktamiti gambhīramuttānaṃ ca, dvividhānyarśāṃsīti śuṣkāṇyārdrāṇi ca (7);

eka ūrustambha ityāmatridoṣasamutthaḥ, ekaḥ saṃnyāsa iti tridoṣātmako manaḥśarīrādhiṣṭhānaḥ, eko mahāgada iti atattvābhiniveśaḥ (8);

viṃśatiḥ kramijātaya iti yūkā pipīlikāśceti dvividhā bahirmalajāḥ, keśādā lomādā lomadvīpāḥ saurasā audumbarā jantumātaraśceti ṣaṭ śoṇitajāḥ, antrādā udarāveṣṭā hṛdayādāścuravo darbhapuṣpāḥ saugandhikā mahāgudāśceti sapta kaphajāḥ, kakerukā makerukā lelihāḥ saśūlakāḥ sausurādāśceti pañca purīṣajāḥ; viṃśatiḥ pramehā ityudakamehaścekṣubālikārasamehaśca sāndramehaśca sāndraprasādamehaśca śuklamehaśca śukramehaśca śītamehaśca śanairmehaśca sikatāmehaśca lālāmehaśceti daśa śleṣmanimittāḥ, kṣāramehaśca kālamehaśca nīlamehaśca lohitamehaśca mañjiṣṭhāmehaśca haridrāmehaśca hastimehaśca madhumehaśceti catvāro vātanimittāḥ, iti viṃśatiḥ pramehāḥ; viṃśatiryonivyāpada iti vātikī paittikī śleṣmikī sānnipātikī ceti catasro doṣajāḥ, doṣadūṣyasaṃsargaprakṛtinirdeśairavaśiṣṭāḥ ṣoḍaśa nirdiśyante, tadyathā --- raktayoniścārajaskā cācaraṇā cāticaraṇā ca prākcaraṇā copaplutā ca pariplutā codāvartinī ca karṇinī ca putraghnī cāntarmukhī ca sūcīmukhī ca śuṣkā ca vāminī ca ṣaṇḍhayoniśca mahāyoniśceti viṃśatiryonivyāpado bhavanti (9);

kevalaścāyamuddeśo yathoddeśamabhinirdiṣṭo bhavati//

sarva eva nijā vikārā nānyatra vātapittakaphebhyo nirvartante yathāhi śakuniḥ sarvā divasamapi paripatan svāṃ chāyāṃ nātivartate tathā svadhātuvaiṣamyanimittāḥ sarve vikārā vātapittakaphānnātiartante /

vātapittaśleṣmaṇāṃ punaḥ sthānasaṃsthānaprakṛtiviśeṣānabhisamīkṣya tadātmakānapi ca sarvavikārāṃstānevopadiśanti buddhimantaḥ //

bhavataścātra

svadhātuvaiṣamyanimittajā ye vikārasaṃghā bahavaḥ śarīre /
na te pṛthak pittakaphānilebhya āgantavastveva tato viśiṣṭāḥ //
āganturanveti nijaṃ vikāraṃ nijastathā+āgantumapi pravṛddhaḥ /
tatrānubandhaṃ prakṛtiṃ ca samyag jñātvā tataḥ karma samārabheta //
tatra ślokau
viṃśakāścaikakāścaiva trikāścoktāstrayastrayaḥ /
dvikāścāṣṭau catuṣkāśca daśa dvādaśa pañcakāḥ //
catvāraścāṣṭakā vargāḥ ṣaṭkau dvau saptakāstrayaḥ /
aṣṭodarīye rogāṇāṃ rogādhyāye prakāśitāḥ //

ityagniveśakṛte tantre carakapratisaṃskṛte ślokasthāne+aṣṭodarīyo nāmonaviṃśo+adhyāyaḥ //

1.20. viṃśo+adhyāyaḥ/

athāto mahārogādhyāyaṃ vyākhyāsyāmaḥ //

iti ha smāha bhagavānātreyaḥ //

catvāro rogā bhavanti āgantuvātapittaśleṣamnimittāḥ teṣāṃ caturṇāmapi rogāṇāṃ rogatvamekavidhaṃ bhavati ruksāmānyāt dvividhā punaḥ prakṛtireṣām āgantunijavibhāgāt dvividhaṃ caiṣāmadhiṣṭhānaṃ manaḥśarīraviśeṣāt vikārāḥ punaraparisaṃkhyeyāḥ prakṛtyadhiṣṭhānaliṅgāyatanavikalpaviśeṣāparisaṃkhyeyatvāt //

sukhāni tu svalvāgantornakhadaśanapatanābhicārābhiśāpābhiṣaṅgābhighātavyadhabandhānaveṣṭanapīḍanarajjudahanaśastrāśanibhūtopasargādīni nijasya tu mukhaṃ vātapittaśleṣmaṇāṃ vaiṣamyam //

dvayostu khalvāgantunijayoḥ preraṇamasātmyendriyārthasaṃyogaḥ prajñāparādhaḥ pariṇāmaśceti //

sarve+api tu khalvete+abhipravṛddhāścatvāro rogāḥ parasparamanubadhnanti na cānyonyena saha sandehamāpadyante //

āganturhi vyathāpūrvaṃ samutpanno jaghanyaṃ vātapittaśleṣmaṇāṃ vaiṣamyamāpādayati nije tu vātapittaśleṣmāṇaḥ pūrvaṃ vaiṣamyamāpadyante jaghanyaṃ vyathāmabhinirvartayanti //

teṣāṃ trayāṇāmapi doṣāṇāṃ śarīre sthānavibhāga upadekṣyate tadyathā bastiḥ purīṣādhānaṃ kaṭiḥ sakthinī pādāvasthīni pakvāśayaśca vātasthānāni tatrāpi pakvāśayo viśeṣeṇa vātasthānaṃ svedo raso lasīkā rudhiramāmāśayaśca pittasthānāni tatrāpyāmāśayo viśeṣeṇa pittasthānam uraḥ śiro grīvā parvāṇyāmāśayo medaśca śleṣmasthānāni tatrāpyuro viśeṣeṇa śleṣmasthānam //

sarvaśarīracarāstu vātapittaśleṣmāṇaḥ sarvasmiñcharīre kupitākupitāḥ śubhāśubhāni kurvanti prakṛtibhūtāḥ śubhānyupacayabalavarṇaprasādādīni aśubhāni punarvikṛtimāpannā vikārasaṃjñakāni //

tatra vikārāḥ sāmānyajā nānātmajāśca /

tatra sāmānyajāḥ pūrvamaṣṭodarīye vyākhyātāḥ nānātmajāṃstvihādhyāye+anuvyākhyāsyāmaḥ /

tadyathā aśītirvātravikārāḥ catvāriṃśat pittavikārāḥ viṃśatiḥ śleṣmavikārāḥ //

tatrādau vātavikārānanuvyākhyāsyāmaḥ /

tadyathā nakhabhedaśca, vipādikā ca, pādaśūlaṃ ca, pādabhraṃśaśca, pādasuptatā ca, vātakhuḍḍatā ca, gulphagrahaśca, piṇḍikodveṣṭanaṃ ca, gṛdhrasī ca, jānubhedaśca, jānuviśleṣaśca, ūrustambhaśca, ūrusādaśca, pāṅgulyaṃ ca, gudabhrāṃśaśca, gudārtiśca, &vṛṣaṇākṣepaśca, śephastambhaśca, vaṅkṣaṇānāhaśca, śroṇibhedaśca, viḍbhedaśca, udāvartaśca, khañjatvaṃ ca, &kubjatvaṃ ca, vāmanatvaṃ ca, trikagrahaśca, pṛṣṭhagrahaśca, pārśvāvamardaśca, udarāveṣṭaśca, hṛnmohaśca, hṛddravaśca, &vakṣaudgharṣaśca, vakṣauparodhaśca, vakṣastodaśca, bāhuśoṣaśca, grīvāstambhaśca, manyāstambhaśca, kaṇṭhoddhvaṃsaśca, &hanubhedaśca, oṣṭhabhedaśca, &akṣibhedaśca, dantabhedaśca, dantaśaithilyaṃ ca, mūkatvaṃ ca&, vāksaṅgaśca, kaṣāyāsyatā ca, mukhaśoṣaśca, arasajñatā ca, ghrāṇanāśaśca, karṇaśūlaṃ ca, aśabdaśravaṇaṃ ca, uccaiḥśrutiśca&, bādhiryaṃ ca, vartmastambhaśca, vartmasaṅkocaśca, timiraṃ ca, akṣiśūlaṃ ca, akṣivyudāsaśca, bhrūvyudāsaśca, śaṅkhabhedaśca, lalāṭabhedaśca, śiroruk ca keśabhūmisphuṭanaṃ ca, arditaṃ ca, ekāṅgarogaśca, sarvāṅgarogaśca, &pakṣavadhaśca, ākṣepakaśca, daṇḍakaśca, &tamaśca, bhramaśca, vepathuśca, jṛmbhā ca, &hikkā ca, viṣādaśca, atipralāpaśca, raukṣyaṃ ca, pāruṣyaṃ ca, śyāvāruṇāvabhāsatā ca, asvapnaśca, anavasthitacittatvaṃ ca; ityaśītirvātavikārā vātavikārāṇāmaparisaṃkhyeyānāmāviṣkṛtatamā vyākhyātāḥ //

sarveṣvapi khalveteṣu vātavikāreṣūkteṣvanyeṣu cānukteṣu vāyoridamātmarūpamapariṇāmi karmaṇaśca svalakṣaṇaṃ yadupalabhya tadavayavaṃ vā vimuktasandehā vātavikāramevādhyavasyanti kuśalāḥ; tadyathā --- raukṣyaṃ śaityaṃ lāghavaṃ vaiśadyaṃ gatiramūrtatvamanavasthitatvaṃ ceti vāyorātmarūpāṇi; &evaṃvidhatvācca vāyoḥ karmaṇaḥ svalakṣaṇamidamasya bhavati taṃ taṃ śarīrāvayavamāviśataḥ&; tadyathā --- sraṃsabhraṃsavyāsasaṅgabhedasādaharṣatarṣakampavartacālatodavyathāceṣṭādīni, tathā kharaparuṣaviśadasuṣirāruṇavareṇakaṣāyavirasamukhatvaśoṣaśūlasuptisaṅkocanastambhanakhañjatādīni ca vāyoḥ karmāṇi; tairanvitaṃ vātavikāramevādhyavasyet //

taṃ madhurāmlalavaṇasnigdhoṣṇairupakramairupakrameta, snehasvedāsthāpanānuvāsananastaḥkarmabhojanābhyaṇgotsādanapariṣekādibhirvātaharairmātrāṃ kālaṃ ca pramāṇīkṛtya tatrāsthāpanānuvāsanaṃ tu khalu sarvatropakramebhyo vāte pradhānatamaṃ manyante bhiṣajaḥ, taddhyādita eva pakvāśayamanupraviśya kevalaṃ vaikārikaṃ vātamūlaṃ chinatti; tatrāvajite+api vāte śarīrāntargatā vātavikārāḥ praśāntimāpadyante, yathā vanaspatermūle chinne skandhaśākhāprarohakusumaphalapalāśāīnāṃ niyato vināśastadvat //

pittavikārāṃścatvāriṃśatamata ūrdhvamanuvyākhyāsyāmaḥ --- oṣaśca, ploṣaśca, dāhaśca, davathuśca, dhūmakaśca, amlakaśca, vidāhaśca, antardāhaśca, aṃsadāhaśca&, ūṣmādhikyaṃ ca, atisvedaśca (aṅgasvedaśca), aṅgagandhaśca, aṅgāvadaraṇaṃ& ca, śoṇitakledaśca, māṃsakledaśca, tvagdāhaśca, (&māṃsadāhaśca), tvagavadaraṇaṃ ca, carmadalanaṃ& ca, raktakoṭhaśca, raktavisphoṭaśca, raktapittaṃ ca, raktamaṇḍalāni ca, haritatvaṃ ca, hāridratvaṃ ca, nīlikā ca, kakṣā(kṣyā)ca, kāmalā ca, tiktāsyatā ca, lohitagandhāsyatā ca, pūtimukhatā ca, tṛṣṇādhikyaṃ ca, atṛptiśca, āsyavipākaśca, galapākaśca, akṣipākaśca, gudapākaśca, meḍhrapākaśca, jīvādānaṃ ca&, tamaḥpraveśaśca, haritahāridranetramūtravarcastvaṃ ca; iti catvāriṃśatpittavikārāḥ pittavikārāṇāmaprisaṃkhyeyānāmāviṣkṛtatamā vyākhyātāḥ //

sarveṣvapi khalveteṣu pittavikāreṣūkteṣvanyeṣu cānukteṣu pitasyedamātmarūpamapariṇāmi karmaṇaśca svalakṣaṇaṃ, yadupalabhya tadavayavaṃ vā vimuktasaṃdehāḥ pittavikāramevādhyavasyanti kuśalāḥ; tadyathā --- auṣṇyaṃ taikṣṇyaṃ dravatvamanatisneho varṇaśca śuklāruṇavarjo gandhaśca visro rasau ca kaṭukāmlau saratvaṃ ca pittasyātmarūpāṇi; evaṃvidhatvācca pittasya karmaṇaḥ svalakṣaṇamidamasya bhavati taṃ taṃ śarīrāvayavamāviśataḥ; tadyathā --- dāhauṣṇyapākasvedakledakothakaṇḍūsravarāgā yathāsvaṃ ca gandhavarṇarasābhinirvartanaṃ pittasya karmāṇi tairanvitaṃ pittavikāramevādhyavasyet //

taṃ madhuratiktakaṣāyaśītairupakramairupakrameta snehavirekapradehapariṣekābhyaṅgādibhiḥ pittaharairmātrāṃ kālaṃ ca pramāṇīkṛtya; virecanaṃ tu sarvopakramebhyaḥ pitte pradhānatamaṃ manyante bhiṣajaḥ; taddhyādita evāmāśayamanupraviśya kevalaṃ vaikārikaṃ pittamūlamapakarśati, tatrāvajite pitte+api śarīrāntargatāḥ pittavikārāḥ praśāntimāpadyante, yathā+agnau vyapoḍhe kevalamagnigṛhaṃ śītībhavati tadvat //

śleṣmavikārāṃśca viṃśatimata ūrdhvaṃ vyākhyāsyāmaḥ; tadyathā --- tṛptiśca, tandrā ca, nidrādhikyaṃ ca, staimityaṃ ca, gurugātratā ca, ālasyaṃ ca, mukhamādhuryaṃ ca, mukhasrāvaśca, śleṣmodgiraṇaṃ ca, malasyādhikyaṃ ca, &balāsakaśca, apaktiśca, hṛdayopalepaśca, kaṇṭhopalepaśca, dhamanīprati(vi)cayaśca, galagaṇḍaśca, atisthaulyaṃ ca, śītāgnitā ca, udardaśca, śvetāvabhāsatā ca, śvetamūtranetravarcastvaṃ ca; iti viṃśatiḥ śelṣmavikārāḥ śleṣmavikārāṇāmaparisaṃkhyeyānāmāviṣkṛtatamā vyākhyātā bhavanti //

sarveṣvapi khalveteṣu śleṣmavikāreṣūkteṣvanyeṣu cānukteṣu śleṣmaṇa idamātmarūpamapariṇāmi karmaṇaśca svalakṣaṇaṃ yadupalabhya tadavayavaṃ vā vimuktasaṃdehāḥ śleṣmavikāramevādhyavasyanti kuśalāḥ; tadyathā --- snehaśaityaśauklyagauravamādhuryashtairyapaicchilyamārtsnyāni śleṣmaṇa ātmarūpāṇi; evaṃvidhatvācca& śleṣmaṇaḥ karṃaṇaḥ svalakṣaṇamidamasya bhavati taṃ taṃ śarīrāvayavamāviśataḥ; tadyathā --- śvaityaśaityakaṇḍūsthairyagauravasnehasuptikledopadehabandhamādhurayacirakāritvāni śleṣmaṇaḥ karmāṇiḥ; tairanvitaṃ śleṣmavikāramevādhyavasyet //

taṃ kaṭukatiktakaṣāyatīkṣnoṣṇarūksāirupakramairupakrameta svedavamanaśirovirecanavyāyāmādibhiḥ śleṣmaharairmātrāṃ kālaṃ ca pramāṇīkṛtya; vamanaṃ tu sarvopakramebhyaḥ śleṣmaṇi pradhānatamaṃ manyante bhiṣajaḥ, taddhyādita evāmāśayamanupraviśyorogatā kevalaṃ vaikārikaṃ śleṣmamūlamūrdhvamutkṣipati, tatrāvajite śleṣmaṇyapi śarīrāntargatāḥ śleṣmavikārāḥ praśāntimāpadyante, yathā bhinne kedārasetau śāliyavaṣaṣṭikādīnyanabhiṣyandyamānānyambhasā praśoṣamāpadyane tadvaditi //

bhavanti cātra

rogamādau parīkṣeta tato+anantaramauṣadham /
tataḥ karma bhiṣak paścājjñānapūrvaṃ samācaret //
yastu rogamavijñāya karmāṇyārabhate bhiṣak /
apyauṣadhavidhānajñastasya siddhiryadṛcchayā //
yastu rogaviśeṣajñaḥ sarvabhaiṣajyakovidaḥ /
deśakālapramāṇajñastasya siddhirasaṃśayam //
tatra ślokāḥ
saṃgrahaḥ prakṛtirdeśo vikāramukhamīraṇam /
asandeho+anubandhaṃśca rogāṇāṃ saṃprakāśitaḥ //
doṣasthānāni rogāṇāṃ gaṇā nānātmajāśca ye /
rūpaṃ pṛthak ca doṣāṇāṃ karma cāpariṇāmi yat //
pṛthaktvena ca doṣāṇāṃ nirdiṣṭāḥ samupakramāḥ /
samyaṅmahati rogāṇāmadhyāye tattvadarśinā //

ityagniveśakṛte tantre carakapratisaṃskṛte ślokasthāne mahārogādhyāyo nāma viṃśo+adhyāyaḥ //

samāpto rogacatuṣkaḥ //

1.21. ekaviṃśo+adhyāyaḥ

athāto+aṣṭauninditīyamadhyāyaṃ vyākhyāsyāmaḥ //

iti ha smāha bhagavānātreyaḥ //

iha khalu śarīramadhikṛtyāṣṭau puruṣā ninditā bhavanti; tadyathā --- atidīrghaśca, atihrasvaśca, atilomā ca, alomā ca&, atikṛṣṇaśca, atigauraśca, atisthūlaśca, atikṛśaśceti //

tatrātisthūlakṛśayorbhūya evāpare ninditaviśeṣā bhavanti /

atisthūlasya tāvadāyuṣo hrāso &javoparodhaḥ kṛcchravyavāyatā daurbalyaṃ daurgandhyaṃ svedābādhaḥ kṣudatimātraṃ pipāsātiyogāśceti bhavantyaṣṭau doṣāḥ /

tadatisthaulyamatisaṃpūraṇādgurumadhuraśītasngidhopayogādavyāyāmādavyavāyāddivāsvapnāddharṣanityatvādacintanādbījasvabhāvāccopajāyate /

tasya hyatimātramedasvino& meda evopacīyate na tathetare dhātavaḥ, tasmādasyāyuṣo hrāsaḥ; śaithilyāt saukumāryādgurutvācca medaso &javoparodhaḥ, śukrābahutvānmedasā++āvṛtamārgatvācca kṛcchravyavāyatā, daurbalyamasamatvāddhātūnāṃ, daurgandhyaṃ medodoṣānmedasaḥ svabhāvāt svedanatvācca, medasaḥ śleṣmasaṃsargādviṣyanditvādbahutvādgurutvādvyāyāmāsahatvācca svedābādhaḥ, tīkṣṇāgnitvāt prabhūtakoṣṭhavāyutvācca kṣudatimātraṃ pipāsātiyogaśceti //

bhavanti cātra

medasā+āvṛtamārgatvādvāyuḥ koṣṭhe viśeṣataḥ /
caran saṃdhukṣayatyagnimāhāraṃ śoṣayatyapi //
tasmāt sa śīghraṃ jarayatyāhāraṃ cātikāṅkṣati /
vikārāṃścāśnute ghorān kāṃścitkālavyatikramāt //
etāvupadravakarau viśeṣādagnimārutau /
etau hi dahataḥ sthūlā vanadāvo vanā yathā //
medasytīva saṃvṛddhe sahasaivānilādayaḥ /
vikārān dāruṇān kṛtvā nāśayantyāśu jīvitam //
medomāṃsātivṛddhatvāccalasphigudarastanaḥ /
ayathopacayotsāho naro+atisthūla ucyate //
iti medasvino doṣā hetavo rūpameva ca /
nirdiṣṭaṃ vakṣyate vācyamatikārśye tvataḥ param //
sevā rūkṣānnapānānām laṅghanaṃ pramityāśanam /
kriyātiyogaḥ śokaśca veganidrāvinigrahaḥ //
rūkṣasyodvartanaṃ snānasyābhyāsaḥ prakṛtirjarā /
vikārānuśayaḥ krodhaḥ kruvantyatikṛśaṃ naram //
vyāyāmamatisauhityaṃ kṣutpipāsāmayauṣadham /
kṛśo na sahate tadvadatiśītoṣṇamaithunam //
plīhā kāsaḥ kṣayaḥ śvāso gulmo+arśāṃsyudarāṇi ca /
kṛśaṃ prāyo+abhidhāvanti rogāśca grahaṇīgatāḥ //
śuṣkasphigudaragrīvo dhamanījālasantataḥ /
tvagasthiśeṣo+atikṛśaḥ sthūlaparvā naro mataḥ //
satataṃ vyādhitāvetāvatisthūlakṛśau narau /
satataṃ copacaryau hi karśanairbṛṃhaṇairapi //
sthaulyakārśye varaṃ kārśyaṃ samopakaraṇau hi tau /
yadyubhau vyādhirāgacchet sthūlamevātipīḍayet //
samamāṃsapramāṇastu samasāhanano naraḥ /
dṛḍhendriyo vikārāṇāṃ na balenābhibhūyate //
kṣutpipāsātapasaḥ śītavyāyāmasaṃsahaḥ /
samapaktā samajaraḥ samamāṃsacayo mataḥ //
guru cātarpaṇaṃ ceṣṭaṃ sthūlānāṃ karśanaṃ prati /
kṛśānāṃ bṛṃhaṇārthaṃ ca laghu saṃtarpaṇaṃ ca yat //
vātaghnānyannapānāni śleṣmamedoharāṇi ca /
rūkṣoṣṇā vastayastīkṣṇā rūkṣāṇyudvartanāni ca //
guḍūcībhadramustānāṃ prayogastraiphalastathā /
takrāriṣṭaprayogāśca prayogo mākṣikasya ca //
viḍaṅgaṃ nāgaraṃ kṣāraḥ kālaloharajo madhu /
yavāmalakacūrṇaṃ ca prayogaḥ kṣaudrasaṃyutaḥ /
bilvādipañcamūlasya prayogaḥ kṣaudrasaṃyutaḥ /
śilājatuprayogaśca ṣagnimantharasaḥ paraḥ //
praśātikā priyaṅguśca śyāmākā yavakā yavāḥ /
jūrṇāhvāḥ kodravā mudgāḥ kulatthāścakramudgakāḥ //
jāḍhakīnāṃ ca bījāni paṭolāmalakaiḥ saha /
bhojanārthaṃ prayojyāni pānām cānu madhūdakam //
ariṣṭāṃścānupānārthe medomāṃsakaphāpahān /
atisthaulyavināśāya saṃvibhajya prayojayet //
prajāgaraṃ vyavāyaṃ ca vyāyāmaṃ cintanāni ca /
sthaulyamicchan parityaktuṃ krameṇābhipravardhayet //
svapno harṣaḥ sukhā śayyā manaso nirvṛtiḥ śamaḥ /
cintāvyavāyavyāyāmavirāmaḥ priyadarśanam //
navānnāni navam madyaṃ grāmyānūpaudakā rasāḥ /
saṃskṛtāni ca māṃsāni dadhi sarpiḥ payāṃsai ca //
ikṣavaḥ śālayo māṣā godhūmā guḍavaikṛtam /
bastayaḥ snigdhamadhurāstailābhyaṅgaśca sarvadā //
snigdhamudvartanaṃ snānaṃ gandhamālyaniṣevaṇam /
śuklaṃ vāso yathākālaṃ doṣāṇāmavasecanam //
rasāyanānāṃ vṛṣyāṇāṃ yogānāmupasevanam /
hatvā+atikārśyamādhatte nṛṇāmupacayaṃ param //
acintanācca kaṛyāṇāṃ dhruvaṃ saṃtarpaṇena ca /
svapnaprasaṅgācca naro varāha iva puṣyati //
yadā tu manasi klānte karmātmānaḥ klamānvitāḥ /
viṣayebhyo nivartante tadā svapiti mānavaḥ //
nidrāyattam sukhaṃ duḥkhaṃ puṣṭiḥ kārśyaṃ balābalam /
vṛṣatā klībatā jñānamajñānaṃ jīvitaṃ na ca //
akāle+atiprasaṅgācca na ca nidrā niṣevitā /
sukhāyuṣī parākuryāt kālarātririvāparā //
saiva yuktā punaryuṅkte nidrā dehaṃ sukhāyuṣā /
puruṣaṃ yoginaṃ siddhyā satyā buddhirivāgatā //
gītādhyayanamadyastrīkarmabhārādhvakarśitāḥ /
ajīrṇinaḥ kṣatāḥ kṣīṇā vṛddhā bālāstathā+abalāḥ //
tṛṣṇātīsāraśūlārtāḥ śvāsino hikkinaḥ kṛśāḥ /
patitābhihatonmattāḥ klāntā yānaprajāgaraiḥ //
krodhaśokabhayaklāntā divāsvapnocitāśca ye /
sarva ete divāsvapnā severan sārvakālikam //
dhātusāmyaṃ tathā hyeṣāṃ balaṃ cāpyupajāyate /
śleṣmā puṣṇāti cāṅgāni sthairyaṃ bhavati cāyuṣaḥ //
grīṣme tvādānarūkṣāṇāṃ vardhamāne ca mārute /
rātrīṇāṃ cātisaṃkṣipādivāsvapnaḥ praśasyate //
grīṣmavarjyeṣu kāleṣu divāsvapnāt prakupyataḥ /
śleṣmapitte divāsvapnastasmātteṣu na śasyate //
medasvinaḥ snehanityāḥ śleṣmalāḥ śleṣmarogiṇaḥ /
dūṣīviṣārtāśc adivā na śayīran kadācana //
halīmakaḥ śiraḥśūlaṃ staimityaṃ gurugātratā /
aṅgamardo+agnināśaśca pralepo hṛdayasya ca //
śophārocakahṛllāsapīnasārdhāvabhedakāḥ /
koṭhāruḥpiḍakāḥ kaṇḍūstandrā kāso galāmayāḥ //
smṛtibuddhipramohaśca saṃrodhaḥ srotasāṃ jvaraḥ /
indriyāṇāmasāmarthyaṃ viṣavegapravartanam&{ā.dha} //
bhavennṛṇāṃ divāsvapnasyāhitasya niṣevaṇāt /
tasmāddhitāhitaṃ svapnaṃ buddhvā svapyāt sukhaṃ budhaḥ //
rātrau jāgarāṇaṃ rūkṣaṃ snigdhaṃ prasvapanaṃ divā /
arūkṣamanabhiṣyandi tvāsīnapracalāyitam //
dehavṛttau yathā+āhārastathā svapnaḥ sukho mataḥ /
svapnāhārasmutthe da sthaulyakārśye viśeṣataḥ //
abhyaṅgotsādanaṃ snānaṃ grāmyānūpaudakā rasāḥ /
śālyannaṃ sadadhi kṣīraṃ sneho madyaṃ manaḥsukham //
manaso+anuguṇā gandhāḥ śabdāḥ saṃvāhanāni ca /
cakṣuṣostarpaṇaṃ lepaḥ śiraso vadanasya ca //
svāstīrṇā śayanaṃ veśma sukhaṃ kālastathocitaḥ /
ānayantyacirānnidrāṃ pranaṣṭa yā nimittataḥ //
kāyasya śirasaścaiva virekaśchardanaṃ bhayam /
cintā krodhastathā dhūmo vyāyāmo raktamokṣaṇam //
upavāso+asukhā śayyā sattvaudāryaṃ tamojayaḥ /
nidrāprasaṅgamahitaṃ vārayanti samutthitam //
eta eva ca vijñeyā nidrānāśasya hetavaḥ /
kāryaṃ kālo vikāraśca prakṛtirvāyureva ca //
tamobhavā śleṣmasamudbhavā ca manaḥśarīraśramasaṃbhavā ca /
āgantukīvyādhyanuvartinī ca rātrisvabhāvaprabhavā ca nidrā //CS.1.21.59ab/ rātrisvabhāvaprabhavā matā yā tāṃ bhūtadhātrīṃ pravadanti tajjñāḥ /
tamobhavāmāhuraghasya mūlaṃ śeṣāḥ punarvyādhiṣu nirdiśanti //
tatra ślokāḥ
ninditāḥ puruṣāsteṣāṃ yau viśeṣeṇa ninditau /
nindite kāraṇaṃ doṣāstayorninditabheṣajam //
yebhyo yadā hitā nidrā yebhyaścāpyahitā yadā /
atinidrāyānidrāya bheṣajaṃ yadbhavā ca sā //
yā yā yathāprabhāvā ca nidra tat sarvamatrijaḥ /
aṣtāuninditasaṃkhyāte vyājahāara punarvasuḥ //

ityagniveśakṛte tantre carakapratisaṃskṛte ślokasthāne+aṣṭauninditīyo nāmaikaviṃśatitamo+adhyāyaḥ //

1.22. dvāviṃśo+adhyāyaḥ/

athāto laṅghanabṛṃhaṇīyamadhyāyaṃ vyākhyāsyāmaḥ&//

iti ha smāha bhagavānātreyaḥ//

tapaḥsvādhyāyaniratānātreyaḥ śiṣyasattamān/
ṣaḍagniveśapramukhānuktavān paricodayam//
laṅghanaṃ& bṛṃhaṇaṃ kāle rūkṣaṇaṃ snehanaṃ tathā/
svedanaṃ stambhanaṃ caiva jānīte yaḥ sa vai bhiṣak//
tamuktavantamātreyamagniveśa uvāca ha//
bhagavaṃllaṅghanaṃ &kiṃsvillaṅghanīyāśca kīdṛśāḥ/
bṛṃhaṇaṃ bṛṃhaṇīyāśca rūkṣaṇīyāśca rūkṣaṇam//
ke snehāḥ& snehanīyāśca svedāḥ svedyāśca ke matāḥ/
stambhanaṃ stambhanīyāśca vaktumarhasi tadguro!//
laṅghanaprabhṛtīnāṃ ca ṣaṇṇāmeṣāṃ samāsataḥ/
&kṛtākṛtātivṛttānāṃ lakṣaṇaṃ vaktumarhasi//
tadagniveśasya vaco niśamya gururabravīt/
yat kiñcillāghavakaraṃ dehe tallaṅghanaṃ smṛtam//
bṛhattvaṃ yaccharīrasya janayettacca bṛṃhaṇam/
raukṣyaṃ kharatvaṃ vaiśadyaṃ yat kuryāttaddhi rūkṣaṇam//
snehanaṃ &snehaviṣyandamārdavakledakārakam/
stambhagauravaśītaghnaṃ svedanaṃ svedakārakam//
stambhanaṃ stambhayati yadgatimantaṃ calaṃ dhruvam/
laghūṣṇatīkṣṇaviśadaṃ rūkṣaṃ sūkṣmaṃ kharaṃ saram//
kaṭhinaṃ caiva yaddravyaṃ prāyastallaṅghanaṃ smṛtam/
guru śītaṃ mṛdu snigdhaṃ bahalaṃ sthūlapicchilam//
prāyo mandaṃ sthiraṃ ślakṣṇaṃ dravyaṃ bṛṃhaṇamucyate/
rūkṣaṃ laghu kharaṃ tīkṣṇamuṣṇaṃ sthiramapicchilam//
prāyaśaḥ kaṭhinaṃ caiva yaddravyaṃ taddhi rūkṣaṇam/
dravaṃ sūkṣmaṃ saraṃ snigdhaṃ picchilaṃ guru śītalam/
prāyo mandaṃ mṛdu ca yaddravyaṃ tatsnehanaṃ matam//
uṣṇaṃ tīkṣṇaṃ saraṃ snigdhaṃ rūkṣaṃ sūkṣmaṃ dravaṃ sthiram/
dravyaṃ guru ca yat prāyastaddhi svedanamucyate//
śītaṃ mandaṃ mṛdu ślakṣṇaṃ rūkṣaṃ sūkṣmaṃ dravaṃ sthiram/
yaddravyaṃ laghu coddiṣṭaṃ prāyastat stambhanaṃ smṛtam//
catuṣprakārā saṃśuddhiḥ pipāsā mārutātapau/
pācanānyupavāsaśca vyāyāmaśceti laṅghanam//
prabhūtaśleṣmapittāsramalāḥ saṃsṛṣṭamārutāḥ/
bṛhaccharīrā balino laṅghanīyā viśuddhibhiḥ//
yeṣāṃ madhyabalā rogāḥ kaphapittasamutthitāḥ/
vamyatīsārahṛdrogavisūcyalasakajvarāḥ//
vibandhagauravodgārahṛllāsārocakādayaḥ/
pācanaistān bhiṣak prājñaḥ prāyeṇādāvupācaret//
eta eva yathoddiṣṭā yeṣāmalpabalā gadāḥ/
pipāsānigrahaisteṣāmupavāsaiśca tāñjayet//
&rogāñjayenmadhyabalān vyāyāmātapamārutaiḥ/
balināṃ kiṃ punaryeṣāṃ &rogāṇāmavaraṃ balam//
tvagdoṣiṇāṃ pramīḍhānāṃ& snigdhābhiṣyandibṛṃhiṇām/
śiśire laṅghanaṃ śastamapi vātavikāriṇām//
adigdhaviddhamakliṣṭaṃ vayasthaṃ sātmyacāriṇām/
mṛgamatsyavihaṅgānāṃ māṃsaṃ bṛṃhaṇamucyate//
kṣīṇāḥ kṣatāḥ kṛśā vṛddhā durbalā nityamadhvagāḥ/
strīmadyanityā grīṣme ca bṛṃhaṇīyā narāḥ smṛtāḥ//
śoṣārśograhaṇīdoṣairvyādhibhiḥ karśitāśca ye/
teṣāṃ kravyādamāṃsānāṃ bṛṃhaṇā laghavo rasāḥ//
snānamutsādanaṃ svapno madhurāḥ snehabastayaḥ/
śarkarākṣīrasarpīṃṣi sarveṣāṃ buddhi bṛṃhaṇam//
kaṭutiktakaṣāyāṇāṃ sevanaṃ strīṣvasaṃyamaḥ/
khalipiṇyākatakrāṇāṃ madhvādīnāṃ ca rūkṣaṇam//
abhiṣyaṇṇā mahādoṣā marmasthā vyādhayaśca ye/
ūrustambhaprabhṛtayo rūkṣaṇīyā nidarśitāḥ//
snehāḥ snehayitavyāśca svedāḥ svedyāśca ye narāḥ/
snehādhyāye mayoktāste svedākhye ca savistaram//
dravaṃ tanvasaraṃ yāvacchītīkaraṇamauṣadham/
svādu tiktaṃ kaṣāyaṃ ca stambhanaṃ sarvameva tat//
pittakṣārāgnidagdhā ye vamyatīsārapīḍitāḥ/
viṣasvedātiyogārtāḥ &stambhanīyā nidarśitāḥ//
vātamūtrapurīṣāṇāṃ visarge gātralāghave/
hṛdayodgārakaṇṭhāsyaśuddhau tandrāklame gate//
svede jāte rucau caiva kṣutpipāsāsahodaye/
kṛtaṃ laṅghanamādeśyaṃ nirvyathe cāntarātmani//
parvabhedo+aṅgamardaśca kāsaḥ śoṣo mukhasya ca/
kṣutpraṇāśo+arucistṛṣṇā daurbalyaṃ śrotranetrayoḥ//
manasaḥ saṃbhramo+abhīkṣṇamūrdhvavātastamo hṛdi/
dehāgnibalanāśaśca laṅghane+atikṛte bhavet//
balaṃ puṣṭyupalambhaśca kārśyadoṣavivarjanam/
lakṣaṇaṃ bṛṃhite sthaulyamati cātyarthabṛṃhite//
kṛtātikṛtaliṅgaṃ yallaṅghite &taddhi rūkṣite/
stambhitaḥ syādbale labdhe yathoktaiścāmayairjitaiḥ//
śyāvatā stabdhagātratvamudvego hanusaṃgrahaḥ/
hṛdvarconigrahaśca syādatistambhitalakṣaṇam//
lakṣaṇaṃ cākṛtānāṃ syāt ṣaṇṇāmeṣāṃ samāsataḥ/
tadauṣadhānāṃ &dhātūnāmaśamo vṛddhireva ca//
iti ṣaṭ sarvarogāṇāṃ proktāḥ samyagupakramāḥ/
sādhyānāṃ sādhane siddhā mātrākālānurodhinaḥ//

bhavati cātra ---

doṣāṇāṃ bahusaṃsargāt saṅkīryante hyupakramāḥ/
ṣaṭtvaṃ tu nātivartante tritvaṃ vātādayo yathā//

tatra ślokāḥ ---

ityasmiṃlaṅghanādhyāye vyākhyātāḥ ṣaḍupakramāḥ/
yathāpraśnaṃ bhagavatā cikitsā yaiḥ pravartate//

ityagniveśakṛte tantre carakapratisaṃskṛte ślokasthāne laṅghanabṛṃhaṇīyo nāma dvāviṃśo+adhyāyaḥ//22//

1.23. trayoviṃśo+adhyāyaḥ/

athātaḥ saṃtarpaṇīyamadhyāyaṃ vyākhyāsyāmaḥ//

iti ha smāha bhagavānātreyaḥ//

saṃtarpayati yaḥ snigdhairmadhurairgurupicchilaiḥ/
navānnairnavamadyaiśca māṃsaiścānūpavārijaiḥ//
gorasairgauḍikaiścānnaiḥ& paiṣṭikaiścātimātraśaḥ/
ceṣṭādveṣī divāsvapnaśayyāsanasukhe rataḥ//
rogāstasyopajāyante saṃtarpaṇanimittajāḥ/
pramehapiḍakākoṭhakaṇḍūpāṇḍvāmayajvarāḥ&//
kuṣṭhānyāmapradoṣāśca mūtrakṛcchramarocakaḥ/
tandrā klaibyamatisthaulyamālasyaṃ gurugātratā//
indriyasrotasāṃ lepo buddhermohaḥ pramīlakaḥ/
śophāścaivaṃvidhāścānye śīghramapratikurvataḥ//
śastamullekhanaṃ tatra vireko raktamokṣaṇam/
vyāyāmaścopavāsaśca dhūmāśca svedanāni ca//
sakṣaudraścābhayāprāśaḥ prāyo rūkṣānnasevanam/
cūrṇapradehā ye coktāḥ kaṇḍūkoṭhavināśanāḥ//
triphalāragvadhaṃ pāṭhāṃ saptaparṇaṃ savatsakam/
mustaṃ samadanaṃ nimbaṃ jalenotkvathitaṃ pibet//
tena mehādayo yānti nāśamabhyasyato dhruvam/
mātrākālaprayuktena saṃtarpaṇasamutthitāḥ//
mustamāragvadhaḥ pāṭhā triphalā devadāru ca/
śvadaṃṣṭrā khadiro nimbo haridre tvakca vatsakāt//
rasameṣāṃ yathādoṣaṃ prātaḥ prātaḥ pibannaraḥ/
saṃtarpaṇakṛtaiḥ sarvairvyādhibhiḥ saṃpramucyate//
ebhiścodvartanodgharṣasnānayogopayojitaiḥ/
tvagdoṣāḥ praśamaṃ yānti tathā snehopasaṃhitaiḥ//
kuṣṭhaṃ gomedako hiṅgu krauñcāsthi tryūṣaṇaṃ vacā/
vṛṣakaile śvadaṃṣṭrā ca kharāhvā cāśmabhedakaḥ//
takreṇa dadhimaṇḍena badarāmlarasena vā/
mūtrakṛcchraṃ pramehaṃ ca pītametadvyapohati//
takrābhayāprayogaiśca triphalāyāstathaiva ca/
ariṣṭānāṃ prayogaiśca yānti mehādayaḥ śamam//
tryūṣaṇaṃ triphalā kṣaudraṃ krimighnamajamodakaḥ/
mantho+ayaṃ saktavastailaṃ hito lohodakāplutaḥ//
&vyoṣaṃ viḍaṅgaṃ śigrūṇi triphalāṃ kaṭurohiṇīm/
bṛhatyau dve haridre dve pāṭhāmativiṣāṃ sthirām//
hiṅgu kebukamūlāni yavānīdhānyacitrakān/
sauvarcalamajājīṃ ca hapuṣāṃ ceti cūrṇayet//
cūrṇatailaghṛtakṣaudrabhāgāḥ syurmānataḥ samāḥ/
saktūnāṃ ṣoḍaśaguṇo bhāgaḥ saṃtarpaṇaṃ pibet//
prayogādasya śāmyanti rogāḥ saṃtarpaṇotthitāḥ/
pramehā mūḍhavātāśca kuṣṭhānyarśāṃsi kāmalāḥ//
plīhā pāṇḍvāmayaḥ śopho mūtrakṛcchramarocakaḥ/
hṛdrogo rājayakṣmā ca kāsaḥ śvāso galagrahaḥ//
krimayo grahaṇīdoṣāḥ śvaitryaṃ sthaulyamatīva ca/
narāṇāṃ dīpyate cāgniḥ smṛtirbuddhiśca vardhate//
vyāyāmanityo jīrṇaśī yavagodhūmabhojanaḥ/
saṃtarpaṇakṛtairdoṣaiḥ &sthaulyaṃ muktvā vimucyate//
uktaṃ saṃtarpaṇotthānāmapatarpaṇamauṣadham/
vakṣyante sauṣadhāścordhvamapatarpaṇajā gadāḥ//
dehāgnibalavarṇaujaḥśukramāṃsaparikṣayaḥ/
jvaraḥ kāsānubandhaśca pārśvaśūlamarocakaḥ//
śrotradaurbalyamunmādaḥ pralāpo hṛdayavyathā/
viṇmūtrasaṃgrahaḥ śūlaṃ jaṅghorutrikasaṃśrayam//
parvāsthisandhimedaśca ye cānye vātajā gadāḥ/
ūrdhvavātādayaḥ sarve jāyante te+apatarpaṇāt//
teṣāṃ saṃtarpaṇaṃ tajjñaiḥ punarākhyātamauṣadham/
yattadātve samarthaṃ syādabhyāse vā tadiṣyate&//
sadyaḥkṣīṇo hi sadyo vai tarpaṇenopacīyate/
narte saṃtarpaṇābhyāsāccirakṣīṇastu puṣyati//
dehāgnidoṣabhaiṣajyamātrākālānuvartinā/
kāryamatvaramāṇena bheṣajaṃ ciradurbale//
hitā māṃsarasāstasmai payāṃsi ca ghṛtāni ca/
snānāni bastayo+abhyaṅgāstarpaṇāśca ye//
jvarakāsaprasaktānāṃ kṛśānāṃ mūtrakṛcchriṇām/
tṛṣyatāmūrdhvavātānāṃ vakṣyante tarpaṇā hitāḥ//
śarkarāpippalītailaghṛtakṣaudraiḥ samāṃśakaiḥ/
saktudviguṇito vṛṣyasteṣāṃ manthaḥ praśasyate//
saktavo madirā kṣaudraṃ śarkarā ceti tarpaṇam/
pibenmārutaviṇmūtrakaphapittānulomanam//
phaṇitaṃ saktavaḥ sarpirdadhimaṇḍo+amlakāñjikam/
tarpaṇaṃ mūtrakṛcchraghnamudāvartaharaṃ pibet//
manthaḥ kharjūramṛdvīkāvṛkṣāmlāmlīkadāḍimaiḥ/
parūṣakaiḥ sāmalakairyukto madyavikāranut//
svāduramlo jalakṛtaḥ sasneho rūkṣa eva vā/
sadyaḥ saṃtarpaṇo manthaḥ sthairyavarṇabalapradaḥ//

tatra ślokaḥ---

saṃtarpaṇotthā ye rogā rogā ye cāpatarpaṇāt/
saṃtarpaṇīye te+adhyāye sauṣadhāḥ parikīrtitāḥ//

ityagniveśakṛte tantre carakapratisaṃskṛte ślokasthāne saṃtarpaṇīyo nāma trayoviṃśo+adhyāyaḥ//23//

1.24. caturviṃśo+adhyāyaḥ/

athāto vidhiśoṇitīyamadhyāyaṃ vyākhyāsyāmaḥ&//

iti ha smāha bhagavānātreyaḥ//

vidhinā śoṇitaṃ jātaṃ śuddhaṃ bhavati dehinām/
deśakālaukasātmyānāṃ vidhiryaḥ saṃprakāśitaḥ//
tadviśuddhaṃ hi rudhiraṃ balavarṇasukhāyuṣā/
yunakti prāṇinaḥ śoṇitaṃ hyanuvartate//
praduṣṭabahutīkṣṇoṣṇairmadyairanyaiśca tadvidhraiḥ/
tathā+atilavaṇakṣārairamlaiḥ kaṭubhireva ca//
kulatthamāṣaniṣpāvatilatailaniṣevaṇaiḥ/
piṇḍālumūlakādīnāṃ haritānāṃ ca sarvaśaḥ//
jalajānūpabailānāṃ prasahānāṃ ca sevanāt/
dadhyamlamastusuktānāṃ surāsauvīrakasya ca//
viruddhānāmupaklinnapūtīnāṃ bhakṣaṇena ca/
bhuktvā divā prasvapatāṃ dravasnigdhagurūṇi ca//
atyādānāṃ tathā krodhaṃ bhajatāṃ cātapānalau/
chardivegapratīghātāt kāle cānavasecanāt//
śramābhighātasaṃtāpairajīrṇādhyaśanaistathā/
śaratkālasvabhāvācca śoṇitaṃ saṃpraduṣyati//
tataḥ śoṇitajā rogāḥ prajāyante pṛthagvidhāḥ/
mukhapāko+&akṣirāgaśca pūtighrāṇāsyagandhitā//
gulmopakuśavīsarparaktapittapramīlakāḥ/
vidradhī raktamehaśca pradaro vātaśoṇitam//
vaivarṇyamagnisādaśca pipāsā gurugātratā/
saṃtāpaścātidaurbalyamaruciḥ śirasaśca ruk//
vidāhaścānnapānasya tiktāmlodgiraṇaṃ klamaḥ/
krodhapracuratā buddheḥ saṃmoho lavaṇāsyatā//
svedaḥ śarīradaurgandhyaṃ madaḥ kampaḥ svarakṣayaḥ/
tandrānidrātiyogaśca tamasaścātidarśanam//
kaṇḍvaruḥkoṭhapiḍakākuṣṭhacarmadalādayaḥ/
vikārāḥ sarva evaite vijñeyāḥ śoṇitāśrayāḥ//
śītoṣṇasnigdharūkṣādyairupakrāntāśca ye gadāḥ/
samyak sādhyā na sidhyanti raktajāṃstān vibhāvayet//
kuryācchoṇitarogeṣu raktapittaharīṃ kriyām/
virekamupavāsaṃ ca srāvaṇaṃ śoṇitasya ca//
baladoṣapramāṇādvā viśuddhyā rudhirasya vā/
rudhiraṃ srāvayejjantorāśayaṃ& prasamīkṣya vā//
aruṇābhaṃ bhavedvātādviśadaṃ phenilaṃ tanu/
pittāt pītāsitaṃ raktaṃ styāyatyauṣṇyāccireṇa ca//
īṣatpāṇḍu kaphādduṣṭaṃ picchilaṃ tantumadghanam/
saṃsṛṣṭaliṅgaṃ& saṃsargāttriliṅgaṃ sānnipātikam//
tapanīyendragopābhaṃ padmālaktakasannibham/
guñjāphalasavarṇaṃ ca viśuddhaṃ viddhi śoṇitam//
nātyuṣṇaśītaṃ laghu dīpanīyaṃ rakte+apanīte hitamannapānam/
tadā śarīraṃ hyanavastitāsṛgagnirviśeṣeṇa ca rakṣitavyaḥ//
prasannavarṇendriyamindriyārthānicchantamavyāhatapaktṛvegam/
sukhānvitaṃ tuṣṭibalopapannaṃ (puṣṭi-) viśuddharaktaṃ puruṣaṃ vandanti//
yadā tu raktavāhīni rasasaṃjñāvahāni ca/
pṛthak pṛthak samastā vā srotāṃsi kupitā malāḥ//
malināhāraśīlasya rajomohāvṛtātmanaḥ/
pratihatyāvatiṣṭhante jāyante vyādhayastadā//
madamūrcchāyasaṃnyāsāsteṣāṃ vidyādvicakṣaṇaḥ/
yathottaraṃ balādhikyaṃ hetuliṅgopaśāntiṣu//
durbalaṃ cetasaḥ sthānaṃ yadā vāyuḥ prapadyate/
mano vikṣobhayañjantoḥ saṃjñāṃ saṃmohayettadā//
pittamevaṃ kaphaścaivaṃ mano vikṣobhayannṛṇām/
saṃjñāṃ nayatyākulatāṃ viśeṣaścātra vakṣyate//
saktānalpadrutābhāṣaṃ calaskhalitaceṣṭitam&/
vidyādvātamadāviṣṭaṃ rūkṣaśyāvāruṇākṛtim/
sakrodhaparuṣābhāṣaṃ saṃprahārakalipriyam/
vidyāt pittamadāviṣṭaṃ raktapītāsitākṛtim//
svalpāsaṃbaddhavacanaṃ tandrālasyasamanvitam/
vidyāt kaphamadāviṣṭaṃ pāṇḍuṃ pradhyānatatparam//
sarvāṇyetāni rūpāṇi sannipātakṛte made/
jāyate śāmyati kṣipraṃ mado madyamadākṛtiḥ//
yaśca madyakṛtaḥ prokto viṣajo raudhiraśca yaḥ/
sarva ete madā narte vātapittakaphatrayāt//
nīlaṃ vā yadi vā kṛṣṇamākāśamathavā+aruṇam/
paśyaṃstamaḥ praviśati śīghraṃ ca pratibudhyate&//
vepathuścāṅgamardaśca prapīḍā hṛdayasya ca/
kārśyaṃ śyāvāruṇā cchāyā mūrcchāye vātasaṃbhave//
raktaṃ haritavarṇaṃ vā viyat pītamathāpi vā/
paśyaṃstamaḥ praviśati sasvedaḥ pratibudhyate//
sapipāsaḥ sasaṃtāpo raktapītākulekṣaṇaḥ/
saṃbhinnavarcāḥ pītābho mūrcchāye pittasaṃbhave//
meghasaṅkāśamākāśamāvṛtaṃ vā tamoghanaiḥ/
paśyaṃstamaḥ praviśati cirācca pratibudhyate//
gurubhiḥ prāvṛtairaṅgairyathaivārdreṇa carmaṇā/
saprasekaḥ sahṛllāso mūrcchāye kaphasaṃbhave//
sarvākṛtiḥ sannipātādapasmāra ivāgataḥ/
sa jantuṃ pātayatyāśu vinā bībhatsaceṣṭitaiḥ//
doṣeṣu madamūrcchāyāḥ kṛtavegeṣu& dehinām/
svayamevopaśāmyanti saṃnyāso nauṣadhairvinā//
vāgdehamanasāṃ ceṣṭāmākṣipyātibalā malāḥ/
saṃnyasyantyabalaṃ jantuṃ prāṇāyatanasaṃśritāḥ//
sa nā saṃnyāsasaṃnyastaḥ kāṣṭhībhūto mṛtopamaḥ/
prāṇairviyujyate śīghraṃ muktvā sadyaḥphalāḥ kriyāḥ//
durge+ambhasi yathā majjadbhājanaṃ tvarayā budhaḥ/
gṛhṇīyāttalamaprāptaṃ tathā saṃnyāsapīḍitam//
añjanānyavapīḍāśca dhūmāḥ pradhamanāni ca/
sūcībhistodanaṃ śastaṃ dāhaḥ pīḍā nakhāntare//
luñcanaṃ keśalomnāṃ ca dantairdaśanameva ca/
ātmaguptāvagharṣaśca hitaṃ tasyāvabodhane//
saṃmūrcchitāni tīkṣṇāni madyāni vividhāni ca/
prabhūtakaṭuyuktāni& tasyāsye gālayenmuhuḥ//
mātuluṅgarasaṃ tadvanmahauṣadhasamāyutam/
tadvatsauvarcalaṃ dadyādyuktaṃ madyāmlakāñjikaiḥ//
hiṅgūṣaṇasamāyuktaṃ yāvat saṃjñāprabodhanam/
prabuddhasaṃjñamannaiśca laghubhistamupācaret//
vismāpanaiḥ smāraṇaiśca priyaśrutibhireva ca/
paḍubhirgītavāditraśabdaiścitraiśca darśanaiḥ//
sraṃsanollekhanairdhūmairañjanaiḥ kavalagrahaiḥ/
śoṇitasyāvasekaiśca vyāyāmodgharṣṇaistathā//
prabuddhasaṃjñaṃ matimānanubandhamupakramet/
&tasya saṃrakṣitavyaṃ hi manaḥ pralayahetutaḥ//
snehasvedopapannānāṃ yathādoṣaṃ yathābalam/
pañca karmāṇi kurvīta mūrcchāyeṣu madeṣu ca//
aṣṭāviṃśatyauṣadhasya tathā tiktasya sarpiṣaḥ/
prayogaḥ śasyate tadvanmahataḥ ṣaṭpalasya vā//
triphalāyāḥ prayogo vā saghṛtakṣaudraśarkaraḥ/
śilājatuprayogo vā prayogaḥ payaso+api vā//
pippalīnāṃ prayogo vā payasā citrakasya vā/
rasāyanānāṃ kaumbhasya sarpiṣo vā praśasyate//
raktāvasekācchāstrāṇāṃ satāṃ sattvavatāmapi/
sevanānmadamūrcchāyāḥ praśamyanti śarīriṇām//

tatra ślokau---

viśuddhaṃ cāviśuddhaṃ ca śoṇitaṃ tasya hetavaḥ/
raktapradoṣajā rogāsteṣu rogeṣu cauṣadham//
madamūrcchāyasaṃnyāsahetulakṣaṇabheṣajam/
vidhiśoṇitake+adhyāye sarvametat prakāśitam//

ityagniveśakṛte tantre carakapratisaṃskṛte ślokasthāne vidhiśoṇitīyo nāma caturviṃśo+adhyāyaḥ//24//

samāpto yojanācatuṣkaḥ//6//

1.25. pañcaviṃśo+adhyāyaḥ

athāto yajjaḥpuruṣīyamadhyāyaṃ vyākhyāsyāmaḥ //

iti ha smāha bhagavānātreyaḥ //

purā pratyakṣadharmāṇāṃ bhagavantaṃ punaravasum /
sametānāṃ maharṣīṇāṃ prādurāsīdiyaṃ kathā //
ātmendriyamanorthānāṃ yo+ayaṃ puruṣasaṃjñakaḥ /
rāśirasyāmayānāṃ ca prāgutpattivinścaye //
tadantaraṃ kāśipatirvāmako vākyamarthavit /
vyājahārarṣisamitimupasṛtyābhivādya ca //
kinnu bhoḥ puruṣo yajjastajjāstasyāmayāḥ smṛtāḥ /
na vetyukte narendreṇa provācarṣīn punarvasuḥ //
sarva evāmitajñānavijñānacchinnasaṃśayāḥ /
bhavantacchettumarhanti kāśirājasya saṃśayam //
pārīkṣistatparīkṣyāgre maudgalyo vākyamabravīt /
ātmajaḥ puruṣo rogāścātmajāḥ kāraṇaṃ hi saḥ //
sa cinotyupabhuṅkte ca karma karmaphalāni ca /
nahyṛte cetanādhātoḥ pravṛttiḥ sukhaduḥkhayoḥ //
śaralomā tu netyāha na hyātmā+ātmānamātmanā /
yojayedvyādhibhirduḥkhairduḥkhadveṣī kadācana //
rajastamobhyāṃ tu manaḥ parītaṃ sattvasaṃjñakam /
śarīrasya samutpattau vikārāṇāṃ ca kāraṇam //
vāryovidastu netyāha na hyekaṃ kāraṇaṃ manaḥ /
narte śarīrācchārīrarogā na manasaḥ sthitiḥ //
rasajāni tu bhūtāni vyādhayaśca pṛthagvidhāḥ /
āpo hi rasavatyastāḥ smṛtā nirvṛittihetavaḥ //
hiraṇyākṣastu netyāha na hyātmā rasajaḥ smṛtaḥ /
nātīndriyaṃ manaḥ santi rogāḥ śabdādijāstathā //
ṣaṭdhātujastu puruṣo rogāḥ ṣaṭdhātujāstathā /
rāśiḥ ṣaḍdhātujo hyeṣa sāṃkhyairādyaiḥ prakīrtitaḥ //
tathā bruvāṇaṃ kuśikamāha tanneti kauṣikaḥ /
kasamānmātāpitṛbhyāṃ hi vinā ṣaḍdhātujo bhavet //
puruṣaḥ puruṣādgaurgoraśvādaśvaḥ prajāyate /
pitryā mehādayaścoktā rogāstāvatra kāraṇam //
bhadrakāpyastu netyāha nahyandho+andhāt prajāyate /
mātāpitrorapi ca te prāgutpattirna yujyate /
karmajastu mato jantuḥ karmajāstasya cāmayāḥ /
nahṛte karmaṇo janma rogāṇāṃ puruṣasya vā //
bharadvājastu netyāha kartā pūrvaṃ hi karmaṇaḥ /
dṛṣtaṃ na cākṛtaṃ karma yasya syāt puruṣaḥ phalam //
bhāvahetuḥ svabhāvastu vyādhīnāṃ puruṣasya ca /
kharadravacaloṣṇatvaṃ tejontānām yathaiva hi //
kāṅkāyanastu netyāha na hyārambhaphalaṃ bhavet /
bhavet svabhāvādbhāvānāmasiddhiḥ siddhireva cā //
sraṣṭā tvamitasaṅkalpo brahmāpatyaṃ prajāpatiḥ /
cetanācetanasyāsya jagataḥ sukhaduḥkhayoḥ //
tanneti bhikṣurātreyo na hyapatyaṃ prajāpatiḥ /
prajāhitaiṣī satataṃ duḥkhairyuṅjyādasādhuvat //
kālajastveva puruṣaḥ kālajāstasya cāmayāḥ /
jagat kālavaśaṃ sarvaṃ kālaḥ sarvatra kāraṇam //
tatharsīṇāṃ vivadatāmuvācedaṃ punarvasuḥ /
maivaṃ vocata tattvaṃ hi duṣprāpaṃ pakṣasaṃśrayāt //
vādān saprativādān hi vadanto niścitāniva /
pakṣāntaṃ naiva gacchanti tilapīḍakavadgatau //
muktvaivaṃ vādasaṅghaṭṭamadhyātmamanucintyatām /
nāvidhūte tamaḥskandhe jñeye jñānaṃ pravartate //
yeṣāmeva hi bhāvānāṃ saṃpat saṃjanayennaram /
teṣāmeva vipadvyādhīnvividhānsamudīrayet //

athātreyasya bhavagato vacanamanuniśamya punareva vāmakaḥ kāśipatiruvāca bhagavantamātreyaṃ bhagavan saṃpannimittajasya puruṣasya vipannimittajānāṃ ca rogāṇaṃ kimabhivṛddhikāraṇamiti //

tamuvāca bhagavānātreyaḥ hitāhāropayoga eka eva puruṣavṛddhikaro bhavati ahitāhāropayogaḥ punarvyādhinimittamiti //

evaṃvādinaṃ bhagavantamātreyamagniveśa uvāca kathamiha bhagavan hitāhiānāmāhārajātānāṃ lakṣaṇamanapavādamabhijānīmahe hitasamākhyātānāmāhārajātānāmahitasamākhyātānāṃ ca mātrākālakriyābhūmidehadoṣapuruṣāvasthāntareṣu viparītakāritvamupalabhāmaha iti //

tamuvāca bhagavānātreyaḥ yadāhārajātamagniveśa samāṃścaiva śarīradhātūn prakṛtau sthāpayati viṣamāṃśca samīkarotītyetaddhitaṃ viddhi viparītaṃ tvahitamiti ityetaddhitāhitalakṣaṇamanapavādaṃ bhavati //

evaṃvādinaṃ ca bhagavantamātreyamagniveśa uvāca bhagava na tvetadevamupadiṣṭaṃ bhūyiṣṭhakalpāḥ sarvabhiṣajo vijñāsyanti //

tamuvāca bhagavānātreyaḥ yeṣāṃ hi viditamāhāratattvamagniveśa guṇato dravyataḥ karmtaḥ sarvāvayavaśaśca mātrādayo bhāvāḥ ta etadevamupadiṣṭaṃ vijñātumutsahante /

yathā tu khalvetadupadiṣṭaṃ bhūyiṣṭhakalpāḥ sarvabhiṣajo vijñāsyanti tathaitadupadekṣyāmo mātrādīn bhāvānanudāharantaḥ teṣāṃ hi bahuvidhavikalpā bhavanti /

āhāravidhiviśeṣāṃstu khalu lakṣaṇataścāvayavataścānuvyākhyāsyāmaḥ //

tadyathā āhāratvamāhārasyaikavidhamarthābhedāt sa punardviyoniḥ sthāvarajaṅgamātmakatvāt dvividhaprabhāvaḥ hitāhitodarkaviśeṣāt caturvidhopayogaḥ pānāśanabhakṣyalehyopayogāt ṣaḍāsvādaḥ rasabhedataḥ ṣaḍvidhatvāt viṃśatiguṇaḥ gurulaghuṣītoṣṇasnigdharūkṣamandatīkṣṇasthirasaramṛdukaṭhinaviśadapicchilaślakṣṇakharasūkṣmasthūlasāndradravānugamāt aparisaṃkhyeyavikalpaḥ dravyasaṃyogakaraṇabāhulyāt //

tasya khalu ye ye vikārāvayavā bhūyiṣṭhamupayujyante bhūyiṣṭhakalpānāṃ ca manuṣyāṇāṃ prakṛtyaiva hitatamāścāhitatamāśca tāṃstān yathāvadupadekṣyāmaḥ //

tadyathā lohitaśālayaḥ śūkadhānyānāṃ pathyatamatve śreṣṭhatamā bhavanti mudgāḥ śamīdhānyānām āntarikṣamudakānāṃ saindhavaṃ lavaṇānāṃ jīvantīśākaṃ śākānām aiṇeyaṃ mṛgamāṃsānāṃ lāvaḥ pakṣiṇāṃ godhā bileśayānāṃ rohito matsyānāṃ gavyaṃ sarpiḥ arpiṣāṃ gokṣīraṃ kṣīrāṇāṃ tilatailaṃ sthāvarajātānāṃ snehānāṃ varāhavasā ānūpamṛgavasānāṃ culukīvasā matsyavasānāṃ pākahaṃsavasā jalacaravihaṅgavasānāṃ kukkuṭavasā viṣkiraśakunivasānāṃ ajamedaḥ śākhādamedasāṃ śṛṅgaveraṃ kandānāṃ mṛdvīkā phalānāṃ śarkarekṣuvikārāṇām, iti prakṛtyaiva hitatamānāmāhāravikārāṃ prādhānyato dravyāṇi vyākhyātāni bhavanti //

ahitatamānapyupadekṣyāmaḥ yavakāḥ śūkadhānyānāmapathyatamatvena prakṛṣṭatamā bhavanti māṣāḥ śamīdhānyānāṃ varṣānādeyamudakānām ūṣaraṃ lavaṇānāṃ sarṣapaśākaṃ śākānāṃ gomāṃsaṃ mṛgamāṃsānāṃ kāṇakapotaḥ pakṣiṇāṃ bheko bileśayānāṃ cilicimo matsyānām avikaṃ sarpiḥ sarpiṣām avikṣīraṃ kṣīrāṇāṃ kuskumbhasnehaḥ sthāvarasnehānāṃ mahiṣavasā ānūpamṛgavasānāṃ kumbhīravasā matsyavasānāṃ kākamadguvasā jalacaravihaṅgavasānāṃ caṭakavasā viṣkiraśakunivasānāṃ hastimedaḥ śākhādamedasāṃ nikucaṃ phalānām ālukaṃ kandānāṃ phāṇitamikṣuvikārāṇām iti prakṛtayivāhitatamānāmāhāravikārāṇāṃ prakṛṣṭatamāni dravyāṇi vyākhyātāni bhavanti; (iti) hitāhitāvayavo vyākhyāta āhāravikārāṇām //

ato bhūyaḥ karmauṣadhānāṃ ca prādhānyataḥ sānubandhāni dravyāṇyanuvyākhyāsyāmaḥ /

tadyathā annaṃ vṛttikarāṇāṃ śreṣṭham udakamāśvāsakarāṇāṃ (&surā śramaharāṇāṃ) kṣīraṃ jīvanīyānāṃ māṃsaṃ bṛṃhaṇīyānāṃ rasastarpaṇīyānāṃ lavaṇamannadravyarūcikarāṇām amlaṃ hṛdyānāṃ kukkuṭo balyānāṃ nakrareto vṛṣyāṇāṃ madhu śleṣmapittapraśamanānāṃ sarpirvātapittapraśamanānāṃ tailaṃ vātaśleṣmapraśamanānāṃ vamanaṃ śleṣmaharāṇāṃ virecanaṃ pittaharāṇāṃ bastirvātaharāṇāṃ svedo mārdavakarāṇāṃ vyāyāmaḥ sthairyakarāṇāṃ kṣāraḥ puṃstvopaghātināṃ (&tindukamanannadravyarucikarāṇām) āmaṃ kapitthamukaṇṭhyānām, āvikaṃ sarpirahṛdyānām ajākṣīraṃ śoṣaghnastanyasātmyaraktasāṃgrāhikaraktapittaprapraśamanānām avikṣīraṃ śleṣmapittajananānāṃ mahiṣīkṣīraṃ svapnajananānāṃ mandakaṃ dadhyabhiṣyandakarāṇāṃ gavedhukānnaṃ karśanīyānām uddālakānnaṃ virūkṣaṇīyānām ikṣurmūtrajananānāṃ yavāḥ purūṣajananānāṃ jāmbavaṃ vātajananānāṃ śaṣkulyaḥ śleṣmapittajananānāṃ kulatthā amlapittajananānāṃ māṣāḥ śleṣmapittajananānāṃ madanaphalaṃ vamanāsthāpanānuvāsanopayogināṃ trivṛt sukhvirecanānāṃ caturaṅgulo mṛduvirecanānāṃ snukpayastīkṣṇāvirecananāṃ, pratyakpuṣpā śirovirecanānāṃ viḍaṅgaṃ krimighnānāṃ śiṛṣo viṣaghnānāṃ khadiraḥ kuṣṭhaghnānāṃ rāsnā vātaharāṇām āmalakaṃ vayaḥsthāpanānāṃ harītakī pathyānām eraṇḍamūlaṃ vṛṣyavātaharāṇāṃ pippalīmūlaṃ dīpanīyapācanīyagudaśothārśaḥśūlaharāṇāṃ puṣkaramūlaṃ hikkāśvāsakāsapārśvaśūlaharāṇāṃ mustaṃ sāṃgrāhikadīpanīyapācanīyānām udīcyaṃ nirvāapaṇadīpanīyapācanīyacchardyatīsāraharāṇāṃ kaṭvaṅgaṃ sāṃgrāhikaraktapittapraśamanānām amṛtā sāṃgrāhikavātaharadīpanīyaśleṣamśoṇitavibandhapraśamanānāṃ, ativiṣā dīpanīyapācanīyasāṃgrāhikasarvadoṣaharāṇām utpalakumudapadmakiñjalkaḥ sāṃgrāhikaraktapittapraśamanānāṃ durālabhā pittaśleṣmapraśamanānāṃ gandhapriyaṅguḥ śoṇitapittātiyogapraśamanānāṃ kuṭajatvak śleṣmapittaraktasāṃgrāhikopaśoṣaṇānāṃ kāśmaryaphalaṃ raktasāṃgrāhikaraktapittapraśamanānāṃ pṛśniparṇī sāṃgrāhikavātaharadīpanīyavṛṣyāṇāṃ vidārigandhā vṛsyasarvadoṣaharāṇāṃ balā sāṃgrāhikabalyavātaharāṇāṃ gokṣurako mūtrakṛcchrānilaharāṇāṃ hiṅguniryāsaśchedanīyadīpanīyānulomikavātakaphapraśamanānām, amlavetaso bhedanīyadīpanīyānulomikavātaśleṣmaharāṇāṃ yāvaśūkaḥ sraṃsanīyapācanīyārśoghnānāṃ takrābhyāso grahaṇīdoṣaśophārśoghṛtavyāpatpraśamanānāṃ kravyānmāṃsarasābhyāso grahaṇīdoṣaśoṣārśoghnānāṃ kṣīraghṛtābhyāso rasāyanānāṃ samaghṛtasaktuprāśābhyāso vṛsyodāvartaharānāṃ tailagaṇḍūṣābhyāso dantabalarucikarāṇāṃ candanaṃ durgandhaharadāhanirvāpaṇalepanānāṃ rāsnāguruṇī śītāpanayanapralepanānāṃ lāmajjakośīraṃ dāhatvagdoṣasvedāpanayanapralepanānāṃ kuṣṭhaṃ vātaharābhyaṅgopanāhopayogināṃ, madhukaṃ cakṣuṣyavṛsyakeśyakaṇṭhyavarṇyavirajanīyaropaṇīyānāṃ vāyuḥ prāṇasaṃjñāpradānahetūnām agnirāmastambhaśītaśūodvepanapraśamanānāṃ jalaṃ stambhanīyānāṃ mṛdbhṛṣṭaloṣṭrinirvāpitamudakaṃ tṛṣṇācchardyatiyogapraśamanānām atimātrāśanamāmapradoṣahetūnāṃ yathāgnyabhyavahāro+agnisandhukṣaṇānāṃ yathāsātmyaṃ ceṣṭābhyavahārau sevyānāṃ kālabhojanamārogyakarāṇāṃ tṛptirāhāraguṇānāṃ vegasandhāraṇamanārogyakarāṇāṃ madyaṃ saumanasyajananānām madyākṣepo dhīghṛtismṛtiharāṇāṃ gurubhojanaṃ durvipākakarāṇām, ekāśanabhojanaṃ sukhapariṇāmakarāṇāṃ strīṣvatiprasaṅgaḥ śoṣakarāṇāṃ śukraveganigrahaḥ ṣāṇḍyakarāṇāṃ parāghātanamannāśraddhājananānām anaśanamāyuṣo hrāsakarāṇāṃ pramitāśanaṃ karśanīyānām ajīrṇādhyaśanaṃ grahaṇīdūṣaṇānāṃ viṣamāśanamagnivaiṣamyakarāṇāṃ viruddhavīryāśanaṃ ninditavyādhikarāṇāṃ praśamaḥ prathyānāṃ āyāsaḥ sarvāpathyānāṃ mithyāyogo vyādhikarāṇāṃ rajasvalābhigamanamalakṣmīmukhānāṃ brahmacaryamāyuṣyāṇāṃ paradārābhigamanamanāyuṣyāṇāṃ saṅkalpo vṛṣyāṇāṃ daumanasyamavrṣyāṇām ayathābalamārambhaḥ prāṇoparodhināṃ, viṣādo rogavardhanānāṃ snānaṃ śramaharāṇāṃ harṣaḥ prīṇanānāṃ śokaḥ śoṣaṇānāṃ nivṛttiḥ puṣṭikarāṇāṃ puṣṭiḥ svapnakarāṇām atisvapnastandrākarāṇāṃ sarvarasābhyāso balakarāṇām ekarasābhyāso daurbalyakarāṇāṃ garbhaśalyamāhāryāṇām ajīrṇamuddhāryāṇāṃ bālo mṛdubheṣajīyānāṃ vṛddho yāpyānāṃ garbhinī tīkṣṇauṣadhavyavāyavyāyāmavarjanīyānāṃ saumanasyaṃ garbhadhāraṇānāṃ sannipāto duścikitsyānām āmo viṣamacikitsyānāṃ jvaro rogāṇāṃ kuṣṭhaṃ dīrgharogāṇāṃ rājayakṣmā rogasamūhānāṃ prameho+anuṣaṅgiṇāṃ jalaukaso+anuśastrāṇāṃ bastistantrāṇāṃ, himavānauṣadhibhūmīnāṃ soma oṣadhīnāṃ marubhūmirārogyadeśānām anūpo+ahitadeśānām nirdeśakāritvamāturaguṇānāṃ bhiṣak cikitsāṅgānāṃ nāstiko varjyānāṃ laulyaṃ kleśakarāṇām anirdeśakāritvamariṣṭānāṃ anirvedo vārtalakṣaṇānāṃ vaidyasamūho niḥśaṃśayakarāṇāṃ yogo vaidyaguṇānāṃ vaidyasamūho vijñānamauṣadhīnāṃ śāstrasahitastarkaḥ sādhanānāṃ saṃpratipattiḥ kālajñānaprayojanānām avyavasāyaḥ kālātipattihetūnāṃ dṛṣṭakarmatā niḥsaṃśayakarāṇām asamarthatā bhayakarāṇāṃ tadvidyasaṃbhāṣā buddhivardhanānām, ācāryaḥ śāstrādhigamahetūnām āyurvedo+amṛtānāṃ sadvacanamanuṣṭheyānām asadgrahaṇaṃ sarvāhitānāṃ sarvasannyāsaḥ sukhānāmiti //

bhavanti cātra

agryāṇāṃ śatamuddiṣṭaṃ yaddvipañcāśaduttaram /
alametadvikārāṇāṃ vighātāyopadiśyate //
samānakāriṇo ye+arthāsteṣāṃ śreṣṭhasya lakṣaṇam /
jyāyastvaṃ kāryakartṛtve varatvaṃ cāpyudāhṛtam //
vātapittakaphānāṃ ca yadyat praśamane hitam /
prādhānyataśca nirdiṣṭaṃ yadvyādhiharamuttamam //
etanniśamya nipuṇaṃ cikitsāṃ saṃprayojayet /
evaṃ kurvan sadā vaidyo dharmakāmau samaśnute //
pathyaṃ patho+anapetaṃ yadyaccoktaṃ manasaḥ priyam /
yaccāpriyamapathyaṃ ca niyataṃ tanna lakṣayet //
mātrākālakriyābhūmidehadoṣaguṇāntaram /
prāpya tattaddhi dṛśyante te te bhāvāstathā tathā //
tasmāt svabhāvo nirdiṣṭastathā mātrādirāśrayaḥ /
tadapekṣyobhayaṃ karma prayojyaṃ siddhimicchatā //

tadātreyasya bhagavato vacanamanuniśamya punarapi bhagavantamātreyamagniveśa uvāca yathoddeśamabhinirdiṣṭaḥ kevalo+ayamartho bhagavatā śurtaścāsmābhiḥ /

āsavadravyāṇāmidānīmanapavādaṃ lakṣaṇamanatisaṃkṣepeṇopadiśyamānaṃ śuśrūṣāmaha iti //

tamuvāca bhagavānātreyaḥ dhānyaphalamūlasārapuṣpakāṇdāpatratvaco bhavantyāsavayonayo+agniveśa saṃgraheṇāṣṭau śarkarānavamīkāḥ /

tāsveva dravyasaṃyogakaraṇato+aparisaṃkhyeyāsu yathāpathyatamānāmāsavāanāṃ caturaśīrtiṃ nibodha /

tadyathā surāsauvīratuṣodakamaireyamedakadhānyāmlāḥ ṣaḍ dhānyāsavā bhavanti, mṛdvīkākharjūrakāśmaryadhanvanarājādanatṛṇaśūnyaparūṣakābhayāmalakamṛgaliṇḍikājāmbavakapitthakuvalabadarakarkandhūpīlupriyālapanasanyagrodhāśvatthaplakṣakapītanodumbarājamodaśṛṅgāṭakaśaṅkhinīphalāsavāḥ ṣaḍviṃśatirbhavanti, vidārigandhāśvagandhākṛṣṇagandhāśatāvarīśyāmātrivṛddantīdravantībilvorubūkacitrakamūlairekādaśa mūlāsavā bhavanti, śālapriyakāśvakarṇacandanasyandanakhadirakadarasaptaparṇārjunāsanārimedatindukakiṇihīśamīśuktiśiṃśapāśirīṣavañjaladhanvanamadhūkaiḥ sārāsavā viṃśatirbhavanti, padmotpalanalikumudasaugandhikapuṇḍaiṛkaśatapatramadhūkapriyaṅgudhātakīpuṣpairdaśa puṣpāsavā bhavanti, ikṣukāṇḍekṣvikṣuvālikāpuṇḍrakacaturthāḥ kāṇḍāsavā bhavanti, paṭolatāḍakapatrāsavau dvau bhavataḥ, tilvakalodhrailavālukakramukacaturthāstvagāsavā bhavanti, śarkarāśava eka eveti /

evameṣāmāsavānāṃ caturaśītiḥ paraspareṇāsaṃsṛṣṭānāmāsavadravyāṇāmupanirdiṣṭā bhavati /

eṣāmāsavānāmāsutatvādāsavasaṃjñā /

dravyasaṃyogavibhāgavistārastveṣāṃ bahuvidhakalpaḥ saṃskāraśca /

yathāsvaṃ saṃyogasaṃskārasaṃskṛtā hyāsavāḥ svaṃ karma kurvanti /

saṃyogasaṃskrāradeśakālamātrādayaśca bhāvāsteṣāṃ teṣāmāsavānāṃ te te samupadiśyante tattatkāryamabhisamīkṣyeti //

bhavati cātra

manaḥśarīrāgnibalapradānāmasvapnaśokārucināśanānām /
saṃharṣaṇānāṃ pravarāsavānāmaśītiruktā caturuttaraiṣā //
tatra ślokaḥ
śarīrarogaprakṛtau matāni tattvena cāhāraviniścayaṃ ca /
uvāca yajjaḥpuruṣādike+asmin munistathā+agryāṇi varāsavāṃśca //

ityagniveśakṛte tantre carakapratisaṃskṛte ślokasthāne yajjaḥpuruṣīyo nāma pañcaviṃśo+adhyāyaḥ //

1.26. ṣaḍviṃśo+adhyāyaḥ

athāta ātreyabhadrakāpyīyamadhyāyaṃ vyākhyāsyāmaḥ //

iti ha smāha bhagavānātreyaḥ //

ātreyo bhadrakāpyaśca śākunteyastathaiva ca /
pūrṇākṣaścaiva maudgalyo hiraṇyākṣaśca kauśikaḥ //
yaḥ kumāraśirā nāma bharadvājaḥ sa cānaghaḥ /
śrīmān vāryovidaścaiva rājā matimatāṃ varaḥ //
nimiśca rājā vaideho baḍiśaśca mahāmatiḥ /
kāṅkāyanaśca bāhlīko bāhlīkabhiṣajāṃ varaḥ //
ete śrutavayovṛddhā jitātmāno maharṣayaḥ /
vane caitrarathe ramye samīyurvijihīrṣavaḥ //
teṣāṃ tatropaviṣṭānāmiyamarthavatī kathā /
babhūvārthavidāṃ samyagrasāhāraviniścaye //

eka eva rasa ityuvāca bhadrakāpyaḥ yaṃ pañcānāmindriyārthānāmanyatamaṃ jihvāvaiṣayikaṃ bhāvamācakṣate kuśalāḥ sa punarudakādananya iti /

dvau rasāviti śākunteyo brāhmaṇaḥ chedanīya upaśamanīyaśceti /

trayo rasā iti pūrṇākṣo maudgalyaḥ chedanīyopaśamanīyasādhāraṇā iti /

catvāro rasā iti hiraṇyākṣaḥ kauśikaḥ svādurhitaśca svādurahitaścāsvādurhitaścāsvādurahitaśceti /

pañca rasā iti kumāraśirā bharadvājaḥ bhaumaudakāgneyavāyavyāntarikṣāḥ /ṣaḍrasā iti vāryovido rājarṣiḥ gurulaghuśītoṣṇasnigdharūkṣāḥ /

sapta rasā iti nimirvaidehaḥ madhurāmlalavaṇakaṭutiktakaṣāyakṣārāḥ /

aṣṭau rasā iti baḍiśo dhāmārgavaḥ madhurāmlalavaṇakaṭutiktakaṣāyakṣārāvyaktāḥ /

aparisaṃkhyeyā rasā iti kāṅkāyano bāhlīkabhiṣak āśrayaguṇakarmasaṃsvādaviśeṣāṇāmaparisaṃkhyeyatvāt //

ṣaḍeva rasā ityuvāca bhagavānātreyaḥ punarvasuḥ madhurāmlalavaṇakaṭutiktakaṣāyāḥ /

teṣāṃ ṣaṇṇāṃ rasānāṃ yonirudakaṃ chedanopaśamane dve karmaṇī tayormiśrībhāvāt sādhāraṇatvaṃ svādvasvādutā bhaktiḥ hitāhitau prabhāvau pañcamahābhūtavikārāstvāśrayāḥ prakṛtivikṛtivicāradeśakālavaśāḥ teṣvāśrayeṣu dravyasaṃjñakeṣu guṇā gurulaghuśītoṣṇasnigdharūkṣādyāḥ kṣaraṇāt kṣāraḥ nāsau rasaḥ dravyaṃ tadanekarasasamutpannamanekarasaṃ kaṭukalavaṇabhūyiṣṭhamanekendriyārthasamanvitaṃ karaṇābhinirvṛttam; &avyaktībhāvastu khalu rasānāṃ prakṛtau bhavatyanurase+anurasasamanvite vā dravye aparisaṃkhyeyatvaṃ punasteṣāmāśrayādīnāṃ bhāvānāṃ viśeṣāparisaṃkhyeyeatvānna yuktam ekaiko+api hyeṣāmāśrayādīnāṃ bhāvānāṃ veśeṣānāśrayate viśeṣāparisaṃkhyeyatvāt na ca tasmādanyatvamupapadyate parasparasaṃsṛṣṭabhūyiṣṭhatvānna caiṣāmabhinirvṛtterguṇaprakṛtīnāmaparisaṃkhyeyatvaṃ bhavati tasmānna saṃsṛṣṭānāṃ rasānāṃ karmopadiśanti buddhimantaḥ /

taccaiva kāraṇamapekṣamāṇāḥ ṣaṣṇāṃ rasānāṃ paraspareṇāsaṃsṛṣṭānāṃ lakṣaṇapṛthaktvamupadekṣyāmaḥ //

agre tu tāvaddravyabhedamabhipretya kiṃcidabhidhāsyāmaḥ /

sarvā dravyaṃ pāñcabhautikamasminnarthe taccetanāvadacenaṃ ca tasya guṇāḥ śabdādayo gurvādayaśca dravyāntāḥ karma pañcavidhamuktaṃ vamanādi //

tatra dravyāṇi gurukharakaṭhinamandasthiraviśadasāndrasthūlagandhaguṇabahulāni pārthivāni tānyupacayasaṅghātagauravasthairyakarāṇi dravasnighdaśītamandamṛdupicchilarasaguṇabahulānyāpyāni tānyupakledasgnehabandhaviṣyandamārdaprahlādakarāṇi uṣṇatīkṣṇasūkṣmalaghurūkṣaviśadarūpaguṇabahulānyāgneyāni tāni dāhapākaprabhāprakāśavarṇakarāṇi laghuśītarūkṣakharaviśadasūkṣmasparśaguṇabahulāni vāyavyāni tāni raukṣyaglānivicāravaiśadyalāghavakarāṇi mṛdulaghusūkṣmaślakṣṇaśabdaguṇabahulānyākāśātmakāni tāni mārdavasauṣiryalāghavakarāṇi //

anenopadeśena nānauṣadhibhūtaṃ jagati kiṃciddravyamupalabhyate tāṃ tāṃ yuktimarthaṃ ca taṃ tamabhipretya //

na tu kevalaṃ guṇaprabhāvādeva dravyāṇi kārmukāṇi bhavanti dravyāṇi hi dravyaprabhāvādguṇaprabhāvāddravyaguṇaprabhāvācca tasmiṃstasmin kāle tattadadhikaraṇamāsādya ṭaṃ tāṃ ca yuktimarthaṃ ca taṃ tamabhipretya yat kurvanti tat karma yena kuvanti tadvīryaṃ yatra kurvanti tadadhikaraṇaṃ yadā kurvanti sa kālaḥ yathā kurvanti sa upāyaḥ yat sādhayanti tat phalam //

bhedaścaiṣāṃ triṣaṣṭividhavikalpo dravyadeśakālaprabhāvādbhavati tamupadekṣyāmaḥ //

svāduramlādibhiryogaṃ śeṣairamlādayaḥ pṛthak /
yānti pañcadaśaitāni dravyāṇi dvirasāni tu //
pṛthagamlādiyuktasya yogaḥ śeṣaiḥ pṛthagbhavet /
madhurasya tathā+amlasya lavaṇasya kaṭostathā //
trirasāni yathāsṃkhyaṃ dravyāṇyuktāni viṃśatiḥ /
vakṣyante tu catuṣkeṇa dravyāṇi daśa pañca ca //
svādvamlau sahitau yogaṃ lavaṇādyaiḥ pṛthaggattau /
yogaṃ śeṣaiḥ pṛthagyātaścatuṣkarasaṃkhyayā //
sahitau svādulavaṇau tadvat kaṭvādibhiḥ pṛthak /
yuktau śeṣaiḥ pṛthagyogaṃ yātaḥ svādūṣaṇau tathā //
kaṭvādyairamlalavaṇau saṃyuktau sahitau pṛthak /
yātaḥ śeṣaiḥ pṛthagyogaṃ śeṣairamlakaṭū tathā //
yujyate tu kaṣāyeṇa satiktau lavaṇoṣaṇau /
ṣaṭ tu pañcarasānyāhurekaikasyāpavarjanāt //
ṣaṭ caivaikarasāni syurekaṃ ṣaḍrasameva tu /
iti triṣaṣṭirdravyāṇāṃ nirdiṣṭā rasasaṃkhyayā //
triṣaṣṭiḥ syāttvasaṃkhyeyā rasānurasakalpanāt /
rasāstaratamābhyāṃ tāṃ saṃkhyāmatipatanti hi //
saṃyogāḥ saptapañcāśat kalpanā tu triṣaṣṭidhā /
rasānāṃ tatra yogyatvāt kalpitā rasacintakaiḥ //
kvacideko rasaḥ kalpyaḥ saṃyuktāśca rasāḥ kvacit /
doṣaiṣadhādīn saṃcintya bhiṣajā siddhimicchatā //
dravyāṇi dvirasādīni saṃyuktāṃśca rasān budhāḥ /
rasānekaikaśo vā+api kalpayanti gadān prati //
yaḥ syādrasavikalpajñaḥ syācca doṣavikalpavit /
na sa muhyedvikārāṇāṃ hetuliṅgopaśāntiṣu //
vyaktaḥ śuṣkasya cādau ca raso dravyasya lakṣyate /
viparyayeṇānuraso rso nāsti hi saptamaḥ //
parāparatve yuktiśca saṃkhyā saṃyoga eva ca /
vibhāgaśca pṛthaktvaṃ ca parimāṇamathāpi ca //
saṃskāro+abhyāsa ityete guṇā jñeyāḥ parādayaḥ /
siddhyupāyāścikitsāyā lakṣaṇaistān pracakṣmahe //
deśakālavayomānapākavīryarasādiṣu /
parāparatve yuktiśca yojanā yā tu yujyate //
saṃkhyā syādgaṇitaṃ yogaḥ saha saṃyoga ucyate /
dravyāṇāṃ dvandvasarvaikakarmajo+anitya eva ca //
vibhāgastu vibhaktiḥ syādviyogo bhāgaśo grahaḥ /
pṛthaktvaṃ syādasaṃyogo vailakṣaṇyamanekatā //
parimāṇaṃ punarmānaṃ saṃskāraḥ karaṇaṃ matam /
bhāvābhyasanamabhyāsaḥ śīlanaṃ satatakriyā //
iti svalakṣaṇairuktā guṇāḥ sarve parādayaḥ /
cikitsā yairaviditairna yathāvat pravartate //
guṇā guṇāśrayā noktāstasmādrasaguṇān bhiṣak /
vidyāddravyaguṇān karturabhiprāyāḥ pṛthagvidhāḥ //
ataśca prakṛtaṃ buddhvā deśakālāntarāṇi ca /
tantrakarturabiprāyānupāyāṃścārthamādiśet //
ṣaḍvibhaktīḥ pravakṣyāmi rasānāmata uttaram /
ṣaṭ pañcabhūtaprabhavāḥ saṃkhyātāśca yathā rasāḥ //

saumyāḥ khalvāpo+antarikṣaprabhavāḥ prakṛtiśītā laghvyāścāvyaktarasāśca tāstvantarikṣādbhraśyamānā bhraṣṭāśca pañcamahābhūtaguṇasamanvitā jaṅgamasthāvarāṇāṃ bhūtānāṃ mūrtīrabhiprīṇayanti tāsu mūrtiṣu ṣādabhimūrcchanti rasāḥ //

teṣāṃ ṣaṇṇāṃ rasānāṃ somaguṇātirekānmadhuro rasaḥ pṛthivyagnibhūyiṣṭhatvādamlaḥ salilāgnibhūyiṣṭhatvāllavaṇaḥ vāyvagunibhūyiṣṭhatvāt kaṭukaḥ vāyvākāśātiriktatvāttiktaḥ pavanapṛthivīvyatirekāt kaṣāya iti /

evameṣāṃ rasānāṃ ṣaṭtvamupapannaṃ nyūnātirekaviśeṣānmahābhūyānāṃ bhūyānāmiva sthāvarajaṅgamānāṃ nānāvarṇākṛtiviśeṣāḥ ṣaḍṛtukatvācca kālasyopapanno mahābhūtānāṃ nyūnātirekaviśeṣaḥ //

tatrāgnimārutātmakā rasāḥ prāyeṇordhvabhājaḥ lāghavādutplavanatvācca vāyorūrdhvajvalanatvācca vahneḥ salilapṛthivyātmakāstu prāyeṇādhobhājaḥ pṛthivyā gurutvānnimnagatvāccodakasya vyāmiśrātmakāḥ punarubhayatobhājaḥ //

teṣāṃ ṣaṇṇā rasānāmekaikasya yathādravyaṃ guṇakarmāṇyanuvyākhyāsyāmaḥ //

tatra madhuro rasaḥ śarīrasātmyādrasarudhiramāṃsamedosthimajjaujaḥśukrābhivardhana āyuṣyaḥ ṣaḍindriyaprasādano balavarṇakaraḥ pittaviṣamārutaghnastṛṣṇādāhapraśamanastvacyaḥ keśyaḥ kaṇṭhyo balyaḥ prīṇano jīvanastarpaṇo bṛṃhaṇaḥ sthairyakaraḥ kṣīṇakṣatasandhānakaro ghrāṇamukhakaṇṭauṣṭhajihvāprahlādano dāhamūrcchāpraśamanaḥ ṣaṭpadapipīlikānāmiṣṭatamaḥ snigdhaḥ śīto guruśca /

sa evaṃguṇo+apyeka evātyarthamupayujyamānaḥ sthaulyaṃ mārdavamālasyamatisvapnaṃ gauravamanannābhilāṣamagnerdaurbalyamāsyakaṇṭhayormāṃsābhivṛddhiṃ śvāsakāsapratiśyāyālasakaśītajvarānāhāsyamādhuryavamathusaṃjñāsvarapraṇāśagalagaṇḍagaṇdamālāślīpadagalaśophabastidhamanīgalopalepākṣyāmayābhiṣyandānityevaṃprabhṛtīn kaphajān vikārānupajanayati ;

amlo raso bhaktaṃ rocayati bhaktaṃ rocayati agniṃ dīpayati dehaṃ bṛṃhayati ūrjayati mano bodhayati indriyāṇi dṛḍhīkaroti balaṃ vardhayati vātamanulomayati hṛdayaṃ tarpayati āsyamāsrāvayati bhukamapakarṣayati kledayati jarayati prīṇayati laghuruṣṇaḥ snigdhaśca /

sa evaṃguṇo+apyeka evātyarthamupayujyamāno dantān harṣayati tarṣayati saṃmīlayatyakṣiṇī saṃvejayati lomāni kaphaṃ vilāpayati pittamabhivardhayati raktaṃ dūṣayati māṃsaṃ vidahati kāyaṃ śithilīkaroti kṣīṇakṣatakṛśadurbalānāṃ śvayathumāpādayati api ca kṣatābhihatadaṣṭadagdhabagnaśūnapracyutāvamūtritaparisarpitamarditacchinnabhinnaviśliṣṭodviddhotpiṣṭādīni pācayatyāgneyasvabhāvāt paridahati kaṇṭhamuro hṛdayaṃ ca ;

lavaṇo rasaḥ pācanaḥ kledano dīpanaścyāvanaśchedano bhedanastīkṣṇaḥ saro dikāsyadhaḥsraṃsyavakāśakaro vātaharaḥ stambhabandhasaṅghātavidhamanaḥ sarvarasapratyanīkabhūtaḥ āsyamāsrāvayati kaphaṃ viṣyandayati mārgān viśodhayati sarvaśarīrāvayavān mṛdūkaroti rocayatyāhāram āhārayogī nātyarthaṃ guruḥ snigdha uṣṇaśca /

sa evaṃguṇo+apyeka evātyarthamupayujyamānaḥ pittaṃ kopayati raktaṃ vardhayati tarṣayati mūrcchayati tāpayati dārayati kuṣṇāti māṃsāni pragālayati kuṣṭhāni viṣaṃ vardhayati śophān sphoṭayati dantāṃścyāvayati puṃstvamupahanti indriyāṇyuparūṇaddhi valipalitakhālityamāpādayati api ca lohitapittāmlapittavīsarpavātaraktavicarcikendraluptaprabhṛtīnvikārānupajanayati ;

kaṭuko raso vaktraṃ śodhayati agniṃ dīpayati bhūktaṃ śoṣayati ghrāṇamāsrāvayati cakṣurvirecayati sphuṭīkarotīndriyāṇi alasakaśvayathūpacayodardābhiṣyandasnehasvedakledamalānupahanti rocayatyaśanaṃ paṇḍūrvināśayati vraṇānavasādayati krimīn hinasti māṃsaṃ vilikhati śoṇitasaṅghātaṃ bhinatti bandhāṃśchinatti mārgān vivṛṇoti śleṣmāṇaṃ śamayati laghuruṣṇo rūkṣaśca /

sa evaṃguṇo+apyeka evātyarthamupayujyamāno vipākaprabhāvāt pūṃstvamupahanti rasavīryaprabhāvānmohayanti glāpayati sādayati karśayati mūrcchayati namayati tamayati bhramayati kaṇṭhaṃ paricahati śarīratāpamupajanayati balaṃ kṣiṇoti tṛṣṇāṃ janayati api ca vāyvagniguṇabāhulyādbhramadavathukampatodabhedaiścaraṇabhujapārśvapṛṣṭhaprabhṛtiṣu mārutajān vikārānupajanayati ;

tikto rasaḥ svayamarociṣṇurapyarocakaghno viṣaghnaḥ krimighno mūrcchādāhakaṇḍūkuṣṭhatṛṣṇāpraśamanastvaṅmāṃsayoḥ sthirīkaraṇo jvaraghno dīpanaḥ pācanaḥ stanyaśodhano lekhanaḥ kledamedovasāmajjalasīkāpūyasvedamṛtrapurīṣapittaśleṣmopaśoṣaṇo rūkṣaḥ śīto laghuśca /

sa evaṃguṇo+apyeka evātyarthamupayujyamāno raukṣyātkharaviṣadasvabhāvācca rasarudhiramāṃsamedosthimajjaśukrāṇyucchoṣayati srotasāṃ kharatvamupapādayati balamādatte karśayati glapayati mohayati bhramayati vadanamupaśoṣayati aparāṃśca vātavikārānupajanayati ;

kaṣāyo rasaḥ saṃśamanaḥ saṃgrāhī sandhānakaraḥ pīḍano ropaṇaḥ śoṣaṇaḥ stambhanaḥ śleṣmaraktapittapraśamanaḥ śarīrakledasyopayoktā rūkṣaḥ śīto+alaghuśca /

sa evaṃguṇo+apyeka evātyarthamupayujyamāna āsyaṃ śoṣayati hṛdyaṃ pīḍayti udaramādhmāpayati vācaṃ nigṛhṇāti srotāṃsyavabadhnāti śyāvatvamāpādayati puṃstvamupahanti viṣṭabhya jarāṃ gacchati vātamūtrapurīṣaretāṃsyavagṛhṇāti karśayati glapayati tarṣayati stambhayati kharaviśadarūkṣatvāt pakṣavadhagrahāpatānakārditaprabhṛtīṃśca vātavikārānupajanayati //

ityevamete ṣaḍrasāḥ pṛthaktvenaikatvena vā mātraśaḥ samyagupayujyamānā upakārāya bhavantyadhyātmalokasya apakārakarāḥ punarato+anyathā bhavantyupayujyamānāḥ tān vidvānupakārārthameva mātraśaḥ samyagupayojayediti //

bhavanti cātra

śītaṃ vīryeṇa yaddravyaṃ madhuraṃ rasapākayoḥ /
tayoramlaṃ yaduṣṇaṃ ca yaddravyaṃ kaṭukaṃ tayoḥ //
teṣāṃ rasopadeśena nirdeśyo guṇasaṃgrahaḥ /
vīryato+aviparītānāṃ pākataścopadekṣyate //
yathā payo yathā sarpiryathā vā cavyacitrakau /
evamādīni cānyāni nirdiśedrasato bhiṣak //
madhuram kiṃciduṣṇaṃ syāt kaṣāyaṃ tiktameva ca /
yathā mahatpañcamūlaṃ yathā+abjānūpamāmiṣam //
lavaṇaṃ saindhavaṃ noṣṇamamlamāmalakaṃ tathā /
arkāguruguḍūcīnāṃ tiktānāmuṣṇamucyate //
kiṃcidamlaṃ hi saṃgrāhi kiṃcidamlaṃ bhinatti ca /
yathā kapitthaṃ saṃgrāhi bhedi cāmalakaṃ tathā //
pippalī nāgaraṃ vṛṣyaṃ kaṭu cāvṛṣyamucyate /
kaṣāyaḥ stambhanaḥ śītaḥ so+abhayāyāmato+anyathā //
tasmādrasopadeśena na sarvaṃ dravyāmādiśet /
dṛṣtaṃ tulyarase+apyevaṃ dravye dravye guṇāntaram //
raukṣyāt kaṣāyo rūkṣāṇāmuttamo madhyamaḥ kaṭuḥ /
tikto+avarastathoṣṇānāmuṣṇatvāllavaṇaḥ paraḥ //
madhyo+amlaḥ kaṭukaścāntyaḥ snigdhānāṃ madhuraḥ paraḥ /
madhyo+amlo lavaṇaścāntyo rasaḥ snehānnirūcyate //
madhyotkṛṣṭāvarāḥ śaityāt kaṣāyasvādutiktakāḥ /
svadurgurutvādadhikaḥ kaṣāyāllavaṇo+avaraḥ //
amlāt kaṭustatastikto laghutvāduttamottamaḥ /
kecillaghūnāmavaramicchanti lavaṇaṃ rasam //
gaurave lāghave caiva so+avarastyūbhayorapi /
paraṃ cāto vipākānāṃ lakṣaṇaṃ saṃpravakṣyate //
kaṭutiktakaṣāyāṇaṃ vipākaḥ prāyaśaḥ kaṭuḥ /
amlo+amlaṃ pacyate svādurmadhuram lavaṇastathā //
madhuro lavaṇāmlau ca snigdhabhāvāttrayo rasāḥ /
vātamūtrapurīṣāṇāṃ prāyo mokṣe sukhā matāḥ //
kaṭutiktakaṣāyāstu rūkṣabhāvāttrayo rasāḥ /
duḥkhāya mokṣe dṛśyante vātaviṇmūtraretasām //
śukrahā baddhaviṇmūtro vipāko vātalaḥ kaṭuḥ /
madhuraḥ sṛṣṭaviṇmūtro vipākaḥ kaphaśukralaḥ //
pittakṛt sṛṣṭaviṇmūtraḥ pāko+amlaḥ śukranāśanaḥ /
teṣāṃ guruḥ syānmadhuraḥ kaṭukāmlāvato+anyathā //
vipākalakṣaṇasyālpamadhyabhūyiṣṭhatāṃ prati /
dravyāṇāṃ guṇavaiśeṣyāttatra tatropalakṣayet //
mṛdutīkṣṇagurulaghusnigdharūkṣoṣṇaśītalam /
vīryamaṣṭavidhaṃ kecit keciddvividhamāsthitāḥ //
śītoṣṇamiti vīryaṃ tu kriyate yena yā kriyā /
nāvīryaṃ kurute kiṃcit sarvā vīryakṛtā kriyā //
raso nipāte dravyāṇāṃ vipākaḥ karmaniṣṭhayā /
vīryaṃ yāvadadhīvāsānnipātāccopalabhyate //
rasavīryavipākānāṃ sāmānyaṃ yatra lakṣyate /
viśeṣaḥ karmaṇāṃ caiva prabhāvastasya sa smṛtaḥ //
kaṭukaḥ kaṭukaḥ pāke vīryoṣṇaścitrako mataḥ /
tadvaddantī prabhāvāttu virecayati mānavam //
viṣaṃ viṣaghnamuktaṃ yat prabhāvastatra kāraṇam /
ūrdhvānulomikaṃ yacca tat prabhāvaprabhāvitam //
maṇīnāṃ dhāraṇīyānāṃ karma yadvividhātmakam /
tat prabhāvākṛtaṃ teṣāṃ prabhāvo+acintya ucyate //
samyagvipākavīryāṇi prabhāvaścāpyudāhṛtaḥ /
kiṃcidrasena kurute karma vīryeṇa cāparam //
dravyaṃ guṇena pākena prabhāveṇa ca kiṃcana /
rasaṃ vipākastau vīryaṃ prabhāvastānapohati //
balasāmye rasādīnāmiti naisargikaṃ balam /
ṣaṇṇāṃ rasānāṃ vijñānamupadekṣyāmyataḥ param //
snehanaprīṇanāhlādamārdavairupalabhyate /
mukhastho madhuraścāsyaṃ vyāpnuva&llimpatīva ca //
dantaharṣānmukhāsrāvāt svedanānmukhabodhanāt /
vidāhāccāsyakaṇṭhasya prāśyaivāmlaṃ rasaṃ vadet //
pralīyan kledaviṣyandamārdavaṃ kurute mukhe /
yaḥ śīghraṃ lavaṇo jñeyaḥ sa vidāhānmukhasya ca //
saṃvejayedyo rasānāṃ nipāte tudatīva ca /
vidahanmukhanāsākṣi saṃsrāvī sa kaṭuḥ smṛtaḥ //
pratihanti nipāte yo rasanaṃ svadate na ca /
sa tikto mukhavaiśadyaśoṣaprahlādakārakaḥ //
vaiśadyastambhajāḍyairyo rasanaṃ yojayedrasaḥ /
badhnātīva ca yaḥ kaṇṭhaṃ kaṣāyaḥ sa vikāsyapi //

evamuktavantaṃ bhagavantamātreyamagniveśa uvāca bhagavan śrutametadavitathamarthasaṃpadyuktaṃ bhagavato yathāvaddravyaguṇakarmādhikāre vacaḥ paraṃ tvāhāravikārāṇāṃ vairodhikānāṃ lakṣaṇamanatisaṃkṣepeṇopadiśyamānaṃ śuśrūṣāmaha iti //

tamuvāca bhagavānātreyaḥ dehadhātupratyanīkabhūtāni dravyāṇi dehadhātubhirvirodhamāpadyante parasparaguṇaviruddhāni kānicit kānicit saṃyogāt saṃskārādaparāṇi deśakālamātrādibhiścāparāṇi tathā svabhāvādaparāṇi //

tatra yānyāhāramadhikṛtya bhūyiṣṭhamupayujyante teṣāmekadeśaṃ vairodhikamadhikṛtyopadekṣyāmaḥ na matsyān payasā sahābhyavaharet ubhayaṃ hyetanmadhuraṃ madhuravipākaṃ mahābhiṣyandi śītoṣṇatvādviruddhavīryā viruddhavīryatvācchoṇitapradūṣaṇāya mahābhiṣyanditvānmārgoparodhāya ca //

tanniśamyātreyavacanamanu bhadrakāpyo+agniveśamuvāca sarvāneva matsyān payasā sahābhyavaharedanyatraikasmāccilicimāt sa punaḥ śakalī lohitanayanaḥ sarvato lohitarājī rohitākāraḥ prāyo bhūmau carati taṃ cet payasā sahābhyavaharenniḥsaṃśayaṃ śoṇitajānāṃ vibandhajānāṃ ca vyādhīnāmanyatamamathavā maraṇaṃ prāpnuyāditi //

neti bhagavānātreyaḥ sarvāneva matsyānn apayasā sahābhyavaharedviśeṣatastu cilicimaṃ sa hi mahābhiṣyanditvāt sthūlalakṣaṇatarānetān vyādhīnupajanayatyāmaviṣamudīrayati ca /

grāmyānūpaudakapiśitāni ca madhutilaguḍapayomāṣamūlakaṣisairvirūḍhadhānyairvā naikadhyamadyāt tanmūlaṃ hi bādhiryāndhyavepathujāḍyakalamūkatāmaiṇmiṇyamathavā maraṇamāpnoti /

na pauṣkaraṃ rohiṇīkaṃ śākaṃ kapotān vā sarṣapatailabhraṣṭānmadhupayobhyāṃ sahābhyavaharet tanmūlaṃ hi &śoṇitābhiṣyandadhamanīpravicayāpasmāraśaṅkhakagalagaṇḍarohiṇīnāmanyatamaṃ prāpnotyathavā maraṇamiti /

na mūlakalaśunakṛṣṇagandhārjakasumukhasurasādīni bhakṣayitvā payaḥ sevyaṃ kuṣṭhābādhabhayāt /

na jātukaśākaṃ na nikucaṃ pakvaṃ madhupayobhyāṃ sahopayojyam etaddhi maraṇāyāthavā balavarṇatejovīryoparodhāyālaghuvyādhaye ṣāṇḍhyāya ceti /

tadeva nikucaṃ pakvaṃ na māṣasūpaguḍasarpirbhiḥ sahopayojyaṃ vairodhikatvāt /tathā+āmrāmrātakamātuluṅganikucakaramardamocadantaśaṭhabadarakośāmrabhavyajāmbavakapitthatintiḍīkapārāvatākṣoḍapanasanālikeradāḍimāmalakānyevaṃprakārāṇi cānyāni dravyāṇi sarvaṃ cāmlaṃ dravamadravaṃ ca payasā saha viruddham /

tathā kaṅguvanakamakuṣṭhakakulatthamāṣaniṣyāvāḥ payasā saha viruddhāḥ /

padmottarikāśākaṃ śārkaro maireyo madhu ca sahopayuktaṃ viruddhaṃ vātaṃ cātikopayati /

hāridrakaḥ sarṣapatailabhṛṣṭo viruddhaḥ pittaṃ cātikopayati /

pāyaso manthānupāno viruddhaḥ śleṣmāṇaṃ cātikopayati /

upodikā tilakalkasiddhā heturatīsārasya /

balākā vāruṇyā saha kulmāṣairapi viruddhā saiva śūkaravasāparibhṛṣṭā sadyo vyāpādayati /

mayūramāṃsameraṇḍasīsakāvasaktameraṇdāgnipluṣṭameraṇḍatailayuktaṃ sadyo vyāpādayati /

hāridrakamāṃsaṃ hāridrasīsakāvasaktaṃ hāridrāgnipluṣṭaṃ sadyo vyāpādayati tadeva bhasmapāṃśuparidhvastaṃ sakṣaudraṃ sadyo maraṇāya /

matsyanistālanasiddhāḥ pippalyastathā kākamācī madhu ca maraṇāya /

madhu coṣṇamuṣṇārtasya ca madhu maraṇāya /

madhusarpiṣī samadhṛte madhu vāri cāntarikṣaṃ samadhṛtaṃ madhu puṣkarabījaṃ madhu pītvoṣṇodakaṃ bhallātakoṣṇodakaṃ takrasiddhaḥ kampillakaḥ paryuṣitā kākamācī aṅgāraśūlyo bhāsaśceti viruddhāni /

ityetadyathāpraśnamabhinirdiṣtāṃ bhavatīti //

bhavanti cātra

yat kiñciddoṣamāsrāvya na nirharati kāyataḥ /
āhārajātaṃ tat sarvamahitāyopapadyate //
yaccāpi deśakālāgnimātrāsātmyānilādibhiḥ /
saṃskārato vīryataśca koṣṭhāvasthākramairapi //
parihāropacārābhyāṃ pākāt saṃyogato+api ca /
viruddhaṃ tacca na hitaṃ hṛtsaṃpadvidhibhiśca yat //
viruddhaṃ deśatastāvadrūkṣatīkṣaṇādi dhanvani /
ānūpe snigdhaśītādi bheṣajaṃ yanniṣevyate //
kālato+api viruddhaṃ yacchītarūkṣādisevanam /
śīte kāle tathoṣṇe ca kaṭukoṣṇādisevanam //
viruddhamanale tadvadannapānaṃ caturvidhe /
madhusarpiḥ samadhṛtaṃ mātrayā tadvirudhyate //
kaṭukoṣṇādisātmyasya svāduśītādisevanam /
yattat sātmyaviruddhaṃ tu viruddhaṃ tvanilādibhiḥ //
yā samānaguṇābhyāsaviruddhānnauṣadhikriyā /
saṃskārato viruddhaṃ tadyadbhojyaṃ viṣavadbhavet //
eraṇḍasīsakāsaktaṃ śikhimāṃsaṃ yathaiva hi /
viruddhaṃ vīryato jñeyaṃ vīryataḥ śītalātmakam //
tat saṃyojyoṣṇavīryeṇa dravyeṇa saha sevyate /
krūrakoṣṭhasya cātyalpaṃ mandavīryamabhedanam //
mṛdukoṣṭhasya guru ca bhedanīyaṃ tathā bahu /
etat koṣṭhaviruddhaṃ tu viruddhaṃ syādavasthayā //
śramavyavāyavyāyāmasaktasyānilakopanam /
nidrālasasyālasasya bhojanaṃ śleṣmakopanam //
yaccānutsṛjya viṇmūtraṃ bhuṅkte yaścābubhukṣitaḥ /
tacca kramaviruddhaṃ syādyaccātikṣudvaśānugaḥ //
parihāraviruddhaṃ tu varāhādīnniṣevya yat /
sevetoṣṇaṃ ghṛtādīṃśca pītvā śītaṃ niṣevate //
viruddhaṃ pākataścāpi duṣṭadurdārusādhitam /
apakvataṇḍulātyarthapakvadagdhā ca yadbhavet /
saṃyogato viruddhaṃ tadyathā+amlaṃ payasā saha //
amanorucitaṃ yacca hṛdviruddhaṃ taducyate /
saṃpadviruddhaṃ tadvidyādasaṃjātarasaṃ tu yat //
atikrāntarasaṃ vā+api vipannarasameva vā /
jñeyaṃ vidhiviruddhaṃ tu bhujyate nibhṛte na yat /
tadevaṃvidhamannaṃ syādviruddhamupayojitam //
ṣāṇḍhyāndhyavīsarpadakodarāṇāṃ visphoṭakonmādabhagandarāṇām /
mūrcchāmadādhmānagalagrahāṇāṃ pāṇḍvāmayasyāmaviṣasya caiva //
kilāsakuṣṭhagrahaṇīgadānāṃ śothāmlapittajvarapīnasānām /
santānadoṣasya tathaiva mṛtyorviruddhamannaṃ pravadanti hetum //
eṣāṃ khalvapareṣāṃ ca vairodhikanimittānāṃ vyādhīnāmime bhāvāḥ pratikārā bhavanti /
tadyathā vamanaṃ virecanaṃ ca tadvirodhināṃ ca dravyāṇāṃ saṃśamanārthamupayogaḥ tathāvidhaiśca dravyaiḥ pūrvamabhisaṃskāraḥ śarīrasyeti //
bhavataścātra
viruddhāśanajān rogān pratihanti vivecanam /
vamanaṃ śamanaṃ caiva pūrvaṃ vā hitasevanam //
sātmyato+alpatayā vā+api dīptāgnestaruṇasya ca /
snigdhavyāyāmabalināṃ viruddhaṃ vitathaṃ bhavet //
tatra ślokāḥ
matirāsīnmaharṣīṇāṃ yā yā rasaviniścaye /
dravyāṇi guṇakramabhyāṃ dravyasaṃkhyā rasāśrayā //
kāraṇaṃ rasasaṃkhyāyā rasānurasalakṣaṇam /
parādīnāṃ guṇānāṃ ca lakṣaṇāni pṛthakpṛthak //
pañcātmakānāṃ ṣaṭtvaṃ ca rasānāṃ yena hetunā /
ūrdhvānulomabhājaśca yadguṇātiśayādrasāḥ //
ṣaṇṇāṃ rasānāṃ ṣaṭtve ca savibhaktā vibhaktayaḥ /
uddeśaścāpavādaśca dravyāṇāṃ guṇakarmaṇi //
pravarāvaramadhyatvaṃ rasānām gaurvādiṣu /
pākaprabhāvayorliṅgaṃ vīryasaṃkhyāviniścayaḥ //
ṣaṇṇāmāsvādyamānānāṃ rasānāṃ yat svalakṣaṇam /
yadyadvirudhyate yasmādyena yatkāri caiva yat //
vairodhikanimittānāṃ vyāhīnāmauṣadhaṃ ca yat /
ātreyabhadrakāpyīye tat sarvamavadanmuniḥ //

ityagniveśakṛte tantre carakapratisaṃskṛte ślokasthāne ātreyabhadrakāpyīyo nāma ṣaḍviṃśo+adhyāyaḥ //

1.27. saptaviṃśo+adhyāyaḥ

athāto+annapānavidhimadhyāyaṃ vyākhyāsyāmaḥ //

iti ha smāha bhagavānātreyaḥ //

iṣṭavarṇagandharasasparśaṃ vidhivihitamannapānaṃ prāṇināṃ prāṇisaṃjñakānāṃ prāṇamācakṣate kuśalāḥ pratyakṣaphaladarśanāt tadindhanā hyantaragneḥ sthitiḥ tat sattvamūrjyati taccharīradhātuvyūhabalavarṇendriyaprasādakaraṃ yathoktamupasevyamānaṃ viparītamahitāya saṃpadyate //

tasmāddhitāhitāvabodhanārthamannapānavidhimakhilenopadekṣyāmo&+agniveśa!/

tat svabhāvādudaktaṃ kledayati, lavaṇaṃ viṣyandayati, kṣāraḥ pācayati, madhu saṃdadhāti, sarpiḥ snehayati, kṣīraṃ jīvayati, māṃsaṃ bṛṃhayati, rasaḥ prīṇayati, surā jarjarīkaroti, śīdhuravadhamati, drākṣāsavo dīpayati, phāṇitamācinoti, dadhi śophaṃ janayati, piṇyākaśākaṃ glapayati, prabhūtāntarmalo māṣasūpaḥ, dṛṣṭiśukraghnaḥ kṣāraḥ, prāyaḥ pittalamamlamanyatra dāḍimāmalakāt, prāyaḥ śleṣmalaṃ madhuramanyatra madhunaḥ purāṇācca śāliṣaṣṭikayavagodhūmāt, prāyastikaṃ vātalamavṛṣyaṃ cānyatra vegāgrāmṛtāpaṭolapatrāt, prāyaḥ kaṭukaṃ vātalamavṛṣyaṃ cānyatra pippalīviśvabheṣajāt//

paramato &vargasaṃgraheṇāhāradravyāṇyanuvyākhyāsyāmaḥ//
śūkadhānyaśamīdhānyamāṃsaśākaphalāśrayān/
vargān haritamadyāmbugorasekṣuvikārikān//
daśa dvau cāparau vargau kṛtānnāhārayoginām/
rasavīryavipākaiśca prabhāvaiśca pracakṣmahe//
atha śūkadhānyavargaḥ--- raktaśālirmahāśāliḥ kalamaḥ śakunāhṛtaḥ&/
&tūrṇako dīrghaśūkaśca gauraḥ pāṇḍukalāṅgulau//
sugandhako lohavālaḥ sārivākhyaḥ pramodakaḥ/
pataṅgastapanīyaśca ye cānye śālayaḥ śubhāḥ//
śītā rase vipāke ca madhurāścālpamārutāḥ/
baddhālpavarcasaḥ snigdhā bṛṃhaṇāḥ śukramūtralāḥ//
raktaśālirvarasteṣāṃ &tṛṣṇāghnastrimalāpahaḥ/
mahāṃstasyānu kalamastasyāpyanu tataḥ pare//
yavakā hāyanāḥ pāṃsuvāpyanaiṣadhakādayaḥ&/
śālīnāṃ śālayaḥ kurvantyanukāraṃ guṇāguṇaiḥ//
śītaḥ snigdho+aguruḥ svādustridoṣaghnaḥ sthirātmakaḥ/
ṣaṣṭikaḥ pravaro gauraḥ kṛṣṇagaurastato+anu ca//
varakoddālakau cīnaśāradojjvaladardurāḥ/
&gandhanāḥ kuruvindāśca ṣaṣṭikālpāntarā guṇaiḥ//
madhuraścāmlapākaśca vrīhiḥ pittakaro guruḥ/
bahumūtrapurīṣoṣmā tridoṣastveva pāṭalaḥ//
sakoradūṣaḥ śyāmākaḥ kaṣāyamadhuro laghuḥ/
vātalaḥ kaphapittaghnaḥ śītaḥ saṃgrāhiśoṣaṇaḥ//
hastiśyāmākanīvāratoyaparṇīgavedhukāḥ/
praśāntikāmbhaḥśyāmākalauhityāṇupriyaṅgavaḥ&//
mukundo kṣiṇṭigarmūṭī& varukā varakāstathā/
śibirotkaṭajūrṇāhvāḥ śyāmākasadṛśā guṇaiḥ//
rūkṣaḥ śīto+aguruḥ svādurbahuvātaśakṛdyavaḥ/
sthairyakṛt &sakaṣāyaśca balyaḥ śleṣmavikāranut//
rūkṣaḥ kaṣāyanuraso madhuraḥ kaphapittahā/
medaḥkrimiviṣaghnaśca balyo veṇuyavo mataḥ//
sandhānakṛdvātaharo godhūmaḥ svāduśītalaḥ/
jīvano bṛṃhaṇo vṛṣyaḥ snigdhaḥ sthairyakaro guruḥ//
nāndīmukhī madhūlī ca madhurasnigdhaśītale/
ityayaṃ śūkadhānyānāṃ pūrvo vargaḥ samāpyate//
atha śamīdhānyavargaḥ--- kaṣāyamadhuro rūkṣaḥ śītaḥ pāke kaṭurlaghuḥ/
&viśadaḥ śleṣmapittaghno mudgaḥ sūpyottamo mataḥ//
vṛṣyaḥ paraṃ vātaharaḥ snigdhoṣṇo madhuro guruḥ/
balyo bahumalaḥ puṃstvaṃ māṣaḥ śīghraṃ dadāti ca//
rājamāṣaḥ& saro rucyaḥ kaphaśukrāmlapittanut/
tatsvādurvātalo rūkṣaḥ kaṣāyo viśado guruḥ//
uṣṇāḥ kaṣāyāḥ pāke+amlāḥ kaphaśukrānilāpahāḥ/
kulatthā grāhiṇaḥ kāsahikkāśvāsārśasāṃ hitāḥ//
madhurā madhurāḥ pāke grāhiṇo rūkṣaśītalāḥ/
makuṣṭhakāḥ praśasyante raktapittajvarādiṣu//
caṇakāścamasūrāśca khaṇḍikāḥ sahareṇavaḥ/
laghavaḥ śītamadhurāḥ sakaṣāyā virūkṣaṇāḥ//
pittaśleṣmaṇi śasyante sūpeṣvālepaneṣu ca/
teṣāṃ masūraḥ saṃgrāhī kalāyo vātalaḥ param//
snigdhoṣṇo madhurastiktaḥ kaṣāyaḥ kaṭukastilaḥ/
tvacyaḥ keśyaśca balyaśca vātaghnaḥ kaphapittakṛt//
madhurāḥ śītalā gurvyo balaghnyo rūkṣaṇātmikāḥ/
sasnehā balibhirbhojyā vividhāḥ śimbijātayaḥ//
śimbī rūkṣā kaṣāyā ca koṣṭhe vātaprakopinī/
na ca vṛṣyā na cakṣuṣyā viṣṭabhya ca vipacyate//
āḍhakī kaphapittaghnī vātalā, kaphavātanut/
avalgujaḥ saiḍagajo, niṣpāvā vātapittalāḥ//
kākāṇḍomā(lā)tmaguptānāṃ māṣavat phalamādiśet/
dvitīyo+ayaṃ śamīdhānyavargaḥ prokto maharṣiṇā//
atha māṃsavargaḥ--- gokharāśvataroṣṭrāśvadvīpisiṃharkṣavānarāḥ/
vṛko vyāghrastarakṣuśca babhrumārjāramūṣikāḥ//
lopāko jambukaḥ śyeno vāntādaścāṣavāyasau/
śaśaghnī madhuhā bhāso gṛdhrolūkakuliṅgakāḥ//
dhūmikā kuraraśceti prasahā mṛgapakṣiṇaḥ/
śvetaḥ śyāmaścitrapṛṣṭhaḥ kālakaḥ kākulīmṛgaḥ//
kūrcikā cillaṭo bheko godhā śallakagaṇḍakau/
kadalī nakulaḥ śvāviditi bhūmiśayāḥ smṛtāḥ//
sṛmaraścamaraḥ khaṅgo mahiṣo gavayo gajaḥ/
nyaṅkurvarāhaścānūpā mṛgāḥ sarve rurustathā//
kūrmaḥ karkaṭako matsyaḥ śiśumārastimiṅgilaḥ/
śuktiśaṅkhodrakummīraculukīmakarādayaḥ//
iti vāriśayāḥ proktā, vakṣyante vāricāriṇaḥ/
haṃsaḥ krauñco balākā ca bakaḥ kāraṇḍavaḥ plavaḥ//
śarāriḥ puṣkarāhvaśca keśarī maṇituṇḍakaḥ&/
mṛṇālakaṇṭho madguśca kādambaḥ kākatuṇḍakaḥ//
utkrośaḥ puṇḍarīkākṣo megharāvo+ambukukkuṭī/
ārā nandīmukhī vāṭī sumukhāḥ sahacāriṇaḥ//
rohiṇī kāmakālī ca sāraso raktaśīrṣakaḥ//
cakravākastathā+anye ca khagāḥ santyambucāriṇaḥ//
pṛṣataḥ śarabho rāmaḥ śvadaṃṣṭro mṛgamātṛkā/
śaśoraṇau kuraṅgaśca gokarṇaḥ koṭṭakārakaḥ//
cāruṣko hariṇaiṇau ca śambaraḥ kālapucchakaḥ/
ṛṣyaśca varapotaśca vijñeyā jāṅgalā mṛgāḥ//
lāvo vartīrakaścaiva vārtīkaḥ sakapiñjalaḥ/
cakoraścopacakraśca kukkubho raktavartmakaḥ//
lāvādyā viṣkirāstvete vakṣyante vartakādayaḥ/
vartako vartikā caiva barhī tittirikukkuṭau//
kaṅkaśārapadendrābhagonardagirivartakāḥ/
krakaro+avakaraścaiva &vāraḍaśceti viṣkirāḥ//
śatapatro bhṛṅgarājaḥ koyaṣṭirjīvajīvakaḥ/
kairātaḥ kokilo+atyūho gopāputraḥ priyātmajaḥ//
laṭṭā laṭṭa(ṭū)ṣako babhrurvaṭahā ḍiṇḍimānakaḥ/
jaṭī &dundubhipākkāralohapṛṣṭhakuliṅgakāḥ//
kapotaśukaśāraṅgāściraṭīkaṅkuyaṣṭikāḥ/
sārikā kalaviṅkaśca caṭako+aṅgāracūḍakaḥ//
pārāvataḥ pāṇḍa(na)vikaḥ ityuktāḥ pratudā dvijāḥ/
prasahya bhakṣayantīti prasahāstena saṃjñitāḥ//
bhūśayā bilavāsitvādānūpānūpasaṃśrayāt&/
jale nivāsājjalajā jalecaryājjalecarāḥ//
sthalajā jāṅgalāḥ proktā mṛgā jāṅgalacāriṇaḥ/
vikīrya viṣkirāśceti pratudya pratudāḥ smṛtāḥ//
yoniraṣṭavidhā tveṣā māṃsānāṃ parikīrtitā/
prasahā bhūśayānūpavārijā vāricāriṇaḥ//
gurūṣṇasnigdhamadhurā balopacayavardhanāḥ/
vṛṣyāḥ paraṃ vātaharāḥ kaphapittavivardhanāḥ//
hitā vyāyāmanityebhyo narā dīptāgnayaśca ye/
prasahānāṃ viśeṣeṇa māṃsaṃ māṃsāśināṃ bhiṣak//
jīrṇārśograhaṇīdoṣaśoṣārtānāṃ prayojayet/
lāvādyo vaiṣkiro vargaḥ pratudā jāṅgalā mṛgāḥ//
laghavaḥ śītamadhurāḥ sakaṣāyā hitā nṛṇām/
pittottare vātamadhye sannipāte kaphānuge//
viṣkirā vartakādyāstu prasahālpāntarā guṇaiḥ/
&nātiśītagurusnigdhaṃ māṃsamājamadoṣalam//
śarīradhātusāmānyādanabhiṣyandi bṛṃhaṇam/
māṃsaṃ madhuraśītatvādguru bṛṃhaṇamāvikam//
&yonāvajāvike miśragocaratvādaniścite/
sāmānyenopadiṣṭānāṃ māṃsānāṃ svaguṇaiḥ pṛthak//
keṣāṃcidguṇavaiśeṣyādviśeṣa upadekṣyate/
darśanaśrotramedhāgnivayovarṇasvarāyuṣām//
barhī hitatamo balyo vātaghno māṃsaśukralaḥ/
gurūṣṇasnigdhamadhurāḥ svaravarṇabalapradāḥ//
bṛṃhaṇāḥ śukralāścoktā haṃsā mārutanāśanāḥ/
snigdhāścoṣṇāśca vṛṣyāśca bṛṃhaṇāḥ svarabodhanāḥ//
balyāḥ paraṃ vātaharāḥ svedanāścaraṇāyudhāḥ/
gurūṣṇo madhuro nātidhanvānūpaniṣevaṇāt//
tittiriḥ saṃjayecchīghraṃ trīn doṣānanilolbaṇān/
pittaśleṣmavikāreṣu sarakteṣu kapiñjalāḥ//
mandavāteṣu śasyante śaityamādhuryalāghavāt/
lāvāḥ kaṣāyamadhurā laghavo+agnivivardhanāḥ//
sannipātapraśamanāḥ kaṭukāśca vipākataḥ/
godhā vipāke madhurā kaṣāyakaṭukā rase//
vātapittapraśamanī bṛṃhaṇī balavardhanī/
śallako madhurāmlaśca vipāke kaṭukaḥ smṛtaḥ//
vātapittakaphaghnaśca kāsaśvāsaharastathā/
kaṣāyaviśadāḥ śītā raktapittanibarhaṇāḥ//
vipāke madhurāścaiva kapotā gṛhavāsinaḥ/
tebhyo laghutarāḥ kiṃcit kapotā vanavāsinaḥ&//
śītāḥ saṃgrāhiṇaścaiva svalpamūtrakarāśca te/
śukamāṃsaṃ kaṣāyāmlaṃ vipāke rūkṣaśītalam//
śoṣakāsakṣayahitaṃ saṃgrāhi laghu dīpanam/
caṭakā madhurāḥ snigdhā balaśukravivardhanāḥ//
sannipātapraśamanāḥ śamanā mārutasya ca/
kaṣāyo viśado rūkṣaḥ śītaḥ pāke kaṭurlaghuḥ//
śaśaḥ svāduḥ praśastaśca saṃnipāte+anilāvare/
madhurā madhurāḥ pāke tridoṣaśamanāḥ śivāḥ//
laghavo baddhaviṇmūtrāḥ śītāścaiṇāḥ prakīrtitāḥ/
snehanaṃ bṛṃhaṇaṃ vṛṣyaṃ śramaghnamanilāpaham//
varāhapiśitaṃ balyaṃ rocanaṃ svedanaṃ guru/
gavyaṃ kevalavāteṣu pīnase viṣamajvare//
śuṣkakāsaśramātyagnimāṃsakṣayahitaṃ ca tat/
snigdhoṣṇaṃ madhuraṃ vṛṣyaṃ māhiṣaṃ guru tarpaṇam//
dārḍhyaṃ bṛhattvamutsāhaṃ svapnaṃ ca janayatyapi/
gurūṣṇā madhurā balyā bṛṃhaṇāḥ pavanāpahāḥ//
matsyāḥ snigdhāśca vṛṣyāśca bahudoṣāḥ prakīrtitāḥ/
śaivālaśaṣpabhojitvātsvapnasya ca vivarjanāt//
rohito dīpanīyaśca laghupāko mahābalaḥ/
varṇyo vātaharo vṛṣyaścakṣuṣyo balavardhanaḥ//
medhāsmṛtikaraḥ pathyaḥ śoṣaghnaḥ kūrma ucyate/
khaḍgamāṃsamabhiṣyandi balakṛnmadhuraṃ smṛtam//
snehanaṃ bṛṃhaṇaṃ varṇyaṃ śramaghnamanilāpaham/
dhārtarāṣṭracakorāṇāṃ dakṣāṇāṃ śikhināmapi//
caṭakānāṃ ca yāni syuraṇḍāni ca hitāni ca/
kṣīṇaretaḥsu kāseṣu hṛdrogeṣu kṣateṣu ca//
madhurāṇyavidāhīni sadyobalakarāṇi ca/
śarīrabṛṃhaṇe nānyat khādyaṃ māṃsādviśiṣyate//
iti vargastṛtīyo+ayaṃ māṃsānāṃ parikīrtitaḥ/
atha śākavargaḥ--- pāṭāśuṣāśaṭīśākaṃ vāstukaṃ suniṣaṇṇakam//
vidyādgrāhi tridoṣaghnaṃ bhinnavarcastu vāstukam/
tridoṣaśamanī vṛṣyā kākamācī rasāyanī//
nātyuṣṇaśītavīryā ca bhedinī kuṣṭhanāśinī/
rājakṣavakaśākaṃ tu tridoṣaśamanaṃ laghu//
grāhi śastaṃ viśeṣeṇa grahaṇyarśovikāriṇām/
kālaśākaṃ tu kaṭukaṃ dīpanaṃ garaśophajit//
laghūṣṇaṃ vātalaṃ rūkṣaṃ &kālāyaṃ śākamucyate/
dīpanī coṣṇavīryā ca grāhiṇī kaphamārute//
praśasyate+amlacāṅgerī grahaṇyarśohitā ca sā/
madhurā madhurā pāke bhedinī śleṣmavardhanī//
vṛṣyā snigdhā ca śītā ca madaghnī cāpyupodikā/
rūkṣo madaviṣaghnaśca praśasto raktapittinām//
madhuro madhuraḥ pāke śītalastaṇḍulīyakaḥ/
maṇḍūkaparṇī vetrāgraṃ kucelā vanatiktakam//
karkoṭakāvalgujakau paṭolaṃ śakulādanī/
vṛṣapuṣpāṇi śārṅgeṣṭā kembūkaṃ sakaṭhillakam//
nāḍī kalāyaṃ gojihvā vārtākaṃ tilaparṇikā/
kaulakaṃ kārkaśaṃ naimbaṃ śākaṃ pārpaṭakaṃ ca yat//
kaphapittaharaṃ tiktaṃ śītaṃ kaṭu vipacyate/
sarvāṇi sūpyaśākāni phañjī cillī kutumbakaḥ//
ālukāni ca sarvāṇi sapatrāṇi kuṭiñjaram&/
śaṇaśālmalipuṣpāṇi karbudāraḥ suvarcalā//
niṣpāvaḥ kovidāraśca patturaścuccuparṇikā/
kumārajīvo loṭṭākaḥ pālaṅkyā māriṣastathā//
kalambanālikāsūryaḥ kusumbhavṛkadhūmakau/
lakṣmaṇā ca prapunnāḍo nalinīkā kuṭherakaḥ//
loṇikā yavaśākaṃ ca kuṣmāṇḍakamavalgujam/
yātukaḥ śālakalyāṇī triparṇī pīluparṇikā//
śākaṃ guru ca rūkṣaṃ ca prāyo viṣṭabhya jīryati/
madhuraṃ śītavīryaṃ ca purīṣasya ca bhedanam//
svinnaṃ niṣpīḍitarasaṃ snehāḍhyaṃ tat praśasyate/
śaṇasya kovidārasya karbudārasya śālmaleḥ//
puṣpaṃ grāhi praśastaṃ ca raktapitte viśeṣataḥ/
nyagrodhodumbarāśvatthaplakṣapadmādipallavāḥ//
kaṣāyāḥ stambhanāḥ śītā hitāḥ pittātisāriṇām/
vāyuṃ vatsādanī hanyāt kaphaṃ gaṇḍīracitrakau//
śreyasī bilvaparṇī ca bilvapatraṃ tu vātanut/
bhaṇḍī śatāvarīśākaṃ balā jīvantikaṃ ca yat//
parvaṇyāḥ parvapuṣpyāśca vātapittaharaṃ smṛtam/
laghu bhinnaśakṛttiktaṃ lāṅgalakyurubūkayoḥ//
tilavetasaśākaṃ ca śākaṃ pañcāṅgulasya ca/
vātalaṃ kaṭutiktāmlamadhomārgapravartanam//
rūkṣāmlamuṣṇaṃ kausumbhaṃ kaphaghnaṃ pittavardhanam/
trapusairvārukaṃ svādu guru viṣṭambhi śītalam//
mukhapriyaṃ ca rūkṣaṃ ca mūtralaṃ trapusaṃ tvati/
ervārukaṃ ca saṃpakvaṃ dāhatṛṣṇāklamārtinut//
varcobhedīnyalābūni& rūkṣaśītagurūṇi ca/
cirbhaṭairvāruke tadvadvarcobhedahite tu te//
&sakṣāraṃ pakvakūṣmāṇḍaṃ madhurāmlaṃ tathā laghu/
sṛṣṭamūtrapurīṣaṃ ca sarvadoṣanibarhaṇam//
kelūṭaṃ ca kadambaṃ ca nadīmāṣakamaindukam/
viśadaṃ guru śītaṃ ca samabhiṣyandi cocyate//
utpalāni kaṣāyāṇi raktapittaharāṇi ca/
tathā tālapralambaṃ syāduraḥkṣatarujāpaham//
kharjūraṃ tālaśasyaṃ ca raktapittakṣayāpaham/
tarūṭabisaśālūkakrauñcādanakaśerukam//
śṛṅgāṭakāṅkaloḍyaṃ ca guru viṣṭambhi śītalam/
kumudotpalanālāstu sapuṣpāḥ saphalāḥ smṛtāḥ//
śītāḥ svādukaṣāyāstu kaphamārutakopanāḥ/
kaṣāyamīṣadviṣṭambhi raktapittaharaṃ smṛtam//
pauṣkaraṃ tu bhavedvījaṃ madhuraṃ rasapākayoḥ/
balyaḥ śīto guruḥ snigdhastarpaṇo bṛṃhaṇātmakaḥ//
vātapittaharaḥ svādurvṛṣyo muñcātakaḥ param/
jīvano bṛṃhaṇo vṛṣyaḥ kaṇṭhyaḥ śasto rasāyane//
vidārikando balyaśca mūtralaḥ svāduśītalaḥ/
amlikāyāḥ smṛtaḥ kando grahaṇyarśohito laghuḥ//
nātyuṣṇaḥ kaphavātaghno grāhī śasto madātyaye/
tridoṣaṃ baddhaviṇmūtraṃ sārṣapaṃ śākamucyate//
(&tadvat syādraktanālasya rūkṣamamlaṃ viśeṣataḥ/)
tadvat piṇḍālukaṃ vidyāt kandatvācca mukhapriyam/
sarpacchatrakavarjyāstu bahvayo+anyāśchatrajātayaḥ//
śītāḥ pīnasakartryaśca madhurā gurvya eva ca/
caturthaḥ śākavargo+ayaṃ patrakandaphalāśrayaḥ//
atha phalavargaḥ--- tṛṣṇādāhajvaraśvāsaraktapittakṣatakṣayān/
vātapittamudāvartaṃ svarabhedaṃ madātyayam//
tiktāsyatāmāsyaśoṣaṃ kāsaṃ cāśu vyapohati/
mṛdvīkā bṛṃhaṇī vṛṣyā madhurā snigdhaśītalā//
madhuraṃ bṛṃhaṇaṃ vṛṣyaṃ kharjūraṃ guru śītalam/
kṣaye+abhighāte dāhe ca vātapitte ca taddhitam//
tarpaṇaṃ bṛṃhaṇaṃ phalgu guru viṣṭambhi śītalam/
parūṣakaṃ madhūkaṃ ca vātapitte ca śasyate//
madhuraṃ bṛṃhaṇaṃ balyamāmrātaṃ tarpaṇaṃ guru/
sasnehaṃ śleṣmalaṃ śītaṃ vṛṣyaṃ viṣṭabhya jīryati//
tālaśasyāni siddhāni nārikelaphalāni ca/
bṛṃhaṇasnigdhaśītāni balyāni madhurāṇi ca//
madhurāmlakaṣāyaṃ ca viṣṭambhi guru śītalam/
pittaśleṣmakaraṃ bhavyaṃ grāhi vaktraviśodhanam//
amlaṃ parūṣakaṃ drākṣā badarāṇyārukāṇi ca/
pittaśleṣmaprakopīṇi karkandhunikucānyapi//
nātyuṣṇaṃ guru saṃpakvaṃ svāduprāyaṃ mukhapriyam/
bṛṃhaṇaṃ jīryati kṣipraṃ nātidoṣalamārukam//
dvividhaṃ śītamuṣṇaṃ ca madhuraṃ cāmlameva ca/
guru pārāvataṃ jñeyamarucyatyagnināśanam//
bhavyādalpāntaraguṇaṃ kāśmaryaphalamucyate/
tathaivālpāntaraguṇaṃ tūdamamlaṃ parūṣakāt//
kaṣāyamadhuraṃ ṭaṅkaṃ vātalaṃ guru śītalam/
kapitthamāmaṃ kaṇṭhaghnaṃ viṣaghnaṃ grāhi vātalam&//
madhurāmlakaṣāyatvāt saugandhyācca rucipradam/
&paripakvaṃ ca doṣaghnaṃ viṣaghnaṃ grāhi guruvapi//
bilvaṃ tu durjaraṃ pakvaṃ doṣalaṃ pūtimārutam/
snigdhoṣṇatīkṣṇaṃ tadvālaṃ dīpanaṃ kaphavātajit//
raktapittakaraṃ bālamāpūrṇaṃ pittavardhanam/
pakvamāmraṃ jayedvāyuṃ māṃsaśukrabalapradam//
kaṣāyamadhuraprāyaṃ guru viṣṭambhi śītalam/
jāmbaraṃ kaphapittaghnaṃ grāhi vātakaraṃ param//
badaraṃ madhuraṃ snigdhaṃ bhedanaṃ vātapittajit/
tacchuṣkaṃ kaphavātaghnaṃ pitte na ca virudhyate//
kaṣāyamadhuraṃ śītaṃ grāhi simbi(ñci)tikāphalam/
gāṅgerukī karīraṃ ca bimbī todanadhanvanam//
madhuraṃ sakaṣāyaṃ ca śītaṃ pittakaphāpaham/
saṃpakvaṃ panasaṃ mocaṃ rājādanaphalāni ca//
svādūni sakaṣāyāṇi snigdhaśītagurūṇi ca/
kaṣāyaviśadatvācca saugandhyācca rucipradam//
avadaṃśakṣamaṃ hṛdyaṃ vātalaṃ lavalīphalam/
nīpaṃ &śatāhvakaṃ pīlu tṛṇaśūnyaṃ vikaṅkatam//
prācīnāmalakaṃ caiva doṣaghnaṃ garahāri ca/
aiṅgudaṃ tiktamadhuraṃ snigdhoṣṇaṃ kaphavātajit//
tindukaṃ kaphapittaghnaṃ kaṣāyaṃ madhuraṃ laghu/
vidyādāmalake sarvān rasāṃllavaṇavarjitān//
rūkṣaṃ svādu kaṣāyāmlaṃ kaphapittaharaṃ param/
rasāsṛṅgāṃsamedojāndoṣān hanti bibhītakam//
svarabhedakaphotkledapittarogavināśanam/
amlaṃ kaṣāyamadhuraṃ vātaghnaṃ grāhi dīpanam//
snigdhoṣṇaṃ dāḍimaṃ hṛdyaṃ kaphapittāvirodhi ca/
rūkṣāmlaṃ dāḍimaṃ yattu tat pittānilakopanam//
madhuraṃ pittanutteṣāṃ pūrvaṃ dāḍimamuttamam/
bṛkṣāmlaṃ grāhi rūkṣoṣṇaṃ vātaśleṣmaṇi śasyate//
amlikāyāḥ phalaṃ pakvaṃ tasmādalpāntaraṃ guṇaiḥ/
guṇaistaireva saṃyuktaṃ bhedanaṃ tvamlavetasam//
śūle+arucau vibandhe ca mande+agnau &madyaviplave/
hikkāśvāse ca kāse ca vamyāṃ varcogadeṣu ca//
vātaśleṣmasamuttheṣu sarveṣvevopadiśyate/
kesaraṃ mātuluṅgasya laghu śeṣamato+anyathā//
rocano dīpano hṛdyaḥ sugandhistvagvivarjitaḥ/
karcūraḥ kaphavātaghnaḥ śvāsahikkārśasāṃ hitaḥ//
madhuraṃ kiṃcidamlaṃ ca hṛdyaṃ bhaktaprarocanam/
durjaraṃ vātaśamanaṃ nāgaraṅgaphalaṃ &guru//
vātamābhiṣukākṣoṭamukūlakanikocakāḥ/
gurūṣṇasnigdhamadhurāḥ sorumāṇā balapradāḥ//
vātaghnā bṛṃhaṇā vṛṣyāḥ kaphapittābhivardhanāḥ/
priyālameṣāṃ sadṛśaṃ vidyādauṣṇyaṃ vinā guṇaiḥ//
śleṣmalaṃ madhuraṃ śītaṃ śleṣmātakaphalaṃ guru/
śleṣmalaṃ guru viṣṭmbhi cāṅkoṭaphalamagnijit//
gurūṣṇaṃ madhuraṃ rūkṣaṃ keśaghnaṃ ca śamīphalam/
viṣṭambhayati kārañjaṃ vātaśleṣmāvirodhi ca//
āmrātakaṃ dantaśaṭhamamlaṃ sakaramardakam/
raktapittakaraṃ vidyādairāvatakameva ca//
vātaghnaṃ dīpanaṃ caiva vārtākaṃ kaṭu tiktakam/
vātalaṃ kaphapittaghnaṃ vidyāt parpaṭakīphalam//
pittaśleṣmaghnamamlaṃ ca vātalaṃ cākṣikīphalam/
madhurāṇyamlapākīni pittaśleṣmaharāṇi ca//
aśvatthodumbaraplakṣanyagrodhānāṃ phalāni ca/
kaṣāyamadhurāmlāni vātalāni gurūṇi ca//
bhallātakāsthyagnisamaṃ tanmāṃsaṃ svādu śītalam/
pañcamaḥ phalavargo+ayamuktaḥ prāyopayogikaḥ//
atha haritavargaḥ--- rocanaṃ dīpanaṃ vṛṣyamārdrakaṃ viśvabheṣajam/
vātaśleṣmavibandheṣu rasastasyopadiśyate//
rocano dīpanastīkṣṇaḥ sugandhirmukhaśodhanaḥ/
jambīraḥ kaphavātaghnaḥ krimighno bhaktapācanaḥ//
bālaṃ doṣaharaṃ, vṛddhaṃ tridoṣaṃ, mārutāpaham/
snigdhasiddhaṃ, viśuṣkaṃ tu mūlakaṃ kaphavātajit//
hikkākāsaviṣaśvāsapārśvaśūlavināśanaḥ/
pittakṛt kaphavātaghnaḥ surasaḥ pūtigandhahā//
yavānī cārjakaścaiva śigruśāleyamṛṣṭakam/
hṛdyānyāmvādanīyāni pittamutkleśayanti ca//
gaṇḍīro jalapippalyastumbaruḥ śṛṅgaverikā/
tīkṣṇoṣṇakaṭurūkṣāṇi kaphavātaharāṇi ca//
puṃstvaghnaḥ kaṭurūkṣoṣṇo bhūstṛṇo vaktraśodhanaḥ/
kharāhvā kaphavātaghnī bastirogarujāpahā//
dhānyakaṃ cājagandhā ca sumukhaśceti rocanāḥ/
sugandhā nātikaṭukā doṣānutkleśayanti ca//
grāhī gṛñjanakastīkṣṇo vātaśleṣmārśasāṃ hitaḥ/
svedane+abhyavahāre ca yojayettamapittinām//
śleṣmalo mārutaghnaśca palāṇḍurna ca pittanut&/
āhārayogī balyaśca gururvṛṣyo+atha rocanaḥ//
krimikuṣṭhakilāsaghno vātaghno gulmanāśanaḥ/
snigdhaścoṣṇaśca vṛṣyaśca laśunaḥ kaṭuko guruḥ//
śuṣkāṇi kaphavātaghnānyetānyeṣāṃ phalāni ca/
haritānāmayaṃ caiṣa ṣaṣṭho vargaḥ samāpyate//
atha madyavargaḥ--- prakṛtyā madyamamloṣṇamamlaṃ coktaṃ vipākataḥ/
sarvaṃ sāmānyatastasya viśeṣa upadekṣyate//
kṛśānāṃ saktamūtrāṇāṃ grahaṇyarśovikāriṇām/
surā praśastā vātaghnī stanyaraktakṣayeṣu ca//
hikkāśvāsapratiśyāyakāsavarcograhārucau/
vamyānāhavibandheṣu vātaghnī madirā hitā//
śūlapravāhikāṭopakaphavātārśasāṃ hitaḥ/
jagalo grāhirūkṣoṣṇaḥ śophaghno bhaktapācanaḥ//
śoṣārśograhaṇīdoṣapāṇḍurogārucijvarān/
hantyariṣṭaḥ kaphakṛtān rogānrocanadīpanaḥ&//
mukhapriyaḥ sukhamadaḥ sugandhirbastiroganut&/
jaraṇīyaḥ pariṇato hṛdyo varṇyaśca śārkaraḥ//
rocano dīpano hṛdyaḥ śoṣaśophārśasāṃ hitaḥ/
snehaśleṣmavikāraghno varṇyaḥ pakvaraso mataḥ//
jaraṇīyo vibandhaghnaḥ svaravarṇaviśodhanaḥ/
lekhanaḥ śītarasiko hitaḥ śophodarārśasām//
sṛṣṭabhinnaśakṛdvāto gauḍastarpaṇadīpanaḥ/
pāṇḍurogavraṇahitā dīpanī cākṣikī matā&//
surāsavastīvramado vātaghno vadanapriyaḥ/
chedī madhvāsavastīkṣṇo maireyo madhuro guruḥ//
dhātakyā+abhiṣuto hṛdyo& rūkṣo rocanadīpanaḥ/
&mādhvīkavanna cātyuṣṇo mṛdvīkekṣurasāsavaḥ//
rocanaṃ dīpanaṃ hṛdyaṃ balyaṃ pittāvirodhi ca/
vibandhaghnaṃ kaphaghnaṃ ca madhu laghvalpamārutam//
surā samaṇḍā rūkṣoṣṇā yavānāṃ vātapittalā/
gurvī jīryati viṣṭabhya śleṣmalā tu madhūlikā//
dīpanaṃ jaraṇīyaṃ ca hṛtpāṇḍukrimiroganut/
grahaṇyarśohitaṃ bhedi sauvīrakatuṣodakam//
dāhajvarāpahaṃ sparśāt pānādvātakaphāpaham/
vibandhaghnamavasraṃsi dīpanaṃ cāmlakāñjikam//
prāyaśo+abhinavaṃ madyaṃ gurudoṣasamīraṇam/
srotasāṃ śodhanaṃ jīrṇaṃ dīpanaṃ laghu rocanam//
harṣaṇaṃ prīṇanaṃ madyaṃ bhayaśokaśramāpaham/
prāgalbhyavīryapratibhātuṣṭipuṣṭibalarpadam//
sāttvikairvidhivadyuktyā pītaṃ syādamṛtaṃ yathā/
vargo+ayaṃ saptamo madyamadhikṛtya prakīrtitaḥ//
atha jalavargaḥ--- jalamekavidhaṃ sarvaṃ patatyaindraṃ nabhastalāt/
&tat patat patitaṃ caiva deśakālāvapekṣate//
khāt& patat somavāyvarkaiḥ spṛṣṭaṃ kālānuvartibhiḥ/
śotoṣṇasnigdharūkṣādyairyathāsannaṃ mahīguṇaiḥ//
śītaṃ śuci śivaṃ mṛṣṭaṃ vimalaṃ laghu ṣaḍguṇam/
prakṛtyā divyamudakaṃ, bhraṣṭaṃ pātramapekṣate//
śvete kaṣāyaṃ bhavati pāṇḍare syāttu tiktakam/
kapile kṣārasaṃsṛṣṭamūṣare lavaṇānvitam//
kaṭu parvatavistāre& madhuraṃ kṛṣṇamṛttike/
etat ṣāḍguṇyamākhyātaṃ mahīsthasya jalasya hi/
tathā+avyaktarasaṃ vidyādaindraṃ kāraṃ himaṃ ca yat//
yadantarīkṣāt patatīndrasṛṣṭaṃ coktaiśca pātraiḥ parigṛhyate+ambhaḥ/
tadaindramityeva vadanti dhīrā narendrapeyaṃ &salilaṃ pradhānam//
īṣatkaṣāyamadhuraṃ susūkṣmaṃ viśadaṃ laghu/
arūkṣamanabhiṣyandi sarvaṃ pānīyamuttamam//
gurvabhiṣyandi pānīyaṃ vārṣikaṃ madhuraṃ navam/
tanu ladhvanabhiṣyandi prāyaḥ śaradi varṣati//
tattu ye sukumārāḥ syuḥ snigdhabhūyiṣṭhabhojanāḥ/
teṣāṃ bhojye ca bhakṣye ca lehye peye ca śasyate//
hemante salilaṃ snigdhaṃ vṛṣyaṃ balahitaṃ guru/
kiṃcittato laghutaraṃ śiśire kaphavātajit//
kaṣāyamadhuraṃ rūkṣaṃ vidyādvāsantikaṃ jalam/
graiṣmikaṃ tvanabhiṣyandi jalamityeva niścayaḥ//
vibhrānteṣu tu kāleṣu yat prayacchanti toyadāḥ/
salilaṃ tattu doṣāya yujyate nātra saṃśayaḥ//
rājabhī rājamātraiśca sukumāraiśca mānavaiḥ/
sugṛhītāḥ śaradyāpaḥ prayoktavyā viśeṣataḥ//
nadyaḥ pāṣāṇavicchinnavikṣubdhābhihatodakāḥ&/
himavatprabhavāḥ pathyāḥ puṇyā devarṣisevitāḥ//
nadyaḥ pāṣāṇasikatāvāhinyo vimalodakāḥ/
malayaprabhavā yāśca jalaṃ tāsvamṛtopamam//
paścimābhimukhā yāśca pathyāstā nirmalodakāḥ/
prāyo mṛduvahā gurvyo yāśca pūrvasamudragāḥ//
pāriyātrabhavā yāśca vindhyasahyabhavāśca yāḥ/
śirohṛdrogakuṣṭhānāṃ tā hetuḥ ślīpadasya ca//
vasudhākīṭasarpākhumalasaṃdūṣitodakāḥ/
varṣājalavahā nadyaḥ sarvadoṣasamīraṇāḥ//
vāpīkūpataḍāgotsasaraḥprasravaṇādiṣu/
ānūpaśailadhanvānāṃ guṇadoṣairvibhāvayet//
picchilaṃ krimilaṃ klinnaṃ parṇaśaivālakardamaiḥ/
vivarṇaṃ virasaṃ sāndraṃ durgandhaṃ na hitaṃ jalam//
visraṃ tridoṣaṃ lavaṇamambu yadvaruṇālayam/
ityambuvargaḥ prokto+ayamaṣṭamaḥ suviniścitaḥ//
atha gorasavargaḥ--- svādu śītaṃ mṛdu snigdhaṃ bahalaṃ ślakṣṇapicchilam/
guru mandaṃ prasannaṃ ca gavyaṃ daśaguṇaṃ payaḥ//
tadevaṃguṇamevaujaḥ sāmānyādabhivardhayet/
pravaraṃ jīvanīyānāṃ kṣīramuktaṃ rasāyanam//
mahiṣīṇāṃ gurutaraṃ gavyācchītataraṃ payaḥ/
snehānyūnamanidrāya hitamatyagnaye ca tat//
rūkṣoṣṇaṃ kṣīramuṣṭrīṇāmīṣatsalavaṇaṃ laghu/
śastaṃ vātakaphānāhakrimiśophodarārśasām//
balyaṃ sthairyakaraṃ sarvamuṣṇaṃ caikaśaphaṃ payaḥ/
sāmlaṃ salavaṇaṃ rūkṣaṃ śākhāvātaharaṃ laghu//
chāgaṃ kaṣāyamadhuraṃ śītaṃ grāhi payo laghu/
raktapittātisāraghnaṃ kṣayakāsajvarāpaham//
hikkāśvāsakaraṃ tūṣṇaṃ pittaśleṣmalamāvikam/
hastinīnāṃ payo balyaṃ guru sthairyakaraṃ param//
jīvanaṃ bṛṃhaṇaṃ sātmyaṃ snehanaṃ mānuṣaṃ payaḥ/
nāvanaṃ raktapitte ca tarpaṇaṃ cākṣiśūlinām//
rocanaṃ dīpanaṃ vṛṣyaṃ snehanaṃ balavardhanam/
pāke+amlamuṣṇaṃ vātaghnaṃ maṅgalyaṃ bṛṃhaṇaṃ dadhi//
pīnase cātisāre ca śītake viṣamajvare/
arucau mūtrakṛcchre ca kārśye ca dadhi śasyate//
śaradgrīṣmavasanteṣu prāyaśo dadhi garhitam/
raktapittakaphottheṣu vikāreṣvahitaṃ ca tat//
&tridoṣaṃ mandakaṃ, jātaṃ vātaghnaṃ dadhi, śukralaḥ/
saraḥ, śleṣmānilaghnastu maṇḍaḥ srotoviśodhanaḥ//
śophārśograhaṇīdoṣamūtragrahodarārucau/
snehavyāpadi pāṇḍutve takraṃ dadyādgareṣu ca//
saṃgrāhi dīpanaṃ hṛdyaṃ navanītaṃ navoddhṛtam/
grahaṇyarśovikāraghnamarditārucināśanam//
smṛtibuddhyagniśukraujaḥkaphamedovivardhanam/
vātapittaviṣonmādaśoṣālakṣmījvarāpaham&//
sarvasnehottamaṃ śītaṃ madhuraṃ rasapākayoḥ/
sahasravīryaṃ vidhibhirghṛtaṃ karmasahasrakṛt//
madāpasmāramūrcchsāyaśoṣonmādagarajvarān/
yonikarṇaśiraḥśūlaṃ ghṛtaṃ jīrṇamapohati//
sarpīṃṣyajāvimahiṣīkṣīravat svāni nirdiśet/
pīyūṣo moraṭaṃ caiva kilāṭā vividhāśca ye//
dīpatāgnīnāmanidrāṇāṃ sarva eva sukhapradāḥ/
guravastarpaṇā vṛṣyā bṛṃhaṇāḥ pavanāpahāḥ//
viśadā guravo rūkṣā grāhiṇastakrapiṇḍakāḥ/
gorasānāmayaṃ vargo navamaḥ parikīrtitaḥ//
athokṣuvargaḥ--- vṛṣyaḥ śītaḥ saraḥ snigdho bṛṃhaṇo madhuro rasaḥ/
śleṣmalo bhakṣitasyekṣoryāntrikastu& vidahyate//
śaityāt prasādānmadhuryāt pauṇḍrakādvaṃśako varaḥ/
prabhūtakrimimajjāsṛṅnodomāṃsakaro guḍaḥ//
kṣudro guḍaścaturbhāgatribhāgārdhāvaśeṣitaḥ/
raso gururyathāpūrvaṃ dhautaḥ svalpamalo guḍaḥ//
tato matsyaṇḍikākhaṇḍaśarkarā vimalāḥ param/
yathā yathaiṣāṃ vaimalyaṃ bhavecchaityaṃ tathā tathā//
vṛṣyā kṣīṇakṣatahitā sasnehā guḍaśarkarā/
kaṣāyamadhurā śītā satiktā yāsaśarkarā//
rūkṣā vamyatisāraghnī cchedanī madhuśarkarā/
tṛṣṇāsṛkpittadāheṣu praśastāḥ sarvaśarkarāḥ//
mākṣikaṃ bhrāmaraṃ kṣaudraṃ paittikaṃ madhujātayaḥ/
mākṣikaṃ pravaraṃ teṣāṃ viśeṣādbhrāmaraṃ guru//
mākṣikaṃ tailavarṇaṃ syādghṛtavarṇaṃ tu pauttikam/
kṣaudraṃ kapilavarṇaṃ syācchvetaṃ bhrāmaramucyate//
vātalaṃ guru śītaṃ ca raktapittakaphāpaham/
sandhātṛ cchedanaṃ rūkṣaṃ kaṣāyaṃ madhuraṃ madhu&//
hanyānmadhūṣṇamuṣṇārtamathavā saviṣānvayāt/
gururūkṣakaṣāyatvācchaityāccalpaṃ hitaṃ madhu//
nātaḥ kaṣṭatamaṃ kiṃcinmadhvāmāttaddhi mānavam/
upakramavirochitvāt sadyo hanyādyathā viṣam//
āme soṣṇā kriyā kāryā sā madhvāme virudhyate/
madhvāmaṃ dāruṇaṃ tasmāt sadyo hanyādyathā viṣam//
nānādravyātmakatvācca yogavāhi paraṃ madhu/(=ṣṣ ṣū 45.142cd) itīkṣuvikṛtiprāyo vargo+ayaṃ daśamo mataḥ//
atha kṛtānnavargaḥ--- kṣuttṛṣṇāglānidaurbalyakukṣirogajvarāpahā/
svedāgnijananī peyā vātavarconulomanī//
tarpaṇī grāhiṇī ladhvī hṛdyā cāpi vilepikā/
maṇḍastu dīpayatyagniṃ vātaṃ cāpyanulomayet//
mṛdūkaroti srotāṃsi svedaṃ saṃjanayatyapi/
laṅghitānāṃ viriktānāṃ jīrṇe snehe ca tṛṣyatām//
dīpanatvāllaghutvācca maṇḍaḥ syāt prāṇadhāraṇaḥ/
lājapeyā śramaghnī tu kṣāmakaṇṭhasya dehinaḥ//
tṛṣṇātīsāraśamano dhātusāmyakaraḥ śivaḥ/
lājamaṇḍo+agnijanano &dāhamūrcchānivāraṇaḥ//
mandāgniviṣamāgnīnāṃ bālasthavirayoṣitām/
deyaśca sukumārāṇāṃ lājamaṇḍaḥ susaṃskṛtaḥ//
kṣutpipāsāpahaḥ pathyaḥ śuddhānāṃ ca malāpahaḥ/
śṛtaḥ pippaliśuṇṭhībhyāṃ &yukto lājāmladāḍimaiḥ//
kaṣāyamadhurāḥ śītā laghavo lājasaktavaḥ/
sudhautaḥ prasrutaḥ svinnaḥ saṃtaptaścaudano laghuḥ//
bhṛṣṭataṇḍulamicchanti garaśleṣmāmayeṣvapi/
adhauto+aprasruto+asvinnaḥ śītaścāpyodano guruḥ//
māṃsaśākavasātailaghṛtamajjaphalaudanāḥ/
balyāḥ saṃtarpaṇā hṛdyā guravo bṛṃhayanti ca//
tadvanmāṣatilakṣīramudgasaṃyogasādhitāḥ/
kulmāṣā guravo rūkṣā vātalā bhinnavarcasaḥ//
svinnabhakṣyāstu ye kecit saupyagaudhūmayāvikāḥ/
bhiṣak teṣāṃ yathādravyamādiśedgurulāghavam//
akṛtaṃ kṛtayūṣaṃ ca tanuṃ sāṃskārikaṃ rasam/
sūpamamlamanamlaṃ ca guruṃ vidyādyathottaram//
saktavo vātalā rūkṣā bahuvarconulominaḥ/
tarpayanti naraṃ sadyaḥ pītāḥ sadyobalāśca te//
madhurā laghavaḥ śītāḥ saktavaḥ śālisaṃbhavāḥ/
grāhiṇo raktapittaghnāstṛṣṇācchardijvarāpahāḥ//
hanyādvyādhīn yavāpūpo yāvako vāḍya eva ca/
udāvartapratiśyāyakāsamehagalagrahān//
dhānāsaṃjñāstu ye bhakṣyāḥ prāyaste lekhanātmakāḥ/
śuṣkatvāttarpaṇāścaiva viṣṭambhitvācca durjarāḥ//
virūḍhadhānā śaṣkulyo madhukroḍāḥ sapiṇḍakāḥ/
pūpāḥ pūpalikādyāśca guruvaḥ paiṣṭikāḥ param//
phalamāṃsavasāśākapalalakṣaudrasaṃskṛtāḥ/
bhakṣyā vṛṣyāśca balyāśca guravo bṛṃhaṇātmakāḥ//
veśavāro guruḥ snigdho balopacayavardhanaḥ/
guravastarpaṇā vṛṣyāḥ kṣīrekṣurasapūpakāḥ&//
saguḍāḥ satilāścaiva sakṣīrakṣaudraśarkarāḥ/
bhakṣyā vṛṣyāśca balyāśca paraṃ tu guravaḥ smṛtāḥ//
sasnehāḥ snehasiddhāśca bhakṣyā vividhalakṣaṇāḥ/
guravastarpaṇā vṛṣyā hṛdyā gaudhūmikā matāḥ//
saṃskārāllaghavaḥ santi bhakṣyā gaudhūmapaiṣṭikāḥ/
dhānāparpaṭapūpādyāstān buddhvā nirdiśettathā//
pṛthukā guravo &bhṛṣṭān bhakṣayedalpaśastu tān/
yāvā viṣṭabhya jīryanti sarasā bhinnavarcasaḥ//
sūpyānnavikṛtā bhakṣyā vātalā rūkṣaśītalāḥ/
sakaṭusnehalavaṇānalpaśo bhakṣayettu tān//
mṛdupākāśca ye bhakṣyāḥ sthūlāśca kaṭhināśca ye/
guravaste vyatikrāntapākāḥ puṣṭibalapradāḥ//
dravyasaṃyogasaṃskāraṃ dravyamānaṃ pṛthak tathā/
bhakṣyāṇāmādiśedbuddhvā yathāsvaṃ gurulāghavam//
(&nānādravyaiḥ samāyuktaḥ pakvāmaklinnabharjitaiḥ/
vimardako gururhṛdyo vṛṣyo balavatāṃ hitaḥ//)
rasālā bṛṃhaṇī vṛṣyā snigdhā balyā rucipradā/
snehanaṃ tarpaṇaṃ hṛdyaṃ vātaghnaṃ saguḍaṃ dadhi//
drākṣākharjūrakolānāṃ guru viṣṭambhi pānakam/
parūṣakāṇāṃ kṣaudrasya yaccekṣuvikṛtiṃ prati//
teṣāṃ kaṭvamlasaṃyogān& pānakānāṃ pṛthak pṛthak/
dravyaṃ mānaṃ ca vijñāya guṇakarmāṇi cādiśet//
kaṭvamlasvādulavaṇā laghavo rāgaṣāḍavāḥ/
mukhapriyāśca hṛdyāśca dīpanā bhaktarocanāḥ//
āmrāmlakalehāśca bṛṃhaṇā balavardhanāḥ/
rocanāstarpaṇāścoktāḥ snehamādhuryagauravāt//
buddhvā saṃyogasaṃskāraṃ dravyamānaṃ ca tacchritam/
guṇakarmāṇi lehānāṃ teṣāṃ teṣāṃ tathā vadet//
raktapittakaphotkledi śuktaṃ vātānulomanam/
kandamūlaphalādyaṃ ca tadvadvidyāttadāsutam//
śiṇḍākī cāsutaṃ cānyat kālāmlaṃ rocanaṃ laghu/
vidyādvargaṃ kṛtānnānāmekādaśatamaṃ bhiṣak//
&kaṣāyānurasaṃ svādu sūkṣmamuṣṇaṃ vyavāyi ca/
pittalaṃ baddhaviṇmūtraṃ na ca śleṣmābhivardhanam//
vātaghneṣūttamaṃ balyaṃ medhāgnivardhanam/
tailaṃ saṃyogasaṃskārāt sarvarogāpahaṃ matam//
tailaprayogādajarā nirvikārā jitaśramāḥ/
āsannatibalāḥ saṃkhye daityādhipatayaḥ purā//
airaṇḍatailaṃ madhuraṃ guru śleṣmābhivardhanam/
vātāsṛgagulmahṛdrogajīrṇajvaraharaṃ param//
kaṭūṣṇaṃ sārṣapaṃ tailaṃ raktapittapradūṣaṇam/
kaphaśukrānilaharaṃ kaṇḍūkoṭhavināśanam&//
priyālatailaṃ madhuraṃ guru śleṣmābhivardhanam/
hitamicchanti nātyauṣṇyātsaṃyoge vātapittayoḥ//
ātasyaṃ madhurāmlaṃ tu vipāke kaṭukaṃ tathā/
uṣṇavīryaṃ hitaṃ vāte raktapittaprakopaṇam//
kusumbhatailamuṣṇaṃ ca vipāke kaṭukaṃ guru/
vidāhi ca ciśeṣeṇa sarvadoṣaprakopaṇam//
phalānāṃ yāni cānyāni &tailānyāhārasaṃvidhau/
yujyante guṇakarmabhyāṃ tāni brūyādathāphalam//
madhuro bṛṃhaṇo vṛṣyo balyo majjā tathā vasā/
yathāsattvaṃ tu śaityoṣṇe vasāmajjñorvinirdiśet//
sasnehaṃ dīpanaṃ vṛṣyamuṣṇaṃ vātakaphāpaham/
vipāke madhuraṃ hṛdyaṃ rocanaṃ viśvabheṣajam//
śleṣmalā madhurā cārdrā gurvī snigdhā ca pippalī/
sā śuṣkā kaphavātaghnī kaṭūṣṇā vṛṣyasaṃmatā&//
nātyarthamuṣṇaṃ maricamavṛṣyaṃ laghu rocanam/
cheditvācchoṣaṇatvācca dīpanaṃ kaphavātajit&//
vātaśleṣmavibandhaghnaṃ kaṭūṣṇaṃ dīpanaṃ laghu/
hiṅgu śūlapraśamanaṃ vidyāt pācanarocanam//
rocanaṃ dīpanaṃ vṛṣyaṃ cakṣuṣyamavidāhi ca/
triḍoṣaghnaṃ &samadhuraṃ saindhavaṃ lavaṇottamam//
saukṣmyādauṣṇyāllaghutvācca saugandhyācca rucipradam/
sauvarcalaṃ vibandhaghnaṃ hṛdyamudgāraśodhi ca//
taikṣṇyādauṣṇyādvyavāyitvāddīpanaṃ śūlanāśanam/
ūrdhvaṃ cādhaśca vātānāmānulomyakaraṃ biḍam//
satiktakaṭu sakṣāraṃ tīkṣṇamutkledi caudbhidam/
na kālalavaṇe gandhaḥ sauvarcalaguṇāśca te//
sāmudrakaṃ samadhuraṃ, satiktaṃ kaṭu pāṃśujam/
rocanaṃ lavaṇaṃ sarvaṃ pāki sraṃsyanilāpaham//
hṛtpāṇḍugrahaṇīrogaplīhānāhagalagrahān/
kāsaṃ kaphajamarśāṃsi yāvaśūko vyapohati//
tīkṣṇoṣṇo laghurūkṣaśca kledī &paktā vidāraṇaḥ/
dāhano dīpanaśchettā sarvaḥ &kṣāro+agnisannibhaḥ//
kāravī kuñcikā+ajājī yavānī dhānyatumburu/
rocanaṃ dīpanaṃ vātakaphadaurgandhyanāśanam//
āhārayogināṃ bhaktiniścayo na tu vidyate/
&samāpto dvādaśaścāyaṃ varga āhārayoginām//
śūladhānyaṃ śamīdhānyaṃ samātītaṃ praśasyate/
purāṇaṃ prāyaśo rūkṣaṃ prāyeṇābhinavaṃ &guru//
yadyadāgacchati& kṣipraṃ tattallaghutaraṃ smṛtam/
nistuṣaṃ yuktibhṛṣṭaṃ ca sūpyaṃ laghu vipacayate//
mṛtaṃ kṛśaṃ cātimedyaṃ vṛddhaṃ bālaṃ viṣairhatam/
agocarabhṛtaṃ vyālasūditaṃ māṃsamutsṛjet//
ato+anyathā hitaṃ māṃsaṃ bṛṃhaṇaṃ balavardhanam/
prīṇanaḥ sarvabhūtānāṃ hṛdyo māṃsarasaḥ param//
śuṣyatāṃ vyādhimuktānāṃ kṛśānāṃ kṣīṇaretasām/
balavarṇārthināṃ caiva rasaṃ vidyādyathāmṛtam//
sarvarogapraśamanaṃ yathāsvaṃ vihitaṃ rasam/
vidyāt svaryaṃ balakaraṃ vayobuddhīndriyāyuṣām//
vyāyāmanityāḥ strīnityā madyanityāśca ye narāḥ/
nityaṃ māṃsarasāhārā nāturāḥ syurna durbalāḥ//
krimivātātapahataṃ śuṣkaṃ jīrṇamanārtavam/
śākaṃ niḥsnehasiddhaṃ ca varjyaṃ yaccāparisrutam//
purāṇamāmaṃ saṃkliṣṭaṃ krimivyālahimātapaiḥ/
adeśakālajaṃ klinnaṃ yatsyātphalamasādhu tat//
&haritānāṃ yathāśākaṃ nirdeśaḥ sādhanādṛte/
madyāmbugorasādīnāṃ sve sve varge viniścayaḥ//
&yadāhāraguṇaiḥ pānaṃ viparītaṃ tadiṣyate/
annānupānaṃ dhātūnāṃ dṛṣṭaṃ yanna virodhi ca//
āsavānāṃ samuddiṣṭāmaśītiṃ caturuttarām/
jalaṃ peyamapeyaṃ ca parīkṣyānupibeddhitam//
&snigdhoṣṇaṃ mārute śastaṃ pitte madhuraśītalam/
kaphe+anupānaṃ rūkṣoṣṇaṃ kṣaye māṃsarasaḥ param//
upavāsādhvabhāṣyastrīmārutātapakarmabhiḥ/
klāntānāmanupānārthaṃ payaḥ pathyaṃ yathā+amṛtam//
surā kṛśānāṃ puṣṭyarthamanupānaṃ vidhīyate/
kārśyārthaṃ sthūladehānāmanu śastaṃ madhūdakam//
alpāgnīnāmanidrāṇāṃ tandrāśokabhayaklamaiḥ/
madyamāṃsocitānāṃ ca madyamevānuśasyate//
&athānupānakarmaguṇān pravakṣyāmaḥ anupānaṃ tarpayati, prīṇayati, ūrjayati, bṛṃhayati, paryāptimabhinirvartayati, bhuktamavasādayati, annasaṅghātaṃ bhinatti, mārdavamāpādayati, kledayati, jarayati, sukhapariṇāmitāmāśuvyavāyitāṃ cāhārasyopajanayatīti //
bhavati cātra
anupānaṃ hitaṃ yuktaṃ tarpayatyāśu mānavam /
sukhaṃ pacati cāhāramāyuṣe ca balāya ca //
nordhvāṅgamārutāviṣṭa na hikkāśvāsakāsinaḥ /
na gītabhāṣyāadhyayanaprasaktā norasi kṣatāḥ //
pibeyurudakaṃ bhuktvā taddhi kaṇṭorasi sthitam /
snehamāhārajaṃ hatvā bhūyo doṣāya kalpate //
annapānaikadeśo+ayamuktaḥ prāyopayogikaḥ /
dravyāṇi na hi nirdeṣṭuṃ śakyaṃ kātsnryena nāmabhiḥ //
yathā nānauṣadhaṃ kiṃciddeśajānāṃ vaco yathā /
dravyaṃ tattattathā vācyamanuktamiha yadbhavet //
caraḥ śarīrāvayavāḥ svabhāvo dhātavaḥ kriyā /
liṅgaḥ pramāṇaṃ saṃskāro mātra cāsmin parīkṣyate //
caro+anūpajalākāśadhanvādyo bhakṣyasaṃvidhiḥ /
jalajānūpajāścaiva jalānūpacarāśca ye //
gurubhakṣyāśca ye sattvāḥ sarve te guravaḥ smṛtāḥ /
laghubhakṣyāstu laghavo dhanvajā dhanvacāriṇaḥ //
śarīrāvayavāḥ sakthiśiraḥskandhādayastathā /
sakthimāṃsādguruḥ skandhastataḥ kroḍastataḥ śiraḥ //
vṛṣaṇau carma meḍhraṃ ca śroṇī vṛkkau yakṛdgudam /
māṃsādgurutaraṃ vidyādyathāsvaṃ madhyamasthi ca //
svabhāvāllaghavo mugāstathā lāvakapiñjalāḥ /
svabhāvādguravo māṣā varāhamahiṣāstathā //
dhātūnāṃ śoṇitādīnāṃ guruṃ vidyādyathottaram /
alasebhyo viśiṣyante prāṇino ye bahukriyāḥ //
gauravaṃ liṅgasāmānye puṃsāṃ strīṇāṃ tu lāghavam /
mahāpramāṇā guravaḥ svajātau laghavo+anyathā //
gurūṇāṃ lāghavaṃ vidyāt saṃskrārāt saviparyayam /
vrīherlājā yathā ca syuḥ saktūnāṃ siddhapiṇḍikāḥ //
alpādāne gurūṇāṃ ca laghūnāṃ cātisevane /
mātrā kāraṇamuddiṣṭaṃ dravyāṇāṃ gurulāghave //
gurūṇāmalpamādeyaṃ laghūnāṃ tṛptiriṣyate /
mātrāṃ dravyāṇyapekṣante mātrā cāgnimapekṣate //
balamārogyamāyuśca prāṇāścāgnau pratiṣṭhitāḥ /
annapānendhanaiścāgnirjvalati vyeti cānyathā //
gurulāghavacinteyaṃ prāyeṇālapavbalān prati /
mandakriyānanārogyān sukumārānsukhocitān //
dīptāgnayaḥ kharāhārāḥ karmanityā mahodarāḥ /
ye narāḥ prati tāṃścintyaṃ nāvaśyaṃ gurulāghavam //
hitābhirjuhuyānnityamantaragniṃ samāhitaḥ /
annapānasamidbhirnā mātrākālau vicārayan //
āhitāgniḥ sadā pathyānyantaragnau juhoti yaḥ /
divase divase brahma japatyatha dadāti ca //
naraṃ niḥśreyase yuktaṃ sātmyajñaṃ pānabhojane /
bhajante nāmayāḥ kecidbhāvino+apyantarādṛte //
ṣaḍtriṃśataṃ sahasrāṇi rātrīṇāṃ hitabhojanaḥ /
jīvatyanāturo janturjitātmā saṃmataḥ satām //
prāṇāḥ prāṇabhṛtāmannamannaṃ loko+abhidhāvati /
varṇaḥ prasādaḥ sausvaryaṃ jīvitaṃ pratibhā sukham //
tuṣṭiḥ puṣṭirbalaṃ medhā sarvamanne pratiṣṭhitam /
laukikaṃ karma yadvṛttau svargatau yaca vaidikam //
karmāpavarge yaccoktaṃ taccāpyanne pratiṣṭhitam /
tatra ślokaḥ
annapānaguṇāḥ sāgryā vargā dvādaśa niścitāḥ //
saguṇānyanupāanāni gurulāghavasaṃgrahaḥ /
annapānavidhāvuktaṃ tat parīkṣyaṃ viśeṣataḥ //

ityagniveśakṛte tantre carakapratisaṃskṛte ślokasthāne+annapānavidhirnāma saptaviṃśo+adhyāyaḥ //

1.28. aṣṭāviṃśo+adhyāyaḥ

athāto vividhāśitapītīyamadhyāyaṃ vyākhyāsyāmaḥ //

iti ha smāha bhagavānātreyaḥ //

vividhamaśitaṃ pītaṃ līḍhaṃ khāditaṃ jantorhitamantaragnisandhukṣitabalena yathāsvenoṣmaṇā samyagvipacyamānaṃ kālavadanavasthitasarvadhātupakamanupahatasarvadhātūṇsmamārutasrotaḥ kevalaṃ śrīramupacayabalavarṇasukhāyuṣā yojayati śarīradhātūnūrjayati ca /

dhātavo hi dhātvāhārāḥ prakṛtimanuvartante //

tatrāhāraprasādākhyo rasaḥ kiṭṭaṃ ca malākhyamabhinirvartate /

kiṭṭāt svedamūtrapurīṣavātapittaśleṣmāṇaḥ karṇākṣināsikāsyalomakūpaprajananamalāḥ keśaśmaśrulomanakhādayaścāvayavāḥ puṣyanti /

puṣyanti tvāhārarasādrasarudhiramāṃsamedosthimajjaśukraujāṃsi pañcendriyadravyāṇi dhātuprasādasaṃjñakāni śarīrasandhibandhapicchādayaścāvayavāḥ /

te sarva eva dhātavo malākhyāḥ prasādākhyāśca rasamalābhyāṃ puṣyantaḥ svaṃ mānamanuvartante yathāvayaḥśarīram /

evaṃ rasamalau svapramāṇāvasthitāvāśrayasya samadhātordhātusāmyamanuvartayataḥ /

nimittatastu kṣīṇavṛddhānāṃ prasādākhyānāṃ dhātūnāṃ vṛddhikṣayābhyāmāhāramūlābhyāṃ rasaḥ sāmyamutpādayatyārogyāya kiṭṭaṃ ca malānāmevameva /

svamānātiriktāḥ punarutasargiṇaḥ śītoṣṇaparyāyaguṇaiścopacaryamāṇā malāḥ śarīradhātusāmyakarāḥ samupalabhyante //

teṣāṃ tu malaprasādākhyānāṃ dhātūnāṃ srotāṃsyayanamukhāni /

tāni yathāvibhāgena yathāsvaṃ dhātūnāpūrayanti /

evamidaṃ śarīramaśitapītalīḍhakhāditaprabhavam /

aśitapītalīḍhakhāditaprabhavāścāsmiñ śarīre vyādhayo bhavanti /

hitāhitopayogaviśeṣāstvatra śubhāśubhaviśeṣakarā bhavantīti //

evaṃvādinaṃ bhagavantamātreyamagniveśa uvāca dṛśyante hi bhagavan hitasamākhyātamapyāhāramupayuñjānā vyādhimantaścāgadāśca tathaivāhitasamākhyātam evaṃ dṛṣṭe kathaṃ hitāhitopayogaviśeṣātmakaṃ śubhāśubhaviśeṣamupalabhāmaha iti //

tamuvāca bhagavānātreyaḥ na hitāhāropayogināmagniveśa tannimittā vyādhayo jāyante na ca kevalaṃ hitāhāropayogādeva sarvavyādhibhayamatikrāntaṃ bhavati santi hyṛte+apyahitāhāropayogādantārogaprakṛtayaḥ tadyathā kālaviparyayaḥ prajñāparādhaḥ śabdasparśarūparasagandhāścāsātmyā iti /

tāśca rogaprakṛtayo rasān samyagupayuñjānamapi puruṣamaśubhenopapādayanti tasmāddhitāhāropayogino+api dṛśyante vyādhimantaḥ /

ahitāhāropayogināṃ punaḥ kāraṇato na sadyo doṣavān bhavatyapacāraḥ /

na hi sarvāṇyapathyāni tulyadoṣāṇi na ca sarve doṣāstulyabalāḥ na ca sarvāṇi śarīrāṇi vyādhikṣamatve samarthāni bhavanti /

tadeva hyapathyaṃ deśakālasaṃyogavīryapramāṇātiyogādbhūyastaramapathayṃ saṃpadyate /

sa eva doṣaḥ saṃsṛṣṭayonirviruddhopakramo gambhīrānugataścirasthitaḥ prāṇāyatanasamuttho marmopaghātī kaṣṭatamaḥ kṣiprakāritamaśca saṃpadyate /

śarīrāṇi cātisthūlānyatikṛśānyaniviṣṭamāṃsaśoṇitāsthīni durbalānyasātmyāhāropacitānyalpāhārāṇyalpasattvāni ca bhavantyavyādhisahāni viparītāni punarvyādhisahāni /

ebhyaścaivāpathyāhāradoṣaśarīraviśeṣebhyo vyādhayo mṛdavo dāruṇāḥ kṣiprasamutthāścirakāriṇaśca bhavanti /

ta eva vātapittaśleṣmāṇaḥ sthānaviśeṣe prakupitā vyādhiviśeṣānabhinirvartayantyagniveśa //

tatra rasādiṣu sthāneṣu prakupitānāṃ doṣāṇāṃ yasmin sthāne ye ye vyādhayaḥ saṃbhavanti tāṃstān yathāvadanuvyākhyāsyāmaḥ //

aśraddhā cāruciścāsyavairasyamarasajñatā /

hṛllāso gauravaṃ tandrā sāṅgamardo jvarastamaḥ //

pāṇḍutvaṃ srotasāṃ rodhaḥ klaibyaṃ sādaḥ kṛśāṅgatā /

nāśo+agnerayathākālā valayaḥ palitāni ca //

rasapradoṣajā rogā vakṣyante raktadoṣajāḥ /

kuṣṭhavīsarpapiḍakā raktapittamasṛgdaraḥ /

gudameḍhrāsyapākaśca plīhā gulmo+atha vidradhiḥ //

nīlikā kāmalā vyaṅgaḥ pipplavastilakālakāḥ //

dadruścarmadalā śvitraṃ pāmā koṭhāsramaṇḍalam /

raktapradoṣājjāyante śṛṇu māṃsapradoṣajān //

adhimāṃsārbudaṃ kīlaṃ galaśālūkaśuṇḍike /

pūtimāṃsālajīgaṇḍagaṇḍamālopajihvikāḥ //

vidyānmāṃsāśrayān medaḥsaṃśrayāṃstu pracakṣmahe /

ninditāni pramehāṇāṃ pūrvarūpāṇi yāni ca //

adhyasthidantau dantāsthimedaśūlaṃ vivarṇatā /

keśalomanakhaśmaśrudoṣāścāsthipradoṣajāḥ //

rūk parvaṇāṃ bhramo mūrcchā darśanaṃ tamasastathā /

aruṣāṃ sthūlamūlānāṃ parvajānāṃ ca darśanam //

majjapradoṣāt śukrasya doṣāt klaibyamaharṣaṇam /

rogi vā klībamalpāyurvirūpaṃ vā prajāyate //

na cāsya jāyate garbhaḥ patati prasravatyapi /

śukraṃ hi duṣṭaṃ sāpatyaṃ sadāraṃ bādhate naram //

indriyāṇi samāśritya prakupyanti yadā malāḥ /

upaghātopatāpābhyāṃ yojayantīndriyāṇi te //

snāyau sirākaṇḍarābhyo duṣṭāḥ kliśnanti mānavam /

stambhasaṃkocakhallībhirgranthisphuraṇasuptibhiḥ //

malānāśritya kupitā bhedaśoṣapradūṣaṇam /

doṣā malānāṃ kurvanti saṅgotsargāvatīva ca //

vividhādaśitāt pītādahitāllīḍhakhāditāt /

bhavantyete manuṣyāṇāṃ vikārā ya udāhṛtāḥ //

teṣāmicchannanutpattiṃ seveta matimān sadā /

hitānyevāśitādīni na syustajjāstathā+āmayāḥ //

rasajānāṃ vikārāṇāṃ sarvaṃ laṅghanamauṣadham /

vidhiśoṇitike+adhyāye raktajānāṃ bhiṣagjitam //

māṃsajānāṃ tu saṃśuddhiḥ śastrakṣārāgnikarma ca /

aṣṭauninditike+adhyāye medojānāṃ cikitsitam //

asthyāśrayāṇāṃ vyādhīnāṃ pañcakarmāṇi bheṣajam /

bastayaḥ kṣīrasarpīṃṣi tiktakopahitāni ca //

majjaśukrasamutthānāmauṣadhaṃ svādutiktakam /

annaṃ vyavāyavyāyāmau śuddhiḥ kāle ca mātrayā //

śāntirindriyajānāṃ tu trimarmīye pravakṣyate /

snāyvādijānāṃ praśamo vakṣyate vātarogike //

navegāndhāraṇe+adhyāye cikitsāsaṃgrahaḥ kṛtaḥ /

malajānāṃ vikārāṇāṃ siddhiścoktā kvacitkvacit //

vyāyāmādūṣmaṇastaikṣṇyāddhitasyānavacāraṇāt /

koṣṭhācchākhā malā yānti drutatvānmārutasya ca //

tatrasthāśca vilambante kadācinna samīritāḥ /

nādeśakāle kupyanti bhūyo hetupratīkṣiṇaḥ //

vṛddhyā viṣyandānāt pākāt srotomukhaviśothanāt /

śākhā muktvā malāḥ koṣṭhaṃ yanti vāyośca nigrahāt /

ajātānāmanutpattau jātānāṃ vinivṛttaye /

rogāṇāṃ yo vidhirdṛṣṭaḥ sukhārthī taṃ samācaret //

sukhārthā sarvabhūtānāṃ matāḥ sarvāḥ pravṛttayaḥ /

jñānājñānaviśeṣāttu mārgāmārgapravṛttayaḥ //

hitamevānurudhyante praparīkṣya parīkṣakāḥ /

rajomohāvṛtātmānaḥ priyameva tu laukikāḥ //

śrutaṃ buddhiḥ smṛtirdākṣyaṃ dhṛtirhitaniṣevaṇam /

vāgviśuddhiḥ śamo dhairyamāśrayanti parīkṣakam //

laukikaṃ nāśrayantyete guṇā moharajaḥśritam /

tanmūlā bahavo yanti rogāḥ śārīramānasāḥ //

prajñāparādhāddhyahitānarthān pañca niṣevate /

saṃdhārayati vegāṃśca sevate sāhasāni ca //

tadātvasukhasaṃjñeṣu bhāveṣvajño+anurajyate /

rajyate na tu vijñātā vijñāne hyamalīkṛte //

na arāgānnāpyavijñānādāhārānupayojayet /

parīkṣya hitamaśnīyāddeho hyāhārasaṃbhavaḥ //

āḥrasya vidhāvaṣṭau viśeṣā hetusājñakāḥ /

śubhāśubhasamutpattau tān parīkṣy aprayojayet //

parihāryāṇyapathyāni sadā pariharannaraḥ /

bhavatyanṛṇatāṃ prāptaḥ sādhūnāmiha paṇḍitaḥ //

yattu rogasamutthānamaśakyamiha kenacit /

parihartuṃ na tat prāpya śocitavyaṃ manīṣibhiḥ //

tatra ślokāḥ

āhārasaṃbhavaḥ vastu rogāścāhārasaṃbhavāḥ /

hitāhitaviśeṣācca viśeṣaḥ sukhaduḥkhayoḥ //

sahatve cāsahatve ca duḥkhānāmṃ dehasattvayoḥ /

viśeṣo rogasaṅghāścca dhātujā ye pṛthakpṛthak //

teṣāṃ caiva praśamanaṃ koṣṭhācchākhā upetya ca /

doṣā yathā prakupyanti śākhābhyaḥ koṣṭhametya ca //

prājñājñayorviśeṣaśca svasthāturahitaṃ ca yat /

vividhāśitapītīye tat sarvaṃ saṃprakāśitam //

ityagniveśakṛte tantre carakapratisaṃskṛte sūtrasthāne vividhāśitapītīyo nāmāṣṭāviṃśo+adhyāyaḥ //

1.29. ūnatriṃśo+adhyāyaḥ

athāto daśaprāṇāyatanīyamadhyāyaṃ vyākhyāsyāmaḥ //

iti ha smāha bhagavānātreyaḥ //

daśaivāyatanānyāhuḥ prāṇā yeṣu pratiṣṭhitāḥ /
śaṅkhau marmatrayaṃ kaṇṭho raktaṃ śukraujasī gudam //
tānīndriyāṇi vijñānaṃ cetanāhetumāmayān /
jānīye yaḥ sa vai vidvān prāṇābhisara ucyate //

dvividhaṣtu khalu bhiṣajo bhavantyagniveśa prāṇānāmeke+abhisarā hantāro rogāṇāṃ rogāṇāmeke+abhisarā hatāraḥ prāṇānāmiti //

evaṃvādinaṃ bhagavantamātreyamagniveśa uvāca bhagavaṃste kathamasmābhirveditavyā bhaveyuriti //

bhagavānuvāca ya ime kulīnāḥ paryavadātaśrutāḥ paridṛṣṭakarmāṇo dakṣāḥ śucayo jitahastā jitātmānaḥ sarvopakaraṇavantaḥ sarvendriyopapannāḥ prakṛtijñāḥ pratipattijñāśca te jñeyāḥ prāṇānāmabhisarā hantāro rogāṇāṃ tathāvidhā hi kelave śarīrajñāne śarīrābhinirvṛttijñāne prakṛtivikārajñāne ca niḥsaṃśayāḥ sukhasādhyakṛcchrasādhyayāpyapratyākhyeyānāṃ ca rogāṇāṃ samutthānapūrvarūpaliṅgavedanopaśayaviśeṣajñāne vyapagatasaṃdehāḥ, trividhasyāyurvedasūtrasya sasaṃgrahavyākaraṇasya satrividhauṣadhagrāmasya pravaktāraḥ pañcatriṃśato mūlaphalānāṃ caturṇāṃ ca snehānāṃ pañcānāṃ ca lavaṇānāmaṣṭānāṃ ca mūtrāṇāmaṣṭāṇāṃ ca kṣīrāṇāṃ kṣīratvagvṛkṣāṇāṃ ca ṣaṇṇāṃ śirovirecanādeśca pañcakarmāśrayasyauṣadhagaṇasyāṣṭāviṃśateśca yavāgūnāṃ dvātriṃśataścūrṇapradehānāṃ ṣaṇṇāṃ ca virecanaśatānāṃ pañcānāṃ ca kaṣāyaśatānāṃ prayoktāraḥ, svasthavṛttavihitabhojanapānaniyamasthānacaṅkramaṇaśayanāsanamātrādravyāñjanadhūmanāvanābhyañjanaparimārjanavegāvidhāraṇavidhāraṇavyāyāmasātmyendriyaparīkṣopakramaṇasadvṛttakuśalāḥ catuṣpādopagṛhīte ca bheṣaje ṣoḍaśakale saviniścaye satriparyeṣaṇe savātakalākalajñāne vyapagatasandehāḥ caturvidhasya ca snehasya caturviṃśatyupanayasyopakalpanīyasya catuḥṣaṣṭiparyantasya ca vyavasthāpayitāraḥ, bahuvidhavidhānayuktānāṃ ca snehyasvedyavamyavirecyavividhauṣadhopacārāṇāṃ ca kuśalāḥ śirorogāderdoṣāṃśavikalpajasya ca vyādhisaṃgrahasya sakṣayapiḍakāvidradhestrayāṇāṃ ca śophānāṃ bahuvidhaśophānubandhānāmaṣṭacatvāriṃśataśca rogādhikaraṇānāṃ catvāriṃśaduttarasya ca nānātmajasya vyādhiśatasta tathā vigarhitātisthūlātikṛśānāṃ sahetulakṣaṇopakramāṇāṃ svapnasya ca hitāhitasyāsvapnātisvapnasya ca sahetūpakramasya ṣaṇṇāṃ ca laṅghanādīnāmupakramāṇāṃ saṃtarpaṇāpatarpaṇajānāṃ ca rogāṇāṃ sarūpapraśamanānāṃ śoṇitajānāṃ ca vyādhīnāṃ madamūrcchāyasaṃnyāsānāṃ ca sakāraṇarūpauṣadhopacārāṇāṃ kuśalāḥ kuśalāścāhāravidhiviniścayasya prakṛtya hitāhitānāmāhāravikārāṇāmagryasaṃgrahasyāsavānāṃ ca caturaśīterdravyaguṇakarmaviniścayasya rasānurasasaṃśrayasya savikalpavairodhikasya dvādaśavargāśrayasya cānnapānasya saguṇaprabhāvasya sānupānaguṇasya navavidhasyārthasaṃgrahasyāhāragateśca hitāhitopayogaviśeṣātmakasya ca śubhāśubhaviśeṣasya dhātvāśrayāṇāṃ ca rogāṇāṃ sauṣadhasaṃgrahāṇāṃ daśānāṃ ca prāṇāyatanānāṃ yaṃ ca vakṣyāmyarthedaśamahāmūlīye triṃśattamādhyāye, tatra ca kṛtsnasya tantroddeśalakṣṇasya tantrasya ca grahaṇadhāraṇavijñānaprayogakarmakāryakālakartṛkaraṇakuśalāḥ kuśalāśca smṛtimatiśāstrayuktijñānasyātmanaḥ śīlaguṇairavisaṃvādanena ca saṃpādanena sarvaprāṇiṣu cetaso maitrasya mātāpitṛbhrātṛbandhuvat evaṃyuktā bavantyagniveśa prāṇānāmabhisarā hantāro rogāṇāmiti //

ato viparītā rogāṇāmabhisarā hantāraḥ prāṇānāṃ bhiṣakchadmapraticchannāḥ kaṇṭakabhūtā lokasya pratirūpakasadharmāṇo rājñāṃ pramādāccaranti rāṣṭrāṇi //

teṣāmidaṃ viśeṣavijñāṇaṃ bhavati atyarthaṃ vaidyaveśena ślāghamānā viśikhāntaramanucaranti karmalobhāt śrutvā ca kasyacidāturayamabhitaḥ paripatanti saṃśravaṇe cāsyātmano vaidyaguṇānuccairvadanti yaścāsya vaidyaḥ pratikarma karoti tasya ca doṣānmuhurmuhurudāharanti āturamitrāṇi ca praharṣaṇopajāpopasevādibhiricchantyātmīkartuṃ svalpecchutāṃ cāmanaḥ khyāpayanti karma cāsādya muhurmuhuravalokayanti dākṣyeṇājñānamātmanaḥ pracchādayitukāmāḥ vyādhiṃ cāpāvartayitumaśaknuvato &vyādhitamevānupakaraṇamaparicārakamanātmamupadiśanti, antagataṃ cainamabhisamīkṣyānyamāśrayanti deśamapadeśamātamanaḥ kṛtvā prākṛtajanasannipāte cātmanaḥ kauśalamakuśalavadvarṇayanti adhīravacca dhairyamapavacanti dhīrāṇāṃ vidvajjanasannipātaṃ &{ā.cābhisamīkṣya} pratibhayamiva kāntāramadhvagāḥ pariharanti dūrāt yaścaiṣāṃ kaścit sūtrāvayavo bhavatyupayuktastamaprakṛte prakṛtāntare vā satatamudāharanti na cānuyogamicchantyanuyoktuṃ vā mṛtyoriva cānuyogādudvijante na caiṣāmācāryaḥ śiṣyaḥ sabrahmacārī vaivādiko vā kaścit prajñāyata iti //

bhavanti cātra ---

bhiṣakchadma praviśyaivaṃ vyādhitāṃstarkayanti ye/
vītaṃsamiva saṃśritya vane śākuntikā dvijān//
śrutadṛṣṭakriyākālamātrājñānabahiṣkṛtāḥ /
varjanīyā hi te mṛtyoścarantyanucarā bhuvi //
vṛttihetorbhiṣaṅmānapūrṇān mūrkhaviśāradān /
varjayedāturo vidvān sarpāste pītamārutāḥ //
ye tu śāstravido dakṣāḥ śucayaḥ karmakovidāḥ /
jitahastā jitātmānastebhyo nityaṃ kṛtaṃ namaḥ //

tatra ślokaḥ

daśaprāṇāyatanike ślokasthānārthasaṃgrahaḥ /
dvividhā bhiṣajaścoktāḥ prāṇasyāyatanāni ca //

ityagniveśakṛte tantre carakapratisaṃskṛte ślokasthāne daśaprāṇāyatanīyo nāmonatriṃśo+adhyāyaḥ //

1.30. triṃśo+adhyāyaḥ

athāto+arthedaśamahāmūlīyamadhyāyaṃ vyākhyāsyāmaḥ //

iti ha smāha bhagavānātreyaḥ //

arthe daśa mahāmūlāḥ samāsaktā mahāphalāḥ /
mahaccārthaśca hṛdayaṃ paryāyairucyate budhaiḥ //
ṣaḍaṅgamaṅgaṃ vijñānamindriyāṇyarthapañcakam /
ātmā ca saguṇaścetaścintyaṃ ca hṛdi saṃśritam //
pratiṣṭhārthaṃ hi bhāvānāmeṣāṃ hṛdayamiṣyate /
gopānasīnāmāgārakarṇikevārthacintakaiḥ //
tasyopaghātānmūrcchāyaṃ bhedānmaraṇamṛcchati /
yadhi tat sparśavijñānaṃ dhāri tattatra saṃśritam //
tat parasyaujasaḥ sthānā tatra caitanyasaṃgrahaḥ /
hṛdayaṃ mahadarthaśca tasmāduktaṃ cikitsakaiḥ //
tena mūlena mahatā mahāmūlā matā daśa /
ojovahāḥ śarīre+asmin vidhamyante samantataḥ //
yenaujasā vartayanti prīṇitāḥ sarvadehinah /
yadṛte sarvabhūtānāṃ jīvitaṃ nāvatiṣṭhate //
yat sāramādau garbhasya yattadgarbharasādrasaḥ /
saṃvartamānaṃ hṛdayaṃ samāviśati yat purā //
yasya nāśāttu nāśo+asti dhāri yaddhṛdayāśritam /
yaccharīrarasasnehaḥ prāṇā yatra pratiṣṭhitāḥ //
tatphalā bahudhā vā tāḥ phalantīva (ā.ti/ mahāphalāḥ /
dhmānāddhamanyaḥ sravaṇāt srotāṃsi saraṇātsirāḥ //
tanmahat tā mahāmūlāstaccaujaḥ parirakṣatāḥ /
parihāryā viśeṣeṇa manaso duḥkhahetavaḥ //
hṛdyaṃ yat syādyadaujasyaṃ srotasāṃ yat prasādanam /
tattat sevyaṃ prayatnena praśamo jñānameva ca //

atha khalvekaṃ prāṇavardhanānāmutkṛṣṭamamekaṃ balavardhanānāmekaṃ bṛṃhaṇānāmekaṃ nandanānāmekaṃ harṣaṇānāmekamayanānāmiti /

tatrāhiṃsā prāṇināṃ prāṇavardhanānāmutkṛṣtatamaṃ vīryaṃ balavardhanānāṃ vidyā bṛṃhaṇānām indriyajayo nandanānām tattvāvabodho harṣaṇānāṃ brahmacaryamayanānāmiti evamāyurvedavido manyante //

tatrāyurvedavidastantrasthānādhyāyapraśnānāṃ pṛthaktvena vākyaśo vākyārthaśo+arthāvayavaśaśca pravaktāro mantavyāḥ /

tatrāha kathaṃ tantrādīni vākyaśo vākyārthaśo+arthāvayavaśaścoktāni bhavantīti //

atrocyate tantramārṣaṃ kārtsnyena yathāmnāyamucyamānaṃ vākyaśo bhavatyuktam //

buddhyā samyaganupraviśyārthatattvaṃ vāgbhirvyāsasamāsapratijñāhetūdāharaṇopanayanigamanayuktābhistrividhaśiṣyabuddhigamyābhirucyamānām vākyārthaśo bhavatyuktam //

tantraniyatānāmarthadurgāṇāṃ punarvibhāvanairuktamarthāvayavaśo bhvatyuktam //

tatra cet praṣṭāraḥ syuḥ caturṇāmṛksāmayajuratharvavedānāṃ kaṃ vedamupadiśantyāyurvedavidaḥ kimāyuḥ kasmādāyurvedaḥ kimarthamāyurvedaḥ śāśvato+aśāśvato vā kati kāni cāsyāṅgāni kaiścāyamadhyetavyaḥ kimarthaṃ ca iti //

tatra bhiṣajā pṛṣṭenaivaṃ caturṇāmṛksāmayajuratharvavedānāmātmano+atharvavede bhaktirādeśyā vedo hyātharvaṇo dānasvastyayanabalimaṅgalahomaniyamaprāyaścittopavāsamantrādiparigrahāccikitsāṃ prāha cikitsā cāyuṣo hitāyopadiśyate //

vedaṃ copadiśyāyurvācyaṃ tatrāyuścetanānuvṛttirjīvitamanubandho dhāri cetyeko+arthaḥ //

tadāyurvedayatītyāyurvedaḥ kathamiti cet ucyate svalakṣaṇataḥ sukhāsukhato hitāhitataḥ pramāṇāpramāṇātaśca yatścāyuṣyāṇyanāyuṣyāṇi ca dravyaguṇakarmāṇi vedayatyato+apyāyurvedaḥ /

tatrāyuṣyāṇyanāyuṣyāṇi ca dravyaguṇakarmāṇi kevalenopadekṣyante tantreṇa //CS.1.30.24/ tatrāyuruktaṃ svalakṣaṇato yathāvadihaiva pūrvādhyāye ca /

tatra śārīramānasābhyām rogābhyāmanabhidrutasya viśeṣeṇa yauvanavataḥ samarthānugatabalavīryayaśaḥpauruṣaparākramasya jñānavijñānendriyendriyārthabalasamudaye vartamānasya paramarddhiruciravividhopabhogasya samṛddhasarvārambhasya yatheṣṭavicāriṇaḥ sukhamāyurucyate; asukhamato viparyayeṇa; hitaiṣiṇaḥ punarbhūtānāṃ parasvāduparatasya satyavādiṇaḥ śamaparasya parīkṣyakāriṇo+apramattasya trivargaṃ paraspareṇānupahatamupasevamānasya pūjārhasaṃpūjakasya jñānavijñānopaśamaśīlasya vṛddhopasevinaḥ suniyatarāgarosṣerṣyāmadamānavegasya satataṃ vividhapradānaparasya tapojñānapraśamanityasyādhyātmavidastatparasya lokamimaṃ cāmuṃ cāvekṣamāṇasya smṛtimatimato hitamāyurucyate ahitamato viparyayeṇa //

pramāṇamāyuṣastvarthendriyamanobuddhiceṣṭādīnāṃ vikṛtilakṣaṇairupalabhyate+animittaiḥ ayamasmāt kṣaṇānmuhūrtāddivasāttripañcasaptadaśadvādaśāhāt pakṣānmāsāt ṣaṇmāsāt saṃvatsarādvā svabhāvāmāpatsyata iti tatra svabhāvaḥ pravṛtteruparamo maraṇamanityatā nirodha ityeko+arthaḥ ityāyuṣaḥ pramāṇam ato viparītamapramāṇamariṣṭādhikāre dehaprakṛtilakṣaṇamadhikṛtya copadiṣṭamāyuṣaḥ pramāṇamāyurvede //

prayojanaṃ cāsya svasthasya svāsthyarakṣaṇamāyurasya vikārapraśamanaṃ ca //

so+ayamāyurvedaḥ śāśvato nirviśyate anāditvāt svabhāvasaṃsiddhalakṣaṇatvāt bhāvasvabhāvanityatvācca /

na hi nābhūt kadācidāyuṣaḥ santāno buddhisantāno vā śāśvataścāyuṣo veditā anādi ca sukhaduḥkhaṃ sadravyahetulakṣaṇamaparāparayogāt /

eṣa cārthsaṃgraho vibhāvyate āyurvedalakṣaṇamiti /

gurulaghuśītoṣṇasnigdharūkṣādīnāṃ dravyāṇām sāmānyaviśeṣābhyāṃ vṛddhihrāsau yathoktaṃ gurubhirabhyasyamānairugurūṇāmupacayo bhavatyapacayo laghūnāṃ evamevetareṣāmiti eṣā bhāvasvabhāvo nityaḥ svalakṣaṇaṃ ca dravyāṇāṃ pṛthivyādīnāṃ santi tu dravyāṇi guṇāśca nityānityāḥ /

na hyāyurvedasyābhūtvotpattirupalabhyate anyatrāvabodhopadeśābhyām etadvai dvayamadhikṛtyotpattimupadiśantyeke /

svābhāvikaṃ cāsya lakṣaṇamakṛtakaṃ yaduktamihādye+adhyāye ca yathā agnerauṣṇyam apāṃ dravatvam /

bhāvasvabhāvanityatvamapi cāsya yathoktaṃ gurubhirabhyasyamānairugurūṇāmupacayo bhavatyapacayo laghūnāmiti //

tasyāyurvedasyāṅgānyaṣṭau tadyathā kāyacikitsā śālākyaṃ śalyāpahartṛkaṃ viṣagaravairodhikapraśamanaṃ bhūtavidyā kaumārabhṛtyakaṃ rasāyanaṃ vājīkaraṇamiti //

sa cādhyetavyo brāhmaṇarājanyavaiśyaiḥ /

tatrānugrahārthaṃ prāṇināṃ brāhmaṇaiḥ ārakṣārthaṃ rājanyaiḥ vṛttyarthaṃ vaiśyaiḥ sāmānyato vā dharmārthakāmaparigrahārthaṃ sarvaiḥ /

tatra yadadhyātmavidāṃ dharmapathasthānāṃ dharmaprakāśakānāṃ vā mātṛpitṛbhrātṛbandhugurujanasya vā vikārapraśamane prayatnavān bhavati yaccāyurvedoktamadhyātmamanudhyāyati vedayatyanuvidhīyate vā so+asya paro dharmaḥ yā punarīśvarāṇāṃ vasumatāṃ vā sakāśāt susvopahāranimittā bhavatyarthāvāptirārakṣaṇaṃ ca yā ca svaparigṛhītānām prāṇināmāturyādārakṣā so+asyārthaḥ; yat punarasya vidvadgrahaṇayaścaḥ śaraṇyatvaṃ ca yā ca saṃmānaśuśrūṣā yacceṣṭānāṃ viṣayāṇāmārogyamādhatte so+asya kāmaḥ /

iti yathāpraśnamuktamaśeṣeṇa //

atha bhiṣagādita egva bhiṣajā praṣṭavyo+aṣtāvidhaṃ bhavati tantraṃ tantrārthān sthānām sthānārthān adhyāyam adhyāyārthān praśnaṃ praśnārthāśceti pṛṣṭena caitadvaktavyamaśeṣeṇa vākyaśo vākyārthaśo+arthāvayāvaśaśceti& //

tatrāyurvedaḥ śākhā vidyā sūtraṃ jñānaṃ śāstraṃ lakṣaṇaṃ tantramityanarthāntaram& //

tantrārthaḥ punaḥ svalakṣaṇairupadiṣṭaḥ /

sa cārthaḥ prakaraṇairuvibhāvyamāno bhūya eva śarīravṛttihetuvyādhikarmakāryakālakartṛkaraṇavidhiviniścayāddaśaprakaraṇaḥ tāni ca prakaraṇāni kevalenopadekṣyante tantreṇa //

tantrasyāsyāṣṭau sthānāni tadyathā ślokanidānavimānaśārīendriyacikitsatakalpasiddhisthānāni /

tatra triṃśadadhyāyakaṃ ślokasthānam aṣṭāṣṭādhyāyakāni nidānavimānaśārīrasthāāni dvādaśakamindiryāṇāṃ triṃśakaṃ ciktisitānāṃ dvādaśake kalpasiddhisthāne bhavataḥ //

tantrasyāsyāṣṭau sthānāni tadyathā ślokanidānavimānaśārīrendriyacikitsitakalpasiddhisthānāni /

tatra triṃśadadhyāyakaṃ ślokasthānam aṣṭāṣṭādhyāyakāni nidānavimānaśārīrasthānāni dvādaśakamindriyāṇāṃ triṃśakaṃ cikitsitānāṃ dvādaśakamindriyāṇāṃ triṃśakaṃ cikitsitānāṃ dvādaśake kalpasiddhisthāne bhavataḥ //

bhavati cātra

dve triṃśake dvādaśakaṃ trayaṃ ca trīṇyaṣṭakānyeṣu samāptiruktā /
ślokauṣadhāriṣṭavikalpasiddhinidānamānāśrayasaṃjñakeṣu //
sve sve sthāne yathāsvaṃ ca sthānārtha upadekṣyate /
saviṃśamadhyāyaśataṃ śṛṇu nāmakramāgatam //
dīrghañjīvo 'pyapāmārgataṇḍulāragvadhādikau /
ṣaḍvirekāśrayaśceti catuṣko bheṣajāśarayaḥ //
mātrātasyāśitīyau ca navegāndhāraṇaṃ tathā /
indriyopakramaśceti catvāraḥ svāsthyavṛttikāḥ //
khuḍḍākaśca catuṣpādo mahāṃstisraiṣaṇastathā /
saha vātakalākhyena vidyānnairdeśikān budhaḥ //
snehanasvedanādhyāyāvubhau yaścopakalpanaḥ /
cikitsāprābhṛtaścaiva sarva eva prakalpanāḥ //
kiyantaḥśirasīyaśca triśophāṣṭodarādikau /
rogādhyāyo mahāṃścaiva rogādhyāyacatuṣṭayam //
aṣṭauninditasaṃkhyātastathā laṅghanatarpaṇe /
vidhiśoṇitikaścaiva vyākhyātāstatra yojanāḥ //
yajjaḥpuruṣasaṃkhyāto bhadrakāpyānnapānikau /
vividhāśitapītīyaścātvāro 'nnaviniścayāḥ //
daśaprāṇāyatanikastathā 'rthedaśamūlikaḥ /
dvāvetau prāṇadehārthau proktau vaidyaguṇāśrayau //
auṣadhasvasthanirdeśakalpanārogayojanāḥ /
catuṣkāḥ ṣaṭ krameṇoktāḥ saptamaścānnapānikaḥ //
dvau cāntyau saṃgrahādhyāyāviti triṃśakamarthavat /
ślokasthānaṃ samuddiṣṭaṃ tantrasyāsya śiraḥ śubham //
catuṣkāṇāṃ mahārthānāṃ sthāne 'smin saṃgrahaḥ kṛtaḥ /
ślokārthaḥ saṃgrahārthaśca ślokasthānamataḥ smṛtam //
jvarāṇāṃ raktapittasya gulmānāṃ mehakuṣṭhayoḥ /
śloṣonmādanidāne ca syādapasmāriṇāṃ ca yat //
ityadhyāyāṣṭakamidaṃ nidānasthānamucyate /
raseṣu trividhe kukṣau dhvaṃse janapadasya ca //
trividhe rogavijñāne srotaḥsvapi ca vartane /
rogānīke vyādhirūpe rogāṇāṃ ca bhiṣagjite //
aṣṭau vimānānyuktāni mānārthāni maharṣiṇā /
katidhāpuruṣīyaṃ ca gotreṇātulyameva ca //
khuḍḍikā mahatī caiva garbhāvakrāntirucyate /
puruṣasy aśarīrasya vicayau dvau viniścitau //
śarīrasāmkhyā sūtraṃ ca jāteraṣṭamamucyate /
ityuddiṣṭāni muninā śārīrāṇyatrisūnunā //
varṇasvarīyaḥ puṣpākhyastṛtīyaḥ parimarśanaḥ /
caturtha indriyānīkaḥ pañcamaḥ pūrvarūpikaḥ //
katamāniśarīrīyaḥ pannarūpo 'pyavākśirāḥ /
yasyaśyāvanimittaśca sadyomaraṇa eva ca //
aṇujyotiriti khyātastathā gomayacūrṇavān /
dvādaśādhyāyakaṃ sthānamindriyāṇāmiti smṛtam //
abhayāmalakīyaṃ ca prāṇakāmīyameva ca /
karapracitakaṃ vedasamutthānaṃ rasāyanam //
sāmyogaśaramūlīyamāsiktakṣīrakaṃ tathā /
māṣaparṇabhṛtīyaṃ ca pumāñjātabalādikam //
cātuṣkadvāyamapyetadadhyāyadvayamucyate /
rasāyanamiti jñeyaṃ vājīkaraṇameva ca //
jvarāṇāṃ raktapittasya gulmānāṃ mehakuṣṭhayoḥ /
śoṣonmāde 'pyapasmāre kṣataśothodarārśasām //
grahaṇīpāṇḍurogāṇāṃ śvāsakāsātisāriṇām /
chardivīsarpatṛṣṇānāṃ viṣamadhayvikārayoḥ //
dvivraṇīyaṃ trimarmīyamūrustambhikameva ca /
vātaroge vātarakte yonivyāpatsu caiva yat //
triṃśaccikitsitānyuktānyataḥ kalpān pracakṣmahe /
phalajīmūtakekṣvākukalpo dhāmārgavasya ca //
pañcamo vatsakasyoktaḥ ṣaṣṭhaśca kṛtavedhane /
śyāmātrivṛtayoḥ kalpastathaiva caturaṅgule //
tilvakasya sudhāyāśca saptalāśaṅkhinīṣu ca /
dantīdravantyoḥ kalpaśca dvādaśo 'yaṃ samāpyate //
kalpanā pañcakarmākhyā bastimūtrī tathaiva ca /
snehavyāpadikī siddhirnetravyāpadikī tathā //
siddhiḥ śodhanayoścaiva bastisiddhistathaiva ca /
prāsṛtī marmasaṃkhyātā siddhirbastyāśrayā ca yā //
phalamātrā tathā siddhiḥ siddhiścottarasaṃjñitā /
siddhayo dvādaśaivaitāstantraṃ cāsu samāpyate //
sve sve sthāne tathā 'dhyāye cādhyāyārthaḥ pravakṣyate /
taṃ brūyāt sarvataḥ sarvaṃ yathāsvaṃ hyarthasaṃgrahāt //
pṛcchā tantrādyathāmnāyaṃ vidhinā praśna ucyate /
praśnārtho yuktimāṃstasya tantreṇaivārthaniścayaḥ //
niruktaṃ tantraṇāttantraṃ sthānamrthapratiṣṭhayā /
adhikṛtyārthamadhyāyanāmasaṃjñā pratiṣṭhitā //
iti sarvaṃ yathāpraśanamaṣṭakaṃ saṃprakāśitam /
kārtsnyena coktastantrasya saṃgrahaḥ suviniścitaḥ //
santi pāllavikotpātāḥ saṃkṣobhaṃ janayanti ye /
vartakānāmivotpātāḥ sahasaivāvibhāvitāḥ //
tasmāttān pūrvasaṃjalpe sarvatrāṣṭakamādiśet /
parāvaraparīkṣārthaṃ tatra śāstravidāṃ balam //
śabdamātreṇa tantrasya kevalasyaikadeśikāḥ /
bhramantyalpabalāstantre jyāśabdenenva vartakāḥ //
paśuḥ paśūnāṃ daurbalyāt kaścinmadhye vṛkāyate /
sa satyaṃ vṛkamāsādya prakṛtiṃ bhajate paśuḥ //
tadvadajño 'jñamadhyasthaḥ kaścinmaukharyasādhanaḥ /
sthāpayatyāptamātmānamāptaṃ tvāsādya bhidyate //
babhrurrgūḍhaṃ ivorṇābhirabuddhirabahuśrutaḥ /
kiṃ vai vakṣyati sāmjalpe kuṇḍabhedī jaḍo yathā //
sadvṛttairna vigṛhṇīyādbhiṣagalpaśrutairapi /
hanyāt praśnāṣṭakenādāvitarāṃstvāptamāninaḥ //
dambhino mukharā hyajñāḥ prabhūtābaddhabhāṣiṇaḥ /
prāyaḥ prāyeṇa sumukhāḥ santo yuktālpabhāṣiṇaḥ //
tattvajñānaprakāśārthamahaṅkāramanāśritaḥ /
svalpādhārājñamukharānmarṣayenna vivādinaḥ //
paro bhūteṣvanukrośastattvajñānaparā&{ā. jñāne} dayā /
yeṣāṃ teṣāmasadvādanigrahe niratā matiḥ //
asatpakṣākṣaṇitvārtidambhapāruṣyasādhanāḥ /
bhavantyanāptāḥ sve tantre prāyaḥ paravikalthakāḥ //
tān kālapāśasadṛśān varjayecchāstradūṣakān /
praśamajñānavijñānapūrṇāḥ sevyā bhiṣaktamāḥ //
samagraṃ duḥkhamāyattamavijñāne dvayāśrayam /
sukhaṃ samagraṃ vijñāne vimale ca pratiṣṭhitam //
idamevamudārārthamajñānāṃ na prakāśakam /
śāstraṃ dṛṣṭipraṇaṣṭānāṃ yathaivādityamaṇḍalam //
tatra ślokāḥ
arthe daśamahāmūlāḥ saṃjñā cāsāṃ yathā kṛtā /
ayanāntāḥ ṣaḍagryāśca rūpaṃ vedavidāṃ ca yat //
saptakaścāṣṭakaścaiva paripraśnāḥ sanirṇayāḥ /
yathā vācyaṃ yadarthaṃ ca ṣaḍvidhāścaikadeśikāḥ //
arthedaśamahāmūle sarvametat prakāśitam /
saṃgrahaścāyamadhyāyastantrasyāsyaiva kevālaḥ //
yathā sumanasāṃ sūtraṃ saṃgrahārthaṃ vidhīyate /
saṃgrahārthaṃ tathā 'rthānāmṛṣiṇā saṃgrahaḥ kṛtaḥ //
ityagniveśakṛte tantre carakapratisaṃskṛte ślokasthāne+arthedaśamahāmūlīyo nāma triṃśo+adhyāyaḥ //

agniveśakṛte tantre carakapratisaṃskṛte /

iyatā+avadhinā sarvaṃ sūtrasthānaṃ samāpyate //

2. nidānasthānam/

2.1. prathamo+adhyāyaḥ/

athāto jvaranidānaṃ vyākhyāsyāmaḥ//

iti ha smāha bhagavānātreyaḥ//

iha khalu heturnimittamāyatanaṃ kartā kāraṇaṃ pratyayaḥ samutthānaṃ nidānamityanarthāntaram/

tantrividham---asātmyendriyārthasaṃyogaḥ, prajñāparādhaḥ, pariṇāmaśceti//

atastrividhā vyādhayaḥ prādurbhavanti-āgneyāḥ, saumyāḥ, vāyavyāśca; dvividhāścāpare-rājasāḥ, tāmasāśca//

tatra vyādhirāmayo gada ātaṅko yakṣmā jvaro vikāro roga ityanarthāntaram//

tasyopalabdhirnidānapūrvarūpaliṅgopaśayasaṃprāptitaḥ//

tatra nidānaṃ kāraṇamityuktamagre//

pūrvarūpaṃ prāgutpatti lakṣaṇaṃ vyādheḥ//

prādurbhūtalakṣaṇaṃ punarliṅgam/ tatra liṅgamākṛtirlakṣaṇaṃ cihnaṃ saṃsthānaṃ vyañjanaṃ rūpamityanarthāntaram//

upaśayaḥ punarhetuvyādhiviparītānāṃ viparītārthakāriṇāṃ cauṣadhāhāravihārāṇāmupayogaḥ sukhānubandhaḥ//

saṃprāptirjatirāgatirityanarthāntaraṃ vyādheḥ//

sā saṃkhyāprādhānyavidhivikalpabalakālaviśeṣairbhidyate//

saṃkhyā tāvadyathā---aṣṭau jvarāḥ, pañca gulmāḥ, sapta kuṣṭhānyevamādiḥ//

prādhānyaṃ punardoṣāṇāṃ taratamābhyāmupalabhyate/

tatra dvayostaraḥ, triṣu tama iti//

vidhirnāma---dvividhā vyādhayo jijāgantubhedena, trividhāstridoṣabhedena, caturvidhāḥ sādhyāsādhyamṛdudāruṇabhedena//

&samavetānāṃ punardoṣāṇāmaṃśāṃśabalavikalpo vikalpo+asminnarthe//

balakālaviśeṣaḥ punarvyādhīnāmṛtvahorātrāhārakālavidhiviniyato bhavati//

tasmādvyādhīn bhiṣaganupahatasattvabuddhirhetvādibhirbhāvairyathāvadanubuddhyeta//

ityarthasaṃgraho nidānasthānasyoddiṣṭo bhavati/

taṃ vistareṇopadiśanto bhūyastaramato+anuvyākhyāsyāmaḥ//

tatra prathamata eva tāvadādyāṃllobhābhidrohakopaprabhavānaṣṭau vyādhīnnidānapūrveṇa krameṇa vyākhyāsyāmaḥ, tathā sūtrasaṃgrahamātraṃ cikitsāyāḥ/

&cikitsiteṣu cottarakālaṃ &yathopacitavikārānanuvyākhyāsyāmaḥ//

iha khalu jvara evādau vikārāṇāmupadiśyate, tatprathamatvācchārīrāṇām//

atha khalvaṣṭābhyaḥ kāraṇebhyo jvaraḥ saṃjāyate manuṣyāṇāṃ; tadyathā---vātāt, pittāt, kaphāt, vātapittābhyāṃ, vātakaphābhyāṃ, pittakaphabhyāṃ, vātapittakaphabhyaḥ, āgantoraṣṭamāt kāraṇāt//

tasya &nidānapūrvarūpaliṅgopaśayaviśeṣānanuvyākhyāsyāmaḥ//

rūkṣalaghuśītavamanavirecanāsthāpanaśirovirecanātiyogavyāyāmavegasaṃdhāraṇānaśanābhighātavyavāyodvegaśokaśoṇitātiṣekajāgaraṇaviṣamaśarīranyāsebhyo+atisevitebhyo vāyuḥ prakopamāpadyate//

sa yadā prakupitaḥ &praviśyāmāśayamūṣmaṇā saha miśrībhūyādyamāhārapariṇāmadhātuṃ rasanāmānamanvavetya rasasvedavāhāni srotāṃsi pidhāyāgnimupahatya paktisthānādūṣmāṇaṃ bahirnirasya kevalaṃ śarīramanuprapadyate, tadā jvaramabhinirvartayati//

tasyemāni liṅgāni bhavanti; tadyathā---viṣamārambhavisargitvam, ūṣmaṇo vaiṣamyaṃ, tīvratanubhāvānavasthānāni jvarasya, jaraṇānte divasānte niśānte gharmānte vā jvarasyābhyāgamanamabhivṛddhirvā, viśeṣeṇa paraṣāruṇavarṇatvaṃ nakhanayanavadanamūtrapurīṣatvacāmatyarthaṃ kḷptībhāvaśca; anekavidhopamāścalācalāśca vedanāsteṣāṃ teṣāmaṅgāvayavānāṃ; tadyathā---pādayoḥ suptatā, piṇḍikayorudveṣṭanaṃ, jānunoḥ kevalānāṃ ca sandhīnāṃ viśleṣaṇam, ūrvoḥ sādaḥ, kaṭīpārśvapṛṣṭhaskandhabāhvaṃsorasāṃ ca bhagnarugṇamṛditam&athitacaṭitāvapāṭitāvanunnatvamiva, hanvoścāprasiddhiḥ, svanaśca karṇayoḥ, śaṅkhayornistodaḥ, kaṣāyāsyatā āsyavairasyaṃ vā, mukhatālukaṇṭhaśoṣaḥ, pipāsā, hṛdayagrahaḥ, śuṣkacchardiḥ, śuṣkakāsaḥ, kṣavathūdnāravinigrahaḥ, annarasakhedaḥ, prasekārocakāvipākāḥ, viṣādajṛmbhāvināmavepathuśramabhramapralāpaprajāgararomaharṣadantaharṣāḥ, uṣṇābhiprāyatā, nidānoktānāmanupaśayo viparītopaśayaśceti &vātajvarasya liṅgāni bhavanti//

uṣṇāmlalavaṇakṣārakaṭukājīrṇabhojanebhyo+atisevitebhyastathā tīkṣṇātapāgnisaṃtāpaśramakrodhaviṣamāhārebhyaśca pittaṃ prakopamāpadyate//

tadyadā &prakupitamāmāśayādūṣmāṇamupasṛjyādyamāhārapariṇāmadhātuṃ rasanāmānamanvavetya rasasvedavahāni srotāṃsi pidhāya dravatvādagnimupahatya paktisthānādūṣmāṇaṃ &bahirnirasya prapīḍayat kevalaṃ śarīramanuprapadyate, tadā jvaramabhinirvartayati//

tasyemāni liṅgāni bhavanti; tadyathā---yugapadeva kevale śarīre jvarasyābhyāgamanamabhivṛddhirvā bhuktasya vidāhakāle madhyandine+ardharātre śaradi vā viśeṣeṇa, kaṭukāsyatā, ghrāṇamukhakaṇṭhauṣṭhatālupākaḥ, tṛṣṇā, mado, bhramo, mūrcchā, pittacchrdanam, atīsāraḥ, annadveṣaḥ, sadanaṃ, khedaḥ, pralāpaḥ, raktakoṭhābhinirvṛttiḥ śarīre, haritahāridratvaṃ nakhanayanavadanamūtrapurīṣatvacām, atyarthamūṣmaṇastīvrabhāvaḥ, atimātraṃ dāhaḥ, śītābhiprāyatā, nidānoktānupaśayo viparītopaśayaśceti &pittajvaraliṅgāni bhavanti//

snigdhagurumadhurapicchilaśītāmlalavaṇadivāsvapnaharṣāvyāyāmebhyo+atisevitebhyaḥ śleṣmā prakopamāpadyate//

sa yadā prakupitaḥ praviśyāmāśayamūṣmaṇā saha miśrībhūyādyamāhārapariṇāmadhātuṃ rasanāmānamanbavetya rasasvedavahāni srotāṃsi pidhāyāgnimupahatya paktisthānādūṣmāṇaṃ bahirnirasya prapīḍayan kevalaṃ śarīramanuprapadyate, tadā jvaramabhinirvartayati//

tasyemāni liṅgāni bhavanti; tadyathā---yugapadeva kevale śarīre jvarasyābhyāgamanamabhivṛddhirvā bhuktamātre pūrvāhṇe pūrvarātre vasantakāle vā viśeṣeṇa, gurugātratvam, anannābhilāṣaḥ, śleṣmaprasekaḥ, mukhamādhuryaṃ, hṛllāsaḥ, hṛdayopalepaḥ, stimitatvaṃ, chirdiḥ, mṛdvagnitā, nidrādhikyaṃ, stambhaḥ, tandrā, kāsaḥ, śvāsaḥ, pratiśyāyaḥ, śaityaṃ, śvaityaṃ ca nakhanayanavadanamūtrapurīṣatvacām, atyarthaṃ ca śītapiḍakā &bhṛśamaṅgebhya uttiṣṭhanti, uṣṇābhiprāyatā, nidānoktānupaśayo niparītopaśayaśca; iti (&śleṣmajvaraliṅgāni bhavanti)//

viṣamāśanādanaśanādannaparivartāddatuvyāpatterasātmyagandhopaghrāṇādviṣopahatasya codakasyopayogādgarebhyo girīṇāṃ copaśleṣāt snehasvedavamanavirecanāsthāpanānuvāsanaśirovirecanānāmayathāvatprayogāt mithyāsaṃsarjanādvā strīṇāṃ ca viṣamaprajananāt prajātānāṃ ca mithyopacārād yathoktānāṃ ca hetūnāṃ miśrībhavādyathānidānaṃ dvandvānāmanyatamaḥ sarve vā trayo doṣā yugapat prakopamāpadyante, te prakupitāstayaivānupūrvyā jvaramabhinirvartayanti//

tatra tathoktānāṃ jvaraliṅgānāṃ miśrībhāvaviśeṣadarśanāddvāndvikamanyatamaṃ jvaraṃ sānnipātikaṃ vā vidyāt//

abhighātābhiṣaṅgābhicārābhiśāpebhya āganturhi vyathāpūrvo+aṣṭamo jvaro bhavati/

sa kiṃcitkālamāgantuḥ kevalo bhūtvā paścāddoṣairanubadhyate/

tatrābhighātajo vāyunā duṣṭaśoṇitādhiṣṭhānena, abhiṣaṅgajaḥ punarvātapittābhyām, abhicārābhiśāpajau tu sannipātenānubadhyete//

sa saptavidhājjvarādviśiṣṭaliṅgopakramasamutthānatvādviśiṣṭo veditavyaḥ, karmaṇā sādhāraṇena &copacaryate/

ityaṣṭavidhā jvaraprakṛtiruktā//

jvarastveka eva saṃtāpalakṣaṇaḥ/

tamevābhiprāyaviśeṣāddvividhamācakṣate, nijāgantuviśeṣācca/

tatra nijaṃ dvividhaṃ trividhaṃ caturvidhaṃ saptavidhaṃ cāhurbhiṣajo vātādivikalpāt//

tasyemāni pūrvarūpāṇi bhavanti; tadyathā---mukhavairasyaṃ, gurugātratvam, anannābhilāṣaḥ, cakṣuṣorākulatvam, aśrvāgamanaṃ, nidrādhikyam, aratiḥ,jṛmbhā, vināmaḥ, vepathuḥ, śramabhramapralāpajāgaraṇaromaharṣadantaharṣāḥ, śabdaśītavātātapasahatvāsahatvam, arocakāvipākau, daurbalyam, aṅgamardaḥ, sadanam, alpaprāṇatā, dīrghasūtratā, ālasyam, ucitasya karmaṇo hāniḥ, pratīpatā svakāryeṣu, gurūṇāṃ vākyeṣvabhyasūyā, bālebhyaḥ pradveṣaḥ, svadharmeṣvacintā, mālyānulepanabhojanaparikleśanaṃ, madhurebhyaśca bhakṣebhyaḥ pradveṣaḥ, amlalavaṇakaṭukapriyatā ca, iti jvarasya pūrvarūpāṇi bhavanti prāksaṃtāpāt; api cainaṃ saṃtāpārtamanubadhnanti//

ityetānyekaikaśo jvaraliṅgāni vyākhyātāni bhavanti vistarasamāsābhyām//

jvarastu khalu maheśvarakopaprabhavaḥ, sarvaprāṇabhṛtāṃ prāṇaharo, dehendriyamanastāpakaraḥ, &prajñābalavarṇaharṣotsāhahrāsakaraḥ, śramaklamamohāhāroparodhasaṃjananaḥ; jvarayati śarīrāṇīti jvaraḥ, nānye vyādhayastathā dāruṇā bahūpadravā duścikitsyāśca yathā+ayam/

sa sarvarogādhipatiḥ, nānātiryagyoniṣu ca bahuvidhaiḥ śabdairabhidhīyate/

sarve prāṇabhṛtaḥ sajvarā eva jāyante sajvarā eva mriyante ca; sa mahāmohaḥ, tenābhibhūtāḥ prāgdaihikaṃ dehinaḥ karma kiṃcidapi na smaranti, sarvaprāṇabhṛtāṃ ca jvara evānte prāṇānādatte//

tatra pūrvarūpadarśane jvarādau vā hitaṃ laghvaśanamapatarpaṇaṃ vā, jvarasyāmāśayasamutthatvāt; tataḥ kaṣāyapānābhyaṅgasnehasvedapradehapariṣekānulepanavamanavirecanāsthāpanānuvāsanopaśamananastaḥkarmadhūpadhūmapānāñjanakṣīrabhojanavidhānaṃ ca yathāsvaṃ yuktyā prayojyam//

jīrṇajvareṣu tu sarveṣveva sarpiṣaḥ pānaṃ praśasyate yathāsvauṣadhasiddhasya; sarpirhi snehādvātaṃ śamayati, saṃskārāt kaphaṃ, śaityāt pittamūṣmāṇaṃ ca; tasmājjīrṇajvareṣu sarveṣveva sarpirhitamudakamivāgnipluṣṭeṣu dravyeṣviti//

bhavanti cātra---

yathā prajvalitaṃ veśma pariṣiñcanti vāriṇā/
narāḥ śāntimabhipretya tathā jīrṇajvare ghṛtam//
snehādvātaṃ śamayati, śaityāt pittaṃ niyacchati/
ghṛtaṃ tulyaguṇaṃ doṣaṃ saṃskārāttu jayet kapham//
nānyaḥ snehastathā kaścit saṃskāramanuvartate/
yathā sarpirataḥ sarpiḥ sarvasnehottamaṃ matam//
gadyokto yaḥ punaḥ ślokairarthaḥ samanugīyate/
tadvyaktivyavasāyārthaṃ dviruktaṃ tanna garhyate//

tatra ślokāḥ---

trividhaṃ nāmaparyāyairhetuṃ pañcavidhaṃ gadam/
gadalakṣaṇaparyāyān vyādheḥ pañcavidhaṃ graham//
jvaramaṣṭavidhaṃ tasya prakṛṣṭāsannakāraṇam/
pūrvarūpaṃ ca rūpaṃ ca bheṣajaṃ saṃgraheṇa ca//
vyājahāra jvarasyāgre nidāne vigatajvaraḥ/

bhagavānagneveśāya praṇatāya punarvasuḥ//

ityagniveśakṛte tantre carakapratisaṃskṛte nidānasthāne jvaranidānaṃ nāma prathamo+adhyāyaḥ//1//

2.2. dvitīyo+adhyāyaḥ/

athāto raktapittanidānaṃ vyākhyāsyāmaḥ

iti ha smāha bhagavānātreyaḥ//

pittaṃ yathābhūtaṃ lohitapittamiti saṃjñāṃ labhate, *tad vyākhyāsyāmaḥ//

yadā janturyavakoddālakakoradūṣaprāyāṇyannāni bhuṅkte, bhṛśoṣṇatīkṣṇamapi cānyadannajātaṃ niṣpāvamāṣakulatthasūpakṣāropasaṃhitaṃ, &dadhidadhimaṇḍodaśvitkaṭvarāmlakāñjikopasekaṃ vā, vārāhamāhiṣāvikamātsyagavyapiśitaṃ, piṇyākapiṇḍāluśuṣkaśākopahitaṃ, mūlakasarṣapalaśunakarañjaśigrumadhuśigru(&khaḍayūṣa) bhūstṛṇasumukhasurasakuṭherakagaṇḍīrakālamālakaparṇāsakṣavakaphaṇijjhakopadaṃśaṃ, surāsauvīratuṣodakamaireyamedakamadhūlakaśuktakuvalabadarāmlaprāyānupānaṃ vā, piṣṭānnottarabhūyiṣṭham; uṣṇābhitapto vā+atimātramativelaṃ vā++āmaṃ payaḥ pibati, payasā samaśnāti &rauhiṇīkaṃ, kāṇakapotaṃ vā sarṣapatailakṣārasiddhaṃ, kulatthapiṇyākajāmbavalakucapakvaiḥ śauktikairvā saha kṣīraṃ &pibatyuṣṇābhitaptaḥ; tasyaivamācarataḥ pittaṃ prakopamāpadyate, lohitaṃ &ca svapramāṇamativartate/

tasmin pramāṇātivṛtte pittaṃ prakupitaṃ &śarīramanusarpadyadeva yakṛtplīhaprabhavāṇāṃ lohitavahānāṃ ca srotasāṃ lohitābhiṣyandagurūṇi mukhānyāsādya &pratirundhyāt &tadeva lohitaṃ dūṣayati//

&saṃsargāllohitapradūṣaṇāllohitagandhavarṇānuvidhānācca pittaṃ lohitapittamityācakṣate//

tasyemāni pūrvarūpāṇi bhavanti; tadyathā---anannābhilāṣaḥ, bhuktasya vidāhaḥ, śuktāmlagandharasa udgāraḥ, charderabhīkṣṇamāgamanaṃ, charditasya bībhatsatā, svarabhedo, gātrāṇāṃ sadanaṃ, paridāhaḥ, mukhāddhūmāgama iva, lohalohitamatsyāmagandhitvamiva cāsyasya, raktaharitahāridratvamaṅgāvayavaśakṛnmūtrasvedalālāsiṅgāṇakāsyakarṇamala-&piḍakolikāpiḍakānām, aṅgavedanā, lohitanīlapītaśyāvānāmarciṣmatāṃ ca rūpāṇāṃ svapne darśanamabhīkṣṇamiti (&lohitapittapūrvarūpāṇi bhavanti)//

upadravāstu khalu daurbalyārocakāvipākaśvāsakāsajvarātīsāraśophaśoṣapāṇḍurogāḥ svarabhedaśca//

mārgau punarasya dvau ūrdhvaṃ, cādhaśca/

tadbahuśleṣmaṇi śarīre śleṣmasaṃsargādūrdhvaṃ pratipadyamānaṃ karṇanāsikānetrāsyebhyaḥ pracyavate, bahuvāte tu śarīre vātasaṃsargādadhaḥ pratipadyamānaṃ mūtrapurīṣamārgābhyāṃ pracyavate, bahuśleṣmavāte tu śarīre śleṣmavātasaṃsargāddvāvapi mārgau pratipadyate, tau mārgau pratipadyamānaṃ sarvebhya eva yathoktebhyaḥ khebhyaḥ pracyavate śarīrasya//

tatra yadūrdhvabhāgaṃ tat sādhyaṃ, virecanopakramaṇīyatvādbahvauṣadhatvācca; yadadhobhāgaṃ tadyathāpyaṃ, vamanopakramaṇīyatvādalpauṣadhatvācca; yadubhayabhāgaṃ tadasādhyaṃ, vamanavirecanāyogitvādanauṣadhatvācceti//

raktapittaprakopastu khalu purā dakṣayajñoddhvaṃse &rudrakopāmarṣāgninā prāṇināṃ parigataśarīrapraṇānāmabhavajjvaramanu//

tasyāśukāriṇo dāvāgnerivāpatitasyātyayikasyāśu praśāntyai prayatitavyaṃ mātrāṃ deśaṃ kālaṃ cābhisamīkṣya saṃtarpaṇenāpatarpaṇena vā mṛdumadhuraśiśiratiktakaṣāyairabhyavahāryaiḥ pradehapariṣekāvagāhasaṃsparśanairvamanādyairvā tatrāvahiteneti//

bhavanti cātra---

sādhyaṃ lohitapittaṃ tadyadūrdhvaṃ pratipadyate/
virecanasya yogitvādbahutvādbheṣajasya ca//
virecanaṃ tu pittasya jayārthe paramauṣadham/
yaśca &tatrānvayaḥ śleṣmā tasya cānadhamaṃ smṛtam//
bhavedyogāvahaṃ tatra &madhuraṃ caiva bheṣajam/
tasmāt sādhyaṃ mataṃ raktaṃ yadūrdhvaṃ pratipadyate//
raktaṃ tu yadadhobhāgaṃ tadyāpyamiti niścitam/
vamanasyālpayogitvādalpatvādbheṣajasya ca//
vamanaṃ hi na pittasya &haraṇe śreṣṭhamucyate/
yaśca &tatrānvayo vāyustacchāntau cāvaraṃ smṛtam//
&taccāyogāvahaṃ tatra kaṣāyaṃ tiktakāni ca/
tasmādyāpyaṃ samākhyātaṃ &yaduktamanulomagam//
raktapittaṃ tu yanmārgau dvāvapi pratipadyate/
asādhyamiti tajjñeyaṃ pūrvoktādeva kāraṇāt//
nahi saṃśodhanaṃ kiṃcidastyasya pratimārgagam/
pratimārgaṃ ca haraṇaṃ raktapitte vidhīyate//
evamevopaśamanaṃ sarvaśo nāsya vidyate/
saṃsṛṣṭeṣu ca doṣeṣu sarvajicchamanaṃ &matam//
ityuktaṃ trividhodarkaṃ raktaṃ mārgaviśeṣataḥ/
ebhyastu khalu hetubhyaḥ kiṃcitsādhyaṃ na sidhyati//
preṣyopakaraṇābhāvāaddaurātmyādvaidyadoṣataḥ/
akarmataśca sādhyatvaṃ kaścidrogo+ativartate//
tatrāsādhyatvamekaṃ syāt sādhyayāpyaparikramāt/
raktapittasya vijñānamidaṃ tasyopadiśyate//
yat kṛṣṇamathavā nīlaṃ yadvā śakradhanuṣprabham/
raktapittamasādhyaṃ tadvāsaso rañjanaṃ ca yat//
bhṛśaṃ pūtyatimātraṃ ca sarvopadravavacca yat/
balamāṃsakṣaye yacca tacca raktamasiddhimat//
yena copahato raktaṃ raktapittena mānavaḥ/
paśyeddṛśyaṃ viyaccāpi taccāsādhyaṃ na saṃśayaḥ//
tatrāsādhyaṃ parityājyaṃ, yāpyaṃ yatnena yāpayet/
sādhyaṃ cāvahitaḥ siddhairbheṣajaiḥ sādhayedbhiṣak//

tatra ślokau---

kāraṇaṃ nāmanirvṛttiṃ pūrvarūpāṇyupadravān/
mārgau doṣānubandhaṃ ca sādhyatvaṃ na ca hetumat//
nidāne raktapittasya vyājahāra punarvasuḥ/
vītamoharajodoṣalobhamānamadaspṛhaḥ//

ityagniveśakṛte tantre carakapratisaṃskṛte nidānasthāne raktapittanidānaṃ nāma dvitīyo+adhyāyaḥ//2//

2.3. tṛtīyo+adhyāyaḥ/

athāto gulmanidānaṃ vyākhyāsyāmaḥ//

iti ha smāha bhagavānātreyaḥ//

iha khalu pañca gulmā bhavanti; tadyathā---vātagulmaḥ, pittagulmaḥ, śleṣmagulmo, nicayagulmaḥ, śoṇitagulma iti//

evaṃvādinaṃ bhagavantamātreyamagniveśa uvāca---kathamiha bhagavan pañcānāṃ gulmānāṃ viśeṣamabhijānīmahe; nahyaviśeṣavidrogāṇāmauṣadhavidapi bhiṣak praśamanasamartho bhavatīti//

tamuvāca bhagavānātreyaḥ---samutthānapūrvarūpaliṅgavedanopaśayaviśeṣebhyo viśeṣavijñānaṃ gulmānāṃ bhavatyanyeṣāṃ ca rogāṇāmagniveśa! tattu &khalu gulmeṣūcyamānaṃ nibodha//

yadā puruṣo vātalo viśeṣeṇa jvaravamanavirecanātīsārāṇāmanyatamena darśanena karśito vātalamāhāramāharati, śītaṃ vā &viśeṣeṇātimātram, asnehapūrve vā vamanavirecane pibati, anudīrṇāṃ vā chardimudīrayati, udīrṇan vātamūtrapurīṣavegānniruṇaddhi, atyaśito vā pibati navodakamatimātram, atisaṃkṣobhiṇā vā yānena yāti, ativyavāyavyāyāmamadyaśokarucirvā, abhighātamṛcchati vā, &viṣamasanaśayanasthānacaṅkramaṇasevī vā bhavati, anyadvā kiṃcidevaṃvidhaṃ viṣamamatimātraṃ vyāyāmajātamārabhate, &tasyāpacārādvātaḥ prakopamāpadyate//

sa prakupito vāyurmahāsroto+anupraviśya raukṣyāt &kaṭhinībhūtamāplutya piṇḍito+avasthānaṃ karoti hṛdi bastau pārśvayornābhyāṃ vā; sa śūlamupajanayati granthīṃścānekavidhān, piṇḍitaścāvatiṣṭhate, sa piṇḍitatvād 'gulma' ityabhidhīyate; sa &muhurādhamati, muhuralpatvamāpadyate; aviyatavupulāṇuvedanaśca bhavati calatvādvāyoḥ, muhuḥ pipīlikāsaṃpracāra ivāṅgeṣu, todabhedasphuraṇāyāmasaṅkocasuptiharṣapralayodayabahulaḥ; tadāturaḥ sūcyeva śaṅkuneva cābhisaṃviddhamātmānaṃ manyate, api ca divasānte &jvaryate, śuṣyati cāsyāsyam, ucchvāsaścoparudhyate, hṛṣyanti cāsya romāṇi vedanāyāḥ prādurbhāve; plīhāṭopāntrakūjanāvipākodāvartāṅgamardamanyāśiraḥśaṅkhaśūlabradhnarogāścainamupadravanti; kṛṣṇāruṇaparuṣatvaṅnakhanayanavadanamūtrapurīṣaśca bhavati, nidānoktāni cāsya nopaśerate, viparītāni copaśerata iti vātagulmaḥ//CS.2.3.8/ taireva tu karśanaiḥ karśitasyāmlalavaṇakaṭukakṣāroṣṇatīkṣṇaśuktavyāpannamadyaharitakaphalāmlānāṃ vidāhināṃ ca śākadhānyamāṃsādīnāmupayogādajīrṇādhyaśanādraukṣyānugate cāmāśaye &vamanamativelaṃ saṃdhāraṇaṃ vātātapau cātisevamānasya pittaṃ saha mārutena prakopamāpadyate//

tat prakupitaṃ māruta āmāśayaikadeśe &saṃvartya tāneva vedanāprakārānupajanayati, ya uktā vātagulme; pittaṃ tvenaṃ vidahati kukṣau hṛdyurasi kaṇṭhe ca; sa vidahyamānaḥ sadhūmamivodgāramudgiratyamlānvitaṃ, gulmāvakāśaścāsya dahyate dūyate &dhūpyate ūṣmāyate svidyati klidyati &śithila iva sparśāsaho+&alparomāñcaśca bhavati; jvarabhramadavathupipāsāgalatālumukhaśoṣapramohaviḍbhedāścainamupadravanti; haritahāridratvaṅnakhanayanavadanamūtrapurīṣaśca bhavati; nidānoktāni cāsya nopaśerate, viparītānyupaśerata iti pittagulmaḥ//

taireva tu karśanaiḥ karśitasyātyaśanādatisnigdhagurumadhuraśītāśanāt &piṣṭekṣukṣīratilamāṣaguḍavikṛtisevanānmandakamadyātipānāddharitakātipraṇanayādānūpaudakagrāmyamāṃsātibhakṣaṇāt &saṃdhāraṇādabubhukṣasya cātipragāḍhamudapānāt saṃkṣobhaṇādvā śarīrasya śleṣmā saha mārutena prakopamāpadyate//

taṃ prakupitaṃ māruta āmāśayaikadeśe &saṃvartya tāneva vedanāprakārānupajanayati ya uktā vātagulme; śleṣmā tvasya śītajvararocakāvipākāṅgamardaharṣahṛdrogacchardinidrālasyastaimityagauravaśirobhitāpānupajanayati, api ca gulmasya sthairyagauravakāṭhinyāvagāḍhasuptatāḥ, tathā kāsaśvāsapratiśyāyān rājayakṣmāṇaṃ cātipravṛddhaḥ, śvaityaṃ tvaṅnakhanayanavadanamūtrapurīṣeṣūpajanayati, nidānoktāni cāsya nopaśerate, viparītāni copaśerata iti śleṣmagulmaḥ//

triḍoṣadetuliṅgasannipāte tu sānnipātikaṃ gulmamupadiśanti kuśalāḥ/

sa &vipratiṣiddhopakramatvādasādhyo nicayagulmaḥ//

śoṇitagulmastu khalu striyā eva bhavati na puruṣasya, garbhakoṣṭhārtavāgamanavaiśeṣyāt/

pāratantryādavaiśāradyāt satatamupacārānurodhādvā vegānudīrṇānuparundhatyā āmagarbhe vā+apyacirapatite+athavā+apyaciraprajātāyā ṛtau vā vātaprakopaṇānyāsevamānāyāḥ kṣipraṃ vātaḥ prakopamāpadyate//

sa prakupito yonimukhamanupraviśyārtavamuparuṇaddhi, māsi māsi tadārtavamuparudhyamānaṃ kukṣimabhivardhayati/

tasyāḥ śūlakāsātīsāracchardyarocakāvipākāṅgamardanidrālasyastaimityakaphaprasekāḥ samupajāyante, stanayośca stanyam, auṣṭhayoḥ stanamaṇḍalayośca kārṣṇyam, atyarthaṃ glāniścakṣuṣoḥ, mūrccha, hṛllāsaḥ, dohadaḥ, śvayathuśca pādayoḥ, īṣaccodgamo romarājyāḥ, yonyāścāṭālatvam, api ca yonyā daurgandhyamāsrāvaścopajāyate, kevalaścāsyā gulmaḥ piṇḍita eva spandate, tāmagarbhāṃ garbhiṇīmityāgurmūḍhāḥ//

eṣāṃ tu khalu pañcānāṃ gulmānāṃ prāgabhinievṛtterimāni pūrvarūpāṇi bhavanti; tadyathā---anannābhilaṣaṇam, arocakāvipākau, agnivaiṣamyaṃ, vidāho bhuktasya, pākakāle cāyuktyā chardyudgārau, vātamūtrapurīṣavegānāṃ cāprādurbhāvaḥ, prādurbhūtānāṃ cāpravṛttirīṣadāgamanaṃ vā, vātaśūlāṭopāntrakūjanāpariharṣaṇātivṛttapurīṣatāḥ, abubhukṣā, daurbalyaṃ, sauhityasya cāsahatvamiti//

sarveṣvapi khalveteṣu gulmeṣu na kaścidvātādṛte saṃbhavati gulmaḥ/

teṣāṃ sānnipātikamasādhyaṃ jñātvā naivopakrameta, ekadoṣaje tu yathāsvamārambhaṃ praṇayet, saṃsṛṣṭāṃstu sādhāraṇena karmaṇopacaret/

yaccānyadapyaviruddhaṃ manyeta tadapyavacārayedvibhajya gurulāghavamupadravāṇāṃ, gurūnupadravāṃstvaramāṇaścikitsejjaghanyamitarān/

tvaramāṇastu viśeṣamanupalabhamāno gulmeṣvātyayike karmaṇi vātacikitsitaṃ praṇayet, snehasvedau vātaharau snehopasaṃhitaṃ ca mṛdu virecanaṃ bastīṃśca; amlalavaṇamadhurāṃśca rasān yuktyā+avacārayet/

mārute hyupaśānte svalpenāpi prayatnena śakyo+anyo+api doṣo niyantuṃ gulmeṣviti//

bhavati cātra---

gulmināmanilaśāntirupāyaiḥ sarvaśo bidhivadācaritavyā/
mārute gyavajite+anyamudīrṇaṃ doṣamalpamapi karma nihanyāt//

tatra ślokaḥ---

saṃkhyā nimittaṃ rūpāṇi pūrvarūpamathāpi ca/
diṣṭaṃ nidāne gulmānāmekadeśaśca karmaṇām//

ityagniveśakṛte tantre carakapratisaṃskṛte nidānasthāne gulmanidānaṃ nāma tṛtīyo+adhyāyaḥ//3//

2.4. caturtho+adhyāyaḥ/

athātaḥ pramehanidānaṃ vyākhyāsyāmaḥ//

iti ha smāha bhagavānātreyaḥ//

tridoṣakopanimittā viṃśatiḥ pramehā bhavanti vikārāścāpare+aparisaṃkhyeyāḥ/

tatra yathā tridoṣaprakopaḥ pramehānabhinirvartayati tathā+anuvyākhyāsyāmaḥ//

iha khalu nidānadoṣadūṣyaviśeṣebhyo vikāravighātabhāvābhāvaprativiśeṣā bhavanti/

yadā hyete trayo nidānādiviśeṣāḥ parasparaṃ &nānubadhnantyathavā kālaprakarṣādabalīyāṃso+athavā+anubadhnanti na tadā vikārābhinirvṛttiḥ, cirādvā+apyabhinirvartante, tanavo vā bhavantyayathoktasarvaliṅgā vā; viparyaye viparītāḥ; iti sarvavikāravighātabhāvābhāvaprativiśeṣābhinirvṛttiheturbhavatyuktaḥ//

tatreme trayo nidānādiviśeṣāḥ śleṣmanimittānāṃ pramehāṇāmāśvabhinirvṛttikarā bhavanti; tadyathā---hāyanakayavakacīnakoddālakanaiṣadhetkaṭamukundakamahāvrīhipramodakasugandhakānāṃ navānāmativelamatipramāṇena copayogaḥ, tathā sarpiṣmatāṃ navahareśumāṣasūpyānāṃ, grāmyānūpaudakānāṃ ca māṃsānāṃ, śākatilapalalapiṣṭānnapāyasakṛśarāvilepīkṣuvikārāṇāṃ, kṣīranavamadyamandakadadhidravamadhurataruṇaprāyāṇāṃ copayogaḥ, mṛjāvyāyāmavarjanaṃ, svapnaśayanāsanaprasaṅgaḥ, yaśca kaścidvidhiranyo+api śleṣmamedomūtrasaṃjananaḥ, sa sarvo nidānaviśeṣaḥ//

bahudravaḥ śleṣmā doṣaviśeṣaḥ//

&bahvabaddhaṃ medo māṃsaṃ śarīrajakledaḥ śukraṃ śoṇitaṃ vasā majjā lasīkā rasaścaujaḥsaṃkhyāta iti dūṣyaviśeṣāḥ//

trayāṇāmeṣāṃ nidānādiviśeṣāṇāṃ sannipāte kṣipraṃ śleṣmā prakopamāpadyate, prāgatibhūyastvāt; sa prakupitaḥ kṣiprameva śarīre visṛptiṃ labhate, śarīraśaithilyāt; sa visarpañ śarīre medasaivādito miśrībhāvaṃ gacchati, medasaścaiva bahvabaddhatvānmedasaśca guṇaiḥ samānaguṇabhūyiṣṭhatvāt; sa medasā miśrībhavan dūṣayatyenat, vikṛtatvāt; sa vikṛto duṣṭena medasopahitaḥ śarīrakledamāṃsābhyāṃ saṃsargaṃ gacchati, kledamāṃsayoratipramāṇābhivṛddhatvāt; sa māṃse māṃsapradoṣāt pūtimāṃsapiḍakāḥ śarāvikākacchapikādyāḥ saṃjanayati, aprakṛtibhūtatvāt; śarīrakledaṃ punardūṣayan mūtratvena pariṇamayati, mūtravahānāṃ ca srotasāṃ &vaṅkṣaṇabastiprabhavāṇāṃ medaḥkledopahitāni gurūṇi mukhānyāsādya pratirudhyate; tataḥ pramehāṃsteṣāṃ sthairyamasādhyatāṃ vā janayati, prakṛtivikṛtibhūtatvāt//

śarīrakledastu śleṣmamedomiśraḥ praviśan mūtrāśayaṃ mūtratvamāpadyamānaḥ ślaiṣmikairebhirdaśabhirguṇairupasṛjyate vaiṣamyayuktaiḥ; tadyathā---śvetaśītamūrtapicchilācchasnigdhagurumadhurasāndraprasādamandaiḥ, tatra yena guṇenaikenānekena vā &bhūyastaramupasṛjyate tatsamākhyaṃ gauṇaṃ nāmaviśeṣaṃ prāpnoti//

te tu khalvime daśa pramehā nāmaviśeṣeṇa bhavanti; tadyathā---udakamehaśca, ikṣuvālikārasamehaśca, sāndramehaśca, sāndraprasādamehaśca, śuklamehaśca, śukramehaśca, śītamehaśca, sikatāmehaśca, śanairmehaśca, ālālamehaśceti//

te daśa pramehāḥ sādhyāḥ; samānaguṇamehaḥsthānakatvāt, kaphasya prādhānyāt, samakriyatvācca//

tatra ślokāḥ śleṣmapramehaviśeṣavijñānārthā bhavanti---//

acchaṃ bahu sitaṃ śītaṃ nirgandhamudakopamam/
śleṣmakopānnaro mūtramudamehī pramehati//
atyarthamadhuraṃ śītamīṣatpicchilamāvilam/
kāṇḍekṣurasasaṅkāśaṃ śleṣmakopāt pramehati//
yasya paryuṣitaṃ mūtraṃ sāndrībhavati bhājane/
puruṣaṃ kaphakopena tamāhuḥ sāndramehinam//
yasya saṃhanyate mūtraṃ kiṃcit kiṃcit prasīdati/
sāndraprasādamehīti tamāhuḥ śleṣmakopataḥ//
śuklaṃ piṣṭanibhaṃ mūtramabhīkṣṇaṃ yaḥ pramehati/
puruṣaṃ kaphakopena tamāhuḥ śuklamehinam//
śukrābhaṃ śukramiśraṃ vā mururmehati yo naraḥ/
śukramehinamāhustaṃ puruṣaṃ śleṣmakopataḥ//
atyarthamadhuraṃ śītaṃ mūtraṃ mehati yo bhṛśam/
śītamehinamāhustaṃ puruṣaṃ śleṣmakopataḥ//
mūrtānmūtragatān doṣānaṇūnamehati yo naraḥ/
sikatāmehinaṃ vidyāttaṃ naraṃ śleṣmakopataḥ//
mandaṃ mandamavegaṃ tu kṛcchraṃ yo mūtrayecchanaiḥ/
śanairmehinamāhustaṃ puruṣaṃ śleṣmakopataḥ//
tantubaddhamivālālaṃ picchilaṃ yaḥ pramehati/
ālālamehinaṃ vidyāttaṃ naraṃ śleṣmakopataḥ//

ityete daśa pramehāḥ śleṣmaprakopanimittā vyākhyātā bhavanti//

uṣṇāmlalavaṇakṣārakaṭukājīrṇabhojanopasevinastathā+atitīkṣṇātapāgnisaṃtāpaśramakrodhaviṣamāhāropasevinaśca tathāvidhaśarīrasyaiva &kṣipraṃ pittaṃ prakopamāpadyate, tattu prakupitaṃ tayaivānupūrvyā pramehānimān ṣaṭ kṣiprataramabhinirvartayati//

teṣāmapi tu khalu pittaguṇaviśeṣeṇaiva nāmaviśeṣā bhavanti; tadyathā---kṣāramehaśca, kālamehaśca, nīlamehaśca, lohitamehaśca, māñjiṣṭhamehaśca, hāridramehaśceti//

te ṣaḍbhireva kṣārāmlalavaṇakaṭukavisroṣṇaiḥ pittaguṇaiḥ pūrvavadyuktā bhavanti//

sarva eva te yāpyāḥ, saṃsṛṣṭadoṣamedaḥsthānatvādviruddhopakramatvācceti//

tatra ślokāḥ pittapramehaviśeṣavijñānārthā bhavanti---//

gandhavarṇarasasparśairyathā kṣārastathāvidham/
pittakopānnaro mūtraṃ kṣāramehī pramehati//
masīvarṇamajasraṃ yo mūtramuṣṇaṃ pramehati/
pittasya parikopeṇa taṃ vidyāt kālamehinam//
cāṣapakṣanibhaṃ mūtramamlaṃ mehati yo naraḥ/
pittasya parikopeṇa taṃ vidyānnīlamehinam//
visraṃ lavaṇamuṣṇaṃ ca raktaṃ mehati yo naraḥ/
pittasya parikopeṇa taṃ vidyādraktamehinam//
mañjiṣṭhodakasaṃkāśaṃ bhṛśaṃ visraṃ pramehati/
pittasya parikopāttaṃ vidyānmāñjiṣṭhamehinam//
haridrodakasaṅkāśaṃ kaṭukaṃ yaḥ pramehati/
pittasya parikopāttaṃ vidyāddhāridramehinam//

ityete ṣaṭ pramehāḥ pittaprakopanimittā vyākhyātā bhavanti//

kaṣāyakaṭutiktarūkṣalaghuśītavyavāyavyāyāmavamanavirecanāsthāpanaśirovirecanātiyogasaṃdhāraṇānaśanābhighātātapodvegaśokaśoṇitātiṣekajāgaraṇaviṣamaśarīranyāsānupasevamānasya tathāvidhaśarīrasyaiva kṣipraṃ vātaḥ prakopamāpadyate//

sa prakupitastathāvidhe śarīre visarpan yadā vasāmādāya mūtravahāni srotāṃsi pratipadyate tadā vasāmehamabhinirvartayati; yadā punarmajjānaṃ mūtrabastāvākarṣati tadā majjamehamabhinirvartayati; yadā tu lasīkāṃ mūtrāśaye+abhivahanmūtramanubandhaṃ cyotayati lasīkātibagutvādvikṣepaṇācca vāyoḥ &khalvasyātimūtrapravṛttisaṅgaṃ karoti, tadā sa matta iva gajaḥ kṣaratyajasraṃ mūtramavegaṃ, taṃ hastimehinamācakṣate; aujaḥ punarmadhurasvabhāvaṃ, tad yadā raukṣyādvāyuḥ kaṣāyatvenābhisaṃsṛjya mūtrāśaye+abhivahati tadā madhumehaṃ karoti//

imāṃścaturaḥ pramehān vātajānasādhyānācakṣate bhiṣajaḥ, mahātyayikatvādviruddhopakramatvācceti//

teṣāmapi pūrvavadguṇaviśeṣeṇa nāmaviśeṣā bhavanti; tadyathā---vasāmehaśca, majjamehaśca, hastimehaśca, madhumehaśceti//

tatra ślokā vātapramehaviśeṣavijñānārthā bhavanti---//

vasāmiśraṃ vasābhaṃ vā muhurmehati yo naraḥ/
vasāmehinamāhustamasādhyaṃ vātakopataḥ//
majjānaṃ saha mūtreṇa muhurmehati yo naraḥ/
majjamehinamāhustamasādhyaṃ vātakopataḥ//
hastī matta ivājasraṃ mūtraṃ kṣarati yo bhṛśam/
hastimehinamāhustamasādhyaṃ vātakopataḥ//
kaṣāyamadhuraṃ pāṇḍu rūkṣaṃ mehati yo naraḥ/
vātakopādasādhyaṃ taṃ pratīyānmadhumehinam//

ityete catvāraḥ pramehā vātaprakopanimittā vyākhyātā bhavanti//

evaṃ tridoṣaprakopanimittā viṃśatiḥ pramehā vyākhyātā bhavanti//

trayastu khalu doṣāḥ prakupitāḥ pramehānabhinirvartayiṣyanta imāni pūrvarūpāṇi darśayanti; tadyathā---jaṭilībhāvaṃ keśeṣu, mādhuryamāsyasya, karapādayoḥ suptatādāhau, mukhatālukaṇṭhaśoṣaṃ, pipāsām, ālasyaṃ, malaṃ kāye, kāyacchidreṣūpadehaṃ, paridāhaṃ suptatāṃ cāṅgeṣu, ṣaṭpadapipīlikābhiśca śarīramūtrābhisaraṇaṃ, mūtre ca mūtradoṣān, visraṃ śarīragandhaṃ, nidrāṃ, tandrā ca sarvakālamiti//

upadravāstu khalu pramehiṇāṃ tṛṣṇātīsārajvaradāhadaurbalyārocakāvipākāḥ pūtimāṃsapiḍakālajīvidradhyādayaśca tatprasaṅgādbhavanti//

tatra sādhyān pramehān saṃśodhanopaśamanairyathārhamupapādayaṃścikitsediti//

bhavanti cātra--- gṛdhnumabhyavahāryeṣu snānacaṅkramaṇadviṣam/

pramehaḥ kṣipramabhyeti nīḍadrumamivāṇḍajaḥ//

mandotsāhamatisthūlamatisnigdhaṃ mahāśanam/

mṛtyuḥ prameharūpeṇa kṣipramādāya gacchati//

yastvāhāraṃ śarīrasya dhātusāmyakaraṃ naraḥ/

sevate vividhāścānyāśceṣṭāḥ sa sukhamaśnute//

tatra ślokāḥ---

heturvyādhiviśeṣāṇāṃ pramehāṇāṃ ca kāraṇam/
doṣadhātusamāyogo rūpaṃ vividhameva ca//
daśa śleṣmakṛtā yasmāt pramehāḥ ṣaṭ ca pittajāḥ/
yathā ca vāyuścaturaḥ pramehān kurute balī//
sādhyāsādhyaviśeṣāśca pūrvarūpāṇyupadravāḥ/
pramehāṇāṃ nidāne+asmin kriyāsūtraṃ ca bhāṣitam//

ityagniveśakṛte tantre carakapratisaṃskṛte nidānasthāne pramehavidhānaṃ nāma caturtho+adhyāyaḥ//4//

2.5. pañcamo+adhyāyaḥ/

athātaḥ kuṣṭhanidānaṃ vyākhyāsyāmaḥ//

iti ha smāha bhagavānātreyaḥ//

sapta dravyāṇi kuṣṭhānāṃ &prakṛtirvikṛtimāpannāni bhavanti/

tadyathā---trayo doṣā vātapittaśleṣmāṇaḥ prakopaṇavikṛtāḥ, dūṣyāśca &śarīradhātavastvaṅmāṃsaśoṇitalatīkāścaturdhā doṣopaghātavikṛtā iti/

etat saptānāṃ saptadhātukamevaṅgatamājananaṃ kuṣṭhānām, ataḥprabhavāṇyabhinirvartamānāni kevalaṃ śarīramupatapanti//

na ca kiñcidasti kuṣṭhamekadoṣaprakopanimittam, asti tu khalu samānaprakṛtīnāmapi kuṣṭhānāṃ doṣāṃśāṃśavikalpānubandhasthānavibhāgena vedanāvarṇasaṃsthānaprabhāvanāmacikitsitaviśeṣaḥ/

sa saptavidho+aṣṭādaśavidho+aparisaṃkhyeyavidho vā bhavati/

doṣā hi vikalpanairvikalpyamānā vikalpayanti vikārān, anyatrāsādhyabhāvāt/

teṣāṃ vikalpavikārasaṃkhyāne+atiprasaṅgamabhisamīkṣya saptavidhameva kuṣṭhaviśeṣamupakṣyāmaḥ//

iha vātādiṣu triṣu prakupiteṣu tvagādīṃścaturaḥ pradūṣayatsu vāte+ dhikatare kapālakuṣṭhamabhinirvartate, pitte tvaudumbaraṃ, śleṣmaṇi maṇḍalakuṣṭhaṃ, vātapittayorṛṣyajihvaṃ, pittaśleṣmaṇoḥ puṇḍarīkaṃ, śleṣmamārutayoḥ sidhmakuṣṭhaṃ, sarvadoṣābhivṛddhau kākaṇakamabhinirvartate; evameṣa saptavidhaḥ kuṣṭhaviśeṣo bhavati/

&sa caiṣa bhūyastaratamataḥ prakṛtau vikalpyamānāyāṃ bhūyasīṃ vikāravikalpasaṃkhyāmāpadyate//

tatredaṃ sarvakuṣṭhanidānaṃ samāsenopadekṣyāmaḥ---śītoṣṇavyatyāsamanānupūrvyopasevamānasya tathā saṃtarpaṇapatarpaṇābhyavahāryavahāryavyatyāsaṃ, madhuphāṇitamatsyalakucamūlakakākamācīḥ satatamatimātramajīrṇe ca samaśnataḥ, cilicimaṃ ca payasā, hāyanakayavakacīnakoddālakakoradūṣaprāyāṇi cānnāni kṣīradadhitakrakolakulatthamāṣātasīkusumbhasnehavanti, etairevātimātraṃ suhitasya ca vyavāyavyāyāmasaṃtāpānatyupasevamānasya, bhayaśramasaṃtāpopahatasya ca sahasā śītodakamavatarataḥ, vidagdhaṃ cāhārajātamanullikhya vidāhīnyabhyavaharataḥ, chardiṃ ca pratighnataḥ, snehāṃścāticarataḥ, trayo doṣāḥ yugapat prakopamāpadyante; tvagādayaścatvāraḥ śaithilyamāpadyante; teṣu śithileṣu doṣāḥ prakupitāḥ sthānamadhigamya saṃtiṣṭhamānāstāneva tvagādīn dūṣayantaḥ kuṣṭhānyabhinirvartayanti//

teṣāmimāni pūrvarūpāṇi bhavanti; tadyathā---asvedanamatisvedanaṃ pāruṣyamatiślakṣṇatā vaivarṇyaṃ kaṇḍūrnistodaḥ suptatā paridāhaḥ pariharṣo lomaharṣaḥ kharatvamūṣmāyaṇaṃ gauravaṃ śvayathuvīrsarpāgamanamabhīkṣṇaṃ ca kāye kāyacchidreṣūpadehaḥ pakvadagdhadaṣṭabhagnakṣatopaskhaliteṣvatimātraṃ vedanā svalpānāmapi ca vraṇānāṃ duṣṭirasaṃrohaṇaṃ ceti//

tato+anantaraṃ kuṣṭhānyabhinirvartante, teṣāmidaṃ vedanāvarṇasaṃsthānaprabhāvanāmaviśeṣavijñānaṃ bhavati; tadyathā---rūkṣāruṇaparuṣāṇi viṣamavisṛtāni kharaparyantāni &tanūnyudvṛttabahistanūni &suptavatsuptāni hṛṣitalomācitāni nistodabahulānyalpakaṇḍūdāhapūyalasīkānyāśugatisamutthānānyāśubhedīni jantumanti kṛṣṇāruṇakapālavarṇāni ca kapālakuṣṭhānīti vidyāt;

tāmrāṇi tāmrakhararomarājībhiravanaddhāni bahalāni bahubahalapūyaraktalasīkāni kaṇḍūkledakothadāhapākavantyāśugatisamutthānabhedīni sasaṃtāpakrimīṇi pakvodumbaraphalavarṇānyaudumbarakuṣṭhānīti vidyāt;

snigdhāni gurūṇyutsedhavanti &ślakṣṇasthirapītaparyantāni śuklaraktāvabhāsāni śuklaromarājīsantānāni &bahubahalaśuklapicchilasrāvīṇi bahukledakaṇḍūkrimīṇi saktagatisamutthānabhedīni parimaṇḍalāni maṇḍalakuṣṭhāni vidyāt;

paruṣāṇyaruṇavarṇāni bahirantaḥśyāvāni nīlapītatāmrāvabhāsānyāśugatisamutthānānyalpakaṇḍūkledakrimīṇi dāhabhedanistoda(pāka)bahulāni śūkopahatopamavedanānyutsannamadhyāni tanuparyantāni karkaśapiḍakācitāni dīrghaparimaṇḍalānyṛṣyajihvākṛtīni ṛṣyajihvānīti vidyāt;

śuklaraktāvabhāsāni raktaparyantāni raktarājīsirāsantatānyutsedhavanti bahubahalaraktapūyalasīkāni kaṇḍūkrimidāhapākavantyāśugatisamutthānabhedīni puṇḍarīkapalāśasaṃkāśāni puṇḍarīkāṇīti vidyāt;

&paruṣāruṇāni viśīrṇabahistanūnyantaḥsnigdhāni śuklaraktāvabhāsāni bahūnyalpavedanānyalpakaṇḍūdāhapūyalasīkāni laghusamutthānānyalpabhedakrimīṇyalābupuṣpasaṅkāśāni sidhmakuṣṭhānīti vidyāt;

kākaṇantikāvarṇānyādau paścāttu sarvakuṣṭhaliṅgasamanvitāni &pāpīyasā sarvakuṣṭhaliṅgasaṃbhavenānekavarṇāni kākaṇānīti vidyāt/

tānyasādhyāni, sādhyāni punaritarāṇi//

tatra yadasādhyaṃ tadasādhyatāṃ nātivartate, sādhyaṃ punaḥ kiṃcit sādhyatāmativartate kadācidapacārāt/

sādhyāni hi ṣaṭ kākaṇakavarjyānyacikitsyamānānyapacārato vā doṣairabhiṣyandamānānyasādhyatāmupayānti//

sādhyānāmapi hyupekṣyamāṇānāṃ tvaṅmāṃsaśoṇitalasīkākothakledasaṃsvedajāḥ krimayo+abhimūrcchanti; te bhakṣayantastvagādīn &doṣāḥ punardūṣayanta imānupadravān pṛthak pṛthagutpādayanti---tatra vātaḥ śyāvāruṇavarṇaṃ paruṣatāmapi ca raukṣyaśūlaśoṣatodavepathuharṣasaṅkocāyāsastambhasuptibhedabhaṅgān, pittaṃ dāhasvedakledakothasrāvapākarāgān, śleṣmā tvasya śvaityaśaityakaṇḍūsthairyagauravotsedhopasnehopalepān, krimayastu tvagādīṃścaturaḥ sirāḥ snāyūścāsthīnyapi &taruṇānyādadate//

asyāṃ caivāvasthāyāmupadravāḥ kuṣṭhinaṃ spṛśanti; tadyathā---prasravaṇamaṅgabhedaḥ patanānyaṅgāvayavānāṃ tṛṣṇājvarātīsāradāhadaurbalyārocakāvipākāśca, tathāvidhamasādhyaṃ vidyāditi//

bhavanti cātra---

sādhyo+ayamiti yaḥ pūrvaṃ naro rogamupekṣate/
sa kiṃcitkālamāsādya mṛta evāvabudhyate//
yastu prāgeva rogebhyo rogeṣu taruṇeṣu vā/
bheṣajaṃ kurute samyak sa ciraṃ sukhamaśnute//
yathā hyalpena yatnena chidyate taruṇastṣaruḥ/
sa evātipravṛddhastu chidyate+atiprayatnataḥ//
evameva vikāro+api taruṇaḥ sādhyate sukham/
vivṛddhaḥ sādhyate kṛcchrādasādhyo vā+api jāyate//

tatra ślokaḥ---

saṃkhyā dravyāṇi doṣāśca hetavaḥ pūrvalakṣaṇam/
rūpāṇyupadravāścoktāḥ kuṣṭhānāṃ kauṣṭhike pṛthak//

ityagniveśakṛte tantre carakapratisaṃskṛte nidānasthāne kuṣṭhanidānaṃ nāma pañcamo+adhyāyaḥ//5//

2.6. ṣaṣṭho+adhyāyaḥ/

athātaḥ śoṣanidānaṃ vyākhyāsyāmaḥ//

iti ha smāha bhagavānātreyaḥ//

iha khalu catvāri śoṣasyāyatanāni bhavanti; tadyathā---sāhasaṃ saṃdhāraṇaṃ kṣayo viṣamāśanamiti//

tatra sāhasaṃ śoṣasyāyatanamiti yaduktaṃ tadanuvyākhyāsyāmaḥ---yadā puruṣo durbalo hi san balavatā saha vigṛhṇāti, atimahatā vā dhanuṣā vyāyacchati, jalpati vā+apyatimātram, atimātraṃ vā bhāramudvahati, apsu vā plavate cātidūram, &utsādanapadāghātane vā+atipragāḍhamāsevate, atiprakṛṣṭaṃ vā+adhvānaṃ drutamabhipatati, abhihanyate vā, anyadvā kiṃcidevaṃvidhaṃ viṣamamatimātraṃ vā vyāyāmajātamārabhate, tasyātimātreṇa karmaṇoraḥ kṣaṇyate/

tasyoraḥ kṣatamupaplavate vāyuḥ/

sa tatrāvasthitaḥ śleṣmāṇamuraḥstham-&upasaṃgṛhya pittaṃ ca dūṣayan viharatyūrdhvamadhistiryak ca/

tasya yo+aṃśaḥ śarīrasandhīnāviśati tenāsya jṛmbhā+aṅgamardo jvaraścopajāyate, yastvāmāśayamabhyupaiti tena rogā bhavanti urasyā &arocakaśca, yaḥ kaṇṭhamabhiprapadyate kaṇṭhastenoddhvaṃsyate svaraścāvasīdati, yaḥ prāṇavahāni srotāṃsyanveti tena śvāsaḥ pratiśyāyaśca jāyate, yaḥ śirasyavatiṣṭhate śirastenopahanyate; tataḥ kṣaṇanāccaivoraso viṣamagatitvācca vāyoḥ kaṇṭhasya coddhvaṃsanāt kāsaḥ satatamasya saṃjāyate, sa kāsaprasaṅgādurasi kṣate śoṇitaṃ ṣṭhīvati, śoṇitāgamanāccāsya daurbalyamupajāyate; evamete sāhasaprabhavāḥ sāhasikamupadravāḥ spṛśanti/

tataḥ sa upaśoṣaṇairetairupadravairupadrutaḥ śanaiḥ śanairupaśuṣyati/

tasmāt puruṣo matimān balamātmanaḥ samīkṣya tadanurūpāṇi karmāṇyārabheta kartuṃ; balasamādhānaṃ hi śarīraṃ, śarīramūlaśca puruṣa iti//

bhavati cātra--- sāhasaṃ varjayet karma rakṣañjīvitamātmanaḥ/

jīvan hi puruṣastviṣṭaṃ karmaṇaḥ phalamaśnute//

saṃdhāraṇaṃ śoṣasyāyatanamiti yaduktaṃ tadanuvyākhyāsyāmaḥ---yadā puruṣo rājasamīpe bhartuḥ samīpe vā gurorvā pādamūle dyūtasabhamanyaṃ vā satāṃ samājaṃ strīmadhyaṃ vā samanupraviśya yānairvā+apyuccāvacair-&abhiyān bhayāt prasaṅgāddhrīmattvāddhṛṇitvādvā niruṇaddhyāgatān vātamūtrapurīṣavegān &tadā tasya saṃdhāraṇādvāyuḥ prakopamāpadyate, sa prakupitaḥ pittaśleṣmāṇau samudīryordhvamadhastiryak ca viharati; tataścāṃśaviśeṣeṇa pūrvavaccharīrāvayavaviśeṣaṃ praviśya śūlamupajanayati, bhinatti purīṣamucchoṣayati vā, pārśve cātirujati, aṃsāvavamṛdgāti, kaṇṭhamuraścāvadhamati, śiraścopahanti, kāsaṃ śvāsaṃ jvaraṃ svarabhedaṃ pratiśyāyaṃ copajanayati; tataḥ sa upaśoṣaśairetairupadravairupadrutaḥ śanaiḥ śanairupaśuṣyati/

tasmāt puruṣo matimānātmanaḥ śārīreṣveva yogakṣemakareṣu prayateta viśeṣeṇa; śarīraṃ hyasya mūlaṃ, śarīramūlaśca puruṣo bhavati//

bhavati cātra---

sarvamanyat parityajya śarīramanupālayet/
tadabhāve hi bhāvānāṃ sarvābhāvaḥ śarīriṇām//

kṣayaḥ śoṣasyāyatanamiti yaduktaṃ tadanuvyākhyāsyāmaḥ---yadā puruṣo+atimātraṃ śokacintāparigatahṛdayo bhavati, īrṣyotkaṇṭhābhayakrodhādibhirvā samāviśyate, kṛśo vā san rūkṣānnapānasevī bhavati, durblaprakṛtiranāhāro+alpāhāro vā bhavati, tadā tasya hṛdayasthāyī rasaḥ kṣayamupaiti; sa tasyopakṣayācchoṣaṃ prāpnoti, apratīkārāccānubadhyate yakṣmaṇā yathopadekṣyamāṇarūpeṇa;

yadā vā puruṣo+atiharṣādatiprasaktabhāvaḥ strīṣvatiprasaṅgamārabhate, tasyātimātraprasaṅgādretaḥ kṣayameti/

kṣayamapi copagacchati retasi yadi manaḥ strībhyo naivāsya nivartate, tasya cātipraṇītasaṅkalpasya maithunamāpadyamānasya na śukraṃ pravartate+atimātropakṣīṇaretastvāt, tathā+asya vāyurvyāyacchamānaśarīrasyaiva dhamanīranupraviśya śoṇitavāhinīstābhyaḥ śoṇitaṃ pracyāvayati, tacchukrakṣayādasya punaḥ śukramārgeṇa śoṇitaṃ pravartate vātānusṛtaliṅgam/

athāsya śukrakṣayācchoṇitapravartanācca sandhayaḥ śithilībhavanti, raukṣyamupajāyate, bhūyaḥ śarīraṃ &daurbalyamāviśati, vāyuḥ prakopamāpadyate; sa prakupito &vaśikaṃ śarīramanusarpannudīrya śleṣmapitte pariśoṣayati māṃsaśoṇite, pracyāvayati śleṣmapitte, saṃrujati pārśve, &avamṛdgātyaṃsau, kaṇṭhamuddhvaṃsati, śiraḥ śleṣmāṇamupatkleśya pratipūrayati śleṣmaṇā, sandhīṃśca prapīḍayan karotyaṅgamardamarocakāvipākau ca, pittaśleṣmotkleśāt pratilomagatvācca vāyurjvaraṃ kāsaṃ śvāsaṃ svarabhedaṃ pratiśyāyaṃ copajanayati; sa kāsaprasaṅgādurasi kṣate śoṇitaṃ ṣṭhīvati, śoṇitagamanāccāsya daurbalyamupajāyate, tataḥ sa upaśoṣaṇairetairupadravairupadrutaḥ śanaiḥ śanairupaśuṣyati/

tasmāt puruṣo matimānātmanaḥ śarīramanurakṣañchukramanurakṣet/

parā hyeṣā phalanirvṛttirāhārasyeti//

bhavati cātra---

śāhārasya paraṃ dhāma śukraṃ tadrakṣyamātmanaḥ/
&kṣayo hyasya bahūn rogānmaraṇaṃ vā niyacchati//

viṣamāśanaṃ śoṣasyāyatanamiti yaduktaṃ, tadanuvyākhyāsyāmaḥ---yadā puruṣaḥ pānāśanabhakṣyalehyopayogān prakṛtikaraṇasaṃyogarāśideśakālopayogasaṃsthopaśayaviṣamānāsevate, tadā tasya tebhyo vātapittaśleṣmāṇo vaiṣamyamāpadyante; te viṣamāḥ śarīramanusṛtya yadā &srotasāmayanamukhāni prativāryāvatiṣṭhante tadā janturyadyadāhārajātamāharati tattadasya mūtrapurīṣamevopajāyate bhūyiṣṭhaṃ nānyastathā śarīradhātuḥ; sa purīṣopaṣṭambhādvartayati, tasmācchuṣyato viśeṣaṇa purīṣamanurakṣyaṃ tathā+anyeṣāmatikṛśadurbalānāṃ; tasyānāpyāyamānasya viṣamāśanopacitā doṣāḥ pṛthak pṛthagupadravaiyuñjanto bhūyaḥ śarīramupaśoṣayanti/

tatra vātaḥ śūlamaṅgamardaṃ kaṇṭhoddhvaṃsanaṃ pārśvasaṃrujanamaṃsāvamardaṃ svarabhedaṃ pratiśyāyaṃ copajanayati; pittaṃ jvaramatīsāramantardāhaṃ ca; śleṣmā tu pratiśyāyaṃ śiraso gurutvamarocakaṃ kāsaṃ ca, sa kāsaprasaṅgādurasi kṣate śoṇitaṃ niṣṭhīvati, śoṇitagamanāccāsya daurbalyamupajāyate/

evamete viṣamāśanopacitāstrayo doṣā rājayakṣmāṇamabhivirvartayanti/

sa tairupaśoṣaṇairupadravairupadrutaḥ śanaiḥ śanaiḥ śuṣyati/

tasmāt puruṣo matimām prakṛtikaraṇasaṃyogarāśideśakālopayogasaṃsthopaśayādaviṣamamāhāramāharet//

bhavati cātra---

hitāśī syānmitāśī syātkālabhojī jitendriyaḥ/
paśyan rogān bahūn kaṣṭān buddhimān viṣamāśanāt//

etaiścaturbhiḥ śoṣasyāyatanairupasevitairvātapittaśleṣmāṇaḥ prakopamāpadyate/

te prakupitā nānāvidhairupadravaiḥ śarīramupaśoṣayanti/

taṃ sarvarogāṇāṃ kaṣṭatamatvādrājayakṣmāṇamācakṣate bhiṣajaḥ; yasmādvā pūrvamāsīdbhagavataḥ somasyoḍurājasya tasmādrājayakṣmeti//

tasyemāni pūrvarūpāṇi bhavanti; tadyathā---pratiśyāyaḥ, kṣavathurabhīkṣṇaṃ, śleṣmaprasekaḥ, mukhamādhuryam, anannābhilāṣaḥ, annakāle cāyāsaḥ, doṣadarśanamadoṣeṣvalpadoṣeṣu vā bhāveṣu pātrodakānnasūpāpūpopadaṃśapariveśakeṣu, bhuktavataścāsya hṛllāsaḥ, tathollekhanamapyāhārasyāntarāntarā, mukhasya pādayośca &śophaḥ, pāṇyoścāvekṣaṇamatyartham, akṣṇoḥ śvetāvabhāsatā cātimātraṃ, bāhvośca pramāṇajijñāsā, strīkāmatā, nirghṛṇitvaṃ, bībhatsadarśanatā cāsya kāye, svapne cābhīkṣṇaṃ darśanamanudakānāmudakasthānānāṃ śūnyānāṃ ca grāmanagaranigamajanapadānāṃ śuṣkadagdhabhagnānāṃ ca vanānāṃ kṛkalāsamayūravānaraśukasarpakākolūkādibhiḥ saṃsparśanamadhirohaṇaṃ yānaṃ vā &śvoṣṭrakharavarāhaiḥ keśāsthibhasmatuṣāṅgārarāśīnāṃ cādhirohaṇamiti (&śoṣapūrvarūpāṇi bhavanti)//

ata ūrdhvamekādaśarūpāṇi tasya bhavanti; tadyathā---śirasaḥ paripūrṇatvaṃ, kāsaḥ, śvāsaḥ, svarabhedaḥ, śleṣmaṇaśchardanaṃ, śoṇitaṣṭhīvanaṃ, pārśvasaṃrojanam, aṃsāvamardaḥ, jvaraḥ, atīsāraḥ, arocakaśceti//

&tatrāparikṣīṇabalamāṃsaśoṇito balavānajātāriṣṭaḥ sarvairapi śoṣaliṅgairupadrutaḥ sādhyo jñeyaḥ/

balavānupacito hi sahatvādvyādhyauṣadhabalasya kāmaṃ subahuliṅgo+apyalpaliṅga eva mantavyaḥ//

durbalaṃ tvatikṣīṇabalamāṃsaśoṇitamalpaliṅgamajātāriṣṭamapi bahuliṅgaṃ jātāriṣṭaṃ ca vidyāt, asahatvāhvyādhyauṣadhabalasya; taṃ parivarjayet, kṣaṇenaiva hi prādurbhavantyariṣṭāni, animittaścāriṣṭaprādurbhāva iti//

tatra ślokaḥ---

samutthānaṃ ca liṅgaṃ ca yaḥ śoṣasyāvabudhyate/
pūrvarūpaṃ ca tattvena sa rājñaḥ kartumarhati//

ityagniveśakṛte tantre carakapratisaṃskṛte nidānasthāne śoṣanidānaṃ nāma ṣaṣṭho+adhyāyaḥ//6//

2.7. aṣṭamo+adhyāyaḥ/

athāto+apasmāranidānaṃ vyākhyāsyāmaḥ//

iti ha smāha bhagavānātreyaḥ//

iha khalu catvāro+apasmārā bhavanti vātapittakaphasannipātanimittāḥ//

ta evaṃvidhānāṃ prāṇabhṛtāṃ kṣipramabhinirvartante; tadyatā---rajastamobhyāmupahatacetasāmudbhrāntaviṣamabahudoṣāṇāṃ samalavikṛtopahitānyaśucīnyabhyavahārajātāni vaiṣamyayuktenopayogavidhinopayuñjānānāṃ tantraprayogamapi ca viṣamamācaratāmanyāśca śarīraceṣṭā viṣamāḥ samācaratām-&atyupakṣayādvā doṣāḥ prakupitārajastamobhyāmupahatacetasāmantarātmanaḥ śreṣṭhatamamāyatanaṃ &hṛdayamupasṛtyopari tiṣṭhante, tathendriyāyatanāni ca/

tatra cāvasthitāḥ santo yadā hṛdayamindriyāyatanāni ceritāḥ kāmakrodhabhayalobhamohaharṣaśokacintodvegādibhiḥ sahasā+abhipūrayanti, tadā janturapasmarati//

apasmāraṃ punaḥ smṛtibuddhisattvasaṃplavādbībhatsaceṣṭamāvasthikaṃ tamaḥpraveśamācakṣate//

tasyemāni pūrvarūpāṇi bhavanti; tadyathā---bhrūvyudāsaḥ satatamakṣṇorvaikṛtamaśabdaśravaṇaṃ lālāsiṅghāṇaprasravaṇamanannābhilaṣaṇamarocakāvipākau hṛdayagrahaḥ kukṣerāṭopo daurbalyamasthibhedo+aṅgamardo mohastamaso darśanaṃ mūrcchā bhramaścābhīkṣṇaṃ svapne ca madanartanavyadhanavyathanavepanapatanādīnīti//

tato+anantaramapasmārābhinirvṛttireva//

tatredamapasmāraviśeṣavijñānaṃ bhavati; tadyathā---abhīkṣṇamapasmarantaṃ, &kṣaṇena saṃjñāṃ pratilabhamānam, utpiṇḍitākṣam, asāmnā vilapantam, udvamantaṃ phenam, atīvādhmātagrīvam, āviddhaśiraskaṃ, viṣamavinatāṅgulim, anavasthitapāṇipādam, aruṇaparuṣaśyāvanakhanayanavadanatvacam, anavasthitacapalaparuṣarūkṣarūpadarśinaṃ, vātalānupaśayaṃ, viparītopaśayaṃ ca &vātenāpasmarantaṃ vidyāt//

abhīkṣṇamapasmarantaṃ, &kṣaṇena saṃjñāṃ pratilabhamānam, avakūjantam, āsphālayantaṃ bhūmiṃ, haritahāridratāmranakhanayanavadanatvacaṃ, rudhirokṣitograbhairavādīptaruṣitarūpadarśinaṃ, pittalānupaśayaṃ, viparītopaśayaṃ ca pittenāpasmarantaṃ vidyāt//

cirādapasmarantaṃ, cirācca saṃjñāṃ pratilabhamānaṃ, patantam, anativikṛtaceṣṭaṃ, lālāmudvamantaṃ, śuklanakhanayanavadanatvacaṃ, śuklagurusnigdharūpadarśinaṃ, śleṣmalānupaśayaṃ, viparītopaśayaṃ ca śleṣmaṇā+apasmarantaṃ vidyāt//

samavetasarvaliṅgamapasmāraṃ sānnipātikaṃ vidyāt, tamasādhyamācakṣate//CS.2.8.8/ iti catvāro+apasmārā vyākhyātāḥ//

teṣāmāganturanubandho bhavatyeva kadācit, tamuttarakālabhupadekṣyāmaḥ/tasya viśeṣavijñānaṃ yathoktaliṅgairliṅgādhikyamadoṣaliṅgānurūpaṃ ca kiñcit//

hitānyapasmāribhyastīkṣṇāni saṃśodhanānyupaśamanāni ca yathāsvaṃ, mantrādīni cāgantusaṃyoge//

tasmin hi dakṣādhvaradhvaṃse dehināṃ nānādikṣu vidravatāmabhidraṛvaṇataraṇadhāvanaplavanalaṅghanādyairdehavikṣobhaṇaiḥ purā gulmotpattirabhūt, haviṣprāśāt pramehakuṣṭhānāṃ, bhayatrāsaśokairunmādānāṃ, vividhabhūtāśucisaṃsparśādapasmārāṇāṃ, jvarastu khalu &maheśvaralalāṭaprabhavaḥ, tatsaṃtāpādraktapittam, ativyavāyāt punarnakṣatrarājasya rājayakṣmeti//

bhavanti cātra---

apasmāro hi vātena pittena ca kaphena ca/
caturthaḥ sannipātena pratyākhyeyastathāvidhaḥ//
sādhyāṃstu bhiṣajaḥ prājñāḥ sādhyanti samāhitāḥ/
tīkṣṇaiḥ saṃśodhanaiścaiva yathāsvaṃ śamanairapi//
yadā doṣanimittasya bhavatyāganturanvayaḥ/
tadā sādhāraṇaṃ karma pravadanti bhiṣagvidaḥ//
sarvarogaviśeṣajñaḥ sarvauṣadhaviśāradaḥ/
bhiṣak sarvāmayān hanti na ca mohaṃ &nigacchati//
ityetadakhilenoktaṃ nidānasthānamuttamam/
nidānārthakaro rogo rogasyāpyupalabhyate//
tadyathā---jvarasaṃtāpādraktapittamudīryate/
raktapittājjvarastābhyāṃ &śoṣaścāpyupajāyate//
plīhābhivṛddhyā jaṭharaṃ jaṭharācchotha eva ca/
arśobhyo jaṭharaṃ duḥkhaṃ gulmaścāpyupajāyate//
pratiśyāyādbhavet kāsaḥ kāsāt saṃjāyate kṣayaḥ/
kṣayo rogasya hetutve śoṣasyāpyupalabhyate//
te pūrvaṃ kevalā rogāḥ paścāddhetvarthakāriṇaṃ/
ubhayārthakarā &dṛṣṭāstathaivaikārthakāriṇaḥ//
kaściddhi rogo rogasya heturbhūtvā praśāmyati/
na praśāmyati cāpyanyo &hetvarthaṃ kurute+api ca//
evaṃ kṛcchratamā nYṇāṃ dṛśyante vyādhisaṅkarāḥ/
prayogāpariśuddhatvāttathā cānyonyasaṃbhavāt//
prayogaḥ śamayedvyādhiṃ yo+ayamanyamudīrayet/
nāsau viśuddhaḥ, śuddhastu śamayedyo na kopayet//
eko heturanekasya tathaikasyaika eva hi/
vyādherekasya cāneko bahūnāṃ bahavo+api ca//
jvarabhramapralāpādyā dṛśyante rūkṣahetujāḥ/
rūkṣeṇaikena cāpyeko jvara evopajāyate//
hetubhirbahubhiścaiko jvaro rūkṣādibhirbhavet/
rūkṣādibhirjvarādyāśca vyādhayaḥ saṃbhavanti hi//
liṅgaṃ caikamanekasya &tathaivaikasya lakṣyate/
bahūnyekasya ca vyādherbahūnāṃ &syurbahūni ca//
viṣamārambhamūlānāṃ liṅgamekaṃ jvaro mataḥ/
jvarasyaikasya cāpyekaḥ saṃtāpo liṅgamucyate//
viṣamārambhamūlaiśca jvara eko nirucyate/
liṅgairetairjvaraśvāsahikkādyāḥ santi cāmayāḥ//
ekā śāntiranekasya &tathaivaikasya lakṣyate/
vyādherekasya cānekā bahūnāṃ bahvya eva ca//
śāntirāmāśayotthānāṃ vyādhīnāṃ laṅghanakriyā/
jvarasyaikasya cāpyekā śāntirlaṅghanamucyate//
tathā laghvaśanādyāśca jvarasyaikasya śāntayaḥ/
etāścaiva jvaraśvāsahikkādīnāṃ praśāntayaḥ//
sukhasādhyaḥ sukhopāyaḥ kālenālpena sādhyate/
sādhyate kṛcchrasādhyastu yatnena mahatā cirāt//
yāti nāśeṣatāṃ vyādhirasādhyo yāpyasaṃjñītaḥ/
paro+asādhyaḥ kriyāḥ sarvāḥ pratyākhyeyo+ativartate//
nāsādhyaḥ sādhyatāṃ yāti sādhyo yāti tvasādhyatām/
pādāpacārāddaivādvā yānti bhāvāntaraṃ gadāḥ//
vṛddhisthānakṣayāvasthāṃ &rogāṇāmupalakṣayet/
susūkṣmāmapi ca prājño dehāgnibalacetasām//
vyādhyavasthāviśeṣān hi jñātvā jñātvā vicakṣaṇaḥ/
tasyāṃ tasyāmavasthāyāṃ &catuḥśreyaḥ prapadyate//
prāyastiryaggatā doṣāḥ kleśayantyāturāṃściram/
&teṣu na tvarayā kuryāddehāgnibalavit kriyām//
prayogaiḥ kṣapayedvā tān sukhaṃ vā koṣṭhamānayet/
jñātvā koṣṭhaprapannāṃstān &yathāsannaṃ haredbudhaḥ//
jñānārthaṃ yāni coktāni vyādhiliṅgāni saṃgrahe/
vyādhayaste tadātve tu liṅgānīṣṭāni nāmayāḥ//
vikāraḥ prakṛtiścaiva dvayaṃ sarvaṃ samāsataḥ/
taddhetuvaśagaṃ hetorabhāvānnānuvartate//

tatra ślokāḥ---

hetavaḥ pūrvarūpāṇi rūpāṇyupaśayastathā/
saṃprāptiḥ pūrvamutpattiḥ sūtramātraṃ cikitsitāt//
jvarādīnāṃ vikārāṇāmaṣṭānāṃ sādhyatā na ca/
pṛthagekaikaśaścoktā hetuliṅgopaśāntayaḥ//
hetuparyāyanāmāni vyādhīnāṃ lakṣaṇasya ca/
nidānasthānametāvat saṃgraheṇopadiśyate//

ityagniveśakṛte tantre carakapratisaṃskṛte nidānasthāne apasmāranidānaṃ nāmāṣṭamo+adhyāyaḥ/

nidānasthānaṃ samāptam/

3. vimānasthānam/

3.1. prathamo+adhyāyaḥ/

athāto rasavimānaṃ vyākhyāsyāmaḥ//

iti ha smāha bhagavānātreyaḥ//

iha khalu vyādhīnāṃ nimittapūrvarūparūpopaśayasaṃkhyāprādhānyavidhivikalpabalakālaviśeṣānanupraviśyānantaraṃ& &doṣabheṣajadeśakālabalaśarīrasārāhārasātmyasattvaprakṛtivayasāṃ mānamabahitamanasā yathāvajjñeyaṃ bhavati bhiṣajā, &doṣādimānajñānāyattatvāt kriyāyāḥ/

na hyamānajño &doṣādīnāṃ bhiṣag vyādhinigrahasamartho bhavati/

tasmāddoṣādimānajñānārthaṃ& vimānasthānamupadekṣyāmo+agniveśa//

tatrādau rasadravyadoṣavikāraprabhāvān vakṣyāmaḥ/

rasāstāvat ṣaṭ --- madhurāmlalavaṇakaṭutiktakaṣāyāḥ/

te samyagupayujyamānāḥ śarīraṃ yāpayanti, mithyopayujyamānāstu khalu doṣaprakopāyopakalpante//

doṣāḥ punastrayo vātapittaśleṣmāṇaḥ/

te prakṛtibhūtāḥ śarīropakārakā& bhavanti, vikṛtimāpannāstu khalu nānāvidhairvikāraiḥ śarīramupatāpayanti//

tatra doṣamekaikaṃ trayastrayo rasā janayanti, trayastrayaścopaśamayanti/

tadyathā --- kaṭutiktakaṣāyā vātaṃ janayanti, madhurāmlalavaṇāstvenaṃ śamayanti; kaṭvamlalavaṇāḥ pittaṃ janayanti, madhuratiktakaṣāyāstvenacchamayanti; madhurāmlalavaṇāḥ śleṣmāṇaṃ janayanti, kaṭutiktakaṣāyāstvenaṃ śamayanti//

rasadoṣasannipāte tu ye rasā yairdoṣaiḥ samānaguṇāḥ samānaguṇabhūyiṣṭhā vā bhavanti te tānabhivardhayanti, viparītaguṇā viparītaguṇabhūyiṣṭhā vā śamayantyabhyasyamānā iti/

etadvyavasthāhetoḥ ṣaṭtvamupadiśyate rasānāṃ paraspareṇāsaṃsṛṣṭānāṃ, tritvaṃ ca doṣāṇām//

saṃsargavikalpavistaro hyeṣāmaparisaṃkhyeyo bhavati, vikalpabhedāparisaṃkhyeyatvāt//

tatra khalvanekaraseṣu& dravyeṣvanekadoṣātmakeṣu ca vikāreṣu rasadoṣaprabhāvamekaikaśyenābhisamīkṣya tato dravyavikārayoḥ prabhāvatattvaṃ vyavasyet//

na tvevaṃ khalu sarvatra/

na hi vikṛtiviṣamasamavetānāṃ nānātmakānāṃ paraspareṇa &copahatānāmanyaiśca vikalpanairvikalpitānāmavayavaprabhāvānumānenaiva samudāyaprabhāvatattvamadhyavasātuṃ śakyam//

tathāyukte hi samudaye samudāyaprabhāvatattvamevamevopalabhya tato dravyavikāraprabhāvatattvaṃ vyavasyet//

tasmādrasaprabhāvataśca dravyaprabhāvataśca doṣaprabhāvataśca vikāraprabhāvataśca tattvamupadekṣyāmaḥ//

tatraiṣa rasaprabhāva upadiṣṭo bhavati/ dravyaprabhāvaṃ punarupadekṣyāmaḥ/

tailasarpirmadhūni vātapittaśleṣmapraśamanārthāni& dravyāṇi bhavanti//

tatra tailaṃ snehauṣṇyagauravopapannatvādvātaṃ jayati& satatamabhyasyamānaṃ; vāto hi raukṣyaśaityalāghavopapanno viruddhaguṇo bhavati, viruddhaguṇasannipāte hi bhūyasā+alpamavajīyate, tasmāttailaṃ vātaṃ jayati satatamabhyasyamānam/ sarpiḥ khalvevameva pittaṃ jayati, mādhuryācchaityānmandatvācca&; pittaṃ hyamadhuramuṣṇaṃ tīkṣṇaṃ ca/

madhu ca śleṣmāṇaṃ jayati, raukṣyāttaikṣṇyāt kaṣāyatvācca; śleṣmā hi snigdho mando madhuraśca&/

yaccānyadapi kiñciddravyamevaṃ vātapittakaphebhyo guṇato viparītaṃ syāttaccaitāñjayatyabhyasyamānam//

atha khalu trīṇi dravyāṇi nātyupayuñjītādhikamanyebhyo dravyebhyaḥ; tadyathā --- pippalī, kṣāraḥ, lavaṇamiti//

pippalyo hi kaṭukāḥ satyo madhuravipākā gurvyo nātyarthaṃ snigdhoṣṇāḥ prakledinyo bheṣajābhimatāśca tāḥ& sadyaḥ; śubhāśubhakāriṇyo bhavanti; āpātabhadrāḥ, prayogasamasādguṇyāt; doṣasañcayānubandhāḥ; --- satatamupayujyamānā hi guruprakleditvācchleṣmāṇamutkleśayanti, auṣṇyāt pittaṃ, na ca vātapraśamanāyopakalpante+alpasnehoṣṇabhāvāt; yogavāhinyastu khalu bhavanti; tasmāt pippalīrnātyupayuñjīta//

kṣāraḥ punarauṣṇyataikṣṇyalāghavopapannaḥ kledayatyādau paścādviśoṣayati&, sa pacanadahanabhedanārthamupayujyate; so+atiprayujyamānaḥ keśākṣihṛdayapuṃstvopaghātakaraḥ saṃpadyate/

ye hyenaṃ grāmanagaranigamajanapadāḥ satatamupayuñjate ta āndhyaṣāṇḍhyakhālityapālityabhājo hṛdayāpakartinaśca bhavanti, tadyathā --- prācyāścīnāśca; tasmāt kṣāraṃ nātyupayuñjīta//

lavaṇaṃ punarauṣṇyataikṣṇyopapannam, anatiguru, anatisnigdham, upakledi, visraṃsanasamartham, annadravyarucikaram, āpātabhadraṃ prayogasamasādguṇyāt, doṣasaṃcayānubandhaṃ, tadrocanapācanopakledanavisraṃsanārthamupayujyate/

tadrocanapācanopakledanavisraṃsanārthamupayujyate/

tadatyarthamupayujyamānaṃ glāniśaithilyadaurbalyābhinirvṛttikaraṃ śarīrasya bhavati/

ye hyenadgrāmanagaranigamajanapadāḥ satatamupayuñjate, te bhūyiṣṭhaṃ glāsnavaḥ śithilamāṃsaśoṇitā aparikleśasahāśca bhavanti/

tadyathā --- bāhlīkasaurāṣṭrikasaindhavasauvīrakāḥ; te hi payasā+api saha lavaṇamaśnanti/

ye+apīha bhūmeratyūṣarā deśāsteṣvoṣadhivīrudvanaspativānaspatyā na jāyante+alpatejaso vā bhavanti lavaṇopahatatvāt/

tasmāllavaṇaṃ nātyupayuñjīta/

ye hyatilavaṇasātmyāḥ puruṣāsteṣāmapi khālityapālityāni valayaścākāle bhavanti//

tasmātteṣāṃ tatsātmyataḥ krameṇāpagamanaṃ śreyaḥ/

sātmyamapi hi krameṇopanivartyamānamadoṣamalpadoṣaṃ vā bhavati//

sātmyaṃ nāma tad yadātmanyupaśete; sātmyārtho hyupaśayārthaḥ/

tattrividhaṃ pravarāvaramadhyavibhāgena; saptavidhaṃ tu rasaikaikatvena sarvarasopayogācca/tatra sarvarasaṃ pravaram, avaramekarasaṃ, madhyaṃ tu pravarāvaramadhyastham/

tatrāvaramadhyābhyāṃ sātmyābhyāṃ krameṇaiva pravaramupapādayet sātmyam/

sarvarasamapi ca sātmyamupapannaḥ& prakṛtyādyupayoktraṣṭamāni sarvāṇyāhāravidhiviśeṣāyatanānyabhisamīkṣya hitamevānurudhyeta//

tatra khalvimānyaṣṭāvāhāravidhiviśeṣāyatanāni bhavanti; tadyathā --- prakṛtikaraṇasaṃyogarāśideśakālopayogasaṃsthopayoktraṣṭamāni (bhavanti)//

tatra prakṛtirucyate svabhāvo yaḥ, sa punarāhārauṣadhadravyāṇāṃ svābhāviko gurvādiguṇayogaḥ; tadyathā --- māṣamudgayoḥ, śūkaraiṇayośca//

karaṇaṃ punaḥ svābhāvikānāṃ dravyāṇāmabhisaṃskāraḥ/

saṃskāro hi guṇāntarādhānamucyate/

te guṇāstoyāgnisannikarṣaśaucamanthanadeśakālavāsanabhāvanādibhiḥ& kālaprakarṣabhājanādibhiścādhīyante//

saṃyogaḥ punardvayorbahūnāṃ vā dravyāṇāṃ saṃhatībhāvaḥ, sa viśeṣamārabhate, yaṃ punarnaikaikaśo dravyāṇyārabhante; tadyathā --- madhusarpiṣoḥ, madhumatsyapayasāṃ ca saṃyogaḥ//

rāśistu sarvagrahaparigrahau mātrāmātraphalaviniścayārthaḥ/

tatra sarvasyāhārasya pramāṇagrahaṇamekapiṇḍena sarvagrahaḥ, parigrahaḥ punaḥ pramāṇagrahaṇamekaikaśyenāhāradravyāṇām/

sarvasya hi grahaḥ sarvagrahaḥ, sarvataśca grahaḥ parigraha ucyate//

deśaḥ punaḥ sthānaṃ; sa dravyāṇāmutpattipracārau deśasātmyaṃ cācaṣṭe//

kālo hi nityagaścāvasthikaśca; tatrāvasthikovikāramapekṣate, nityagastu ṛtusātmyāpekṣaḥ//

upayogasaṃsthā tūpayoganiyamaḥ; sa jīrṇalakṣaṇāpekṣaḥ//

upayoktā punaryastamāhāramupayuṅkte, yadāyattamokasātmyam/

ityaṣṭāvāhāravidhiviśeṣāyatanāni vyākhyātāni bhavanti//

eṣāṃ viśeṣāḥ śubhāśubhaphalāḥ parasparopakārakā bhavanti; tān bubhutseta, buddhvā ca hitepsureva syāt; naca mohāt pramādādvā priyamahitamasukhodarkamupasevyamāhārajātamanyadvā kiṃcit//

tatredamāhāravidhividhānamarogāṇāmāturāṇāṃ cāpi keṣāṃcit kāle prakṛtyaiva hitatamaṃ bhuñjānānāṃ bhavati uṣṇaṃ, snigdhaṃ, mātrāvat, jīrṇe vīryāviruddham, iṣṭe deśe, iṣṭasarvopakaraṇaṃ, nātidrutaṃ, nātivilambitam, ajalpan, ahasan, tanmanā bhuñjīta, ātmānamabhisamīkṣya samyak//

tasya sādguṇyamupadekṣyāmaḥ --- uṣṇamaśnīyāt; uṣṇaṃ hi bhujyamānaṃ svadate, bhuktaṃ cāgnimaudaryamudīrayati, kṣipraṃ jarāṃ gacchati, vātamanulomayati, śleṣmāṇaṃ ca parihrāsayati&; tasmāduṣṇamaśnīyāt//

snigdhamaśnīyāt; snigdhaṃ hi bhujyamānaṃ svadate, bhuktaṃ cānudīrṇamagnimudīrayati&, kṣipraṃ jarāṃ gacchati, vātamanulomayati, śarīramupacinoti, dṛḍhīkarotīndriyāṇi, balābhivṛddhimupajanayati, varṇaprasādaṃ cābhinirvartayati; tasmāt snigdhamaśnīyāt//

mātrāvadaśnīyāt; mātrāvaddhi bhuktaṃ vātapittakaphānapīḍayadāyureva vivardhayati kevalaṃ, sukhaṃ gudamanuparyeti, na coṣmāṇamupahanti, avyathaṃ ca paripākameti; tasmānmātrāvadaśnīyāt//

jīrṇe+aśnīyāt; ajīrṇe hi bhuñjānasyābhyavahṛtamāhārajātaṃ pūrvasyāhārasya rasamapariṇatamuttareṇāhārarasenopasṛjat sarvān doṣān prakopayatyāśu, jīrṇe tu bhuñjānasya svasthānastheṣu doṣeṣvagnau codīrṇe jātāyāṃ ca bubhukṣāyāṃ vivṛteṣu ca srotasāṃ mukheṣu viśuddhe codgāre hṛdaye viśuddhe vātānulomye visṛṣṭeṣu ca vātamūtrapurīṣavegeṣvabhyavahṛtamāhārajātaṃ sarvaśarīradhātūnapradūṣayadāyurevābhivardhayati kevalaṃ; tasmājjīrṇe+aśnīyāt//

vīryāviruddhamaśnīyāt; aviruddhavīryamaśnan hi viruddhavīryāhārajairvikārairnopasṛjyate; tasmādvīryāviruddhamaśnīyāt//

iṣṭe deśe iṣṭasarvopakaraṇaṃ cāśnīyāt; iṣṭe hi deśe bhuñjāno nāniṣṭadeśajairmanovighātakarairbhāvairmanovighātaṃ prāpnoti, tathaiveṣṭaiḥ sarvopakaraṇaiḥ; tasmādiṣṭe deśe tatheṣṭasarvopakaraṇaṃ cāśnīyāt//

nātidrutamaśnīyāt; atidrutaṃ hi bhuñjānasyotsnehanamavasādanaṃ bhojanasyāpratiṣṭhānaṃ ca, bhojyadoṣasādgaṇyopalabdhiśca na niyatā; tasmānnātidrutamaśnīyāt//

nātivilambitamaśnīyāt; ativilambitaṃ hi bhuñjāno na tṛptimadhigacchati, bahu bhuṅkte, śītībhavatyāhārajātaṃ, &viṣamaṃ ca pacyate; tasmānnātivilambitamaśnīyāt//

ajalpannahasan tanmanā bhuñjīta; jalpato hasato+anyamanaso vā bhuñjānasya ta eva hi doṣā bhavanti, ya evātidrutamaśnataḥ; tasmādajalpannahasaṃstanmanā bhuñjīta//

ātmānamabhisamīkṣya bhuñjīta samyak; idaṃ mamopaśete idaṃ nopaśeta ityevaṃ viditaṃ hyasyātmana ātmasātmyaṃ bhavati; tasmādātmānamabhisamīkṣya bhuñjīta samyagiti//

bhavati cātra

rasān dravyāṇi doṣāṃśca vikārāṃśca prabhāvataḥ/
veda yo deśakālau ca śarīraṃ ca &sa no bhiṣak//

tatra ślokau

vimānārtho rasadravyadoṣarogāḥ prabhāvataḥ/
dravyāṇi nātisevyāni trividhaṃ sātmyameva ca//
āhārāyatanānyaṣṭau bhojyasādguṇyameva ca/
vimāne rasasaṃkhyāte sarvametat prakāśitam//

ityagniveśakṛte tantre carakapratisaṃskṛte vimānasthāne rasavimānaṃ nāma prathamo+adhyāyaḥ//1//

3.2. dvitīyo+adhyāyaḥ/

athātastrividhakukṣīyaṃ vimānaṃ vyākhyāsyāmaḥ//

iti ha smāha bhagavānātreyaḥ//

trividhaṃ kukṣau sthāpayedavakāśāṃśamāhārasyāhāramupayuñjānaḥ; tadyathā --- ekamavakāśāṃśaṃ mūrtānāmāhāravikārāṇām, ekaṃ dravāṇām, ekaṃ punarvātapittaśleṣmaṇām; etāvatīṃ hyāhāramātrāmupayuñjāno nāmātrāhārajaṃ kiṃcidaśubhaṃ prāpnoti//

na ca kevalaṃ mātrāvattvādevāhārasya kṛtsnamāhāraphalasauṣṭhavamavāptuṃ śakyaṃ, prakṛtyādīnāmaṣṭānāmāhāravidhiviśeṣāyatanānāṃ pravibhaktaphalatvāt//

tatrāyaṃ tāvadāhārarāśimadhikṛtya mātrāmātrāphalaviniścayārthaḥ/

etāvāneva hyāhārarāśividhivikalpo yāvanmātrāvattvamamātrāvattvaṃ ca//

tatra mātrāvattvaṃ pūrvamuddiṣṭaṃ kukṣyaṃśavibhāgena, tadbhūyo vistareṇānuvyākhyāsyāmaḥ/

tadyathā --- kukṣeraprapīḍanamāhāreṇa, hṛdayasyānavarodhaḥ, pārśvayoravipāṭanam, anatigauravamudarasya, prīṇanamindriyāṇāṃ, kṣutpipāsoparamaḥ, sthānāsanaśayanagamanocchvāsapraśvāsahāsyasaṃkathāsu sukhānuvṛttiḥ, sāyaṃ prātaśca sukhena pariṇamanaṃ&, balavarṇopacayakaratvaṃ ca; iti mātrāvato lakṣaṇamāhārasya bhavati//

amātrāvattvaṃ punardvividhamācakṣate --- hīnam, adhikaṃ ca/

tatra hīnamātramāhārarāśiṃ balavarṇopacayakṣayakaramatṛptikaramudāvartakaramanāyuṣyavṛṣyamanaujasyaṃ śarīramanobuddhīndriyopaghātakaraṃ sāravidhamanamalakṣmyāvahamaśīteśca vātavikāraṇāmāyatanamācakṣate, atimātraṃ punaḥ sarvadoṣaprakopaṇamicchanti kuśalāḥ/

yo hi mūrtānāmāhārajātānāṃ sauhityaṃ gatvā dravaistṛptimāpadyate bhūyastasyāmāśayagatā vātapittaśleṣmāṇo+abhyavahāreṇatimātreṇātiprapīḍyamānāḥ sarve yugapat prakopamāpadyante, te prakupitāstamevāhārarāśimapariṇatamāviśya kukṣyekadeśamannāśritā& viṣṭambhayantaḥ sahasā vā+apyuttarādharābhyāṃ mārgābhyāṃ pracyāvayantaḥ pṛthak pṛthagmān vikārānabhinirvartayantyatimātrabhoktuḥ/

tatra vātaḥ śūlānāhāṅgamardamukhaśoṣamūrcchābhramāgnivaiṣamyapārśvapṛṣṭhakaṭigrahasirākuñcanastambhanāni karoti, pittaṃ punarjvarātīsārāntardāhatṛṣṇāmadabhramapralapanāni, śleṣmā tu chardyarocakāvipākaśītajvarālasyagātragauravāṇi//

na ca khalu kevalamatimātramevāhārarāśimāmapradoṣakaramicchanti&, api tu khalu gururūkṣaśītaśuṣkadviṣṭaviṣṭambhividāhyaśuciviruddhānāmakāle cānnapānānāmupasevanaṃ, kāmakrodhalobhamoherṣyāhrīśokamānodvegabhayopataptamanasā vā yadannapānamupayujyate, tadapyāmāmeva pradūṣayati//

bhavati cātra

mātrayā+apyabhyavahṛtaṃ pathyaṃ cānnaṃ na jīryati/
cintāśokabhayakrodhaduḥkhaśayyāprajāgaraiḥ//

taṃ dvividhamāmapradoṣamācakṣate bhiṣajaḥ --- visūcikām, alasakaṃ ca//

tatra visūcikāmūrdhvaṃ cādhaśca pravṛttāmadoṣāṃ yathoktarūpāṃ vidyāt//

alasakamupadekṣyāmaḥ --- durbalasyālpāgnerbahuśleṣmaṇo vātamūtrapurīṣavegavidhāriṇaḥ sthiragurubahurūkṣaśītaśuṣkānnasevinastadannapānamanilaprapīḍitaṃ śleṣmaṇā ca vibaddhamārgamatimātrapralīnamalasatvānna bahirmukhībhavati, tataśchardyatīsāravarjyānyāmapradoṣaliṅgānyabhidarśayatyatimātrāṇi/

atimātrapraduṣṭāśca doṣāḥ praduṣṭāmabaddhamārgāstiryaggacchantaḥ kadācideva kevalamasya śarīraṃ daṇḍavat stambhayanti, &tatastaṃ daṇḍālasakamasādhyaṃ bruvate/

viruddhādhyaśanājīrṇāśanaśīlinaḥ punarāmadoṣamāmaviṣamityācakṣate& bhiṣajaḥ, viṣasadṛśaliṅgatvāt; tat paramasādhyam, āśukāritvādviruddhopakramatvācceti//

tatra sādhyamāmaṃ praduṣṭamalasībhūtamullekhayedādau pāyayitvā salavaṇamuṣṇaṃ vāri, tataḥ svedanavartipraṇidhānābhyāmupācaredupavāsayeccainam/

visūcikāyāṃ tu laṅghanamevāgre viriktavaccānupūrvī/

āmapradoṣeṣu tvannakāle jīrṇāhāraṃ punardoṣāvaliptāmāśayaṃ stimitagurukoṣṭhamanannābhilāṣiṇamabhisamīkṣya pāyayeddoṣaśeṣapācanārthamauṣadhamagnisaṃdhukṣaṇārthaṃ ca, natvevājīeṇāśanam; āmapradoṣadurbalo hyagnirna yugapaddoṣamauṣadhamāhārajātaṃ ca śaktaḥ paktum/

api cāmapradoṣāhārauṣadhavibhramo+atibalatvāduparatakāyāgniṃ& sahasaivāturamabalamatipātayet/

āmapradoṣajānāṃ punarivikārāṇāmapatarpaṇenaivoparamo bhavati, sati tvanubandhe kṛtāpatarpaṇānāṃ vyādhīnāṃ nigrahe nimittaviparītamapāsyauṣadhamātaṅkaviparītamevāvacārayedyathāsvam/

sarvavikārāṇāmapi ca nigrahe hetuvyādhiviparītamauṣadhamicchanti kuśalāḥ, tadarthakāri vā/

&vimuktāmapradoṣasya punaḥ paripakvadoṣasya dīpte cāgnāvabhyaṅgāsthāpanānuvāsanaṃ vidhivat snehapānaṃ ca yuktyā prayojyaṃ prasamīkṣya doṣabheṣajadeśakālabalaśarīrāhārasātmyasattvaprakṛtivayasāmavasthāntarāṇi vikārāṃśca samyagiti//

bhavati cātra

āhāravidhyāyatanāni cāṣṭau samyak parīkṣyātmahitaṃ vidadhyāt/
anyaśca yaḥ kaścidihāsti mārgo hitopayogeṣu bhajeta taṃ ca//
aśitaṃ khāditaṃ pītaṃ līḍhaṃ ca kva vipacyate/
etattvāṃ dhīra pṛcchāmastanna ācakṣva buddhiman//
ityagniveśapramukhaiḥ śiṣyaiḥ pṛṣṭaḥ punarvasuḥ/
ācacakṣe tatastebhyo yatrāhāro vipacyate//
nābhistanāntaraṃ jantorāmāśaya iti smṛtaḥ/
aśitaṃ khāditaṃ pītaṃ līḍhaṃ cātra vipacyate//
āmāśayagataḥ pākamāhāraḥ prāpya kevalam/
pakvaḥ sarvāśayaṃ paścāddhamanībhiḥ prapadyate//

tatra ślokaḥ

tasya mātrāvato liṅgaṃ phalaṃ coktaṃ yathāyatham/
amātrasya tathā liṅgaṃ phalaṃ coktaṃ vibhāgaśaḥ//

ityagniveśakṛte tantre carakapratisaṃskṛte vimānasthāne trividhakukṣīyavimānaṃ nāma dvitīyo+adhyāyaḥ//2//

3.3. tṛtīyo+adhyāyaḥ/

athāto janapadoddhvaṃsanīyaṃ vimānaṃ vyākhyāsyāmaḥ//

iti ha smāha bhagavānātreyaḥ//

janapadamaṇḍale pañcālakṣetre dvijātivarādhyuṣite kāmpilyarājadhānyāṃ bhagavān punarvasurātreyo+antevāsigaṇaparivṛtaḥ paścime gharmamāse gaṅgātīre vanavicāramanuvicarañchiṣyamagniveśamabravīt//

dṛśyante hi khalu saumya nakṣatragrahagaṇacandrasūryānilānalānāṃ diśāṃ &cāprakṛtibhūtānāmṛtuvaikārikā bhāvāḥ, acirādito bhūrapi ca na yathāvadrasavīryavipākaprabhāvamoṣadhīnāṃ pratividhāsyati, tadviyogāccātaṅkaprāyatā niyatā/

tasmāt prāguddhvaṃsāt prāk ca bhūmervirasībhāvāduddharadhvaṃ saumya bhaiṣajyāni yāvannopahatarasavīryavipākaprabhāvāṇi bhavanti/

vayaṃ caiṣāṃ rasavīryavipākaprabhāvānupayokṣyāmahe ye cāsmānanukāṅkṣanti, yāṃśca vayamanukāṅkṣāmaḥ/

na hi samyaguddhṛteṣu saumya bhaiṣajyeṣu samyagvihiteṣu samyak cāvacāriteṣu janapadoddhvaṃsakarāṇāṃ vikārāṇāṃ kiṃcit pratīkāragauravaṃ bhavati//

evaṃvādinaṃ bhagavantamātreyamagniveśa uvāca---uddhṛtāni khalu bhagavan! bhaiṣajyāni, samyagvihitāni, *samyagavacāritāni ca; api tu khalu janapadoddhvaṃsanamekenaiva vyādhinā yugapadasamānaprakṛtyāhāradehabalasātmyasattvavayasāṃ manuṣyāṇāṃ kasmādbhavatīti//

tamuvāca bhagavānātreyaḥ---evamasāmānyāvatāmapyebhiragniveśa! prakṛtyādibhirbhāvairmanuṣyāṇāṃ ye+anyebhāvāḥ sāmānyāstadvaiguṇyāt samānakālāḥ samānaliṅgāśca vyādhayo+abhinirvartamānā janapadamuddhvaṃsayanti/

te tu khalvime bhāvāḥ sāmānyā janapadeṣu bhavanti; tadyathā---vāyuḥ, udakaṃ, deśaḥ, kāla iti//

tatra vātamevaṃvidhamanārogyakaraṃ vidyāt; tadyathā---yathartuviṣamamatistimitamaticalamatiparuṣamatiśītamatyuṣṇamatirūkṣamatybhiṣyandinamatibhairavārāvamatipratihataparasparagatimatikuṇḍalinamasātmyagandhabāṣpasikatāpāṃśudhūmopahatamiti;

udakaṃ tu khalvatyarthavikṛtagandhavarṇarasasparśaṃ kledabahulamapakrāntajalacaravihaṅgam-*upakṣīṇajaleśayamaprītikaramapagataguṇaṃ vidyāt;

deśaṃ punaḥ prakṛtivikṛtavarṇagandharasasparśaṃ kledabahulamupasṛṣṭaṃ sarīsṛpavyālamaśakaśalabhamakṣikāmūṣakolūkaśmāśānikaśakunijambūkādibhistṛṇolūpopavanavantaṃ pratānādibahulamapūrvavadavapatitaśuṣkanaṣṭaśasyaṃ dhūmrapavanaṃ pradhmātapatatrigaṇamudbhrāntavyathitavividhamṛgapakṣisaṅghamutsṛṣṭamaṣṭadharmasatyalajjācāraśīlaguṇajanapadaṃ *śaśvatkṣubhitodīrṇasalilāśayaṃ *pratatolkāpātanirghātabhūmikampamatibhayārāvarūpaṃ rūkṣatāmrāruṇasitābhrajālasaṃvṛtārkacandratārakamabhīkṣṇaṃ sasaṃbhramodvegamiva satrāsaruditamiva satamaskamiva guhyakācaritamivākranditaśabdabahulaṃ cāhitaṃ vidyāt;

kālaṃ tu khalu yathartuliṅgādviparītaliṅgamatiliṅgaṃ hīnaliṅgaṃ cāhitaṃ vyavasyet;

imānevaṃdoṣayuktāṃścaturo bhāvāñjanapadoddhvaṃsakarān vadanti kuśalāḥ; ato+anyathābhūtāṃstu hitānācakṣate//

viguṇeṣvapi khalveteṣu janapadoddhvaṃsakareṣu bhāveṣu bheṣajenopapādyamānānāmabhayaṃ bhavati rogebhya iti //

bhavanti cātra---

vaiguṇyamupapannānāṃ deśakālānilāmbhasām/
garīyastvaṃ viśeṣeṇa hetumat saṃpravakṣyate//
vātājjalaṃ jalāddeśaṃ deśāt kālaṃ svabhāvataḥ/
*vidyādduṣparihāryatvādgarīyastaramarthavit//
vāyvādiṣu yathoktānāṃ koṣāṇāṃ tu viśeṣavit/
pratīkārasya saukarye nidyāllāghavalakṣaṇam//
caturṣvapi tu duṣṭeṣu kālānteṣu yadā narāḥ/
bheṣajenopapādyante na bhavantyāturāstadā//
yeṣāṃ na mṛtyusāmānyaṃ sāmānyaṃ na ca karmaṇām/
karma pañcavidhaṃ teṣāṃ bheṣajaṃ paramucyate//
rasāyanānāṃ vidhivaccopayogaḥ praśasyate/
śasyate dehavṛttiśca bheṣajaiḥ pūrṛvamuddhṛtaiḥ//
satyaṃ bhūte dayā dānaṃ balayo devatārcanam/
sadvṛttasyānuvṛttiśca praśamo guptirātmanaḥ//
hitaṃ janapadānāṃ ca śivānāmupasevanam/
sevanaṃ brahmacaryasya tathaiva brahmacāriṇām//
saṃkathā dharmaśāstrāṇāṃ maharṣīṇāṃ jitātmanām/
dhārmikaiḥ sāttvikairnityaṃ sahāsyā vṛddhasaṃmataiḥ//
ityetadbheṣajaṃ proktamāyuṣaḥ paripālanam/
yeṣāmaniyato mṛtyustasmin kāle sudāruṇe//

iti śrutvā janapadoddhvaṃsane kāraṇāni punarapi bhagavantamātreyamagniveśa uvāca---atha khalu bhagavan! kutomūlameṣāṃ vāyvādīnāṃ vaiguṇyamutpadyate? yenopapannā janapadamuddhvaṃsayantīti//

tamuvāca bhagavānātreyaḥ---sarveṣāmapyagniveśa! vāyvādināṃ yadvaiguṇyamutpadyate tasya mūlamadharmaḥ, tanmūlaṃ vā+&asatkarma pūrvakṛtaṃ; tayoryoniḥ prajñāparādha eva/

tadyathā---yadā vaideśa-&nagaranigamajanapadapradhānā dharmamutkramyādharmeṇa prajāṃ vartayanti, tadāśritopāśritāḥ paurajanapadā vyavahāropajīvinaśca tamadharmamabhivardhayanti, tataḥ so+adharmaḥ prasabhaṃ dharmamantardhatte, tataste+antarhitadharmāṇo devatābhirapi tyajyante; teṣāṃ tathā+antarhitadharmaṇāmadharmaṇāmadharmapradhānānāmapakrāntadevatānāmṛtavo vyāpadyante; tena nāpo yathākālaṃ devo varṣati na vā varṣati vikṛtaṃ vā varṣati, vātā na samyagabhivānti, kṣitirvyāpadyate, salilānyupaśuṣyanti, auṣadhayaḥ svabhāvaṃ parihāyāpadyante vikṛtiṃ; tata uddhvaṃsante janapadāḥ &spṛśyābhyavahāryadoṣāt//

tathā śastraprabhavasyāpi janapadoddhvaṃsasyādharma eva heturbhavati/ye+atipravṛddhalobhakrodhamohamānāste durbalānavamatyātmasvajanaparopaghātāya śastreṇa parasparamabhikrāmanti, parān vā+abhikrāmanti, parairvā+abhikrāmyante//

rakṣogaṇādibhirvā vividhairbhūtasaṅghaistamadharmamanyadvā+apyapacārāntaramupalabhyābhihanyante//

tathā+abhiśāpaprabhavasyāpyadharma eva heturbhavati/

ye luptadharmāṇo dharmādapetāste guruvṛddhasiddharṣipūjyānavamatyāhitānyācaranti; tatastāḥ prajā gurvādibhirabhiśaptā bhasmatāmupayānti prāgevānekapuruṣakulavināśāya, *niyatapratyayopalambhādaniyatāścāpare//

prāgapi cādharmādṛte nāśubhotpattiranyato+abhūt/

ādikāle hyaditisutasamaujaso+ativimalavipulaprabhāvāḥ pratyakṣadevadevarṣidharmayajñavidhividhānāḥ śailasārasaṃhatasthiraśarīrāḥ prasannavarṇendriyāḥ pavanasamabalajavaparākramāścārusphico+abhirūpapramāṇākṛtiprasādopacayavantaḥ satyārjavānṛśaṃsyadānadamaniyamatapaupavāsabrahmacaryavrataparā vyapagatabhayarāgadveṣamohalobhakrodhaśokamānaroganidrātandrāśramaklamālasyaparigrahāśca puruṣā babhūvuramitāyuṣaḥ/

teṣām-*udārasattvaguṇakarmaṇāmacintyarasavīryavipākaprabhāvaguṇasamuditāni prādurbabhūvuḥ śasyāni sarvaguṇasamuditatvāt pṛthivyādīnāṃ kṛtayugasyādau/

bhraśyati tu kṛtayuge keṣāṃcidatyādānāt sāṃpannikānāṃ sattvānāṃ śarīragauravamāsīt, śarīragauravācchramaḥ, śramādālasyam, ālasyāt saṃcayaḥ, saṃcayāt parigrahaḥ, parigrahāllobhaḥ prādurāsīt kṛte/

tatastretāyāṃ lobhādabhidrohaḥ, abhidrohānṛtavacanam, anṛtavacanāt kāmakrodhamānadveṣapāruṣyābhighātabhayatāpaśokacintodvegādayaḥ pravṛttāḥ/

tatastretāyāṃ dharmapādo+antardhānamaganat/

tsyāntardhānāt yugavarṣapramāṇasya pādahrāsaḥ, pṛthivyādeśca guṇapādapraṇāśo+abhūt/

tatpraṇāśakṛtaśca śasyānāṃ snehavaimalyarasavīryavipākaprabhāvaguṇapādabhraṃśaḥ/

tatastāni prajāśarīrāśi hīyamānaguṇapādairāhāravihārairayathāpūrvamupaṣṭabhyamānānyagnimārutaparītāni prāgvyādhibhirjvarādibhirākrāntāni/ataḥ prāṇino hrāsamavāpurāyuṣaḥ kramaśa iti//

bhavataścātra---

yuge yuge dharmapadaḥ krameṇānena hīyate/
guṇapādaśca bhūtānāmevaṃ lokaḥ pralīyate//
saṃvatsaraśate pūrṇe yāti saṃvatsaraḥ kṣayam/
dehināmāyuṣaḥ kāle yatra yanmānamiṣyate//

iti vikārāṇāṃ prāgutpattiheturukto bhavati//

evaṃvādinaṃ bhagavantamagniveśa uvāca---kinnu khalu bhagavan! niyatakālapramāṇamāyuḥ sarvaṃ na veti//

taṃ bhagavānuvāca---

ihāgniveśa! bhūtānāmāyuryuktimapekṣate/
daive puruṣakāre ca sthitaṃ hyasya balābalam//
daivamātmakṛtaṃ vidyāt karma yati paurvadaihikam/
smṛtaḥ puruṣakārastu kriyate yadihāparam//
balābalaviśeṣo+asthi tayorapi ca karmaṇoḥ/
dṛṣṭaṃ hi trividhaṃ karma hīnaṃ madhyamamuttamam//
tayorudārayoryuktirdīrghasya ca sukhasya ca/
niyatasyāyuṣo heturviparītasya cetarā//
madhyamā madhyamasyeṣṭā kāraṇaṃ śṛṇu cāparam/
daivaṃ puruṣakāreṇa durbalaṃ hyupahanyate//
daivena cetarat karma viśiṣṭenopahanyate/
dṛṣṭvā yadeke manyante niyataṃ mānamāyuṣaḥ//
karma kiṃcit kvacit kāle vipāke niyataṃ mahat/
kiṃcittvakālaniyataṃ pratyayaiḥ pratibodhyate//

tasmādubhayadṛṣṭatvādekāntagrahaṇamasādhu/

nidarśanamapi cātrodāhariṣyāmaḥ---yadi hi niyatakālapramāṇamāyuḥ sarvaṃ syāt, tadā++āyuṣkāmāṇāṃ namantrauṣadhimaṇimaṅgalabalyupahārahomaniyamaprāyaścittopavāsasvastyayanapraṇipātagamanādyāḥ kriyā iṣṭayaśca prayojyeran; nodbhrāntacaṇḍacapalagogajoṣṭrakharaturagamahiṣādayaḥ pavanādayaśca duṣṭāḥ parihāryāḥ syuḥ, na prapātagiriviṣamadurgāmbuvegāḥ, tathā na pramattonmattodbhrāntacaṇḍacapalamohalobhākulamatayaḥ, nārayaḥ, na pravṛddho+agniḥ, ca vividhaviṣāśrayāḥ sarīsṛporagādayaḥ, na sāhasaṃ, nādeśakālacaryā, na narendraprakopa iti; evamādayo hi bhāvā nābhāvakarāḥ syuḥ, āyuṣaḥ sarvasya niyatakālapramāṇatvāt/

na cānabhyastākālamaraṇabhayanivārakāṇāmakālamaraṇabhayamāgacchet prāṇināṃ, vyarthāścārambhakathāprayogabuddhayaḥ syurmaharṣīṇāṃ rasāyanādhikāre, nāpīndro niyatāyuṣaṃ śatruṃ vajreṇābhihanyāt, nāśvināvārtaṃ *bheṣajenopapādayetāṃ, na maharṣayo yatheṣṭamāyustapasā prāpnuyuḥ, na ca viditaveditavyā maharṣayaḥ sasureśāḥ samyak paśyeyurupadeśeyurācareyurvā/

api ca sarvacakṣuṣāmetat paraṃ yadaindraṃ *cakṣuḥ, idaṃ cāpyasmākaṃ tena pratyakṣaṃ; yathā---puruṣasahasrāṇāmutthāyotthāya^*āhavaṃ kurvatāmakurvatāṃ cātulyāyuṣṭvaṃ, tathā jātamātrāṇāmapratīkārāt pratīkārācca, aviṣaviṣaprāśināṃ cāpyatulyāyuṣṭvameva, na ca tulyo yogakṣema udapānaghaṭānāṃ citraghaṭānāṃ cotsīdatāṃ; tasmāddhitopacāramūlaṃ jīvitam, ato viparyayānmṛtyuḥ/

api ca deśakālātmaguṇaviparītānāṃ karmaṇāmāhāravikārāṇāṃ ca *kramopayogaḥ samyak, tyāgaḥ *sarvasya cātiyogāyogamithyāyogānāṃ, *sarvātiyogasaṃdhāraṇam, asaṃdhāraṇamudīrṇānāṃ ca gatimatāṃ, sāhasānāṃ ca varjanam, ārigyānuvṛtto hetumupalabhāmahe samyagupadiśāmaḥ samyak paśyāmaśceti//

ataḥ paramagniveśa uvāca---evaṃ satyaniyatakālapramāṇāyuṣāṃ bhagavan! kathaṃ kālamṛtyurakālamṛtyurvābhavatīti//

tamuvāca bhagavānātreyaḥ---śrūyatāmagniveśa! yathā yānasamāyukto+akṣaḥ prakṛtyaivākṣaguṇairupetaḥ sa ca sarvaguṇopapanno vāhyamāno yathākālaṃ svapramāṇakṣayādevāvasānaṃ gacchet, tathā++āyuḥ śarīropagataṃ balavatprakṛtyā yathāvadupacaryamāṇaṃ svapramāṇakṣayādevāvasānaṃ gacchati; sa mṛtyuḥ kāle/

yathā ca sa evākṣo+atibhārādhiṣṭhitatvādviṣamapathādapathādakṣacakrabhaṅgādvāgyavāhakadoṣādaṇimokṣādanupāṅgāt paryasanāccāntarā+avasānamāpadyate, tathā++āyurapyayathābalamārambhādayathāgnyabhyavaharaṇādviṣamābhyavaharaṇādviṣamaśarīranyāsādatimaithunādasatsaṃśrayādudīrṇavegavinigrahādvidhāryavegāvidhāraṇādbhūtaviṣavāyvagnyupatāpādabhighātādāhārapratīkāravivarjanāccāntarā+avasānamāpadyate, sa mṛtyurakāle; tathā jvarādīnapyātaṅkānmithyopacaritānakālamṛtyūn paśyāma iti//

athāgniveśaḥ papraccha---kinnu khalu bhagavan! jvaritebhyaḥ pānīyamuṣṇaṃ prayacchanti bhiṣajo bhūyiṣṭhaṃ na tathā śītam, asti ca śītasādhyo+api dhāturjvarakara iti//

tamuvāca bhagavānātreyaḥ---jvaritasya kāyasamutthānadeśakālānabhisamīkṣya pācanārthaṃ pānīyamuṣṇaṃ prayacchanti bhiṣajaḥ/

jvaro hyāmāśayasamutthaḥ, prāyo bheṣajāni cāmāśayasamutthānāṃ vikārāṇāṃ *pācanavamanāpatarpaṇasamarthāni bhavanti; pācanārthaṃ ca pānīyamuṣṇaṃ, tasmādetajjvaritebhyaḥ prayacchanti bhiṣajo bhūyiṣṭham/

taddhi teṣāṃ vātamanulomayati, agniṃ codaryamudīrayati, kṣipraṃ jarāṃ gacchati, śleṣmāṇaṃ pariśoṣayati, svalpamapi ca pītaṃ tṛṣṇāpraśamanāyopakalpate; tathāyuktamapi caitannātyarthotsannapitte jvare sadāhabhramapralāpātisāre vā pradeyam, uṣṇena hi dāhabhramapralāpātisārā bhūyo+abhivardhante, śītena copaśāmyantīti//

bhavati cātra---

śītenoṣṇakṛtān rogāñchamayanti bhiṣagvidaḥ/
ye tu śītakṛtā rogāsteṣāmuṣṇaṃ bhiṣagjitam//

evamitareṣāmapi vyādhīnāṃ vidānaviparītaṃ bheṣajaṃ bhavati; yathā---apatarpaṇanimittānāṃ vyādhīnāṃ nāntareṇa pūraṇamasti śāntiḥ, tathā pūraṇanimittānāṃ vyādhīnāṃ nāntareṇāpatarpaṇam//

apatarpaṇamapi ca trividhaṃ---laṅghanaṃ, laṅghanapācanaṃ, doṣāvasecanaṃ ceti//

tatra laṅghanam-*alpabaladoṣāṇāṃ, laṅghanena hyagnimārutavṛddhyā vātātapaparītamivālpamudakamalpo doṣaḥ praśoṣamāpadyate; *laṅghanapācane tu madhyabaladoṣāṇāṃ, laṅghanapācanābhyāṃ hi sūryasaṃtāpamārutābhyāṃ pāṃśubhasmāvakiraṇairiva cānatibahūdakaṃ madhyabalo doṣaḥ praśoṣamāpadyate; bahudoṣāṇāṃ punardoṣāvasecanameva kāryaṃ, na hyabhinne kedārasetau palvalāpraseko+asti, tadvaddoṣāvasecanam//

doṣāvasecanamanyadvā bheṣajaṃ prāptakālamapyāturasya naivaṃvidhasya kuryāt/

tadyathā---*anapavādapratīkārasyādhanasyāparicārakasya vaidyamāninaścaṇḍasyāsūyakasya tīvrādharmāruceratikṣīṇabalamāṃsaśoṇitasyāsādhyarogopahatasya mumūrṣuliṅgānvitasya ceti/

evaṃvidhaṃ hyāturamupacaran bhiṣak pāpīyasā+ayaśasā yogamṛcchatīti//

bhavati cātra---

tadātve cānubandhe vā yasya syādaśubhaṃ phalam/
karmaṇastanna kartavyametadbuddhimatāṃ matam//
(alpodakadrumo yastu pravātaḥ pracurātapaḥ/
jñeyaḥ sa jāṅgalo deśaḥ svalparogatamo+api ca//
pracurodakavṛkṣo yo nivāto durlabhātapaḥ/
anūpo bahudoṣaśca, samaḥ sādhāraṇo mataḥ//)

tatra ślokāḥ---

pūrvarūpāṇi sāmānyā hetavaḥ sasvalakṣaṇāḥ/
deśoddhvaṃsasya bhaiṣajyaṃ hetūnāṃ mūlameva ca//
prāgvikārasamutpattirāyuṣaśca kṣayakramaḥ/
maraṇaṃ prati bhūtānāṃ kālākālaviniścayaḥ//
yathā cākālamaraṇaṃ yathāyuktaṃ ca bheṣajam/
siddhiṃ yātyauṣadhaṃ yeṣāṃ na kuryādyena hetunā//
tadātreyo+agniveśāya nikhilaṃ sarvamuktavān/
deśoddhvaṃsanimittīye vimāne munisattamaḥ//

ityagniveśakṛte tantre carakapratisaṃskṛte vimānasthāne janapadoddhvaṃsanīyavimānaṃ nāma tṛtīyo+adhyāyaḥ//3//

3.4. caturtho+adhyāyaḥ/

athātastrividharogaviśeṣavijñānīyaṃ vimānaṃ vyākhyāmaḥ//

iti ha smāha bhagavānātreyaḥ//

trividhaṃ khalu rogaviśeṣavijñānaṃ bhavati; tadyathā---āptopadeśaḥ, pratyakṣam, anumānaṃ ceti//

tatrāptopadeśo nāmāptavacanam/

āptā hyavitarkasmṛtivibhāgavido niṣprītyupatāpadarśinaśca/

teṣāmevaṃguṇayogādyadvacanaṃ tat pramāṇam/

apramāṇaṃ punar-*mattonmattamūrkharaktaduṣṭavacanamiti; pratyakṣaṃ tu khalu tadyat svayamindriyair-*manasā copalabhyate/

anumānaṃ khalu tarko yuktyapekṣaḥ//

trividhena khalvanena jñānasamudāyena pūrvaṃ parīkṣya rogaṃ sarvathā *sarvamathottarakālamadhyavasānamadoṣaṃ bhavati, na hi jñānāvayavena kṛtsne jñeye jñānamutpadyate/

trividhe tvasmin jñānasamudaye pūrvamāptopadeśājjñānaṃ, tataḥ pratyakṣānumānābhyāṃ parīkṣopapadyate/

kiṃ gyanupadiṣṭaṃ pūrvaṃ yattat pratyakṣānumānābhyāṃ parīkṣamāṇo vidyāt/tasmāddvividhā parīkṣā jñānavatāṃ pratyakṣam, anumānaṃ ca; trividhā vā sahopadeśena//

tatredamupadiśanti buddhimantaḥ---rogamekaikamevaṃprakopaṇamevaṃyonimevamutthānamevamātmānamevamadhiṣṭhānamevaṃvedanamevaṃsaṃsthānamevaṃśabdasparśarūparasagandhamevamupadravamevaṃvṛddhisthānakṣayasamanvitamevamudarkamevaṃnāmānamevaṃyogaṃ vidyāt; tasminniyaṃ pratīkārārthā pravṛttirathavā nivṛttirityupadeśājjñāyate//

pratyakṣatastu khalu rogatattvaṃ bubhutsuḥ sarvairindriyaiḥ sarvānindriyārthānāturaśarīragatān parīkṣeta, anyatra rasajñānāt; tadyathā---antrakūjanaṃ, sandhisphuṭanamaṅgulīparvaṇāṃ ca, svaraviśeṣāṃśca, ye cānye+api keciccharīropagatāḥ śabdāḥ syu(s)tāñchrotreṇa parīkṣeta; *varṇasaṃsthānapramāṇacchāyāḥ, śarīraprakṛtivikārau, cakṣurvaiṣayikāṇi yāni cānyānyanuktāni tāni cakṣuṣā parīkṣeta; rasaṃ tu khalvāturaśarīragatamindriyavaiṣayikamapyanumānādavagacchet, na hyasya pratyakṣeṇa grahaṇamupapadyate, tasmādāturaparipraśnenaivāturamukharasaṃ vidyāt, yūkāpasarpaṇena tvasya śarīravairasyaṃ, makṣikopasarpaṇena śarīramādhuryaṃ, lohitapittasaṃdehe tu kiṃ dhārilohitaṃ lohitapittaṃ veti śvakākabhakṣaṇāddhārilohitamabhakṣaṇāllohitapittamityanumātavyam, evamanyānapyāturaśarīragatān rasānanumimīta; gandhāṃstu khalu sarvaśarīragatānāturasya prakṛtivaikārikān ghrāṇena parīkṣeta; sparśaṃ ca pāṇinā prakṛtivikṛtiyuktam/

iti pratyakṣato+*anumānādupadeśataśca parīkṣaṇamuktam//

ime tu *khalvanye+apyevameva bhūyo+anumānajñeyā bhavanti bhāvāḥ/

tadyathā---agniṃ jaraṇaśaktyā parīkṣeta, balaṃ vyāyāmaśaktyā, śrotrādīni śabdādyarthagrahaṇena, mano+arthāvyabhicaraṇena, vijñānaṃ vyavasāyena, rajaḥ saṅgena, mohamavijñānena, krodhamabhidroheṇa, śokaṃ dainyena, harṣamāmodena, prītiṃ toṣeṇa, bhayaṃ viṣādena, dharmaviṣādena, *vīryamutthānena, avasthānamavibhrameṇa, śraddhāmabhiprāyeṇa, medhāṃ grahaṇena, saṃjñāṃ nāmagrahaṇena, smṛtiṃ smaraṇena, hriyamapatrapaṇena, śīlamanuśīlanena, dveṣaṃ pratiṣedhena, *upadhimanubandhena, dhṛtimalaulyena, vaśyatāṃ vidheyatayā, vayobhaktisātmyavyādhisamutthānāni kāladeśopaśayavedanāviśeṣeṇa, gūḍhaliṅgaṃ vyādhimupaśayānupaśayābhyāṃ, doṣapramāṇaviśeṣamapacāraviśeṣeṇa, āyuṣaḥ kṣayamariṣṭaiḥ, upasthitaśreyastvaṃ kalyāṇābhiniveśena, amalaṃ sattvamavikāreṇa, grahaṇyāstu mṛdudāruṇatvaṃ svapnadarśanamabhiprāyaṃ *dviṣṭeṣṭasukhaduḥkhāni cāturaparipraśnenaiva vidyāditi//

bhavanti cātra---

āptataścopadeśena pratyakṣakaraṇena ca/ anumānena ca vyādhīn samyagvidyādvicakṣaṇaḥ//
sarvathā sarvamālocya yathāsaṃbhavamarthavit/
athādhyavasyettattve ca kārye ca tadanantaram//
kāryatattvaviśeṣajñaḥ pratipattau na muhyati/
amūḍhaḥ phalamāpnoti yadamohanimittajam//
jñānabuddhipradīpena yo nāviśati *tattvavit/
āturasyāntarātmānaṃ na sa rogāṃścikitsati//

tatra ślokau---

sarvarogaviśeṣāṇāṃ trividhaṃ jñānasaṃgraham/
yathā copadiśantyāptāḥ pratyakṣaṃ gṛhyate yathā//
ye yathā cānumānena jñeyāstāṃścāpyudāradhīḥ/
bhāvāṃstrirogavijñāne vimāne muniruktavān//

ityagniveśakṛte tantre carakapratisaṃskṛte vimānasthāne trividharogaviśeṣavijñānīyaṃ vimānaṃ nāma caturtho+adhyāyaḥ//4//

3.5. pañcamo+adhyāyaḥ/

athātaḥ srotasāṃ vimānaṃ vyākhyāsyāmaḥ//

iti ha smāha bhagavānātreyaḥ//

yāvantaḥ puruṣe mūrtimanto bhāvaviśeṣāstāvanta evāsmin srotasāṃ prakāraviśeṣāḥ/

sarve hi bhāvā puruṣe nāntareṇa srotāṃsyabhinirvartante, kṣayaṃ vā+apyabhigacchanti/

srotāṃsi khalu pariṇāmamāpadyamānānāṃ dhātūnāmabhivāhīni bhavantyayanārthena//

api caike srotasāmeva samudayaṃ puruṣamicchanti, sarvagatarvāt sarvasaratvācca doṣaprakopaṇapraśamanānām/

na tvetadevaṃ, yasya hi srotāṃsi, *yacca vahanti, yaccāvahanti, yatra cāvasthitāni, sarvaṃ tadanyattebhyaḥ/

atibahutvāt khalu kecidaparisaṅkhyeyānyācakṣate srotāṃsi, parisaṅkhyāni punaranye//

(absence?)

teṣāṃ tu khalu srotasāṃ yathāsthūlaṃ katicitprakārānmūlataśca prakopavijñānataścānuvyākhyāsyāmaḥ; ye bhaviṣyantyalamanuktārthajñānāya jñānavatāṃ, vijñānāya cājñānavatām/

tadyathā---prāṇodakānnarasarudhiramāṃsamedosthimajjaśukramūtrapurīṣasvedavahānīti; vātapittaśleṣmaṇāṃ punaḥ sarvaśarīracarāṇāṃ sarvāṇi srotāṃsyayanabhūtāni, tadvadatīndriyāṇāṃ punaḥ sattvādīnāṃ kevalaṃ cetanāvaccharīramayanabhūtamadhiṣṭhānabhūtaṃ ca/

tadetat srotasāṃ prakṛtibhūtatvānna vikārairupasṛjyate śarīram//

tatra prāṇavahānāṃ srotasāṃ hṛdayaṃ mūlaṃ mahāsrotaśca, praduṣṭānāṃ tu khalveṣāmidaṃ viśeṣavijñānaṃ bhavati; tadyathā---atisṛṣṭamatibaddhaṃ kupitamalpālpamabhīkṣṇaṃ vā saśabdaśūlamucchvasantaṃ dṛṣṭvā prāṇavahānyasya srotāṃsi praduṣṭānīti vidyāt/

udakavahānāṃ srotasāṃ tālumūlaṃ kloma ca, praduṣṭānāṃ tu khalveṣāmidaṃ viśeṣavijñānaṃ bhavati; tadyathā---jihvātālvoṣṭhakaṇṭhaklomaśoṣaṃ pipāsāṃ cātipravṛddhāṃ dṛṣṭvodakavahānyasya srotāṃsi praduṣṭānīti vidyāt/

annavahānāṃ srotasāmāmāśayo mūlaṃ vāmaṃ ca pārśvaṃ, praduṣṭānāṃ tu khalveṣāmidaṃ niśeṣavijñānaṃ bhavati; tadyathā---anannābhilaṣaṇamarocakavipākau chardiṃ ca dṛṣṭvā+annavahānyasya srotāṃsi praduṣṭānīti vidyāt/

rasavahānāṃ srotasāṃ hṛdayaṃ mūlaṃ daśa ca dhamanyaḥ/

śoṇitavahānāṃ srotasāṃ yakṛnmūlaṃ plīhā ca/

māṃsavahānāṃ ca srotasāṃ snāyurmūlaṃ tvak ca/

midovahānāṃ srotasāṃ *vṛkkau mūlaṃ vapāvahanaṃ ca/

asthivahānāṃ srotasāṃ medo mūlaṃ jaghanaṃ ca/

majjavahānāṃ srotasāmasthīni mūlaṃ sandhayaśca/

śukravahānāṃ srotasāṃ vṛṣaṇau mūlaṃ śephaśca/

praduṣṭānāṃ tu khalveṣāṃ rasādivahasrotasāṃ vijñānānyuktāni vividhāśitapītīye; yānyeva hi dhātūnāṃ pradoṣavijñānāni tānyeva yathāsvaṃ praduṣṭānāṃ dhātusrotasām/

mūtravahānāṃ srotasāṃ bastirmūlaṃ *vaṅkṣaṇau ca, praduṣṭānāṃ tu khalveṣāmidaṃ viśeṣavijñānaṃ bhavati; tadyathā---atisṛṣṭamatibaddhaṃ prakupitamalpālpamabhīkṣṇaṃ vā bahalaṃ saśūlaṃ mūtrayantaṃ dṛṣṭvā mūtravahānyasya srotāṃsi praduṣṭānīti vidyāt/

purīṣavahānāṃ srotasāṃ pakvāśayo mūlaṃ *sthūlagudaṃ ca, praduṣṭānāṃ tu khalveṣāmidaṃ viśeṣavijñānaṃ bhavati; tadyathā---kṛcchreṇālpālpaṃ saśabdaśūlamatidravamatigrathitamatibahu copaviśantaṃ dṛṣṭvā purīṣavahānyasya srotāṃsi praduṣṭānīti vidyāt/

svedavahānāṃ srotasāṃ medo mūlaṃ lomakūpāśca, praduṣṭānāṃ tu khalveṣāmidaṃ viśeṣavijñānaṃ bhavati; tadyathā---asvedanamatisvedanaṃ pāruṣyamatiślakṣṇatāmaṅgasya paridāhaṃ lomaharśaṃ ca dṛṣṭvā svedavahānyasya srotāṃsi praduṣṭānīti vidyāt//

srotāṃsi,sirāḥ,dhamanyaḥ,rasāyanyaḥ,rasavāhinyaḥ,nāḍyaḥ,panthānaḥ,mārgāḥ,śarīracchidrāṇi,saṃvṛtāsaṃvṛtāni,sthānāni,āśayāḥ,niketāśceti śarīradhātvavakāśānāṃ lakṣyālakṣyāṇāṃ nāmāni bhavanti/

teṣāṃ prakopāt sthānasthāścaiva mārgagāśca śarīradhātavaḥ prakopamāpadyante,itareśāṃ prakopāditarāṇi ca/

srotāṃsi srotāṃsyeva,dhātavaśca dhātūneva pradūṣayanti praduṣṭāḥ/

teṣāṃ sarveṣāmeva vātapittaśleṣmāṇaḥ praduṣṭā dūṣayitāro bhavanti, doṣasvabhāvāditi//

bhavanti cātra---

kṣayāt saṃdhāraṇādraukṣyāhvyāyāmāt kṣudhitasya ca/
prāṇavāhīni duṣyanti srotāṃsyanyaiśca dāruṇaiḥ//
auṣṇyādāmādbhayāt pānādatiśuṣkānnasevanāt/
ambuvāhīni duṣyanti tṛṣṇāyāścātipīḍanāt//
atimātrasya cākāle cāhitasya ca bhojanāt/
annavāhīni duṣyanti vaiguṇyāt pāvakasya ca//
guruśītamatisnigdhamatimātraṃ samaśnatām/
rasavāhīni duṣyanti cintyānāṃ cāticintanāt//
vidāhīnyannapānāni snigdhoṣṇāni dravāṇi ca/
raktavāhīni duṣyanti bhajatāṃ cātapānalau//
abhiṣyandīni bhojyāni sthūlāni ca gurūṇi ca/
māṃsavāhīni duṣyanti bhuktvā ca svapatāṃ divā//
avyāyāmāddivāsvapnānmedyānāṃ cātibhakṣaṇāt/
midovāhīni duṣyanti vāruṇyāścātisevanāt//
vyāyāmādatisaṃkṣobhādasthnāmativighaṭṭanāt/
asthivāhīni duṣyanti vātalānāṃ ca sevanāt//
utpeṣādatyabhiṣyandādabhighātāt prapīḍanāt/
majjavāhīni duṣyanti viruddhānāṃ ca sevanāt//
akālayonigamanānnigrahādatimaithunāt/
śukravāhīni duṣyanti śastrakṣārāgnibhistathā//
mūtritodakabhakṣyastrīsevanānmūtranigrahāt/
mūtravāhīni duṣyanti *kṣīṇasyābhikṣatasya ca//
saṃdhāraṇādatyaśanādajīrṇādhyaśanāttathā/
varcovāhīni duṣyanti durbalāgneḥ kṛśasya ca//
*vyāyāmādatisaṃtāpācchītoṣṇākramasevanāt/
svedavāhīni duṣyanti krodhaśokabhayaistathā//
āhāraśca vihāraśca yaḥ syāddoṣaguṇaiḥ samaḥ/
dhātubhirviguṇaścāpi srotasāṃ sa pradūṣakaḥ//
atipravṛttiḥ saṅgo vā sirāṇāṃ granthayo+api vā/
vimārgagamanaṃ cāpi srotasāṃ duṣṭilakṣaṇam//
svadhātusamavarṇāni vṛttasthūlānyaṇūni ca/
srotāṃsi dīrghāṇyākṛtyā pratānasadṛśāni ca//
prāṇodakānnavāhānāṃ duṣṭānāṃ śvāsikī kriyā/
kāryā tṛṣṇopaśamanī tathaivāmapradoṣikī//
vividhāśitapītīye rasādīnāṃ yadauṣadham/
rasādisrotasāṃ kuryāttadyathāsvamupakramam//
mūtraviṭsvedavāhānāṃ cikitsā mautrakṛcchrikī/
tathā+atisārikī kāryā tathā jvaracikitsikī//

tatra ślokāḥ---

trayodaśānāṃ mūlāni srotasāṃ duṣṭilakṣaṇam/
sāmānyaṃ nāmaparyāyāḥ kopanāni parasparam//
doṣahetuḥ pṛthaktvena bheṣajoddeśa eva ca/
srotovimāne nirdiṣṭastathā cādau viniścayaḥ//
kevalaṃ viditaṃ yasya śarīraṃ sarvabhāvataḥ/
śārīrāḥ sarvarogāśca sa karmasu na muhyati//

ityagniveśakṛte tantre carakapratisaṃskṛte vimānasthāne srotovimānaṃ nāma pañcamo+adhyāyaḥ//5//

3.6. ṣaṣṭho+adhyāyaḥ/

athāto rogānīkaṃ vimānaṃ vyākhyāsyāmaḥ//

iti ha smāha bhagavānātreyaḥ//

dve rogānīke bhavataḥ prabhāvabhedena-sādhyam,asādhyaṃ ca; dve rogānīke balabhedena-mṛdu,dāruṇaṃ ca; dve rogānīke adhiṣṭhānabhedena-mano+adhiṣṭhānaṃ,śarīrādhiṣṭhānaṃ ca; dve rogānīke nimittabhedena-svadhātuvaiṣamyanimittam,āgantunimittaṃ ca; dve rogānīke āśayabhedena-āmāśayasamutthaṃ,pakvāśayasamutthaṃ ceti/

evametat prabhāvalādhiṣṭhānanimittāśayabhedāddvaidhaṃ sadbhedaprakṛtyantareṇa bhidyamānamathavā+api sandhīyamānaṃ syādekatvaṃ bahutvaṃ vā/

ekatvaṃ tāvadekameva rogānīkaṃ,*duḥkhasāmānyāt; bahutvaṃ tu daśa rogānīkāni prabhāvabhedādinā bhavanti; bahutvamapi saṃkhyeyaṃ syādasaṃkhyeyaṃ vā/tatra saṃkhyeyaṃ tāvadyathoktamaṣṭodarīye,aparisaṃkhyeyaṃ punaryathā---mahārogādhyāye rugvarṇasamutthānādīnāmasaṃkhyeyatvāt//

na ca saṃkhyeyāgreṣu bhedaprakṛtyantarīyeṣu vigītirityato doṣavatī syādatra kācit pratijñā, na cāvigītirityataḥ syādadoṣavatī/

bhettā hi bhedyamanyathā bhinatti, anyathā punastādbhinnaṃ bhedaprakṛtyantareṇa bhindan bhedasaṃkhyāviśeṣamāpādayatyanekadhā, na ca pūrvaṃ bhedāgramupahanti/

samānāyāmapi khalu bhedaprakṛtau *prakṛtānuprayogāntaramapekṣyam/

santihyarthāntarāṇi samānaśabdābhihitāni, santi cānarthāntarāṇi paryāyaśabdābhihitāni/

samāno hi rogaśabdo doṣeṣu ca vyādhiṣu ca; doṣā hyapi rogaśabdamātaṅkaśabdaṃ yakṣmaśabdaṃ doṣaprakṛtiśabdaṃ vikāraśabdaṃ ca labhante, vyādhayaśca rogaśabdamātaṅkaśabdaṃ yakṣmaśabdaṃ doṣaprakṛtiśabdaṃ vikāraśabdaṃ ca labhante/

tatra doṣeṣu caiva vyādhiṣu ca rogaśabdaḥ samānaḥ, śeṣeṣu tu viśeṣavān//

tatra vyādhayo+aparisaṃkhyeyā bhavanti, atibahutvāt; doṣāstu khalu parisaṃkhyeyā bhavanti, anatibahutvāt/

tasmādyathācitraṃ vikārānudāharaṇārtham, anavaśeṣeṇa ca doṣān vyākhyāsyāmaḥ/

rajastamaśca mānasau doṣau/

tayorvikārāḥ kāmakrodhalobhamoherṣyāmānamadaśokacitto(nto)dvegabhayaharṣādayaḥ/

vātapittaśleṣmāṇastu khalu śārīrā doṣāḥ/

teṣāmapi ca vikārā jvarātīsāraśophaśoṣaśvāsamehakuṣṭhādayaḥ/

iti doṣāḥ kevalā vyākhyātā vikāraikadeśaśca//

tatra khalveṣāṃ dvayānāmapi doṣāṇāṃ trividhaṃ prakopaṇaṃ; tadyathā---asātmyendriyārthasaṃyogaḥ, prajñāparādhaḥ, pariṇāmaśceti//

prakupitāstu khalu te prakopaṇaviśeṣāddūṣyaviśeṣācca vikāraviśeṣānabhinirvartayantyaparisaṃkhyeyān//

te ca vikārāḥ parasparamanuvartamānāḥ kadācidanubadhnanti kāmādayo jvarādayaśca//

niyatastvanubandho rajastamasoḥ parasparaṃ, na hyarajaskaṃ tamaḥ *pravartate//

(prāyaḥ) śārīradoṣāṇāmekādhiṣṭhānīyānāṃ sannipātaḥ saṃsargo vā samānaguṇatvāt; doṣā hi dūṣaṇaiḥ samānāḥ//

tatrānubandhyānubandhakṛto viśeṣaḥ---svatantre vyaktaliṅgo yathoktasamutthānapraśamo bhavatyanubandhyaḥ, tadviparītalakṣaṇastvanubandhaḥ/

*anubandhyalakṣaṇasamanvitāstatra yadi doṣā bhavanti tattrikaṃ sannipātamācakṣate, dvayaṃ vā saṃsargam/

anubandhyānubandhaviśeṣakṛtastu bahuvidho doṣabhedaḥ/

evameṣa saṃjñāprakṛto bhiṣajāṃ doṣeṣu vyādhiṣu ca *nānāprakṛtiviśeṣavyūhaḥ//

agniṣu tu śārīreṣu caturvidho viśeṣo balabhedena bhavati/

tadyathā---tīkṣṇo, mandaḥ, samo, viṣamaśceti/

tatra tīkṣṇo+agniḥ sarvāpacārasahaḥ, tadviparītalakṣaṇastu mandaḥ, samastu khalvapacārato vikṛtimāpadyate+anapacāratastu prakṛtāvavatiṣṭhate, samalakṣaṇaviparītalakṣaṇastu viṣama iti/

ete caturvidhā bhavantyagnayaścaturvidhānāmeva puruṣāṇām/

tatra samavātapittaśleṣmaṇāṃ prakṛtisthānāṃ samā bhavantyagnayaḥ, vātalānāṃ tu vātābhibhūte+agnyadhiṣṭhāne viṣamā bhavantyagnayaḥ, pittalānāṃ tu pittābhibhūte hyagnyadhiṣṭhāne tīkṣṇā bhavantyagnayaḥ, śleṣmalānāṃ tu śleṣmābhibhūte+agnyadhiṣṭhāne mandā bhavantyagnayaḥ//

tatra kecidāhuḥ---na samavātapittaśleṣmāṇo jantavaḥ santi, viṣamāhāropayogitvānmanuṣyāṇāṃ; tasmācca vātaprakṛtayaḥ kecit, kecit pittaprakṛtayaḥ, kecit punaḥ śleṣmaprakṛtayo bhavantīti/

taccānupapannaṃ, kasmāt kāraṇāt? samavātapittaśleṣmāṇaṃ hyarogamicchanti bhiṣajaḥ, *yataḥ prakṛtiścārogyam, ārogyārthā ca bheṣajapravṛttiḥ, sā ceṣṭarūpā, tasmāt santi samavātapittaśleṣmāṇaḥ; na khalu santi vātaprakṛtayaḥ pittaprakṛtayaḥ śleṣmaprakṛtayo vā/

tasya tasya *kila doṣasyādhikyāt sā sā doṣaprakṛtirucyate manuṣyāṇāṃ, na ca vikṛteṣu doṣeṣu prakṛtisthatvamupapadyate, tasmānnaitāḥ prakṛtayaḥ santi; santi tu khalu vātalāḥ pittalāḥ śleṣmalāśca, aprakṛtisthāstu te jñeyāḥ//

teṣāṃ tu khalu caturvidhānāṃ puruṣāṇāṃ *catvāryanupraṇidhānāni śreyaskarāṇi bhavanti/

tatra samasarvadhātūnāṃ sarvākārasamam, adhikadoṣāṇāṃ tu trayāṇāṃ yathāsvaṃ doṣādhikyamabhisamīkṣya doṣapratikūlayogīni trīṇyanu(nna)praṇidhānāni śreyaskarāṇi bhavanti yāvadagneḥ samībhāvāt, same tu samameva kāryam; evaṃ ceṣṭā bheṣajaprayogāścāpare/

*tān vistareṇānuvyākhyāsyāmaḥ//

trayastu putuṣā bhavantyāturāḥ, te tvanāturāstantrānatarīyāṇāṃ bhiṣajām/

tadyathā---vātalaḥ, pittalaḥ, śleṣmalaśceti/

teṣāmidaṃ viśeṣavijñānaṃ---vātalasya vātanimittāḥ, pittalasya pittanimittāḥ, śleṣmalasya śleṣmanimittā vyādhayaḥ prāyeṇa balavantaśca bhavanti//

tatra vātalasya *vātaprakopaṇānyāsevamānasya kṣipraṃ vātaḥ prakopamāpadyate, na tathetarau doṣau; sa tasya prakopamāpanno yathoktairvikāraiḥ śarīramupatapati balavarṇasukhāyuṣāmupaghātāya/

tasyāvajayanaṃ---snehasvedau vidhiyuktau, mṛdūni ca saṃśodhanāni snehoṣṇamadhurāmlalavaṇayuktāni, tadvadabhyavahāryāṇi, abhyaṅgopanāhanodveṣṭanonmardanapariṣekāvagāhanasaṃvāhanāvapīḍanavitrāsanavismāpanavismāraṇāni, surāsavavidhānaṃ, snehāścānekayonayo dīpanīyapācanīyavātaharavirecanīyopahitāstathā śatapākāḥ sahasrapākāḥ sarvaśaśca prayogārthāḥ, bastayaḥ, bastiniyamaḥ sukhaśīlatā ceti//

pittalasyāpi *pittaprakopaṇānyāsevamānasya kṣipraṃ pittaṃ prakopamāpadyate, na tathetarau doṣau; tadasya prakopamāpannaṃ yathoktairvikāraiḥ śarīramupatapati balavarṇasukhāyuṣāmupaghātāya/

tasyāvajayanaṃ---sarpiṣpānaṃ, sarpiṣā ca snehanam, adhaśca doṣaharaṇaṃ, madhuratiktakaṣāyaśītānāṃ caiṣadhābhyavahāryāṇāmupayogaḥ, mṛdumadhurasurabhiśītahṛdyānāṃ gandhānāṃ copasevā, muktāmaṇihārāvalīnāṃ ca paramaśiśiravārisaṃsthitānāṃ dhāraṇamurasā, kṣaṇe kṣaṇe+agryacandanapriyaṅgukālīyamṛṇālaśītavātavāribhirutpalakumudakokanadasaugandhikapadmānugataiśca vāribhirabhiprokṣaṇaṃ, śrutisukhamṛdumadhuramano+anugānāṃ ca gītavāditrāṇāṃ śravaṇaṃ, śravaṇaṃ cābhyudayānāṃ, suhṛdbhiḥ saṃyogaḥ, saṃyogaśceṣṭābhiḥ strībhiḥ śītopahitāṃśukasragdhāriṇībhiḥ, niśākarāṃśuśītalapravātaharmyavāsaḥ, śailāntarapulinaśiśirasadanavasanavyajanapavanasevanaṃ, ramyāṇāṃ copavanānāṃ sukhaśiśirasurabhimārutopahitānāmupasevanaṃ, sevanaṃ ca padmotpalanalinakumudasaugandhikapuṇḍarīka-*śatapatrahastānāṃ, saumyānāṃ ca sarvabhāvānāmiti//CS.3.6.18/ śleṣmalasyāpi *śleṣmaprakopaṇānyāsevamānasya kṣipraṃ śleṣmā prakopamāpadyate, na tathetarau doṣauḥ; sa tasya prakopamāpanno yathoktairvikāraiḥ śarīramupatapati balavarśasukhāyuṣāmupaghātāya/

tasyāvajayanaṃ---vidhiyuktāni tīkṣṇoṣṇāni saṃśodhanāni, rūkṣaprāyāṇi cābhyavahāryāṇi kaṭukatiktakaṣāyopahitāni, tathaiva dhāvanalaṅghanaplavanaparisaraṇajāgaraṇaniyuddhavyavāyavyāyāmonmardanasnānotsādanāni, viśeṣatastīkṣṇānāṃ dīrghakālasthitānāṃ ca madyānāmupayogaḥ, sadhūmapānaḥ sarvaśaścopavāsaḥ, tathoṣṇaṃ vāsaḥ, sukhapratiṣedhaśca sukhārthameveti//

bhavati cātra---

sarvarogaviśeṣajñaḥ sarvakāryaviśeṣavit/
sarvabheṣajatattvajño rājñaḥ prāṇapatirbhavediti//

tatra ślokāḥ---

prakṛtyantarabhedena rogānīkavikalpanam/
parasparāvirodhaśca sāmānyaṃ rogadoṣayoḥ//
doṣasaṃkhyā vikārāṇāmekadeśaḥ prakopaṇam/
jaraṇaṃ prati cintā ca *kāyāgnerdhukṣaṇāni ca//
narāṇāṃ vātalādīnāṃ prakṛtisthāpanāni ca/
rogānīke vimāne+asmin vyāhṛtāni maharṣiṇā//

ityagniveśakṛte tantre carakapratisaṃskṛte vimānasthāne rogānīkavimānaṃ nāma ṣaṣṭho+adhyāyaḥ//6//

3.7. saptamo+adhyāyaḥ/

athāto vyādhitarūpīyaṃ vimānaṃ vyākhyāsyāmaḥ//

iti ha smāha bhagavānātreyaḥ//

iha khalu dvau puruṣau vyādhitarūpau bhavataḥ---guruvyādhitaḥ, laghuvyādhitaśca/

tatra---guruvyādhita ekaḥ sattvabalaśarīrasaṃpadupetatvāllaghuvyādhita iva dṛśyate, laghuvyādhito+aparaḥ sattvādīnām-*adhamatvādguruvyādhita iva dṛśyate/

tayorakuśalāḥ kevalaṃ cakṣuṣaiva rūpaṃ dṛṣṭvā+adhyavasyanto vyādhigurulāghave vipratipadyante//

nahi jñānāvayavena kṛtsne jñeye vijñānamutpadyate/

vipratipannāstu khalu rogajñāne upakramayuktijñāne cāpi vipratipadyante/

te yadā guruvyādhitaṃ laghuvyādhitarūpamāsādayanti, tadā tamalpadoṣaṃ matvā saṃśodhanakāle+asmai mṛdu saṃśodhanaṃ prayacchanto bhūya evāsya doṣānudīrayanti/

yadā tu laghuvyādhitaṃ guruvyādhitarūpamāsādayanti, tadā taṃ mahādoṣaṃ matvā saṃśodhanakāle+asmai tīkṣṇaṃ saṃśodhanaṃ prayacchanto doṣānatinirhṛtya śarīramasya kṣiṇvanti/

evamavayavena jñānasya kṛtsne jñeye jñānamabhimanyamānāḥ pariskhalanti/

viditaveditavyāstu bhiṣajaḥ sarvaṃ sarvathā yathāsaṃbhavaṃ parīkṣyaṃ parīkṣyādhyavasyanto na kvacidapi vipratipadyante, yatheṣṭamarthamabhinirvartayanti ceti//

bhavanti cātra---

sattvādīnāṃ vikalpena *vyādhirūpamathāture/
dṛṣṭvā vipratipadyante bālā vyādhibalābale//
te bheṣajamayogena kurvantyajñānamohitāḥ/
vyādhitānāṃ vināśāya kleśāya mahate+api vā//
prājñāstu sarvamājñāya parīkṣyamiha sarvathā/
na skhalanti prayogeṣu bheṣajānāṃ kadācana//

iti vyādhitarūpādhikāre vyādhitarūpasaṃkhyāgrasaṃbhavaṃ vyādhitarūpahetuvipratipattau kāraṇaṃ sāpavādaṃ saṃpratipattikāraṇaṃ cānapavādaṃ niśamya, bhagavantamātreyamagniveśo+ataḥ paraṃ sarvakrimīṇāṃ purīṣasaṃśrayāṇāṃ samutthānasthānasaṃsthānavarṇanāmaprabhāvacikitsitaviśeṣān papracchopasaṃgṛhya pādau//

athāsmai provāca bhagavānātreyaḥ---iha khalvagniveśa! viṃśatividhāḥ krimayaḥ pūrvamuddiṣṭā nānāvidhena pravibhāgenānyatra sahajebhyaḥ; te punaḥ prakṛtibhirvibhajyamānāścaturvidhā bhavanti; tadyathā---purīṣajāḥ, śleṣmajāḥ, śoṇitajā, malajāśceti//

tatra malo bāhyaścābhyantaraśca/

tatra bāhyamalajātān malajān *saṃcakṣmahe/

teṣāṃ samutthānaṃ-mṛjāvarjanaṃ; sthānaṃ---keśaśmaśrulomapakṣmavāsāṃsi; saṃsthānam-aṇavastilākṛtayo bahupādāśca; varṇa-kṛṣṇaḥ, śuklaśca; nāmāni-yūkāḥ, pipīlikāśca; prabhāvaḥ-kaṇḍūjananaṃ, koṭhapiḍakābhinirvartanaṃ ca; cikitsitaṃ tu khalveṣāmapakarṣaṇaṃ, malopaghātaḥ, malakarāṇāṃ ca bhāvānāmanupasevanamiti//

śoṇitajānāṃ tu khalu kuṣṭhaiḥ samānaṃ samutthānaṃ; sthānaṃ-raktavāhinyo dhamanyaḥ; saṃsthānam-aṇavo vṛttāścāpādāśca, sūkṣmatvāccaike bhavantyadṛśyāḥ; varṇaḥ-tāmraḥ; nāmāni-keśādā, lomādā, lomadvīpāḥ, saurasā, auḍumbarā, jantumātaraśceti; prabhāvaḥ-keśaśmaśrunakhalomapakṣmāpadhvaṃsaḥ, vraṇagatānāṃ ca harṣakaṇḍūtodasaṃsarpaṇāni, ativṛddhānāṃ ca tvaksirāsnāyumāṃsataruṇāsthibhakṣaṇamiti; cikitsitamapyeṣāṃ kuṣṭhaiḥ samānaṃ, taduttarakālamupadekṣyāmaḥ//

śleṣmajāḥ kṣīraguḍatilamatsyānūpamāṃsapiṣṭānnaparamānnakusumbhasnehājīrṇapūtiklinnasaṃkīrṇaviruddhāsātmyabhojanasamutthānāḥ; teṣāmāmāśayaḥ sthānaṃ, te pravardhamānāstūrdhvamadho vā visarpantyubhayato vā; saṃsthānavarṇaviśeṣāstu---śvetāḥ pṛthubradhvasaṃsthānāḥ kecit, kecidvṛttapariṇāhā gaṇḍūpadākṛtayaḥ śvetāstāmrāvabhāsāśca, kecidaṇavo dīrghastantvākṛtayaḥ śvetāḥ; teṣāṃ trividhānāṃ śleṣmanimittānāṃ krimīṇāṃ nāmāni-antrādāḥ, udarādāḥ, *hṛdayacarāḥ, curavaḥ, darbhapuṣpāḥ, saugandhikāḥ, mahāgudaśceti; prabhāvohṛllāsaḥ, āsyasaṃsravaṇam, arocakāvipākau, jvaraḥ, mūrcchā, jṛmbhā, kṣavathuḥ, ānāhaḥ, aṅgamardaḥ, chardiḥ kārśyaṃ, pāruṣyaṃ, ceti//

purīṣajāstulyasamutthānāḥ śleṣmajaiḥ; teṣāṃ sthānaṃ pakvāśayaḥ, te pravardhamānāstvadho visarpanti, yasya punarāmāśayābhimukhāḥ *syuryadantaraṃ tadantaraṃ tasyodgāraniḥśvāsāḥ purīṣagandhinaḥ syuḥ; saṃsthānavarṇaviśeṣāstu-sūkṣmavṛttaparīṇāhāḥ śvetā *dīrghā ūrṇaṃśusaṃkāśāḥ kecit, kecit punaḥ sthūlavṛttaparīṇāhāḥ śyāvanīlaharitapītāḥ; teṣāṃ nāmāni kakerukāḥ, makerukāḥ, lelihāḥ; saśūlakāḥ, sausurādāśceti; prabhāvaḥ---purīṣabhedaḥ, kārśyaṃ, pāruṣyaṃ, lomaharṣābhinirvartanaṃ ca, ta eva cāsya gudamukhaṃ paritudantaḥ kaṇḍūṃ copajanayanto gudamukhaṃ paryāsate, ta eva jātaharṣā gudaniṣkramaṇamativelaṃ kurvanti; ityeṣa śleṣmajānāṃ purīṣajānāṃ ca krimīṇāṃ samutthānādiviśeṣaḥ//

cikitsitaṃ tu khalveṣāṃ samāsenopadiśya paścādvistareṇopadekṣyāmaḥ/

tatra sarvakrimīṇāmapakarṣaṇamevāditaḥ kāryaṃ, tataḥ prakṛtivighātaḥ, anantaraṃ nidānoktānāṃ bhāvānāmanupasevanamiti//

tatrāpakarṣaṇaṃ-hastenābhigṛhya vimṛśyopakaraṇavatā+apanayanamanupakaraṇena vā; sthānagatānāṃ tu krimīṇaṃ bheṣajenāpakarṣaṇaṃ nyāyataḥ, taccaturvidhaṃ; tadyathā---śirovirecanaṃ, vamanaṃ, virecanam, āsthāpanaṃ ca; ityapakarṣaṇavidhiḥ/

prakṛtivighātastveṣāṃ kaṭutiktakaṣāyakṣāroṣṇānāṃ dravyāṇāmupayogaḥ, yaccānyadapi kiṃcicchleṣmapurīṣapratyanīkabhūtaṃ tat syāt; iti prakṛtivighātaḥ/

anantaraṃ nidānoktānāṃ bhāvānāmanupasevanaṃ---yaduktaṃ nidānavidhau tasya vivirjanaṃ tathāprāyāṇāṃ cāpareṣāṃ dravyāṇām/

iti lakṣaṇataścikitsitamanuvyākhyātam/

etadeva punarvistareṇopadekṣyate//

athainaṃ krimikoṣṭhamāturamagre ṣaḍrātraṃ saptarātraṃ vā snehasvedābhyāmupapādya śvobhūte enaṃ saṃśodhanaṃ pāyayitā+asmīti kṣīraguḍadadhitilamatsyānūpamāṃsapiṣṭānnaparamānnakusumbhasnehasaṃprayuktairbhojyaiḥ sāyaṃ prātaścopapādayet samudīraṇārthaṃ krimīṇāṃ koṣṭhābhisaraṇārthaṃ ca bhiṣak/

atha vyuṣṭāyāṃ rātryāṃ sukhoṣitaṃ suprajīrṇabhaktaṃ ca vijñāyāsthāpanavamanavirecanaistadaharevopapādayedupapādanīyaścet syāt sarvān parīkṣyaviśeṣān parīkṣya samyak//

athāhareti brūyāt---mūlakasarṣapalaśunakarañjaśirtumadhuśigrukharapuṣpābhūstṛṇasumukhasurasakuṣṭherakagaṇḍīrakālamālakaparṇāsakṣavakaphaṇijjhakāni sarvāṇyathavā yathālābhaṃ; tānyāhṛtānyabhisamīkṣya khaṇḍaśaśchedayitvā prakṣālya pānīyena suprakṣālitāyāṃ sthālyāṃ samāvāpya gomūtreṇārdhodakenābhiṣicya sādhayet satatamavaghaṭṭayan darvyā, *tamupayuktabhūyiṣṭhe+ambhasi gataraseṣvauṣadheṣu sthālīmavatārya suparipūtaṃ kaṣāyaṃ sukhoṣṇaṃ madanaphalapippalīviḍaṅgakalkatailopahitaṃ svarjikālavaṇitamabhyāsicya bastau vidhivadāsthāpayedenaṃ; tathā+arkālarkakuṭajāḍhakīkuṣṭhakaiḍaryakaṣāyeṇa vā, tathā śigrupīlukustumburukaṭukāsarṣapakaṣāyeṇa, tathā++āmalakaśṛṅgaveradāruharidrāpicumardakaṣāyeṇa madanaphalādisaṃyogasaṃpāditena, trivāraṃ saptarātraṃ vā++āsthāpayet//

pratyāgate ca paścime bastau pratyāśvastaṃ tadaharevobhayatobhāgaharaṃ saṃśodhanaṃ pāyayedyuktyā; tasya vidhirupadekṣyate---madanaphalapippalīkaṣāyasyārdhāñjalimātreṇa trivṛtkalkākṣamātramāloḍya pātumasmai prayacchet, tadasya doṣamubhayato nirharati sādhu; evameva kalpoktāni vamanavirecanāni pratisaṃsṛjya pāyayedenaṃ buddhyā sarvaviśeṣānavekṣamāṇo bhiṣak//

athainaṃ samyagviriktaṃ vijñāyāparāhṇe śaikharikakaṣāyeṇa sukhoṣṇena pariṣecayet/

tenaiva ca kaṣāyeṇa bāhyābhyantarān sarvodakārthān kārayecchaśvat; tadabhāve kaṭutiktakaṣāyāṇāmauṣadhānāṃ kvāthairmūtrakṣārairvā pariṣecayet/

pariṣiktaṃ cainaṃ nivātamāgāramanupraveśya pippalīpippalīmūlacavyacitrakaśṛṅgaverasiddhena yavāgvādinā krameṇopācaret, vilepīkramāgataṃ cainamanuvāsayedviḍaṅgatailenaikāntaraṃ dvistrirvā//

yadi punarasyātipravṛddhāñchīrṣādān krimīn manyeta śirasyaivābhisarpataḥ kadācit, tataḥ svehasvedābhyāmasya śira upapādya virecayedapāmārgataṇḍulādinā śirovirecanena//

yastvabhyavahāryavidhiḥ prakṛtivighātāyoktaḥ krimīṇāmatha tamanuvyākhyāsyāmaḥ,---*mūlakaparṇīṃ samūlāgrapratānāmāhṛtya khaṇḍaśaśchedayitvolū(dū)khale kṣodayitvā pāṇibhyāṃ pīḍayitvā rasaṃ gṛhṇīyāt, tena rasena lohitaśālitaṇḍulapiṣṭaṃ samāloḍya pūpalikāṃ kṛtvā *vidhūmeṣvaṅgāreṣūpakuḍya viḍaṅgatailalavaṇopahitāṃ krimikoṣṭhāya bhakṣayituṃ prayacchet, anantaraṃ cāmlakāñjikamudaśvidvā pippalyādipañcavarga saṃsṛṣṭaṃ salavaṇamanupāyayet/anena kalpena mārkavārkasahacaranīpanirguṇḍīsumukhasurasakuṭherakagaṇḍīrakālamālakaparṇāsakṣavakaphaṇijjhakabakulakuṭajasuvarṇakṣīrīsvarasānāmanyatamasmin kārayet pūpalikāḥ; tathā kiṇihīkirātatiktakasuvahāmalakaharītakībibhītakasvaraseṣu kārayet pūpalikāḥ; svarasāṃścaiteṣāmekaikaśo dvandvaśaḥ sarvaśo vā madhuvilulitān prātaranannāya pātuṃ prayacchet//

athāśvaśakṛdāhṛtya mahati kiliñjake prastīryātape śoṣayitvodūkhale kṣodayitvā dṛṣadi punaḥ sūkṣmacūrṇāni kārayitvā viḍaṅgakaṣāyeṇa triphalākaṣāyeṇa vā+aṣṭakṛtvo daśakṛtvo *vā++ātape suparibhāvitāni bhāvayitvā dṛṣadi punaḥ sūkṣmāṇi cūrṇāni kārayitvā nave kalaśe samāvāpyānuguptaṃ nidhāpayet/

teṣāṃ tu khalu cūrṇānāṃ pāṇitalaṃ yāvadvā sādhu manyeta tat kṣaudreṇa saṃsṛjya krimikoṣṭhine leḍhuṃ prayacchet//

tathā bhallātakāsthīnyāhṛtya kalaśapramāṇena cāpothya snehabhāvite dṛḍhe kalaśe sūkṣmānekacchidrabradhne *śarīramupaveṣṭya mṛdāvalipte samāvāpyoḍupena pidhāya bhūmāvākaṇṭhaṃ nikhātasya snehabhāvitasyaivānyasya dṛḍhasya kumbhasyopari samāropya samantādgomayairupacitya dāhayet, sa yadā jānīyāt sādhu dagdhāni gomayāni vigatasnehāni ca bhallātakāsthīnīti tatastaṃ kumbhamuddharet/

atha tasmāddvitīyāt kumbhāt snehamādāya viḍaṅgataṇḍulacūrṇaiḥ snehārdhamātraiḥ pratisaṃsṛjyātape sarvamahaḥ sthāpayitvā tato+asmai mātrāṃ prayacchet pānāya; tena sādhu viricyate, viriktasya cānupūrvī yathoktā/

evameva bhadradārusaralakāṣṭhasnehānupakalpya pātuṃ prayacchet//

anuvāsayec-*cainamanuvāsanakāle//

athāhareti brūyāt---śāradānnavāṃstilān saṃpadepetān; tānāhṛtya suviṣpūtānniṣpūya, suśuddhān *śodhayitvā, viḍaṅgakaṣāye sukhoṣṇe prakṣipya nirvāpayedādoṣagamanāt, gatadoṣānabhisamīkṣya, *supralūnān praluñcya, punareva *suniṣpūtān niṣpūya, suśuddhān śodhayitvā, viḍaṅgakaṣāyeṇa triḥsaptakṛtvaḥ *suparibhāvitān bhāvayitvā, ātape śoṣayitvā, ulū(dū)khale saṃkṣudya, dṛṣadi punaḥ ślakṣṇapiṣṭān kārayitvā, droṇyāmabhyavadhāya, viḍaṅgakaṣāyeṇa muhurmuhuravasiñcan pāṇimardameva mardayet; tasmiṃstu khalu prapīḍyamāne yattailamudiyāttat pāṇibhyāṃ paryādāya, śucau dṛḍhe kalaśe nyasyānuguptaṃ nidhāpayet//

athāhareti brūyāt---tilvakoddālakayordvau bilvamātrau piṇḍau ślakṣṇapiṣṭau viḍaṅgakaṣāyeṇa, tadardhamātrau śyāmātrivṛtayoḥ, ato+ardhamātrau dantīdravantyoḥ, ato+ardhamātrau ca cavyacitrakayoriti/

etaṃ saṃbhāraṃ viḍaṅgakaṣāyasyārdhāḍhakamātreṇa pratisaṃsṛjya, tattailaprasthaṃ samāvāpya, sarvamāloḍya, mahati paryoge samāsicyāgnāvadhiśrityāsane samāsicyāgnāvadhiśrityāsane sukhopaviṣṭaḥ sarvataḥ snehamavalokayannajasraṃ mṛdvagninā sādhayeddarvyā satatamavaghaṭṭayan/

sa yadā jānīyādviramati śabdaḥ, praśāmyati ca phenaḥ, prasādamāpadyate snehaḥ, yathāsvaṃ ca gandhavarṇarasotpattiḥ, saṃvartate ca bhaiṣajyamaṅgulibhyāṃ mṛdyamānamanatimṛdvanatidāruṇamanaṅguligrāhi ceti, sa kālastasyāvatāraṇāya/

tatastamavatārya śītībhūtamahatena vāsasā paripūya, śucau dṛḍhe kalaśe samāsicya, pidhānena pidhāya, śuklena vastrapaṭṭenāvacchādya, sūtreṇa subaddhaṃ suniguptaṃ nidhāpayet/

tato+asmai mātrāṃ prayacchet pānāya, tena sādhu viricyate; samyagapahṛtadoṣasya cānupūrvī yathoktā/

tataścainamanuvāsayedanuvāsanakāle/

etenaiva ca pākavidhinā sarṣapātasīkarañjakoṣātakīsnehānupakalpya pāyayet sarvaviśeṣānavekṣamāṇaḥ/

tenāgado bhavati//

*evaṃ dvayānāṃ śleṣmapurīṣasaṃbhavānāṃ krimīṇāṃ samutthānasaṃsthānavarṇanāmaprabhāvacikitsitaviśeṣā vyākhyātāḥ sāmānyataḥ/

viśeṣatastu svalpamātramāsthāpanānuvāsanānulomaharaṇabhūyiṣṭhaṃ teṣvevauṣadheṣu purīṣajānāṃ krimīṇāṃ cikitsitaṃ kartavyaṃ, mātrādhikaṃ punaḥ śirovirecanavamanopaśamanabhūyiṣṭhaṃ teṣvevauṣadheṣu śleṣmajānāṃ krimīṇāṃ cikitsitaṃ kāryam; ityeṣa krimighno bheṣajavidhiranuvyākhyāto bhavati/

tamannutiṣṭhatā yathāsvaṃ hetuvarjane prayatitavyam/

yathoddeśamevamidaṃ krimikoṣṭhacikitsitaṃ yathāvadanuvyākhyātaṃ bhavati//

bhavanti cātra---

apakarṣaṇamevādau krimīṇāṃ bheṣajaṃ smṛtam/
tato vighātaḥ prakṛternidānasya ca varjanam//
*ayameva vikāraṇāṃ sarveṣāmapi nigrahe/
vidhirdṛṣṭastridhā yo+ayaṃ krimīnuddiśya kīrtitaḥ//
saṃśodhanaṃ saṃśamanaṃ nidānasya ca varjanam/
etāvsadbhiṣajā kāryaṃ roge roge yathāvidhi//

tatra ślokau---

vyādhitau puruṣau jñājñau bhiṣajau saprayojanau/
viṃśatiḥ krimayasteṣāṃ hetvādiḥ saptako gaṇaḥ//
ukto vyādhitarūpīye vimāne paramarṣiṇā/
śiṣyasaṃbodhanārthāya vyādhipraśamanāya ca//

ityagniveśakṛte tantre carakapratisaṃskṛte vimānasthāne vyādhitarūpīyavimānaṃ nāma saptamo+adhyāyaḥ//7//

3.8. aṣṭamo+adhyāyaḥ/

athāto rogabhiṣagjitīyaṃ vimānaṃ vyākhyāsyāmaḥ//

iti ha smāha bhagavānātreyaḥ//

buddhimānātmanaḥ *kāryagurulāghavaṃ karmaphalamanubandhaṃ deśakālau ca viditvā yuktidarśanādbhiṣagbubhūṣuḥ śāstramevāditaḥ parīkṣeta/

vividhāni hi śāstrāṇi bhiṣajāṃ pracaranti loke; tatra yanmanyeta sumahadyaśasvidhīrapuruṣāsevitamarthabahulamāptajanapūjitaṃ trividhaśiṣyabuddhihitamapagatapunaruktadoṣamārṣaṃ supraṇītasūtrabhāṣyasaṃgrahakramaṃ svādhāramanavapatitaśabdamakaṣṭaśabdaṃ puṣkalābhidhānaṃ kramāgatārthamarthatattvaviniścayapradhānaṃ saṃgatārthamasaṃkulaprakaraṇamāśuprabodhakaṃ lakṣaṇavaccodāharaṇavacca, tadabhiprapadyeta śāstram/

śāstraṃ hyevaṃvidhamamala ivādityastamo vidhūya prakāśayati sarvam//

tato+anantaramācāryaṃ parīkṣeta; tadyathā---paryavadātaśrutaṃ paridṛṣṭakarmāṇaṃ dakṣaṃ dakṣiṇaṃ śuciṃ jitahastamupakaraṇavantaṃ sarvondriyopapannaṃ prakṛtijñaṃ pratipattijñaman-*upaskṛtanidyamanahaṅkṛtamanasūyakamakopanaṃ kleśakṣamaṃ śiṣyavatsalamadhyāpakaṃ jñāpanasamarthaṃ ceti/

evaṃguṇo hyācāryaḥ sukṣetramārtavo megha iva śasyaguṇaiḥ suśiṣyamāśu vaidyaguṇaiḥ saṃpādayati//

tamupasṛtyārirādhayiṣurupacaredagnivacca devavacca rājavacca pitṛvacca bhartṛvaccāpramattaḥ/

tatastatprasādāt kṛtsnaṃ śāstramadhigamya śāstrasya dṛḍhatāyāmabhidhānasya sauṣṭhave+arthasya vijñāne vacanaśaktau ca bhūyo bhūyaḥ prayateta samyak//

tatropāyānanuvyākhyāsyāmaḥ---adhyayanam, adhyāpanaṃ, tadvidyasaṃbhāṣā cetyupāyāḥ//

tatrāyamadhyayanavidhiḥ---kalyaḥ kṛtakṣaṇaḥ prātarutthāyopavyūṣaṃ vā kṛtvā++āvaśyakamupaspṛśyodakaṃ devarṣigobrāhmaṇaguruvṛddhasiddhācāryebhyo namaskṛtya same śucau deśe sukhopaviṣṭo manaḥpuraḥsarābhirvāgbhiḥ sūtramanukrāman punaḥ punarāvartayed *buddhvā samyaganupraviśyārthatattvaṃ svadoṣaparihārārthaṃ paradoṣapramāṇārthaṃ ca; evaṃ madhyaṃdine+aparāhṇe rātrau ca śaśvadaparihāpayannadhyayanamabhyasyet/

ityadhyayanavidhiḥ//

athādhyāpanavidhiḥ---adhyāpane kṛtabuddhirācāryaḥ śiṣyamevāditaḥ parīkṣeta; tadyathā---praśāntamāryaprakṛtikamakṣudrakarmāṇamṛjucakṣurmukhanāsāvaṃśaṃ tanuraktaviśadajihvamavikṛtadantauṣṭhamaminminaṃ dhṛtimantamanahaṅkṛtaṃ medhāvinaṃ vitarkasmṛtisaṃpannamudārasattvaṃ tadvidyakulajamathavā tadvidyavṛttaṃ tattvābhiniveśinamavyaṅgamanyāpannevdriyaṃ nibhṛtam-*anuddhatamarthatattvabhāvakamakopanamavyasaninaṃ śīlaśaucācārānurāgadākṣyaprādakṣiṇyopapannamadhyayanābhikāmamarthavijñāne karmadarśane cānanyakāryamalubdhamanalasaṃ *sarvabhūtahitaiṣiṇamācāryasarvānuśiṣṭipratikaramanuraktaṃ ca, evaṃguṇasamuditamadhyāpyamāhuḥ//

*evaṃvidhamadhyayanārthinamupasthitamārirādhayiṣumācāryo+anubhāṣeta---udagayane śuklapakṣe praśaste+ahani tiṣyahastaśravaṇāśvayujāmanyatamena nakṣatreṇa yogamupagate bhagavati śaśini kalyāṇe kalyāṇe ca karaṇe maitre muhūrte muṇḍaḥ kṛtopavāsaḥ snātaḥ kāṣāyavastrasaṃvītaḥ sagandhahastaḥ samidho+agnimājyamupalepanamudakumbhān mālyadāmadīpahiraṇyahemarajatamaṇimuktāvidrumakṣaumaparidhīn kuśalājasarṣapākṣatāṃśca śuklāni sumanāṃsi grathitāgrathitāni medhyān bhakṣyān gandhāṃśca ghṛṣṭānādāyopatiṣṭhasveti//

*sa tathā kuryāt//

tamupasthitamājñāya same śuvau deśe *prākpravaṇe udakpravaṇe vā catuṣkiṣkumātraṃ caturasraṃ sthaṇḍilaṃ gomayodakenopaliptaṃ kuśāstīrṇaṃ *suparihitaṃ paridhibhiścaturdiśaṃ yathoktacandanodakumbhakṣaumahemahiraṇyarajatamaṇimuktāvidrumālaṅkṛtaṃ medhyabhakṣyagandhaśuklapuṣpalājasarṣapākṣatopaśobhitaṃ kṛtvā, tatra pālāśībhiraiṅgudībhiraudumbarībhirmādhukībhirvā samidbhiragnimupasamādhāya prāṅmukhaḥ śuciradhyayanavidhimanuvidhāya madhusarpirbhyāṃ tristrirjuhuyādagnimāśīḥsaṃprayukairmantrairbrahmāṇamagniṃ dhanvantariṃ prajāpatimaśvināvindramṛṣīṃśca sūtrakārānabhimantrayamāṇaḥ pūrvaṃ svāheti//

śiṣyaścainamanvālabheta/

hutvā ca pradakṣiṇamagnimanuparikrāmet/

parikramya brāhmaṇān svasti vācayet; bhiṣajaścābhipūjayet//

athainamagnisakāśe brāhmaṇasakāśe bhiṣaksakāśe cānuśiṣyāt---brahmacāriṇā śmaśrudhāriṇā satyavādinā+amāṃsādena medhyasevinā nirmatsareṇāśastradhāriṇā ca bhavitavyaṃ, na ca te madvacanāt kiñcidakāryaṃ syādanyatra rājadviṣṭāt prāṇaharādvipulādadharmyādanarthasaṃprayuktādvā+apyarthāt; madarpaṇena matpradhānena madadhīnena matpriyahitānuvartinā ca śaśvadbhavitavyaṃ, putravaddāsavadarthivaccopacaratā+*anuvastavyo+aham, anutsekenāvahitenānanyamanasā vinītenāvekṣyāvekṣyakāriṇā+anasūyakena cābhyanujñātena pravicaritavyam, anujñātena (cānanujñātena ca) pravicaratā pūrvaṃ gurvarthopāharaṇe yathāśakti prayatitavyaṃ, karmasiddhimarthasiddhiṃ yaśolābhaṃ pretya ca svargamicchatā bhiṣajā tvayā gobrāhmaṇamādau kṛtvā sarvaprāṇabhṛtāṃ śarmāśāsitavyamaharaharuttiṣṭhatā copaviśatā ca, sarvātmanā cāturāṇāmārohyāya prayatitavyaṃ, jīvitahetorapi cāturebhyo nābhidrogdhavyaṃ, manasā+api ca parastriyo nābhigamanīyāstathā sarvameva parasvaṃ, nibhṛtaveśaparicchadena bhavitavyam, aśauṇḍenāpāpenāpāpasahāyena ca, ślakṣṇaśukladharmyaśarmyadhanyasatyahitamitavacasā deśakālavicāriṇā smṛtimatā jñānotthānopakaraṇasaṃpatsu nityaṃ yatnavatā ca; na ca kadācidrājadviṣṭānāṃ rājadveṣiṇāṃ vā mahājanadviṣṭānāṃ mahājanadveṣiṇāṃ vā+apyauṣadhamanuvidhātavyaṃ, tathā sarveṣāmatyarthanikṛtaduṣṭaduḥkhaśīlācāropacārāṇām-*anapavādapratikārāṇāṃ mumūrṣūṇāṃ ca, tathaivāsannihiteśvarāṇāṃ strīṇāmanadhyakṣāṇāṃ vā; na ca kadācit strīdattamāmiṣamādātavyamananujñātaṃ bhartrā+athavā+adhyakṣeṇa, āturakulaṃ cānupraviśatā viditenānumatapraveśinā sārdhaṃ puruṣeṇa susaṃvītenāvākśirasā smṛtimatā stimitenāvekṣyāvekṣya manasā sarvamācaratā samyaganupraveṣṭavyam, anupraviśya ca vāṅmanobuddhīndriyāṇi na kvacit praṇidhātavyānyanyatrāturādāturādāturopakārārthādāturagateṣvanyeṣu vā bhāveṣu, na cāturakulapravṛttayo bahirniścārayitavyāḥ, hrasitaṃ cāyuṣaḥ pramāṇamāturasya jānatā+api tvayā na varṇayitavyaṃ tatra ya rocyamānamāturasyānyasya vā+apyupaghātāya saṃpadyate; jñānavatā+api ca nātyarthamātmano jñāne vikatthitavyam, āptādapi hi vikatthamānādatyarthamudvijantyaneke//

na caiva hyasti sutaramāyurvedasya pāraṃ, tasmādapramattaḥ śaśvadabhiyogamasmin gacchet, *etacca kāryam. evaṃbhūyaśca vṛttasauṣṭhavamanasūyatā parebhyo+apyāgamayitavyaṃ, kṛtsno hi loko buddhimatāmācāryaḥ śatruścābuddhimatām, ataścābhisamīkṣya buddhimatā+amitrasyāpi dhanyaṃ yaśasyamāyuṣyaṃ pauṣṭikaṃ *laukyamabhyupadiśato vacaḥ śrotavyamanuvidhātavyaṃ ceti/

ataḥ paramidaṃ brūyāt---devatāgnidvijaguruvṛddhasiddhācāryeṣu te nityaṃ samyagvartitavyaṃ, teṣu te samyagvartamānasyāyamagniḥ sarvagandharasaratnabījāni yatheritāśca devatāḥ śivāya syuḥ, ato+anyathā vartamānasyāśivāyeti/

evaṃ bruvati cācārye śiṣyaḥ 'tathā'iti brūyāt/

yathopadeśaṃ ca kurvannadhyāpyaḥ, ato+anyathā tvanadhyāpyaḥ/

adhyāpyamadhyāpayan hyācāryo yathoktaiścādhyāpanaphalairyogamāpnotyanyaiścānuktaiḥ śreyaskarairguṇaiḥ śiṣyamātmānaṃ ca yunakti/

ityadhyāpanavidhiruktaḥ//

saṃbhāṣāvidhimata ūrdhvaṃ vyākhyāsyāmaḥ---bhiṣak bhiṣajā saha saṃbhāṣeta/

tadvidyasaṃbhāṣā hi jñānābhiyogasaṃharṣakarī bhavati, vaiśāradyamapi cābhimirvartayati, vacanaśaktimapi cādhatte, yaśaścābhidīpayati, pūrvaśrute ca saṃdehavataḥ punaḥ śravaṇācchrutasaṃśayamapakarṣati, śrute cāsaṃdehavato bhūyo+adhyavasāyamabhinirvartayati, aśrutamapi ca kañcidarthaṃ śrotraviṣayamāpādayati, yaccācāryaḥ śiṣyāya śuśrūṣave prasannaḥ krameṇopadiśati guhyābhimatamarthajātaṃ tat paraspareṇa saha jalpan *piṇḍena vijigīṣurāha saṃharṣāt, tasmāttadvidyasaṃbhāṣāmabhipraśaṃsanti kuśalāḥ//

dvividhā tu khalu tadvidyasaṃbhāṣā bhavati---sandhāyasaṃbhāṣā, vigṛhyasaṃbhāṣā ca//

tatra jñānavijñānavacanaprativacanaśaktisaṃpannenākopanenānupaskṛtavidyenānasūyakenānuneyenānunayakovidena kleśakṣameṇa priyasaṃbhāṣaṇena ca saha sandhāyasaṃbhāṣā vidhīyate/

tathāvidhena saha kathayan visrabdhaḥ kathayet, pṛcchedapi ca visrabdhaḥ, pṛcchate cāsmai visrabdhāya viśadamarthaṃ brūyāt, na ca nigrahabhayādudvijeta, nigṛhya cainaṃ na hṛṣyet, na ca pareṣu vikattheta, na ca mohādekāntagrāhī syāt, na cāviditamarthamanuvarṇayet, *samyak cānunayenānunayet, tatra cāvahitaḥ syāt/

ityanulomasaṃbhāṣāvidhiḥ//

ata ūrdhvamitareṇa saha vigṛhya *saṃbhāṣāyāṃ jalpecchreyasā yogamātmanaḥ paśyan/

prāgeva ca *jalpājjalpāntaraṃ parāvarāntaraṃ pariṣadviśeṣāṃśca samyak parīkṣeta/

samyakparīkṣā hi buddhimatāṃ kāryapravṛttinivṛttikālau śaṃsati, tasmāt parīkṣāmabhipraśaṃsanti kuśalāḥ/

parīkṣamāṇastu khalu parāvarāntaramimān jalpakaguṇāñ śreyaskarān doṣavataśca parīkṣeta samyak; tadyathā---śrutaṃ vijñānaṃ dhāraṇaṃ pratibhānaṃ vacanaśaktiriti, etān guṇān śreyaskarānāhuḥ; imān punardoṣavataḥ, tadyathā---kopanatvamavaiśāradyaṃ bhīrutvamadhāraṇatvamanavahitatvamiti/

etān guṇān gurulāghavataḥ parasya caivātmanaśca tulayet//

tatra trividhaḥ paraḥ saṃpadyate---pravaraḥ, pratyavaraḥ, samo vā, guṇavinikṣepataḥ; natveva kārtsneyana//

pariṣattu khalu dvividhā---jñānavatī, mūḍhapariṣacca/

saiva dvividhā satī trividhā punaranena kāraṇavibhāgena---suhṛtpariṣat, udāsīnapariṣat, *pratiniviṣṭapariṣacceti/

tatra pratiniviṣṭāyāṃ pariṣadi jñānavijñānavacanaprativacanaśaktisaṃpannāyāṃ mūḍhāyāṃ vā na kathaṃcit kenacit saha jalpo vidhīyate; mūḍhāyāṃ tu suhṛtpariṣadyudāsīnāyāṃ vā jñānavijñānavacanaprativacanaśaktīrantareṇāpy-*adīptayaśasā mahājavacidviṣṭenāpi saha jalpo vidhīyate/

tadvidhena ca saha kathayatā āviddhadīrghasūtrasaṃkulairvākyadaṇḍakaiḥ kathayitavyam, atihṛṣṭaṃ muhurmuhurupahasatā paraṃ nirūpayatā ca parṣadamākārairbruvataścāsya vākyāvakāśo na deyaḥ; kaṣṭaśabdaṃ ca *bruvatā vaktavyo nicyate, athavā punarhīnā te pratijñā, iti/

punaścāhū(hva)yamānaḥ prativaktavyaḥ---*parisaṃvatsaro bhavān śikṣasva tāvat; na tvayā gururupāsito nūnam, athavā paryāptametāvatte; sakṛdapi hi parikṣepikaṃ nihataṃ nihatamāhuriti nāsya yogaḥ kartavyaḥ kathañcit/

apyevaṃ śreyasā saha vigṛhya vaktavyamityāhureke; natvevaṃ jyāyasā saha vigrahaṃ praśaṃsanti kuśalāḥ//

pratyavareṇa tu saha samānābhimatena vā vigṛhya jalpatā suhṛtpariṣadi kathayitavyam, athavā+apyudāsīnapariṣadyavadhānaśravaṇajñānavijñānopadhāraṇavacanaprativacanaśaktisaṃpannāyāṃ kathayatā cāvahitena parasya sādguṇyadoṣabalamavekṣitavyaṃ, samavekṣya ca yatrainaṃ śreṣṭhaṃ manyeta nāsya tatra jalpaṃ yojayedanāviṣkṛtamayogaṃ kurvan; yatra tvenamavaraṃ manyeta tatraivainamāśu nigṛhṇīyāt/

tatra khalvime pratyavarāṇāmāśu nigrahe bhavantyupāyāḥ; tadyathā---śrutahīnaṃ mahatā sūtrapāṭhenābhibhavet, vijñānahīnaṃ punaḥ kaṣṭaśabdena vākyena, vākyadhāraṇāhīnamāviddhadīrghasūtrasaṃkulairvākyadaṇḍakaiḥ, patibhāhīnaṃ punar-*vacanenaikavidhenānekārthavācinā, vacanaśaktihīnamardhoktasya *vākyasyākṣepeṇa, aviśāradamapatrapaṇena, kopanamāyāsanena, bhīruṃ vitrāsanena, anavahitaṃ niyamaneneti/

evametairupāyaiḥ paramavaramabhibhavecchīghram//

tatra ślokau--- vigṛhya kathayedyktyā yuktaṃ ca na nivārayet/

vigṛhyabhāṣā tīvraṃ hi keṣāṃciddrohamāvahet//

nākāryamasti kruddhasya nāvācyamapi vidyate/

kuśalā nābhinandanti kalahaṃ samitau satām//

evaṃ pravṛtte vāde kuryāt//

*prāgeva tāvadidaṃ kartuṃ yateta---sandhāya parṣadā+ayanabhūtamātmanaḥ prakaraṇamādeśayitavyaṃ, yadvā parasya bhṛśadurgaṃ syāt, pakṣamathavā parasya bhṛśaṃ vimukhamānayet; pariṣadi copasaṃhitāyāmaśakyamasmābhirvaktum, eṣaiva te pariṣadyatheṣṭaṃ yathāyogaṃ yathābhiprāyaṃ vādaṃ vādamaryādāṃ ca sthāpayiṣyatītyuktvā tūṣṇīmāsīta//

tatredaṃ vādamaryādālakṣaṇaṃ bhavati---idaṃ vācyam, idamavācyam, evaṃ parājito bhavatīti//

imāni tu khalu padāni *bhiṣagvādamārgajñānārthamadhigamyāni bhavanti; tadyathā---vādaḥ, dravyaṃ, guṇāḥ, karma, sāmānyaṃ, viśeṣaḥ, samavāyaḥ, pratijñā, sthāpanā, pratiṣṭhāpanā, hetuḥ, dṛṣṭāntaḥ, upanayaḥ, nigamanam, uttaraṃ, siddhāntaḥ, śabdaḥ, pratyakṣam, anumānam, aitihyam, aupamyaṃ, saṃśayaḥ, prayojanaṃ, savyabhicāraṃ, jijñāsā, vyavasāyaḥ, arthaprāptiḥ, saṃbhavaḥ, anuyojyam, ananuyojyam, anuyogaḥ, pratyanuyogaḥ, vākyadoṣaḥ, vākyapraśaṃsā, chalam, ahetuḥ, atītakālam, upālambhaḥ, parihāraḥ, pratijñāhāniḥ, abhyanujñā, hetvantaram, arthāntaraṃ, nigrahasthānamiti//

tatra vādo nāma sa yat pareṇa saha śāstrapūrvakaṃ vigṛhya kathayati/sa ca dvividhaḥ saṃgraheṇa---jalpaḥ, vitaṇḍā ca/

tatra pakṣāśritayorvacanaṃ jalpaḥ, jalpaviparyayo vitaṇḍā/

yathā---ekasya pakṣaḥ punarbhavo+astīti, nāstityaparasya; tau ca svasvapakṣahetubhiḥ svasvapakṣaṃ sthāpayataḥ, parapakṣamudbhāvayataḥ, eṣa jalpaḥ/

jalpaviparyayo vitaṇḍā/

vitaṇḍā nāma parapakṣe doṣavacanamātrameva//

dravya-guṇa-sāmānya-viśeṣa-samavāyāḥ svalakṣaṇaiḥ ślokasthāne pūrvamuktāḥ//

atha pratijñā---pratijñā nāma sādhyavacanaṃ; yathā---nityaḥ puruṣa iti//

atha sthāpanā---sthāpanā nāma tasyā eva pratijñāyā hetudṛṣṭāntopanayanigamanaiḥ sthāpanā/

*pūrvaṃ hi pratijñā, paścāt sthāpanā, kiṃ hyapratijñātaṃ sthāpanyiṣyati; yathā---nityaḥ puruṣa iti pratijñā; hetuḥ---akṛtakatvāditi; *dṛṣṭāntaḥ---yathā++ākāśamiti; upanayaḥ---yathā cākṛtakamākāśaṃ, tacca nityaṃ, tathā puruṣa iti; nigamanaṃ---tasmānnitya iti//

atha pratiṣṭhāpanā---pratiṣṭhāpanā nāma yā tasyā eva *parapratijñāyā viparītārthasthāpanā/

yathā-anityaḥ puruṣa iti *pratijñā; hetuḥ---aindriyakatvāditi; dṛṣṭāntaḥ---yathā *ghṭa iti, upanayo---yathā ghaṭa aindriyakaḥ sa cānityaḥ, tathā cāyamiti; nigamanaṃ---tasmādanitya iti//

atha hetuḥ---heturnāmopalabdhikāraṇaṃ; tat pratyakṣam, anumānam, aitihyam, aupamyamiti; ebhirhetubhiryadupalabhyate tat tattvam//

atha dṛṣṭāntaḥ---dṛṣṭānto nāma yatra mūrkhaviduṣāṃ buddhisāmyaṃ, yo varṇyaṃ *varṇayati/

yathā---agniruṣṇāḥ, dravamudakaṃ, sthirā pṛthivī, ādityaḥ prakāśaka iti; yathā *ādityaḥ prakāśakastathā *sāṃkhyajñānaṃ prakāśakamiti//

upayo nigamanaṃ coktaṃ sthāpanāpratiṣṭhāpanāvyākhyāyām//

athottaram---uttaraṃ nāma sādharmyopadiṣṭe hetau vaidharmyavacanaṃ, vaidharmyopdiṣṭe vā hetau sādharmyavacanam/

yathā---'hetusadharmāṇo vikārāḥ, śītakasya hi vyādherhetubhiḥ sādharmyaṃ himaśiśiravātasaṃsparśāḥ', iti bruvataḥ paro brūyāt---hetuvidharmāṇo vikārāḥ, yathā śarīrāvayavānāṃ dāhauṣṇyakothaprapacane *hetuvaidharmyaṃ himaśiśiravātasaṃsparśā iti/

etat saviparyayamuttaram//

atha siddhāntaḥ---siddhānto nāma sa yaḥ parīkṣakairbahuvidhaṃ parīkṣya hetubhiśca sādhayitvā sthāpyate nirṇayaḥ/

sa caturvidhaḥ---sarvatantrasiddhāntaḥ, pratitantrasiddhāntaḥ, adhikaraṇasiddhāntaḥ, abhyupagamasiddhāntaśceti/

tatra sarvatantrasiddhānto nāma tasmiṃstasmin sarvasmiṃstantre tattat prasiddhaṃ; yathā santi nidānāni, santi vyādhayaḥ, santi siddhyupāyāḥ sādhyānāmiti/

pratitantrasiddhānto nāma tasmiṃstasminnekaikasmiṃstantre tattat prasiddhaṃ; yathā---anyatrāṣṭau rasāḥ ṣaḍatra, pañcendriyāṇyatra ṣaḍindriyāṇyanyatra tantre, vātādikṛtāḥ sarve vikārā yathā+anyatra, atra vātādikṛtā bhūtakṛtāśca prasiddhāḥ/

adhikaraṇasiddhānto nāma sa yasminnadhikaraṇe prastūyamāne siddhānyanyānyapyadhikaraṇāni bhavanti, yathā---'na muktaḥ karmānubandhikaṃ kurute, nispṛhatvāt' iti prastute siddhāḥ karmaphala-mokṣa-puruṣa-pretyabhāvā bhavanti/

abhyupagamasiddhānto nāma sa yamarthamasiddhamaparīkṣitamanupadiṣṭamahetukaṃ vā vādakāle+abhyupagacchanti bhiṣajaḥ; tadyathā---dravyaṃ pradhānamiti kṛtvā vakṣyāmaḥ, guṇāḥ pradhānamiti kṛtvā vakṣyāmaḥ, *vīryaṃ pradhānamiti kṛtvā vakṣyāmaḥ, ityevamādiḥ/

iti caturvidhaḥ siddhāntaḥ//

atha śabdaḥ---śabdo nāma varṇasamāmnāyaḥ; sa caturvidhaḥ---dṛṣṭārthaśca, adṛṣṭārthaśca, satyaśca, anṛtaśceti/

tatra dṛṣṭārtho nāma---tribhirhetubhirdoṣāḥ prakupyanti, ṣaḍbhirupakramaiśca praśāmyanti, sati śrotrādisadbhāve śabdādigrahaṇamiti/

adṛṣṭārthaḥ punaḥ---asti pretyabhāvaḥ, asti mokṣa iti/

satyo nāma---yathārthabhūtaḥ; santyāyurvedopadeśāḥ, santi siddhyupāyāḥ sādhyānāṃ vyādhīnāṃ, santyārambhaphalānīti/

satyaviparyayaścānṛtaḥ//

atha pratyakṣaṃ---pratyakṣaṃ nāma tadyadātmanā cendriyaiśca svayamupalabhyate; tatrātmapratyakṣāḥ sukhaduḥkhecchādveṣādayaḥ, śabdādayastvindriyapratyakṣāḥ//

athānumānam---anumānaṃ nāma tarko yuktyapekṣaḥ; yathā---agniṃ jaraṇaśaktyā, balaṃ vyāyāmaśaktyā, śrotrādīni śabdādigrahaṇenetyevamādi//

athaitihyam---aitihyaṃ nāmāptopadeśo vedādiḥ//

athaupamyam---aupamyaṃ nāma yadanyenānyasya sādṛśyamadhikṛtya prakāśanaṃ; yathā---daṇḍena daṇḍakasya, dhanuṣā dhanuḥstambhasya, iṣvāsenā++ārogyadasyeti//

atha saṃśayaḥ---saṃśayo nāma *sandehalakṣaṇānusandigdheṣvartheṣvaniścayaḥ; yathā---dṛṣṭā hyāyuṣmallakṣaṇairupetāścānupetāśca tathā sakriyāścākriyāśca puruṣāḥ śīghrabhaṅgāścirajīvinaśca, etadubhayadṛṣṭatvāt saṃśayaḥ---kimasti khalvakālamṛtyuruta nāstīti//

atha prayojanaṃ---prayojanaṃ nāma yadarthamārabhyanta ārambhāḥ; yathā---yadyakālamṛtyurasti tato+ahamātmānamāyuṣyairupacariṣyāmyanāyuṣyāṇi ca parihariṣyāmi, kathaṃ māmakālamṛtyuḥ prasaheteti//

atha savyabhicāraṃ---savyabhicāraṃ nāma yadvyabhicaraṇaṃ; yathā---bhavedidamauṣadhamasmin vyādhau yaugikamathavā neti//

atha jijñāsā---jijñāsā nāma parīkṣā; yathā bheṣajaparīkṣottarakālamupadekṣyate//

atha vyavasāyaḥ---vyavasāyo nāma niścayaḥ; yathā---vātika evāyaṃ vyādhiḥ, *idamevāsya bheṣajaṃ ceti//

athārthaprāptiḥ---arthaprāptirnāma yatraikenārthenoktenāparasyārthasyānuktasyāpi siddhiḥ; yathā---nāyaṃ saṃtarpaṇasādhyo vyādhirityukte bhavatyarthaprāptiḥ---apatarpaṇasādhyo+ayamiti, nānena divā bhoktavyamityukte bhavatyarthaprāptiḥ---niśi bhoktavyamiti//

atha saṃbhavaḥ---yo yataḥ saṃbhavati sa tasya saṃbhavaḥ; yathā---ṣaḍdhātavo garbhasya, vyādherahitaṃ, hitamārogyasyeti//

athānuyojyam---anuyojyaṃ nāma yadvākyaṃ vākyadoṣayuktaṃ tat/

*sāmānyato vyāhṛteṣvartheṣu vā viśeṣagrahaṇārthaṃ yadvākyaṃ tadapyanuyojyaṃ; yathā---'saṃśodhanasādhyo+ayaṃ vyādhiḥ' ityukte 'kiṃ vamanasādhyo+ayaṃ, kiṃvā virecanasādhyaḥ' ityanuyujyate//

athānanuyojyam---ananuyojyaṃ nāmāto viparyayeṇa; yathā---ayamasādhyaḥ//

athānuyogaḥ---anuyogo nāma sa yat tadvidyānāṃ tadvidyaireva sārdhaṃ tantre tantraikadeśe vā praśnaḥ praśnaikadeśo vā jñānavijñāvacanaprativacanaparīkṣārthamādiśyate/

yathā---'nityaḥ puruṣaḥ' iti pratijñāte yat paraḥ 'ko hetuḥ' ityāha, so+anuyogaḥ//

atha pratyanuyogaḥ---pratyanuyogo nāmānuyogasyānuyogaḥ; yathā---asyānuyogasya punaḥ ko heturiti//

atha vākyadoṣaḥ---vākyadoṣo nāma yathā khalvasminnartha nyūnam, anarthakam, apārhtakaṃ, viruddhaṃ ceti; etāni hyantareṇa na prakṛto+arhtaḥ praṇaśyet/

tatra nyūnaṃ---pratijñāhetūdāharaṇopanayanigamanānāmanyatamenāpi nyūnaṃ nyūnaṃ bhavati; yadvā bahūpadiṣṭahetukamekena hetunā sādhyate tacca nyūnam/

athādhikam---adhikaṃ nāma yannyanaviparītaṃ, yadvā++āyurvede bhāṣyamāṇe bārhaspatyamauśanasamanyadvā yatkiṃcidapratisaṃbaddhārthamucyate, yadvā saṃbaddhārthamapi dvirabhidhīyate tat punaruktadoṣatvādadhikaṃ; tacca punaruktaṃ dvividham---arthapunaruktaṃ, śabdapunaruktaṃ ca; tatrārthapunaruktaṃ yathā---bheṣajamauṣadhaṃ sādhanamiti, śabdapunaruktaṃ punarbheṣajaṃ bheṣajamiti/

athānarthakam---anarhtakaṃ nāma yadvacanamakṣaragrāmamātrameva syāt pañcavargavanna cārthato gṛhyate/

athāpārthakam---apārthakaṃ nāma yadarthavacca paraspareṇāsaṃyujyamānārthakaṃ; yathā---cakra-na(ta)kra-vaṃśa-vajra-niśākarā iti/

atha viruddhaṃ---viruddhaṃ nāma yaddṛṣṭāntasiddhāntasamayairviruddhaṃ; tatra pūrvaṃ dṛṣṭāntasiddhāntāvuktau; samayaḥ punastridhā bhavati; yathā---āyurvaidikasamayaḥ, yājñikasamayaḥ, kokṣaśāstrikasamayaśceti; tatrāyurvaidikasamayaḥ-catuṣpādaṃ bheṣajamiti, yājñikasamayaḥ-ālabhyā yajamānaiḥ paśava iti, mokṣaśāstrikasamayaḥ-sarvabhūteṣvahiṃseti; tatra svasamayaviparītamucyamānaṃ viruddhaṃ bhavati/

iti vākyadoṣāḥ//

atha vākyapraśaṃsā---vākyapraśaṃsā nāma yathā khalvasminnarthe tvanyūnam, anadhikam, arthavat, anapārthakam, aviruddham, adhigatapadārthaṃ ceti yattadvākyamananuyojyamiti praśasyate//

atha cchalaṃ---chalaṃ nāma pariśaṭhamarthābhāsamanarthakaṃ vāgvastumātrameva/

taddvividhaṃ---vākchalṃ, sāmānyacchalaṃ ca/

tatra vākchalaṃ nāma yathā---kaścidbrūyāt---navatantre+ayaṃ bhiṣagiti, atha bhiṣag brūyāt---nāhaṃ navatantra ekatantro+ahamiti; paro brūyāt---nāhaṃ bravīmi nava tantrāṇi taveti, api tu navābhyastaṃ te tantramiti; bhiṣak brūyāt---na mayā navābhyastaṃ tantram, anekadhā+abhyastaṃ mayā tantramiti; etadvākchalam/

sāmānyacchalaṃ nāma yathā---vyādhipraśamanāyauṣadhamityukte, paro bhūyāt---sat satpraśamanāyeti kiṃ nu bhavānāha; san hi rogaḥ, sadauṣadhaṃ; yadi ca sat satpraśamanāya bhavati, tatra sat kāsaḥ, sat kṣayaḥ, satsāmānyāt kāsaste kṣayapraśamanāya bhaviṣyatīti/

etat sāmānyacchalam//

athāhetuḥ---aheturnāma prakaraṇasamaḥ, saṃśayasamaḥ, varṇyasamaśceti/

tatra prakaraṇasamo nāmāheturyathā---anyaḥ śarīrādātmā nitya iti; paro brūyāt---yasmādanyaḥ śarīrādātmā, tasmānnityaḥ; śarīraṃ hyanityamato vidharmiṇā *cātmanā bhavitavyamityeṣa cāhetuḥ; nahi ya eva pakṣaḥ sa eva heturiti/

saṃśayasamo nāmāheturya eva saṃśayahetuḥ sa eva saṃśayacchedahetuḥ; yathā---ayamāyurvedaikadeśamāha, kiṃnvayaṃ cikitsakaḥ syānna veti saṃśaye paro brūyāt---yasmādayamāyurvedaikadeśamāha tasmāccikitsako+ayamiti, na ca saṃśayacchedahetuṃ viśeṣayati, eṣa cāhetuḥ; na hi ya eva saṃśayahetuḥ, sa eva saṃśayacchedaheturbhavati/

varṇyasamo nāmāhetuḥ-yo heturvarṇyāviśiṣṭaḥ; yathā---kaścidbrūyāt---asparśatvādbuddhiranityā śabdaviditi; atra varṇyaḥ śabdo buddhirapi varṇyā, tadubhayavarṇyāviśiṣṭatvādvarṇyasamo+apyahetuḥ//

athātītakālam---atītakālaṃ nāma yat pūrvaṃ vācyaṃ tat paścāducyate, tat kālātītatvādagrāhyaṃ bhavatīti; *pūrvaṃ vā nigrahaprāptamanigṛhya parigṛhya pakṣāntaritaṃ paścānnigṛhīte, tattasyātītakālatvānnigrahavacanamasamarthaṃ bhavatīti//

athopālambhaḥ-upālambho nāma hetordoṣavacanaṃ; yathā-pūrvamahetavo hetvābhāsā vyākhyātāḥ//

atha parihāraḥ---parihāro nāma tasyaiva doṣavacanasya pariharaṇaṃ; yathā---nityamātmani śarīrasthe jīvaliṅgānyupalabhyante, tasya cāpagamānnopalabhyante, tasmādanyaḥ śarīrādātmā nityaśceti//

atha pratijñāhāniḥ---pratijñāhānirnāma sā pūrvaparigṛhītāṃ pratijñāṃ paryanuyukto yat parityajati, yathā prāk pratijñāṃ kṛtvā nityaḥ puruṣa iti, paryanuyuktastvāha---anitya iti//

athābhyanujñā---abhyanujñā nāma sā ya iṣṭāniṣṭābhyupagamaḥ//

atha hetvantaraṃ---hetvantaraṃ nāma prakṛtahetau vācye yadvikṛtahetumāha//

athārthāntaram---arthāntaraṃ nāmaikasmin vaktavye+aparaṃ yadāha/

yathā-jvaralakṣaṇe vācye pramehalakṣaṇamāha//

atha nigrahasthānaṃ---nigrahasthānaṃ nāma parājayaprāptiḥ; tacca trirabhihitasya vākyasyāparijñānaṃ pariṣadi vijñānavatyāṃ, yadvā ananuyojyasyānuyogo+anuyojyasya cānanuyogaḥ/

pratijñāhāniḥ, abhyanujñā, kālātītavacanam, ahetuḥ, nyūnam, adhikaṃ, vyartham, anarthakaṃ, punaruktaṃ, viruddhaṃ, hetvantaram, arthāntaraṃ ca nigrahasthānam//

iti vādamārgapadāni yathoddeśamabhinirdiṣṭāni bhavanti//

vādastu khalu bhiṣajāṃ pravartamāno pravartetāyurveda eva, nānyatra/

atra hi vākyaprativākyavistarāḥ kevalāścopapattayaḥ sarvādhikaraṇeṣu/

tāḥ sarvāḥ samavekṣya sarvaṃ vākyaṃ brūyāt, nāprakṛtakamaśāstramaparīkṣitamasādhakamākulamavyāpakaṃ vā/

sarvaṃ ca hetumadbrūyāt/

hetumanto hyakaluṣāḥ sarva eva vādavigrahāścikitsite kāraṇabhūtāḥ, praśastabuddhivardhakatvāt; sarvārambhasiddhaṃ hyāvahatyanupahatā buddhiḥ//

imāni khalu tāvadiha kānicit prakaraṇāni bhiṣajāṃ jñānārthamupadekṣyāmaḥ/

jñānapūrvakaṃ hi karmaṇāṃ samārambhaṃ praśaṃsanti kuśalāḥ/

jñātvā hi kāraṇa-karaṇa-kāryayoni-kārya-kāryaphalānubandha-deśa-kāla-pravṛttyupāyān samyagabhinirvartamānaḥ kāryābhinirvṛttāviṣṭaphalānubandhaṃ kāryamabhinirvartayatyanatimahatā yatnena kartā//

tatra kāraṇaṃ nāma tad *yat karoti, sa eva hetuḥ, sa kartā//

karaṇaṃ punastad yadupakaraṇāyopakalpate kartuḥ kāryābhinirvṛttau prayatamānasya//

kāryayonistu sā yā vikriyamāṇā kāryatvamāpadyate//

kāryaṃ tu tadyasyābhinirvṛttimabhisamdhāya kartā pravartate //

kāryaphalaṃ punastad yatprayojanā kāryābhinirvṛttiriṣyate//

anubandhaḥ khalu sa yaḥ kartāramavaśyamanubadhnāti kāryāduttarakālaṃ kāryanumittaḥ śubho vā+apyaśubho bhāvaḥ//

deśastvadhiṣṭhānam//

kālaḥ punaḥ pariṇāmaḥ//

pravṛttistu khalu ceṣṭā kāryārthā; saiva kriyā, karma, yatnaḥ, kāryasamārambhaśca//

upāyaḥ punastrayāṇāṃ kāraṇādīnāṃ sauṣṭhavam-*abhividhānaṃ ca samyak kāryakāryaphalānubandhavarjyānāṃ, kāryāṇāmabhinirvartaka *ityatastūpāyaḥ; kṛte nopāyārtho+asti, na ca vidyate tadātve, kṛtāccottarakālaṃ phalaṃ, phalāccānubandha iti//

etaddaśavidhamagre parīkṣyaṃ, tato+anantaraṃ kāryārthā pravṛttiriṣṭā/

tasmādbhiṣak kāryaṃ cikīrṣuḥ prāk kāryasamārambhāt parīkṣayā kevalaṃ parīkṣyaṃ parīkṣya karma samārabheta kartum//

tatra cedbhiṣagabhiṣagvā bhiṣajaṃ kaścidevaṃ khalu pṛcched---vamanavirecanāsthāpanānuvāsanaśirovirecanāni prayoktukāmena bhiṣajā katividhayā parīkṣayā katividhameva parīkṣyaṃ, kaścātra parīkṣyaviśeṣaḥ, kathaṃ ca parīkṣitavyaḥ, kiṃprayojanā ca parīkṣā, kva ca vamanādīnāṃ pravṛttiḥ, kva ca nivṛttiḥ, pravṛttinivṛttilakṣaṇasaṃyoge ca kiṃ naiṣṭhikaṃ, kāni ca vamanādīnāṃ bheṣajadravyāṇyupayogaṃ gacchantīti//

sa evaṃ pṛṣṭo yadi mohayitumicchet, brūyādenaṃ---bahuvidhā hi parīkṣā tathā parīkṣyavidhibhedaḥ, katamena vidhibhedaprakṛtyantareṇa bhinnayā parīkṣayā kena vā vidhibhedaprakṛtyantareṇa parīkṣyasya bhinnasya bhedāgraṃ bhavān *pṛcchatyāyamānaṃ; nedānīṃ bhavato+anyena vidhibhedaprakṛtyantareṇa bhinnayā parīkṣayā+anyena vā vidhibhedaprakṛtyantareṇa parīkṣyasya bhinnasyābhilaṣitamarthaṃ śrotumahamanyena parīkṣāvidhibhedenānyena vā vidhibhedaprakṛtyantareṇa parīkṣyaṃ bhittvā+*anyathā++ācakṣāṇa icchāṃ pūrayeyamiti//

sa yaduttaraṃ brūyāttat samīkṣyottaraṃ vācyaṃ syādyathoktaṃ ca prativacanavidhimavekṣya; *samyak yadi tu brūyānna cainaṃ mohayitumicchet, prāptaṃ tu vacanakālaṃ manyeta, kāmamasmai brūyādāptameva nikhilena//

dvividhā tu khalu parīkṣājñānavatāṃ---pratyakṣam, anumānaṃ ca/

etaddhi dvayamupadeśaśca parīkṣā syāt/

eva meṣā dvividhā parīkṣā, trividhā vā sahopadeśena//

daśavidhaṃ tu parīkṣyaṃ kāraṇādi yaduktamagre, tadiha bhiṣagādiṣu saṃsārya saṃdarśayiṣyāmaḥ---iha kāryaprāptau kāraṇaṃ bhiṣak, karaṇaṃ punarbheṣajaṃ, kāryayonirdhātuvaiṣamyaṃ, kāryaṃ dhātusāmyaṃ, kāryaphalaṃ sukhāvāptiḥ, anubandhaḥ khalvāyuḥ, deśo bhūmirāturaśca, kālaḥ punaḥ saṃvatsaraścāturāvasthā ca, pravṛttiḥ pratikarmasamārambhaḥ, upāyastu bhiṣagādīnāṃ sauṣṭhavam-*abhividhānaṃ ca samyak/ ihāpyasyopāyasya viṣayaḥ pūrveṇaivopāyaviśeṣeṇa vyākhyātaḥ/

iti kāraṇādīni daśa daśasu bhiṣagādiṣu saṃsārya saṃdarśitāni, tathaivānupūrvyaitaddaśavidhaṃ parīkṣyamuktaṃ ca//

tasya yo yo *viśeṣo yathā yathā ca parīkṣitavyaḥ, sa tathā tathā vyākhyāsyate//

kāraṇaṃ bhiṣagityuktamagre, tasya parīkṣā---bhiṣaṅnāma yo bhiṣajyati, yaḥ sūtrārthaprayogakuśalaḥ, yasya cāyuḥ sarvathā viditaṃ yathāvat/

sa ca sarvadhātusāmyaṃ cikīrṣannātmānamevāditaḥ parīkṣeta guṇiṣu guṇataḥ kāryābhinirvṛttiṃ paśyan, kaccidahamasya kāryasyābhinirvartane samarhto na veti; tatreme bhiṣagguṇā yairupapanno bhiṣagdhātusāmyābhinirvartane samartho bhavati; tadyathā---paryavadātaśrutatā, paridṛṣṭakarmatā, dākṣyaṃ, śaucaṃ, jitahastatā, upakaraṇavattā, sarvendriyopapannatā, prakṛtijñatā, pratipattijñatā ceti//

karaṇaṃ punarbheṣajam/

bheṣajaṃ nāma tadyadupakaraṇāyopakalpate bhiṣajo dhātusāmyābhinirvṛttau prayatamānasya viśeṣataścopāyāntebhyaḥ/

taddvividhaṃ vyapāśrayabhedāt---daivavyapāśrayaṃ, yuktivyaṛpāśrayaṃ ceti/

tatra daivavya pāśrayaṃ---mantrauṣadhimaṇimaṅgalabalyupahārahomaniyamaprāyaścittopavāsasvastyayanapraṇipātagamanādi, yuktivyapāśrayaṃ---saṃśodhanopaśamane ceṣṭāśca dṛṣṭaphalāḥ/

etaccaiva bheṣajamaṅgabhedādapi dvividhaṃ---dravyabhūtam, adravyabhūtaṃ ca/

tatra yadadravyabhūtaṃ tadupāyābhiplutam/

upāyo nāma bhayadarśanavismāpanavismāraṇakṣobhaṇaharṣaṇabharstanavadhabandhasvapnasaṃvāhanādiramūrto bhāvaviśeṣo yathoktāḥ siddhyupāyāśca^*upāyābhiplutā iti/

yattu dravyabhūtaṃ tadvamanādiṣu yogamupaiti/

tasyāpīyaṃ parīkṣā---idamevaṃprakṛtyai(e?)vaṃguṇamivaṃprabhāvamasmin deśe jātamasminnṛtāvevaṃ gṛhītamevaṃ nihitamevamupaskṛtamanayā ca mātrayā yuktamasmin vyādhāvevaṃvidhasya puruṣasyaivatāvantaṃ doṣamapakarṣatyupaśamayati vā, yadanyadapi caivaṃvidhaṃ bheṣajaṃ bhavettacca^*anena viśeṣeṇa yuktamiti//

kāryayonirdhātuvaiṣamyaṃ, tasya lakṣaṇaṃ vikārāgamaḥ/

parīkṣā tvasya vikāraprakṛteścaivonātiriktaliṅgaviśeṣāvṛekṣaṇaṃ vikārasya ca sādhyāsādhyamṛdudāruṇaliṅgaviśeṣāvekṣaṇamiti//

kāryaṃ dhātusāmyaṃ, tasya lakṣaṇaṃ vikāropaśamaḥ/ parīkṣā tvasya-rugupaśamanaṃ, svaravarṇayogaḥ, śarīropacayaḥ, balavṛddhiḥ, abhyavahāryābhilāṣaḥ, rucirāhārakāle, abhyavahṛtasya cāhārasya kāle samyagjaraṇaṃ, nidrālābho yathākālaṃ, vaikāriṇāṃ ca svapnānāmadarśanaṃ, sukhena ca pratibodhanaṃ, vātamūtrapurīṣaretasāṃ muktiḥ, sarvākārairmanobuddhīndriyāṇāṃ cāvyāpattiriti//

kāryaphalaṃ sukhāvāptiḥ, tasya lakṣaṇaṃ---manobuddhīcdriyaśarīratuṣṭiḥ//

anubandhastu khalvāyuḥ, tasya lakṣaṇaṃ---prāṇaiḥ saha saṃyogaḥ//

deśastu bhūmirāturaśca//

tatra bhūmiparīkṣā āturaparijñānahetorvā syādauṣadhaparijñānahetorvā/

tatra tāvadiyamāturaparijñānahetoḥ/

tadyathā---ayaṃ kasmin bhūmideśe jātaḥ saṃvṛddho vyādhito vā; tasmiṃśca bhūmideśe manuṣyāṇāmidamāhārajātam, idaṃ vihārajātam, idamācārajātam, etāvacca balam, evaṃvidhaṃ sattvam, evaṃvidhaṃ sātmyam, evaṃvidho doṣaḥ, bhaktiriyam, ime vyādhayaḥ, hitamidam, ahitamidamiti *prāyograhaṇena/

auṣadhaparijñānahetostu kalpeṣu bhūmiparīkṣā vakṣyate//

āturastu khalu kāryadeśaḥ/

tasya parīkṣā āyuṣaḥ pramāṇajñānahetorvā syād, baladoṣapramāṇajñānahetorvā/

tatra tāvadiyaṃ baladoṣapramāṇajñānahetoḥ; doṣapramāṇānurupo hi *bheṣajapramāṇavikalpo balapramāṇaviśeṣāpekṣo bhavati/

sahasā hyatibalamauṣadhamaparīkṣakaprayuktamalpabalamāturamatipātayet; na hyatibalānyāgreyavāyavīyānyauṣadhānyagnikṣāraśastrakarmāṇi vā śakyante+alpabalaiḥ soḍhum; asahyātitīkṣṇavegatvāddhi tāni sadyaḥprāṇaharāṇi syuḥ/

etaccaiva kāraṇamapekṣamāṇā hīnabalamāturamaviṣādakarairmṛdusukumāraprāyairuttarottaragurubhiravibhramairanātyayikaiścopacarantyauṣadhaiḥ; viśeṣataśca nārīḥ, tā hyanavasthitamṛduvivṛtaviklavahṛdayāḥ prāyaḥ sukumāryo+abalāḥ parasaṃstabhyāśca/

tathā balavati balavadvyādhiparigate svalpabalamauṣadhamaparīkṣakaprayuktamasādhakameva bhavati/

tasmādāturaṃ parīkṣeta prakṛtitaśca, vikṛtitaśca, sārataśca, saṃhananataśca, pramāṇataśca, sātmyataśca, sattvataśca, āhāraśaktitaśca, vyāyāmaśaktitaśca, vayastaśceti, balapramāṇaviśeṣagrahaṇahetoḥ//

*tatra prakṛtyādīn bhāvānanuvyākhyāsyāmaḥ/

tadyathā---śukraśoṇitaprakṛtiṃ, kālagarbhāśayaprakṛtiṃ, āturāhāravihāraprakṛtiṃ, mahābhūtavikāraprakṛtiṃ ca garbhaśarīramapekṣate/

*etāni hi yena *doṣeṇādhikenaikenānekena vā samanubadhyante, tena tena doṣeṇa garbho+anubadhyate; tataḥ sā sā doṣaprakṛtirucyate manuṣyāṇāṃ garbhādipravṛttā/

tasmācchleṣmalāḥ prakṛtyā kecit, pittalāḥ kecit, vātalāḥ kecit, saṃsṛṣṭāḥ kecit, samadhātavaḥ kecidbhavanti/

teṣāṃ hi lakṣaṇāni vyākhyāsyāmaḥ//

śleṣmā hi snigdhaślakṣṇamṛdumadhurasārasāndramandastimitaguruśītavijjalācchaḥ/

tasya snehācchleṣmalāḥ snigdhāṅgāḥ, ślakṣṇatvācchlakṣṇāṅgāḥ, mṛdutvāddṛṣṭisukhasukumārāvadātagātrāḥ, māduryāt prabhūtaśukravyavāyāpatyāḥ, sāratvāt sārasaṃhatasthiraśarīrāḥ, sāndratvādupacitaparipūrṇasarvāṅgāḥ, mandatvānmandaceṣṭāhāravyāhārāḥ, staimityādaśīdhrārambhakṣobhavikārāḥ, gurutvāt sārādhiṣṭhitāvasthitagatayaḥ, śaityādalpakṣuttṛṣṇāsaṃtāpasvedadoṣāḥ, vijjalatvāt suśliṣṭasārasandhibandhanāḥ, tathā+acchatvāt prasannadarśanānanāḥ prasannasnigdhavarṇasvarāśca bhavanti/

ta evaṃguṇayogācchleṣmalā balavanto vasumanto vidyāvanta aujasvinaḥ śāntā āyuṣmantaśca bhavanti//

pittamuṣṇaṃ tīkṣṇaṃ dravaṃ visramamlaṃ kaṭukaṃ ca/

tasyauṣṇyāt pittalā bhavantyuṣṇāsahā, uṣṇamukhāḥ, *sukumārāvadātagātrāḥ, prabhūtavipluvyaṅgatilapiḍakāḥ, kṣutpipāsāvantaḥ, kṣipravalīpalitakhālityadoṣāḥ, prāyo mṛdvalpakapilaśmaśrulomakeśāśca; taikṣṇyāttīkṣṇaparākramāḥ, tīkṣṇāgnayaḥ, prabhūtāśanapānāḥ, kleśāsahiṣṇavo, dandaśūkāḥ; dravatvācchithilamṛdusandhimāṃsāḥ, prabhūtasṛṣṭasvedamūtrapurīṣāśca; visratvāt prabhūtapūtikakṣāsyaśiraḥśarīragandhāḥ; kaṭvamlatvādalpaśukravyavāyāpatyāḥ; ta evaṃguṇayogāt pittalā madhyabalā madhyāyuṣo madhyajñānavijñānavittopakaraṇavantaśca bhavanti//

vātastu rūkṣalaghucalabahuśīghraśītaparuṣaviśadaḥ/

tasya raukṣyādvātalā rūkṣāpacitālpaśarīrāḥ pratatarūkṣa-*kṣāmasannasaktajarjarasvarā jāgarūkāśca bhavanti, laghutvāllaghucapalagaticeṣṭāhāravyāhārāḥ, calatvādanavasthitasandhyakṣibhrūhanvoṣṭhajihvāśriraḥskandhapāṇipādāḥ, bahutvādbahupralāpakaṇḍarāsirāpratānāḥ, śīghratvācchrīghrasamārambhakṣobhavikārāḥ śīghratrāsarāgavirāgāḥ śrutagrāhiṇo+alpasmṛtayaśca, śaityācchītāsahiṣṇavaḥ pratataśītakodvepakastambhāḥ, pāruṣyāt paruṣakeśaśmaśruromanakhadaśanavadanapāṇipādāḥ, vaiśadyāt sphuṭitāṅgāvayavāḥ satatasandhiśabdagāminaśca bhavanti; ta evaṃ guṇayogādvātalāḥ prāyeṇālpabalāścālpāyuṣaścālpāpatyāścālpasādhanāścālpadhanāśca bhavanti//

saṃsargāt saṃsṛṣṭalakṣaṇāḥ//

sarvaguṇasamuditāstu samadhātavaḥ/

ityevaṃ prakṛtitaḥ parīkṣeta//

vikṛtitaśceti vikṛtirucyate vikāraḥ/

tatra vikāraṃ hetu-doṣa-dūṣya-prakṛti-deśa-kāla-balaviśeṣairliṅgataśca parīkṣeta, na hyantareṇa hetvādīnāṃ balaviśeṣaṃ vyādhibalaviśeṣopalabdhiḥ/

yasya hi vyādherdoṣa-dūṣya-prakṛti-deśa-kāla-balasāmyaṃ bhavati, mahacca hetuliṅgabalaṃ, sa vyādhirbalavān bhavati; tadviparyayāccālpabalaḥ; madhyabalastu doṣadūṣyādīnāmanyatamasāmānyāddhetuliṅgamadhyabalatvāccopalabhyate//

sārataśceti sārāṇyaṣṭau puruṣāṇāṃ balamānaviśeṣajñānārthamupadiśyante; tadyathā---tvagraktamāṃsamedo+asthimajjaśukrasattvānīti//

tatra snigdhaślakṣṇamṛduprasannasūkṣmālpagambhīrasukumāralomā saprabheva ca tvak tvaksārāṇām/

sā sāratā sukhasaubhāgyaiśvaryopabhogabuddhividyārogyapraharṣaṇānyāyuṣyatvaṃ cācaṣṭe//

karṇākṣimukhajihvānāsauṣṭhapāṇipādatalanakhalalāṭamehanaṃ snigdharaktavarṇaṃ śrīmadbhrājiṣṇu raktasārāṇām/

sā sāratā sukhamuddhatāṃ medhāṃ manasvitvaṃ saukumāryamanatibalamakleśasahiṣṇutvamuṣṇāsahiṣṇutvaṃ cācaṣṭe//

śaṅkhalalāṭakṛkāṭikākṣigaṇḍahanugrīvāskandhodarakakṣavakṣaḥpāṇipādasandhayaḥ sthiraguruśubhamāṃsopacitā māṃsasārāṇām/

sā sāratā kṣamāṃ dhṛtimalaulyaṃ vittaṃ vidyāṃ sukhamārjavamārogyaṃ balamāyuśca dīrghamācaṣṭe//

varṇasvaranetrakeśalomanakhadantauṣṭhamūtrapurīṣeṣu viśeṣataḥ sneho medaḥsārāṇām/

sā sāratā vittaiśvaryasukhopabhogapradānānyārjavaṃ sukumāropacāratāṃ cācaṣṭe//

pārṣṇigulphajānvaratnijatrucibukaśiraḥparvasthūlāḥ sthūlāsthinakhadantāścāsthisārāḥ/

te mahotsāhāḥ kriyāvantaḥ kleśasahāḥ sārasthiraśarīrā bhavantyāyuṣmantaśca//

mṛdvaṅgā balavantaḥ snigdhavarṇasvarāḥ sthūladīrghavṛttasandhayaśca majjasārāḥ/

te dīrghāyuṣo balavantaḥ śrutavittavijñānāpatyasaṃmānabhājaśca bhavanti//

saumyāḥ saumyaprekṣiṇaḥ kṣīrapūrṇalocanā iva praharṣabahulāḥ snigdhavṛttasārasamasaṃhataśikharadaśanāḥ prasannasnigdhavarṇasvarā bhrājiṣṇavo mahāsphicaśca śukrasārāḥ/

te *strīpriyopabhogā balavantaḥ sukhaiśvaryārogyavittasaṃmānāpatyabhājaśca bhavanti//

smṛtimanto bhaktimantaḥ kṛtajñāḥ prajñāḥ śucayo mahotsāhā dakṣā dhīrāḥ samaravikrāntayodhinastyaktaviṣādāḥ suvyavasthitagatigambhīrabuddhiceṣṭāḥ kalyāṇābhiniveśinaśca sattvasārāḥ/

teṣāṃ svalakṣaṇaireva guṇā vyākhyātāḥ//

tatra sarvaiḥ sārairupetāḥ puruṣā bhavantyatibalāḥ *paramasukhayuktāḥ kleśasahāḥ sarvārambheṣvātmani jātapratyayāḥ kalyāṇābhiniveśinaḥ sthirasamāhitaśarīrāḥ susamāhitagatayaḥ sānunādasnigdhagambhīramahāsvarāḥ sukhaiśvaryavittopabhogasaṃmānabhājo mandajaraso mandavikārāḥ prāyastulyaguṇavistīrṇāpatyāścirajīvinaśca//

ato viparītāstvasārāḥ//

madhyānāṃ madhyaiḥ sāraviśeṣairguṇaviśeṣā vyākhyātā bhavanti//

iti sārāṇyaṣṭau puruṣāṇāṃ balapramāṇaviśeṣajñānārthamupadiṣṭāni bhavanti//

kathaṃ nu śarīramātradarśanādeva bhiṣaṅnuhyedayamupacitatvādbalavān, ayamalpabalaḥ kṛśatvāt, mahābalo+ayaṃ mahāśarīratvāt, ayamalpaśarīratvādalpabala iti; dṛśyante hyalpaśarīrāḥ kṛśāścaike balavantaḥ; tatra pipīlikābhāraharaṇavat siddhiḥ/

ataśca sārataḥ *parīkṣetetyuktam//

saṃhananataśceti saṃhananaṃ, *saṃhati saṃyojanamityeko+arthaḥ/

tatra samasuvibhaktāsthi, subaddhasandhi, suniviṣṭamāṃsaśoṇitaṃ, susaṃhataṃ śarīramityucyate/

tatra susaṃhataśarīrāḥ puruṣā balavantaḥ, viparyayeṇālpabalāḥ, madhyatvāt saṃhananasya madhyabalā bhavanti//

pramāṇataśceti śarīrapramāṇaṃ punaryathāsvenāṅgulipramāṇenopadekṣyate utsedhavistārāyāmairyathākramam/

tatra *pādau catvāri ṣaṭ caturdaśāṅgulāni, jaṅghe tvaṣṭādaśāṅgule ṣoḍaśāṅgulaparikṣepe ca, jānunī caturaṅgule ṣoḍaśāṅgulaparikṣepe, triṃśadaṅgulaparikṣepāvaṣṭādaśāṅgulāvūru, ṣaḍaṅguladīrghau vṛṣaṇāvaṣṭāṅgulapariṇāhau, śephaḥ ṣaḍaṅguladīrghaṃ pañcāṅgulapariṇāhaṃ, dvādaśāṅgulipariṇāho bhagaḥ, ṣoḍaśāṅgulavistārā kaṭī, daśāṅgulaṃ bastiśiraḥ, daśāṅgulavistāraṃ dvādaśāṅgulamudaraṃ, daśāṅgulavistīrṇe dvādaśāṅgulāyāme pārśve, dvādaśāṅgulaṃ stanāntaraṃ, dvyaṅgulaṃ stanaparyantaṃ, caturviṃśatyaṅgulaviśālaṃ dvādaśāṅgulotsedhamuraḥ, *dvyaṅgulaṃ hṛdayam, aṣṭāṅgulau skandhau, ṣaḍaṅgulāvaṃsau, ṣoḍaśāṅgulau prabāhū, pañcadaśāṅgulau prapāṇī, hastau *dvādaśāṅgulau, kakṣāvaṣṭāṅgulau, trikaṃ dvādaśāṅgulotsadham, aṣṭādaśāṅgulotsedhaṃ pṛṣṭhaṃ, caturaṅgulotsedhā dvāviṃśatyaṅgulapariṇāhā śirodharā, dvādaśāṅgulotsedhaṃ caturviṃśatyaṅgulapariṇāhamānanaṃ, pañcāṅgulamāsyaṃ, cibukauṣṭhakarṇākṣimadhyanāsikālalāṭaṃ caturaṅgulaṃ, ṣoḍaśāṅgulotsedhaṃ dvātriṃśadaṅgulapariṇāhaṃ śiraḥ; iti pṛthaktvenāṅgāvayavānāṃ mānamuktam/

kevalaṃ punaḥ śarīramaṅguliparvāṇi caturaśītiḥ/

tadāyāmavistārasamaṃ samucyate/

tatrāyurbalamojaḥ sukhamaiśvaryaṃ vittamiṣṭāścāpare bhāvā bhavantyāyattāḥ pramāṇavati śarīre; viparyayastvato hīne+adhike vā//

sātmyataśceti sātmyaṃ nāma tadyat sātatyenopasevyamānamupaśete/

tatra ye ghṛtakṣīratailamāṃsarasasātmyāḥ sarvarasasātmyāśca te balavantaḥ kleśasahāścirajīvinaśca bhavanti, rūkṣasātmyāḥ punarekarasasātmyāśca ye te prāyeṇālpabalā alpakleśasahā alpāyuṣo+alpasādhanāśca bhavanti, vyāmiśrasātmyāstu ye te madhyabalāḥ sātmyanimittato bhavanti//

sattvataśceti sattvamucyate manaḥ/

taccharīrasya tantrakamātmasaṃyogāt/

tantrividhaṃ balabhedena---pravaraṃ, madhyam, avaraṃ ceti; ataśca pravaramadhyāvarasattvāḥ puruṣā bhavanti/

tatra pravarasattvāḥ sattvasārāste sāreṣūpadiṣṭāḥ, svalpaśarīrā hyapi te nijāgantunimittāsu mahatīṣvapi *pīḍāsvavyathā dṛśyante sattvaguṇavaiśeṣyāt; madhyasattvāstva-*parānātmanyupanidhāya saṃstambhayantyātmanā++ātmānaṃ parairvā+api saṃstabhyante; hīnasattvāstu nātmanā nāpi paraiḥ sattvabalaṃ prati śakyante upastambhayituṃ, mahāśarīrā hyapi te svalpānāmapi vedanānāmasahā dṛśyante, sannihitabhayaśokalobhamohamānā raudrabhairadviṣṭabībhatsavikṛtasaṃkathāsvapi ca paśupuruṣamāṃsaśoṇitāni cāvekṣya viṣādavaivarṇyamūrcchonmādabhramaprapatanānāmanyatamamāpnuvantyathavā maraṇamiti//

āhāraśaktitaśceti āhāraśaktirabhyavaharaṇaśaktyā jaraṇaśaktyā ca parīkṣyā; balāyuṣī hyāhārāyatte//

vyāyāmaśaktitaśceti vyāyāmaśaktirapi karmaśaktyā parīkṣyā/

karmaśaktyā hyanumīyate *balatraividhyam//

vayastaśceti kālapramāṇaviśeṣāpekṣiṇī hi śarīrāvasthā vayo+abhidhīyate/

tadvayo *yathāsthūlabhedena trividhaṃ---bālaṃ, madhyaṃ, jīrṇamiti/

tatra bālamaparipakvadhātumajātavyañjanaṃ sukumāramakleśasahamasaṃpūrṇabalaṃ śleṣmadhātuprāyamāṣoḍaśavarṣaṃ, vivardhamānadhātuguṇaṃ punaḥ prāyeṇānavasthitasattvamātriṃśadvarṣamupadiṣṭaṃ; madhyaṃ punaḥ samatvāgatabalavīryapauruṣaparākramagrahaṇadhāraṇasmaraṇavacanavijñānasarvadhātuguṇaṃ balasthitamavasthitasattvamaviśīryamāṇadhātuguṇaṃ pittadhātuprāyamāṣaṣṭivarṣamupadiṣṭam; ataḥ paraṃ hīyamānadhātvindriyabalavīryapauruṣaparākramagrahaṇadhāraṇasmaraṇavacanavijñānaṃ bhraśyamānadhātuguṇaṃ vāyudhātuprāyaṃ krameṇa jīrṇamucyate āvarṣaśatam/

varṣaśataṃ khalvāyuṣaḥ pramāṇamasmin kāle; santi ca punaradhikonavarṣaśatajīvino+api manuṣyāḥ; teṣāṃ vikṛtivarjyaiḥ prakṛtyādibalaviśeṣairāyuṣo lakṣaṇataśca pramāṇamupalabhya vayasastritvaṃ vibhajet//

evaṃ prakṛtyādīnāṃ vikṛtivarjyānāṃ bhāvānāṃ pravaramadhyāvaravibhāgena balaviśeṣaṃ vibhajet/

vikṛtibalatraividhyena tu doṣabalaṃ trividhamanumīyate/

tato bhaiṣajyasya tīkṣṇamṛdumadhyavibhāgena traividhyaṃ vibhajya yathādoṣaṃ bhaiṣajyamavacārayediti//

āyuṣaḥ pramāṇajñānahetoḥ punar-*indriyeṣu jātisūtrīye ca lakṣaṇānyupadekṣyante//

kālaḥ punaḥ saṃvatsaraścāturāvasthā ca/

tatra saṃvatsaro dvidhā tridhā ṣoḍhā dvādaśadhā bhūyaścāpyataḥ pravibhajyate tattatkāryamabhisamīkṣya/

atra khalu tāvat ṣoḍhā pravibhajya kāryamupadekṣyate-hemanto grīṣmo varṣāśceti śītoṣṇavarṣalakṣaṇāstraya ṛtavo bhavanti, teṣāmantarreṣvitare sādhāraṇalakṣaṇāstraya ṛtavaḥ-prāvṛṭśaradvasantā iti/

prāvṛḍiti prathamaḥ *pravṛṣṭaḥ kālaḥ, tasyānubandho hi varṣāḥ/

evamete saṃśodhanamadhikṛtya ṣaṭ vibhajyante ṛtavaḥ//

tatra sādhāraṇalakṣaṇeṣvṛtuṣu vamanādīnāṃ pravṛttirvidhīyate, nivṛttiritareṣu/

sādhāraṇalakṣaṇā hi mandaśītoṣṇavarṣatvāt sukhatamāśca bhavantyavikalpakaśaśca śarīrauṣadhānām, itare punaratyarthaśītoṣṇavarṣatvādduḥkhatamāśca bhavatni vikalpakāśca śarīrauṣadhānām//

tatra hemante hyatimātraśītopahatatvāccharīramasukhopapannaṃ bhavatyatiśītavātādhmātamatidāruṇībhūtamavabaddhadoṣaṃ ca, bheṣajaṃ punaḥ saṃśodhanārthamuṣṇasvabhāvamatiśītopahatatvānmandavīryatvamāpadyate, tasmāttayoḥ saṃyoge saṃśodhanamayogāyopapadyate śarīramapi ca vātopadravāya/

grīṣme punarbhṛśoṣṇopahatatvāccharīramasukhopapannaṃ bhavatyuṣṇavātātapādhmātamatiśithilamatyarthapravilīnadoṣaṃ, bheṣajaṃ punaḥ saṃśodhanārthamuṣṇasvabhāvamuṣṇānugamanāttīkṣṇataratvamāpadyate, tasmāttayoḥ saṃyoge saṃśodhanamatiyogāyopapadyate śarīrāmapi pipāsopadravāya/

varṣāsu tu meghajalāvatate gūḍhārkacandratāre dhārākule viyati bhūmau paṅkajalapaṭalasaṃvṛtāyāmatyarthopaklinnaśarīreṣu bhūteṣu vihatasvabhāveṣu ca kevaleṣvauṣadhagrāmeṣu *toyatoyadānugatamārutasaṃsargād gurupravṛttīni vamanādīni bhavanti, gurusamutthānāni ca śarīrāṇi/

tasmādvamanādīnāṃ nivṛttirvidhīyate *varṣānteṣvṛtuṣu, na cedātyayikaṃ karma/

ātyayike punaḥ karmaṇi kāmamṛtuṃ vikalpya kṛtrimaguṇopadhānena yathartuguṇaviparītena bheṣajaṃ saṃyogasaṃskārapramāṇavikalpenopapādya pramāṇavīryasamaṃ kṛtvā tataḥ prayojayeduttamena yatnenāvahitaḥ//

āturāvasthāsvapi tu kāryākāryaṃ prati kālākālasaṃjñā; tadyathā---asyāmavasthāyām-*asya bheṣajasyākālaḥ, kālaḥ punaranyasyeti; etadapi hi bhavatyavasthāviśeṣeṇa; tasmādāturāvasthāsvapi hi kālākālasaṃjñā/

tasya parīkṣā---muhurmuhurāturasya sarvāvasthāviśeṣāvekṣaṇaṃ yathāvadbheṣajaprayogārtham/

na hyatipatitakālamaprāptakālaṃ vā bheṣajamupayujyamānaṃ yaugikaṃ bhavati; kālo hi bhaiṣajyaprayogaparyāptimabhinirvartayati//

pravṛttistu pratikarmasamārambhaḥ"

tasya lakṣaṇaṃ bhiṣagauṣadhāturaparicārakāṇāṃ kriyāsamāyogaḥ//

upāyaḥ punarbhiṣagādīnāṃ sauṣṭhavam-*abhividhānaṃ ca samyak/

tasya lakṣaṇaṃ---bhiṣagādīnāṃ yathoktaguṇasaṃpat deśakālapramāṇasātmyakriyādibhiśca siddhikāraṇaiḥ samyagupapāditasyauṣadhasyāvacāraṇamiti//

evamete daśa parīkṣyaviśeṣāḥ pṛthak pṛthak parīkṣitavyā bhavanti//

parīkṣāyāstu khalu prayojanaṃ pratipattijñānam/

pratipattirnāma yo vikārāro yathā pratipattavyastasya tathā+anuṣṭhānajñānam//

yatra tu khalu vamanādīnāṃ pravṛttiḥ, yatra ca nivṛttiḥ, tadvyāsataḥ siddhiṣūttaramupadekṣyāmaḥ//

pravṛnivṛttilakṣaṇasaṃyoge tu gurulāghavaṃ saṃpradhārya samyagadhyavasyedanyataraniṣṭhāyām/

santi hi vyādhayaḥ śāstreṣūtsargāpavādairupakramaṃ prati nirdiṣṭāḥ/

tasmādgurulāghavaṃ saṃpradhārya samyagadhyavasyedityuktam//

yāni tu khalu vamanādiṣu bheṣajadravyāṇyupayogaṃ gacchanti tānyanuvyākhyāsyāmaḥ/

tadyathā---phalajīmūtakekṣvākudhāmārgavakuṭajakṛtavedhanaphalāni, phalajīmūtakekṣvākudhāmārgavapatrapuṣpāṇi āragvadhavṛkṣakamadanasvādukaṇṭakāpāṭhāpāṭalāśārṅgeṣṭāmūrvāsaptaparṇanaktamālapicumardapaṭolasuṣavīguḍūcīcitrakasomavalkaśatāvarīdvīpīśigrumūlakaṣāyaiḥ, madhukamadhūkakovidārakarvudāranīpavidulabimbīśaṇapuṣpīsadāpuṣpāpratyak puṣpākaṣāyaiśca, elāhareṇupriyaṅgupṛthvīkākustumburutagaranaladahrīvera-*tālīśośīrakaṣāyaiśca, ikṣukāṇḍekṣvikṣuvālikādarbhapoṭagalakālaṅkṛ(ṅka)takaṣāyaiśca, sumanāsaumanasyāyanīharidrādāruharidrāvṛścīrapunarnavāmahāsahākṣudrasahākaṣāyaiśca, śālmaliśālmalikabhadraparṇyelāparṇyupodikoddālakadhanvanarājādanipacitrāgopīśṛṅgāṭikākaṣāyaiśca, pippalīpippalīmūlacavyacitrakaśṛṅgaverasarṣapaphāṇitakṣīrakṣāralavaṇodakaiśca, yathālābhaṃ yatheṣṭaṃ vā+apyupasaṃskṛtya vartikriyācūrṇāvalehasnehakaṣāyamāṃsarasayavāgūyūṣakāmbalikakṣīropadheyānmodakānanyāṃśca bhakṣyaprakārān vividhānanuvidhāya yathārhaṃ vamanārhāya dadyādvidhivadvamanam/

iti kalpasaṃgraho vamanadravyāṇām/

kalpameṣāṃ vistāreṇottarakālamupadekṣyāmaḥ//

virecanadravyāṇi tu śyāmātrivṛccaturaṅgulatilvakamahāvṛkṣasaptalāśāṅkhinīdantīdravantīnāṃ kṣīramūlatvakpatrapuṣpaphalāni yathāyogaṃ taistaiḥ kṣīramūlatvakpatrapuṣpaphalairvikliptāvikliptaiḥ, ajagandhāśvagandhājaśṛṅgīkṣīriṇīnīlinīklītakakaṣāyaiśca, prakīryodakīryāmasūravidalākampillakaviḍaṅgagavākṣīkaṣāyaiśca, pīlupriyālamṛdvīkākāśmaryaparūṣakabadaradāḍimāmalakaharītakībibhītakavṛścīrapunarnavāvidārigandhādikaṣāyaiśca, sīdhusurāsauvīrakatuṣodakamaireyamedakamadirāmadhumadhūlakadhānyāmlakuvalabadarakharjūrakarkandhubhiśca, dadhidadhimaṇḍodaśvidbhiśca, gomahiṣyajāvīnāṃ ca kṣīramūtrairyathālābhaṃ yatheṣṭaṃ vā+apyupasaṃskṛtya vartikriyācūrṇāsavalekasnehakaṣāyamāṃsarasayūṣakāmbalikayavāgūkṣīropadheyān modakānanyāṃśca bhakṣyapra(vi)kārān *vividhāṃśca yogānanuvidhāya yathārhaṃ virecanārhāya dadyādvirecanam/

iti kalpasaṃgraho virecanadravyāṇām/

kalpameṣāṃ vistareṇa yathāvaduttarakālamupadekṣyāmaḥ//

āsthāpaneṣu tu bhūyiṣṭhakalpāni dravyāṇi yāni yogamupayānti teṣu teṣvavasthāntareṣvāyurāṇāṃ, tāni dravyāṇi nāmato vistareṇopadiśyamānānyaparisaṃkhyeyāni syuratibahutvāt; iṣṭaścānatisaṃkṣepavistaropadeśastantre, iṣṭaṃ ca kevalaṃ jñānaṃ, tasmādrasata eva tānyatra vyākhyāsyāmaḥ/

*rasasaṃsargavikalpavistaro hyeṣāmaparisaṅkhyeyaḥ, samavetānāṃ rasānāmaṃśāṃśabalavikalpātibahutvāt/

tasmāddravyāṇāṃ caikadeśamudāharaṇārthaṃ raseṣvanuvibhajya rasaikaikaśyena ca nāmalakṣaṇārthaṃ ṣaḍāsthāpanaskandhā rasato+anuvibhajya vyākhyāsyante//

yattu ṣaḍvidhamāsthāpanamekarasamityācakṣate bhiṣajaḥ, taddurlabhatamaṃ saṃsṛṣṭarasabhūyiṣṭhatvāddravyāṇām/

tasmānmadhurāṇi madhuraprāyāṇi madhuravipākāni madhuraprabhāvāṇi ca madhuraskandhe madhurāṇyeva kṛtvopadekṣyante, tathetarāṇi dravyāṇyapi//

tadyathā---jīvakarṣabhakau jīvantī vīrā tāmalakī kākolī kṣīrakākolī mudgaparṇī māṣaparṇī śālaparṇī pṛśniparṇya-*sanaparṇī medā mahāmedā karkaṭaśṛṅgī śṛṅgāṭikā chinnaruhā cchatrā+aticchatrā śrāvaṇī mahāśrāvaṇī sahadevā viśvadevā śuklā kṣīraśuklā balā+atibalā vidārī kṣīravidārī kṣudrasahā mahāsahā ṛṣyagandhā+aśvagandhā vṛścīraḥ punarnavā bṛhatī kaṇṭakārikorubūko moraṭaḥ śvadaṃṣṭrā saṃharṣā śatāvarī śatapuṣpā madhūkapuṣpī yaṣṭīmadhu madhūlikā mṛdvīkā kharjūraṃ parūṣakamātmaguptā puṣkarabījaṃ kaśerukaṃ rājakaśerukaṃ rājādanaṃ katakaṃ kāśmaryaṃ śītapākyodanapākī tālakharjūramastakamikṣurikṣuvālikā darbhaḥ kuśaḥ kāśaḥ śālirgundretkaṭakaḥ śaramūlaṃ rājakṣavakaḥ ṛṣyaproktā dvāradā bhāradvājī vanatrapuṣyabhīrupatrī haṃsapādī kākanāsikā kuliṅgākṣī kṣīraballī kapolavallī kapotavallī somavallī gopavallī madhuvallī ceti; eṣāmevaṃvidhānāmanyeṣāṃ ca madhuravargaparisaṃkhyātānāmauṣadhadravyāṇāṃ chedyāni khaṇḍaśaśchedayitvā bhedyāni cāṇuśo bhedayitvā prakṣa lya pānīyena suprakṣālitāyāṃ sthālyāṃ samāvāpya payasā+ardhodakenābhyāsicya sādhayeddarvyā satatamavaghaṭṭayan; tadupayuktabhūyiṣṭhe+ambhasi gataraseṣvauṣadheṣu payasi cānupadagdhe sthālīmupahṛtya *suparipūtaṃ payaḥ sukhoṣṇaṃ ghṛtatailavasāmajjalavaṇaphāṇitopahitaṃ bastiṃ vātavikāriṇe vidhijño vidhivaddadyāt; śītaṃ tu madhusarpirbhyāmupasaṃsṛjya pittavikāriṇe vidhivaddadyāt/

iti madhuraskandhaḥ//

āmrāmrātakalakucakaramardavṛkṣāmlāmlavetasakuvalabadaradāḍimamātuluṅgagaṇḍīrāmalakanandītakaśītakatintiṇḍīkadantaśaṭhairāvatakakośāmradhanvanānāṃ phalāni, patrāṇi cāmrātakāśmantakacāṅgerīṇāṃ caturvidhānāṃ cāmlikānāṃ dvayośca kolayoścāmaśuṣkayordvayoścaiva śuṣkāmlikayorgrāmyāraṇyayoḥ, āsavadravyāṇi ca surāsauvīrakatuṣodakamaireyamedakamadirāmadhuśuktaśīdhudadhidadhimaṇḍodaśviddhānyāmlādīni ca, eṣāmevaṃvidhānāmanyeṣāṃ cāmlavargaparisaṃkhyātānāmauṣadhadravyāṇāṃ chedyāni khaṇḍaśaśchedayitvā bhedyāni cāṇuśo bhedayitvā dravaiḥ sthālyāmabhyāsicya sādhayitvopasaṃskṛtya yathāvattailavasāmajjalavaṇaphāṇitopahitaṃ sukhoṣṇaṃ vātavikāriṇe vidhijño vidhivaddadyāt/

ityamlaskandhaḥ//

saindhavasauvarcalakālaviḍapākyānūpakūpyavālukailamaulakasāmudraromakaudbhidauṣarapāṭeyakapāṃśujānyevaṃprakārāṇi cānyāni lavaṇavargaparisaṃkhyātāni, etānyamlopahitānyuṣṇodakopahitāni vā snehavanti sukhoṣṇaṃ bastiṃ vātavikāriṇe vidhijño vidhivaddadyāt/

iti lavaṇaskandhaḥ//

pippalīpippalīmūlahastipippacavyacitrakaśṛṅgaveramaricājamodārdrakaviḍaṅgakustumburupīlutejovatyelākuṣṭhabhallātakāsthihiṅguniryāsakilimamūlakasarṣapalaśunakarañjaśigrukamadhuśigrukakharapuṣpabhūstṛṇasumukhasurasakuṭherakārjakagaṇḍīrakālamālakaparṇāsakṣavakaphaṇijjhakakṣāramūtrapittānīti; eṣāmevaṃvidhānāṃ cānyeṣāṃ kaṭukavargaparisaṃkhyātānāmauṣadhadravyāṇāṃ chedyāni khaṇḍaśaśchedayitvā bhedyāni cāṇuśo bhedayitvā gomūtreṇa saha sādhayitvopasaṃskṛtya yathāvanmadhutailalavaṇopahitaṃ sukhoṣṇaṃ bastiṃ śleṣmavikāriṇe vidhijño vidhivaddadyāt/

iti kaṭukaskandhaḥ//

candananaladakṛtamālanaktamālanimbatumburukuṭajaharidrādāruharidrāmustamūrvākirātatiktakakaṭukarohiṇītrāyamāṇākāravellikākarīrakaravīrakebukakaṭhillakavṛṣamaṇḍūkaparṇīkarkoṭakavārtākukarkaśakākamācīkākodumbarikāsuṣavyativiṣāpaṭolakulakapāṭhāguḍūcīvetrāgravetasavikaṅkatabakulasomavalkasaptaparṇasumanārkāvalguja-*vacātagarāguruvālakośīrāṇīti, eṣāmevaṃvidhānāṃ cānyeṣāṃ tiktavargaparisaṃkhyātānāmauṣadhadravyāṇāṃ chedyāni khaṇḍaśaśchedayitvā bhedyāni cāṇuśo bhedayitvā prakṣālya pānīyenābhyāsicya sādhayitvopasaṃskṛtya yathāvanmadhutailalavaṇopahitaṃ sukhoṣṇaṃ bastiṃ śleṣmavikāriṇe vidhijño vidhivaddadyāt, śītaṃ tu madhusarpirbhyāmapasaṃsṛjya pittavikāriṇe vidhijño vidhivaddadyāt/

iti tiktaskandhaḥ//

priyagṅvanantāmrāsthyambaṣṭhakīkaṭvaṅgalodhramocarasasamaṅgādhātakīpuṣpapadmāpadmakeśarajambvāmraplakṣavaṭakapītanodumbarāśvatthabhallātakāsthyaśmantakaśirīṣaśiṃśapāsomavalkatindukapriyālabadarakhadirasaptaparṇaśvakarṇasyandanārjunārimedailavālukaparipelavakadambaśallakījiṅginīkāśakaśerukarājakaśerukaṭphalavaṃśapadmakāśokaśāladhavasarjabhūrjaśaṇakharapuṣpāpuraśamīmācīkavarakatuṅgājakarṇasphūrjakabibhītakakumbhīpuṣkarabījabisamṛṇālatālakharjūra-*taruṇānīti, eṣāmevaṃvidhānāṃ cānyeṣāṃ kaṣāyavargaparisaṃkhyātānāmauṣadhadravyāṇāṃ chedyāni khaṇḍaśaśchedayitvā bhedyāni cāṇuśo bhedayitvā prakṣālya pānīyenābhyāsicya sādhayitvopasaṃskṛtya yathāvanmadhutailalavaṇopahitaṃ sukhoṣṇaṃ bastiṃ śleṣmavikāriṇe vidhijño vidhivaddadyāt, śītaṃ tu madhusarpirbhyāmupasaṃsṛjya pittavikāriṇe dadyāt/

iti kaṣāyaskandhaḥ//

tatra ślokāḥ--- ṣaḍvargāḥ parisaṃkhyātā ya ete rasabhedataḥ/

āsthāpanamabhipretya tānvidyātsārvayaugikān//

sarśo hi praṇihitāḥ sarvarogeṣu jānatā/

sarvānrogānniyacchanti yebhya āsthāpanaṃ hitam//

yeṣāṃ yeṣāṃ praśāntyarthaṃ ye ye na parikīrtitāḥ/

dravyavargā vikārāṇāṃ teṣāṃ te parikopakāḥ//

ityete ṣaḍāsthāpanaskandhā rasato+anuvibhajya vyākhyātāḥ//

tebhyo bhiṣagbuddhimān parisaṃkhyātamapi yadyaddravyamayaugikaṃ manyeta, tattadapakarṣayet; yadyaccānuktamapi yaugikaṃ manyeta, tattadvidadhyāt; vargamapi vargeṇopasaṃsṛjedekamekenānekena vā yuktiṃ pramāṇīkṛtya/

pracaraṇamiva bhikṣukasya bījamiva karṣakasya sūtraṃ buddhimatāmalpamapyanalpajñānāya bhavati; tasmādbuddhimatāmūhāpohavitarkāḥ, mandabuddhestu yathoktānugamanameva śreyaḥ/

yathoktaṃ hi mārgamanugacchan bhiṣak saṃsādhayati *kāryamanatimahattvādvā vinipātayatyanatihrasvatvādudāharaṇasyeti//

ataḥ paramanuvāsanadravyāṇyanuvyākhyāsyāmaḥ/

anuvāsanaṃ tu sneha eva/

snehastu dvividhaḥ---sthāvarātmakaḥ, jaṅgamātmakaśca/

tatra sthāvarātmakaḥ snehastailamatailaṃ ca/

taddvayaṃ tailameva kṛtvopadekṣyāmaḥ, sarvatastailaprādhānyāt/

jaṅgamātmakastu vasā, majjā, sarpiriti/

teṣāṃ tailavasāmajjasarpiṣāṃ yathāpūrvaṃ śreṣṭhaṃ vātaśleṣmavikāreṣvanuvāsanīyeṣu, yathottaraṃ tu pittavikāreṣu, sarva eva vā sarvavikāreṣvapi yogamupayānti saṃskāravidhiviśeṣāditi//

śirovirecanadravyāṇi punarapāmārgapippalīmaricaviḍaṅgaśigruśirīṣatumburupilvajājyajamodāvārtākīpṛthvīkailāhareṇukāphalāni ca, sumukhasurasakuṭherakagaṇḍīrakālamālakaparṇāsakṣavakaphaṇijjhakaharidrāśṛṅgaveramūlakalaśunatarkārīsarṣapapatrāṇi ca, arkālarkakuṣṭhanāgadantīvacāpāmārgaśvetājyotiṣmatīgavākṣīgaṇḍīrapuṣyavākpuṣpīvṛścikālīvayasthātiviṣāmūlāni ca, haridrāśṛṅgaveramūlakalaśunakandāśca, lodhramadanasaptaparṇanimbārkapuṣpāṇi ca, devadārvagurusaralaśallakījiṅginyasanahiṅguniryāsāśca, tejovatīvarāṅgeṅgudīśobhāñjanakabṛhatīkaṇṭakārikātvacaśceti/

śirovirecanaṃ saptavidhaṃ, phala-patra-mūla-kanda-puṣpa-niryāsa-tvagāśrayabhedāt/

lavaṇakaṭutiktakaṣāyāṇi cendriyopaśayāni tathā+aparāṇyanuktānyapi dravyāṇi yathāyogavihitāni śirovirecanārthamupadiśyante iti//

tatra ślokāḥ---

lakṣaṇācāryaśiṣyāṇāṃ parīkṣā kāraṇaṃ ca yat/
adhyeyādhyāpanavidhī saṃbhāṣāvidhireva ca//
ṣaḍbhirūnāni pañcāśadvādamārgapadāni ca/
padāni daśa cānyāni kāraṇādīni tattvataḥ//
saṃpraśnaśca parīkṣādernavako vamanādiṣu/
bhiṣagjitīye rogāṇāṃ vimāne saṃprakāśitaḥ//
bahuvidhamidamuktamarthajātaṃ bahuvidhavākyavicitramarthakāntam/
bahuvidhaśubhaśabdasandhiyuktaṃ bahuvidhavādanisūdanaṃ pareṣām//
imāṃ matiṃ bahuvidhahetusaṃśrayāṃ vijajñivān paramatavādasūdanīm/
*na sajjate paravacanāvamardanairna śakyate paravacanaiśca marditum//
doṣādīnāṃ tu bhāvānāṃ sarveṣāmeva hetumat/
mānāt samyagvimānāni niruktāni vibhāgaśaḥ//
ityagniveśakṛte tantre carakapratisaṃskṛte vimānasthāne rogabhiṣagjitīyavimānaṃ nāmāṣṭamo+adhyāyaḥ//

(agniveśakṛte tantre carakapratisaṃskṛte/

anenāvadhinā sthānaṃ vimānānāṃ samarthitam/) vimānasthānavyākhyā samāptā/

4. śārīrasthāna

4.1. prathamo+adhyāyaḥ/

athātaḥ katidhāpuruṣīyaṃ śārīraṃ vyākhyāsyāmaḥ//

iti ha smāha bhagavānātryaḥ//

katidhā puruṣo dhīman ! dhātubhedena bhidyate/
puruṣaḥ kāraṇaṃ kasmāt, prabhavaḥ puruṣasya kaḥ//
kimajño jñaḥ, sa nityaḥ kiṃ kimanityo nidarśitaḥ/
prakṛtiḥ kā, vikārāḥ ke, kiṃ liṅgaṃ puruṣasya ca//
niṣkriyaṃ ca svatantraṃ ca vaśinaṃ sarvagaṃ vibhum/
vadantyātmānamātmajñāḥ kṣetrajñaṃ sākṣiṇaṃ tathā//
niṣkriyasya kriyā tasya bhagavan ! vidyate katham/
svatantraścedaniṣṭāsu kathaṃ yoniṣu jāyate//
vaśī yadyasukhaiḥ kasmādbhāvairākramyate balāt/
sarvāḥ sarvagatatvācca vedanāḥ kiṃ na vetti saḥ//
na paśyati vibhuḥ kasmācchailakuḍyatiraskṛtam/
kṣetrajñaḥ kṣetramathavā kiṃ pūrvamiti saṃśayaḥ//
jñeyaṃ kṣetraṃ vinā pūrvaṃ kṣetrajñaḥ hi na yujyate/
kṣetraṃ ca yadi pūrvaṃ syāt kṣetrajñaḥ syādaśāśvataḥ//
sākṣibhūtaśca kasyāyaṃ kartā hyanyo na vidyate/
syāt kathaṃ cāvikārasya viśeṣo vedanākṛtaḥ//
atha cārtasya bhagavaṃstisṛṇāṃ kāṃ cikitsati/
atītāṃ vedanāṃ vaidyo vartamānāṃ bhaviṣyatīm//
bhaviṣyantyā asaṃprāptiratītāyā anāgamaḥ/
sāṃpratikyā api sthānaṃ nāstyarteḥ saṃśayo hyataḥ//
kāraṇaṃ vedanānāṃ kiṃ,kimadhiṣṭhānamucyate/
kva caitā vedanāḥ sarvā nivṛttiṃ yāntyaśeṣataḥ//
sarvavit sarvasaṃnyāsī sarvasaṃyoganiḥsṛtaḥ/
ekaḥ praśānto bhūtātmā kairliṅgairupalabhyate//
[Note: 'vacastadagniveśasya'iti pā+]ityagniveśasya vacaḥ śrutvā matimatāṃ varaḥ/
sarvaṃ yathāvat provāca praśāntātmā punarvasuḥ//
[Note: 'khādayaścetanādhātuṣaṣṭāstu'iti pā+]khādayaścetanāṣaṣṭā dhātavaḥ puruṣaḥ smṛtaḥ/
cetanādhāturapyekaḥ smṛtaḥ puruṣasaṃjñakaḥ//
punaśca dhātubhedena caturviṃśatikaḥ smṛtaḥ/
mano daśendriyāṇyarthāḥ prakṛtiścāṣṭadhātukī//
lakṣaṇaṃ manaso jñānasyābhāvo bhāva eva ca/
sati hyātmendriyārthānāṃ sannikarṣe na vartate//
vaivṛttyānmanaso jñānaṃ sānnidhyāttacca vartate/
aṇutvamatha caikatvaṃ dvau guṇau manasaḥ smṛtau//
cintyaṃ vicāryamūhyaṃ ca dhyeyaṃ saṃkalpyameva ca/
yatkiṃcinmanaso jñeyaṃ tat sarvaṃ hyarthasaṃjñakam//
indriyābhigrahaḥ karma manasaḥ svasya nigrahaḥ/
ūho vicāraśca,tataḥ paraṃ buddhiḥ pravartate//
indriyeṇendriyārtho hi samanaskena gṛhyate/
kalpyate manasā tūrdhvaṃ guṇato doṣato+athavā//
jāyate viṣaye tatra yā buddhirniścayātmikā/
vyavasyati tayā vaktuṃ kartuṃ vā buddhipūrvakam//
ekaikādhikayuktāni khādīnāmindriyāṇi tu/
pañca karmānumeyāni yebhyo buddhiḥ pravartate//
[Note: 'hastapādaṃ'iti pā+]hastau pādau gudopasthaṃ vāgindriyamathāpi ca/
karmendriyāṇi pañcaiva pādau gamanakarmaṇi//
pāyūpasthaṃ visargārthaṃ hastau grahaṇadhāraṇe/
jihvā vāgindriyaṃ vāk ca satyā jyotistamo+anṛtā//
mahābhūtāni khaṃ vāyuragnirāpaḥ kṣitistathā/
śabdaḥ sparśaśca rūpaṃ ca raso gandhaśca tadguṇāḥ//
[Note: 'teṣāmekaguṇaṃ pūrvaṃ'iti pā+]teṣāmekaguṇaḥ pūrvo guṇavṛddhiḥ pare pare/
pūrvaḥ [Note: 'pūrvo guṇaścaiva'iti pā+]pūrvaguṇaścaiva kramaśo guṇiṣu smṛtaḥ//
kharadravacaloṣṇatvaṃ bhūjalānilatejasām/
ākāśasyāpratīghāto dṛṣṭaṃ liṅgaṃ yathākramam//
lakṣaṇaṃ sarvamevaitat sparśanendriyagocaram/
sparśanendriyavijñeyaḥ sparśo hi saviparyayaḥ//
guṇāḥ śarīre guṇināṃ nirdiṣṭāścihnameva ca /
arthāḥ śabdādayo jñeyā gocarā viṣayā guṇāḥ//
yā yadindriyamāśritya jantorbuddhiḥ pravartate /
yāti sā tena nirdeśaṃ manasā ca manobhavā//
bhedāt kāryendriyārthānāṃ bahvyo vai buddhayaḥ smṛtāḥ/
ātmendriyamanorthānām- [Note: 'ekaikasannikarṣajāḥ'iti pā+]ekaikā sannikarṣajā//
aṅgulyaṅguṣṭhatalajastantrīvīṇānakhodbhavaḥ/
dṛṣṭaḥ śabdo yathā buddhirdṛṣṭā saṃyogajā tathā//
buddhīndriyamanorthānāṃ vidyādyogadharaṃ param/
caturviṃśatiko hyeṣa rāśiḥ puruṣasaṃjñakaḥ//
rajastamobhyāṃ yuktasya saṃyogo+ayamanantavān/
tābhyāṃ nirākṛtābhyāṃ tu [Note: 'sattvabuddhyā'iti pā+]sattvavṛddhyā nirvartate//
atra karma phalaṃ cātra jñānaṃ cātra pratiṣṭhitam/
atra mohaḥ sukhaṃ duḥkhaṃ jīvitaṃ maraṇaṃ svatā//
[Note: 'etadyo veda'iti pā+]evaṃ yo veda tattvena sa veda pralayodayau/
pāraṃparyaṃ cikitsāṃ ca [Note: 'vedyaṃ yaccātra'iti pā+]jñātavyaṃ yacca kiṃcana//
bhāstamaḥ satyamanṛtaṃ vedāḥ karma śubhāśubham/
na syuḥ [Note: 'kartā veditā' iti pā+]kartā ca boddhā ca puruṣo na bhavedyadi//
nāśrayo na sukhaṃ nārtirna gatirnāgatirna vāk/
na vijñānaṃ na śāstrāṇi na janma maraṇaṃ na ca//
na bandho na ca mokṣaḥ syāt puruṣo na bhavedyadi/
kāraṇaṃ puruṣastasmāt kāraṇajñairudāhṛtaḥ//
na cet kāraṇamātmā syād- [Note: 'khādayaḥ' iti pā+]bhādayaḥ syurahetukāḥ/
na caiṣu saṃbhavej jñānaṃ na ca taiḥ syāt prayojanam//
kṛtaṃ mṛddaṇḍacakraiśca kumbhakārādṛte ghaṭam/
kṛtaṃ mṛttṛṇakāṣṭhaiśca gṛhakārādvinā gṛham//
yo vadet sa vadeddehaṃ saṃbhūya karaṇaiḥ kṛtam/
vinā kartāramajñānādyuktyāgamabahiṣkṛtaḥ//
kāraṇaṃ puruṣaḥ sarvaiḥ pramāṇairupalabhyate//
yebhyaḥ prameyaṃ sarvebhya āgamebhyaḥ pramīyate//
na te tatsadṛśāstvanye pāraṃparyasamutthitāḥ/
sārūpyādye ta eveti nirdiśyante navā navāḥ//
bhāvāsteṣāṃ samudayo nirīśaḥ sattvasaṃjñakaḥ/
kartā bhoktā na sa pumāniti kecidvyavasthitāḥ//
teṣāmanyaiḥ kṛtasyānye [Note: 'bhāvairbhāvā' iti pā+]bhāvā bhāvairnavāḥ phalam/
bhuñjate sadṛśāḥ prāptaṃ yairātmā nopadiśyate//
karaṇānyānyatā dṛṣṭā kartuḥ kartā sa eva tu/
kartā hi karaṇairyuktaḥ kāraṇaṃ sarvakarmaṇām//
nimeṣakālādbhāvānāṃ kālaḥ śīghrataro+atyaye/
bhagnānāṃ [Note: 'ca' iti pā+]na punarbhāvaḥ kṛtaṃ nānyamupaiti ca//
mataṃ tattvavidāmetadyasmāttasmāt sa kāraṇam/
kriyopabhoge bhūtānāṃ nityaḥ puruṣasaṃjñakaḥ//
ahaṅkāraḥ phalaṃ karma dehāntaragatiḥ smṛtiḥ/
vidyate sati bhūtānāṃ kāraṇe dehamantarā//
prabhavo na hyanāditvādvidyate paramātmanaḥ/
puruṣo rāśisaṃjñastu mohecchādveṣakarmajaḥ//
ātmā jñaḥ karaṇairyogāj jñānaṃ tvasya pravartate/
karaṇānāmavaimalyādayogādvā na vartate//
paśyato+api yathā++ādarśe saṃkliṣṭe nāsti darśanam/
[Note: 'yadvajjale' iti pā+]tattvaṃ jale vā kaluṣe cetasyupahate tathā//
karaṇāni mano buddhirbuddhikarmendriyāṇi ca/
kartuḥ saṃyogajaṃ karma vedanā buddhireva ca//
naikaḥ pravartate kartuṃ bhūtātmā nāśnute phalam/
saṃyogādvartate sarvaṃ tamṛte nāsti kiñcana//
na hyeko vartate bhāvo vartate nāpyahetukaḥ/
śīghragatvāt- [Note: 'svabhāvāttu bhāvo na vyativartate'iti pā+]svabhāvāttvabhāvo na vyativartate//
anādiḥ puruṣo nityo viparītastu hetujaḥ/
sadakāraṇavannityaṃ dṛṣṭaṃ hetujamanyathā//
tadeva bhāvādagrāhyaṃ [Note: 'nityatvānna kutaścana'iti pā+]nityatva na kutaścana/
bhāvājjñeyaṃ tadavyaktamacintyaṃ vyaktamanyathā//
avyaktamātmā kṣetrajñaḥ śāśvato vibhuravyayaḥ/
tasmādyadanyattadvyaktaṃ, vakṣyate cāparaṃ dvayam//
vyaktamaindriyakaṃ caiva gṛhyate tadyadindriyaiḥ/
ato+anyat punaravyaktaṃ liṅgagrāhyamatīndriyam//
khādīni buddhiravyaktamahaṅkārastathā+aṣṭamaḥ/
bhūtaprakṛtiruddiṣṭā vikārāścaiva ṣoḍaśa//
buddhīndriyāṇi pañcaiva pañca karmendriyāṇi ca/
samanaskāśca pañcārthā vikārā iti saṃjñitāḥ//
iti kṣetraṃ samuddiṣṭaṃ sarvamavyaktavarjitam/
avyaktamasya kṣetrasya kṣetrajñamṛṣayo viduḥ//
jāyate buddhiravyaktādbuddhyā+ahamiti manyate/
paraṃ [Note: 'khādīnyahaṅkāra upādatte' iti pā+]khādīnyahaṅkārādutpadyante yathākramam//
tataḥ saṃpūrṇasarvāṅgo jāto+abhyudita ucyate/
puruṣaḥ pralaye ceṣṭaiḥ punarbhāvairviyujyate//
avyaktādvyaktatāṃ yāti vyaktādavyaktatāṃ punaḥ/
rajastamobhyāmāviṣṭaścakravat parivartate//
yeṣāṃ dvandve parā saktirahaṅkāraparāśca ye/
udayapralayau teṣāṃ na teṣāṃ ye tvato+anyathā//
prāṇāpānau nimeṣādyā jīvanaṃ manaso gatiḥ/
indriyāntarasaṃcāraḥ preraṇaṃ dhāraṇaṃ ca yat//
deśāntaragatiḥ svapne pañcatvagrahaṇaṃ tathā/
dṛṣṭasya dakṣiṇenākṣṇā savyenāvagamastathā//
icchā dveṣaḥ sukhaṃ duḥkhaṃ prayatnaścetanā dhṛtiḥ/
buddhiḥ smṛtirahaṅkāro liṅgāni paramātmanaḥ//
yasmāt samupalabhyante liṅgānyetāni jīvataḥ/
na mṛtasyātmaliṅgāni tasmādāhurmaharṣayaḥ//
śarīraṃ hi gate tasmiñ śūnyāgāramacetanam/
pañcabhūtāvaśeṣatvāt pañcatvaṃgatamucyate//
acetanaṃ kriyāvacca manaścetayitā paraḥ/
yuktasya manasā tasya nirdiśyante vibhoḥ kriyāḥ//
cetanāvān yataścātmā tataḥ kartā nirucyate/
acetanatvācca manaḥ kriyāvadapi nocyate//
yathāsvenātmanā++ātmānaṃ sarvaḥ sarvāsu yoniṣu/
prāṇaistantrayate prāṇī nahyanyo+astyasya tantrakaḥ//
vaśī tat kurute karma yat kṛtvā phalamaśnute/
vaśī cetaḥ samādhatte vaśī sarvaṃ nirasyati//
[Note: 'dehe sarvagataścātmā' iti pā+]dehī sarvagato+apyātmā sve sve saṃsparśanendriye/
sarvāḥ sarvāśrayasthāstu nātmā+ato vetti vedanāḥ//
vibhutvamata evāsya yasmāt sarvagato mahān/
manasaśca samādhānāt paśyatyātmā tiraskṛtam//
nityānubandhaṃ manasā dehakarmānupātinā/
sarvayonigataṃ vidyādekayonāvapi sthitam//
[Note: 'anādirātmā kṣetrasya pāramparyamanādikam' iti pā+]ādirnāstyātmanaḥ kṣetrapāraṃparyamanādikam/
atastayoranāditvāt kiṃ pūrvamiti nocyate//
jñaḥ sākṣītyucyate nājñaḥ sākṣī tvātmā yataḥ smṛtaḥ/
sarve bhāvā hi sarveṣāṃ bhūtānāmātmasākṣikāḥ//
naikaḥ kadācidbhūtātmā lakṣaṇairupalabhyate/
viśeṣo+anupalabhyasya tasya naikasya vidyate//
saṃyogapuruṣasyeṣṭo viśeṣo vedanākṛtaḥ/
vedanā yatra niyatā viśeṣastatra tatkṛtaḥ//
cikitsati bhiṣak sarvāstrikālā vedanā iti/
yayā yuktyā vadantyeke sā yuktirupadhāryatām//
punastacchirasaḥ śūlaṃ jvaraḥ sa punarāgataḥ/
punaḥ sa kāso balavāṃśchardiḥ sā punarāgatā//
ebhiḥ prasiddhavacanairatītāgamanaṃ matam/
kālaścāyamatītānāmartīnāṃ punarāgataḥ//
tamartikālamuddiśya bheṣajaṃ yat prayujyate/
atītānāṃ praśamanaṃ vedanānāṃ taducyate//
āpastāḥ punarāgurmā yābhiḥ śasyaṃ purā hatam/
yathā prakriyate setuḥ pratikarma tathā++āśraye//
pūrvarūpaṃ vikārāṇāṃ dṛṣṭvā prādurbhaviṣyatām/
yā kriyā kriyate sā ca vedanāṃ hantyanāgatām
pāraṃparyānubandhastu duḥkhānāṃ vinivartate/
sukhahetūpacāreṇa sukhaṃ cāpi pravartate//
na samā yānti vaiṣamyaṃ viṣamāḥ samatāṃ na ca /
hetubhiḥ sadṛśā nityaṃ jāyante dehadhātavaḥ//
yuktimetāṃ puraskṛtya trikālāṃ vedanāṃ bhiṣak/
hantītyuktaṃ cikitsā tu naiṣṭhikī yā vinopadhām
upadhā hi paro heturduḥkhaduḥkhāśrayapradaḥ/
tyāgaḥ sarvopadhānāṃ ca sarvaduḥkhavyapohakaḥ//
koṣakāro yathā hyaṃśūnupādatte [Note: 'vadhāvahān' iti pā+]vadhapradān/
upādatte tathā+arthebhyastṛṣṇāmajñaḥ sadā++āturaḥ//
yastvagnikalpānarthāñ jño jñātvā tebhyo nivartate/
anārambhādasaṃyogāttaṃ duḥkhaṃ nopatiṣṭhate//
dhīdhṛtismṛtivibhraṃśaḥ saṃprāptiḥ kālakarmaṇām/
asātmyārthāgamaśceti jñātavyā duḥkhahetavaḥ//
viṣamābhiniveśo yo nityānitye hitāhite/
jñeyaḥ sa buddhivibhraṃśaḥ samaṃ buddhirhi paśyati//
viṣayapravaṇaṃ sattvaṃ dhṛtibhraṃśānna śakyate/
niyantumahitādarthāddhṛtirhi niyamātmikā//
tattvajñāne smṛtiryasya rajomohāvṛtātmanaḥ/
bhraśyate sa smṛtibhraṃśaḥ smartavyaṃ hi smṛtau sthitam
dhīdhṛtismṛtivibhraṣṭaḥ karma yat kurute+aśubham/
prajñāparādhaṃ taṃ vidyāt sarvadoṣaprakopaṇam//
udīraṇaṃ gatimatāmudīrṇānāṃ ca nigrahaḥ/
sevanaṃ sāhasānāṃ ca nārīṇāṃ cātisevanam//
karmakālātipātaśca mithyārambhaśca karmaṇām/
vinayācāralopaśca pūjyānāṃ cābhidharṣaṇam//
jñātānāṃ svayamarthānāmahitānāṃ niṣevaṇam/
paramaunmādikānāṃ ca pratyayānāṃ niṣevaṇam//
akālādeśasaṃcārau maitrī saṃkliṣṭakarmabhiḥ/
indriyopakramoktasya sadvṛttasya ca varjanam//
īrṣyāmānabhayakrodhalobhamohamadabhramāḥ/
tajjaṃ vā karma yat kliṣṭaṃ kliṣṭaṃ yaddehakarma ca//
yaccānyadīdṛśaṃ karma rajomohasamutthitam/
prajñāparādhaṃ taṃ śiṣṭā bruvate [Note: 'vyādhikāriṇam'iti pā+]vyādhikāraṇam//
buddhyā viṣamavijñānaṃ viṣamaṃ ca pravartanam/
prajñāparādhaṃ jānīyānmanaso gocaraṃ hi tat//
nirdiṣṭā kālasaṃprāptirvyādhīnāṃ vyādhisaṃgrahe/
cayaprakopapraśamāḥ pittādīnāṃ yathā purā//
mithyātihīnaliṅgāśca varṣāntā rogahetavaḥ/
[Note: 'bhuktajīrṇaprajīrṇānnakālāḥ'iti pā+]jīrṇabhuktaprajīrṇānnakālākālasthitiśca yā//
pūrvamadhyāparāhṇāśca rātryā yāmāstrayaśca ye/
eṣu kāleṣu niyatā ye rogāste ca kālajāḥ//
anyedyuṣko dvyahagrāhī tṛtīyakacaturthakau/
sve sve kāle pravartante kāle hyeṣāṃ balāgamaḥ//
ete [Note: anye ca ye keciditi ardhāvabhedakāpasmārādayaḥ]cānye ca ye kecit kālajā vividhā gadāḥ/
anāgate cikitsyāste balakālau vijānatā//
kālasya pariṇāmena jarāmṛtyunimittajāḥ/
rogāḥ svābhāvikā dṛṣṭāḥ svabhāvo niṣpratikriyaḥ
nirdiṣṭaṃ daivaśabdena karma yat paurvadehikam/
hetustadapi kālena rogāṇāmupalabhyate//
na hi karma mahat kiñcit phalaṃ yasya na bhujyate/
kriyāghnāḥ karmajā rogāḥ praśamaṃ yānti tatkṣayāt
atyugraśabdaśravaṇācchravaṇāt sarvaśo na ca /
śabdānāṃ cātihīnānāṃ bhavanti śravaṇājjaḍāḥ//
paruṣodbhīṣaṇāśastāpriyavyasanasūcakaiḥ/
śabdaiḥ śravaṇasaṃyogo mithyāsaṃyoga ucyate//
asaṃsparśo+atisaṃsparśo hīnasaṃsparśa eva ca /
spṛśyānāṃ saṃgraheṇoktaḥ sparśanendriyabādhakaḥ//
yo bhūtaviṣavātānāmakālenāgataśca yaḥ/
snehaśītoṣṇasaṃsparśo mithyāyogaḥ sa ucyate
rūpāṇāṃ bhāsvatāṃ dṛṣṭirvinaśyatyatidarśanāt/
darśanāccātisūkṣmāṇāṃ sarvaśaścāpyadarśanāt//
[Note: '+tikliṣṭadarśanāt' iti pā+]dviṣṭabhairavabībhatsadūrātiśliṣṭadarśanāt/
tāmasānāṃ ca rūpāṇāṃ mithyāsaṃyoga ucyate
atyādānamanādānamokasātmyādibhiśca yat/
rasānāṃ viṣamādānamalpādānaṃ ca dūṣaṇam//
atimṛdvatitīkṣṇānāṃ gandhānāmupasevanam/
asevanaṃ sarvaśaśca ghrāṇendriyavināśanam//
pūtibhūtaviṣadviṣṭā gandhā ye cāpyanārtavāḥ/
tairgandhairghrāṇasaṃyogo mithyāyogaḥ sa ucyate//
ityasātmyārthasaṃyogastrividho doṣakopanaḥ/
asātmyamiti tadvidyādyanna yāti sahātmatām
mithyātihīnayogebhyo yo vyādhirupajāyate/
śabdādīnāṃ sa vijñeyo vyādhiraindriyako budhaiḥ//
[Note: 'asātmyānāṃ'iti pā+]vedanānāmaśāntānāmityete hetavaḥ smṛtāḥ/
sukhahetuḥ samastvekaḥ samayogaḥ sudurlabhaḥ//
nendriyāṇi na caivārthāḥ sukhaduḥkhasya hetavaḥ/
hetustu sukhaduḥkhasya yogo dṛṣṭaścaturvidhaḥ//
santīndriyāṇi santyarthā yogo [Note: 'nāsti' iti pā+]na ca na cāsti ruk/
na sukhaṃ, kāraṇaṃ tasmādyoga eva caturvidhaḥ//
nātmendriyaṃ mano buddhiṃ [Note: 'nātmendriyamanobuddhigocaraṃ' iti pā+]gocaraṃ karma vā vinā/
sukhaduḥkhaṃ, yathā yacca boddhavyaṃ tattathocyate//
sparśanendriyasaṃsparśaḥ sparśo mānasa eva ca /
dvividhaḥ sukhaduḥkhānāṃ vedanānāṃ pravartakaḥ//
icchādveṣātmikā tṛṣṇā sukhaduḥkhāt pravartate/
tṛṣṇā ca sukhaduḥkhānāṃ kāraṇaṃ punarucyate//
upādatte hi sā bhāvān vedanāśrayasaṃjñakān/
spṛśyate nānupādāne nāspṛṣṭo vetti vedanāḥ//
vedanānāmadhiṣṭhānaṃ mano dehaśca sendriyaḥ/
keśalomanakhāgrānnamaladravaguṇairvinā//
yoge mokṣe ca sarvāsāṃ vedanānāmavartanam/
mokṣe nivṛttirniḥśeṣā yogo mokṣapravartakaḥ//
ātmendriyamanorthānāṃ sannikarṣāt pravartate/
sukhaduḥkhamanārambhādātmasthe manasi sthire//
nivartate tadubhayaṃ vaśitvaṃ copajāyate/
saśarīrasya yogajñāstaṃ yogamṛṣayo viduḥ//
āveśaścetaso jñānamarthānāṃ chandataḥ kriyā/
dṛṣṭiḥ śrotraṃ smṛtiḥ kāntiriṣṭataścāpyadarśanam//
ityaṣṭavidhamākhyātaṃ yogināṃ balamaiśvaram/
śuddhasattvasamādhānāttat sarvamupajāyate//
mokṣo rajastamo+abhāvāt balavatkarmasaṃkṣayāt/
viyogaḥ sarvasaṃyogairapunarbhava ucyate//
satāmupāsanaṃ samyagasatāṃ parivarjanam/
vratacaryopavāsau ca niyamāśca pṛthagvidhāḥ//
dhāraṇaṃ darmaśāstrāṇāṃ vijñānaṃ vijane ratiḥ/
viṣayeṣvaratirmokṣe vyavasāyaḥ parā dhṛtiḥ//
karmaṇāmasamārambhaḥ kṛtānāṃ ca parikṣayaḥ/
[Note: 'naiṣkarmyaṃ'iti pā+]naiṣkramyamanahaṅkāraḥ saṃyoge bhayadarśanam//
manobuddhisamādhānamarthatattvaparīkṣaṇam/
tattvasmṛterupasthānāt sarvametat pravartate//
smṛtiḥ satsevanādyaiśca dhṛtyantairupajāyate/
smṛtvā svabhāvaṃ bhāvānāṃ smaran duḥkhāt pramucyate
vakṣyante kāraṇānyaṣṭau smṛtiryairupajāyate/
nimittarūpagrahaṇāt sādṛśyāt saviparyayāt//
sattvānubandhādabhyāsājjñānayogāt punaḥ śrutāt/
dṛṣṭaśrutānubhūtānāṃ smaraṇāt smṛtirucyate//
etattadekamayanaṃ muktairmokṣasya darśitam/
tattvasmṛtibalaṃ, yena gatā na punarāgatāḥ//
ayanaṃ punarākhyātametadyogasya yogibhiḥ/
saṃkhyātadharmaiḥ sāṃkhyaiśca muktairmokṣasya cāyanam//
sarvaṃ kāraṇavadduḥkhamasvaṃ cānityameva ca/
na cātmakṛtakaṃ taddhi tatra cotpadyate svatā//
yāvannotpadyate satyā buddhirnaitadahaṃ yayā/
naitanmameti vijñāya jñaḥ sarvamativartate//
tasmiṃścaramasaṃnyāse samūlāḥ sarvavedanāḥ/
[Note: 'samagrajñeyavijñānānnivṛttiṃ' iti pā+]sasaṃjñājñānavijñānā nivṛttiṃ yāntyaśeṣataḥ//
ataḥ paraṃ brahmabhūto bhūtātmā nopalabhyate/
niḥsṛtaḥ sarvabhāvebhyaścihnaṃ yasya na vidyate//
/ (gatirbrahmavidāṃ brahma taccākṣaramalakṣaṇam)(by gaṅgādhara ed.)/
jñānaṃ brahmavidāṃ cātra nājñastajjñātumarhati//

tatra ślokaḥ---

praśnāḥ puruṣamāśritya trayoviṃśatiruttamāḥ/

katidhāpuruṣīye+asminnirṇītāstattvadarśinā// ityagniveśakṛte tantre carakapratisaṃskṛte śārīrasthāne katidhāpuruṣīyaṃ śārīraṃ nāma prathamo+adhyāyaḥ//1//

4.2. dvitīyo+adhyāyaḥ/

athāto+atulyagotrīyaṃ śārīraṃ vyākhyāsyāmaḥ//

iti ha smāha bhagavānātreyaḥ//

atulyagotrasya rajaḥkṣayānte rahovisṛṣṭaṃ mithunīkṛtasya/ kiṃ syāccatuṣpātprabhavaṃ ca [Note: 'catuṣpadaṃ ṣaḍprabhavaṃ kimasya'iti pā+]ṣaḍbhyo yat strīṣu garbhatvamupaiti puṃsaḥ//
śukraṃ tadasya pravadanti dhīrā yaddhīyate garbhasamudbhavāya/
vāyvagnibhūmyabguṇapādavattat ṣaḍbhyo rasebhyaḥ prabhavaśca tasya//
saṃpūrṇadehaḥ samaye sukhaṃ ca garbhaḥ kathaṃ kena ca jāyate strī/
garbhaṃ cirādvindati saprajā+api bhūtvā+athavā naśyati kena garbhaḥ//
śukrāsṛgātmāśayakālasaṃpad yasyopacāraśca [Note: 'hitaistathā+arthaiḥ'iti pā+]hitaistathā+annaiḥ/ garbhaśca kāle ca sukhī sukhaṃ ca saṃjāyate saṃparipūrṇadehaḥ//
yonipradoṣānmanaso+abhitāpācchukrāsṛgāhāravihāradoṣāt/
akālayogādbalasaṃkṣayācca garbhaṃ cirādvindati saprajā+api//
[&'vibaddhaṃ'iti pā+]asṛṅniruddhaṃ pavanena nāryā garbhaṃ vyavasyantyabudhāḥ kadācit/
garbhasya rūpaṃ hi karoti tasyāstadasṛgasrāvi vivardhamānam//
[Note: tadagnisūryaśramaroṣaśokaiḥ'iti pā+]tadagnisūryaśramaśokarogairuṣṇānnapānairathavā pravṛttam/
[Note: 'dṛṣṭvā+asṛgevaṃ'iti pā+]dṛṣṭvā+asṛgekaṃ na ca garbhasaṃjñaṃ kecinnarā bhūtahṛtaṃ vadanti//
ojośanānāṃ rajanīcarāṇāmāhārahetorna śarīramiṣṭam/
garbhaṃ hareyuryadi te na māturlabdhāvakāśā na hareyurojaḥ//
kanyāṃ sutaṃ vā sahitau pṛthagvā sutau sute vā tanayāṃn bahūn vā/
kasmāt prasūte sucireṇa garbhameko+abhivṛddhiṃ ca yame+abhyupaiti//
raktena kanyāmadhikena putraṃ śukreṇa tena dvividhīkṛtena bījena kanyāṃ ca sutaṃ ca sūte yathāsvabījānyatarādhikena//
śukrādhikaṃ dvaidhamupaiti bījaṃ yasyāḥ sutau sā sahitau prasūte/
raktādhikaṃ vā yadi bhedameti dvidhā sute sā sahite prasūte//
bhinatti yāvadbahudhā prapannaḥ śukrārtavaṃ vāyuratipravṛddhaḥ/
tāvantyapatyāni yathāvibhāhaṃ karmātmakānyasvavaśāt prasūte//
āhāramāpnoti yadā na garbhaḥ śoṣaṃ samāpnoti parisrutiṃ vā/
taṃ strī prasūte sucireṇa garbhaṃ puṣṭo yadā varṣagaṇairapi syāt//
karmātmakatvādviṣamāṃśabhedācchukrāsṛjorvṛddhimupaiti kukṣau/
eko+adhiko nyūnataro dvitīya [Note: 'yame+adhike+apyeṣa bhavedviśeṣaḥ'iti pā+]evaṃ yame+apyabhyadhiko viśeṣaḥ //
kasmāddviretāḥ pavanendriyo vā saṃskāravāhī naranāriṣaṇḍau/
vakrī tatherṣyābhiratiḥ kathaṃ vā saṃjāyate vātikaṣaṇḍako vā//
bījāt samāṃśādupataptabījāt strīpuṃsaliṅgī bhavati dviretāḥ/
śukrāśayaṃ garbhagatasya [Note: 'gatvā'iti pā+]hatvā karoti vāyuḥ pavanendriyatvan//
śukrāśayadvāravighṭṭanena [Note: 'saṃskāravāhaṃ hi karoti vāyuḥ'iti pā+]saṃskāravāhaṃ kurute+anilaśca/
mandālpabījāvabalāvaharṣau klībau ca heturvikṛtidvayasya//
māturvyavāyapratighena vakrī syādbījadaurbalyatayā pituśca/
īrṣyābhibhūtāvapi mandaharṣā- [Note: '+vīrṣyāhvayasyaiva'iti pā+]vīrṣyāratereva vadanti hetum//
vāyvagnidoṣādvṛṣaṇau tu yasya nāśaṃ gatau vātikaṣaṇḍakaḥ saḥ/
ityevamaṣṭau vikṛtiprakārāḥ karmātmakānāmupalakṣaṇīyaḥ//
garbhasya sadyo+anugatasya kukṣau strīpuṃnapuṃsāmudarasthitānām/
kiṃ lakṣaṇaṃ? kāraṇamiṣyate kiṃ sarūpatāṃ yena ca yātyapatyam//
niṣṭhīvikā gauravamaṅgasādastandrāpraharṣau hṛdaye vyathā ca/
tṛptiśca bījagrahaṇaṃ ca yonyāṃ garbhasya sadyo+anugatasya liṅgam//
savyāṅgaceṣṭā [Note: 'susukhārthinī yā'iti pā+]puruṣārthinī strī strīsvapnapānāśanaśīlaceṣṭā/
[Note: 'savyāṅgagarbhā'iti pā+]savyāttagarbhā na ca vṛttagarbhā savyapradugdhā striyameva sūte//
putraṃ tvato liṅgaviparyayeṇa vyāmiśraliṅgā prakṛtiṃ tṛtīyām/
garbhopapattau tu manaḥ striyā yaṃ jantuṃ vrajettatsadṛśaṃ prasūte//
garbhasya catvāri caturvidhāni bhūtāni mātāpitṛsaṃbhavāni/
āhārajānyātmakṛtāni caiva sarvasya sarvāṇi bhavanti dehe//
teṣāṃ viśeṣādbalavanti yāni bhavanti mātāpitṛkarmajāni/
tāni vyavasyet sadṛśatvahetuṃ sattvaṃ yathānūkamapi vyavasyet//
kasmāt prajāṃ strī vikṛtāṃ prasūte hīnādhikāṅgīṃ vikalendriyāṃ vā/
dehāt kathaṃ dehamupaiti cānyamātmā sadā kairanubadhyate ca //
bījātmakarmāśayakāladoṣairmātustathā++āhāravihāradoṣaiḥ/
kurvanti doṣā vividhāni duṣṭāḥ saṃsthānavarṇendriyavaikṛtāni//
varṣāsu kāṣṭhāśmaghanāmbuvegāstaroḥ saritsrotasi saṃsthitasya/
yathaiva kuryurvikṛtiṃ tathaiva garbhasya kukṣau viyatasya doṣāḥ//
bhūtaiścaturbhiḥ sahitaḥ susūkṣmairmanojavo dehamupaiti dehāt/
karmātmakatvānna tu tasya dṛśyaṃ divyaṃ vinā darśanamasti rūpam//
sa sarvagaḥ sarvaśarīrabhṛcca sa viśvakarmā sa ca viśvarūpaḥ/
sa cetanādhāturatīndriyaśca sa nityayuk sānuśayaḥ sa [Note: 'ekaḥ'iti pā+]eva //
rasātmamātāpitṛsaṃbhavāni bhūtāni vidyāddaśa ṣaṭ ca dehe/
catvāri tatrātmani saṃśritāni sthitastathā++ātmā ca caturṣu teṣu//
bhūtāni mātāpitṛsaṃbhavāni rajaścaśukraṃ ca vadanti garbhe/
āpyāyyate śukramasṛk ca bhūtairyaistāni [Note: 'dehe rasajāni vidyāt'iti pā+]bhūtāni rasodbhavāni//
bhūtāni catvāri tu karmajāni yānyātmalīnāni viśanti garbham/
sa bījadharmā hyaparāparāṇi dehāntarāṇyātmani yāti yāti//
rūpāddhi rūpaprabhavaḥ prasiddhaḥ karmātmakānāṃ manaso manastaḥ/
bhavanti ye tvākṛtibuddhibhedā rajastamastatra ca karma hetuḥ//
atīndriyaistairatisūkṣmarūpairātmā kadācinna viyuktarūpaḥ/
na karmaṇā naiva manomatibhyāṃ na cāpyahaṅkāravikāradoṣaiḥ//
rajastamobhyāṃ hi mano+anubaddhaṃ jñānaṃ vinā tatra hi sarvadoṣāḥ/
gatipravṛttyostu nimittamuktaṃ manaḥ sadoṣaṃ balavacca karma//
rogāḥ kutaḥ saṃśamanaṃ kimeṣāṃ harṣasya śokasya ca kiṃ nimittam/
śarīrasattvaprabhavā vikārāḥ kathaṃ na śāntāḥ punarāpateyuḥ//
prajñāparādho viṣamāstathā+arthā hetustṛtīyaḥ pariṇāmakālaḥ/
sarvāmayānāṃ trividhā ca śāntirjñānārthakālāḥ samayogayuktāḥ//
dharmyāḥ kriyā harṣanimittamuktāstato+anyathā śokavaśaṃ nayanti/
śarīrasattvaprabhavāstu rogāstayoravṛttyā na bhavanti bhūyaḥ//
rūpasya sattvasya ca santatiryā noktastadādirnahi so+asti kaścit/
tayoravṛttiḥ kriyate parābhyāṃ dhṛtismṛtibhyāṃ parayā dhiyā ca//
satyāśraye vā dvividhe yathokte pūrvaṃ gadebhyaḥ pratikarma nityam/
jitendriyaṃ nānupatanti rogāstatkālayuktaṃ yadi nāsti daivam//
daivaṃ purā yat kṛtamucyate tat [Note: 'tanmānuṣaṃ'iti pā+]tat pauruṣaṃ yattviha karma dṛṣṭam/
pravṛttiheturviṣamaḥ sa dṛṣṭo nivṛttiheturhi samaḥ sa eva//
haimantikaṃ doṣacayaṃ vasante pravāhayan graiṣmakamabhrakāle/
ghanātyaye vārṣikamāśu samyak prāpnoti rogānṛtujānna [Note: 'jantuḥ'iti pā+]jātu //
naro hitāhāravihārasevī samīkṣyakārī viṣayeṣvasaktaḥ/
dātā samaḥ satyaparaḥ kṣamāvānāptopasevī ca bhavatyarogaḥ//
matirvacaḥ karma sukhānubandhaṃ sattvaṃ vidheyaṃ viśadā ca buddhiḥ/
jñānaṃ tapastatparatā ca yoge yasyāsti taṃ [Note: 'nānutapanti'iti pā+]nānupatanti rogāḥ//

tatra ślokaḥ/

ihāgniveśasya mahārthayuktaṃ ṣaṭtriṃśakaṃ praśnagaṇaṃ maharṣiḥ/
atulyagotre bhagavān yathāvannirṇītanām jñānavivardhanārthaṃ//

ityagniveśakṛte tantre carakapratisaṃskṛte śārīrasthāne+atulyagatrīyaṃ śārīraṃ nāma dvitīyo+adhyāyaḥ//2//

4.3. tṛtīyo+adhyāyaḥ/

athātaḥ khuḍḍikāṃ garbhāvakrāntiṃ śārīraṃ vyādhyāsyāmaḥ//

iti ha smāha bhagavānātreyaḥ//

puruṣasyānupahataretasaḥ striyāścāpraduṣṭayoniśoṇitagarbhāśayāyā yadā bhavati saṃsargaḥ ṛtukāle, yadā [Note: 'tayostathaiva yukte saṃsarge'iti, 'cānayostathāvidhayostathaiva yukte saṃsarge'iti ca pā+]cānayostathāyukte saṃsarge śukraśoṇitasaṃsargamantargarbhāśayagataṃ jīvo+avakrāmati sattvasaṃprayogāttadā garbho+abhinirvartate, sa sātmyarasopayogādarogo+abhivardhate samyagupacāraiścopacaryamāṇaḥ, tataḥ prāptakālaḥ sarvendriyopapannaḥ paripūrṇaśarīro balavarṇasattvasaṃhananasaṃpadupetaḥ sukhena jāyate samudayādeṣāṃ bhāvānāṃ---mātṛjaścāyaṃ garbhaḥ pitṛjaścātmajaśca sātmyajaśca rasajaśca, asti ca khalu [Note: 'sattvamupapādukaṃ'iti pā+]sattvamaupapādukamiti hovāca bhagavānātreyaḥ//

neti bharadvājaḥ, kiṃ kāraṇaṃ---na hi mātā na pitā nātmā na sātmyaṃ na pānāśanabhakṣyalehyopayogā garbhaṃ janayanti, na ca paralokādetya garbhaṃ sattvamavakrāmati//

yadi hi mātāpitarau garbhaṃ janayetāṃ, bhūyasyaḥ striyaḥ pumāṃsaśca bhūyāṃsaḥ putrakāmāḥ, te sarve putrajanmābhisandhāya maithunadharmamāpadyamānāḥ putrāneva janayeyurduhitYrvā duhitṛkāmāḥ, na tu kāścit striyaḥ kecidvā puruṣā nirapatyāḥ [Note: 'syuḥ/ na cāpatyakāmāḥ pavideveran'iti pā+]syurapatyakāmā vā parideveran//

na cātmā++ātmānaṃ janayati/

yadi hyātmā++ātmānaṃ janayejjāto vā janayedāyamānamajāto vā, taccobhayathā+apyayuktam/

na hi jāto janayati sattvāt, va cājāto janayatyasattvāt, tasmādubhayathā+apyanupapattiḥ/

tiṣṭhatu tāvadetat/

yadyayamātmā++ātmānaṃ śakto janayituṃ syāt, na tvenamiṣṭāsveva kathaṃ yoniṣu janayedvaśinamapratihatagatiṃ kāmarūpiṇaṃ tejobalajavavarṇasattvasaṃhananasamuditamajaramarujamamaram; evaṃvidhaṃ hyātmā++ātmānamicchatyato vā bhūyaḥ//

asātmyajaścāyaṃ garbhaḥ/

yadi hi sātmyajaḥ syāt, tarhi sātmyasevināmevaikāntena prajā syāt, asātmyasevinaśca nikhilenānapatyāḥ syuḥ, taccobhayamubhayatraiva dṛśyate//

arasajaścāyaṃ garbhaḥ/

yadi hi rasajaḥ syāt, na kecit strīpuruṣeṣvanapatyāḥ syuḥ, na hi kaścidastyeṣāṃ yo rasānnopayuḍkte; śreṣṭharasopayogināṃ cedgarbhājāyanta ityabhipretamiti, evaṃ satyājaurabhramārgamāyūragokṣīradadhighṛtamadhutailasaindhavekṣurasamudgaśālibhṛtānāmevaikāntena prajā syāt, śyāmākavarakoddālakakoradūṣakakandamūlabhakṣāśca nikhilenānapatyāḥ syuḥ, taccobhayamubhayatra dṛśyate//

na khalvapi paralokādetya sattvaṃ garbhamavakrāmati; yadi hyenamavakrāmet, nāsya kiñcit paurvadehikaṃ syādaviditamaśrutamadṛṣṭaṃ vā, sa ca tacca na kiñcidapi smarati//

tasmādetadbrūmahe---amātṛjaścāyaṃ garbho+apitṛjaścānātmajaścāsātmyajaścārasajaśca, na cāsti sattvamaupapādukamiti( [Note: yogīndranāthasenasyāsaṃmato+ayaṃ pāṭhaḥ]hovāca bharadvājaḥ)//

neti bhagavānātreyaḥ, sarvebhya ebhyo bhāvebhyaḥ samuditebhyo garbho+abhinirvartate//

mātṛjaścāyaṃ garbhaḥ/

na hi māturvinā garbhotpattiḥ syāt, na ca janma jarāyujānām/

yāni khalvasya garbhasya mātṛjāni, yāni cāsya mātṛtaḥ saṃbhavataḥ saṃbhavanti, tānyanuvyākhyāsyāmaḥ; tadyathā---tvak ca lohitaṃ ca māṃsaṃ ca medaśca nābhiśca hṛdayaṃ ca kloma ca yakṛcca plīhā ca vṛkkau ca bastiśca purīṣādhānaṃ cāmāśayaśca pakvāśayaścottaragudaṃ cādharagudaṃ ca kṣudrāntraṃ ca sthūlāntraṃ ca vapā ca vapāvahanaṃ ceti (mātṛjāni)//

pitṛjaścāyaṃ garbhaḥ/

nahi piturṛte garbhotpattiḥ syāt, na ca janma jarāyujānām/

yāni khalvasya garbhasya pitṛjāni, yāni cāsya pitṛtaḥ saṃbhavataḥ saṃbhavanti, tānyanuvyākhyāsyāmaḥ; tadyathā---keśaśmaśrunakhalomadantāsthisirāsnāyudhamanyaḥ śukraṃ ceti (pitṛjāni)//

ātmajaścāyaṃ garbhaḥ/

garbhātmā hyantarātmā yaḥ, taṃ 'jīva' ityācakṣate śāśvatamarujamajaramamaramakṣayamabhedyamacchedyamaloḍyaṃ viśvarūpaṃ viśvakarmāṇamavyaktamanādimanidhanamakṣaramapi/

sa garbhāśayamanupraviśya śukraśoṇitābhyāṃ saṃyogametya garbhatvena janayatyātmanā++ātmānam, ātmasaṃjñā hi garbhe/

tasya punarātmano janmānāditvānnopapadyate, [Note: 'tasmādajāta evāyamajātaṃ garbha janayati, jāto+apyajātaṃ ca garbhaṃ janayati'iti pā+]tasmānna jāta evāyamajātaṃ garbhaṃ janayati, ajāto hyayamajātaṃ garbhaṃ janayati; sa caiva garbhaḥ kālāntareṇa bālayuvasthavirabhāvān prāpnoti, sa yasyāṃ yasyāmavasthāyāṃ vartate tasyāṃ tasyāṃ jāto bhavati, yā tvasya puraskṛtā tasyāṃ janiṣyamāṇaśca, tasmāt sa eva jātaścājātaśca yugapadbhavati; yasmiṃścaitadubhayaṃ saṃbhavati jātatvaṃ janiṣyamāṇatvaṃ ca sa jāto janyate, sa caivānāgateṣvavasthāntareṣvajāto janyayatyātmanā++ātmanam/

sato hyavasthāntaragamanamātrameva hi janma cocyate tatra tatra vayasi tasyāṃ tasyāmavasthāyāṃ; yathā-satāmeva śukraśoṇitajīvānāṃ prāk saṃyogādgarbhatvaṃ na bhavati, tacca saṃyogādbhavati; yathā-satastasyaiva puruṣasya prāgapatyāt pitṛtvaṃ na bhavati, taccāpatyādbhavati; tathā satastasyaiva garbhasya tasyāṃ tasyāmavasthāyāṃ jātatvamajātatvaṃ cocyate//

na khalu garbhasya na ca māturna piturna cātmanaḥ sarvabhāveṣu yatheṣṭakāritvamasti; te kiṃcit svavaśāt kurvanti, kiṃcit karmavaśāt, kvaciccaiṣāṃ karaṇaśaktirbhavati, kvacinna bhavati/

yatra sattvādikaraṇasaṃpattatra yathābalameva yatheṣṭakāritvam, ato+avyathā viparyayaḥ /

na ca karaṇadoṣādakaraṇamātmā saṃbhavati garbhajanane, dṛṣṭaṃ ceṣṭā yoniraiśvaryaṃ mokṣaścātmavidbhirātmāyattam/

nahyanyaḥ sukhaduḥkhayoḥ kartā /

na cānyato garbho jāyate jāyamānaḥ, nāṅkurotpattirabījāt//

yāni tu khalvasya garbhasyātmajāni, yāni cāsyātmataḥ saṃbhavataḥ saṃbhavanti, tānyanuvyākhyāsyāmaḥ; tadyathā---tāsu tāsu yoniṣūtpattirāyurātmajñānaṃ mana indriyāṇi prāṇāpānau preraṇaṃ dhāraṇamākṛtisvaravarṇaviśeṣāḥ sukhaduḥkhe icchādveṣau cetanā dhṛtirbuddhiḥ smṛtirahaṅkāraḥ prayatnaśceti(ātmajāni)//

sātmyajaścāyaṃ garbhaḥ/

nahyasātmyasevitvamantareṇa strīpuruṣayorvandhyatvamasti, garbheṣu vā+apyaniṣṭo bhāvaḥ/

yāvāt khalvasātmyasevināṃ strīpuruṣāṇāṃ trayo doṣāḥ prakupitāḥ śarīramupasarpanto na śukraśoṇitagarbhāśayopaghātāyopapadyante, tāvat samarthā garbhajananāya bhavanti/

sātmyasevināṃ punaḥ strīpuruṣāṇāmanupahataśukraśoṇitagarbhāśayānāmṛtukāle sannipatitānāṃ jīvasyānavakramaṇādgarbhā na prādurbhavanti/

nati kevalaṃ sātmyaja evāyaṃ garbhaḥ, samudayo+atra kāraṇamucyate/

yāni khalvasya garbhasya sātmyajāni, yāni cāsya sātmyataḥ saṃbhavataḥ saṃbhavanti, tānyanuvyākhyāsyāmaḥ; tadyathā---ārogyamanālasyamalolupatvamindriyaprasādaḥ svaravarṇabījasaṃpat praharṣabhūyastvaṃ ceti (sātmyajāni)//

rasajaścāyaṃ garbhaḥ/

na hi rasādṛte mātuḥ prāṇayātrā+api syāt, kiṃ punargarbhajanma/

[Note: 'na caivāsyā asamyapayujyamānā'iti pā+]na caivāsamyagupayujyamānā rasā garbhamabhinirvartayanti, na ca kevalaṃ samyagupayogādeva rasānāṃ garbhābhinirvṛttirbhavati, [Note: 'samudāyo+atra'iti pā+]samudāyo+apyatra kāraṇamucyate/

yāni tu khalvasya garbhasya rasajāni, yāni cāsya rasataḥ saṃbhavataḥ saṃbhavanti, tānyanuvyākhyāsyāmaḥ; tadyathā---śarīrasyābhinirvṛttirabhivṛddhiḥ prāṇānubandhastṛptiḥ puṣṭirutsāhaśceti (rasajāni)//

asti khalu sattvamaupapādukaṃ; [Note: 'jīvaspṛkśarīreṇa'iti pā+]yajjīvaṃ spṛkśarīreṇābhisaṃbadhnāti, yasminnapagamanapuraskṛte śīlamasya vyāvartate, bhaktirviparyasyate, sarvendriyāṇyupatapyante, balaṃ hīyate, vyādhaya āpyāyyante, yasmāddhīnaḥ prāṇāñjahāti, yadindriyāṇāmabhigrāhakaṃ ca 'mana' ityabhidhīyate; tattrividhamākhyāyate---śuddhaṃ, rājasaṃ, tāmasamiti/

yenāsya khalu mano bhūyiṣṭhaṃ, tena [Note: 'dvitīyāyāṃ jātau'iti pā+]dvitīyāyāmājātau saṃprayogo bhavati; yadā tu tenaiva śuddhena saṃyujyate, tadā jāteratikrāntāyā api smarati/

smārtaṃ hi jñānamātmanastasyaiva manaso+anubandhādanuvartate, yasyānuvṛttiṃ puraskṛtya puruṣo 'jātismara' ityucyate/

yāni khalvasya garbhasya sattvajāni, yānyasya sattvataḥ saṃbhavataḥ saṃbhavanti, tānyanuvyākhyāsyāmaḥ; tadyathā---bhaktiḥ śīlaṃ śaucaṃ dveṣaḥ smṛtirmohastyāgo mātsaryaṃ śauryaṃ bhayaṃ krodhastandrotsāhastaikṣṇyaṃ mārdavaṃ gāmbhīryamanavasthitatvamityevamādayaścānye, te sattvavikārā yānuttarakālaṃ sattvabhedamadhikṛtyopadekṣyāmaḥ/

nānāvidhāni khalu sattvāni, tāni sarvāṇyekapuruṣe bhavanti, na ca bhavantyekakālam, ekaṃ tu [Note: 'prāyo+anuvṛttyā'iti pā+]prāyovṛttyā++āha //

evamayaṃ nānāvidhānāmeṣāṃ garbhakarāṇāṃ bhāvānāṃ samudāyādabhinirvartate garbhaḥ; yathā---kūṭāgāraṃ nānādravyasamudāyāt, yathā vā-ratho nānārathāṅgasamudāyāt; tasmādetadavocāma---mātṛjaścāyaṃ garbhaḥ; pitṛjaśca, ātmajaśca, sātmyajaśca, rasajaśca, asti ca sattvamaupapādukamiti(hovāca bhagavānātreyaḥ)//

bharadvāja uvāca---yadyayameṣāṃ nānāvidhānāṃ garbhakarāṇāṃ bhāvānāṃ samudāyādabhinirvartate garbhaḥ kathamayaṃ sandhīyate, yadi cāpi sandhīyate kasmāt samudāyaprabhavaḥ sam garbho manuṣyavigraheṇa jāyate, manuṣyaśca manuṣyaprabhava ucyate; tatra cediṣṭametadyasmānmanuṣyo manuṣyaprabhavastasmādeva manuṣyavigraheṇa jāyate, yathā-gaurgoprabhavaḥ, yathā-cāśvo+aśvaprabhava iti; evaṃ sati yaduktamagre samudayātmaka iti tadayuktam/

yadi ca manuṣyo manuṣyaprabhavaḥ, kasmājjaḍāndhakubjamūkavāmanamimminavyaṅgonmattakuṣṭhikilāsibhyo jātāḥ [Note: 'pitṛsadṛśāḥ'iti pā+]pitṛsadṛśarūpā na bhavanti/

athātrāpi buddhirevaṃ syāt---svenaivāyamātmā cakṣuṣā rūpāṇi vetti, śrotreṇa śabdān, ghrāṇena gandhān, rasanena rasān, sparśanena sparśān, buddhyā boddhavyamityanena hetunā na jaḍādibhyo jātāḥ [Note: 'pitṛsadṛśarūpāḥ'iti pā+]pitṛsadṛśā bhavanti/

atrāpi pratijñāhānidoṣaḥ syāt, evamukte hyātmā satsvindriyeṣu jñaḥ syādasatkhajñaḥ; yatra caitadubhayaṃ saṃbhavati jñatvamajñatvaṃ ca, [Note: 'sa vikāraprakṛtikaścātmā'iti pā+]savikāraścātmā /

yadi ca darśanādibhirātmā viṣayān vetti, nirindriyo darśanādivirahādajñaḥ syāt, ajñatvādakāraṇam, akāraṇatvācca nātmeti vāgnastumātrametadvacanamanarthaṃ syāditi(hovāca bharadvājaḥ)//

ātreya uvāca---purastādetat pratijñātaṃ---sattvaṃ [Note: 'jīvaspṛkśarīreṇa'iti pā+]jīvaṃ spṛkśarīreṇābhisaṃbadhnātīti/

yasmāttu samudāyaprabhavaḥ san sa garbho manuṣyavigraheṇa jāyate, manuṣyo manuṣyaprabhava ityucyate, tadvakṣyāmaḥ-bhūtānāṃ caturvidhā yonirbhavati---jarāyvaṇḍasvedodbhidaḥ/

tāsāṃ khalu catasṛṇāmapi yonīnāmekaikā yoniraparisaṃkhyeyabhedā bhavati, bhūtānāmākṛtiviśeṣāparisaṃkhyeyatvāt/

tatra jarāyujānāmaṇḍajānāṃ ca prāṇināmete garbhakarā bhāvā yāṃ yāṃ yonimāpadyante, tasyāṃ tasyāṃ yonau tathātathārūpā bhavanti; yathā---kanakarajatatāmratrapusīsakānyāsicyamānāni teṣu teṣu madhūcchiṣṭavigraheṣu, tāni yadā manuṣyabimbamāpadyante tadā manuṣyavigraheṇa jāyante, tasmāt samudāyaprabhavaḥ san garbho manuṣyavigraheṇa jāyate; manuṣyaśca manuṣyaprabhava ucyate, tadyonitvāt//

yaccoktaṃ---yadi ca manuṣyo manuṣyaprabhavaḥ, kasmānna jaḍādibhyo jātāḥ pitṛsadṛśarūpā bhavantīti; tatrocyate---yasya yasya hyaṅgāvayavasya bīje bījabhāga upatapto bhavati, tasya tasyāṅgāvayavasya vikṛtirupajāyate, nopajāyate cānupatāpāt; tasmādubhayopapattirapyatra/

sarvasya cātmajānīndriyāṇi, teṣāṃ bhāvābhāvaheturdaivaṃ; tasmānnaikāntato jaḍādibhyo jātāḥ pitṛsadṛśarūpā bhavanti//

na cātmā satsvindriyeṣu jñaḥ, asatsu vā bhavatyajñaḥ; na hyasattvaḥ kadācidātmā, sattvaviśeṣāccopalabhyate jñānaviśeṣa iti//

bhavanti cātra--- na karturindriyābhāvāt kāryajñānaṃ pravartate/

yā kriyā vartate [Note: 'yaiḥ kriyā vartate yā tu'iti pā+]bhāvaiḥ sā vinā tairna vartate //

jānannapi mṛdo+abhāvāt kumbhakṛnna pravartate/

śrūyatāṃ [Note: yogīndranāthasenastu 'vedaṃ'iti paṭhati, vyākhyānayati ca 'vedaṃ vedamivātathajñānaṃ śrūyatām'iti]cedamadhyātmamātmajñānabalaṃ mahat //

indriyāṇi ca [Note: 'saṃyamya'iti pā+]saṃkṣipya manaḥ saṃkṣipya cañcalam /

praviśyādhyātmamātmajñaḥ sve jñāne paryavasthitaḥ//

sarvatrāvahitajñānaḥ sarvabhāvān parīkṣate/

gṛhṇīṣva ce(ve)damaparaṃ bharadvāja vinirṇayam//

nivṛttendriyavākceṣṭaḥ suptaḥ [Note: 'svapnagatān'iti pā+]svapnagato yadā /

viṣayān sukhaduḥkhe ca vetti nājño+apyataḥ smṛtaḥ//

nātmajñānādṛte caikaṃ jñānaṃ kiñcit pravartate/

na hyeko vartate bhāvo vartate nāpyahetukaḥ//

tasmājjñaḥ prakṛtiścātmā draṣṭā kāraṇameva ca /

sarvametadbharadvāja nirṇītaṃ jahi saṃśayam//

tatra ślokau---

heturgarbhasya nirvṛttau vṛddhau janmani caiva yaḥ/
punarvasumatiryā ca bharadvājamatiśca yā//
pratijñāpratiṣedhaśca viśadaścātmanirṇayaḥ/
garbhāvakrāntimuddiśya khuḍḍīkāṃ tatprakāśitam//

ityagniveśakṛte tantre carakapratisaṃskṛte śārīrasthāne khuḍḍīkāgarbhāvakrāntiśārīraṃ nāma tṛtīyo+adhyāyaḥ//3//

4.4. caturtho+adhyāyaḥ/

athāto mahatīṃ garbhāvakrāntiṃ śārīraṃ vyākhyāsyāmaḥ//

iti ha smāha bhagavānātreyaḥ//

yataśca garbhaḥ saṃbhavati, yasmiṃśca garbhasaṃjñā, yadvikāraśca garbhaḥ, yayā cānupūrvyā+abhinirvartate kukṣau, yaścāsya vṛddhihetuḥ, yataścāsyājanma bhavati, yataśca jāyamānaḥ kukṣau vināśaṃ prāpnoti, yataśca kārtsnyenāvinaśyan vikṛtimāpadyate, tadanuvyākhyāsyāmaḥ//

mātṛtaḥ pitṛta ātmataḥ sātmyato rasataḥ sattvata ityetebhyo bhāvebhyaḥ samuditebhyo garbhaḥ saṃbhavati/

tasya ye ye+avayavā yato yataḥ saṃbhavataḥ saṃbhavanti tān vibhajya mātṛjādīnavayavān pṛthak pṛthaguktamagre//

śukraśoṇitajīvasaṃyoge tu khalu kukṣigate garbhasaṃjñā bhavati//

garbhastu khalvantarikṣavāyvagnitoyabhūmivikāraścotanādhiṣṭhānabhūtaḥ/

evamanayā yuktyā pañcamahābhūtavikārasamudāyātmako garbhaścetanādhiṣṭhānabhūtaḥ, sa hyasya ṣaṣṭho dhāturuktaḥ//

yayā cānupūrvyā+abhinirvartate kukṣau tāṃ vyākhyāsyāmaḥ---gate purāṇe rajasi nave cānasthite śuddhasnātāṃ striyamavyāpannayoniśoṇitagarbhāśayāmṛtumatīmācakṣmahe/

tayā saha tathābhūtayā yadā pumānavyāpannabījo miśrībhāvaṃ gacchati, tadā tasya harṣodīritaḥ paraḥ śarīradhātvātmā śukrabhūto+aṅgādaṅgāt saṃbhavati/

sa tathā harṣabhūtenātmanodīritaśca- [Note: 'adhiṣṭhitabījadhātuḥ'iti pā+]adhiṣṭhitaśca bījarūpo dhātuḥ puruṣaśarīrādabhiviṣpattyocitena pathā garbhāśayamanupraviśyārtavenābhisaṃsargameti//

tatra pūrvaṃ cetanādhātuḥ [Note: 'sattvopakaraṇaḥ'iti pā+]sattvakaraṇo guṇagrahaṇāya pravartate; sa hi hetuḥ kāranaṃ nimittamakṣaraṃ kartā mantā [Note: 'bodhayitā'iti pā+]veditā boddhā draṣṭā dhātā brahmā viśvakarmā viśvarūpaḥ puruṣaḥ prabhavo+avyayo nityo guṇī grahaṇaṃ pradhānamavyaktaṃ jīvo jñaḥ pudgalaścetanāvān vibhurbhūtātmā cendriyātmā cāntarātmā ceti/

sa guṇopādānakāle+antarikṣaṃ pūrvamanyebhyo guṇebhya upādatte, yathā-pralayātyaye sisṛkṣurbhūtānyakṣarabhūta ātmā sattvopādānaḥ pūrvataramākāśaṃ sṛjati, tataḥ krameṇa vyaktataraguṇān dhātūn vāyvādikāṃścaturaḥ; tathā dehagrahaṇe+api pravartamānaḥ pūrvataramākāśamevopādatte, tataḥ krameṇa vyaktataraguṇān dhātūn vāyvādikāṃścaturaḥ/

sarvamapi tu khalvetadguṇopādānamaṇunā kālena bhavati//

sa sarvaguṇavān garbhatvamāpannaḥ prathame māsi saṃmūrcchitaḥ [Note: 'sarvadhātukalanīkṛtaḥ'iti, 'sarvadhātukalalīkṛtaḥ'iti ca pā+]sarvadhātukaluṣīkṛtaḥ kheṭabhūto bhavatyavyaktavigrahaḥ sadasadbhūtāṅgāvayavaḥ//

dvitīye māsi ghanaḥ saṃpadyate [Note: 'piṇḍaḥ'iti hastalikhitapustake na paṭhyate]piṇḍaḥ peśyarbudaṃ vā/

tatra ghanaḥ puruṣaḥ, peśī strī, arbudaṃ napuṃsakam//

tṛtīye māsi sarvendriyāṇi sarvāṅgāvayavāśca yaugapadyenābhinirvartante//

tatrāsya kecidaṅgāvayavā mātṛjādīnavayavān vibhajya pūrvamuktā yathāvat /

mahābhūtavikārapravibhāgena [Note: 'tvidānīmaparāṃścaivāṅgāvayavān paryāyāntareṇānuvyākhyāsyāmaḥ'iti pā+]tvidānīmasya tāṃścaivāṅgāvayavān kāṃścit paryāyāntareṇāparāṃścānuvyākhyāsyāmaḥ/

mātṛjādayo+apyasya māhābhūtavikārā eva/

tatrāsyākāśātmakaṃ śabdaḥ śrotraṃ lāghavaṃ saukṣmyaṃ vivekaśca, vāyvātmakaṃ sparśaḥ sparśanaṃ raukṣyaṃ preraṇaṃ dhātuvyūhanaṃ ceṣṭāśca śārīryaḥ, agnyātmakaṃ rūpaṃ darśanaṃ prakāśaḥ paktirauṣṇyaṃ ca , abātmakaṃ raso rasanaṃ śaityaṃ mārdavaṃ snehaḥ kledaśca, pṛthivyātmakaṃ gandho ghrāṇaṃ gauravaṃ sthairyaṃ mūrtiśceti//

evamayaṃ lokasaṃmitaḥ puruṣaḥ/

yāvanto hi loke mūrtimanto bhāvaviśeṣāstāvantaḥ puruṣe, yāvantaḥ puruṣe tāvanto loke iti; budhāstvevaṃ draṣṭumicchanti//

evamasyevdriyāṇyaṅgāvayavāśca yaugapadyenābhinirvartante+anyatra tebhyo bhāvebhyo ye+asya jātasyottarakālaṃ jāyante; tadyathā---dantā vyañjanāni [Note: 'śukrarajovyaktībhāvaḥ'iti pā+]vyaktībhāvastathāyuktāni cāparāṇi/

eṣā prakṛtiḥ, vikṛtiḥ punarato+avyathā/ santi khalvasmin garbhe kecinnityā bhāvāḥ, santi cānityāḥ kecit/

tasya ya evāṅgāvayavāḥ santiṣṭhante, ta eva strīliṅgaṃ puruṣaliṅgaṃ napuṃsakaliṅgaṃ vā bibhrati/

tatra strīpuruṣayorye vaiśeṣikā bhāvāḥ pradhānasaṃśrayā guṇasaṃśrayāśca, teṣāṃ yato bhūyastvaṃ tato+anyatarabhāvaḥ/

tadyathā---klaibyaṃ bhīrutvamavaiśāradyaṃ moho+anavasthānamadhogurutvamasahanaṃ śaithilyaṃ mārdavaṃ garbhāśayabījabhāgastathāyuktāni cāparāṇi strīkarāṇi, ato viparītāni puruṣakarāṇi, [Note: 'ubhayabhāgabhāvāni'iti 'ubhayabhāvā'iti ca pā+]ubhayabhāgāvayavā napuṃsakakarāṇi bhavanti//

tasya yatkālamevendriyāṇi saṃtiṣṭhante, tatkālameva cetasi vedanā nirbandhaṃ prāpnoti;tasmāttadā prabhṛti garbhaḥ spandate, prārthayate ca janmāntarānubhūtaṃ yat kiṃcit, taddvaihṛdayyamācakṣate vṛddhāḥ/

mātṛjaṃ cāsya hṛdayaṃ mātṛhṛdayenābhisaṃbaddhaṃ bhavati [Note: 'rasahāriṇībhiḥ'iti pā+]rasavāhinībhiḥ saṃvāhinībhiḥ; tasmāttayostābhirbhaktiḥ [Note: 'saṃpadyate'iti pā+]saṃspandate /

taccaiva kāraṇamavekṣamāṇā [Note: 'dvaihṛdayyāvimānitaṃ'iti pā+]na dvaihṛdayyasya vimānitaṃ garbhamicchanti kartum/

vimānane hyasya dṛśyate vināśo vikṛtirvā/

samānayogakṣemā hi tadā bhavati garbheṇa keṣucidartheṣu mātā/

tasmāt priyahitābhyāṃ garbhiṇīṃ viśeṣeṇopacaranti kuśalāḥ//

tasyā garbhāpatterdvaihṛdayyasya ca nijñānārthaṃ liṅgāni samāsenopadekṣyāmaḥ/

[Note: 'upacārasaṃbodhanaṃ'iti pā+]upacārasādhanaṃ hyasya jñāne, jñānaṃ ca liṅgataḥ, tasmādiṣṭo liṅgopadeśaḥ /

tadyathā---ārtavādarśanamāsyasaṃsravaṇamanannābhilāṣaśchardirarocako+amlakāmatā ca viśeṣeṇa śraddhāpraṇayanamuccāvaceṣu bhāveṣu gurugātratvaṃ cakṣuṣorglāniḥ stanayoḥ stanyamoṣṭhayoḥ stanamaṇḍalayośca kārṣṇyamatyarthaṃ śvayathuḥ pādayorīṣallomarājyudgamo yonyāścāṭālatvamiti garbhe paryāgate rūpāṇi bhavati//

sā yadyadicchettattadasyai dadyādanyatra garbhopaghātakarebhyo bhāvebhyaḥ//

garbhopaghātakarāstvime bhāvā bhavantiḥ; tadyathā---sarvamatigurūṣṇatīkṣṇaṃ dāruṇāśca ceṣṭāḥ; imāṃścānyānupadiśanti vṛddhāḥ---devatārakṣo+anucaraparirakṣaṇārthaṃ na raktāni vāsāṃsi bibhṛyānna madakarāṇi madyānyabhyavaharenna yānamadhirohenna māṃsamaśnīyāt sarvendriyapratikūlāṃśca bhāvān dūrataḥ parivarjayet, yaccānyadapi kiñcit striyo vidyuḥ//

tīvrāyāṃ tu khalu prārthanāyāṃ kāmamahitamapyasyai hitenopahitaṃ dadyāt prārthanāvinayanārtham/

prārthanāsaṃdhāraṇāddhi vāyuḥ prakupito+antaḥśarīramanucaran garbhasyāpadyamānasya vināśaṃ vairūpyaṃ vā kuryāt//

caturthe māsi sthiratvamāpadyate garbhaḥ, tasmāttadā garbhiṇī gurugātratvamadhikamāpadyate viśeṣeṇa//

pañcame māsi garbhasya māṃsaśoṇitopacayo bhavatyadhikamanyebhyo māsebhyaḥ, tasmāttadā garbhiṇī kārśyamāpadyate viśeṣeṇa//

ṣaṣṭhe māsi garbhasya balavarṇopacayo bhavatyadhikamanyebhyo māsebhyaḥ, tasmāttadā garbhiṇī balavarṇahānimāpadyate viśeṣeṇa//

saptame māsi garbhaḥ sarvairbhāvairāpyāyyate, tasmāttadā garbhiṇī sarvākāraiḥ klāntatamā bhavati//

aṣṭame māsi garbhaśca mātṛto garbhataśca mātā [Note: 'rasavāhinībhiḥ'iti pā+]rasahāriṇībhiḥ saṃvāhinībhirmuhurmuhurojaḥ parasparata ādadāte [Note: 'garbhasya saṃpūrṇatvāt'iti pā+]garbhasyāsaṃpūrṇatvāt / tasmāttadā garbhiṇī muhurmuhurmudā yuktā bhavati muhurmuhuśca mlānā, tathā garbhaḥ; tasmāttadā garbhasya janma vyāpattimadbhavatyojaso+anavasthitatvāt/ taṃ caivārthamabhisamīkṣyāṣṭamaṃ māsamagaṇyamityācakṣate kuśalāḥ//

tasminnekadivasātikrānte+api navamaṃ māsamupādāya prasavakālamityāhurādaśamānmāsāt/

etāvān prasavakālaḥ, [Note: 'ata ūrdhvamavasthānaṃ'iti pā+]vaikārikamataḥ paraṃ kukṣāvavasthānaṃ garbhasya//

evamanayā++ānupūrvyā+abhinirvartate kukṣau//

mātrādīnāṃ khalu garbhakarāṇāṃ bhāvānāṃ saṃpadastathā vṛttasya sauṣṭhavānmātṛtaścaivopasnehopasvedābhyāṃ kālapariṇāmāt svabhāvasaṃsiddheśca kukṣau vṛddhiṃ prāpnoti//

mātrādīnāmeva tu khalu garbhakarāṇāṃ bhāvānāṃ vyāpattinimittamasyājanma bhavati//

ye hyasya kukṣau vṛddhihetusamākhyātā bhāvāsteṣāṃ viparyayādudare vināśamāpadyate, athavā+apyavcirajātaḥ syāt//

yatastu kārtsnyenāvinaśyan vikṛtimāpadyate, tadnuvyākhyāsyāmaḥ---yadā striyā doṣaprakopaṇoktānyāsevamānāyā doṣāḥ prakupitāḥ śarīramupasarpantaḥ [Note: 'śoṇitagarbhāśayopaghātāyopapadyante'iti pā+]śoṇitagarbhāśayāvupapadyate, na ca kārtsnyena śoṇitagarbhāśayau dūṣayanti, [Note: 'tadā yaṃ 'iti pā+]tadeyaṃ garbhaṃ labhate strī; tadā tasya garbhasya mātṛjānāmavayavānāmanyatamo+avayavo vikṛtimāpadyata eko+athavā+aneke, yasya yasya hyavayavasya bīje bījabhāge vā doṣāḥ prakopamāpadyante, taṃ tamavayavaṃ vikṛtirāviśati/

yadā hyasyāḥ śoṇite garbhāśayabījabhāgaḥ pradoṣamāpadyate, tadā vandhyāṃ janayati; yadā punarasyāḥ śoṇite garbhāśayabījabhāgāvayavaḥ pradoṣamāpadyate, tadā pūtiprajāṃ janayati; yadā tvasyāḥ śoṇite garbhāśayabījabhāgāvayavaḥ strīkarāṇāṃ ca śarīrabījabhāgānāmekadeśaḥ pradoṣamāpadyate, tadā stryākṛtibhūyiṣṭhāmastriyaṃ [Note: 'rāntāṃ'iti pā+]vārtāṃ nāma janayati, tāṃ strīvyāpadamācakṣate//

[Note: 'evameva puruṣasya bījadoṣe pitṛjāvayavavikṛtiṃ vidyāt/ yadā hyasya bīje bījabhāgāvayavaḥ'iti pā+]evameva puruṣasya yadā bīje bījabhāgaḥ pradoṣamāpadyate, tadā vandhyaṃ janayati; yadā punarasya bīje bījabhāgāvayavaḥ pradoṣamāpadyate, tadā pūtiprajaṃ janayati; yadā tvasya bīje bījabhāgāvayavaḥ puruṣakarāṇāṃ ca śarīrabījabhāgānāmekadeśaḥ pradoṣamāpadyate, tadā puruṣākṛtibhūyiṣṭhamapuruṣaṃ [Note: 'tṛṇapūlikaṃ'iti pā+]tṛṇaputrikaṃ nāma janayati; tāṃ puruṣavyāpadamācakṣate//

etena mātṛjānāṃ pitṛjānāṃ cāvayavānāṃ vikṛtivyākhyānena sātmyajānāṃ rasajānāṃ sattvajānāṃ cāvayavānāṃ vikṛtirvyākhyātā bhavati//

nirvikāraḥ parastvātmā sarvabhūtānāṃ virniśeṣaḥ; sattvaśarīrayostu viśeṣādviśeṣopalabdhiḥ//

tatra trayaḥ śarīradoṣā vātapittaśleṣmāṇaḥ, te śarīraṃ dūṣayanti; dvau punaḥ sattvadoṣau rajastamaśca, tau sattvaṃ dūṣayataḥ/

tābhyāṃ ca sattvaśarīrābhyāṃ duṣṭābhyāṃ vikṛtirupajāyate, nopajāyate cāpraduṣṭābhyām//

tatra śarīraṃ yoniviśeṣāccaturvidhamuktamagre//

trividhaṃ khalu sattvaṃ-śuddhaṃ, rājasaṃ, tāmasamiti/

tatra śuddhamadoṣamākhyātaṃ klyāṇāṃśatvāt, rājasaṃ sadoṣamākhyātaṃ roṣāṃśatvāt, tāmasamapi sadoṣamākhyātaṃ mohāṃśatvāt/

teṣāṃ tu trayāṇāmapi sattvānāmekaikasya bhedāgramaparisaṅkhyeyaṃ taratamayogāccharīrayoniviśeṣebhyaścānyonyānuvidhānatvācca/

śarīraṃ hyapi sattvamanuvidhīyate, sattvaṃ ca śarīram/

tasmāt katicitsattvabhedānanūkābhinirdeśena nidarśanārthamanuvyākhyāsyāmaḥ//

tadyathā---śuciṃ satyābhisandhaṃ jitātmānaṃ saṃvibhāginaṃ jñānavijñānavacanaprativacanasaṃpannaṃ smṛtimantaṃ kāmakrodhalobhamānamoherṣyāharṣāmarṣāpetaṃ samaṃ sarvabhūteṣu brāhmaṃ vidyāt//

ijyādhyayanavratahomabrahmacaryaparamatithivratamupaśāntamadamānarāgadveṣamohalobharoṣaṃ pratibhāvacanavijṣānopadhāraṇaśaktisaṃpannamārṣaṃ vidyāt//

aiśvaryavantamādeyavākyaṃ yajvānaṃ śūramojasvinaṃ tejasopetamakliṣṭakarmāṇaṃ dīrghadarśinaṃ dharmārthakāmābhiratamaindraṃ vidyāt//

lekhāsthavṛttaṃ prāptakāriṇamasaṃprahāryamutthānavantaṃ smṛtimantam- [Note: 'aiśvaryālambinaṃ'iti pā+]aiśvaryalambhinaṃ vyapagatarāgerṣyādveṣamohaṃ yāmyaṃ vidyāt//

śūraṃ dhīraṃ śucimaśucidveṣiṇaṃ yajvānamambhovihāraratimakliṣṭakarmāṇaṃ sthānakopaprasādaṃ vāruṇaṃ vidyāt//

sthānamānopabhogaparivārasaṃpannaṃ dharmārthakāmanityaṃ śuciṃ sukhavihāraṃ vyaktakopaprasādaṃ kauberaṃ vidyāt//

priyanṛtyagītavāditrollāpakaślokākhyāyiketihāsapurāṇeṣu kuśalaṃ gandhamālyānulepanavasanastrīvihārakāmanityamanasūyakaṃ gāndharvaṃ vidyāt//

ityenaṃ śuddhasya sattvasya saptavidhaṃ bhedāṃśaṃ vidyāt kalyāṇāṃśatvāt; tatsaṃyogāttu brāhmamatyantaśuddhaṃ vyavasyet//

śūraṃ caṇḍamasūyakamaiśvaryavantam- [Note: 'audarikaṃ'iti pā+]aupadhikaṃ raudramananukrośamātmapūjakamāsuraṃ vidyāt//

amarṣiṇamanubandhakopaṃ chidraprahāriṇaṃ krūramāhārātimātrarucimāmiṣapriyatamaṃ svapnāyāsabahulamīrṣyuṃ rākṣasaṃ vidyāt//

mahāśanaṃ straiṇaṃ strīrahaskāmamaśuciṃ śucidveṣiṇaṃ bhīruṃ bhīṣayitāraṃ vikṛtavihārāhāraśīlaṃ paiśācaṃ vidyāt//

kruddhaśūramakruddhabhīruṃ tīkṣṇamāyāsabahulaṃ [Note: 'niralaṅkariṣṇuṃ'iti pā+]saṃtrastagocaramāhāravihāraparaṃ sārpaṃ vidyāt//

āhārakāmamatiduḥkhaśīlācāropacāramasūyakamasaṃvibhāginamatilolupamakarmaśīlaṃ praitaṃ vidyāt//

anuṣaktakāmamajasramāhāravihāraparamanavasthitamamarṣaṇamasaṃcayaṃ śākunaṃ vidyāt//

ityevaṃ khalu rājasasya sattvasya ṣaḍvidhaṃ bhedāṃśaṃ vidyāt, roṣāṃśatvāt//

&nirākariṣṇumamedhasaṃ jugupsitācārāhāraṃ maithunaparaṃ svapnaśīlaṃ pāśavaṃ vidyāt//

bhīrumabudhamāhāralubdhamanavasthitamanuṣaktakāmakrodhaṃ saraṇaśīlaṃ toyakāmaṃ mātsyaṃ vidyāt//

alasaṃ kevalamabhiniviṣṭamāhāre sarvabuddhyaṅgahīnaṃ vānaspatyaṃ vid yāt//

ityevaṃ tāmasasya sattvasṛya trividhaṃ bhedāṃśaṃ vidyānmohāṃśatvāt//

ityaparisaṃkhyeyabhedānāṃ trayāṇāmapi sattvānāṃ bhedaikadeśo vyākhyātaḥ; śuddhasya sattvasya saptavidho brahmarṣiśakrayamavaruṇakuberagandharvasattvānukāreṇa, rājasasya ṣaḍvidho daityapiśācarākṣasasarpapretaśakunisattvānukāreṇa, tāmasasya trividhaḥ paśumatsyavanaspatisattvānukāreṇa, kathaṃ ca yathāsattvamupacāraḥ syāditi//

kevalaścāyamuddeśo yathoddeśamabhinirdiṣṭo bhavati [Note: 'garbhāvakrāntisaṃprayuktasyārthasya vijñāne'iti pā+]garbhāvakrāntisaṃprayuktaḥ ; tasya cārthasya vijñāne sāmarthyaṃ garbhakarāṇāṃ ca bhāvānāmanusamādhiḥ, vighātaśca vighātakarāṇāṃ bhāvānāmiti//

tatra ślokāḥ---

nimittamātmā prakṛtirvṛddhiḥ kukṣau krameṇa ca/
vṛddhihetuśca garbhasya pañcārthāḥ śubhasaṃjñitāḥ//
ajanmani ca yo heturvināśe vikṛtāvapi/
imāṃstrīnaśubhān bhāvānāhurgarbhavighātakān//
śubhāśubhasamākhyātānaṣṭau bhāvānimān bhiṣak/
sarvathā veda yaḥ sarvān sa rājñaḥ kartumarhati//
avāptyupāyān garbhasya sa evaṃ jñātumarhati/
ye ca garbhavighātoktā bhāvāstāṃścāpyudāradhīḥ//

ityagniveśakṛte tantre carakapratisaṃskṛte śārīrasthāne mahatīgarbhāvakrān tiśārīraṃ nāma caturthe+adhyāyaḥ//4//

4.5. pañcamo+adhyāyaḥ/

athātaḥ puruṣavicayaṃ śārīraṃ vyākhyāsyāmaḥ//

iti ha smāha bhagavānātreyaḥ//

'puruṣo+ayaṃ lokasaṃnitaḥ'ityuvāca bhagavān punarvasurātreyaḥ/

yāvanto hi loke ( [Note: 'mūrtimantaḥ'iti gaṅgādharasaṃmataḥ pāṭhaḥ]bhūrtimanto ) bhāvaviśeṣāstāvantaḥ puruṣe, yāvantaḥ puruṣe tāvanto loke; ityevaṃvādinaṃ bhagavantamātreyamagniveśa uvāca---netāvatā vākyenoktaṃ vākyārthamavagāhāmahe, bhagavatā buddhyā bhūyastaramato+anuvyākhyāyamānaṃ śuśrūṣāmaha iti//

tamuvāca bhagavānātreyaḥ---aparisaṃkhyeyā lokāvayavaviśeṣāḥ, puruṣāvayavaviśeṣā apyaparisaṃkhyeyāḥ; teṣāṃ yathāsthūlaṃ katicidbhāvān sāmānyamabhipretyodāhariṣyāmaḥ, tānekamanā nibodha samyagupavarṇyamānānagniveśa! /

ṣaḍdhātavaḥ samuditāḥ 'puruṣa'iti śabdaṃ labhante; tadyathā---pṛthivyāpastejo vāyurākāśaṃ brahma cāvyaktamiti, eta eva ca ṣaḍdhātavaḥ samuditāḥ 'puruṣa' iti śabdaṃ labhante//

tasya puruṣasya pṛthivī mūrtiḥ, āpaḥ kledaḥ, tejo+abhisantāpaḥ, vāyuḥ prāṇaḥ, viyat suṣirāṇi, brahma antarātmā/

yathā khalu brāhmī vibhūtirloke tathā puruṣe+apyāntarātmikī vibhūtiḥ, brahmaṇo vibhūtirloke prajāpatirantarātmano vibhūtiḥ puruṣe sattvaṃ, yastvindro loke sa puruṣe+ahaṅkāraḥ, ādityastvādānaṃ, rudro roṣaḥ, somaḥ prasādaḥ, vasavaḥ sukham, aśvinau kāntiḥ, marudutsāhaḥ, viśvedevāḥ sarvendriyāṇi saevendriyārthāśca, tamo mohaḥ, jyotirjñānaṃ, yathā lokasya sargādistathā puruṣasya garbhādhānaṃ, yathā kṛtayugamevaṃ bālyaṃ, yathā tretā tathā yauvanaṃ, yathā dvāparastathā sthāviryaṃ, yathā kalirevamāturyaṃ, yathā yugāntastathā maraṇamiti/

evametenānumānenānuktānāmapi lokapuruṣayoravayavaviśeṣāṇāmagniveśa! sāmānyaṃ vidyāditi//

evaṃvādinaṃ bhagavantamātreyamagniveśa uvāca---evametat sarvamanapavādaṃ yathoktaṃ bhagavatā lokapuruṣayoḥ sāmānyam/

kinnvasya sāmānyopadeśasya prayojanamiti//

bhagavānuvāca---śṛṇvagniveśa! sarvalokamātmanyātmānaṃ ca sarvaloke samamanupaśyataḥ &satyā buddhiḥ samutpadyate/

sarvalokaṃ hyātmani paśyato bhavatyātmaiva sukhaduḥkhayoḥ kartā nānya iti/

karmātmakatvācca hetvādibhiryuktaḥ sarvaloko+ahamiti viditvā jñānaṃ pūrvamutthāpyate+apavargāyeti/

tatra saṃyogāpekṣī lokaśabdaḥ/

ṣaḍdhātusamudāyo hi sāmānyataḥ sarvalokaḥ//

tasya hetuḥ, utpattiḥ, vṛddhiḥ, upaplavaḥ, viyogaśca /

tatra heturutpattikāraṇaṃ, utpattirjanma, vṛddhirāpyāyanam, upaplavo duḥkhāgamaḥ, ṣaḍdhātuvibhāgo viyogaḥ sajīvāpagamaḥ sa prāṇanirodhaḥ sa bhaṅgaḥ sa lokasvabhāvaḥ/ tasya mūlaṃ sarvopaplavānāṃ ca pravṛttiḥ, nivṛttiruparamaḥ/

pravṛttirduḥkhaṃ, nivṛttiḥ sukhamiti yaj jñānamutpadyate tat satyam/

tasya hetuḥ sarvalokasāmānyajñānam/

etatprayojanaṃ sāmānyopadeśasyeti//

athāgniveśa uvāca---kiṃmūlā bhagavan! pravṛttiḥ, nivṛttau ca ka upāya iti//

bhagavānuvāca---mohecchādveṣakarmamūlā pravṛttiḥ/

tajjā hyahaṅkārasaṅgasaṃśayābhisaṃplavābhyavapātavipratyayāviśeṣānupāyāstaruṇamiva drumamativipulaśākhāstaravo+abhibhūya puruṣamavatatyaivottiṣṭhante; yairabhibhūto na sattāmativartate /

tatraivaṃjātirūpavittavṛttabuddhiśīlavidyābhijanavayovīryaprabhāvasaṃpanno+ahamityahaṅkāraḥ, yanmanovākkāyakarma nāpavargāya sa saṅgaḥ, karmaphalamokṣapuruṣapretyabhāvādayaḥ santi vā neti saṃśayaḥ, sarvāvasthāsvananyo+ahamahaṃ sraṣṭā svabhāvasaṃsiddho+ahamahaṃ śarīrendriyabuddhismṛtiviśeṣarāśiriti grahaṇamabhisaṃplavaḥ, mama mātṛpitṛbhrātṛdārāpatyabandhumitrabhṛtyagaṇo gaṇasya cāhamityabhyavapātaḥ, kāryākāryahitāhitaśubhāśubheṣu viparītābhiniveśo vipratyayaḥ, jñājñayoḥ prakṛtivikārayoḥ pravṛttinivṛttyośca sāmānyadarśanamaviśeṣaḥ, prokṣaṇānaśanāgnihotratriṣavaṇābhyukṣaṇāvāhanayājanayajanayācanasalilahutāśanapraveśādayaḥ samārambhāḥ procyante hyanupāyāḥ/

evamayamadhīdhṛtismṛtirahaṅkārābhiniviṣṭaḥ saktaḥ sasaṃśayo+abhisaṃplutabuddhirabhyavapatito+anyathādṛṣṭiraviśeṣagrāhī vimārgagatirnivāsavṛkṣaḥ sattvaśarīradoṣamūlānāṃ sarvaduḥkhānāṃ bhavati/

evamahaṅkārādibhirdoṣairbhrāmyamāṇo nātivartate pravṛttiṃ, sā ca mūlamaghasya//

nivṛttirapavargaḥ; tat paraṃ praśāntaṃ tattadakṣaraṃ tadbrahma sa mokṣaḥ//

tatra mumukṣūṇāmudayanāni vyākhyāsyāmaḥ/

tatra lokadoṣadarśino mumukṣorādita evācāryābhigamanaṃ, tasyopadeśānuṣṭhānam, agnerevopacaryā, dharmaśāstrānugamanaṃ, tadārthāvabodhaḥ, tenāvaṣṭambhaḥ, tatra yathoktāḥ kriyāḥ, satāmupāsanam, asatāṃ parivarjanam, asaṅgatirjanena, satyaṃ sarvabhūtahitamaparuṣamanatikāle parīkṣya vacanaṃ, sarvaprāṇiṣu cātmanīvāvekṣā, sarvāsāmasmaraṇamasaṅkalpanamaprār thanamanabhibhāṣaṇaṃ ca strīṇāṃ, sarvaparigrahatyāgaḥ, kaupīnaṃ pracchādanārthaṃ, dhāturāganivasanaṃ, kanthāsīvanahetoḥ sūcīpippalakaṃ, śaucādhānahe torjalakuṇḍikā, daṇḍadhāraṇaṃ, bhaikṣacaryārthaṃ pātraṃ, prāṇadhāraṇārthamekakālamagrāmyo yathopapanno+abhyavahāraḥ, śramāpanayanārthaṃ śīrṇaśuṣkaparṇatṛṇāstaraṇopadhānaṃ, dhyānahetoḥ kāyanibandhanaṃ, vaneṣvaniketavāsaḥ, tandrānidrālasyādikarmavarjanaṃ, indriyārtheṣvanurāgopatāpanigrahaḥ, suptasthitagataprekṣitāhāravihārapratyaṅgaceṣṭādikeṣvārambheṣu smṛtipūrvikā pravṛttiḥ, satkārastutigarhāvamānakṣamatvaṃ, kṣutpipāsāyāsaśramaśītoṣṇavātavarṣāsukhaduḥkhasaṃsparśasahatvaṃ,śokadainyamānodvegamadalobharāgerṣyābhayakrodhādibhirasaṃcalanam, ahaṅkārādiṣūpasargasaṃjñā, lokapuruṣayoḥ sargādisāmānyāvekṣaṇaṃ, kāryakālātyayabhayaṃ, yogārambhe satatamanirvedaḥ, sattvotsāhaḥ, apavargāya dhīdhṛtismṛtibalādhānaṃ; niyamanamindriyāṇāṃ cetasi, cetasa ātmani, ātmanaśca; dhātubhedena śarīrāvayavasaṃkhyānamabhīkṣṇaṃ, sarvaṃ kāraṇavadduḥkhamasvamanityamityabhyupagamaḥ, [Note: 'duḥkhasaṃjñā'iti pā+]sarvapravṛttiṣvaghasaṃjñā, sarvasaṃnyāse sukhamityabhiniveśaḥ; eṣa mārgo+apavargāya, ato+anyathā badhyate; ityudayanāni vyākhyātāni//

bhavanti cātra---

etairavimalaṃ sattvaṃ śuddhyulāyairviśudhyati/
mṛjyamāna ivādarśastailacelakacādibhiḥ//
grahāmbudarajodhūmanīhārairasamāvṛtam/
yathā+arkamaṇḍalaṃ bhāti bhāti sattvaṃ tathā+amalam//
jnalatyātmani saṃruddhaṃ tat sattvaṃ saṃvṛtāyane/
śuddhaḥ sthiraḥ prasannārcirdīlo dīlāśaye yathā//
śuddhasattvasya yā śuddhā satyā buddhiḥ pravartate/
yayā bhinattyatibalaṃ mahāmohamayaṃ tamaḥ//
sarvabhāvasvabhāvajño yayā bhavati niḥspṛhaḥ/
yogaṃ yayā sādhayate sāṃkhyaḥ saṃladyate yayā//
yayā nolaityahaṅkāraṃ nolāste kāraṇaṃ yayā/
yayā nālambate kiṃcit sarvaṃ saṃnyasyate yayā//
yāti brahma yayā nityamajaraṃ [Note: 'śāntamakṣaram'iti lā+]śāntamavyayam /
vidyā siddhirmatirmedhā prajñā jñānaṃ ca sā matā//
loke vitatamātmānaṃ lokaṃ cātmani laśyataḥ/
larāvaradṛśaḥ śāntirjñanamūlā na naśyati//
laśyataḥ sarvabhāvān hi sarvāvasthāsu sarvadā/
brahmabhūtasya saṃyogo na śuddhasyolaladyate//
nātamanaḥ karaṇābhāvālliṅgamalyulalabhyate/
sa sarvakaraṇāyogānmukta ityabhidhīyate //
vilālaṃ virajaḥ śāntaṃ laramakṣaramavyayam/
amṛtaṃ brahma nirvāṇaṃ laryāyaiḥ śāntirucyate//
etattat saumya! vijñānaṃ yajjñātvā muktasaṃśayāḥ/
munayaḥ praśamaṃ jagmurvītamoharajaḥspṛhāḥ//

tatra ślokau---

saprayojanamuddiṣṭaṃ lokasya luruṣasya ca /
sāmānyaṃ mūlamutlattau nivṛttau mārga eva ca //
śuddhasattvasamādhānaṃ satyā buddhiśca naiṣṭhikī/
vicaye luruṣasyoktā niṣṭhā ca laramarṣiṇā//

ityagniveśakṛte tantre carakapratisaṃskṛte śārīrasthāne puruṣavicayaśārīraṃ nāma pañcamo+adhyāyaḥ//5//

4.6. ṣaṣṭho+adhyāyaḥ/

athātaḥ śarīravicayaṃ śārīraṃ vyākhyāsyāmaḥ//

iti ha smāha bhagavānātreyaḥ//

śarīravicayaḥ śarīropakārārthamiṣyate/

jñātvā hi śarīratattvaṃ śarīropakārakareṣu bhāveṣu jñānamutpadyate/

tasmāccharīravicayaṃ praśaṃsanti kuśalāḥ//

tatra śarīraṃ nāma cetanādhiṣṭhānabhūtaṃ pañcamahābhūtavikārasamudāyātmakaṃ [Note: 'samayogavāhino yadā hyasmin' iti pā+]samayogavāhi / yadā hyasmiñ śarīre dhātavo vaiṣamyamāpadyante tadā kleśaṃ vināśaṃ vā prāpnoti /

vaiṣamyagamanaṃ hi punardhātūnāṃ vṛddhihrāsagamanamakārtsnyena prakṛtyā ca//

yaugapadyena tu virodhināṃ dhātūnāṃ vṛddhihrāsau bhavataḥ/

yaddhi yasya dhātorvṛddhikaraṃ tattato viparītaguṇasya dhātoḥ pratyavāyakaraṃ saṃpadyate//

tadeva tasmādbheṣajaṃ samyagavacāryāmāṇaṃ yugapannyūnātiriktānāṃ dhātūnāṃ sāmyakaraṃ bhavati, adhikamapakarṣati nyūnamāpyāyayati//

etāvadeva hi bhaiṣajyaprayoge phalamiṣṭaṃ svasthavṛttānuṣṭhāne ca yāvaddhātūnāṃ sāmyaṃ syāt/

svasthā hyapi dhātūnāṃ sāmyānugrahārthameva kuśalā rasaguṇānāhārivikārāṃśca paryāyeṇecchantyupayoktuṃ sātmyasamājñātān; ekaprakārabhūyiṣṭhāṃścopayuñjānāstad- [Note: 'viparītakaraṇalakṣaṇasamājñātayā'iti pā+]viparītakarasamājñātayā ceṣṭayā samamicchanti kartum//

deśakālātmaguṇaviparītānāṃ hi karmaṇāmāhāravikārāṇāṃ ca [Note: 'krimeṇopayogaḥ,samyak sarvābhiyogaḥ,anudīrṇānāṃ saṃdhāraṇaṃ'iti pā+]kriyopayogaḥ samyak, sarvātiyogasandhāraṇam, asamdhāraṇamudīrṇānāṃ ca gatimatāṃ, sāhasānāṃ ca varjanaṃ, svasthavṛttametāvaddhātūnāṃ sāmyānugrahārthamupadiśyate//

dhātavaḥ punaḥ śārīrāḥ samānaguṇaiḥ samānaguṇabhūyiṣṭhairvā+apyāhāravikārairabhyasyamānairvṛddhiṃ prāpnuvanti, hrāsaṃ tu viparītaguṇairviparītaguṇabhūyiṣṭhairvā+apyāhārairabhyasyamānaiḥ//

tatreme śarīradhātuguṇāḥ saṃkhyāsāmarthyakarāḥ; tadyathā---gurulaghuśītoṣṇasnigdharūkṣamandatīkṣṇasthirasaramṛdukaṭhinaviśadapicchilaślakṣṇakharasūkṣmasthūlasāndrudravāḥ/ teṣu ye guravaste gurubhirāhāravikāraguṇairabhyasyamānairāpyāyyante, laghavaśca grasanti; laghavastulaghubhirāpyāyyante, guravaśca hrasanti/ evameva sarvadhātuguṇānāṃ sāmānyayogādvṛddhiḥ, viparyayāddhrāsaḥ/

tasmānmāṃsamāpyāyyate māṃsena bhūyastaramanyebhyaḥ śarīradhātubhyaḥ, tathā lihitaṃ lihitena, medo medasā, vasā vasayā, asthi taruṇāsthnā, majjā majjñā, śuktaṃ śukreṇa, garbhastvāmagarbheṇa//

tatra tvevaṃlakṣaṇena sāmānyavatāmāhāravikārāṇāmasānnidhyaṃ syāt, sannihitānāṃ vā+apyayuktatvānnopayogo dhṛṇitvādanyasmādvā kāraṇāt, sa ca dhāturabhivardhayitavyaḥ syāt, tasya ye samānaguṇāḥ syurāhāravikārā asevyāśca, tatra samānaguṇabhūyiṣṭhānāmanyaprakṛtīnāmapyāhāravikārāṇāmupayogaḥ syāt/

tadyathā---śukrakṣaye kṣīrasarpiṣorupayogo madhurasnigdhaśītasamākhyātānāṃ cāpareṣāṃ dravyāṇāṃ, mūtrakṣaye punarikṣurasavāruṇīmaṇḍadravamadhurāmlalavaṇopakledināṃ, purīṣakṣaye kulmāṣamāṣakuṣkuṇḍājamadhyayavaśākadhānyāmlānāṃ, vātakṣaye kaṭukatiktakaṣāyarūkṣalaghuśītānāṃ, pittakṣaye+amlalavaṇakaṭukakṣāroṣṇatīkṣṇānāṃ, śleṣmakṣaye snigdhagurumadhurasāndrapicchilānāṃ dravyāṇām/

karmāpi yadyasya dhātorvṛddhikaraṃ tattadāsevyam/

evamanyeṣāmapi śarīradhātūnāṃ sāmānyaviparyayābhyāṃ vṛddhihrāsau yathākālaṃ kāryau/

iti sarvadhātūnāmekaikaśo+atideśataśca vṛddhihrāsakarāṇi vyākhyātāni bhavanti//

kārtsnyena [Note: 'śarīrapuṣṭikarāstvime'iti pā+]śarīravṛddhikarāstvime bhāvā bhavanti; tadyathā---kālayogaḥ, svabhāvasaṃsiddhiḥ, āhārasauṣṭhavam, avighātaśceti//

balavṛddhikarāstvime bhāvā bhavanti/

tadyathā---balavatpuruṣe deśe janma balavatpuruṣe kāle ca, sukhaśca kālayogaḥ, bījakṣetraguṇasaṃpacca, āhārasaṃpacca, śarīrasaṃpacca, sātmyasaṃpacca, sattvasaṃpacca, svabhāvasaṃsiddhiśca, yauvanaṃ ca, karma ca, saṃharṣaśceti//

āhārapariṇāmakarāstvime bhāvā bhavanti/

tadyathā---ūṣmā, vāyuḥ, kledaḥ, snehaḥ, kālaḥ, [Note: 'saṃyogaśca'iti pā+]samayogaśceti //

tatra tu khalveṣāmūṣmādīnāmāhārapariṇāmakarāṇāṃ bhāvānāmime karmaviśeṣā bhavanti/

tadyathā---ūṣmā pacati, vāyurapakarṣati, kledaḥ śaithilyamāpādayati, sneho mārdavaṃ janayati, kālaḥ paryāptimabhinirvartayati, samayogastveṣāṃ pariṇāmadhātusāmyakaraḥ saṃpadyate//

[Note: 'pariṇāmataḥ'iti pā+]pariṇamatastvāhārasya guṇāḥ śarīraguṇabhāvamāpadyante yathāsvamaviruddhāḥ; viruddhāśca vihanyurvihatāśca virodhibhiḥ śarīram//

[Note: 'śarīradhātava'iti pā+]śarīraguṇāḥ punardvividhāḥ saṃgraheṇa---malabhūtāḥ, prasādabhūtāśca/

tatra malabhūtāste ye śarīrasyābādhakarāḥ syuḥ/

tadyathā---śarīracchidreṣūpadehāḥ pṛthagjanmāno bahirmukhāḥ, paripakvāśca dhātavaḥ, prakupitāśca vātapittaśleṣmāṇaḥ, ye cānye+api keciccharīre tiṣṭhanto bhāvāḥ śarīrasyopaghātāyopapadyante, [Note: 'malākhyān'iti pā+]sarvāṃstānmale saṃcakṣmahe; itarāṃstu [Note: 'prasādākhyān'iti pā+]prasāde, gurvādīṃśca dravāntān guṇabhedena, rasādīṃśca śukrāntān dravyabhedena//

teṣāṃ sarveṣāmeva vātapittaśleṣmāṇo duṣṭā dūṣayitāro bhavanti, doṣasvabhāvāt/

vātādīnāṃ punardhātvantare kālāntare praduṣṭānāṃ vividhāśitapītīye+adhyāye vijñānā yuktāni/

etāvatyeva duṣṭadoṣagātaryāvat saṃsparśanāccharīradhātūnām/

prakṛtibhūtānāṃ tu khalu vātādīnāṃ phalamārogyam/

tasmādeṣāṃ prakṛtibhāve prayatitavyaṃ buddhimadbhiriti//

bhavati cātra---

śarīraṃ sarvathā sarvaṃ sarvadā veda yo bhiṣak/
āyurvedaṃ sa kārtsnyena veda lokasukhapradam//

[Note: 'tamevamuktavantaṃ'iti pā+]evaṃvādinaṃ bhagavantamātreyamagniveśa uvāca---śrutametadyaduktaṃ bhagavatā śarīrādhikāre vacaḥ/

kinnu khalu garbhasyāṅgaṃ pūrvamabhinirvartate kukṣau, kuto mukhaḥ kathaṃ cāntargatastiṣṭhati, kimāhāraśca vartayati, kathaṃbhūtaśca niṣkrāmati, kaiścāyamāhāropacārairjātaḥ sadyo hanyate, kairavyādhirabhivardhate, kiṃ cāsya devādaprakopanimittā vikārāḥ saṃbhavanti āhosvinna, kiṃcāsya kālākālamṛtyvorbhāvābhāvayorbhagavānadhyavasyati, kiṃcāsya paramāyuḥ, kāni cāsya paramāyuṣo nimittānīti//

tamevamuktavantamagniveśaṃ bhagavān punarvasurātreya uvāca---pūrvamuktametadgarbhāvakrāntau yathā+ayamabhinirvartate kukṣau, yaccāsya yadā saṃtiṣṭhate+aṅgajātam/

viprativādāstvatra bahuvidhāḥ sūtrakṛtāmṛṣīṇāṃ santi sarveṣāṃ; tānapi nibodhocyamānān---śiraḥ pūrvamabhinirvartate kukṣāviti kumāraśirā bharadvājaḥ paśyati, sarvendriyāṇāṃ tadadhiṣṭhānamiti kṛtvā; hṛdayamiti kāṅkāyano bāhlīkabhiṣak, cetanādhiṣṭhānatvāt; nābhiriti bhadrakāpyaḥ, āhārāgama iti kṛtvā; pakvāśayagudamiti bhadraśaunakaḥ, mārutādhiṣṭhānatvāt; hastapādamiti baḍiśaḥ, tatkaraṇatvāt puruṣasya; indriyāṇīti janako vaidehaḥ, tānyasya buddyadhiṣṭhānānīti kṛtvā; parokṣatvādacintyamiti mārīciḥ kaśyapaḥ; sarvāṅgābhinirvṛttiryugapaditi dhanvantariḥ; tadupapannaṃ, sarvāṅgānāṃ tulyakālābhinirvṛttatvāddhṛdayaprabhṛtīnām/

sarvāṅgānāṃ hyasya hṛdayaṃ mūlamadhiṣṭhānaṃ ca keṣāñcidbhāvānām, naca tasmāt pūrvābhinirvṛttireṣāṃ; [Note: 'hṛdayapūrvāṇāṃ'iti pā+]tasmāddhṛdayaprabhṛtīnāṃ sarvāṅgānāṃ tulyakālābhinirvṛttiḥ, sarve bhāvā hyanyonyapratibaddhāḥ; tasmādyathābhūtadarśanaṃ sādhu//

garbhastu khalu mātuḥ pṛṣṭhābhimukha ūrdhvaśirāḥ saṅkucyāṅgānyāste+ [Note: 'saṅkucyāṅgānyāste jarāyuvṛtaḥ kukṣau'iti pā+]antaḥkukṣau //

vyapagatapipāsābubhukṣastu khalu garbhaḥ paratantravṛttirmātaramāśritya vartayatyupasnehopasvedābhyāṃ garbhāśaye sadasadbhūtāṅgāvayavaḥ, tadanantaraṃ hyasya kaścillomakūpāyanairupasnehaḥ kaścinnābhināḍyayanaiḥ/

nābhyāṃ hyasya nāḍī prasaktā, nāḍyāṃ cāparā, aparā cāsya mātuḥ prasaktā hṛdaye, mātṛhṛdayaṃ hyasya tāmaparāmabhisaṃplavate sirābhiḥ [Note: 'saṃspandamānābhiḥ'iti pā+]syandamānābhiḥ; sa tasya raso balavarṇakaraḥ saṃpadyate, sa ca sarvarasavānāhāraḥ/

striyā hyāpannagarbhāyāstridhā rasaḥ pratipadyate-svaśarīrapuṣṭaye, stanyāya, garbhavṛddhaye ca /

sa tenāhāreṇopaṣṭabdhaḥ (paratantravṛttirmātaramāśritya) vartayatyantargataḥ//

sa copasthitakāle janmani prasūtimārutayogāt [Note: 'parivṛtyārvākśirā'iti pā+]parivṛttyāvākśirā niṣkrāmatyapatyapathena, eṣā prakṛtiḥ, vikṛtiḥ punarato+anyathā/

paraṃ [Note: 'paraṃ tataḥ'iti pā+]tvataḥ svatantravṛttirbhavati//

tasyāhāropacārau jātisūtrīyopadiṣṭāvavikārakarau cābhivṛddhikarau bhavataḥ//

tābhyāmeva ca viṣamasevitābhyāṃ jātaḥ sadya upahanyate tarurivāciravyaparopito vātātapābhyāmapratiṣṭhitamūlaḥ//

āptopadeśādadbhutarūpadarśanāt samutthānaliṅgacikitsitaviśeṣāccādoṣaprakopānurūpā devādiprakopanimittā vikārāḥ samupalabhyante//

kālākālamṛtyvostu khalu bhāvābhāvayoridamadhyavasitaṃ naḥ---"yaḥ kaścin sa kāla eva mriyate, na hi kālacchidramasti" ityeke bhāṣante/

taccāsamyak/

na hyacchidratā sacchidratā vā kālasyopapadyate, kālasvalakṣaṇasvabhāvāt/

tatrāhurapare---yo yadā mriyate sa tasya niyato mṛtyukālaḥ; sa sarvabhūtānāṃ satyaḥ, samakriyatvāditi/

etadapi cānyathā+arthagrahaṇam/

na hi kaścinna mriyata iti samakriyaḥ/

kālo hyāyuṣaḥ pramāṇamadhikṛtyocyate/

yasya ceṣṭaṃ yo yadā mriyate sa tasya mṛtyukāla iti, tasya sarve bhāvā yathāsvaṃ niyatakālā bhaviṣyanti; tacca nopapadyate, pratyakṣaṃ hyakālāhāravacanakarmaṇāṃ phalamaniṣṭaṃ, viparyaye ceṣṭaṃ; pratyakṣataścopalabhyate khalu kālākālavyaktistāsu tāsvavasthāsu taṃ tamarthamabhisamīkṣya, tadyathā---kālo+ayamasya vyadherāhārasyauṣadhasya pratikarmaṇo visargasya, akālo veti/

loke+apyetadbhavati---kāle devo varṣatyakāle devo varṣati, kāle śītamakāle śītaṃ, kāle tapatyakāle tapati, kāle puṣpaphalamakāle ca puṣpaphalamiti/

tasmādubhayamasti---kāle mṛtyurakāle ca; naikāntikamatra/

yadi hyakāle mṛtyurna syānniyatakālapramāṇamāyuḥ sarvaṃ syāt; evaṃ gate hitāhitajñānamakāraṇaṃ syāt, pratyakṣānumānopadeśāścāpramāṇāni syurye pramāṇabhūtāḥ sarvatantreṣu, yairāyuṣyāṇyanāyuṣyāṇi copalabhyante/

vāgvastumātrametadvādamṛṣayo manyante---nākāle mṛtyurastīti//

varṣaśataṃ khalvāyuṣaḥ pramāṇamasmin kāle//

tasya nimittaṃ prakṛtiguṇātmasaṃpat sātmyopasevanaṃ ceti//

tatra ślokāḥ---

śarīraṃ yadyathā [Note: 'yathāvacca'iti lā+]tacca vartate kliṣṭamāmayaiḥ/
yathā kleśaṃ vināśaṃ ca yāti ye cāsya dhātavaḥ//
vṛddhihrāsau yathā teṣāṃ kṣīṇānāmauṣadhaṃ ca yat/
dehavṛddhikarā bhāvā balavṛddhikarāśacaye //
lariṇāmakarā bhāvā yā ca teṣāṃ lṛthak kriyā/
malākhyāḥ [Note: 'saprasādākhyāḥ'iti lā+]saṃprasādākhyā dhātavaḥ praśna eva ca//
[Note: 'daśakaḥ'iti lā+]navako nirṇayaścāsya vidhivat saṃprakāśitaḥ/
tathyaḥ śarīravicaye śārīre laramarṣiṇā//

ityagniveśakṛte tantre carakapratisaṃskṛte śārīrasthāne śarīravicayaśārīraṃ nāma ṣaṣṭho+adhyāyaḥ//6//

4.7. saptamo+adhyāyaḥ/

athātaḥ śarīrasaṃkhyā- [Note: 'śarīrasaṃkhyāṃ nāma śārīraṃ' iti pā+]śārīraṃ vyākhyāsyāmaḥ //

iti ha smāaha bhagavānātreyaḥ //

śarīrasaṃkhyāmavayavaśaḥ kṛtsnaṃ śarīraṃ pravibhajya sarvaśarīrasaṃkhyānapramāṇajñānahetorbhagavantamātreyamagniveśaḥ papraccha //

tamuvāca bhagavānātreyaḥ --- śṛṇu matto+agniveśa ! sarvaśarīramācakṣāṇasya yathāpraśnamekamanā yathāvat / śarīre ṣaṭ tvacaḥ ;tadyathā --- udakadharā tvagbāhyā, dvitīyā tvasṛgdharā,tṛtīyā sidhmakilāsasaṃbhavādhiṣṭhānā,catuethī dadrūkuṣṭhasaṃbhavādhiṣṭhānā,pañcamī tvalajīvidradhisaṃbhavādhiṣṭhānā,ṣaṣṭhī tu yasyāṃ chinnāyāṃ tāmyatyandha iva ca tamaḥ praviśati yāṃ cāpyadhiṣṭhāyārūṃṣi jāyante parvasu kṛṣṇāraktāni sthūlamūlāni duścikitsyatamāni ca ; iti ṣaṭ tvacaḥ / etāḥ ṣaḍaṅgaṃ śarīramavatatya tiṣṭhanti //

tatra [Note: 'atha'iti pā+]ayaṃ śarīrasyāṅgavibhāgaḥ;tadyathā ---dvau bāhū,dve sakthinī,śirogrīvam,antarāadhiḥ,iti ṣaḍaṅgamaṅgam //

trīṇi saṣaṣṭīni śatānyasthnāṃ saha [Note: 'dantolūkhalanakhaiḥ'iti pā+]dantolūkhalanakhena tadyathā --- dvātriṃśaddantāḥ,dvātriṃśaddantolūkhalāni,viṃśatirnakhāḥ,ṣaṣṭiḥ pāṇipādāṅgulyāsthīni,viṃśatiḥ pāṇipādaśalākāḥ, [Note: 'catvāryadhiṣṭhānānyāsāṃ'iti pā+]catvāri pāṇipādaśalākādhiṣṭhānāni,dve pārṣṇyorasthinī,catvāraḥ pādayorgulphāḥ,dvau [Note: 'maṇibandhakau'iti pā+]maṇikau hastayoḥ,catvāryaratyorasthīni,catvāri jaṅghayoḥ,dve jānunī,dve jānukapālike,dvāvūrunalakau,dvau bāhunalakau,dvāvaṃsau,dve aṃsaphalake,dvāvakṣakau,ekaṃ jatru,dve tāluke,dve śroṇiphalake,ekaṃ bhagāsthi,paṅcacatvāriṃśat pṛṣṭhagatānyasthīni,pañcadaśa grīvāyāṃ,caturdaśorasi,dvayoḥ pārśvayoścaturviṃśatiḥ parśukāḥ,tāvanti sthālakāni,tāvanti caiva sthālakārbudāni,ekaṃ hanvasthi,dve hanumūlabandhane,ekāsthi nāsikāgaṇḍalalāṭaṃ,dvau śaṅkhau,catvāri śiraḥkapālānīti; evaṃ trīṇi saṣaṣṭīni śatānyasthnāṃ saha datolūkhalanakhenaiti //

pañcendriyādhiṣṭhānāni; tadyathā --- tvag,jihvā,nāsikā,asṣiṇī,karṇau ca /

pañca buddhīndriyāṇi;tadyathā --- sparśanaṃ,rasanaṃ,ghrāṇaṃ,darśanaṃ,śrotramiti /

pañca karmendriyāṇi ; tadyathā --- hastau,pādau,pāyuḥ,upsthaḥ,jihvā ceti //

hṛdayaṃ cetanādhiṣṭhānamekam //

daśa prāṇāyatanāni; tadyathā --- mūrdhā,kaṇṭhaḥ,hṛdayaṃ,nābhiḥ,gudaṃ,bastiḥ,ojaḥ,śukraṃ,śoṇitaṃ,māṃsamiti/

teṣu ṣaṭ pūrvāṇi marmasaṃkhyātāni//

pañcadaśa koṣṭhāṅgāni; tadyathā --- nābhiśca,hṛdayaṃ ca,kloma ca,yakṛcca,plīhā ca,vṛkkau ca,bastiśca,purīṣādhāraśca,āmāśayaśca,pakvāśayaśca,uttaragudaṃ ca,adharagudaṃ ca,kṣudrāntraṃ ca,sthūlāntraṃ ca,vapāvahanaṃ ceti//

ṣaṭpañcāśat pratyaṅgāni,ṣaṭsvaṅgeṣūpanibaddhāni,yānyaparisaṃkhyātāni pūrvamaṅgeṣu parisaṃkhyāyamāneṣu,tānyanyaiḥ paryāyairiha [Note: 'prakāśya vyākhyātāni'iti pā+]prakāśyāni bhavanti/

tadyathā --- dve jaṅghāpiṇḍike,dve ūrupiṇḍike,dvau sphicau,dvau vṛṣaṇau,ekaṃ śephaḥ,dve ukhe,dvau vaṅghaṇau,dvau kukundarau,ekaṃ bastiśīrṣam,ekamudaraṃ,dvau stanau,dvau [Note: 'dvau bhujau'iti pā+]śleṣmabhuvau, dve bāhupiṇḍike,cibukamekaṃ,dvāvoṣṭhau,dve sṛkkaṇyau,dvau dantaveṣṭakau,ekaṃ tālu,ekā galaśuṇḍikā,dve upajihvike,ekāgojihvikā,dvau gaṇḍau,dve karṇaśaṣkulike,dvau karṇaputrakau,dve akṣikūṭe,catvāryakṣivartmāni,dve akṣikanīnike,dve bhruvau,ekāvaṭuḥ,catvāri pāṇipādahṛdayāni//

nava mahanti chidrāṇi - sapta śirasi,dve cādhaḥ//

etāvaddṛśyaṃ śakyamapi nirdeṣṭum //

anirdeśyamataḥ paraṃ tarkyameva /

tadyathā --- nava snāyu-śatāni, sapta sirāśatāni, dve dhamanīśate, [Note: 'pañca peśīśatāni'iti pā+]catvāri peśīśatāni, saptottaraṃ marmaśataṃ, dve sandhiśate, [Note: 'ekonatriṃśacchatasahasrāṇi'iti pā+]ekonatriṃśatsahasrāṇi nava ca śatāni ṣaṭpañcāśatkāni sirādhamanīnāmaṇuśaḥ pravibhajyamānānāṃ mukhāgraparimāṇaṃ, tāvanti caiva keśaśmaśrulomānīti /

etadyathāvatsaṃkhyātaṃ tvakprabhṛti dṛśyaṃ, tarkyamataḥ param /

[Note: 'eke tadubhayamapi na vikalpayante prakṛtibhāvāccharīrasya'iti,'tvakprabhṛti dṛśyaṃ tarkyamevetyeke,tadubhayamapi na vikalpate prakṛtibhāvāccharīrasya'iti ca pā+]etadubhayamapi na vikalpate, prakṛtibhāvāccharīrasya //

yattvañjalisaṃkhyeyaṃ tadupadekṣyāmaḥ; tat paraṃ pramāṇamabhijñeyaṃ, tacca vṛddhihrāsayogi, tarkyameva / tadyathā --- daśodakasyāñjalayaḥ śarīre svenāñjalipramāṇena, yattu pracyavamānaṃ purīṣam anubadhnātyatiyogena tathā mūtraṃ rudhiramanyāṃśca śarīradhātūn, yattu sarvaśarīracaraṃ bāhyā tvagbibharti, yattu tvagantare vraṇagataṃ lasīkāśabdaṃ labhate, yaccaoṣmaṇānubaddhaṃ lomakūpebhyo niṣpatat svedaśabdamavāpnoti, tadudakaṃ daśāñjalipramāṇaṃ; navāñjalayaḥ pūrvasyāhārapariṇāmadhātoḥ, yaṃ 'rasa' ityācakṣate; aṣṭau śoṇitasya, sapta purīṣasya, ṣaṭ śleṣmaṇaḥ, pañca pittasya, catvāro mūtrasya, trayo vasāyāḥ, dvau medasaḥ, eko majjāyāḥ, mastiṣkasyārdhāñjaliḥ, śukrasya tāvadeva pramāṇaṃ, [Note: 'tāvadeva caujasaḥ, strīṇāmārtavasya catvāro+añjalayaḥ'iti pā+]tāvadeva ślaiṣmikasyaujasa iti/ etaccharīratattvamuktam //

tatra yadviśeṣataḥ sthūlaṃ sthiraṃ mūrtimadgurukharakaṭhinamaṅgaṃ nakhāsthidantamāṃsacarmavarcaḥkeśaśmaśrulomakaṇḍarādi tat pārthivaṃ gandho ghrāṇaṃ ca; yaddravasaramandasnigdhamṛdupicchilaṃ rasarudhiravasākaphapittamūtrasvedādi tadāpyaṃ raso rasanaṃ ca; yat pittamūṣmā ca yo yā ca bhāḥ śarīre tat sarvamāgneyaṃ rūpaṃ darśanaṃ ca; yaducchvāsapraśvāsonmeṣanimeṣākuñcanaprasāraṇagamanapreraṇadhāraṇādi tadvāyavīyaṃ sparśaḥ sparśanaṃ ca; yadviviktaṃ yaducyate mahānti cāṇūni srotāṃsi tadāntarīkṣaṃ śabdaḥ śrotraṃ ca; yat prayoktṛ tat pradhānaṃ buddhirmanaśca/

iti śarīrāvayavasaṃkhyā yathāsthūlabhedenāvayavānāṃ nirdiṣṭā //

śarīrāvayavāstu paramāṇubhedenāparisaṃkhyeyā bhavanti, atibahutvādatisaukṣmyādatīndriyatvācca /

teṣāṃ saṃyogavibhāge paramāṇūnāṃ kāraṇaṃ vāyuḥ karmasvabhāvaśca //

tadetaccharīraṃ saṃkhyātamanekāvayavaṃ dṛṣṭamekatvena saṅgaḥ, pṛthaktvenāpavargaḥ /

tatra pradhānamasaktaṃ sarva [Note: 'sarvasaṃtānanivṛttau'iti pā+]sattānivṛttau nivartate iti //

tatra ślokau ---

śarīrasaṃkhyāṃ yo veda sarvāvayavaśo bhiṣak /
tadajñānanimittena sa mohena na yujyate //
amūḍho mohamūlaiśca na doṣairabhibhūyate /
nirdoṣo niḥspṛhaḥ śāntaḥ praśāmyatyapunarbhavaḥ //

ityagniveśakṛte tantre carakapratisaṃskṛte śārīrasthāne śarīrasaṃkhyāśārīraṃ nāma saptamo+adhyāyaḥ //

4.8. aṣṭamo+adhyāyaḥ

athāto jātisūtrīyaṃ śārīraṃ vyākhyāsyāmaḥ//

iti ha smāha bhagavānātreyaḥ//

strīpuṃsayoravyāpannaśukraśoṇitagarbhāśayayoḥ śreyasīṃ prajāmicchatostadartha^ [Note: 'tannirvṛttikaraṃ'iti pā+]abhinirvṛttikaraṃ karmopadekṣyāmaḥ//

athāpyetau strīpuṃsau snehasvedābhyāmupapādya,vamanavirecanābhyāṃ saṃśodhya,krameṇa prakṛtimāpādayet /

saṃśuddhau cāsthāpanānuvāsanābhyāmupācaret; upācarecca madhurauṣadhasaṃskṛtābhyāṃ ghṛtakṣīrābhyāṃ puruṣaṃ, striyaṃ tu tailamāṣābhyām//

tataḥ puṣpāt prabhṛti trirātramāsīta(?) brahmacāriṇyadhaḥśāyinī, pāṇibhyāmannamajarjarapātrādbhuñjānā, na ca kāñcinmṛjāmāpadyeta /

tataścaturthe+ahanyenāmutsādya saśiraskaṃ snāpayitvā śuklāni vāsāṃsyācchādayet puruṣaṃ ca /

tataḥ śuklavāsasau sragviṇau sumanasāvanyonyamabhikāmau saṃvaseyātāṃ snānāt prabhṛti yugmeṣvahaḥsu putrakāmau, ayugmeṣu duhitṛkāmau//

na ca nyubjāṃ pārśvagatāṃ vā saṃseveta /

nyubjāyā vāto balavān sa yoniṃ pīḍayati, pārśvagatāyā dakṣiṇe pārśve śleṣmā sa cyutaḥ pidadhāti garbhāśayaṃ, vāme pārśve pittaṃ tadasyāḥ pīḍitaṃ vidahati raktaṃ śukraṃ ca, tasmāduttānā bījaṃ gṛhṇīyāt; tathāhi yathāsthānamavatiṣṭante doṣāḥ/

paryāpte caināṃ śītodakena pariṣiñcet /

tatrātyaśitā kṣudhitā pipāsitā bhītā vimanāḥ śokārtā kruddhā+anyaṃ ca pumāṃsamicchantī maithune cātikāmā vā na garbhaṃ dhatte, viguṇāṃ vā prajāṃ janayati/

atibālāmativṛddhāṃ dīrgharogiṇīmanyena vā vikāreṇopasṛṣṭāṃ varjayet/

puruṣe+apyeta eva doṣāḥ /

ataḥ sarvadoṣavarjitau strīpuruṣau saṃsṛjyeyātām//

saṃjātaharṣau maithune cānukūlāviṣṭagandhaṃ svāstīrṇaṃ sukhaṃ śayanamupakalpya manojñaṃ hitamaśanamaśitvā nātyaśitau dakṣiṇapādena pumānārohet vāmapādena strī//

tatra mantraṃ prayuñjīta -- "ahirasi āyurasi sarvataḥ pratiṣṭhā+si dhātā tvā dadatu vidhātā tvā dadhātu brahmavarcasā bhava"iti /

"brahmā bṛhaspatirviṣṇuḥ somaḥ sūryastathā+aśvinau/

bhago+atha mitrāvaruṇau vīraṃ dadatu me sutam " ityuktvā saṃ vaseyātām//

sā cedevamāśāsīta -- bṛhantamavadātaṃ haryakṣamojasvinaṃ śuciṃ sattvasaṃpannaṃ putramiccheyamiti, śuddhasnānāt prabhṛtyasyai manthamavadātayavānāṃ madhusarpirbhyāṃ saṃsṛjya śvetāyā goḥ sarūpavatsāyāḥ payasā+āloḍya rājate kāṃsye vā pātre kāle kāle saptāhaṃ satataṃ prayacchet pānāya / prātaśca śāliyavānnavikārān dadhimadhusarpirbhiḥ payobhirvā saṃsṛjya bhuñjīta, tathā sāyamavadātaśaraṇaśayanāsanapānavasanabhūṣaṇā ca syāt /sāyaṃ prātaśca śaśvacchvetaṃ mahāntaṃ vṛṣabhamājāneyaṃ vā haricandanāṅgadaṃ paśyet /

saumyābhiścaināṃ kathābhirmanonukūlābhirupāsīta /

saumyākṛtivacanopacāraceṣṭāṃśca strīpuruṣānitarānapi cendriyārthānavadātān paśyet /

sahacaryaścaināṃ priyahitābhyāṃ satatamupacareyustathā bhartā /

na ca miśrībhāvamāpadyeyātāmiti /

anena vidhinā saptarātraṃ sthitvā+aṣṭame+ahanyāplutyādbhiḥ saśiraskaṃ saha bhartrā ahatāni vastrāṇyācchādayedavadātāni, avadātāśca srajo bhūṣaṇāni ca bibhṛyāt//

tata ṛtvik prāguttarasyāṃ diśyagārasya prāgpravaṇamudakpravaṇaṃ vā pradeśamabhisamīkṣya, gomayodakābhyāṃ sthaṇḍilamupalipya, prokṣya codakena, vedīmasmin sthāpayet/

tāṃ paścimenāhatavastrasaṃcaye śvetārṣabhe vā'apyajina upaviśed brāhmaṇaprayuktaḥ, rājanyaprayuktastu vaiyāghre carmaṇyānaḍuhe vā, vaiśyaprayuktastu raurave bāste vā/

tatropaviṣṭaḥ pālāśībhiraiṅgudībhiraudumbarībhirmādhūkībhirvā samidbhiragnimupasamādhāya, kuśaiḥ paristīrya, paridhibhiśca paridhāya, lājaiḥ śuklābhiśca gandhavatībhiḥ sumanobhirupakiret/

tatra praṇīyodapātraṃ pavitrapūtamupasaṃskṛtya sarpirājyārthaṃ yathoktavarṇānājāneyādīn samantataḥ sthāpayet//

tataḥ putrakāmā paścimato'agniṃ dakṣiṇato brāhmaṇamupaviśyānvālabheta saha bhartrā yatheṣṭaṃ putramāśāsānā/

tatastasyā āśāsānāyā ṛtvik prajāpatimabhinirdiśya yonau tasyāḥ kāmaparipūraṇārthaṃ kāmyāmiṣṭiṃ nirvartayed 'viṣṇuryoniṃ kalpayatu'ityanayarcā/

tataścaivājyena sthālīpākamabhighārya trirjuhuyādyathāmnāyam/

mantropamantritamudapātraṃ tasyai dadyāt sarvodakārthān kuruṣveti/

tataḥ samāpte karmaṇi pūrvaṃ dakṣiṇapādamabhiharantī pradakṣiṇamagnimanuparikrāmet saha bhartrā/

[Note: 'tato+anuparikramya'iti pā+]tato brāhmaṇān svasti [Note: 'saha bhartrā++ājyaśeṣaṃ'iti pā+]vācayitvā++ājyaśeṣaṃ prāśnīyāt pūrvaṃ pumān, paścāt strī; na cocchiṣṭamavaśeṣayet/

tatastau saha saṃvaseyātāmaṣṭarātraṃ, tathāvidhaparicchadāveva ca syātāṃ [Note: syātāmiti hastalikhitapustake na paṭhyate], tatheṣṭaputraṃ janayetām//

yā tu strī śyāmaṃ lohitākṣaṃ vyūḍhoraskaṃ mahābāhuṃ ca putramāśāsīta, yā vā kṛṣṇamṛdudīrghakeśaṃ śuklākṣaṃ śukladantaṃ tejasvinamātmavantam; eṣa evānayorapi homavidhiḥ/

kintu paribarho varṇavarjaṃ syāt/

putravarṇānurūpastu yathāśīreva tayoḥ paribarho'anyaḥ kāryaḥ syāt//

śūdrā tu namaskārameva kuryāt [Note: yogīndranāthasenastvamuṃ pāṭhaṃ na paṭhati](devāgnidvijagurutapasvisiddhebhyaḥ) //

yā yā ca yathāvidhaṃ putramāśāsīta tasyāstasyāstāṃ tāṃ putrāśiṣamanuniśamya tāṃstāñjanapadānmanasā'anuparikrāmayet/

[Note: 'tānanuparikramya'iti pā+]tato yā yā yeṣāṃ yeṣāṃ janapadānāṃ manuṣyāṇāmanurūpaṃ putramāśāsīta sā sā teṣāṃ teṣāṃ janapadānāṃ manuṣyāṇāmāhāravihāropacāraparicchadānanuvidhatsveti vācyā syāt/

ityetat sarvaṃ putrāśiṣāṃ samṛddhikaraṃ karma vyākhyātaṃ bhavati//

na khalu kevalametadeva karma varṇavaiśeṣyakaraṃ bhavati/

api tu tejodhāturapyudakāntarikṣadhātuprāyo'avadātavarṇakaro bhavati, pṛthivīvāyudhātuprāyaḥ kṛṣṇavarṇakaraḥ, samasarvadhātuprāyaḥ śyāmavarṇakaraḥ//

sattvavaiśeṣyakarāṇi punasteṣāṃ teṣāṃ prāṇināṃ mātāpitṛsattvānyantarvatnyāḥ śrutayaścābhīkṣṇaṃ svocitaṃ ca karma sattvaviśeṣābhyāsaśceti//

yathoktena vidhinopasaṃskṛtaśarīrayoḥ strīpuruṣayormiśrībhāvamāpannayoḥ śukraṃ śoṇitena saha saṃyogaṃ sametyāvyāpannamavyāpannena yonāvanupahatāyāmapraduṣṭe garbhāśaye garbhamabhinirvartayatyekāntena/

yathā --- nirmale vāsasi suparikalpite rañjanaṃ samuditaguṇamupanipātādeva rāgamabhinirvartayati, tadvat; yathā vā kṣīraṃ dadhnā+abhiṣutamabhiṣavaṇādvihāya svabhāvamāpadyate dadhibhāvaṃ, śukraṃ tadvat//

evamabhinirvartamānasya garbhasya strīpuruṣatve hetuḥ pūrvamuktaḥ /

yathā hi bījamanupataptamuptaṃ svāṃ svāṃ prakṛtimanuvidhīyate vrīhirvā vrīhitvaṃ yavo vā yavatvaṃ tathā strīpuruṣāvapi yathoktaṃ hetuvibhāgamanuvidhīyete//

tayoḥ karmaṇā vedoktena [Note: 'vivartanam anyathātvena pravartanam'iti gaṅgādharaḥ]vivartanamupadiśyate prāgvyaktībhāvāt prayuktena samyak/ karmaṇāṃ hi deśakālasaṃpadupetānāṃ niyatamiṣṭaphalatvaṃ, tathetareṣāmitaratvam/

tasmādāpannagarbhāṃ striyamabhisamīkṣya prāgvyaktībhāvādgarbhasya puṃsavanamasyai dadyāt/

goṣṭhe jātasya nyagrodhasya prāguttarābhyāṃ śākhābhyāṃ śuṅge anupahate ādāya dvābhyāṃ dhānyamāṣābhyāṃ saṃpadupetābhyāṃ gaurasarṣapābhyāṃ vā saha dadhni prakṣipya puṣyeṇa pibet, tathaivāparāñjīvakarṣabhakāpāmārgasahacarakalkāṃśca yugapadekaikaśo yatheṣṭaṃ vā+apyupasaṃskṛtya payasā, kuḍyakīṭakaṃ matsyakaṃ vodakāñjalau prakṣipya puṣyeṇa pibet, tathā kanakamayān rājatānāyasāṃśca puruṣakānagnivarṇānaṇupramāṇān dadhni payasyudakāñjalau vā prakṣipya pibedanavaśeṣataḥ puṣyeṇa, puṣyeṇaiva ca śālipiṣṭasya pacyamānasyoṣmāṇamupāghrāya tasyaiva ca piṣṭasyodakasaṃsṛṣṭasya rasaṃ [Note: 'dehalīmupadhāya'iti pā+]dehalyāmupanidhāya dakṣiṇe nāsāpuṭe svayamāsiñcet picunā/ yaccānyadapi brāhmaṇā brūyurāptā vā striyaḥ puṃsavanamiṣṭaṃ taccānuṣṭheyam/

iti puṃsavanāni//

ata ūrdhvaṃ garbhasthāpanāni vyākhyāsyāmaḥ---aindrī brāhmī śatavīryā sahasravīryā+amoghā+avyathā śivā+ariṣṭā vāṭyapuṣpī viṣvaksenakāntā cetyāsāmoṣadhīnāṃ śirasā dakṣiṇena vā pāṇinā dhāraṇaṃ, etābhiścaiva siddhasya payasaḥ sarpiṣo vā pānam, etābhiścaiva puṣye puṣye snānaṃ, sadā ca [Note: 'sadā caitābhiḥ'iti pā+]tāḥ samālabheta/

tathā sarvāsāṃ jīvanīyoktānāmoṣadhīnāṃ sadopayogastaistairupayogavidhibhiḥ/

iti garbhasthāpanāni vyākhyātāni bhavanti//

garbhopaghātakarāstvime bhāvā bhavanti; tadyathā--- [Note: 'utkaṭaviṣamasthānakaṭhināsanasevinyāḥ'iti pā+]utkaṭaviṣamakaṭhināsanasevinyā vātamūtrapurīṣavegānuparundhatyā dāruṇānucitavyāyāmasevinyāstīkṣṇoṣṇātimātrasevinyāḥ pramitāśanasevinyā garbho mriyate+antaḥ kukṣeḥ, akāle vā sraṃsate, śoṣī vā bhavati; tathā+abhighātaprapīḍanaiḥ śvabhrakūpaprapātadeśāvalokanairvā+abhīkṣṇaṃ mātuḥ prapatatyakāle garbhaḥ, tathā+atimātrasaṃkṣobhibhiryānairyānena, apriyātimātraśravaṇairvā /

pratatottānaśāyinyāḥ punargarbhasya nābhyāśrayā nāḍī kaṇṭhamanuveṣṭayati, vivṛtaśāyinī naktaṃcāriṇī conmattaṃ janayati, apasmāriṇaṃ punaḥ kalikalahaśīlā, vyavāyaśīlā durvapuṣamahrīkaṃ straiṇaṃ vā, śokanityā bhītamapacitamalpāyuṣaṃ vā, [Note: ' abhidhyāyinī'iti pā+]abhidhyātrī paropatāpinamīrṣyuṃ straiṇaṃ vā, stenā tvāyāsabahulamatidrohiṇamakarmaśīlaṃ vā, amarṣiṇī caṇḍamaupadhikamasūyakaṃ vā, svapnanityā tandrālumabudhamalpāgniṃ vā, madyanityā pipāsālumalpasmṛtimanavasthitacittaṃ vā, [Note: 'godhāmāṃsapriyā'iti pā+]godhāmāṃsaprāyā śārkariṇamaśmariṇaṃ śanairmehiṇaṃ vā, varāhamāṃsaprāyā raktākṣaṃ krathanamatiparuṣaromāṇaṃ vā, matsyamāṃsanityā ciranimeṣaṃ stabdhākṣaṃ vā, madhuranityā pramehiṇaṃ mūkamatisthūlaṃ vā, amlanityā raktapittinaṃ tvagakṣirogiṇaṃ vā, lavaṇanityā śīghravalīpalitaṃ khālityarogiṇaṃ vā, kaṭukanityā durbalamalpaśukramanapatyaṃ vā, tiktanityā śoṣiṇamabalamanupacitaṃ vā, kaṣāyanityā śyāvamānāhinamudāvartinaṃ vā, yadyacca yasya yasya vyādhernidānamuktaṃ tattadāsevamānā+antarvatnī tannimittavikārabahulamapatyaṃ janayati/

pitṛjāstu śukra doṣāmātṛjairapacārairvyākhyātāḥ/

iti garbhopaghātakarā bhāvā [Note: 'vyākhyātāḥ'iti pā+]bhavantyuktāḥ /

tasmādahitānāhāravihārān prajāsaṃpadamicchantī strī viśeṣeṇa varjayet/sādhvācārā cātmānamupacareddhitābhyāmāhāravihārābhyāmiti//

vyādhīṃścāsyā mṛdumadhuraśiśirasukhasukumāraprāyairauṣadhāhāropacārairupacaret, na cāsyā vamanavirecanaśirovirecanāni prayojayet, na raktamavasecayet, sarvakālaṃ ca nāsthāpanamanuvāsanaṃ vā kuryādanyatrātyayikādvyādheḥ/

aṣṭamaṃ māsamupādāya vamanādisādhyeṣu punarvikāreṣvātyayikeṣu mṛdubhirvamanādibhistadarthakāribhirvopacāraḥ syāt/

pūrṇamiva tailapātram- [Note: 'asaṃkṣobhyāntarvartnī' iti pā+]asaṃkṣobhayatā+antarvatnī bhavatyupacaryā//

sā cedapacārād dvayostriṣu vā māseṣu puṣpaṃ paṣyennāsyā garbhaḥ sthāsyatīti vidyāt; ajātasāro hi tasmin kāle bhavati garbhaḥ//

sā ceccatuṣprabhṛtiṣu māseṣu krodhaśokāsūyerṣyābhayatrāsavyavāyavyāyāmasaṃkṣobhasaṃdhāraṇaviṣamāśanaśayanasthānakṣutpipāsātiyogāt kadāhārādvā puṣpaṃ paśyet, tasyā garbhasthāpanavidhimupadekṣyāmaḥ/

puṣpadarśanādevaināṃ brūyāt---śayanaṃ tāvanmṛdusukhaśiśirāstaraṇasaṃstīrṇamīṣadavanataśiraskaṃ pratipadyasveti/

tato yaṣṭīmadhukasarpirbhyāṃ paramaśiśiravāriṇi saṃsthitābhyāṃ picumāplāvyopasthasamīpe sthāpayettasyāḥ, tathā śatadhautasahasradhautābhyāṃ sarpirbhyāmadhonābheḥ sarvataḥ pradihyāt, sarvataśca gavyena caināṃ payasā suśītena madhukāmbunā vā nyagrodhādikaṣāyeṇa vā pariṣecayedadho nābheḥ, udakaṃ vā suśītamavagāhayet, kṣīriṇāṃ kaṣāyadrumāṇāṃ ca svarasaparipītāni [Note: 'tailāni' iti pā+]celāni grāhayet, nyagrodhādiśuṅgāsiddhayorvā kṣīrasarpoṣoḥ picuṃ grāhayet, ataścaivākṣamātraṃ prāśayet, prāśayedvā kevalaṃ kṣīrasarpiḥ, padmotpalakumudakiñjalkāṃścāsyai samadhuśarkarān lehārthaṃ dadyāt, śṛṅgāṭakapuṣkarabījakaśerukān bhakṣaṇārthaṃ, gandhapriyaṅgvasitotpalaśālūkodumbaraśalāṭunyagrodhaśuṅgāni vā pāyayedenāmājena payasā, payasā caināṃ balātibalāśāliṣaṣṭikekṣumūlakākolīśṛtena samadhuśarkaraṃ raktaśālīnāmodanaṃ mṛdusurabhiśītalaṃ bhojayet, lāvakapiñjalakuraṅgaśamvaraśaśahariṇaiṇakālapucchakarasena vā ghṛtasusaṃskṛtena sukhaśiśiropavātadeśasthāṃ bhojayet, krodhaśokāyāsavyavāyavyāyāmebhyaścābhirakṣet, saumyābhiścaināṃ kathābhirmanonukūlābhirupāsīta; tathā+asyā garbhastiṣṭhati//

yasyāḥ punarāmānvayāt puṣpadarśanaṃ syāt, prāyastasyāstadgarbhopaghātakaraṃ bhavati, viruddhopakramatvāttayoḥ//

yasyāḥ punaruṣṇatīkṣṇopayogādgarbhiṇyā mahati saṃjātasāre garbhe puṣpadarśanaṃ syādanyo vā yonisrāvastasyā garbho vṛddhiṃ na prāpnoti niḥsrutatvāt; sa kālamavatiṣṭhate+atimātraṃ, tamupaviṣṭakamityācakṣate kecit/

upavāsavratakarmaparāyāḥ punaḥ kadāhārāyāḥ snehadveṣiṇyā vātaprakopaṇoktānyāsevamānāyā garbho vṛddhiṃ na prāpnoti pariśuṣkatvāt;sa cāpi [Note: 'kālāntaraṃ'iti pā+]kālamavatiṣṭhate+atimātram, aspandanaśca bhavati, taṃ tu nāgodaramityācakṣate//

nāryostayorubhayorapi cikitsitaviśeṣamupadekṣyāmaḥ---bhautikajīvanīyabṛhaṇīyamadhuravātaharasiddhānāṃ sarpiṣāṃ payasāmāmagarbhāṇāṃ copyogo garbhavṛddhikaraḥ; tathā saṃbhojanametaireva siddhaiśca ghṛtādibhiḥ [Note: 'sububhukṣāyāṃ'(-ḥ?)iti pā+]subhikṣāyāḥ, abhīkṣṇaṃ yānavāhanāpamārjanāvajṛmbhaṇairupapādanamiti//

yasyāḥ punargarbhaḥ prasupto na spandate tāṃ śyenamatsyagavayaśikhitāmracūḍatittirīṇāmanyatamasya sarpiṣmatā rasena māṣayūṣeṇa vā prabhūtasarpiṣā mūlakayūṣeṇa vā raktaśālīnāmodanaṃ mṛdumadhuraśītalaṃ bhojayet /

tailābhyaṅgena cāsyā abhīkṣṇamudarabastivaṃkṣaṇorukaṭīpārśvapṛṣṭhapradeśānīṣaduṣṇenopacaret//

yasyāḥ punarudāvartavibandhaḥ syādaṣṭame māse na cānuvāsanasādhyaṃ manyeta tatastasyāstadvikārapraśamanamupakalpayennirūham/

udāvarto hyupekṣitaḥ sahasā [Note: 'garbhaṃ sagarbhāṃ garbhiṇīṃ vā nipātayet' iti pā+]sagarbhāṃ garbhiṇīṃ garbhamathavā+atipātayet/

tatra vīraṇaśāliṣaṣṭikakuśakāśekṣuvālikāvetasaparivyādhamūlānāṃ bhūtīkānantākāśmaryaparūṣakamadhukamṛdvīkānāṃ ca payasā+ardhodakenodgamayya rasaṃ priyālabibhītakamajjatilakalkasaṃprayuktamīṣallavaṇamanatyuṣṇaṃ ca nirūhaṃ dadyāt/

vyapagatavibandhāṃ caināṃ sukhasalilapariṣiktāṅgīṃ sthairyakaramavidāhinamāhāraṃ bhuktavatīṃ sāvaṃ madhurakasiddhena tailenānuvāsayet/

nyubjāṃ tvenāmāsthāpanānuvāsanābhyāmupacaret//

yasyāḥ punaratimātradoṣopacayādvā tīkṣṇoṣṇātimātrasevanādvā vātamūtrapurīṣavegavidhāraṇairvā viṣamāśa(sa)naśayanasthānasaṃpīḍanābhighātairvā krodhaśokerṣyābhayatrāsādibhirvā sāhasairvā+aparaiḥ karmabhir- [Note: 'antaḥkukṣau'iti pā+]antaḥkukṣergarbho mriyate, tasyāḥ stimitaṃ stabdhamudaramātataṃ śītamaśmāntargatamiva bhavatyaspandano garbhaḥ, śūlamadhikamupajāyate, na cāvyaḥ prādurbhavanti, yonirnaprasravati, akṣiṇī cāsyāḥ sraste bhavataḥ, tāmyati, vyathate, bhramate, śvasiti, aratibahulā ca bhavati, na cāsyā vegaprādurbhāvo yathāvadupalabhyate; ityevaṃlakṣaṇāṃ striyaṃ mṛtagarbheyamiti vidyāt//

tasya garbhaśalyasya jarāyuprapātanaṃ karma saṃśamanamityāhureke, mantrādikamatharvavedavihitamityeke, paridṛṣṭakarmaṇā śalyahartrā haraṇamityeke/

vyapagatagarbhaśalyāṃ tu striyamāmagarbhāṃ surāsīdhvariṣṭamadhumadirāsavānāmanyatamamagre sāmarthyataḥ pāyayedgarbhakoṣṭhaśuddhyarthamartivismaraṇārthaṃ praharṣaṇārthaṃ ca , ataḥ paraṃ saṃprīṇanair- [Note: 'bṛṃhaṇaiḥ'iti pā+]balānurakṣibhirasnehasaṃprayuktairyavāgvādibhirvā tatkālayogibhirāhārairupacareddoṣadhātukledaviśoṣaṇamātraṃ kālam/

ataḥ paraṃ snehapānairbastibhirāhāravidhibhiśca dīpanīyajīvanīyabṛṃhaṇīyamadhuravātaharasamākhyātairupacaret/

paripakvagarbhaśalyāyāḥ punarvimuktagarbhaśalyāyāstadahareva snehopacāraḥ syāt//

paramato nirvikāramāpyāyyamānasya garbhasya māse māse karmopadekṣyāmaḥ /prathame māse śaṅkitā cedgarbhamāpannā kṣīramanupaskṛtaṃ mātrāvacchītaṃ kāle kāle pibet, sātmyameva ca bhojanaṃ sāyaṃ prātaśca bhuñjīta; dvitīye māse kṣīrameva ca madhurauṣadhasiddhaṃ; tṛtīye māse kṣīraṃ madhusarpirbhyāmupasaṃsṛjya; caturthe māse kṣīranavanītamakṣamātramaśnīyāt; pañcame māse kṣīrasarpiḥ; ṣaṣṭhe māse kṣīrasarpirmadhurauṣadhasiddhaṃ; tadeva saptame māse /

tatra garbhasya keśā jāyamānā māturvidāhaṃ janayantīti striyo bhāṣante; tanneti bhagavānātreyaḥ, kintu garbhotpīḍanādvātapittaśleṣmāṇa uraḥ prāpya vidāhaṃ janayanti, tataḥ kaṇḍūrupajāyate, kaṇḍūmūlā ca kikkisāvāptirbhavati/

tatra kolodakena navanītasya madhurauṣadhasiddhasya pāṇitalamātraṃ kāle kāle+asyai pānārthaṃ dadyāt, candanamṛṇālakalkaiścāsyāḥ stanodaraṃ vimṛdnīyāt, śirīṣadhātakīsarṣapamadhukacūrṇairvā, kuṭajārjakabījamustaharidrākalkairvā, nimbakolasurasamañjiṣṭhākalkairvā, pṛṣatahariṇaśaśarudhirayutayā triphalayā vā; karavīrapatrasiddhena tailenābhyaṅgaḥ; pariṣekaḥ punarmālatīmadhukasiddhenāmbhasā; jātakaṇḍūśca kaṇḍūyanaṃ varjayettvagbhedavairūpyaparihārārtham, asahyāyāṃ tu kaṇḍvāmunmardanoddharṣaṇābhyāṃ parihāraḥ syāt; madhuramāhārajātaṃ vātaharamalpamasnehalavaṇamalpodakānupānaṃ ca bhuñjīta /

aṣṭame tu māse kṣīrayavāgūṃ sarpiṣmatīṃ kāle kāle pibet; tanneti bhadrakāpyaḥ, paiṅgalyābādho hyasyā garbhamāgacchediti; astvatra paiṅgalyābādha ityāha bhagavān punarvasurātreyaḥ , na tvevaitanna kāryam; evaṃ kurvatī hyarogā++ārogyabalavarṇasvarasaṃhananasaṃpadupetaṃ jñātīnāmapi śreṣṭhamapatyaṃ janayati/

navame tu khalvenāṃ māse madhurauṣadhasiddhena tailenānuvāsayet/

ataścaivāsyāstailāt picuṃ yonau praṇayedgarbhasthānamārgasnehanārtham/yadidaṃ karma prathamaṃ māsaṃ samupādāyopadiṣṭamānavamānmāsāttena garbhiṇyā garbhasamaye [Note: 'garbhadhāraṇe' iti pā+]garbhadhāriṇīkukṣikaṭīpārśvapṛṣṭhaṃ mṛdūbhavati, vātaścānulomaḥ saṃpadyate, mūtrapurīṣe ca prakṛtibhūte sukhena mārgamanupadyate, carmanakhāni ca mārdavamupayānti, balavarṇau copacīyete; putraṃ ceṣṭaṃ saṃpadupetaṃ sukhinaṃ sukhenaiṣā kāle prajāyata iti//

prāk caivāsyā navamānmāsāt sūtikāgāraṃ kārayedapahṛtāsthiśarkarākapāle deśe praśastarūparasagandhāyāṃ bhūmau prāgdvāramudagdvāraṃ vā bailvānāṃ kāṣṭhānāṃ taindukaiṅgudakānāṃ bhāllātakānāṃ vāra(ru)ṇānāṃ khādirāṇāṃ vā; yāni cānyānyapi brāhmaṇāḥ śaṃseyuratharvavedavidasteṣāṃ; vasanālepanācchādanāpidhānasaṃpadupetaṃ vāstuvidyāhṛdayayogāgnisalilodūkhalavarcaḥsthānasnānabhūmimahānasamṛtusukhaṃ ca//

tatra sarpistailamadhusaindhavasauvarcalakālaviḍalavaṇaviḍaṅgakuṣṭhakilimanāgarapippalīpipalīmūlahastipippalīmaṇḍūkaparṇyelālāṅgalīvacācavyacitrikacirabilvahiṅgusarṣapalaśunakatakakaṇakaṇikānīpātasībalvajabhūrjakulatthamaireyasurāsavāḥ sannihitāḥ syuḥ; tathā+aśmānau dvau, dve ku(ca)ṇḍamusale, dve udūkhale, [Note: 'kharo vṛṣabhaśca'iti pā+]kharavṛṣabhaśca, dvau ca tīkṣṇau sūcīpippalakau sauvarṇarājatau, śastrāṇi ca tīkṣṇāyasāni, dvau ca bilvamayau paryaṅkau, taindukaiṅgudāni ca kāṣṭhānyagnisandhukṣaṇāni, striyaśca bahvyo bahuśaḥ prajātāḥ sauhārdayuktāḥ satatamanuraktāḥ pradakṣiṇācārāḥ pratipattikuśalāḥ prakṛtivatsalāstyaktaviṣādāḥ kleśasahinyo+abhimatāḥ, brāhmaṇāścātharvavedavidaḥ; yaccānyadapi tatra samarthaṃ manyeta, yaccānyacca brāhmaṇā brūyuḥ striyaśca vṛddhāstat kāryam//

tataḥ pravṛtte navame māse puṇye+ahani praśastanakṣatrayogamupagate praśaste bhagavati śaśini kalyāṇe kalyāṇe ca karaṇe maitre muhūrte śāntiṃ hutvā gobrāhmaṇamagnimudakaṃ cādau praveśya gobhyastṛṇodakaṃ madhulājāṃśca pradāya brāhmaṇebhayo+akṣatān sumanaso nāndīmukhāni ca phalānīṣṭāni dattvodakapūrvamāsanasthebhyo+abhivādya punarācamya svasti vācayet/

tataḥ puṇyāhaśabdena gobrāhmaṇaṃ [Note: 'anvāvartamānā praviśet'iti pā+]samanuvartamānā pradakṣiṇaṃ praviśet sūtikāgāram/

tatrasthā ca prasavakālaṃ pratīkṣet//

tasyāstu khalvimāni liṅgāni prajananakālamabhito bhavanti; tadyathā---klamo gātrāṇāṃ, glānirānanasya, akṣṇoḥ śaithilyaṃ, [Note: 'akṣṇorvimuktabandhanatvamiva'iti pā+]vimuktabandhanatvamiva vakṣasaḥ, kukṣeravasraṃsanam, adhogurutvaṃ, vaṃkṣaṇabastikaṭīkukṣipārśvapṛṣṭhanistodaḥ, yoneḥ prasravaṇam, anannābhilāṣaśceti; tato+anantaramāvīnāṃ prādurbhāvaḥ, prasekaśca garbhodakasya//

āvīprādurbhāve tu bhūmau śayanaṃ vidadhyānmṛdvāstaraṇopapannam/

[Note: 'tadadhyāsīnāṃ tāṃ tataḥ'iti pā+]tadadhyāsīta sā/

tāṃ tataḥ samantataḥ parivārya yathoktaguṇāḥ striyaḥ paryupāsīrannāśvāsayantyo vāgbhir- [Note: 'grāhaṇīyābhirupadiṣṭavadarthābhidhāyinībhiḥ' iti pā+]grāhiṇīyābhiḥ sāntvanīyābhiśca//

sā cedāvībhiḥ saṃkliśyamānā na prajāyetāthaināṃ brūyāt---uttiṣṭha, musalamanyataraṃ gṛhṇīṣva, anenaitadulūkhalaṃ dhānyapūrṇaṃ muhurmuhurabhijahi muhurmuhuravajṛmbhasva caṅkramasva cāntarā+antareti; evamupadiśantyeke/

tannetyāha bhagavānātreyaḥ/

dāruṇavyāyāmavarjanaṃ hi garbhiṇyāḥ satatamupadiśyate, viśeṣataśca prajananakāle pracalitasarvadhātudoṣāyāḥ sukumāryā nāryā musalavyāyāmasamīrito vāyurantaraṃ labdhvā prāṇān hiṃsyāt, duṣpratīkāratamā hi tasmin kāle viśeṣeṇa bhavati garbhiṇī; tasmānmusalagrahaṇaṃ parihāryamṛṣayo manyante, jṛmbhaṇaṃ caṅkramaṇaṃ ca punaranuṣṭheyamiti /

athāsyai dadyāt kuṣṭhailālāṅgalikīvacācikatracirabilvacavyacūrṇamupaghrātuṃ, sā tanmuhurmuhurupajighret, tathā bhūrjapatradhūmaṃ śiṃśapāsāradhūmaṃ vā/

tasyāścāntarā+antarā kaṭīpārśvapṛṣṭhasakthideśānīṣaduṣṇena [Note: 'anumukhaṃ'iti pā+]tailenābhyajyānusukhamavamṛd(n?)gīyāt/

anena karmaṇā garbho+ [Note: 'avāggarbhaḥ'iti pā+]avāk pratipadyate//

sa yadā jānīyādvimucya hṛdayamudaramasyāstvāviśati, bastiśiro+avagṛhṇāti, tvarayantyenāmāvyaḥ, parivartate+ [Note: 'avāggarbhaḥ'iti pā+]adho garbha iti; asyāmavasthāyāṃ paryaṅkamenāmāropya pravāhayitumupakrameta/

karṇe cāsyā mantramimamanukūlā strī japet--- 'kṣitirjalaṃ viyattejo [Note: 'indraḥ' iti pā+]vāyurviṣṇuḥ prajāpatiḥ/

sagarbhāṃ tvāṃ sadā pāntu vaiśalyaṃ ca diśantu te//

prasūṣva tvamavikliṣṭamavikliṣṭā śubhānane !/

kārtikeyadyutiṃ putraṃ kārtikeyābhirakṣitam' iti//

tāścaināṃ yathoktaguṇāḥ striyo+anuśiṣyuḥ---anāgatāvīrmā pravāhiṣṭhāḥ; [Note: 'yadyanāgatāvīḥ'iti pā+]yā hyanāgatāvīḥ pravāhate vyarthamevāsyāstat karma bhavati, prajā cāsyā vikṛtā vikṛtimāpannā ca, śvāsakāsaśoṣaplīhaprasaktā vā bhavati/

yathā hi kṣavathūdgāravātamūtrapurīṣavegān prayatamāno+apyaprāptakālānna labhate kṛcchreṇa [Note: 'vā labhate'iti pā+]vā+apyavāpnoti, tathā+anāgatakālaṃ garbhamapi pravāhamāṇā; yathā caiṣāmeva kṣavathvādīnāṃ sandhāraṇamupaghātāyopapadyate, tathā prāptakālasya garbhasyāpravāhaṇamiti/sā yathānirdeśaṃ kuruṣveti vaktavyā syāt/

tathā ca kurvatī śanaiḥ pūrvaṃ pravāheta, tato+anantaraṃ balavattaram/tasyāṃ ca pravāhamāṇāyāṃ striyaḥ śabdaṃ kuryuḥ---'prajātā prajātā dhanyaṃ dhanyaṃ putram' iti /

tathā+asyā harṣeṇāpyāyyante prāṇāḥ//

yadā ca prajātā syāttadaivaināmavekṣeta---kācidasyā aparā prapannā na veti /

tasyāścedaparā na prapannā syādathaināmanyatamā strī dakṣiṇena pāṇinā nābherupariṣṭādbalavannipīḍya savyena pāṇinā pṛṣṭhata upasaṃgṛhya tāṃ sunirdhūtaṃ nirdhunuyāt/

athāsyāḥ pārṣṇyā śroṇīmākoṭayet /

asyāḥ sphicāvupasaṃgṛhya supīḍitaṃ pīḍayet/

athāsyā bālaveṇyā kaṇṭhatālu parimṛśet/

bhūrjapatrakācamaṇisarpanirmokaiścāsyā yoniṃ dhūpayet/

kuṣṭhatālīsakalkaṃ [Note: 'balvajakvāthe'iti pā+]balvajayūṣe maireyasurāmaṇḍe tīkṣṇe kaulatthe vā yūṣe maṇḍūkaparṇīpippalīsaṃpāke vā saṃplāvya pāyayedenām/

tathā sūkṣmailākilimakuṣṭhanāgaraviḍaṅgapippalīkālāgurucavyacitrakopakuñcikākalkaṃ kharavṛṣabhasya vā [Note: 'kharasyavṛṣasya vā jarato dakṣiṇaṃ parṇamutkṛtya'iti pā+]jīvato dakṣiṇaṃ karṇamutkṛtya dṛṣadi jarjarīkṛtya [Note: 'balvajayūṣādīnāmanyatame'iti pā+]balvajakvāthādīnāmāplāvanānāmanyatame prakṣipyāplāvya muhūrtasthitamuddhṛtya tadāplāvanaṃ pāyayedenām/

śatapuṣpākuṣṭhamadanahiṅgusiddhasya cainām tailasya picuṃ grāhayet/ataścaivānuvāsayet /

etaireva cāplāvanaiḥ phalajīmūtekṣvākudhāmārgavakuṭajakṛtavedhanahastipippalyupahitairāsthāpayet/

tadāsthāpanamasyāḥ saha vātamūtrapurīṣairnirharatyaparāmāsaktāṃ [Note: 'vāyoranulomagamanāt'iti pā+]vāyorevāpratilomagatvāt/

aparāṃ hi vātamūtrapurīṣāṇyanyāni [Note: 'cāntarbahirmukhāni'iti pā+]cāntarbahirmārgāṇi sajjanti//

tasyāstu khalvaparāyāḥ prapatanārthe karmaṇi kriyamāṇe jātamātrasyaiva kumārasya kāryāṇyetāni karmāṇi bhavanti; tadyathā---aśmanoḥ saṃghaṭṭanaṃ karṇayormūle, śītodakenoṣṇodakena vā [Note: 'sukhena pariṣekaḥ'iti pā+]mukhapariṣekaḥ, tathā sa kleśavihatān prāṇān punarlabheta/

kṛṣṇakapālikāśūrpeṇa cainamabhiniṣpuṇīyuryadyaceṣṭaḥ syād yāvat prāṇānāṃ pratyāgamanam ( [Note: ayaṃ pāṭho hastalikhitapustake nopalabhyate]tattat sarvameva kāryam)/

tataḥ pratyāgataprāṇaṃ prakṛtibhūtamabhisamīkṣya snānodakagrahaṇābhyāmupapādayet//

athāsya tālvoṣṭhakaṇṭhajihvāpramārjanamārabhetāṅgulyā suparilikhitanakhayā suprakṣālitopadhānakārpāsa?sapicumatyā/

prathamaṃ pramārjitāsyasya cāsya śirastālu kārpāsapicunā snehagarbheṇa pratisaṃchādayet/

tato+asyānantaraṃ saindhavopahitena sarpiṣā kāryaṃ pracchardanam//

tataḥ kalpanaṃ nāḍyāḥ /

atastasyāḥ kalpanavidhimupadekṣyāmaḥ---nābhibandhanāt prabhṛtyaṣṭāṅgulamabhijñānaṃ kṛtvā chedanāvakāśasya dvayorantarayoḥ śanairgṛhītvā tīkṣṇena raukmarājatāyasānāṃ chedanānāmanyatamena- [Note: 'ūrdhvadhāreṇa'iti pā+]ārdhadhāreṇa chedayet/

tāmagre sūtreṇopanibadhya kaṇṭhe+asya śithilamavasṛjet/

tasya cennābhiḥ pacyeta, tāṃ lodhramadhukapriyaṅgusuradāruharidrākalkasiddhena tailenābhyajyāt, eṣāmeva tailauṣadhānāṃ cūrṇenāvacūrṇayet/

iti nāḍīkalpanavidhiruktaḥ samyak//

asamyakkalpane hi nāḍyā āyāmavyāyāmottuṇḍitā-piṇḍalikā-vināmikā-vijṛmbhikābādhebhyo bhayam/

tatrāvidāhibhirvātapittapraśamanairabhyaṅgotsādanapariṣekaiḥ sarpirbhiścopakrameta gurulāghavamabhisamīkṣya//

ato+anantaraṃ jātakarma kumārasya kāryam/

tadyathā---madhusarpiṣī mantropamantrite yathāmnāyaṃ prathamaṃ prāśituṃ dadyāt/

stanamata ūrdhvametenaiva vidhinā dakṣiṇaṃ pātuṃ purastāt prayacchet/

[Note: 'athāsya'iti pā+]athātaḥ śīrṣataḥ sthāpayedudakumbhaṃ mantropamantritam//

athāsya rakṣāṃ vidadhyāt---ādānīkhadirakarkandhupīluparūṣakaśākhābhirasyā gṛhaṃ samantataḥ parivārayet/ sarvataśca sūtikāgārasya sarṣapātasītaṇḍulakaṇakaṇikāḥ prakireyuḥ /

tathā taṇdulabalihomaḥ satatam- [Note: 'ubhayataḥkālaṃ'iti pā+]ubhayakālaṃ [Note: 'prāṅnāmakarmaṇaḥ'iti pā+]kriyetānāmakarmaṇaḥ /

dvāre ca musalaṃ dehalīmanu tiraścīnaṃ nyaset/

vacākuṣṭhakṣaumakahiṅgusarṣpātasīlaśunakaṇakaṇikānāṃ rakṣoghnasamākhyātānāṃ cauṣadhīnāṃ poṭṭalikāṃ baddhvā sūtikāgārasyottaradehalyāmavasṛjet, tathā sūtikāyāḥ kaṇṭhe saputrāyāḥ, sthālyudakakumbhaparyaṅkeṣvapi, tathaiva ca dvayordvārapakṣayoḥ/

kaṇakakaṇṭakendhanavānagnistindukakāṣṭhendhanaścāgniḥ sūtikāgārasyābhyantarato nityaṃ syāt/

striyaścaināṃ yathoktaguṇāḥ suhṛdaścānuścānujāgṛyur(anujāgṛyur?)-daśāhaṃ dvādaśāhaṃ vā/

anuparatapradānamaṅgalāśīḥstutigītavāditramannapānaviśadamanuraktaprahṛṣṭajanasaṃpūrṇaṃ ca tadveśma kāryam/

brāhmaṇaścātharvavedavit satatamubhayakālaṃ śāntiṃ juhuyāt svastyayanārthaṃ kumārasya tathā sūtikāyāḥ /

ityetadrakṣāvidhānamuktam//

sūtikāṃ tu khalu bubhukṣitāṃ viditvā snehaṃ pāyayeta paramayā śaktyā sarpistailaṃ vasāṃ majjānaṃ vā sātmyībhāvamabhisamīkṣya pippalīpippalīmūlacavyacitrakaśṛṅgaveracūrṇasahitam/

snehaṃ pītavatyāśca sarpistailābhyāmabhyajya veṣṭayedudaraṃ mahatā+acchena vāsasā; tathā tasyā na vāyurudare vikṛtimutpādayatyanavakāśatvāt/jīrṇe tu snehe pippalyādibhireva siddhāṃ yavāgūṃ susnigdhāṃ dravāṃ [Note: 'mātrāṃ'iti pā+]mātraśaḥ pāyayet/

ubhayataḥkālaṃ coṣṇodakena ca pariṣecayet prāk snehayavāgūpānābhyām/

evaṃ pañcarātraṃ saptarātraṃ vā+anupālya krameṇāpyāyayet/

svasthavṛttametāvat sūtikāyāḥ//

tasyāstu khalu yo vyādhirutpadyate sa kṛcchrasādhyo bhavatyasādhyo vā, garbhavṛddhikṣayitaśithilasarvadhātutvāt, pravāhaṇavedanākledanaraktaniḥsrutiviśeṣaśūnyaśarīratvācca; tasmāttāṃ yathoktena vidhinopacaret; bhautikajīvanīyabṛṃhaṇīyamadhuravātaharasiddhairabhyaṅgotsādanapariṣekāvagāhanānnapānavidhibhirviśeṣataścopacaret; viśeṣato hi śūnyaśarīrāḥ striyaḥ prajātā bhavanti//

daśame [Note: 'daśamyāṃ niśyatītāyām'iti pā+]tvahani saputrā strī sarvagandhauṣadhairgaurasarṣapalodhraiśca snātā laghvahataśucivastraṃ [Note: ['laghvahatavastraparihitā'iti pā+]paridhāya pavitreṣṭalaghuvicitrabhūṣaṇavatī ca saṃspṛśya maṅgalānyucitāmarcayitvā ca devatāṃ śikhinaḥ śuklavāsaso+avyaṅgāṃśca brāhmaṇān svasti vācayitvā [Note: 'kumāramahatena vāsasā++ācchādayet prākśirasamudakśirasaṃ vā saṃveśya'iti pā+ ]kumāramahatānāṃ ca vāsasāṃ saṃcaye prākśirasamudakśirasaṃ vā saṃveśya devatāpūrvaṃ dvijātibhyaḥ praṇamatītyuktvā kumārasya pitā dve nāmanī kārayennākṣatrikaṃ nāmābhiprāyikaṃ ca /

tatrābhiprāyikaṃ ghoṣavadādyantasthāntamūṣmāntaṃ vā+ [Note: 'vṛddhatripuruṣāntaraṃ'iti pā+]avṛddhaṃ tripuruṣānūkamanavapratiṣṭhitaṃ, nākṣātrikaṃ tu [Note: ['nakṣatradevatāsaṃyuktaṃ kṛtaṃ'iti pā+]nakṣatradevatāsamānākhyaṃ dvyakṣaraṃ caturakṣaraṃ vā//

/ [Note: 'kṛte'iti pā+]vṛtte ca nāmakarmaṇi kumāraṃ parīkṣitumupakrametāyuṣaḥ pramāṇajñānahetoḥ/

tatremānyāyuṣmatāṃ kumārāṇāṃ lakṣaṇāni bhavanti/

tadyathā---ekaikajā mṛdavo+alpāḥ snigdhāḥ subaddhamūlāḥ kṛṣṇāḥ keśāḥ praśasyante, sthirā bahalā tvak, prakṛtyā+atisaṃpannamīṣat- [Note: 'pramāṇātiriktaṃ'iti pā+]pramāṇātivṛttamanurūpamātapatropamaṃ śiraḥ, vyūḍhaṃ dṛḍhaṃ samaṃ suśliṣṭaśaṅkhasandhyūrdhvavyañjanasaṃpannamupacitaṃ valibhamardhacandrākṛti lalāṭaṃ, bahalau vipulasamapīṭhau samau nīcairvṛddhau pṛṣṭhato+avanatau suśliṣṭakarṇaputrakau mahācchidrau karṇau, īṣatpralambinyāvasaṃgate same saṃhate mahatyau bhuvau, same samāhitadarśane vyaktabhāgavibhāge balavatī tejasopapanne svaṅgāpāṅge cakṣuṣī, ṛjvī mahocchvāsā vaṃśasaṃpanneṣadavanatāgrā nāsikā, mahadṛjusuniviṣṭadantamāsyam, āyāmavistāropapannā ślakṣṇā tanvī [Note: 'prakṛtiyuktā pāṭalavarṇā'iti pā+]prakṛtivarṇayuktā jihvā, ślakṣṇaṃ yuktopacayamūṣmopapannaṃ raktaṃ tālu, mahānadīnaḥ snigdho+anunādī gambhīrasamuttho dhīraḥ svaraḥ, nātisthūlau nātikṛśau vistāropapannāvāsyapracchādanau raktāvoṣṭhau, mahatyau hanū, vṛttā nātimahatī grīvā,vyūḍhamupacitamuraḥ, gūḍhaṃ jatru pṛṣṭhavaṃśaśca, viprakṛṣṭāntarau stanau, asaṃpātinī sthire pārśve, vṛttaparipūrṇāyatau bāhū sakthinī aṅgulayaśca, mahadupacitaṃ pāṇipādaṃ, sthirā vṛttāḥ snigdhāstāmrāstuṅgāḥ kūrmākārāḥ karajāḥ, pradakṣiṇāvartā sotsaṅgā ca nābhiḥ, urastribhāgahīnā samā samupacitamāṃsā kaṭī, vṛttau sthiropacitamāṃsau nātyunnatau nātyavanatau sphicau, anupūrvaṃ vṛttāvupacayayuktāvūrū, nātyupacite nātyapacite eṇīpade pragūḍhasirāsthisandhī jaṅghe, nātyupacitau nātyapacitau gulphau, pūrvopadiṣṭaguṇau pādau kūrmākārau, prakṛtiyuktāni vātamūtrapurīṣaguhyāni tathā svapr(n?)ajāgaraṇāyāsasmitaruditastanagrahaṇāni, yacca kiñcidanyadapyanuktamasti tadapi sarvaṃ prakṛtisaṃpannamiṣṭaṃ, viparītaṃ punaraniṣṭam/

iti dīrghāyurlakṣaṇāni//

ato dhātrīparīkṣāmupadekṣyāmaḥ /

atha brūyāt---dhātrīmānaya samānavarṇāṃ yauvanasthāṃ nibhṛtāmanāturāmavyaṅgāmavyasanāmavirūpām- [Note: 'avijugupsāmajugupsitāṃ'iti pā+]ajugupsitāṃ deśajātīyāmakṣudrāmakṣudrakarmiṇīṃ kule jātāṃ vatsalāmarogāṃ jīvadvatsāṃ puṃvatsāṃ dogdhrīmapramattāmanuccāraśāyinīmanantyāvasāyinīṃ kuśalopacārāṃśucimaśucidveṣiṇīṃ stanastanyasaṃpadupetāmiti//

tatreyaṃ stanasaṃpat---nātyūrdhvau nātilambāvanatikṛśāvanatipīnau yuktapippalakau sukhaprapānau ceti (stanasaṃpat)//

stanyasaṃpattu prakṛtivarṇagandharasasparśam, udapātre ca duhyamānamudakaṃ vyeti prakṛtibhūtatvāt; tat puṣṭikaramārogyakaraṃ ceti(stanyasaṃpat)//

ato+anyathā vyāpannaṃ jñeyam/

tasya viśeṣāḥ---śyāvāruṇavarṇaṃ kaṣāyānurasaṃ viśadamanālakṣyagandhaṃ rūkṣaṃ dravaṃ phenilaṃ laghvatṛptikaraṃ karśanaṃ vātavikārāṇāṃ kartṛ vātopasṛṣṭaṃ [Note: 'kṣīramiti jñeyam'iti pā+]kṣīramabhijñeyaṃ ; kṛṣṇanīlapītatāmrāvabhāsaṃ tiktāmlakaṭukānurasaṃ kuṇaparudhiragandhi bhṛśoṣṇaṃ pittavikārāṇāṃ kartṛ ca pittopasṛṣṭaṃ kṣīramabhijñeyam, atyarthaśuklamatimādhuryopapannaṃ lavaṇānurasaṃ ghṛtatailavasāmajjagandhi picchilaṃ tantumadudakapātre+avasīdach(cch?)leṣmavikārāṇāṃ kartṛ śleṣmopasṛṣṭaṃ kṣīramabhijñeyam//

teṣāṃ tu trayāṇāmapi kṣīradoṣāṇāṃ prativiśeṣamabhisamīkṣya yathāsvaṃ yathādoṣaṃ ca vamanavirecanāsthāpanānuvāsanāni vibhajya kṛtāni praśamanāya bhavanti/

pānāśanavidhistu duṣṭakṣīrāyā yavagodhūmaśāliṣaṣṭikamudgahareṇukakulatthasurāsauvīrakamaireyamedakalaśunakarañjaprāyaḥ syāt/

kṣīradoṣaviśeṣāṃścāvekṣyāvekṣya tattadvidhānaṃ kāryaṃ syāt/

pāṭhāmahauṣadhasuradārumustamūrvāguḍūcīvatsakaphalakirātatiktakakaṭukarohiṇīsārivākaṣāyāṇāṃ ca pānaṃ praśasyate, tathā+anyeṣāṃ [Note: 'tiktakaṣāyakaṭukaprāyāṇāṃ'iti pā+]tiktakaṣāyakaṭukamadhurāṇāṃ dravyāṇāṃ prayogaḥ kṣīravikāraviśeṣānabhisamīkṣya mātrāṃ kālaṃ ca /

iti kṣīraviśodhanāni//

kṣīrajananāni tu madyāni sīdhuvarjyāni, grāmyānūpaudakāni ca śākadhānyamāṃsāni, dravamadhurāmlalavaṇabhūyiṣṭhāścāhārāḥ, kṣīriṇyaścauṣadhayaḥ, kṣīrapānamanāyāsaśca, vīraṇaṣaṣṭikaśālīkṣuvālikādarbhakuśakāśagundretkaṭamūlakaṣāyāṇāṃ ca pānamiti(kṣīrajananāni)//

dhātrī tu yadā svādubahulaśuddhadugdhā syāttadā snātānuliptā śuklavastraṃ paridhāyaindrīṃ brāhmīṃ śatavīryāṃ sahasravīryāmamoghāmavyathāṃ śivāmariṣṭāṃ vāṭyapuṣpīṃ [Note: 'viṣvaksenakāntāmiti bibhratyoṣadhīḥ'iti pā+]viṣvaksenakāntāṃ vā bibhratyoṣadhiṃ kumāraṃ prāṅmukhaṃ prathamaṃ dakṣiṇaṃ stanaṃ pāyayet/

iti dhātrīkarma//

ato+anantaraṃ kumārāgāravidhimanuvyākhyāsyāmaḥ---vāstuvidyākuśalaḥ praśastaṃ ramyamatamaskaṃ nivātaṃ pravātaikadeśaṃ dṛḍhamapagataśvāpadapaśudaṃṣṭrimūṣikapataṅgaṃ suvibhaktasalilolūkhalamūtravarcaḥsthānasnānabhūmimahānasamṛtusukhaṃ yathartuśayanāsanāstaraṇasaṃpannaṃ kuryāt; tathā suvihitarakṣāvidhānabalimaṅgalahomaprāyaścittaṃ śucivṛddhavaidyānuraktajanasaṃpūrṇam/

iti kumārāgāravidhiḥ//

śayanāsanāstaraṇaprāvaraṇāni kumārasya mṛdulaghuśucisuganghīni syuḥ; svedamalajantumanti mūtrapurīṣopasṛṣṭāni ca varjyāni syuḥ; asati saṃbhave+anyeṣāṃ tānyeva ca suprakṣālitopadhānāni sudhūpitāni śuddhaśuṣkāṇyupayogaṃ gaccheyuḥ//

dhūpanāni punarvāsasāṃ śayanāstaraṇaprāvaraṇānāṃ ca yavasarṣapātasīhiṅgugugguluvacācorakavayaḥsthāgolomījaṭilāpalaṅkaṣāśokarohiṇīsarpanirmokāṇi ghṛtayuktāni syuḥ//

maṇayaśca dhāraṇīyāḥ kumārasya khaḍgarurugavayavṛṣabhāṇāṃ jīvatāmeva dakṣiṇebhyo viṣāṇebhyo+agrāṇi gṛhītāni syuḥ; aindryādyāścauṣadhayo jīvakarṣabhakau ca, yāni cānyānyapi brāhmaṇāḥ praśaṃseyuratharvavedavidaḥ//

krīḍanakāni khalu kumārasya vicitrāṇi ghoṣavantyabhirāmāṇi cāgurūṇi cātīkṣṇāgrāṇi cānāsyapraveśīni cāprāṇaharāṇi cāvitrā sanāni syuḥ//

na hyasya vitrāsanaṃ sādhu/

tasmāttasmin rudatyabhuñjāne vā+anyatra vidheyatāmagacchati rākṣasapiśācapūtanādyānāṃ nāmānyāhvayatā kumārasya vitrāsanārthaṃ nāmagrahaṇaṃ na kāryaṃ syāt//

yadi tvāturyaṃ kiñcit kumāramāgacchet tat prakṛtinimittapūrvarūpaliṅgopaśayaviśeṣaistattvato+anubudhya sarvaviśeṣānāturauṣadhadeśakālāśrayānavekṣamāṇaścikitsitumārabhetainaṃ madhuramṛdulaghusurabhiśītaśaṅkaraṃ karma pravartayan/

evaṃsātmyā hi kumārā bhavanti /

tathā te śarma labhante cirāya/

aroge tvarogavṛttamātiṣṭheddeśakālātmaguṇaviparyayeṇa vartamānaḥ, krameṇāsātmyāni parivartyopayuñjānaḥ sarvāṇyahitāni varjayet/

tathā balavarṇaśarīrāyuṣāṃ saṃpadamavāpnotīti//

evamenaṃ kumāramāyauvanaprāpterdharmārthakauśalāgamanāccānupālayet//

iti putrāśiṣāṃ samṛddhikaraṃ karma vyākhyātam/

tadācaran yathoktairvidhibhiḥ pūjāṃ yatheṣṭaṃ labhate+anasūyaka iti//

tatra ślokau---

putrāśiṣāṃ karma samṛddhikārakaṃ yaduktametanmahadarthasaṃhitam/
tadācaran jño vidhibhiryathātathaṃ pūjāṃ yatheṣṭaṃ labhate+anasūyakaḥ//
śarīraṃ cintyate sarvaṃ daivamānuṣasaṃpadā/
sarvabhāvairyatastasmācchārīraṃ sthānamucyate//

ityagniveśakṛte tantre carakapratisaṃskṛte śārīrasthāne jātisūtrīyaṃ śārīraṃ nāmāṣṭamo+adhyāyaḥ//8//

śārīrasthānaṃ saṃpūrṇam/

5. indriyasthānam/

5.1. prathamo+adhyāyaḥ/

athāto varṇasvarīyamindiyaṃ vyākhyāsyāmaḥ//

iti hasmāha bhagavānātreyaḥ//

iha khalu varṇaśca svaraśca gandhaśca rasaśca sparśaśca cakṣuśca śrotraṃ ca ghrāṇaṃ ca rasanaṃ ca sparśanaṃ ca sattvaṃ ca bhaktiśca śaucaṃ ca śīlaṃ cācāraśca smṛtiścākṛtiśca prakṛtiśca vikṛtiśca balaṃ ca glāniśca medhā ca harṣaśca raukṣyaṃ ca snehaśca tandrā cārambhaśca gauravaṃ ca lāghavaṃ ca guṇāścāhāraśca vihāraścāhārapariṇāmaścopāyaścāpāyaśca vyādhiśca vyādhipūrvarūpaṃ ca vedanāścopadravāśca cchāyā ca praticchāyā ca svapnadarśanaṃ ca dūtādhikāraśca pathi cautpātikaṃ cāturakule bhāvāvasthāntāaṇi ca &bheṣajasaṃvṛttiśca bheṣajavikārayuktiśceti parīkṣyāṇi pratyakṣānumānopadeśairāyuṣaḥ pramāṇāvaśeṣaṃ jijñāsamānena bhiṣajā//

tatra tu khalveṣāṃ parīkṣyāṇāṃ kānicit puruṣamanāśritāni, kānicicca puruṣasaṃśrayāṇi/

tatra yāni puruṣamanāśritāni tānyupadeśato yuktitaśca parīkṣeta, puruṣasaṃśrayāṇi punaḥ prakṛtito vikṛtitaśca//

tatra prakṛtirjātiprasaktā ca, kulaprasaktā ca, &deśānupātinī ca, kālānupātinī ca, vayo+anupātinī ca, pratyātmaniyatā ceti/

jātikuladeśakālavayaḥpratyātmaniyatā hi teṣāṃ teṣāṃ puruṣāṇāṃ te te bhāvaviśeṣā bhavanti//

vikṛtiḥ punarlakṣaṇanimittā ca, lakṣyannimittā ca, nimittānurūpā ca//

tatra lakṣaṇanimittā nāma sā yasyāḥ śarīre lakṣaṇānyeva hetubhūtāni bhavanti daivāt; lakṣaṇāni hi kāniciccharīropanibaddhāni bhavanti, yāni hi tasmiṃstasmin kāle tatrādhiṣṭhānamāsādya tāṃ tāṃ vikṛtimutpādayanti//

lakṣyanimittā tu sā yasyā upalabhyate nimittaṃ &yathoktaṃ nidāneṣu//

nimittānurūpā tu nimittārthānukāriṇī yā, tāmanimittāṃ nimittamāyuṣaḥ pramāṇajñānasyecchanti bhiṣajo bhūyaścāyuṣaḥ kṣayanimittāṃ pretaliṅgānurūpāṃ, yāmāyuṣo+&antargatasya jñānārthamupadiśanti dhīrāḥ/

yāṃ cādhikṛtya puruṣasaṃśrayāṇi mumūrṣatāṃ lakṣaṇānyupadekṣyāmaḥ/

ityuddeśaḥ/

taṃ vistareṇānuvyākhyāsyāmaḥ//

tatrādita eva varṇādhikāraḥ/

tadyathā---kṛṣṇaḥ, &śyāmaḥ, śyāmāvadātaḥ, avadātaśceti prakṛtivarṇāḥ śarīrasya bhavanti; &yāṃścāparānupekṣamāṇo vidyādanūkato+anyathā vā+api nirdiśyamānāṃstajjñaiḥ//

nīlaśyāvatāmraharitaśuklāśca varṇāḥ śarīrasya vaikārikā bhavanti; yāṃścāpara-&anupekṣamāṇo vidyāt &prāgvikṛtānabhūtvotpannān/

iti prakṛtivikṛtivarṇā bhavantyuktāḥ śarīrasya//

tatra prakṛtivarṇamardhaśarīre vikṛtivarṇamardhaśarīre, dvāvapi varṇau maryādānibhaktau dṛṣṭvā; yadyevaṃ savyadakṣiṇavibhāgena, yadyevaṃ pūrvapaścimavibhāgena, yadyuttarādharavibhāgena, yadyantarbahirvibhāgena, āturasyāriṣṭamiti vidyāt; evameva varṇabhedo mukhe+&apyanyatra vartamāno maraṇāya bhavati//

varṇabhedena glāviharṣaraukṣyasnehā vyākhyātāḥ//

tathā pipluvyaṅgatilakālakapiḍakānāmanyatamasyānane janmāturasyaivamevāpraśastaṃ vidyāt//

nakhanayanavadanamūtrapurīṣahastapādauṣṭhādiṣvapi ca vaikārikoktānāṃ varṇānāmanyatamasya prādurbhāvo hīnabalavarṇendriyeṣu lakṣaṇamāyuṣaḥ kṣayasya bhavati//

yaccānyadapi kiṃcidvarṇavaikṛtamabhūtapūrvaṃ sahasotpadyetānimittameva hīyamānasyāturasya śaśvat, tadariṣṭamiti vidyāt/

iti varṇādhikāraḥ//

svarādhikārastu---haṃsakrauñcanemidundubhikalaviṅkakākakapotajarjarānukārāḥ prakṛtisvarā bhavanti; yāṃścāpara-&anupekṣamāṇo+api vidyādanūkarto+anyathā vā+api virdiśyamānāṃstajñaiḥ/

&eḍakakalagrastānyaktagadgadakṣāmadīnānukīrṇāstvāturāṇāṃ svarā vaikārikā bhavanti; yāṃścāpara-&anupekṣamāṇo+api vidyāt &prāgvikṛtānabhūtvotpannān/

iti prakṛtivikṛtisvarā vyākhyātā bhavanti//

tatra prakṛtivaikārikāṇāṃ svarāṇāmāśvabhinirvṛttiḥ &svarānekatvamekasya cānekatvamapraśastam/

iti svarādhikāraḥ//

iti varṇasvarādhikārau yathāvaduktau mumūrṣatāṃ lakṣaṇajñānārthamiti//

bhavanti cātra---

yasya vaikāriko varṇaḥ śarīra upapadyate/
ardhe vā yadi vā kṛtsne nimittaṃ na ca nāsti saḥ//
nīlaṃ vā yadi vā śyāvaṃ tāmraṃ vā yadi vā+aruṇam/
mukhārdhamanyathā varaṇo mukhārdhe+ariṣṭamucyate//
sneho mukhārdhe suvyakto &raukṣyamardhamukhe bhṛśam/
glānirardhe tathā harṣo mukhārdhe pretalakṣaṇam//
tilakāḥ pipalavo vyaṅgā rājayaśca pṛthagvidhāḥ/
āturasyāśu jāyante mukhe prāṇān mumukṣataḥ//
puṣpāṇi nakhadanteṣu paṅko vā dantasaṃśritaḥ/
cūrṇako vā+api danteṣu lakṣaṇaṃ &maraṇasya tat//
auṣṭhayoḥ pādayoḥ pāṇyorakṣṇormūtrapurīṣayoḥ/
nakheṣvapi ca vaivarṇyametat kṣīṇabale+antakṛt//
yasya nīlāvubhāvoṣṭhau pakvajāmbavasannibhau/
mumūrṣuriti taṃ vidyānnaro dhīro gatāyuṣam//
eko vā yadi vā+aneko yasya vaikārikaḥ svaraḥ/
sahasotpadyate jantorhīyamānasya nāsti saḥ//
yaccānyadapi kiñcit syādvaikṛtaṃ svaravarṇayoḥ/
balamāṃsavihīnasya tat sarvaṃ &maraṇodayam//

tatra ślokaḥ---

iti varṇasvarāvuktau lakṣaṇārthaṃ mumūrṣatām/
&yastau samyagvijānāti nāyurjñāne sa muhyati//

ityagviceśakṛte tantre carakapratisaṃskṛte indriyasthāne varṇasvarīyamindriyaṃ nāma prathamo+adhyāyaḥ//1//

5.2. dvitīyo+adhyāyaḥ/

athātaḥ puṣpitakamindriyaṃ vyākhyāsyāmaḥ//

iti ha smāha bhagavānātreyaḥ//

puṣpaṃ yathā pūrvarūpaṃ phalasyeha bhaviṣyataḥ/
tathā liṅgamariṣṭākhyaṃ pūrvarūpaṃ mariṣyataḥ//
apyevaṃ tu bhavet puṣpaṃ phalenānanubandhi yat/
phalaṃ cāpi bhavet kiñcidyasya puṣpaṃ na &pūrvajam//
na tvariṣṭasya jātasya nāśo+asti maraṇādṛte/
maraṇaṃ cāpi tannāsti yannāriṣṭapuraḥsaram//
mithyādṛṣṭamariṣṭābhamanariṣṭamajānatā/
ariṣṭaṃ vā+apyasaṃbuddhametat prajñāparādhajam//
jñānasaṃbodhanārthaṃ tu liṅgairmaraṇapūrvajaiḥ/
puṣpitānupadekṣyāmo narān &bahuvidhairbahūn/
nānāpuṣpopamo gandho yasya &bhāti divāniśam/
puṣpitasya vanasyeva nānādrumalatāvataḥ//
tamāhuḥ puṣpitaṃ dhīrā naraṃ maraṇalakṣaṇaiḥ/
sa &nā saṃvatsarāddehaṃ jahātīti viniścayaḥ//
evamekaikaśaḥ puṣpairyasya gandhaḥ samo bhavet/
iṣṭairvā yadi vā+aniṣṭaiḥ sa ca puṣpita ucyate//
samāsenāśubhān gandhānekatvenāthavā punaḥ/
ājighredyasya gātreṣu taṃ vidyāt puṣpitaṃ bhiṣak//
āpulutānāplute kāye yasya gandhāḥ śubhāśubhāḥ/
vyatyāsenānimittāḥ syuḥ sa ca puṣpita ucyate//
tadyathā-candanaṃ kuṣṭhaṃ tagarāguruṇī madhu/
mālyaṃ mūtrapurīṣe ca &mṛtāni kuṇapāni ca//
ye cānye vividhātmāno gandhā vividhayonayaḥ/
te+apyanenānumānena vijñeyā vikṛtiṃ gatāḥ//
idaṃ cāpyatideśārthaṃ lakṣaṇaṃ gandhasaṃśrayam/
vakṣyāmo yadabhijñāya bhiṣaṅnaraṇamādiśet//
&viyonirviduro gandho yasya gātreṣu jāyate/
iṣṭo vā yadi vā+aniṣṭo na sa jīvati tāṃ samām//
etāvadgandhavijñānaṃ,rasajñānamataḥ param/
āturāṇaṃ śarīreṣu vakṣyate vidhipūrvakam//
yo rasaḥ prakṛtisthānāṃ narāṇāṃ dehasaṃbhavaḥ/
sa eṣāṃ carame kāle vikāraṃ bhajate dvayam//
kaścidevāsyavairasyamatyarthamupapadyate/
svādutvamaparaścāpi vipulaṃ bhajate rasaḥ//
tamanenānumānena vidyādvikṛtimāgatam/
manuṣyo hi manuṣyasya kathaṃ rasamavāpnuyāt//
makṣikāścaiva yūkāśca maśakaiḥ saha/
virasādapasarpanti jantoḥ kāyānmumūrṣataḥ//
atyartharasikaṃ kāyaṃ kālapakvasya makṣikāḥ/
api snātānuliptasya bhṛśamāyānti sarvaśaḥ//

tatra ślokaḥ---

sāmānyena mayoktāni liṅgāni rasagandhayīḥ/
puṣpitasya narasyaitatphalaṃ maraṇamādiśet//

ityagniveśakṛte tantre carakapratisaṃskṛte indriyasthāne puṣpitakamindriyaṃ nāma dvitīyo+adhyāyaḥ//2//

5.3. tritīyo+adhyāyaḥ/

athātaḥ parimarśanīyamindriyaṃ vyākhyāsyāmaḥ//

iti ha smāha bhagavānātreyaḥ//

varṇe svare ca gandhe ca rase coktaṃ pṛthak pṛthak/
liṅgaṃ mumūrṣatāṃ samyak sparśoṣvapi nibodhata//

&sparśaprādhānyenaivāturasyāyuṣaḥ &pramāṇāvaśeṣaṃ jijñāsuḥ prakṛtisthena pāṇinā śarīramasya kevalaṃ spṛśet, parimarśayedvā+anyena/

parimṛśatā tu khalvāturaśarīramime bhāvāstatra tatrāvaboddhavyā bhavanti/tadyathā---satataṃ spandamānānāṃ śarīradeśānāmaspandanaṃ, nityoṣmaṇāṃ śītībhāvaḥ, mṛdūnāṃ dāruṇatvaṃ, ślakṣṇānāṃ kharatvaṃ, &satāmasadbhāvaḥ, sandhīnāṃ sraṃsabharaṃśacyavanāni; māṃsaśoṇitayorvītībhāvaḥ, dāruṇatvaṃ, svedānubandhaḥ, stambho vā; yaccānyadapi kiñcidīdṛśaṃ sparśānāṃ lakṣaṇaṃ bhṛśavikṛtamanimittaṃ syāt/ iti lakṣaṇaṃ spṛśyānāṃ bhāvānāmuktaṃ samāsena//

tadvyāsato+anuvyākhyāsyāmaḥ---tasya cet parimṛśyamānaṃ pṛthaktvena pādajaṅghorusphigudarapārśvapṛṣṭheṣikāpāṇigrīvātālvoṣṭhalalāṭaṃ svinnaṃ śītaṃ &stabdhaṃ dāruṇaṃ vītamāṃsaśoṇitaṃ vā syāt, parāsurayaṃ puruṣo na cirāt &kālaṃ mariṣyatīti vidyāt/

tasya cet parimṛśyamānāni pṛthaktvena gulphajānuvaṅkṣaṇagudavṛṣaṇameḍhranābhyaṃsastanamaṇikaparśukāhanunāsikākarṇākṣibhrūśaṅkhādīni srastāni vyastāni cyutāni sthānebhyaḥ &skannāni vā syuḥ, parāsurayaṃ puruṣo+acirāt kālaṃ &mariṣyatīti vidyāt//

tathā+asyocchvāsamanyādantapakṣmacakṣuḥkeśalomodaranakhāṅgulīrālakṣayet/

tasya ceducchvāso+atidīrgho+atihrasvo vā syāt, parāsuriti vidyāt/

tasya cenmanye parimṛśyamāne na spandeyātāṃ, parāsuriti vidyāt/ tasya ceddantāḥ parikīrṇāḥ śvetā jātaśarkarāḥ syuḥ, parāsuriti vidyāt/ tasya cet pakṣmāṇi jaṭābaddhāni syuḥ, parāsuriti vidyāt/ tasya ceccakṣuṣī prakṛtihīne, vikṛtiyukte---atyutpiṇḍite,atipraviṣṭe,atijihme,ativiṣame, atimuktabandhane,atiprasrute,satatonmiṣite,satatanimiṣite,nimiṣonmeṣātipravṛtte,vibhrāntadṛṣṭike,viparītadṛṣṭike,hīnadṛṣṭike,vyastadṛṣṭike,&nakulāndhe,kapotāndhe,alātavarṇe,kṛṣṇapītanīlaśyāvatāmraharitahāridraśuklavaikārikāṇāṃ varṇānāmanyatamenātiplute vā syātāṃ,tadā parāsuriti vidyāt/

athāsya keśalomānyāyacchet,tasya cet keśalomānyāyamyamānāni pralucyeran na cedvedayeyustaṃ parāsuriti vidyāt/ tasya cedudare sirāḥ prakāśerañ śyāvatāmranīlahāridraśuklā vā syuḥ, parāsuriti vidyāt/

tasya cennakhā vītamāṃsaśoṇitāḥ pakvajāmbavavarṇāḥ syuḥ, parāsuriti vidyāt/

athāsyāṅgulīrāyacchet; tasya cedaṅgulaya āyamyamānā na sphuṭeyuḥ, parāsuriti vidyāt//

tatra ślokaḥ---

etān spṛśyān bahūn bhāvān yaḥ spṛśannavabudhyate/
āture na sa saṃmohamāyurjñānasya gacchati//

ityagniveśakṛte tantre carakapratisaṃskṛte indriyasthāne parimarśanīyamindriyaṃ nāma tṛtīyo+adhyāyaḥ//3//

5.4. caturtho+adhyāyaḥ/

athāta indriyānīkamindriyaṃ vyākhyāsyāmaḥ//

iti ha smāha bhagavānātreyaḥ//

indriyāṇi yathā jantoḥ parīkṣeta viśeṣavit/
jñātumicchan bhiṣaṅnānam-&āyuṣastannibodhata//
anumānāt parīkṣeta darśanādīni tattvataḥ/
addhā hi &viditaṃ jñānamindriyāṇāmatīndriyam//
svasthebhyo vikṛtaṃ yasya &jñānamindriyasaṃśrayam/
ālakṣyetānimittena lakṣaṇaṃ maraṇasya tat//
ityuktaṃ lakṣaṇaṃ samyagindriyeṣvaśubhodayam/
tadeva tu punarbhūyo vistareṇa vibodhata//
ghanībhūtamivākāśamākāśamiva medinīm/
vigītamubhayaṃ hyetat paśyan maraṇamṛcchati//
yasya darśanamāyāti māruto+ambaragocaraḥ/
agnirnāyāti cādīptastasyāyuḥkṣayamādiśet//
jale suvimale jālamajālāvatate naraḥ/
sthite gacchati vā dṛṣṭvā jīvitāt parimucyate//
jāgrat paśyati yaḥ pretān rakṣāṃsi vividhāni ca/
anyadvā+apyadbhutaṃ &kiñcinna sa jīvatumarhati//
yo+agniṃ prakṛtivarṇasthaṃ nīlaṃ paśyati niṣprabham/
kṛṣṇaṃ vā yadi vā śuklaṃ niśāṃ vrajati saptamīm//
marīvcīnasato meghānmeghān vā+apyasato+ambare/
vidyuto vā vinā meghaiḥ &paśyan maraṇamṛcchati//
mṛnmayīmiva yaḥ pātrīṃ kṛṣṇāmbarasamāvṛtām/
ādityamīkṣate śuddhaṃ candraṃ vā na sa jīvati//
aparvaṇi yadā paśyet sūryācandramasorgraham/
avyādhito vyādhito vā tadantaṃ tasya jīvitam//
naktaṃ sūryamahaścandramanagnau dhūmamutthitam/ agniṃ vā niṣprabhaṃ rātrau dṛṣṭvā maraṇamṛcchati//
prabhāvataḥ prabhāhīnānniṣprabhāṃśca prabhāvataḥ/
narā viliṅgān paśyanti bhāvān &bhāvāñjihāsavaḥ//
vyākṛtīni vivarṇāni visaṃkhyopagatāni ca/
vinimittāni paśyanti rūpāṇyāyuḥkṣaye narāḥ//
yaśca paśyatyadṛśyān vai dṛśyān yaśca na paśyati/
&tāvubhau paśyataḥ kṣipraṃ yamakṣayamasaṃśayam//
aśabdasya ca yaḥ śrotā śabdān yaśca na budhyate/
dvāvapyetau yathā pretau tathā jñeyau &vijānatā//
saṃvṛtyāṅgulibhiḥ karṇau jvālāśabdaṃ ya āturaḥ/
na śṛṇoti gatāsuṃ taṃ buddhimān parivārjayet//
viparyayeṇa yo vidyādgandhānāṃ sādhvasādhutām/
na vā &tān sarvaśo vidyāttaṃ vidyādvigatāyuṣam//
yo rasānna vijānāti na vā jānāti tattvataḥ/
mukhapākādṛte pakvaṃ tamāhuḥ kuśalā naram//
uṣṇāñchītān kharāñchlakṣṇānmṛdūnapi ca dāruṇān/
spṛśyān spṛṣṭvā tato+anyatvaṃ mumūrṣusteṣu manyate//
antareṇa tapastīvraṃ yogaṃ vā vidhipūrvakam/
indiyairadhikaṃ paśyan pañcatvamadhigacchati//
&indriyāṇāmṛte dṛṣṭerindriyārthānadoṣajān/
naraḥ paśyati yaḥ kaścidindriyairna sa jīvati//
svasthāḥ prajñāviparyāsairindiyārtheṣu vaikṛtam/
paśyanti ye+&asadvbahuśasteṣāṃ maraṇamādiśet//

tatra ślokaḥ---

etadindriyavijñānaṃ yaḥ paśyati yathātatham/
maraṇaṃ jīvitaṃ caiva sa bhiṣak jñātumarhati//

ityagniveśakṛte tantre carakapratisaṃskṛte indriyasthāne indriyānīkamindriyaṃ nāma caturtho+adhyāyaḥ//4//

5.5. pañcamo+adhyāyaḥ/

athātaḥ pūrvarūpīyamindriyaṃ vyākhyāsyāmaḥ//

iti ha smāha bhagavānātreyaḥ//

pūrvarūpāṇyasādhyānāṃ vikārāṇāṃ pṛthak pṛthak/
bhinnābhinnāni vakṣyāmo bhiṣajāṃ jñānavṛddhaye//
pūrvarūpāṇi sarvāṇi jvaroktānyatimātrayā/
yaṃ viśanti viśatyenaṃ mṛtyurjvarapuraḥsaraḥ//
anyasyāpi ca rogasya pūrvarūpāṇi yaṃ naram/
viśantyanena kalpena tasyāpi maraṇaṃ dhruvam//
pūrvarūpaikadeśāṃstu vakṣyāmo+anyān sudāruṇān/
ye rohānanubadhvanti &mṛtyuryairanubadhyate//
balaṃ ca hīyate yasya pratiśyāyaśca vardhate/
tasya nārīprasaktasya śoṣo+antāyopajāyate//
śvabhiruṣṭraiḥ kharairvā+api yāti yo dakṣiṇāṃ diśam/
svapne yakṣmāṇamāsādya jīvitaṃ sa vimuñcati//
pretaiḥ saha pibenmadyaṃ svapne yaḥ kṛṣyate śunā/
sughoraṃ jvaramāsādya jīvitaṃ sa vimuñcati//
lākṣāraktāmbarābhaṃ yaḥ paśyatyambaramantikāt/
sa raktapittamāsādya tenaivāntāya nīyate//
raktasragraktasarvāṅgo raktavāsā muhurhasan/
yaḥ svapne &hriyate nāryā sa raktaṃ prāpya sīdati//
śūlāṭopāntrakūjāśca daurbalyaṃ cātimātrayā/
nakhādiṣu ca vaivarṇyaṃ gulmenāntakaro grahaḥ//
latā kaṇṭakinī yasya dāruṇā hṛdi jāyate/
svapne gulmastamantāya krūro viśati mānavam//
kāye+alpamapi saṃspṛṣṭaṃ subhṛśaṃ yasya dīryate/
kṣatāni ca na rohanti kuṣṭhairmṛtyurhinasti tam//
nagnasyājyāvasiktasya juhvato+agnimanarciṣam/
padmānyurasi jāyante svapne kuṣṭhairmariṣyataḥ//
snātānuliptagātre+api yasmin gṛdhnanti makṣikāḥ/
sa prameheṇa saṃsparṇaṃ prāpya tenaiva hanyate//
snehaṃ bahuvidhaṃ svapne caṇḍālaiḥ saha yaḥ pibet/
badhyate sa prameheṇa spṛśyate+antāya mānavaḥ//
dhyānāyāsau tathodvegau mohaścāsthānasaṃbhavaḥ/
aratirbalahāniśca mṛtyurunmādapūrvakaḥ//
āhāradveṣiṇaṃ paśyan luptacittamudarditam/
vidyāddhīro mumūrṣuṃ tamunmādenātipātinā//
krodhanaṃ trāsabahulaṃ sakṛtprahasitānanam/
mūrcchāpipāsābahulaṃ hantyunmādaḥ śarīriṇam//
nṛtyan rakṣogaṇaiḥ sākaṃ yaḥ svapne+ambhasi &sīdati/
sa prāpya bhṛśamunmādaṃ yāti lokamataḥ param//
asattamaḥ paśyati yaḥ śṛṇotyapyasataḥ svanān/
bahūn bahuvidhān jāgrat so+apasmāreṇa badhyate//
mattaṃ nṛtyantamāvidhya preto harati yaṃ naram/
svapne harati taṃ mṛtyurapasmārapuraḥsaraḥ//
stabhyete pratibuddhasya hanū manye tathā+akṣiṇī/
yasya taṃ bahirāyāmo gṛhītvā hantyasaṃśayam//
śaṣkulīrvā+apyapūpān vā svapne khādati yo naraḥ/
sa &cettādṛk chardayati pratibuddho na jīvati//
etāni pūrvarūpāṇi yaḥ samyagavabudhyate/
sa eṣāmanubandhaṃ ca phalaṃ ca jñātumarhati//
imāṃścāpyaparān svapnān dāruṇānupalakṣayet/
vyādhitānāṃ vināśāya kleśāya mahate+api vā//
yasyottamāṅge jāyante vaṃśagulmalatādayaḥ/
vayāṃsi ca vilīyante svapne maiṇḍyamiyācca yaḥ//
gṛdhrolūkaśvakākādyaiḥ svapne yaḥ parivāryate/
rakṣaḥpretapiśācastrīcaṇḍāla-&draviḍāndhrakaiḥ//
vaṃśavetralatāpāśatṛṇakaṇṭakasaṅkaṭe/
&saṃsajjati hi yaḥ svapne yo &gacchan prapatatyapi//
bhūmau pāṃśūpadhānāyāṃ valmīke vā+atha bhasmani/
śmaśānāyatane śvabhre svapne yaḥ &prapatatyapi//
kaluṣe+ambhasi paṅke vā kūpe vā tamasā++āvṛte/
svapne majjati śīghreṇa srotasā &hriyate ca yaḥ//
snehapānaṃ tathā+abhyaṅgaḥ pracchardanavirecane/
hiraṇyalābhaḥ kalahaḥ svapne bandhaparājayau//
upānadyuganāśaśca prapātaḥ pādacarmaṇoḥ/
harṣaḥ svapne prakupitaiḥ pitṛbhiścāvabhartsanam//
danta-&candrārkanakṣatradevatādīpacakṣuṣām/
patanaṃ vā vināśo vā svapne bhedo nagasya vā//
raktapuṣpaṃ vanaṃ bhūmiṃ pāpakarmālayaṃ citām/
guhāndhakārasaṃbādhaṃ svapne yaḥ praviśatyapi//
raktamālī hasannuccairdigvāsā dakṣiṇāṃ diśam/
dāruṇāmaṭavīṃ svapne kapiyuktena yāti vā//
kāṣāyiṇāmasaumyānāṃ nagnānāṃ daṇḍadhāriṇām/
kṛṣṇānāṃ raktanetrāṇāṃ svapne necchanti daraśanam//
kṛṣṇā &pāpā nirācārā dīrghakeśanakhastanī/
virāgamālyavasanā svapne kālaniśā matā//
ityete dāruṇāḥ svapnā rohī yairyāti pañcatām/
arogaḥ saṃśayaṃ gatvā kaścideva pramucyate//
manovahānāṃ pūrṇatvāddoṣauratibalaistribhiḥ/
srotasāṃ dāruṇān svapnān kāle paśyati dāruṇe//
nātiprasuptaḥ puruṣaḥ saphalānaphalāṃstathā/
indriyeśena manasā svapnān paśyatyanekadhā//
dṛṣṭaṃ śrutānubhūtaṃ ca prārthitaṃ kalpitaṃ tathā/
bhāvikaṃ doṣajaṃ caiva svapnaṃ saptavidhaṃ viduḥ//
tatra pañcavidhaṃ pūrvamaphalaṃ bhiṣagādiśet/
divāsvapnamatihrasvamatidīrghaṃ &ca buddhimān//
dṛṣṭaḥ prathamarātre yaḥ svapnaḥ so+&alpaphalo bhavet/
na svapedyaṃ punardṛṣṭvā sa sadyaḥ syānmahāphalaḥ//
akalyāṇamapi svapnaṃ dṛṣṭvā tatraiva yaḥ punaḥ/
paśyet saumyaṃ śubhākāraṃ tasya vidyācchubhaṃ phalam//

tatra ślokaḥ---

pūrvarūpāṇyatha svapnān ya imān vetti dāruṇān/
na sa mohādasādhyeṣu karmāṇyārabhate bhiṣak//

ityagniveśakṛte tantre carakapratisaṃskṛte indriyasthāne pūrvarūpīyamindriyaṃ nāma pañcamo+adhyāyaḥ//5//

5.6. ṣaṣṭho+adhyāyaḥ/

athātaḥ katamāniśarīrīyamindriyaṃ vyākhyāsyāmaḥ//

iti ha smāha bhagavānātreyaḥ//

katamāni śarīrāṇi vyādhimanti mahāmune!/
yāni vaidyaḥ pariharedyeṣu karma na siddhyati//
&ityātreyo+agniveśena praśnaṃ pṛṣṭaḥ sudurvacam/
ācacakṣe yathā tasmai bhagavāṃstannibodhata//
yasya vaibhāṣamāṇasya rujatyūrdhvamuro bhṛśam/
annaṃ ca cyavate bhuktaṃ sthitaṃ cāpi na jīryati//
balaṃ ca hīyate &śīghraṃ tṛṣṇā cātipravardhate/
jāyate hṛdi śūlaṃ ca taṃ bhiṣak parivarjayet//
hikkā gambhīrajā yasya śoṇitaṃ cātisāryate/
na tasmai bheṣajaṃ dadyāt smarannātreyaśāsnama//
ānāhaścātisāraśca yametau durbalaṃ naram/
vyādhitaṃ viśato rogau durlabhaṃ tasya jīvitam//
ānāhaścātitṛṣṇā ca yametau durbalaṃ naram/
viśato vijahatyenaṃ prāṇā nāticirānnaram//
jvaraḥ paurvāhṇiko yasya śuṣkakāsaśca dāruṇaḥ/
balamāṃsavihīnasya yathā pretastathaiva saḥ//
yasya mūtraṃ purīṣaṃ ca grathitaṃ saṃpravartate/
nirūṣmaṇo jaṭhariṇaḥ śvasano na sa jīvati//
śvayathuryasya kukṣistho hastapādaṃ visarpati/
jñātisaṅghaṃ sa saṃkleśya tena rogeṇa hanyate//
śvayathuryasya pādasthastathā sraste ca piṇḍike/
sīdataścāpyubhe &jaṅghe taṃ bhiṣak parivarjayet//
śūnahastaṃ śūnapādaṃ śūnaguhyodaraṃ naram/
hīnavarṇabalāhāramauṣadhairnopapādayet//
&uroyukto bahuśleṣmā nīlaḥ pītaḥ salohitaḥ/
satataṃ cyavate yasya dūrātaṃ parivarjayet//
hṛṣṭaromā sāndramūtraḥ śūnaḥ &kāsajvarārditaḥ/
kṣīṇamāṃso naro dūrādvarjyo vaidyena jānatā//
trayaḥ prakupitā yasya doṣāḥ &kaṣṭābhilakṣitāḥ/
kṛśasya balahīnasya nāsti tasya cikitsitam//
jvarātisārau śophānte śvayathurvā tayoḥ kṣaye/
durbalasya viśeṣeṇa narasyāntāya jāyate//
pāṇḍuraśca kṛśo+atyarthaṃ tṛṣṇayā+abhipariplutaḥ/
ḍambarī kupitocchvāsaḥ pratyākhyeyo vijānatā//
hanumanyāgrahastṛṣṇā balahrāso+atimātrayā/
prāṇāścorasi vartante yasya taṃ parivarjayet//
&tāmyatyāyacchate śarma na kiñcidapi vindati/
kṣīṇamāṃsabalāhāro mumūrṣuracirānnaraḥ//
viruddhayonayo yasya viruddhopakramā bhṛśam/
&vardhante dāruṇā rogāḥ śīghraṃ śīghraṃ sa hanyate//
balaṃ vijñānamārogyaṃ grahaṇī &māṃsaśoṇitam/
etāni yasya &kṣīyante kṣipraṃ kṣipraṃ sa hanyate//
ārogyaṃ hīyate &yasya prakṛtiḥ parihīyate/
sahasā sahasā tasya mṛtyurharati jīvitam//

tatra ślokaḥ---

ityetāni śarīrāṇi vyādhimanti vivarjayet/
na hyeṣu dhīrāḥ paśyanti siddhiṃ kāñcidupakramāt//

ityagniveśakṛte tantre carakapratisaṃskṛte indriyasthāne katamāniśarīrīyamindriyaṃ nāma ṣaṣṭho+adhyāyaḥ//6//

5.7. saptamo+adhyāyaḥ/

athātaḥ pannarūpīyamindriyaṃ vyākhyāsyāmaḥ//

iti ha smāha bhagavānātreyaḥ//

dṛṣṭyāṃ yasya vijānīyāt pannarūpāṃ kumārikām/
praticchāyāmayīmakṣṇornainamiccheccikitsitum//
jyotsnāyāmātape dīpe salilādarśayorapi/
aṅgeṣu vikṛtā yasya cchāyā &pretastathaiva saḥ//
chinnā bhinnā++ākulā cchāyā hīnā vā+apyadhikā+api vā/
naṣṭā tanvī dvidhā cchinnā vikṛtā viśitā ca yā//
etāścānyāśca yāḥ kāścit praticchāyā vigarhitāḥ/
sarvā mumūrṣatāṃ jñeyā na cellakṣyanimittajāḥ//
saṃsthānena pramāṇena varṇena prabhayā tathā/
chāyā vivartate yasya svastho+api preta eva saḥ//
saṃsthānamākṛtirjñeyā suṣamā viṣamā ca sā/
madhyamalpaṃ mahaccoktaṃ pramāṇaṃ trividhaṃ nṛṇām//
pratipramāṇasaṃsthānā jalādarśātapādiṣu/
chāyā yā sā praticchāyā cchāyā varṇaprabhāśrayā//
svādīnāṃ pañca pañcānāṃ chāyā vividhalakṣaṇāḥ/
nābhasī nirmalā nilā sasnehā saprabheva ca //
rūkṣā śyāvāruṇā yā tu vāyavī sā hataprabhā/
viśuddharaktā tvāgneyī dīptābhā darśanapriyā//
śuddhavaidūryavimalā susnigdhā cāmbhasī matā/
sthirā &snigdhā ghanā ślakṣṇā śyāmā śvetā ca pārthivī//
vāyavī garhitā tvāsāṃ catasraḥ syuḥ &sukhodayāḥ/
vāyavī tu vimāśāyā kleśāya mahate+api vā//
syāttaijasī prabhā sarvā sā tu saptavidhā smṛtā/
raktā pītā sitā śyāvā haritā pāṇḍurā+asitā//
tāsāṃ yāḥ syurvikāsinyaḥ snigdhāśca vipulāśca yāḥ/
tāḥ śubhā rūkṣamalināḥ &saṃkṣiptāścāśubhodayāḥ//
varṇamākrāmati cchāyā &bhāstu varṇaprakāśinī/
āsannā lakṣyate cchāyā bhāḥ &prakṛṣṭā prakāśate//
nācchāyo nāprabhaḥ kaścidviśeṣāścihnayanti tu/
nṛṇāṃ śubhāśubhotpattiṃ kāle chāyāprabhāśrayāḥ//
kāmalā+akṣṇormukhaṃ pūrṇaṃ śaṅkhayormuktamāṃsatā/
&saṃtrāsaścoṣṇagātratvaṃ yasya taṃ parivarjayet//
utthāpyamānaḥ śayanāt pramohaṃ yāti yo naraḥ/
muhurmuhurna saptāhaṃ sa jīvati &vikatthanaḥ//
saṃsṛṣṭā vyādhayo yasya pratilomānulomagāḥ/
vyāpannā grahaṇī prāyaḥ so+ardhamāsaṃ na jīvati//
uparuddhasya rogeṇa karśitasyālpamaśnataḥ/
bahu mūtrapurīṣaṃ syādyasya taṃ parivarjayet//
durbalo bahu bhuṅkte yaḥ &prāgbhuktādannamāturaḥ/
alpamūtrapurīṣaśca yathā pretastathaiva saḥ//
iṣṭaṃ ca &guṇasaṃpannamannamaśnāti yo naraḥ/
śaśvacca balavarṇābhyāṃ hīyate na sa jīvati//
prakūjati praśvasiti śithilaṃ cātisāryate/
balahīnaḥ pipāsārtaḥ śuṣkāsyo na sa jīvati//
hrasvaṃ ca yaḥ praśvasiti vyāviddhaṃ spandate ca yaḥ/
mṛtameva tamātreyo vyācacakṣe punarvasuḥ//
ūrdhvaṃ ca yaḥ praśvasiti śleṣmaṇā cābhibhūyate/
hīnavarṇabalāhāro yo naro na sa jīvati//
ūrdhvāgne nayane yasya &manye cāratakampane/
balahīnaḥ pipāsārtaḥ śuṣkāsyo na sa jīvati//
yasya gaṇḍāvupacitau jvarakāsau ca dāruṇau/
śūlī pradveṣṭi cāpyannaṃ tasmin karma na sidhyati//
&vyāvṛttamūrdhajihvāsyo bhruvau yasya ca vicyute/
kaṇṭakaiścācitā jihvā yathā pretastathaiva saḥ//
śophaścātyarthamutsiktaṃ niḥsṛtau vṛṣaṇau bhṛśam/
ataścaiva viparyāso vikṛtyā pretalakṣaṇam//
nicitaṃ yasya māṃsaṃ &syāttvagasthiṣveva dṛśyate/
kṣīṇasyānaśnatastasya māsamāyuḥ paraṃ bhavet//

tatra ślokaḥ---

idaṃ liṅgamariṣṭāakhyamanekamabhijajñivān/
āyurvedavidityākhyāṃ labhate kuśalo janaḥ//

ityagniveśakṛte tantre carakapratisaṃskṛte indriyasthāne pannarūpīyamindriyaṃ nāma saptamo+adhyāyaḥ//7//

5.8. aṣṭamo+adhyāyaḥ/

athāto+avākśirasīyamindriyaṃ vyākhyāsyāmaḥ//

iti ha smāha bhagavānātreyaḥ//

avākśirā vā jihmā vā yasya vā viśirā bhavet/
janto rūpapraticchāyā nainamiccheccikitsitum//
jaṭībhūtāni pakṣmāṇi dṛṣṭiścāpi &nigṛhyate/
yasya jantorna taṃ dhīro bheṣajenopapādayet//
yasya śūnāni vartmāni na samāyānti śuṣyataḥ/
cakṣuṣī &copadihyete yathā pretastathaiva saḥ//
bhruvorvā yadi vā mūrdhni sīmantāvartakān bahūn/
apūrvānakṛtān vyaktān dṛṣṭvā maraṇamādiśet//
tryahametena jīvanti lakṣaṇenāturā narāḥ/
arogāṇāṃ punastvetat ṣaḍrātraṃ &paramucyate//
āyamyotpāṭitān keśān yo naro nāvabudhyate/
anāturo vā rogī vā ṣaḍrātraṃ nātivartate//
yasya keśā nirabhyaṅgā dṛśyante+abhyaktasannibhāḥ/
uparuddhāyuṣaṃ jñātvā taṃ dhīraḥ parivarjayet//
&glāyate nāsikāvaṃśaḥ pṛthutvaṃ yasya gacchati/
aśūnaḥ śūnasaṃkāśaḥ pratyākhyeyaḥ sa jānatā//
atyarthavivṛtā yasya yasya cātyarthasaṃvṛtā/
jihmā vā pariśuṣkā vā nāsikā na sa jīvati//
mukhaṃ &śabdaśravāvoṣṭhau śuklaśyāvātilohitau/
vikṛtyā yasya vā nīlau na sa rogādvimucyate//
asthiśvetā dvijā yasya puṣpitāḥ paṅkasaṃvṛtāḥ/
vikṛtyā na sa rogaṃ taṃ vihāyārogyamaśnute//
stabdhā niścetanā gurvī kaṇṭakopacitā bhṛśam/
śyāvā śuṣkā+athavā śūnā pretajihvā nisarpiṇī//
dīrghamucchvasya yo hrasvaṃ naro niḥśvasya tāmyati/
uparuddhāyuṣaṃ jñātvā taṃ dhīraḥ parivarjayet//
hastau pādau ca manye ca tālu caivātidītalam/
bhavatyāyuḥkṣaye krūramathavā+api bhavenmṛdu//
ghaṭṭayañjānunā jānu pādāvudyamya pātayan/
yo+apāsyati muhurvaktramāturo na sa jīvati//
dantaiśchindannakhāgrāṇi nakhaicchindañchiroruhān/
kāṣṭhena bhūmiṃ vilikhanna rogāt parimucyate//
dantān khādati yo jāgradasāmnā virudan hasan/
vijānāti na cedduḥkhaṃ na sa rogādvimucyate//
muhurhasan muhuḥ kṣveḍan śayyāṃ pādena hanti yaḥ/
&uccaiśchidrāṇi vimṛśannāturo na sa jīvati//
yairvindati purā bhāvaiḥ sametaiḥ paramāṃ ratim/
tairevāramamāṇasya glāsnormaraṇamādiśet//
na bibharti śiro grīvā na pṛṣṭhaṃ bhāramātmanaḥ/
na hanū piṇḍamāsyasthamāturasya mumūrṣataḥ//
sahasā jvarasaṃtāpastṛṣṇā mūrcchā balakṣayaḥ/
viśleṣaṇaṃ ca sandhīnāṃ mumūrṣorupajāyate//
gosargo vadanādyasya svedaḥ pracyavate bhṛśam/
lepajvaropataptasya durlabhaṃ tasya jīvitam//
nopaiti kaṇṭhamāhāro jihvā kaṇṭhamupaiti ca/
āyuṣyantaṃ gate jantorbalaṃ ca parihīyate//
śiro vikṣipate kṛcchrānmuñcayitvā prapāṇikau/
lalāṭasrupratasvedo &mumūrṣuścyutabandhanaḥ//

tatra ślokaḥ---

imāni liṅgāni nareṣu buddhimān vibhāvayetāvahito mumūrṣuṣu/
kṣaṇena bhūtvā hyupayānti kānicinnacāphalaṃ liṅgamihāsti kiñcana//

ityagniveśakṛte tantre carakapratisaṃskṛte indriyasthāne+avākṇirasīyamindriyaṃ nāmāṣṭamo+adhyāyaḥ//8//

5.9. navamo+adhyāyaḥ/

athāto &yasyaśyāvanimittīyamindriyaṃ vyākhyāsyāmaḥ//

iti ha smāha bhagavānātreyaḥ//

yasya śyāve paridhvaste harite cāpi darśane/
āpanno vyādhirantāya jñeyastasya vijānatā//
niḥsaṃjñaḥ pariśuṣkāsyaḥ &samṛddho vyādhibhiśca yaḥ/
uparuddhāyuṣaṃ jñātvā taṃ dhīraḥ parivarjayet//
&haritāśca sirā yasya lomakūpāśca saṃvṛtāḥ/
so+amlābhilāṣī puruṣaḥ pittānmaraṇamaśnute//
śarīrāntāśca śobhante śarīraṃ copaśuṣyati/
balaṃ ca hīyate yasya rājayakṣmā hinasti tam//
aṃsābhitāpo hikkā ca chardanaṃ śoṇitasya ca/
ānāhaḥ pārśvaśūlaṃ ca bhavatyantāya śoṣiṇaḥ//
vātavyādhirapasmārī kuṣṭhī &śophī tathodarī/
gulmī ca madhumehī ca rājayakṣmī ca yo naraḥ//
acikitsyā bhavantyete balamāṃsakṣaye sati/
anyeṣvapi vikāreṣu tān bhiṣak parivarjayet//
virecanahṛtānāho yastṛṣṇānugato naraḥ/
viriktaḥ punarādhmāti yathā pretastathaiva saḥ//
peyaṃ pātuṃ na śaknoti kaṇṭhasya ca mukhasya ca/
urasaśca niśuṣkatvādyo naro na sa &jīvati//
svarasya durbalībhāvaṃ hāniṃ ca balavarṇayoḥ/
rogavṛddhimayuktyā ca dṛṣṭvā maraṇamādiśet//
ūrdhvaśvāsaṃ gatoṣmāṇaṃ śūlopahatavaṅkṣaṇam/
śarma cānadhigacchantaṃ buddhimān parivarjayet//
apasvaraṃ bhāpamāṇaṃ prāptaṃ maraṇamātmanaḥ/
śrotāraṃ cāpyaśabdasya dūrataḥ parivarjayet//
yaṃ naraṃ sahasā rogo durbalaṃ parimuñcati/
saṃśayaprāptamātreyo jīvitaṃ tasya manyate//
atha cejjñātayastasya yāceran praṇipātataḥ/
rasenādyāditi brūyānnāsmai dadyādviśodhanam//
māsena cenna dṛśyeta viśeṣastasya śobhanaḥ/
rasaiścānyaibahuvidhairdurlabhaṃ tasya jīvitam//
niṣṭhyūtaṃ ca purīṣaṃ ca retaścāmbhasi majjati/
yasya tasyāyuṣaḥ prāptamantamāhurmanīṣiṇaḥ//
niṣṭyūte yasya dṛśyante varṇā bahuvidhāḥ pṛthak/
tacca sīdatyapaḥ prāpya na sa &jīvitumarhati//
pittamūṣmānugaṃ yasya śaṅgau prāpya &vimūrcchati/
sa rogaḥ śaṅkhako nāmnā trirātrāddhanti jīvitam//
saphenaṃ rudhiraṃ yasya muhurāsyāt prasicyate/
śūlaiśca tudyate kukṣiḥ pratyākhyeyastathāvidhaḥ//
balamāṃsakṣayastīvro rogavṛddhirarocakaḥ/
yasyāturasya lakṣyante trīn pakṣānna sa jīvati//

tatra ślokau--- vijñānāni manuṣyāṇāṃ maraṇe pratyupasthite/

bhavantyetāni saṃpaśyedanyānyevaṃvidhāni ca//
tāni sarvāṇi lakṣyante na tu sarvāṇi mānavam/
viśanti vinaśiṣyantaṃ tasmādbodhyāni sarvataḥ//

ityagniveśakṛte tantre carakapratisaṃskṛte indriyasthāne yasyaśyāvanimittīyamindriyaṃ nāma navamo+adhyāyaḥ//9//

5.10. daśamo+adhyāyaḥ/

athātaḥ sadyomaraṇīyamindriyaṃ vyākhyāsyāmaḥ//

iti ha smāha bhagavānātreyaḥ//

sadyastitikṣataḥ prāṇāṃ(anunāsika)llakṣaṇāni pṛthak pṛthak/
agniveśa! pravakṣyāmi saṃspṛṣṭo yairna jīvati//
vātāṣṭhīlā susaṃvṛddhā tiṣṭhantī dāruṇā hṛdi/
tṛṣṇayā+abhiparītasya sadyo muṣṇāti jīvitam//
piṇḍike śithilīkṛtya jihmīkṛtya ca nāsikām/
vāyuḥ śarīre vicaran sadyo muṣṇāti jīvitam//
bhruvau yasya cyute sthānādantardāhaśca dāruṇaḥ/
tasya hikkākaro rogaḥ sadyo muṣṇāti jīvitam//
kṣīṇaśoṇitamāṃsasya vāyurūrdhvagatiścaran/
ubhe manye same yasya sadyo muṣṇāti jīvitam//
&antareṇa gudaṃ gacchan nābhiṃ ca sahasā+anilaḥ/
kṛśasya vaṃkṣaṇau gṛhṇan sadyo muṣṇāti jīvitam//
vitatya parśukāgrāṇi gṛhītvoraśca mārutaḥ/
stimitasyāyatākṣasya sadyo muṣṇāti jīvitam//
hṛdayaṃ ca gudaṃ cobhe &gṛhītvā māruto balī/
durbalasya viśeṣeṇa sadyo muṣṇāti jīvitam//
vaṃkṣaṇaṃ ca gudaṃ cobhe gṛhītvā māruto balī/
śvāsaṃ saṃjanayañjantoḥ sadyo muṣṇāti jīvitam//
nābhiṃ mūtraṃ &bastiśīrṣaṃ purīṣaṃ cāpi mārutaḥ/
&pracchinnaṃ janayañchūlaṃ sadyo muṣṇāti jīvitam//
bhidyete vaṃkṣaṇau yasya vātaśūlaiḥ samantataḥ/
bhinnaṃ purīṣaṃ tṛṣṇā ca sadyaḥ prāṇāñjahāti saḥ//
āplutaṃ māruteneha śarīraṃ yasya kevalam/
bhinnaṃ purīṣaṃ tṛṣṇā ca sadyo jahyāt sa jīvitam//
śarīraṃ śophitaṃ yasya vātāśophena dehinaḥ/
bhinnaṃ purīṣaṃ tṛṣṇā ca sadyo jahyāt sa jīvitam//
āmāśayasamutthānā yasya syāt parikartikā/
bhinnaṃ purīṣaṃ tṛṣṇā ca sadyaḥ prāṇāñjahāti saḥ//
pakvāśayasamutthānā yasya syāt parikartikā/
tṛṣṇā gudagrahaścograḥ sadyo jahyāt sa jīvitam//
&pakvāśayamadhiṣṭhāyaṃ hatvā saṃjñāṃ ca mārutaḥ/
kaṇṭhe ghurghurakaṃ kṛtvā sadyo harati jīvitam//
dantāḥ kardamadigdhābhā mukhaṃ cūrṇakasannibham/
siprāyante ca gātrāṇi liṅgaṃ sadyo mariṣyataḥ//
tṛṣṇāśvāsaśirorogamohadairbalyakūjanaiḥ/
spṛṣṭaḥ prāṇāñjahātyāśu śakṛdbhedena cāturaḥ//

tatra ślokaḥ---

etāni khalu liṅgāni yaḥ samyagavabudhyate/
sa jīvitaṃ ca martyānāṃ maraṇaṃ cāvabudhyate//

ityagniveśakṛte tantre carakapratisaṃskṛte indriyasthāne sadyomaraṇīyamindriyaṃ nāma daśamo+adhyāyaḥ//10//

5.11. ekādaśo+adhyāyaḥ/

athāto+aṇujyotīyamindriyaṃ vyākhyāsyāmaḥ//

iti ha smāha bhagavānātreyaḥ//

aṇujyotiranekāgro duśchāyo durmanāḥ sadā/
ratiṃ na labhate &yāti paralokaṃ samāntaram//
baliṃ balibhṛto yasya praṇītaṃ nopabhuñjate/
lokāntaragataḥ piṇḍaṃ bhuṅkte saṃvatsareṇa saḥ//
saptarṣīṇāṃ samīpasthāṃ yo na paśyatyarundhatīm/
saṃvatsarānte jantuḥ sa saṃpaśyati mahattamaḥ//
vikṛtyā vinimittaṃ yaḥ śobhāmupacayaṃ dhanam/
prāpnotyato vā vibhraṃśaṃ samāntaṃ tasya jīvitam//
bhaktiḥ śīlaṃ smṛtistyāgo buddhirbalamahetukam/
ṣaḍetāni nivartante ṣaḍbhirmāsairmariṣyataḥ//
dhamanīnāmapūrvāṇāṃ jālamatyarthaśobhanam/
lalāṭe dṛśyate yasya ṣaṇmāsānna sa jīvati//
lekhābhiścandravakrābhirlalāṭamupacīyate/
yasya tasyāyuṣaḥ ṣaḍbhirmāsairantaṃ samādiśet//
śarīrakampaḥ saṃmoho gatirvacanameva ca/
mattasyevopalabhyante yasya māsaṃ na jīvati//
retomūtrapurīṣāṇi yasya majjanti cāmbhasi/
sa māsāt svajanadveṣṭā mṛtyuvāriṇi majjati//
hastapādaṃ mukhaṃ cobhe viśeṣādyasya śuṣyataḥ/
śūyete vā vinā dehāt sa ca &māsaṃ na jīvati//
lalāṭe mūrdhni bastau vā nīlā yasya prakāśate/
rājī bālendukuṭilā na sa jīvitumarhati//
pravālaguṭikābhāsā yasya gātre masūrikāḥ/
utpadyāśu &vinaśyanti na cirāt sa vinaśyati//
grīvāvamardo balavāñjihvāśvayathureva ca/
bradhnāsyagalapākaśca yasya pakvaṃ tamādiśet//
saṃbhramo+atipralāpo+atibhedo+&asthnāmatidāruṇaḥ/
kālapāśaparītasya trayametat pravartate//
pramuhya luñcayet keśān &parigṛhṇātyatīva ca/
naraḥ &svasthavadāhāramabalaḥ kālacoditaḥ//
samīpe cakṣuṣoḥ kṛtvā mṛgayetāṅgulīkaram/
smayate+api ca kālāndha &ūrdhvagānimiṣekṣaṇaḥ//
śayanādāsanādaṅgāt kāṣṭhāt kuḍyādathāpi vā/
asanmṛgayate kiñcit sa muhyan kālacoditaḥ//
ahāsyahāsī saṃmuhyan &praleḍhi daśanacchadau/
śītapādakarocchvāso yo naro na sa jīvati//
āhvayaṃstaṃ samīpasthaṃ svajanaṃ janameva vā/
mahāmohāvṛtamanāḥ paśyannapi na paśyati//
ayogamatiyogaṃ vā śarīre matimān bhiṣak/
khādīnāṃ yugapaddṛṣṭvā bheṣajaṃ nāvacārayet//
atipravṛddhyā rogāṇāṃ manasaśca balakṣayāt/
vāsamutsṛjati kṣipraṃ śarīrī dehasaṃjñakam//
varṇasvarāvannibalaṃ vāgindriyamanobalam/
hīyate+asukṣaye nidrā nityā bhavati vā na vā//
bhiṣagbheṣajapānānnagurumitradviṣaśca ye/
vaśagāḥ sarva evaite boddhavyāḥ samavartinaḥ//
eteṣu rogaḥ kramate bheṣajaṃ pratihanyate/
naiṣāmannāni bhuñjīta na codakamapi spṛśet//
pādāḥ sametāścatvāraḥ saṃpannāḥ sādhakairguṇaiḥ/
vyarthā gatāyuṣo dravyaṃ vinā nāsti guṇodayaḥ//
parīkṣyamāyurbhiṣajā nīrujasyāturasya ca/
āyurjñānaphalaṃ kṛtsnamāyurjñe hyanuvartate//

tatra ślokaḥ---

kriyāpathamatikrāntāḥ kevalaṃ dehamāplutāḥ/
cihnaṃ kurvanti yaddoṣāstadariṣṭaṃ nirucyate//

ityagniveśakṛte tantre carakapratisaṃskṛte indriyasthāne+aṇujyotīyamindriyaṃ nāmaikādaśo+adhyāyaḥ//11//

5.12. dvādaśo+adhyāyaḥ/

athāto gomayacūrṇīyamindriyaṃ vyākhyāsyāmaḥ//

iti ha smāha bhagavānātreyaḥ//

yasya gomayacūrṇābhaṃ cūrṇaṃ mūrdhani jāyate/
sasnehaṃ bhraśyate caiva māsāntaṃ tasya jīvitam//
&nikaṣanniva yaḥ pādau cyutāṃsaḥ paridhāvati/
vikṛtyā na sa loke+asmiṃściraṃ vasati mānavaḥ//
yasya snātānuliptasya pūrvaṃ śuṣyatyuro bhṛśam/
ārdreṣu sarvagātreṣu so+ardhamāsaṃ na jīvati//
yamuddiśyāturaṃ vaidyaḥ &saṃvartayitumauṣadham/
yatamāno na śaknoti durlabhaṃ tasya jīvitam//
vijñātaṃ bahuśaḥ siddhaṃ vidhivaccāvacāritam/
na sidhyatyauṣadhaṃ yasya nāsti tasya cikitsitam//
&āhāramupayuñjāno bhiṣajā sūpakalpitam/
yaḥ phalaṃ tasya nāpnoti durlabhaṃ tasya jīvitam//
dūtādhikāre vakṣyāmo lakṣaṇāni mumūrṣatām/
yāni dṛṣṭvā bhiṣak prājñaḥ pratyākhyāyādasaṃyamam//
muktakeśo+athavā nagne rudatyaprayate+athavā/
bhiṣagabhyāgataṃ dṛṣṭvā dūtaṃ maraṇamādiśet//
supte bhiṣaji ye dūtāśchindatyapi ca bhindati/
āgacchanti bhiṣak teṣāṃ na bhartāramanuvrajet//
juhvatyagniṃ tathā piṇḍān pitṛbhyo nirvapatyapi/
vaidye dūtā ya āyānti te ghnanti prajighāṃsavaḥ//
kathayatyapraśastāni cintayatyathavā punaḥ/
vaidye dūtā manuṣyāṇāmāgacchanti mumūrṣatām//
mṛtadagdhavinaṣṭāni bhajati vyāharatyapi/
apraśastāni cānyāni vaidye dūtā mumūrṣatām//
vikārasāmānyaguṇe deśe kāle+athavā bhiṣak/
dūtamabhyāgataṃ dṛṣṭvā nāturaṃ tamupācaret//
dīnabhītadrutatrastamalināmasatīṃ striyam/
trīn vyākṛtīṃśca ṣaṇḍāṃśca dūtān vidyānmumūrṣatām//
aṅgavyasaninaṃ dūtaṃ liṅginaṃ vyādhitaṃ tathā/
saṃprekṣya cograkarmāṇaṃ na vaidyo gantumarhati//
āturārthamanuprāptaṃ kharoṣṭrarathavāhanam/
dūtaṃ dṛdṣṭvā bhiṣagvidyādāturasya parābhavam//
palālabusamāṃsāsthikeśalomanakhadvijān/
mārjanīṃ musalaṃ śūrpamupānaccarma &vicyutam//
tṛṇakāṣṭhatuṣāṅgāraṃ spṛśanto loṣṭamaśma ca/
tatpūrvadarśane dūtā vyāharanti mumūrṣatām//
yasmiṃśca dūte