The Nāradasmṛti - SARIT transcript
Compilation, data entry, proof correction by
Yasuke Ikari, Kyoto University
Editing and conversion to TEI markup by
Richard Mahoney, Indica et Buddhica
SARIT: Search and Retrieval of Indic Texts
London
:
2009
 
Financial support by The British Association for South Asian Studies
Financial support by The British Association for South Asian Studies

Table of contents

1. Part 1 :: Mātṛkā (Prolegomena)

[Page 1 ] [Note: [ L tr. 1-22 :: cf. J tr. 4-15]

1.1. Chapter 1 :: Vyavahāraḥ (Legal Procedure)

[Note: [ L tr. 1-19 :: cf. J tr. 4-11] [Page 3 ]
NM01.001a/ dharma.ekatānāḥ puruṣā yadāsan satyavādinaḥ |
NM01.001c/ tadā na vyavahāro 'bhūn na dveṣo nāpi matsaraḥ || 1 ||
NM01.002a/ naṣṭe dharme manuṣyeṣu vyavahāraḥ pravartate |
NM01.002c/ draṣṭā ca vyavahārāṇāṁ rājā daṇḍadharaḥ kṛtaḥ || 2 ||
[Page 5 ]
NM01.003a/ likhitaṁ sākṣiṇaś cātra dvau vidhī samprakīrtitau |
NM01.003c/ sandigdhārthaviśuddhyarthaṁ dvayor vivadamānayoḥ || 3 ||
NM01.004a/ sottaro 'nuttaraś caiva sa vijñeyo dvilakṣaṇaḥ |
NM01.004c/ sottaro 'bhyadhiko yatra vilekhāpūrvakaḥ paṇaḥ || 4 ||
[Page 6 ]
NM01.005a/ vivāde sottarapaṇe dvayor yas tatra hīyate |
NM01.005c/ sa paṇaṁ svakṛtaṁ dāpyo vinayaṁ ca parājaye || 5 ||
[Page 7 ]
NM01.006a/ sāras tu vyavahārāṇāṁ pratijñā samudāhṛtā |
NM01.006c/ taddhānau hīyate vādī taraṁs tām uttaro bhavet || 6 ||
[Page 8 ]
NM01.007a/ kulāni śreṇayaś caiva gaṇāś cādhikṛto nṛpaḥ |
NM01.007c/ pratiṣṭhā vyavahārāṇāṁ gurvebhyas tūttarottaram || 7 ||
NM01.008a/ sa catuṣpāc catuḥsthānaś catuḥsādhana eva ca |
NM01.008c/ caturhitaś caturvyāpī catuṣkārī ca kīrtyate || 8 ||
[Page 9 ]
NM01.009a/ aṣṭāṅgo 'ṣṭādaśapadaḥ śataśākhas tathā-eva ca |
NM01.009c/ triyonir dvyabhiyogaś ca dvidvāro dvigatis tathā || 9 ||
NM01.010a/ dharmaś ca vyavahāraś ca caritraṁ rājaśāsanam |
NM01.010c/ catuṣpād vyavahāro 'yam uttaraḥ pūrvabādhakaḥ || 10 ||
NM01.011a/ tatra satye sthito dharmo vyavahāras tu sākṣiṣu |
NM01.011c/ caritraṁ pustakaraṇe rājājñāyāṁ tu śāsanam || 11 ||
[Page 10 ]
NM01.012a/ sāmādyupāyasādhyatvāc catuḥsādhana ucyate |
NM01.012c/ caturṇām āśramāṇāṁ ca rakṣaṇāt sa caturhitaḥ || 12 ||
NM01.013a/ kartṝn atho sākṣiṇaś ca sabhyān rājānam eva ca |
NM01.013c/ vyāpnoti pādaśo yasmāc caturvyāpī tataḥ smṛtaḥ || 13 ||
NM01.014a/ dharmasyārthasya yaśaso lokapaktes tathā-eva ca |
NM01.014c/ caturṇāṁ karaṇād eṣāṁ catuṣkārī prakīrtitaḥ || 14 ||
NM01.015a/ rājā sapuruṣaḥ sabhyāḥ śāstraṁ gaṇakalekhakau |
NM01.015c/ hiraṇyam agnir udakam aṣṭāṅgaḥ sa udāhṛtaḥ || 15 ||
[Page 11 ]
NM01.016a/ ṛṇādānaṁ hy upanidhiḥ sambhūya-utthānam eva ca |
NM01.016c/ dattasya punar ādānam aśuśrūṣābhyupetya ca || 16 ||
NM01.017a/ vetanasyānapākarma tathā-eva-asvāmivikrayaḥ |
NM01.017c/ vikrīya-asampradānaṁ ca krītvānuśaya eva ca || 17 ||
NM01.018a/ samayasyānapākarma vivādaḥ kṣetrajas tathā |
NM01.018c/ strīpuṁsayoś ca sambandho dāyabhāgo 'tha sāhasam || 18 ||
NM01.019a/ vākpāruṣyaṁ tathā-eva-uktaṁ daṇḍapāruṣyam eva ca |
NM01.019c/ dyūtaṁ prakīrṇakaṁ caiva-ity aṣṭādaśapadaḥ smṛtaḥ || 19 ||
NM01.020a/ eṣām eva prabhedo 'nyaḥ śatam aṣṭa.uttaraṁ smṛtam |
NM01.020c/ kriyābhedān manuṣyāṇāṁ śataśākho nigadyate || 20 ||
[Page 13 ]
NM01.021a/ kāmāt krodhāc ca lobhāc ca tribhyo yasmāt pravartate |
NM01.021c/ triyoniḥ kīrtyate tena trayam etad vivādakṛt || 21 ||
NM01.022a/ dvyabhiyogas tu vijñeyaḥ śaṅkātattvābhiyogataḥ |
NM01.022c/ śaṅkāsatāṁ tu saṁsargāt tattvaṁ ha-ūḍhādidarśanāt || 22 ||
[Page 14 ]
NM01.023a/ pakṣadvayābhisambandhād dvidvāraḥ samudāhṛtaḥ |
NM01.023c/ pūrvavādas tayoḥ pakṣaḥ pratipakṣas taduttaram || 23 ||
NM01.024a/ bhūtacchalānusāritvād dvigatiḥ sa udāhṛtaḥ |
NM01.024c/ bhūtaṁ tattvārthasaṁyuktaṁ pramādābhihitaṁ chalam || 24 ||
[Page 15 ]
NM01.025a/ tatra śiṣṭaṁ chalaṁ rājā marṣayed dharmasādhanaḥ |
NM01.025c/ bhūtam eva prapadyeta dharmamūlā yataḥ śriyaḥ || 25 ||
NM01.026a/ dharmeṇa-uddharato rājño vyavahārān kṛtātmanaḥ |
NM01.026c/ sambhavanti guṇāḥ sapta sapta vahner ivārciṣaḥ || 26 ||
[Page 16 ]
NM01.027a/ dharmaś cārthaś ca kīrtiś ca lokapaktir upagrahaḥ |
NM01.027c/ prajābhyo bahumānaś ca svarge sthānaṁ ca śāśvatam || 27 ||
NM01.028a/ tasmād dharmāsanaṁ prāpya rājā vigatamatsaraḥ |
NM01.028c/ samaḥ syāt sarvabhūteṣu bibhrad vaivasvataṁ vratam || 28 ||
NM01.029a/ dharmaśāstraṁ puraskṛtya prāḍvivākamate sthitaḥ |
NM01.029c/ samāhitamatiḥ paśyed vyavahārān anukramāt || 29 ||
NM01.030a/ āgamaḥ prathamaṁ kāryo vyavahārapadaṁ tataḥ |
NM01.030c/ vivitsā nirṇayaś caiva darśanaṁ syāc caturvidham || 30 ||
[Page 17 ]
NM01.031a/ dharmaśāstrārthaśāstrābhyām avirodhena mārgataḥ |
NM01.031c/ samīkṣamāṇo nipuṇaṁ vyavahāragatiṁ nayet || 31 ||
NM01.032a/ yathā mṛgasya viddhasya vyādho mṛgapadaṁ nayet |
NM01.032c/ kakṣe śoṇitaleśena tathā dharmapadaṁ nayet || 32 ||
NM01.033a/ yatra vipratipattiḥ syād dharmaśāstrārthaśāstrayoḥ |
NM01.033c/ arthaśāstra.uktam utsṛjya dharmaśāstra.uktam ācāret || 33 ||
[Page 18 ]
NM01.034a/ dharmaśāstravirodhe tu yuktiyukto 'pi dharmataḥ |
NM01.034c/ vyavahāro hi balavān dharmas tenāvahīyate || 34 ||
NM01.035a/ sūkṣmo hi bhagavān dharmaḥ parokṣo durvicāraṇaḥ |
NM01.035c/ ataḥ pratyakṣamārgeṇa vyavahāragatiṁ nayet || 35 ||
[Page 19 ]
NM01.036a/ yāty acauro 'pi cauratvaṁ cauraś cāyāty acauratām |
NM01.036c/ acauraś cauratāṁ prāpto māṇḍavyo vyavahārataḥ || 36 ||
NM01.037a/ strīṣu rātrau bahir grāmād antarveśmany arātiṣu |
NM01.037c/ vyavahāraḥ kṛto 'py eṣu punaḥ kartavyatām iyāt || 37 ||
NM01.038a/ gahanatvād vivādānām asāmarthyāt smṛter api |
NM01.038c/ ṛṇādiṣu haret kālaṁ kāmaṁ tattvabubhutsayā || 38 ||
NM01.039a/ gobhūhiraṇyastrīsteyapāruṣyātyayikeṣu ca |
NM01.039c/ sāhaseṣv abhiśāpe ca sadya eva vivādayet || 39 ||
[Page 20 ]
NM01.040a/ anāvedya tu yo rājñe sandigdhe 'rthe pravartate |
NM01.040c/ prasahya sa vineyaḥ syāt sa cāsyārtho na sidhyati || 40 ||
NM01.041a/ vaktavye 'rthe na tiṣṭhantam utkrāmantaṁ ca tadvacaḥ |
NM01.041c/ āsedhayed vivādārthī yāvad āhvānadarśanam || 41 ||
NM01.042a/ sthānāsedhaḥ kālakṛtaḥ pravāsāt karmaṇas tathā |
NM01.042c/ caturvidhaḥ syād āsedho nāsiddhas taṁ vilaṅghayet || 42 ||
NM01.043a/ nadīsantārakāntāradurdeśa.upaplavādiṣu |
NM01.043c/ āsiddhas taṁ parāsedham utkrāman nāparādhnuyāt || 43 ||
[Page 21 ]
NM01.044a/ āsedhakāla āsiddha āsedham yo vyatikramet |
NM01.044c/ sa vineyo 'nyathā kurvann āseddhā daṇḍabhāg bhavet || 44 ||
NM01.045a/ nirveṣṭukāmo rogārto yiyakṣur vyasane sthitaḥ |
NM01.045c/ abhiyuktas tathānyena rājakārya.udyatas tathā || 45 ||
NM01.046a/ gavāṁ pracāre gopālāḥ sasyabandhe kṛṣīvalāḥ |
NM01.046c/ śilpinaḥ cāpi tatkālam āyudhīyāś ca vigrahe || 46 ||
NM01.047a/ aprāptavyavahāraś ca dūto dāna.unmukho vratī |
NM01.047c/ viṣamasthaś ca nāsedhyo na ca-enān āhvayen nṛpaḥ || 47 ||
[Page 22 ]
NM01.048a/ nābhiyukto 'bhiyuñjīta tam atīrtvārtham anyataḥ |
NM01.048c/ na cābhiyuktam anyena na viddhaṁ veddhum arhati || 48 ||
NM01.049a/ yam artham abhiyuñjīta na taṁ viprakṛtiṁ nayet |
NM01.049c/ nānyat pakṣāntaraṁ gacched gacchan pūrvāt sa hīyate || 49 ||
NM01.050a/ na ca mithyābhiyuñjīta doṣo mithyābhiyoginaḥ |
NM01.050c/ yas tatra vinayaḥ proktaḥ so 'bhiyoktāram āvrajet || 50 ||
[Page 23 ]
NM01.051a/ sāpadeśaṁ haran kālam abruvaṁś cāpi saṁsadi |
NM01.051c/ uktvā vaco vibruvaṁś ca hīyamānasya lakṣaṇam || 51 ||
NM01.052a/ palāyate ya āhūtaḥ prāptaś ca vivaden na yaḥ |
NM01.052c/ vineyaḥ sa bhaved rājñā hīna eva sa vādataḥ || 52 ||
[Page 24 ]
NM01.053a/ nirṇiktavyavahāreṣu pramāṇam aphalaṁ bhavet |
NM01.053c/ likhitaṁ sākṣiṇo vāpi pūrvam āveditaṁ na cet || 53 ||
NM01.054a/ yathā pakveṣu dhānyeṣu niṣphalāḥ prāvṛṣo guṇāḥ |
NM01.054c/ nirṇiktavyavahārāṇāṁ pramāṇam aphalaṁ tathā || 54 ||
[Page 25 ]
NM01.055a/ abhūtam apy abhihitaṁ prāptakālaṁ parīkṣyate |
NM01.055c/ yat tu pramādān na-ucyeta tad bhūtam api hīyate || 55 ||
NM01.056a/ tīritaṁ cānuśiṣṭaṁ ca yo manyeta vidharmataḥ |
NM01.056c/ dviguṇaṁ daṇḍam āsthāya tat kāryaṁ punar uddharet || 56 ||
[Page 26 ]
NM01.057a/ durdṛṣṭe vyavahāre tu sabhyās taṁ daṇḍam āpnuyuḥ |
NM01.057c/ na hi jātu vinā daṇḍaṁ kaścin mārge 'vatiṣṭhate || 57 ||
NM01.058a/ rāgād ajñānato vāpi lobhād vā yo 'nyathā vadet |
NM01.058c/ sabhyo 'sabhyaḥ sa vijñeyas taṁ rājā vinayed bhṛśam || 58 ||
[Page 27 ]
NM01.059a/ kintu rājñā viśeṣeṇa svadharmam anurakṣatā |
NM01.059c/ manuṣyacittavaicitryāt parīkṣyā sādhvasādhutā || 59 ||
[Page 28 ]
NM01.060a/ puruṣāḥ santi ye lobhāt prabrūyuḥ sākṣyam anyathā |
NM01.060c/ santi cānye durātmānaḥ kūṭalekhyakṛto janāḥ || 60 ||
NM01.061a/ ataḥ parīkṣyam ubhayam etad rājñā viśeṣataḥ |
NM01.061c/ lekhyācāreṇa likhitaṁ sākṣyācāreṇa sākṣiṇaḥ || 61 ||
NM01.062a/ asatyāḥ satyasaṅkāśāḥ satyāś cāsatyadarśanāḥ |
NM01.062c/ dṛśyante vividhā bhāvās tasmād yuktaṁ parīkṣaṇam || 62 ||
NM01.063a/ talavad dṛśyate vyoma khadyoto havyavāḍ iva |
NM01.063c/ na talaṁ vidyate vyomni na khadyote hutāśanaḥ || 63 ||
NM01.064a/ tasmāt pratyakṣadṛṣṭo 'pi yuktam arthaḥ parīkṣitum |
NM01.064c/ parīkṣya jñāpayan arthān na dharmāt parihīyate || 64 ||
[Page 29 ]
NM01.065a/ evaṁ paśyan sadā rājā vyavahārān samāhitaḥ |
NM01.065c/ vitatya-iha yaśo dīptaṁ bradhnasyāpnoti viṣṭapam || 65 ||

1.2. Chapter 2 :: Bhāṣā (The Plaint)

[Page 30 ] [Note: [ L tr. 229-238 :: J tr. n/a]
NM02.001a/ suniścitabalādhānas tv arthī svārthapracoditaḥ |
NM02.001c/ lekhayet pūrvapakṣaṁ tu kṛtakāryaviniścayaḥ || J edn Mā 2.1 ||
NM02.002a/ pūrvapakṣaśrutārthas tu pratyarthī tadanantaram |
NM02.002c/ pūrvapakṣārthasambandhaṁ pratipakṣaṁ niveśayet || J edn Mā 2.2 ||
NM02.003a/ śvo lekhanaṁ vā sa labhet tryahaṁ saptāham eva vā |
NM02.003c/ arthī tṛtīyapāde tu yuktaṁ sadyo dhruvaṁ jayī || J edn Mā 2.3 ||
[Page 31 ]
NM02.004a/ mithyā sampratipattir vā pratyavaskandam eva vā |
NM02.004c/ prāṅnyāyavidhisādhyaṁ vā uttaraṁ syāc caturvidham || J edn Mā 2.4 ||
NM02.005a/ mithyaitan nābhijānāmi tadā tatra na sannidhiḥ |
NM02.005c/ ajātaś cāsmi tatkāla evaṁ mithyā caturvidhā || J edn Mā 2.5 ||
NM02.006a/ mithyā ca viparītaṁ ca punaḥ śabdasamāgamam |
NM02.006c/ pūrvapakṣārthasambandham uttaraṁ syāc caturvidham || J edn Mā 2.6 ||
NM02.007a/ bhāṣāyā uttaraṁ yāvat pratyarthī na niveśayet |
NM02.007c/ arthī tu lekhayet tāvad yāvad vastu vivakṣitam || J edn Mā 2.7 ||
[Page 32 ]
NM02.008a/ anyārtham arthahīnaṁ ca pramāṇāgamavarjitam |
NM02.008c/ lekhyaṁ hīnādhikaṁ bhraṣṭaṁ bhāṣādoṣās tūdāhṛtāḥ || J edn Mā 2.8 ||
NM02.009a/ labdhavyaṁ yena yad yasmāt sa tat tasmād avāpnuyāt |
NM02.009c/ na tv anyo 'nyad athānyasmād ity anyārtham idaṁ tridhā || J edn Mā 2.9 ||
NM02.010a/ manasāham api dhyātas tvanmitreṇeha śatruvat |
NM02.010c/ ato 'nyathā mahākṣāntyā tvam ihāvedito mayā || J edn Mā 2.10 ||
NM02.011a/ dravyapramāṇahīnaṁ yat phalopāśrayavarjitam |
NM02.011c/ pramāṇavarjitaṁ nāma lekhyadoṣaṁ tad utsṛjet || J edn Mā 2.11 ||
NM02.012a/ āgamavarjitaṁ doṣaṁ pūrvapāde vivarjayet |
NM02.012c/ ekasya bahubhiḥ sārdhaṁ purarāṣṭravirodhakam || J edn Mā 2.12 ||
NM02.013a/ bindumātrāpadavarṇeṣv ekāvidhiṣṭayā (?) |
NM02.013c/ hīnādhikā bhaved vyarthā tāṁ yatnena vivarjayet || J edn Mā 2.13 ||
NM02.014a/ bhraṣṭaṁ tu duḥsthitaṁ yat syāj jalatailādibhir hatam |
NM02.014c/ bhāṣāyāṁ tad api spaṣṭaṁ vispaṣṭārthaṁ vivarjayet || J edn Mā 2.14 ||
NM02.015a/ satyā bhāṣā na bhavati yady api syāt pratiṣṭhitā |
NM02.015c/ bahiś ced bhraśyate dharmān niyatād vyavahārikāt || J edn Mā 2.15, Manu 8.164 ||
[Page 33 ]
NM02.016a/ gandhamādanasaṁsthasya mayāsyāsīt tad arpitam |
NM02.016c/ vyavahārikadharmasya bāhyam etan na sidhyati || J edn Mā 2.16 ||
NM02.017a/ anyākṣaraniveśena anyārthagamanena ca |
NM02.017c/ ākulaṁ ca kriyādānaṁ kriyā caivākulā bhavet || J edn Mā 2.17 ||
NM02.018a/ rāgādīnāṁ yad ekena kopitaḥ karaṇe vadet |
NM02.018c/ tad ādau tu likhet sarvaṁ vādinaḥ phalakādiṣu || J edn Mā 2.18 ||
NM02.019a/ nirākulāvabodhāya dharmasthaiḥ suvicāritam |
NM02.019c/ tasmād anyad vyapohyaṁ syād vādinaḥ phalakādiṣu || J edn Mā 2.19 ||
NM02.020a/ vādibhyām abhyanujñātaṁ śeṣaṁ ca phalake sthitam |
NM02.020c/ sasākṣikaṁ likheyus te pratipattiṁ ca vādinoḥ || J edn Mā 2.20 ||
[Page 35 ]
NM02.021a/ vādibhyāṁ likhitāc cheṣaṁ yat punar vādinā smṛtam |
NM02.021c/ tat pratyākalitaṁ nāma svapāde tasya likhyate || J edn Mā 2.21 ||
NM02.022a/ arthinā sanniyukto vā pratyarthiprahito 'pi vā |
NM02.022c/ yo yasyārthe vivadate tayor jayaparājayau || J edn Mā 2.22 ||
NM02.023a/ yo na bhrātā na ca pitā na putro na niyogakṛt |
NM02.023c/ parārthavādī daṇḍyaḥ syād vyavahāre 'pi vibruvan || J edn Mā 2.23 ||
NM02.024a/ pūrvavādaṁ parityajya yo 'nyam ālambate punaḥ |
NM02.024c/ vādasaṅkramaṇāj jñeyo hīnavādī sa vai naraḥ || J edn Mā 2.24 ||
[Page 36 ]
NM02.025a/ sarveṣv api vivādeṣu vākchale nāpahīyate |
NM02.025c/ paśustrībhūmyṛṇādāne śāsyo 'py arthān na hīyate || J edn Mā 2.25 ||
NM02.026a/ abhiyukto 'bhiyogasya yadi kuryād apahnavam |
NM02.026c/ abhiyoktā diśed deśyaṁ pratyavaskandito na cet || J edn Mā 2.26 ||
NM02.027a/ pūrvapāde hi likhitaṁ yathākṣaram aśeṣataḥ |
NM02.027c/ arthī tṛtīyapāde tu kriyayā pratipādayet || J edn Mā 02.027 ||
NM02.028a/ kriyāpi dvividhā proktā mānuṣī daivikī tathā |
NM02.028c/ mānuṣī lekhyasākṣibhyāṁ dhaṭādir daivikī smṛtā || J edn Mā 2.28 ||
[Page 37 ]
NM02.029a/ divā kṛte kāryavidhau grāmeṣu nagareṣu vā |
NM02.029c/ sambhave sākṣiṇāṁ caiva divyā na bhavati kriyā || J edn Mā 2.29 ||
NM02.030a/ araṇye nirjane rātrāv antarveśmani sāhase |
NM02.030c/ nyāsasyāpahnave caiva divyā sambhavati kriyā || J edn Mā 2.30 ||
NM02.031a/ kāraṇapratipattyā ca pūrvapakṣe virodhite |
NM02.031c/ abhiyuktena vai bhāvyaṁ vijñeyaṁ pūrvapakṣavat || J edn Mā 2.31 ||
NM02.032a/ palāyate ya āhūto maunī sākṣiparājitaḥ |
NM02.032c/ svayam abhyupapannaś ca avasannaś caturvidhaḥ || J edn Mā 2.32 ||
[Page 38 ]
NM02.033a/ anyavādī kriyādveṣī na-upasthātā niruttaraḥ |
NM02.033c/ āhūtaprapalāyī ca hīnaḥ pañcavidhaḥ smṛtaḥ || J edn Mā 2.33 ||
NM02.034a/ maṇayaḥ padmarāgādyā dīnārādi hiraṇmayam |
NM02.034c/ muktāvidrumaśaṅkhādyāḥ praduṣṭāḥ svāmigāminaḥ || J edn Mā 2.34 ||
NM02.035a/ gandhamālyam adattaṁ tu bhūṣaṇaṁ vāsa eva vā |
NM02.035c/ pādukā-iti rājā-uktaṁ tad ākrāman vadham arhati || J edn Mā 2.35 ||
[Page 39 ]
NM02.036a/ paṇyamūlyaṁ bhṛtir nyāso daṇḍo yac cāvahārakam |
NM02.036c/ vṛthādānākṣikapaṇā vardhante nāvivakṣitāḥ || J edn Mā 2.36 ||
NM02.037a/ mithyābhiyogino ye syur dvijānāṁ śūdrayonayaḥ |
NM02.037c/ teṣāṁ jihvāṁ samutkṛtya rājā śūle vidhāpayet || J edn Mā 2.37 ||
NM02.038a/ ājñā lekhaḥ paṭṭakaḥ śāsanaṁ vā
ādhiḥ pattraṁ vikrayo vā krayo vā |
NM02.038c/ rājñe kuryāt pūrvam āvedanaṁ yas
tasya jñeyaḥ pūrvapakṣaḥ vidhijñaiḥ || J edn Mā 2.38 ||
[Page 40 ]
NM02.039a/ sākṣikadūṣaṇe kāryaṁ pūrvasākṣiviśodhanam |
NM02.039c/ śuddheṣu sākṣiṣu tataḥ paścāt sākṣyaṁ viśodhayet || J edn Mā 2.39 ||
NM02.040a/ sākṣisabhyāvasannānāṁ dūṣaṇe darśanaṁ punaḥ |
NM02.040c/ svacaryāvasitānāṁ tu nāsti paunarbhavo vidhiḥ || J edn Mā 2.40 ||
NM02.041a/ svayam abhyupapanno 'pi svacaryāvasito 'pi san |
NM02.041c/ kriyāvasanno 'py arheta paraṁ sabhyāvadhāraṇam || J edn Mā 2.41 ||
[Page 41 ]
NM02.042a/ pakṣān utsārya kāryas tu sabhyaiḥ kāryaviniścayaḥ |
NM02.042c/ anutsāritanirṇikte virodhaḥ pretya ceha ca || J edn Mā 02.042 ||
NM02.043a/ sabhair eva jitaḥ paścād rājñā śāsyaḥ svaśāstrataḥ |
NM02.043c/ jayine cāpi deyaṁ syād yathāvaj jayapatrakam || J edn Mā 2.43 ||
NM02.044a/ vyavahāramukhaṁ caitat pūrvam uktaṁ svayambhuvā |
NM02.044c/ mukhaśuddhau hi śuddhiḥ syād vyavahārasya nānyathā || J edn Mā 2.44 ||

1.3. Chapter 3 :: Sabhā (The Court)

[Page 42 ] [Note: [ L tr. 20-22 :: cf. J tr. 12-15]
NM03.001a/ nāniyuktena vaktavyaṁ vyavahāre kathañcana |
NM03.001c/ niyuktena tu vaktavyam apakṣapatitaṁ vacaḥ || 1 ||
[Page 43 ]
NM03.002a/ yuktarūpaṁ bruvan sabhyo nāpnuyād dveṣakilbiṣe |
NM03.002c/ bruvāṇas tv anyathā sabhyas tad eva-ubhayam āpnuyāt || 2 ||
NM03.003a/ rājā tu dhārmikān sabhyān niyuñjyāt suparīkṣitān |
NM03.003c/ vyavahāradhuraṁ voḍhuṁ ye śaktāḥ sadgavā iva || 3 ||
[Page 44 ]
NM03.004a/ dharmaśāstrārthakuśalāḥ kulīnāḥ satyavādinaḥ |
NM03.004c/ samāḥ śatrau ca mitre ca nṛpateḥ syuḥ sabhāsadaḥ || 4 ||
NM03.005a/ tatpratiṣṭhaḥ smṛto dharmo dharmamūlaś ca pārthivaḥ |
NM03.005c/ saha sadbhir ato rājā vyavahārān viśodhayet || 5 ||
NM03.006a/ śuddheṣu vyavahāreṣu śuddhiṁ yānti sabhāsadaḥ |
NM03.006c/ śuddhiś ca teṣāṁ dharmād dhi dharmam eva vadet tataḥ || 6 ||
[Page 45 ]
NM03.007a/ yatra dharmo hy adharmeṇa satyaṁ yatrānṛtena ca |
NM03.007c/ hanyate prekṣamāṇānāṁ hatās tatra sabhāsadaḥ || 7 ||
NM03.008a/ viddho dharmo hy adharmeṇa sabhāṁ yatra-upatiṣṭhate |
NM03.008c/ na ced viśalyaḥ kriyate viddhās tatra sabhāsadaḥ || 8 ||
NM03.009a/ sabhā vā na praveṣṭavyā vaktavyaṁ vā samañjasam |
NM03.009c/ abruvan vibruvan vāpi naro bhavati kilbiṣī || 9 ||
[Page 46 ]
NM03.010a/ ye tu sabhyāḥ sabhāṁ gatvā tūṣṇīṁ dhyāyanta āsate |
NM03.010c/ yathāprāptaṁ na bruvate sarve te 'nṛtavādinaḥ || 10 ||
NM03.011a/ pādo 'dharmasya kartāraṁ pādaḥ sākṣiṇam ṛcchati |
NM03.011c/ pādaḥ sabhāsadaḥ sarvān pādo rājānam ṛcchati || 11 ||
NM03.012a/ rājā bhavaty anenās tu mucyante ca sabhāsadaḥ |
NM03.012c/ eno gacchati kartāraṁ nindārho yatra nindyate || 12 ||
[Page 47 ]
NM03.013a/ andho matsyān ivāśnāti nirapekṣaḥ sakaṇṭakān |
NM03.013c/ parokṣam arthavaikalyād bhāṣate yaḥ sabhāṁ gataḥ || 13 ||
NM03.014a/ tasmāt sabhyaḥ sabhāṁ prāpya rāgadveṣavivarjitaḥ |
NM03.014c/ vacas tathāvidhaṁ brūyād yathā na narakaṁ patet || 14 ||
NM03.015a/ yathā śalyaṁ bhiṣag vidvān uddhared yantrayuktitaḥ |
NM03.015c/ prāḍvivākas tathā śalyam uddhared vyavahārataḥ || 15 ||
NM03.016a/ yatra sabhyo janaḥ sarvaḥ sādhv etad iti manyate |
NM03.016c/ sa niḥśalyo vivādaḥ syāt saśalyaḥ syād ato 'nyathā || 16 ||
[Page 48 ]
NM03.017a/ na sā sabhā yatra na santi vṛddhā
vṛddhā na te ye na vadanti dharmam |
NM03.017c/ nāsau dharmo yatra na satyam asti
na tat satyaṁ yac chalenānuviddham || 17 ||

2. Part 2 :: Vyavahārapadāni (Titles of Law)

[Page 49 ] [Note: [ L tr. 23-203 :: cf. J tr. 15-45, 55-116]

2.1. Chapter 1 :: Ṛṇādānam (Nonpayment of Debts)

[Note: [ L tr. 23-48 :: cf. J tr. 15-23]
N01.001a/ ṛṇaṁ deyam adeyaṁ ca yena yatra yathā ca yat |
N01.001c/ dānagrahaṇadharmāc ca ṛṇādānam iti smṛtam || 1 ||
[Page 50 ]
N01.002a/ pitary uparate putrā ṛṇaṁ dadyur yathāṁśataḥ |
N01.002c/ vibhaktā hy avibhaktā vā yas tām udvahate dhuram || 2 ||
N01.003a/ pitṛvyeṇāvibhaktena bhrātrā vā yad ṛṇaṁ kṛtam |
N01.003c/ mātrā vā yat kuṭumbārthe dadyus tad rikthino 'khilam || 3 ||
N01.004a/ kramād avyāhataṁ prāptaṁ putrair yan narṇam uddhṛtam |
N01.004c/ dadyuḥ paitāmahaṁ pautrās tac caturthān nivartate || 4 ||
[Page 51 ]
N01.005a/ icchanti pitaraḥ putrān svārthahetor yatas tataḥ |
N01.005c/ uttamarṇādhamarṇebhyo mām ayaṁ mocayiṣyati || 5 ||
[Page 57 ]
N01.006a/ ataḥ putreṇa jātena svārtham utsṛjya yatnataḥ |
N01.006c/ pitā mokṣitavya ṛṇād yathā na narakaṁ patet || 6 ||
N01.007a/ tapasvī cāgnihotrī ca ṛṇavān mriyate yadi |
N01.007c/ tapaś caivāgnihotraṁ ca sarvaṁ tad dhanināṁ dhanam || 7 ||
N01.008a/ na putrarṇaṁ pitā dadyād dadyāt putras tu paitṛkam |
N01.008c/ kāmakrodhasurādyūtaprātibhāvyakṛtaṁ vinā || 8 ||
[Page 58 ]
N01.009a/ pitur eva niyogād yat kuṭumbabharaṇāya ca |
N01.009c/ kṛtaṁ vā yad ṛṇaṁ kṛcchre dadyāt putrasya tat pitā || 9 ||
N01.010a/ śiṣyāntevāsidāsastrīvaiyāvṛttyakaraiś ca yat |
N01.010c/ kuṭumbahetor utkṣiptaṁ voḍhavyaṁ tat kuṭumbinā || 10 ||
[Page 59 ]
N01.011a/ nārvāg viṁśatimād varṣāt pitari proṣite sutaḥ |
N01.011c/ ṛṇaṁ dadyāt pitṛvye vā jyeṣṭhe bhrātary athāpi vā || 11 ||
N01.012a/ dāpyaḥ pararṇam eko 'pi jīvatsv adhikṛtaiḥ kṛtam |
N01.012c/ preteṣu tu na tatputraḥ pararṇaṁ dātum arhati || 12 ||
[Page 60 ]
N01.013a/ na strī patikṛtaṁ dadyād ṛṇaṁ putrakṛtaṁ tathā |
N01.013c/ abhyupetād ṛte yadvā saha patyā kṛtaṁ bhavet || 13 ||
N01.014a/ dadyād aputrā vidhavā niyuktā yā mumūrṣuṇā |
N01.014c/ yo vā tadriktham ādadyād yato riktham ṛṇaṁ tataḥ || 14 ||
N01.015a/ na ca bhāryākṛtam ṛṇaṁ kathañcit patyur ābhavet |
N01.015c/ āpatkṛtād ṛte puṁsāṁ kuṭumbārtho hi vistaraḥ || 15 ||
[Page 61 ]
N01.016a/ anyatra rajakavyādhagopaśauṇḍikayoṣitām |
N01.016c/ teṣāṁ tatpratyayā vṛttiḥ kuṭumbaṁ ca tadāśrayam || 16 ||
N01.017a/ putriṇī tu samutsṛjya putraṁ strī yānyam āśrayet |
N01.017c/ ṛkthaṁ tasyā haret sarvaṁ niḥsvāyāḥ putra eva tu || 17 ||
[Page 62 ]
N01.018a/ yā tu sapradhanaiva strī sāpatyā cānyam āśrayet |
N01.018c/ so 'syā dadyād ṛṇaṁ bhartur utsṛjed vā tathaiva tām || 18 ||
N01.019a/ adhanasya hy aputrasya mṛtasyopaiti yaḥ striyam |
N01.019c/ ṛṇaṁ voḍhuḥ sa bhajate tad evāsya dhanaṁ smṛtam || 19 ||
N01.020a/ dhanastrīhāriputrāṇām ṛṇabhāg yo dhanaṁ haret |
N01.020c/ putro 'satoḥ strīdhaninoḥ strīhārī dhaniputrayoḥ || 20 ||
[Page 64 ]
N01.021a/ uttamā svairiṇī yā syād uttamā ca punarbhuvām |
N01.021c/ ṛṇaṁ tayoḥ patikṛtaṁ dadyād yas tām upāśnute || 21 ||
[Page 65 ]
N01.022a/ strīkṛtāny apramāṇāni kāryāṇy āhur anāpadi |
N01.022c/ viśeṣato gṛhakṣetradānādhamanavikrayāḥ || 22 ||
N01.023a/ etāny api pramāṇāni bhartā yady anumanyate |
N01.023c/ putraḥ patyur abhāve vā rājā vā patiputrayoḥ || 23 ||
N01.024a/ bhartrā prītena yad dattaṁ striyai tasmin mṛte 'pi tat |
N01.024c/ sā yathākāmam aśnīyād dadyād vā sthāvarād ṛte || 24 ||
[Page 66 ]
N01.025a/ tathā dāsakṛtaṁ kāryam akṛtaṁ paricakṣate |
N01.025c/ anyatra svāmisandeśān na dāsaḥ prabhur ātmanaḥ || 25 ||
N01.026a/ putreṇa ca kṛtaṁ kāryaṁ yat syāt pitur anicchataḥ |
N01.026c/ tad apy akṛtam evāhur dāsaḥ putraś ca tau samau || 26 ||
N01.027a/ aprāptavyavahāraś cet svatantro 'pi hi na rṇabhāk |
N01.027c/ svātantryaṁ tu smṛtaṁ jyeṣṭhe jyaiṣṭhyaṁ guṇavayaḥkṛtam || 27 ||
[Page 67 ]
N01.028a/ trayaḥ svatantrā loke 'smin rājācāryas tathaiva ca |
N01.028c/ prati prati ca varṇānāṁ sarveṣāṁ svagṛhe gṛhī || 28 ||
N01.029a/ asvatantrāḥ prajāḥ sarvāḥ svatantraḥ pṛthivīpatiḥ |
N01.029c/ asvatantraḥ smṛtaḥ śiṣya ācārye tu svatantratā || 29 ||
N01.030a/ asvatantrāḥ striyaḥ putrā dāsāś ca saparigrahāḥ |
N01.030c/ svatantras tatra tu gṛhī yasya yat syāt kramāgatam || 30 ||
N01.031a/ garbhasthaiḥ sadṛśo jñeya ā varṣād aṣṭamāc chiṣuḥ |
N01.031c/ bāla ā ṣoḍaśāj jñeyaḥ pogaṇḍaś cāpi śabdyate || 31 ||
[Page 68 ]
N01.032a/ parato vyavahārajñaḥ svatantraḥ pitarau vinā |
N01.032c/ jīvator asvatantraḥ syāj jarayāpi samanvitaḥ || 32 ||
N01.033a/ tayor api pitā śreyān bījaprādhānyadarśanāt |
N01.033c/ abhāve bījino mātā tadabhāve tu pūrvajaḥ || 33 ||
N01.034a/ svatantrāḥ sarva evaite paratantreṣu sarvadā |
N01.034c/ anuśiṣṭau visarge ca vikraye ceśvarā matāḥ || 34 ||
[Page 69 ]
N01.035a/ yad bālaḥ kurute kāryam asvatantras tathaiva ca |
N01.035c/ akṛtaṁ tad iti prāhuḥ śāstre śāstravido janāḥ || 35 ||
N01.036a/ svatantro 'pi hi yat kāryaṁ kuryād aprakṛtiṁ gataḥ |
N01.036c/ tad apy akṛtam evāhur asvatantraḥ sa hetutaḥ || 36 ||
N01.037a/ kāmakrodhābhiyuktārtabhayavyasanapīḍitāḥ |
N01.037c/ rāgadveṣaparītāś ca jñeyās tv aprakṛtiṁ gatāḥ || 37 ||
[Page 70 ]
N01.038a/ kule jyeṣṭhas tathā śreṣṭhaḥ prakṛtisthaś ca yo bhavet |
N01.038c/ tatkṛtaṁ syāt kṛtaṁ kāryaṁ nāsvatantrakṛtaṁ kṛtam || 38 ||
N01.039a/ dhanamūlāḥ kriyāḥ sarvā yatnas tatsādhane mataḥ |
N01.039c/ rakṣaṇaṁ vardhanaṁ bhoga iti tasya vidhiḥ kramāt || 39 ||
N01.040a/ tat punas trividhaṁ jñeyaṁ śuklaṁ śabalam eva ca |
N01.040c/ kṛṣṇaṁ ca tasya vijñeyaḥ prabhedaḥ saptadhā pṛthak || 40 ||
[Page 71 ]
N01.041a/ śrutaśauryatapaḥkanyāśiṣyayājyānvayāgatam |
N01.041c/ dhanaṁ saptavidhaṁ śuklam udayo 'py asya tadvidhaḥ || 41 ||
N01.042a/ kusīdakṛṣivāṇijyaśulkaśilpānuvṛttibhiḥ |
N01.042c/ kṛtopakārād āptaṁ ca śabalaṁ samudāhṛtam || 42 ||
N01.043a/ pārśvikadyūtadautyārtipratirūpakasāhasaiḥ/
N01.043c/ vyājenopārjitaṁ yac ca tat kṛṣṇaṁ samudāhṛtam || 43 ||
[Page 72 ]
N01.044a/ tena krayo vikrayaś ca dānaṁ grahaṇam eva ca |
N01.044c/ vividhāś ca pravartante kriyāḥ sambhoga eva ca || 44 ||
N01.045a/ yathāvidhena dravyeṇa yatkiñcit kurute naraḥ |
N01.045c/ tathāvidham avāpnoti sa phalaṁ pretya ceha ca || 45 ||
N01.046a/ tat punar dvādaśavidhaṁ prativarṇāśrayāt smṛtam |
N01.046c/ sādhāraṇaṁ syāt trividhaṁ śeṣaṁ navavidhaṁ smṛtam || 46 ||
N01.047a/ kramāgataṁ prītidāyaḥ prāptaṁ ca saha bhāryayā |
N01.047c/ aviśeṣeṇa varṇānāṁ sarveṣāṁ trividhaṁ dhanam || 47 ||
[Page 73 ]
N01.048a/ vaiśeṣikaṁ dhanaṁ jñeyaṁ brāhmaṇasya trilakṣaṇam |
N01.048c/ pratigraheṇa yallabdhaṁ yājyataḥ śiṣyatas tathā || 48 ||
N01.049a/ trividhaṁ kṣatriyasyāpi prāhur vaiśeṣikaṁ dhanam |
N01.049c/ yuddhopalabdhaṁ kāraś ca daṇḍaś ca vyavahārataḥ || 49 ||
N01.050a/ vaiśeṣikaṁ dhanaṁ jñeyaṁ vaiśyasyāpi trilakṣaṇam |
N01.050c/ kṛṣigorakṣavāṇijyaiḥ śūdrasyaibhyas tv anugrahāt || 50 ||
N01.051a/ sarveṣām eva varṇānām eṣa dharmyo dhanāgamaḥ |
N01.051c/ viparyayād adharmyaḥ syān na ced āpad garīyasī || 51 ||
N01.052a/ āpatsv anantarā vṛttir brāhmaṇasya vidhīyate |
N01.052c/ vaiśyavṛttis tataś coktā na jaghanyā kathañcana || 52 ||
[Page 74 ]
N01.053a/ na kathañcana kurvīta brāhmaṇaḥ karma vārṣalam |
N01.053c/ vṛṣalaḥ karma na brāhmaṁ patanīye hi te tayoḥ || 53 ||
N01.054a/ utkṛṣṭaṁ cāpakṛṣṭaṁ ca tayoḥ karma na vidyate |
N01.054c/ madhyame karmaṇī hitvā sarvasādhāraṇe hi te || 54 ||
N01.055a/ āpadaṁ brāhmaṇas tīrtvā kṣatravṛttyā hṛtair dhanaiḥ |
N01.055c/ utsṛjet kṣatravṛttiṁ tāṁ kṛtvā pāvanam ātmanaḥ || 55 ||
[Page 75 ]
N01.056a/ tasyām eva tu yo vṛttau brāhmaṇo ramate rasāt |
N01.056c/ kāṇḍapṛṣṭhaś cyuto mārgāt so 'pāṅkteyaḥ prakīrtitaḥ || 56 ||
N01.057a/ vaiśyavṛttāv avikreyaṁ brāhmaṇasya payo dadhi |
N01.057c/ ghṛtaṁ madhu madhūcchiṣṭaṁ lākṣākṣārarasāsavāḥ || 57 ||
N01.058a/ māṁsaudanatilakṣaumasomapuṣpaphalapalāḥ |
N01.058c/ manuṣyaviṣaśastrāmbulavaṇāpūpavīrudhaḥ || 58 ||
N01.059a/ nīlīkauṣeyacarmāsthikutapaikaśaphā mṛdaḥ |
N01.059c/ udaśvitkeśapiṇyākaśākādyauṣadhayas tathā || 59 ||
[Page 76 ]
N01.060a/ brāhmaṇasya tu vikreyaṁ śuṣkaṁ dāru tṛṇāni ca |
N01.060c/ gandhadravyairakāvetratūlamūlatuśād ṛte || 60 ||
N01.061a/ svayaṁ śīrṇaṁ ca vidalaṁ phalānāṁ badareṅgude |
N01.061c/ rajjuḥ kārpāsikaṁ sūtraṁ tac ced avikṛtaṁ bhavet || 61 ||
N01.062a/ aśaktau bheṣajasyārthe yajñahetos tathaiva ca |
N01.062c/ yady avaśyaṁ tu vikreyās tilā dhānyena tatsāmāḥ || 62 ||
N01.063a/ avikreyāṇi vikrīṇan brāhmaṇaḥ pracyutaḥ pathaḥ |
N01.063c/ mārge punar avasthāpya rājñā daṇḍena bhūyasā || 63 ||
[Page 77 ] [Note: cf. J tr. 23 :: Chapter iv. On Evidence by Writing] [Note: [ L tr. 48-73 :: cf. J tr. 23-32]
N01.064a/ pramāṇāni pramāṇasthaiḥ paripālyāni yatnataḥ |
N01.064c/ sīdanti hi pramāṇāni pramāṇair avyavasthitaiḥ || 64 ||
N01.065a/ likhitaṁ sākṣiṇo bhuktiḥ pramāṇaṁ trividhaṁ smṛtaṁ |
N01.065c/ dhanasvīkaraṇe yena dhanī dhanam upāśnute || 65 ||
[Page 78 ]
N01.066a/ likhitaṁ balavan nityaṁ jīvantas tv eva sākṣiṇaḥ |
N01.066c/ kālātiharaṇād bhuktir iti śāstreṣu niścayaḥ || 66 ||
[Page 79 ]
N01.067a/ trividhasyāsya dṛṣṭasya pramāṇasya yathākramam |
N01.067c/ pūrvaṁ pūrvaṁ guru jñeyaṁ bhuktir ebhyo garīyasī || 67 ||
N01.068a/ vidyamāne 'pi likhite jīvatsv api hi sākṣiṣu |
N01.068c/ viśeṣataḥ sthāvarāṇāṁ yan na bhuktaṁ na tat sthiram || 68 ||
[Page 80 ]
N01.069a/ bhujyamānān parair arthān yaḥ svān maurkhyād upekṣate |
N01.069c/ samakṣaṁ jīvato 'py asya tān bhuktiḥ kurute vaśe || 69 ||
N01.070a/ yatkiñcid daśa varṣāṇi sannidhau prekṣate dhanī |
N01.070c/ bhujyamānaṁ parais tūṣṇīṁ na sa tal labdhum arhati || 70 ||
N01.071a/ upekṣāṁ kurvatas tasya tūṣṇīṁ bhūtasya tiṣṭhataḥ |
N01.071c/ kāle 'tipanne pūrvokte vyavahāro na sidhyati || 71 ||
[Page 81 ]
N01.072a/ ajaḍaś ced apogaṇḍo viṣaye cāsya bhujyate |
N01.072c/ bhuktaṁ tad vyavahāreṇa bhoktā tad dhanam arhati || 72 ||
N01.073a/ ādhiḥ sīmā bāladhanaṁ nikṣepopanidhī striyaḥ |
N01.073c/ rājasvaṁ śrotriyasvaṁ ca nopabhogena jīryate || 73 ||
N01.074a/ pratyakṣaparibhogāc ca svāmino dvidaśāḥ samāḥ |
N01.074c/ ādhyādīny api jīryante strīnarendradhanād ṛte || 74 ||
[Page 82 ]
N01.075a/ strīdhanaṁ ca narendrāṇāṁ na kadācana jīryate |
N01.075c/ anāgamaṁ bhujyamānaṁ vatsarāṇāṁ śatair api || 75 ||
N01.076a/ nirbhogo yatra dṛśyeta na dṛśyetāgamaḥ kvacit |
N01.076c/ āgamaḥ kāraṇaṁ tatra na bhogas tatra kāraṇam || 76 ||
N01.077a/ anāgamaṁ bhujyate yan na tad bhogo 'tivartate |
N01.077c/ prete tu bhoktari dhanaṁ yāti tadvaṁśyabhogyatām || 77 ||
[Page 83 ]
N01.078a/ āhartaivābhiyuktaḥ sann arthānām uddharet padam |
N01.078c/ bhuktir eva viśuddhiḥ syāt prāptānāṁ pitṛtaḥ kramāt || 78 ||
N01.079a/ anvāhitaṁ hṛtaṁ nyastaṁ balāvaṣṭabdhaṁ yācitam |
N01.079c/ apratyakṣaṁ ca yad bhuktaṁ ṣaḍ etāny āgamaṁ vinā || 79 ||
[Page 84 ]
N01.080a/ tathārūḍhavivādasya pretasya vyavahāriṇaḥ |
N01.080c/ putreṇa so 'rthaḥ saṁśodhyo na taṁ bhogo 'tivartate || 80 ||
N01.081a/ yad vināgamam apy ūrdhvaṁ bhuktaṁ pūrvais tribhir bhavet |
N01.081c/ na tac chakyam apākartuṁ kramāt tripuruṣāgatam || 81 ||
N01.082a/ santo 'pi na pramāṇaṁ syur mṛte dhanini sākṣiṇaḥ |
N01.082c/ anyatra śrāvitaṁ yat syāt svayam āsannamṛtyunā || 82 ||
[Page 85 ]
N01.083a/ na hi pratyarthini prete pramāṇaṁ sākṣiṇāṁ vacaḥ |
N01.083c/ sākṣimat karaṇaṁ tatra pramāṇaṁ syād viniścaye || 83 ||
N01.084a/ śrāvitas tv ātureṇāpi yas tv artho dharmasaṁhitaḥ |
N01.084c/ mṛte 'pi tatra sākṣī syāt ṣaṭsu cānvāhitādiṣu || 84 ||
N01.085a/ kriya rṇādiṣu sarveṣu balavaty uttarottarā |
N01.085c/ pratigrahādhikrīteṣu pūrvā pūrvā garīyasī || 85 ||
[Page 86 ]
N01.086a/ sthānalābhanimittaṁ hi dānagrahaṇam iṣyate |
N01.086c/ tat kusīdam iti proktaṁ tena vṛttiḥ kusīdinām || 86 ||
[Page 87 ]
N01.087a/ kāyikā kālikā caiva kāritā ca tathā smṛtā |
N01.087c/ cakravṛddhiś ca śāstreṣu tasya vṛddhiś caturvidhā || 87 ||
N01.088a/ kāyāvirodhinī śaśvat paṇapādyā tu kāyikā |
N01.088c/ pratimāsaṁ sravati yā vṛddhiḥ sā kālikā smṛtā || 88 ||
N01.089a/ vṛddhiḥ sā kāritā nāma ya rṇikena svayaṅkṛtā |
N01.089c/ vṛddher api punar vṛddhiś cakravṛddhir udāhṛtā || 89 ||
[Page 89 ]
N01.090a/ ṛṇānāṁ sārvabhaumo 'yaṁ vidhir vṛddhikaraḥ smṛtaḥ |
N01.090c/ deśācāravidhis tv anyo yatra rṇam avatiṣṭhati || 90 ||
N01.091a/ dviguṇaṁ triguṇaṁ caiva tathānyasmiṁś caturguṇam |
N01.091c/ tathāṣṭaguṇam anyasmin deśe deśe 'vatiṣṭhate || 91 ||
N01.092a/ hiraṇyadhānyavastrāṇāṁ vṛddhir dvitricaturguṇā |
N01.092c/ ghṛtasyāṣṭaguṇā vṛddhiḥ strīpaśūnāṁ ca santatiḥ || 92 ||
[Page 90 ]
N01.093a/ sūtrakarpāsakiṇvānāṁ trapuṣaḥ sīsakasya ca |
N01.093c/ āyudhānāṁ ca sarveṣāṁ carmaṇas tāmralohayoḥ || 93 ||
N01.094a/ anyeṣāṁ caiva sarveṣām iṣṭakānāṁ tathaiva ca |
N01.094c/ akṣayyā vṛddhir eteṣāṁ manur āha prajāpatiḥ || 94 ||
N01.095a/ tailānāṁ caiva sarveṣāṁ madyānāṁ madhusarpiṣām |
N01.095c/ vṛddhir aṣṭaguṇā jñeyā guḍasya lavaṇasya ca || 95 ||
N01.096a/ na vṛddhiḥ prītidattānāṁ syād anākāritā kvacit |
N01.096c/ anākāritam apy ūrdhvaṁ vatsarārdhād vivardhate || 96 ||
N01.097a/ eṣa vṛddhividhiḥ proktaḥ prativṛddhasya dharmataḥ |
N01.097c/ vṛddhis tu yoktā dhānyānāṁ vārdhuṣyaṁ tad udāhṛtam || 97 ||
[Page 91 ]
N01.098a/ āpadaṁ nistared vaiśyaḥ kāmaṁ vārdhuṣakarmaṇā |
N01.098c/ āpatsv api hi kaṣṭāsu brāhmaṇasya na vārdhuṣam || 98 ||
N01.099a/ brāhmaṇasya tu yad deyaṁ sānvayasya na cāsti saḥ |
N01.099c/ svakulyasyāsya nivapet tadabhāve 'sya bandhuṣu || 99 ||
N01.100a/ yadā tu na svakulyāḥ syur na ca sambandhibāndhavāḥ |
N01.100c/ tadā dadyāt svajātibhyas teṣv asatsv apsu nikṣipet || 100 ||
[Page 92 ]
N01.101a/ gṛhītvopagataṁ dadyād ṛṇikāyodayaṁ dhanī |
N01.101c/ adadad yācyamānas tu śeṣahānim avāpnuyāt || 101 ||
N01.102a/ lekhyaṁ dadyād ṛṇe śuddhe tadabhāve pratiśravam |
N01.102c/ dhanikarṇikayor evaṁ viśuddhiḥ syāt parasparam || 102 ||
[Page 93 ]
N01.103a/ viśrambhahetū dvāv atra pratibhūr ādhir eva ca |
N01.103c/ likhitaṁ sākṣiṇaś ca dve pramāṇe vyaktikārake || 103 ||
N01.104a/ upasthānāya dānāya pratyayāya tathaiva ca |
N01.104c/ trividhaḥ pratibhūr dṛṣṭas triṣv evārtheṣu sūribhiḥ || 104 ||
[Page 94 ]
N01.105a/ ṛṇiṣv apratikurvatsu pratyaye vā vivādite |
N01.105c/ pratibhūs tad ṛṇaṁ dadyād anupasthāpayaṁs tathā || 105 ||
[Page 95 ]
N01.106a/ bahavaś cet pratibhuvo dadyus te 'rthaṁ yathākṛtam |
N01.106c/ arthe 'viśeṣite hy eṣu dhaninaś chandataḥ kriyā || 106 ||
[Page 96 ]
N01.107a/ yaṁ cārthaṁ pratibhūr dadyād dhanikenopapīḍitaḥ |
N01.107c/ ṛṇikas taṁ pratibhuve dviguṇaṁ pratipādayet || 107 ||
[Page 97 ]
N01.108a/ adhikriyata ity ādhiḥ sa vijñeyo dvilakṣaṇaḥ |
N01.108c/ kṛtakālopaneyaś ca yāvaddeyodyatas tathā || 108 ||
[Page 98 ]
N01.109a/ sa punar dvividhaḥ prokto gopyo bhogyas tathaiva ca |
N01.109c/ pratidānaṁ tathaivāsya lābhahānir viparyaye || 109 ||
N01.110a/ pramādād dhaninas tadvad ādhau vikṛtim āgate |
N01.110c/ vinaṣṭe mūlanāśaḥ syād daivarājakṛtād ṛte || 110 ||
[Page 99 ]
N01.111a/ rakṣyamāṇo 'pi yatrādhiḥ kāleneyād asāratām |
N01.111c/ ādhir anyo 'dhikartavyo deyaṁ vā dhanine dhanam || 111 ||
N01.112a/ atha śaktivihīnaḥ syād ṛṇī kālaviparyayāt |
N01.112c/ śakyaprekṣam ṛṇaṁ dāpyaḥ kāle kāle yathodayam || 112 ||
[Page 100 ]
N01.113a/ śakto vā yadi daurātmyān na dadyād dhanine dhanam |
N01.113c/ rājñā dāpayitavyaḥ syād gṛhītvāṁśaṁ tu viṁśakam || 113 ||
N01.114a/ naśyed ṛṇaparīmāṇaṁ kāleneha rṇikasya cet |
N01.114c/ jātisañjñādhivāsānām āgamo lekhyataḥ smṛtaḥ || 114 ||
[Page 101 ]
N01.115a/ lekhyaṁ tu dvividhaṁ jñeyaṁ svahastānyakṛtaṁ tathā |
N01.115c/ asākṣimat sākṣimac ca siddhir deśasthites tayoḥ || 115 ||
N01.116a/ deśācārāviruddhaṁ yad vyaktādhikṛtalakṣaṇam |
N01.116c/ tat pramāṇaṁ smṛtaṁ lekhyam aviluptakramākṣaram || 116 ||
N01.117a/ mattābhiyuktastrībālabalātkārakṛtaṁ ca yat |
N01.117c/ tad apramāṇakaraṇaṁ bhītopadhikṛtaṁ tathā || 117 ||
[Page 102 ]
N01.118a/ mṛtāḥ syuḥ sākṣiṇo yatra dhanikarṇikalekhakāḥ |
N01.118c/ tad apy apārthaṁ likhitam ṛte tv ādheḥ sthirāśrayāt || 118 ||
N01.119a/ ādhir yo dvividhaḥ prokto jaṅgamaḥ sthāvaras tathā |
N01.119c/ siddhir atrobhayasyāsya bhogo yady asti nānyathā || 119 ||
N01.120a/ darśitaṁ pratikālaṁ yac chrāvitaṁ śrāvitaṁ ca yat |
N01.120c/ lekhyaṁ sidhyati sarvatra mṛteṣv api hi sākṣiṣu || 120 ||
[Page 103 ]
N01.121a/ aśrutārtham adṛṣṭārthaṁ vyavahārārtham eva ca |
N01.121c/ na lekhyaṁ siddhim āpnoti jīvatsv api hi sākṣiṣu || 121 ||
N01.122a/ lekhye deśāntaranyaste dagdhe durlikhite hṛte |
N01.122c/ satas tatkālakaraṇam asato dṛṣṭadarśanam || 122 ||
[Page 104 ]
N01.123a/ yasmin syāt saṁśayo lekhye bhūtābhūtakṛte kvacit |
N01.123c/ tatsvahastakriyācihnaprāptiyuktibhir uddharet || 123 ||
[Page 105 ]
N01.124a/ lekhyaṁ yac cānyanāmāṅkaṁ hetvantarakṛtaṁ bhavet |
N01.124c/ vipratyaye parīkṣyaṁ tat sambandhāgamahetubhiḥ || 124 ||
[Page 106 ]
N01.124-1a/ lekhyaṁ yac cānyanāmāṅkaṁ hetvantarakṛtaṁ bhavet |
N01.124-1c/ vipratyaye parīkṣyaṁ tat sambandhāgamahetubhiḥ || 124-1 ||
[Page 107 ]
N01.125a/ likhitaṁ likhitenaiva sākṣimat sākṣibhir haret |
N01.125c/ sākṣibhyo likhitaṁ śreyo likhitena tu sākṣiṇaḥ || 125 ||
[Page 108 ]
N01.126a/ chinnabhinnahṛtonmṛṣṭanaṣṭadurlikhiteṣu ca |
N01.126c/ kartavyam anyal lekhyaṁ syād eṣa lekhyavidhiḥ smṛtaḥ || 126 ||
[Page 109 ] [Note: cf. J tr. 32 :: Chapter v. On Evidence by Witnesses ...] [Note: [ L tr. 73-95 :: cf. J tr. 32-45]
N01.127a/ sandigdheṣu tu kāryeṣu dvayor vivadamānayoḥ |
N01.127c/ dṛṣṭaśrutānubhūtatvāt sākṣibhyo vyaktidarśanam || 127 ||
N01.128a/ samakṣadarśanāt sākṣī vijñeyaḥ śrotracakṣuṣoḥ |
N01.128c/ śrotrasya yat paro brūte cakṣuṣaḥ kāyakarma yat || 128 ||
[Page 110 ]
N01.129a/ ekādaśavidhaḥ sākṣī sa tu dṛṣṭo manīṣibhiḥ |
N01.129c/ kṛtaḥ pañcavidhas teṣāṁ ṣaḍvidho 'kṛta ucyate || 129 ||
N01.130a/ likhitaḥ smāritaś caiva yadṛcchābhijña eva ca |
N01.130c/ gūḍhaś cottarasākṣī ca sākṣī pañcavidhaḥ smṛtaḥ || 130 ||
N01.131a/ akṛtaḥ ṣaḍvidhaś cāpi sūribhiḥ parikīrtitaḥ |
N01.131c/ grāmaś ca prāḍvivākaś ca rājā ca vyavahāriṇām || 131 ||
N01.132a/ kāryeṣv abhyantaro yaḥ syād arthinā prahitaś ca yaḥ |
N01.132c/ kulaṁ kulavivādeṣu bhaveyus te 'pi sākṣiṇaḥ || 132 ||
[Page 111 ]
N01.133a/ kulīnā ṛjavaḥ śuddhā janmataḥ karmato 'rthataḥ |
N01.133c/ tryavarāḥ sākṣiṇo 'nindyāḥ śucayaḥ syuḥ subuddhayaḥ || 133 ||
N01.134a/ brāhmaṇāḥ kṣatriyā vaiśyāḥ śūdrā ye cāpy aninditāḥ |
N01.134c/ prativarṇaṁ bhaveyus te sarve sarveṣu vā punaḥ || 134 ||
N01.135a/ śreṇīṣu śreṇipuruṣāḥ sveṣu vargeṣu vargiṇaḥ |
N01.135c/ bahirvāsiṣu bāhyāś ca striyaḥ striṣu ca sākṣiṇaḥ || 135 ||
[Page 112 ]
N01.136a/ śreṇyādiṣu tu vargeṣu kaścic ced dveṣyatām iyāt |
N01.136c/ tebhya eva na sākṣī syād dveṣṭāraḥ sarva eva te || 136 ||
N01.137a/ asākṣy api hi śāstreṣu dṛṣṭaḥ pañcavidho budhaiḥ |
N01.137c/ vacanād doṣato bhedāt svayamukter mṛtāntaraḥ || 137 ||
N01.138a/ śrotriyādyā vacanataḥ stenādyā doṣadarśanāt |
N01.138c/ bhedād vipratipattiḥ syād vivāde yatra sākṣiṇaḥ || 138 ||
N01.139a/ svayamukter anirdiṣṭaḥ svayam evaitya yo vadet |
N01.139c/ mṛtāntaro 'rthini prete mumūrṣuśrāvitād ṛte || 139 ||
N01.140a/ śrotriyās tāpasā vṛddhā ye ca pravrajitā narāḥ |
N01.140c/ asākṣiṇas te vacanān nātra hetur udāhṛtaḥ || 140 ||
N01.141a/ stenāḥ sāhasikāś caṇḍāḥ kitavā vadhakās tathā |
N01.141c/ asākṣiṇas te duṣṭatvāt teṣu satyaṁ na vidyate || 141 ||
[Page 113 ]
N01.142a/ rājñā parigṛhīteṣu sākṣiṣv ekārthaniścaye |
N01.142c/ vacanaṁ yatra bhidyate te syur bhedād asākṣiṇaḥ || 142 ||
N01.143a/ anirdiṣṭas tu sākṣitve svayam evaitya yo vadet |
N01.143c/ sūcīty uktaḥ sa śāstreṣu na sa sākṣitvam arhati || 143 ||
N01.144a/ yo 'rthaḥ śrāvayitavyaḥ syāt tasminn asati cārthini |
N01.144c/ kva tad vadatu sākṣitvam ity asākṣī mṛtāntaraḥ || 144 ||
N01.144-1a/ yo 'rthaḥ śrāvayitavyaḥ syāt tasminn asati cārthini |
N01.144-1c/ kva tad vadatu sākṣitvam ity asākṣī mṛtāntaraḥ || 144-1 ||
[Page 114 ]
N01.145a/ dvayor vivadator arthe dvayoḥ satsu ca sākṣiṣu |
N01.145c/ pūrvapakṣo bhaved yasya bhaveyus tasya sākṣiṇaḥ || 145 ||
[Page 115 ]
N01.146a/ ādharyaṁ pūrvapakṣasya yasminn arthe vaśād bhavet |
N01.146c/ praṣṭavyāḥ sākṣiṇas tatra vivāde prativādinaḥ || 146 ||
N01.147a/ na pareṇa samuddiṣṭam upeyāt sākṣiṇaṁ rahaḥ |
N01.147c/ bhedayet taṁ na cānyena hīyetaivaṁ samācaran || 147 ||
[Page 116 ]
N01.148a/ sākṣy uddiṣṭo yadi preyād gacched vāpi digantaram |
N01.148c/ tacchrotāraḥ pramāṇaṁ syuḥ pramāṇaṁ hy uttarakriyā || 148 ||
N01.149a/ sudīrgheṇāpi kālena likhitaṁ siddhim āpnuyāt |
N01.149c/ jānatā cātmanā lekhyaṁ ajānānas tu lekhayet || 149 ||
N01.150a/ siddhir uktāṣṭamād varṣāt smāritasyeha sākṣiṇaḥ |
N01.150c/ ā pañcamāt tathā siddhir yadṛcchopagatasya tu || 150 ||
[Page 117 ]
N01.151a/ ā tṛtīyāt tathā varṣāt siddhir gūḍhasya sākṣiṇaḥ |
N01.151c/ ā vai saṁvatsarāt siddhiṁ vadanty uttarasākṣiṇaḥ || 151 ||
N01.152a/ athavā kālaniyamo na dṛṣṭaḥ sākṣiṇaṁ prati |
N01.152c/ smṛtyapekṣaṁ hi sākṣitvam āhuḥ śāstravido janāḥ || 152 ||
N01.153a/ yasya nopahatā puṁsaḥ smṛtiḥ śrotraṁ ca nityaśaḥ |
N01.153c/ sudīrgheṇāpi kālena sa sākṣī sākṣyam arhati || 153 ||
N01.154a/ asākṣipratyayās tv anye ṣaḍvivādāḥ prakīrtitāḥ |
N01.154c/ lakṣaṇāny eva sākṣitvaṁ eṣām āhur manīṣiṇaḥ || 154 ||
[Page 118 ]
N01.155a/ ulkāhasto 'gnido jñeyaḥ śastrapāṇis tu ghātakaḥ |
N01.155c/ keśākeśigṛhītaś ca yugapat pāradārikaḥ || 155 ||
N01.156a/ kuddālapāṇir vijñeyaḥ setubhettā samīpagaḥ |
N01.156c/ tathā kuṭhārapāṇiś ca vanachettā prakīrtitaḥ || 156 ||
N01.157a/ abhyagracihno vijñeyo daṇḍapāruṣyakṛn naraḥ |
N01.157c/ asākṣipratyayā hy ete pāruṣye tu parīkṣaṇam || 157 ||
N01.158a/ kaścit kṛtvātmanaś cihnaṁ dveṣāt param upadravet |
N01.158c/ hetvarthagatisāmarthyais tatra yuktaṁ parīkṣaṇam || 158 ||
N01.159a/ nārthasambandhino nāptā na sahāyā na vairiṇaḥ |
N01.159c/ na dṛṣṭadoṣāḥ praṣṭavyāś na vyādhyārtā na dūṣitāḥ || 159 ||
[Page 119 ]
N01.160a/ dāsanaikṛtikāśraddhavṛddhastrībālacākrikāḥ |
N01.160c/ mattonmattapramattārtakitavagrāmayājakāḥ || 160 ||
N01.161a/ mahāpathikasāmudravaṇikpravrajitāturāḥ |
N01.161c/ lubdhakaśrotriyācārahīnaklībakuśīlavāḥ || 161 ||
N01.162a/ nāstikavrātyadārāgnityāgino 'yājyayājakāḥ |
N01.162c/ ekasthālīsahāyāricarajñātisanābhayaḥ || 162 ||
[Page 120 ]
N01.163a/ prāgdṛṣṭadoṣaśailūṣaviṣajīvyahituṇḍikāḥ |
N01.163c/ garadāgnidakīnāśaśūdrāputropapātikāḥ || a 163 ||
N01.164a/ klāntasāhasikaśrāntanirdhanāntyāvasāyinaḥ |
N01.164c/ bhinnavṛttāsamāvṛttajaḍatailikamūlikāḥ || 164 ||
N01.165a/ bhūtāviṣṭanṛpadviṣṭavarṣanakṣatrasūcakāḥ |
N01.165c/ aghaśaṁsyātmavikretṛhīnāṅgabhagavṛttayaḥ || 165 ||
[Page 121 ]
N01.166a/ kunakhī śyāvadan śvitrimitradhrukśaṭhaśauṇḍikāḥ |
N01.166c/ aindrajālikalubdhograśreṇīgaṇavirodhinaḥ || 166 ||
N01.167a/ vadhakṛccitrakṛnmaṅkhaḥ patitaḥ kūṭakārakaḥ |
N01.167c/ kuhakaḥ pratyavasitas taskaro rājapūruṣaḥ | 167
N01.168a/ manuṣyaviṣaśastrāmbulavaṇāpūpavīrudhām |
N01.168c/ vikretā brāhmaṇaś caiva dvijo vārdhuṣikaś ca yaḥ || 168 ||
N01.169a/ cyutaḥ svadharmāt kulikaḥ stāvako hīnasevakaḥ |
N01.169c/ pitrā vivadamānaś ca bhedakṛc cety asākṣiṇaḥ || 169 ||
N01.170a/ asākṣiṇo ye nirdiṣṭā dāsanaikṛtikādayaḥ |
N01.170c/ kāryagauravam āsādya bhaveyus te 'pi sākṣiṇaḥ || 170 ||
[Page 122 ]
N01.171a/ sāhaseṣu ca sarveṣu steyasaṅgrahaṇeṣu ca |
N01.171c/ pāruṣyayoś cāpy ubhayor na parīkṣeta sākṣiṇaḥ || 171 ||
N01.172a/ teṣām api na bālaḥ syān naiko na strī na kūṭakṛt |
N01.172c/ na bāndhavo na cārātir brūyus te sākṣyam anyathā || 172 ||
N01.173a/ bālo 'jñānād asatyāt strī pāpābhyāsāc ca kūṭakṛt |
N01.173c/ vibrūyād bāndhavaḥ snehād vairaniryātanād ariḥ || 173 ||
N01.174a/ athavānumato yaḥ syād dvayor vivadamānayoḥ |
N01.174c/ asākṣy eko 'pi sākṣitve praṣṭavyaḥ syāt sa saṁsadi || 174 ||
N01.175a/ yas tv ātmadoṣabhinnatvād asvastha iva lakṣyate |
N01.175c/ sthānāt sthānāntaraṁ gacched ekaikaṁ copadhāvati || 175 ||
N01.176a/ kāsate 'nibhṛto 'kasmād abhīkṣṇaṁ niśvasaty api |
N01.176c/ bhūmiṁ likhati pādābhyāṁ bāhu vāso dhunoti ca || 176 ||
[Page 123 ]
N01.177a/ bhidyate mukhavarṇo 'sya lalāṭaṁ svidyate tathā |
N01.177c/ śoṣam āgacchataś coṣṭhāv ūrdhvaṁ tiryak ca vīkṣate || 177 ||
N01.178a/ tvaramāṇa ivābaddham apṛṣṭo bahu bhāṣate |
N01.178c/ kūṭasākṣī sa vijñeyas taṁ pāpaṁ vinayen nṛpaḥ || 178 ||
N01.179a/ śrāvayitvā ca yo 'nyebhyaḥ sākṣitvaṁ tad vinihnute |
N01.179c/ sa vineyo bhṛśataraṁ kūṭasākṣyadhiko hi saḥ || 179 ||
N01.180a/ āhūya sākṣiṇaḥ pṛcchen niyamya śapathair bhṛśam |
N01.180c/ samastān viditācārān vijñātārthān pṛthak pṛthak || 180 ||
[Page 124 ]
N01.181a/ satyena śāpayed vipraṁ kṣatriyaṁ vāhanāyudhaiḥ |
N01.181c/ gobījakāñcanair vaiśyaṁ śūdraṁ sarvais tu pātakaiḥ || 181 ||
N01.182a/ purāṇair dharmavacanaiḥ satyamāhātmyakīrtanaiḥ |
N01.182c/ anṛtasyāpavādaiś ca bhṛśam uttrāsya sākṣiṇaḥ || 182 ||
N01.183a/ nagno muṇḍaḥ kapālena bhikṣārthī kṣutpipāsitaḥ |
N01.183c/ dīnaḥ śatrugṛhaṁ gacched yaḥ sākṣyam anṛtaṁ vadet || 183 ||
N01.184a/ nagare pratiruddhaḥ san bahirdvāre bubhukṣitaḥ |
N01.184c/ amitrān bhūyaśaḥ paśyed yaḥ sākṣyam anṛtaṁ vadet || 184 ||
[Page 125 ]
N01.185a/ yāṁ rātrim adhivinnā strī yāṁ caivākṣaparājitaḥ |
N01.185c/ yāṁ ca bhārābhitaptāṅgo durvivaktā sa tāṁ vaset || 185 ||
N01.186a/ sākṣī sākṣyasamuddeśe gokarṇaśithilaṁ caran |
N01.186c/ sahasraṁ vāruṇān pāśān ātmani pratimuñcati || 186 ||
N01.187a/ tasya varṣaśate pūrṇe pāśam ekaṁ pramucyate |
N01.187c/ evaṁ sa bandhanāt tasmān mucyate niyutāḥ samāḥ || 187 ||
N01.188a/ yāvato bāndhavāṁs yasmin hanti sākṣye 'nṛtaṁ vadan |
N01.188c/ tāvataḥ saṅkhyayā tasmin śṛṇu saumyānupūrvaśaḥ || 188 ||
N01.189a/ pañca paśvanṛte hanti daśa hanti gavānṛte |
N01.189c/ śatam aśvānṛte hanti sahasraṁ puruṣānṛte || 189 ||
N01.190a/ hanti jātān ajātāṁś ca hiraṇyārthe 'nṛtaṁ vadan |
N01.190c/ sarvaṁ bhūmyanṛte hanti mā sma bhūmyanṛtaṁ vadīḥ || 190 ||
[Page 126 ]
N01.191a/ ekam evādvitīyaṁ tat prāhuḥ pāvanam ātmanaḥ |
N01.191c/ satyaṁ svargasya sopānaṁ pārāvārasya naur iva || 191 ||
N01.192a/ aśvamedhasahasraṁ ca satyaṁ ca tulayā dhṛtam |
N01.192c/ aśvamedhasahasrād dhi satyam eva viśiṣyate || 192 ||
N01.193a/ varaṁ kūpaśatād vāpi varaṁ vāpīśatāt kratuḥ |
N01.193c/ varaṁ kratuśatāt putraḥ satyaṁ putraśatād varam || 193 ||
N01.194a/ bhūr dhārayati satyena satyenodeti bhāskaraḥ |
N01.194c/ satyena vāyuḥ pavate satyenāpaḥ sravanti ca || 194 ||
N01.195a/ satyam eva paraṁ dānaṁ satyam eva paraṁ tapaḥ |
N01.195c/ satyam eva paro dharmo lokānām iti naḥ śrutam || 195 ||
N01.196a/ satyaṁ devāḥ samāsena manuṣyās tv anṛtaṁ smṛtam |
N01.196c/ ihaiva tasya devatvaṁ yasya satye sthitā matiḥ || 196 ||
N01.197a/ satyaṁ brūhy anṛtaṁ tyaktvā satyena svargam eṣyasi |
N01.197c/ uktvānṛtaṁ mahāghoraṁ narakaṁ pratipatsyate || 197 ||
N01.198a/ nirayeṣu ca te śaśvaj jihvām utkṛtya dāruṇāḥ |
N01.198c/ asibhiḥ śātayiṣyanti balino yamakiṅkarāḥ || 198 ||
[Page 127 ]
N01.199a/ śūlair bhetsyanti cākruddhāḥ krośantam aparāyaṇam |
N01.199c/ avākśirasam utkṣipya kṣepsyanty agnihradeṣu ca || 199 ||
N01.200a/ anubhūya ca duḥkhās tāś ciraṁ narakavedanāḥ |
N01.200c/ iha yāsyasy abhavyāsu gṛdhrakākādiyoniṣu || 200 ||
N01.201a/ jñātvaitān anṛte doṣāñ jñātvā satye ca sadguṇān |
N01.201c/ satyaṁ vadoddharātmānaṁ mātmānaṁ pātayiṣyasi || 201 ||
N01.202a/ na bāndhavā na suhṛdo na dhanāni mahānty api |
N01.202c/ alaṁ tārayituṁ śaktās tamasy ugre nimajjataḥ || 202 ||
N01.203a/ pitaras tv avalambante tvayi sākṣitvam āgate |
N01.203c/ tārayiṣyati kiṁvāsmān ātmānaṁ pātayiṣyati || 203 ||
N01.204a/ satyam ātmā manuṣyasya satye sarvaṁ pratiṣṭhitam |
N01.204c/ sarvathaivātmanātmānaṁ śreyasā yojayiṣyasi || 204 ||
[Page 128 ]
N01.205a/ yāṁ ca rātrim ajaniṣṭhā yāṁ rātriṁ ca mariṣyasi |
N01.205c/ vṛthā tadantaraṁ te syāt kuryāś cet satyam anyathā || 205 ||
N01.206a/ nāsti satyāt paro dharmo nānṛtāt pātakaṁ param |
N01.206c/ sākṣidharme viśeṣeṇa satyam eva vadet tataḥ || 206 ||
N01.207a/ yaḥ parārthe praharati svāṁ vācaṁ puruṣādhamaḥ |
N01.207c/ ātmārthe kiṁ na kuryāt sa pāpo narakanirbhayaḥ || 207 ||
N01.208a/ arthā vai vāci niyatā vāṅmūlā vāgviniḥsṛtāḥ |
N01.208c/ yo hy etāṁ stenayed vācaṁ sa sarvasteyakṛn naraḥ || 208 ||
[Page 129 ]
N01.209a/ sākṣivipratipattau tu pramāṇaṁ bahavo yataḥ |
N01.209c/ tatsāmye śucayo grāhyās tatsāmye smṛtimattarāḥ || 209 ||
N01.210a/ smṛtimatsākṣisāmyaṁ tu vivāde yatra dṛśyate |
N01.210c/ sūkṣmatvāt sākṣidharmasya sākṣyaṁ vyāvartate punaḥ || 210 ||
N01.211a/ nirdiṣṭeṣv arthajāteṣu sākṣī cet sākṣyam āgataḥ |
N01.211c/ na brūyād akṣarasamaṁ na tan nigaditaṁ bhavet || 211 ||
N01.212a/ deśakālavayodravyapramāṇākṛtijātiṣu |
N01.212c/ yatra vipratipattiḥ syāt sākṣyaṁ tad asad ucyate || 212 ||
[Page 130 ]
N01.213a/ ūnam abhyadhikaṁ cārthaṁ prabrūyur yatra sākṣiṇaḥ |
N01.213c/ tad apy anuktaṁ vijñeyam eṣa sākṣyavidhiḥ smṛtaḥ || 213 ||
[Page 131 ]
N01.214a/ pramādād dhanino yatra na syāl lekhyaṁ na sākṣiṇaḥ |
N01.214c/ arthaṁ cāpahnuyād vādī tatroktas trividho vidhiḥ || 214 ||
N01.215a/ codanā pratikālaṁ ca yuktileśas tathaiva ca |
N01.215c/ tṛtīyaḥ śapathaś coktas tair evaṁ sādhayet kramāt || 215 ||
N01.216a/ abhīkṣṇaṁ codyamāno yaḥ pratihanyān na tadvacaḥ |
N01.216c/ tricatuḥpañcakṛtvo vā parato 'rthaṁ tam āvahet || 216 ||
N01.217a/ codanāpratighāte tu yuktileśais tam anviyāt |
N01.217c/ deśakālārthasambandhaparimāṇakriyādibhiḥ || 217 ||
[Page 132 ]
N01.218a/ yuktiṣv apy asamarthāsu śapathair enam ardayet |
N01.218c/ arthakālabalāpekṣam agnyambusukṛtādibhiḥ || 218 ||
N01.219a/ dīptāgnir yaṁ na dahati yam antardhārayanty āpaḥ |
N01.219c/ sa taraty abhiśāpaṁ taṁ kilbiṣī syād viparyaye || 219 ||
[Page 133 ]
N01.220a/ strīṇāṁ śīlābhiyogeṣu steyasāhasayor api |
N01.220c/ eṣa eva vidhir dṛṣṭaḥ sarvārthāpahnaveṣu ca || 220 ||
N01.221a/ śapathā hy api devānām ṛṣīṇām api ca smṛtāḥ |
N01.221c/ vasiṣṭhaḥ śapathaṁ śepe yātudhāne tu śaṅkitaḥ || 221 ||
N01.222a/ saptarṣayas tathendrāya puṣkarārthe samāgatāḥ |
N01.222c/ śepuḥ śapatham avyagrāḥ parasparaviśuddhaye || 222 ||
[Page 134 ]
N01.223a/ ayuktaṁ sāhasaṁ kṛtvā pratyāpattiṁ bhajeta yaḥ |
N01.223c/ brūyāt svayaṁ vā sadasi tasyārdhavinayaḥ smṛtaḥ || 223 ||
N01.224a/ gūhamānas tu daurātmyād yadi pāpaṁ sa jīyate |
N01.224c/ sabhyāś cātra na tuṣyanti tīvro daṇḍaś ca pātyate || 224 ||

2.2. Chapter 2 :: Nikṣipaḥ (Deposits)

[Page 135 ] [Note: [ L tr. 96-99 :: cf. J tr. 55-56]
N02.001a/ svadravyaṁ yatra viśrambhān nikṣipaty aviśaṅkitaḥ |
N02.001c/ nikṣepo nāma tat proktaṁ vyavahārapadaṁ budhaiḥ || 1 ||
[Page 136 ]
N02.002a/ anyadravyavyavahitaṁ dravyam avyākṛtaṁ ca yat |
N02.002c/ nikṣipyate paragṛhe tad aupanidhikaṁ smṛtam || 2 ||
N02.003a/ sa punar dvividhaḥ proktaḥ sākṣimān itaras tathā |
N02.003c/ pratidānaṁ tathaivāsya pratyayaḥ syād viparyaye || 3 ||
N02.004a/ yācyamānas tu yo dātrā nikṣepaṁ na prayacchati |
N02.004c/ daṇḍyaḥ sa rājñā dāpyaś ca naṣṭe dāpyaś ca tatsamam || 4 ||
[Page 137 ]
N02.005a/ yaś cārthaṁ sādhayet tena nikṣeptur ananujñayā |
N02.005c/ tatrāpi daṇḍyaḥ sa bhavet tac ca sodayam āvahet || 5 ||
N02.006a/ grahītuḥ saha yo 'rthena naṣṭo naṣṭaḥ sa dāyinaḥ |
N02.006c/ daivarājakṛte tadvan na cet taj jihmakāritam || 6 ||
[Page 138 ]
N02.007a/ eṣa eva vidhir dṛṣṭo yācitānvāhitādiṣu |
N02.007c/ śilpiṣūpanidhau nyāse pratinyāse tathaiva ca || 7 ||
[Page 139 ]
N02.008a/ pratigṛhṇāti pogaṇḍaṁ yaś ca sapradhanaṁ naraḥ |
N02.008c/ tasyāpy eṣa bhaved dharmaḥ ṣaḍ ete vidhayaḥ samāḥ || 8 ||

2.3. Chapter 3 :: Sambhūyasamutthānam (Breach of Contract for Service)

[Page 140 ] [Note: [ L tr. 100-103 :: cf. J tr. 57-59]
N03.001a/ vaṇikprabhṛtayo yatra karma sambhūya kurvate |
N03.001c/ tat sambhūyasamutthānaṁ vyavahārapadaṁ smṛtam || 1 ||
N03.002a/ phalahetor upāyena karma sambhūya kurvatām |
N03.002c/ ādhārabhūtaḥ prakṣepas tenottiṣṭheyur aṁśataḥ || 2 ||
N03.003a/ samo 'tirikto hīno vā yatrāṁśo yasya yādṛśaḥ |
N03.003c/ kṣayavyayau tathā vṛddhis tasya tatra tathāvidhāḥ || 3 ||
N03.004a/ bhāṇḍapiṇḍavyayoddhārabhārasārānvavekṣaṇam |
N03.004c/ kuryus te 'vyabhicāreṇa samaye sve vyavasthitāḥ || 4 ||
[Page 141 ]
N03.005a/ pramādān nāśitaṁ dāpyaḥ pratiṣiddhakṛtaṁ ca yat |
N03.005c/ asandiṣṭaś ca yat kuryāt sarvaiḥ sambhūyakāribhiḥ || 5 ||
N03.006a/ daivataskararājotthe vyasane samupasthite |
N03.006c/ yas tat svaśaktyā saṁrakṣet tasyāṁśo daśamaḥ smṛtaḥ || 6 ||
N03.007a/ ekasya cet syād vyasanaṁ dāyādo 'sya tad āpnuyāt |
N03.007c/ anyo vāsati dāyāde śaktāś cet sarva eva vā || 7 ||
N03.008a/ ṛtvijāṁ vyasane 'py evam anyas tat karma nistaret |
N03.008c/ labheta dakṣiṇābhāgaṁ sa tasmāt samprakalpitam || 8 ||
[Page 142 ]
N03.009a/ ṛtvig yājyam aduṣṭaṁ yas tyajed anapakāriṇam |
N03.009c/ aduṣṭaṁ va rtvijaṁ yājyo vineyau tāv ubhāv api || 9 ||
N03.010a/ ṛtvik tu trividho dṛṣṭaḥ pūrvajuṣṭaḥ svayaṅkṛtaḥ |
N03.010c/ yadṛcchayā ca yaḥ kuryād ārtvijyaṁ prītipūrvakam || 10 ||
N03.011a/ kramāgateṣv eṣa dharmo vṛteṣv ṛtvikṣu ca svayam |
N03.011c/ yādṛcchike tu saṁyājye tattyāge nāsti kilbiṣam || 11 ||
[Page 143 ]
N03.012a/ śulkasthānaṁ vaṇik prāptaḥ śulkaṁ dadyād yathopagam |
N03.012c/ na tad vyatihared rājñāṁ balir eṣa prakalpitaḥ || 12 ||
N03.013a/ śulkasthānaṁ pariharan na kāle krayavikrayī |
N03.013c/ mithyoktvā ca parīmāṇaṁ dāpyo 'ṣṭaguṇam atyayam || 13 ||
N03.014a/ kaścic cet sañcaran deśāt preyād abhyāgato vaṇik |
N03.014c/ rājāsya bhāṇḍaṁ tad rakṣet yāvad dāyādadarśanam || 14 ||
N03.015a/ dāyāde 'sati bandhubhyo jñātibhyo vā tad arpayet |
N03.015c/ tadabhāve suguptaṁ tad dhārayed daśatīḥ samāḥ || 15 ||
[Page 144 ]
N03.016a/ asvāmikam adāyādaṁ daśavarṣasthitaṁ tataḥ |
N03.016c/ rājā tad ātmasāt kuryād evaṁ dharmo na hīyate || 16 ||

2.4. Chapter 4 :: Dattāpradānikam (Resumption of Gifts)

[Page 145 ] [Note: [ L tr. 104-106 :: cf. J tr. 59-60]
N04.001a/ dattvā dravyam asamyag yaḥ punar ādātum icchati |
N04.001c/ dattāpradānikaṁ nāma tad vivādapadaṁ smṛtam || 1 ||
N04.002a/ adeyam atha deyaṁ ca dattaṁ cādattam eva ca |
N04.002c/ vyavahāreṣu vijñeyo dānamārgaś caturvidhaḥ || 2 ||
N04.003a/ tatra hyaṣṭāv adeyāni deyam ekavidhaṁ smṛtam |
N04.003c/ dattaṁ saptavidhaṁ vidyād adattaṁ ṣoḍaśātmakam || 3 ||
N04.004a/ anvāhitaṁ yācitakam ādhiḥ sādhāraṇaṁ ca yat |
N04.004c/ nikṣepaḥ putradāraṁ ca sarvasvaṁ cānvaye sati || 4 ||
[Page 146 ]
N04.005a/ āpatsv api hi kaṣṭāsu vartamānena dehinā |
N04.005c/ adeyāny āhur ācāryā yac cānyasmai pratiśrutam || 5 ||
N04.006a/ kuṭumbabharaṇād dravyaṁ yatkiñcid atiricyate |
N04.006c/ tad deyam upahṛtyānyad dadad doṣam avāpnuyāt || 6 ||
N04.007a/ paṇyamūlyaṁ bhṛtis tuṣṭyā snehāt pratyupakārataḥ |
N04.007c/ strīśulkānugrahārthaṁ ca dattaṁ dānavido viduḥ || 7 ||
[Page 147 ]
N04.008a/ adattaṁ tu bhayakrodhaśokavegarujānvitaiḥ |
N04.008c/ tathotkocaparīhāsavyatyāsacchalayogataḥ || 8 ||
N04.009a/ bālamūḍhāsvatantrārtamattonmattāpavarjitam |
N04.009c/ kartā mamāyaṁ karmeti pratilābhecchayā ca yat || 9 ||
N04.010a/ apātre pātram ity ukte kārye cādharmasaṁhite |
N04.010c/ yad dattaṁ syād avijñānād adattaṁ tad api smṛtam || 10 ||
[Page 148 ]
N04.011a/ gṛhṇāty adattaṁ yo lobhād yaś cādeyaṁ prayacchati |
N04.011c/ adattādāyako daṇḍyas tathādeyasya dāyakaḥ || 11 ||

2.5. Chapter 5 :: Abhyupetyāśuśrūṣā (Breach of Contract for Service)

[Page 149 ] [Note: [ L tr. 107-115 :: cf. J tr. 61-65]
N05.001a/ abhyupetya tu śuśrūṣāṁ yas tāṁ na pratipadyate |
N05.001c/ aśuśrūṣābhyupetyaitad vivādapadam ucyate || 1 ||
N05.002a/ śuśrūṣakaḥ pañcavidhaḥ śāstre dṛṣṭo manīṣibhiḥ |
N05.002c/ caturvidhaḥ karmakaras teṣāṁ dāsās tripañcakāḥ || 2 ||
N05.003a/ śiṣyāntevāsibhṛtakāś caturthas tv adhikarmakṛt |
N05.003c/ ete karmakarāḥ proktā dāsās tu gṛhajādayaḥ || 3 ||
[Page 150 ]
N05.004a/ sāmānyam asvatantratvam eṣām āhur manīṣiṇaḥ |
N05.004c/ jātikarmakṛtas tūkto viśeṣo vṛttir eva ca || 4 ||
N05.005a/ karmāpi dvividhaṁ jñeyam aśubhaṁ śubham eva ca |
N05.005c/ aśubhaṁ dāsakarmoktaṁ śubhaṁ karmakṛtāṁ smṛtam || 5 ||
N05.006a/ gṛhadvārāśucisthānarathyāvaskaraśodhanam |
N05.006c/ guhyāṅgasparśanocchiṣṭaviṇmūtragrahaṇojjhanam || 6 ||
N05.007a/ iṣṭataḥ svāminaś cāṅgair upasthānam athāntataḥ |
N05.007c/ aśubhaṁ karma vijñeyaṁ śubham anyad ataḥ param || 7 ||
N05.008a/ ā vidyāgrahaṇāc chiṣyaḥ śuśrūṣet prayato gurum |
N05.008c/ tadvṛttir gurudāreṣu guruputre tathaiva ca || 8 ||
N05.009a/ brahmacārī cared bhaikṣam adhaḥśāyy analaṅkṛtaḥ |
N05.009c/ jaghanyaśāyī sarveṣāṁ pūrvotthāyī guror gṛhe || 9 ||
[Page 151 ]
N05.010a/ nāsandiṣṭaḥ pratiṣṭheta tiṣṭhed vāpi guruṁ kvacit |
N05.010c/ sandiṣṭaḥ karma kurvīta śaktaś ced avicārayan || 10 ||
N05.011a/ yathākālam adhīyīta yāvan na vimanā guruḥ |
N05.011c/ āsīno 'dho guroḥ kūrce phalake vā samāhitaḥ || 11 ||
N05.012a/ anuśāsyaś ca guruṇā na ced anuvidhīyate |
N05.012c/ avadhenāthavā hanyāt rajjvā veṇudalena vā || 12 ||
N05.013a/ bhṛśaṁ na tāḍayed enaṁ nottamāṅge na vakṣasi |
N05.013c/ anuśāsyātha viśvāsyaḥ śāsyo rājñānyathā guruḥ || 13 ||
[Page 152 ]
N05.014a/ samāvṛttaś ca gurave pradāya gurudakṣiṇām |
N05.014c/ pratīyāt svagṛhān eṣā śiṣyavṛttir udāhṛtā || 14 ||
N05.015a/ svaśilpam icchann āhartuṁ bāndhavānām anujñayā |
N05.015c/ ācāryasya vased ante kālaṁ kṛtvā suniścitam || 15 ||
N05.016a/ ācāryaḥ śikṣayed enaṁ svagṛhād dattabhojanam |
N05.016c/ na cānyat kārayet karma putravac cainam ācaret || 16 ||
N05.017a/ śikṣayantam aduṣṭaṁ ca yas tv ācāryaṁ parityajet |
N05.017c/ balād vāsayitavyaḥ syād vadhabandhau ca so 'rhati || 17 ||
[Page 153 ]
N05.018a/ śikṣito 'pi kṛtaṁ kālam antevāsī samāpnuyāt |
N05.018c/ tatra karma ca yat kuryād ācāryasyaiva tatphalam || 18 ||
[Page 154 ]
N05.019a/ gṛhītaśilpaḥ samaye kṛtvācāryaṁ pradakṣiṇam |
N05.019c/ śaktitaś cānumānyainam antevāsī nivartayet || 19 ||
N05.020a/ bhṛtakas trividho jñeya uttamo madhyamo 'dhamaḥ |
N05.020c/ śaktibhaktyanurūpā syād eṣāṁ karmāśrayā bhṛtiḥ || 20 ||
N05.021a/ uttamas tv āyudhīyo 'tra madhyamas tu kṛṣīvalaḥ |
N05.021c/ adhamo bhāravāhaḥ syād ity evaṁ trividho bhṛtaḥ || 21 ||
N05.022a/ artheṣv adhikṛto yaḥ syāt kuṭumbasya tathopari |
N05.022c/ so 'dhikarmakaro jñeyaḥ sa ca kauṭumbikaḥ smṛtaḥ || 22 ||
N05.023a/ śubhakarmakarās tv ete catvāraḥ samudāhṛtāḥ |
N05.023c/ jaghanyakarmabhājas tu śeṣā dāsās tripañcakāḥ || 23 ||
[Page 155 ]
N05.024a/ gṛhajātas tathā krīto labdho dāyād upāgataḥ |
N05.024c/ anākālabhṛtas tadvad ādhattaḥ svāminā ca yaḥ || 24 ||
N05.025a/ mokṣito mahataś carṇāt prāpto yuddhāt paṇe jitaḥ |
N05.025c/ tavāham ity upagataḥ pravrajyāvasitaḥ kṛtaḥ || 25 ||
N05.026a/ bhaktadāsaś ca vijñeyas tathaiva vaḍavābhṛtaḥ |
N05.026c/ vikretā cātmanaḥ śāstre dāsāḥ pañcadaśā smṛtāḥ || 26 ||
N05.027a/ tatra pūrvaś caturvargo dāsatvān na vimucyate |
N05.027c/ prasādād svāmino 'nyatra dāsyam eṣāṁ kramāgatam || 27 ||
N05.028a/ yaś caiṣāṁ svāminaṁ kaścin mokṣayet prāṇasaṁśayāt |
N05.028c/ dāsatvāt sa vimucyeta putrabhāgaṁ labheta ca || 28 ||
N05.029a/ anākālabhṛto dāsyān mucyate goyugaṁ dadat |
N05.029c/ sambhakṣitaṁ yad durbhikṣe na tac chudhyeta karmaṇā || 29 ||
N05.030a/ ādhatto 'pi dhanaṁ dattvā svāmī yady enam uddharet |
N05.030c/ athopagamayed enaṁ sa vikrītād anantaraḥ || 30 ||
N05.031a/ dattvā tu sodayam ṛṇaṁ ṛṇī dāsyāt pramucyate |
N05.031c/ kṛtakālābhyupagamāt kṛtako 'pi vimucyate || 31 ||
[Page 156 ]
N05.032a/ tavāham ity upagato yuddhaprāptaḥ paṇe jitaḥ |
N05.032c/ pratiśīrṣapradānena mucyate tulyakarmaṇā || 32 ||
N05.033a/ rājña eva tu dāsaḥ syāt pravrajyāvasito naraḥ |
N05.033c/ na tasya pratimokṣo 'sti na viśuddhiḥ kathañcana || 33 ||
N05.034a/ bhaktasyopekṣaṇāt sadyo bhaktadāsaḥ pramucyate |
N05.034c/ nigrahād vaḍavāyāś ca mucyate vaḍavābhṛtaḥ || 34 ||
N05.035a/ vikrīṇīte ya ātmānaṁ svatantraḥ san narādhamaḥ |
N05.035c/ sa jaghanyataras teṣāṁ naiva dāsyāt pramucyate || 35 ||
N05.036a/ caurāpahṛtavikrītā ye ca dāsīkṛtā balāt |
N05.036c/ rājñā mokṣayitavyās te dāsatvaṁ teṣu neṣyate || 36 ||
N05.037a/ varṇānāṁ prātilomyena dāsatvaṁ na vidhīyate |
N05.037c/ svadharmatyāgino 'nyatra dāravad dāsatā matā || 37 ||
N05.038a/ tavāham iti cātmānaṁ yo 'svatantraḥ prayacchati |
N05.038c/ na sa taṁ prāpnuyāt kāmaṁ pūrvasvāmī labheta tam || 38 ||
N05.039a/ adhanās traya evoktā bhāryā dāsas tathā sutaḥ |
N05.039c/ yat te samadhigacchanti yasya te tasya tad dhanam || 39 ||
N05.040a/ svadāsam icched yaḥ kartum adāsaṁ prītamānasaḥ |
N05.040c/ skandhād ādāya tasyāpi bhindyāt kumbhaṁ sahāmbhasā || 40 ||
[Page 157 ]
N05.041a/ akṣatābhiḥ sapuṣpābhir mūrdhany enam avākiret |
N05.041c/ adāsa iti coktvā triḥ prāṅmukhaṁ tam athotsṛjet || 41 ||
N05.042a/ tataḥprabhṛti vaktavyaḥ svāmyanugrahapālitaḥ |
N05.042c/ bhojyānnaḥ pratigṛhyaś ca bhavaty abhimataś ca saḥ || 42 ||

2.6. Chapter 6 :: Vetanasyānapākarma (Nonpayment of Wages)

[Page 158 ] [Note: [ L tr. 116-121 :: cf. J tr. 66-68]
N06.001a/ bhṛtānāṁ vetanasyokto dānādānavidhikramaḥ |
N06.001c/ vetanasyānapākarma tad vivādapadaṁ smṛtam || 1 ||
N06.002a/ bhṛtāya vetanaṁ dadyāt karmasvāmī yathākramam |
N06.002c/ ādau madhye 'vasāne vā karmaṇo yad viniścitam || 2 ||
N06.003a/ bhṛtāvaniścitāyāṁ tu daśabhāgaṁ samāpnuyuḥ |
N06.003c/ lābhagobījasasyānāṁ vaṇiggopakṛṣībalāḥ || 3 ||
N06.004a/ karmopakaraṇaṁ caiṣāṁ kriyāṁ prati yad āhṛtam |
N06.004c/ āptabhāvena kurvīta na jihmena samācaret || 4 ||
N06.005a/ karmākurvan pratiśrutya kāryo dattvā bhṛtiṁ balāt |
N06.005c/ bhṛtiṁ gṛhītvākurvāṇo dviguṇāṁ bhṛtim āvahet || 5 ||
N06.006a/ kāle 'pūrṇe tyajet karma bhṛtināśo 'sya cārhati |
N06.006c/ svāmidoṣād apākrāman yāvat kṛtam avāpnuyāt || 6 ||
N06.007a/ bhṛtiṣaḍbhāgam ābhāṣya pathi yugyakṛtaṁ tyajan |
N06.007c/ adadat kārayitvā tu karmaivaṁ sodayāṁ bhṛtim || 7 ||
[Page 159 ]
N06.008a/ anayan bhāṭayitvā tu bhāṇḍavān yānavāhane |
N06.008c/ dāpyo bhṛticaturbhāgaṁ samam ardhapathe tyajan || 8 ||
N06.009a/ anayan vāhako 'py evaṁ bhṛtihānim avāpnuyāt |
N06.009c/ dviguṇāṁ tu bhṛtiṁ dāpyaḥ prasthāne vighnam ācaran || 9 ||
N06.010a/ bhāṇḍaṁ vyasanam āgacched yadi vāhakadoṣataḥ |
N06.010c/ dāpyo yat tatra naṣṭaṁ syād daivarājakṛtād ṛte || 10 ||
N06.011a/ gavāṁ śatād vatsatarī dhenuḥ syād dviśatād bhṛtiḥ |
N06.011c/ prati samvatsaraṁ gope sadohaś cāṣṭame 'hani || 11 ||
N06.012a/ upānayet gā gopāya pratyahaṁ rajanīkṣaye |
N06.012c/ cīṛṇāḥ pītāś ca tā gopaḥ sāyāhne pratyupānayet || 12 ||
N06.013a/ syāc ced govyasanaṁ gopo vyāyacchet tatra śaktitaḥ |
N06.013c/ aśaktas tūrṇam āgamya svāmine tan nivedayet || 13 ||
N06.014a/ avyāyac channavikrośan svāmine cānivedayan |
N06.014c/ voḍhum arhati gopas tāṁ vinayaṁ cāpi rājani || 14 ||
N06.015a/ naṣṭavinaṣṭaṁ kṛmibhiḥ śvahataṁ viṣame mṛtam |
N06.015c/ hīnaṁ puruṣakāreṇa gopāyaiva nipātayet || 15 ||
N06.016a/ ajāvike tathāruddhe vṛkaiḥ pāle tv anāyati |
N06.016c/ yat prasahya vṛko hanyāt pāle tatkilbiṣam bhavet || 16 ||
[Page 160 ]
N06.017a/ tāsāṁ caivāniruddhānāṁ carantīnāṁ mitho vane |
N06.017c/ yām utpatya vṛko hanyān na pālas tatra kilbiṣī || 17 ||
N06.018a/ vighuṣya tu hṛtaṁ caurair na pālo dātum arhati |
N06.018c/ yadi deśe ca kāle ca svāminaḥ svasya śaṁsati || 18 ||
N06.019a/ etena sarvapālānāṁ vivādaḥ samudāhṛtaḥ |
N06.019c/ mṛteṣu ca viśuddhiḥ syāt pālasyāṅkādidarśanāt || 19 ||
N06.020a/ śulkaṁ gṛhītvā paṇyastrī necchantī dvis tad āvahet |
N06.020c/ aprayacchaṁs tadā śulkam anubhūya pumān striyam || 20 ||
N06.021a/ ayonau kramate yas tu bahubhir vāpi vāsayet |
N06.021c/ śulkam aṣṭaguṇaṁ dāpyo vinayas tāvad eva ca || 21 ||
N06.022a/ parājire gṛhaṁ kṛtvā stomaṁ dattvā vaset tu yaḥ |
N06.022c/ sa tad gṛhītvā nirgacchet tṛṇakāṣṭheṣṭakādikam || 22 ||
N06.023a/ stomavāhīni bhāṇḍāni pūrṇakālāny upānayet |
N06.023c/ grahītur ābhaved bhagnaṁ naṣṭaṁ cānyatra samplavāt || 23 ||

2.7. Chapter 7 :: Asvāmivikrayaḥ (Sale without Ownership)

[Page 161 ] [Note: [ L tr. 122-123 :: cf. J tr. 69-70]
N07.001a/ nikṣiptaṁ vā paradravyaṁ naṣṭaṁ labdhvāpahṛtya vā |
N07.001c/ vikrīyate 'samakṣaṁ yad vijñeyo 'svāmivikrayaḥ || 1 ||
N07.002a/ dravyam asvāmivikrītaṁ prāpya svāmī samāpnuyāt |
N07.002c/ prakāśaṁ krayataḥ śuddhiḥ kretuḥ steyaṁ rahaḥ krayāt || 2 ||
N07.003a/ asvāmyanumatād dāsād asataś ca janād rahaḥ |
N07.003c/ hīnamūlyam avelāyāṁ krīṇaṁs taddoṣabhāg bhavet || 3 ||
N07.004a/ na gūhetāgamaṁ kretā śuddhis tasya tadāgamāt |
N07.004c/ viparyaye tulyadoṣaḥ steyadaṇḍaṁ ca so 'rhati || 4 ||
N07.005a/ vikretā svāmine 'rthaṁ ca kretur mūlyaṁ ca tatkṛtam |
N07.005c/ dadyād daṇḍaṁ tathā rājñe vidhir asvāmivikraye || 5 ||
[Page 162 ]
N07.006a/ pareṇa nihitaṁ labdhvā rājany upaharen nidhim |
N07.006c/ rājagāmī nidhiḥ sarvaḥ sarveṣāṁ brāhmaṇād ṛte || 6 ||
N07.007a/ brāhmaṇo 'pi nidhiṁ labdhvā kṣipraṁ rājñe nivedayet |
N07.007c/ tena dattaṁ ca bhūñjīta stenaḥ syād anivedayan || 7 ||
N07.008a/ svam apy arthaṁ tathā naṣṭaṁ labdhvā rājñe nivedayet |
N07.008c/ gṛhṇīyāt tatra taṁ śuddham aśuddhaṁ syāt tato 'nyathā || 8 ||

2.8. Chapter 8 :: Krītānuśayaḥ (Nondelivery of What Has Been Sold)

[Page 163 ] [Note: [ L tr. 124-126 :: cf. J tr. 70-71]
N08.001a/ vikrīya paṇyaṁ mūlyena kretur yan na pradīyate |
N08.001c/ vikrīyāsampradānaṁ tad vivādapadam ucyate || 1 ||
N08.002a/ loke 'smin dvividhaṁ dravyaṁ jaṅgamaṁ sthāvaraṁ tathā |
N08.002c/ krayavikrayadharmeṣu sarvaṁ tat paṇyam ucyate || 2 ||
N08.003a/ ṣaḍvidhas tasya tu budhair dānādānavidhiḥ smṛtaḥ |
N08.003c/ gaṇimaṁ tulimaṁ meyaṁ kriyayā rūpataḥ śriyā || 3 ||
N08.004a/ vikrīya paṇyaṁ mūlyena kretur yo na prayacchati |
N08.004c/ sthāvarasya kṣayaṁ dāpyo jaṅgamasya kriyāphalam || 4 ||
N08.005a/ arghaś ced apahīyeta sodayaṁ paṇyam āvahet |
N08.005c/ sthāyinām eṣa niyamo diglābho digvicāriṇām || 5 ||
N08.006a/ upahanyeta vā paṇyaṁ dahyetāpahriyeta vā |
N08.006c/ vikretur eva so 'nartho vikrīyāsamprayacchataḥ || 6 ||
[Page 164 ]
N08.007a/ nirdoṣaṁ darśayitvā tu sadoṣaṁ yaḥ prayacchati |
N08.007c/ mūlyaṁ taddviguṇaṁ dāpyo vinayaṁ tāvad eva ca || 7 ||
N08.008a/ tathānyahaste vikrīya yo 'nyasmai samprayacchati |
N08.008c/ so 'pi taddviguṇaṁ dāpyo vineyas tāvad eva ca || 8 ||
N08.009a/ dīyamānaṁ na gṛhṇāti krītaṁ paṇyaṁ ca yaḥ krayī |
N08.009c/ vikrīṇānas tad anyatra vikretā nāparādhnuyāt || 9 ||
N08.010a/ dattamūlyasya paṇyasya vidhir eṣa prakīrtitaḥ |
N08.010c/ adatte 'nyatra samayān na vikretur atikramaḥ || 10 ||
N08.011a/ lābhārthe vaṇijāṁ sarvapaṇyeṣu krayavikrayaḥ |
N08.011c/ sa ca lābho 'rgham āsādya mahān bhavati vā na vā || 11 ||
N08.012a/ tasmād deśe ca kāle ca vaṇig arghaṁ parākramet |
N08.012c/ na jihmena pravarteta śreyān evaṁ vaṇikpathaḥ || 12 ||

2.9. Chapter 9 :: Vikrīyāsampradānam (Reneging on a Purchase)

[Page 165 ] [Note: [ L tr. 127-129 :: cf. J tr. 72-74]
N09.001a/ krītvā mūlyena yaḥ paṇyaṁ kretā na bahu manyate |
N09.001c/ krītvānuśaya ity etad vivādapadam ucyate || 1 ||
N09.002a/ krītvā mūlyena yat paṇyaṁ duṣkrītaṁ manyate krayī |
N09.002c/ vikretuḥ pratideyaṁ tat tasminn evāhny avikṣatam || 2 ||
N09.003a/ dvitīye 'hni dadat kretā mūlyāt triṁśāṁśam āvahet |
N09.003c/ dviguṇaṁ tat tṛtīye 'hni parataḥ kretur eva tat || 3 ||
N09.004a/ kretā paṇyaṁ parīkṣeta prāk svayaṁ guṇadoṣataḥ |
N09.004c/ parīkṣyābhimataṁ krītaṁ vikretur na bhavet punaḥ || 4 ||
N09.005a/ tryahād dohyaṁ parīkṣeta pañcāhād vāhyam eva tu |
N09.005c/ muktāvajrapravālānāṁ saptāhaṁ syāt parīkṣaṇam || 5 ||
N09.006a/ dvipadām ardhamāsaṁ syāt puṁsāṁ taddviguṇaṁ striyāḥ |
N09.006c/ daśāhaṁ sarvabījānām ekāhaṁ lohavāsasām || 6 ||
N09.007a/ paribhuktaṁ ca yad vāsaḥ kliṣṭarūpaṁ malīmasam |
N09.007c/ sadoṣam api vikrītaṁ vikretur na bhavet punaḥ || 7 ||
[Page 166 ]
N09.008a/ mūlyāṣṭabhāgo hīyeta sakṛd dhautasya vāsasaḥ |
N09.008c/ dviḥ pādas tris tribhāgas tu catuḥkṛtvo 'rdham eva ca || 8 ||
N09.009a/ ardhakṣayāt tu parataḥ pādāṁśāpacayaḥ kramāt |
N09.009c/ yāvat kṣīṇadaśaṁ jīrṇaṁ jīrṇasyāniyamaḥ kṣaye || 9 ||
N09.010a/ lohānām api sarveṣāṁ hetur agnikriyāvidhau |
N09.010c/ kṣayaḥ saṁskriyamāṇānāṁ teṣāṁ dṛṣṭo 'gnisaṅgamāt || 10 ||
N09.011a/ suvarṇasya kṣayo nāsti rajate dvipalaṁ śatam |
N09.011c/ śatam aṣṭapalaṁ jñeyaṁ kṣayas syāt trapusīsayoḥ || 11 ||
N09.012a/ tāmre pañcapalaṁ vidyād vikārā ye ca tanmayāḥ |
N09.012c/ taddhātūnām anekatvād ayaso 'niyamaḥ kṣaye || 12 ||
N09.013a/ tāntavasya ca saṁskāre kṣayavṛddhī udāhṛte |
N09.013c/ sūtrakārpāsikorṇānāṁ vṛddhir daśapalaṁ śatam || 13 ||
N09.014a/ sthūlasūtravatāṁ teṣāṁ madhyānāṁ pañcakaṁ śatam |
N09.014c/ tripalaṁ tu susūkṣmāṇām antaḥkṣaya udāhṛtaḥ || 14 ||
N09.015a/ triṁśāṁśo romaviddhasya kṣayaḥ karmakṛtasya tu |
N09.015c/ kauṣeyavalkalānāṁ tu naiva vṛddhir na ca kṣayaḥ || 15 ||
[Page 167 ]
N09.016a/ krītvā nānuśayaṁ kuryād vaṇik paṇyavicakṣaṇaḥ |
N09.016c/ vṛddhikṣayau tu jānīyāt paṇyānām āgamaṁ tathā || 16 ||

2.10. Chapter 10 :: Samayasyānapākarma (Nonobservance of Conventions)

[Page 168 ] [Note: [ L tr. 130-131 :: cf. J tr. 74-75]
N10.001a/ pāṣaṇḍanaigamādīnāṁ sthitiḥ samaya ucyate |
N10.001c/ samayasyānapākarma tad vivādapadaṁ smṛtam || 1 ||
N10.002a/ pāṣaṇḍanaigamaśreṇīpūgavrātagaṇādiṣu |
N10.002c/ saṁrakṣet samayaṁ rājā durge janapade tathā || 2 ||
N10.003a/ yo dharmaḥ karma yac caiṣām upasthānavidhiś ca yaḥ |
N10.003c/ yac caiṣāṁ vṛttyupādānam anumanyeta tat tathā || 3 ||
N10.004a/ pratikūlaṁ ca yad rājñaḥ prakṛtyavamataṁ ca yat |
N10.004c/ bādhakaṁ ca yad arthānāṁ tat tebhyo vinivartayet || 4 ||
N10.005a/ mithaḥ saṅghātakaraṇam ahitaṁ śastradhāraṇam |
N10.005c/ parasparopaghātaṁ ca teṣāṁ rājā na marṣayet || 5 ||
N10.006a/ pṛthag gaṇāṁś ca ye bhindyus te vineyā viśeṣataḥ |
N10.006c/ āvaheyur bhayaṁ ghoraṁ vyādhivat te hy upekṣitāḥ || 6 ||
N10.007a/ doṣavat karaṇaṁ yat syād anāmnāyaprakalpitam |
N10.007c/ pravṛttam api tad rājā śreyaskāmo nivartayet || 7 ||

2.11. Chapter 11 :: Kṣetrajavivādaḥ (Land Disputes)

[Page 169 ] [Note: [ L tr. 132-140 :: cf. J tr. 75-80]
N11.001a/ setukedāramaryādāvikṛṣṭākṛṣṭaniścayāḥ |
N11.001c/ kṣetrādhikārā yatra syur vivādaḥ kṣetrajas tu saḥ || 1 ||
N11.002a/ kṣetrasīmāvirodheṣu sāmantebhyo viniścayaḥ |
N11.002c/ nagaragrāmagaṇino ye ca vṛddhatamā narāḥ || 2 ||
N11.003a/ grāmasīmāsu ca bahir ye syus tatkṛṣijīvinaḥ |
N11.003c/ gopaśākunikavyādhā ye cānye vanagocarāḥ || 3 ||
N11.004a/ samunnayeyus te sīmāṁ lakṣaṇair upalakṣitām |
N11.004c/ tuṣāṅgārakapālaiś ca kumbhair āyatanair drumaiḥ || 4 ||
N11.005a/ abhijñātaiś ca valmīkasthalanimnonnatādibhiḥ |
N11.005c/ kedārārāmamārgaiś ca purāṇaiḥ setubhis tathā || 5 ||
N11.006a/ nimnagāpahṛtotsṛṣṭanaṣṭacihnāsu bhūmiṣu |
N11.006c/ tatpradeśānumānāc ca pramāṇair bhogadarśanaiḥ || 6 ||
N11.007a/ atha ced anṛtaṁ brūyuḥ sāmantās tadviniścaye |
N11.007c/ sarve pṛthak pṛthag daṇḍyā rājñā madhyamasāhasam || 7 ||
[Page 170 ]
N11.008a/ gaṇavṛddhādayas tv anye daṇḍaṁ dāpyāḥ pṛthak pṛthak |
N11.008c/ vineyāḥ prathamena syuḥ sāhasenānṛte sthitāḥ || 8 ||
N11.009a/ naikaḥ samunnayet sīmāṁ naraḥ pratyayavān api |
N11.009c/ gurutvād asya dharmasya kriyaiṣā bahuṣu sthitā || 9 ||
N11.010a/ ekaś ced unnayet sīmāṁ sopavāsaḥ samāhitaḥ |
N11.010c/ raktamālyāmbaradharaḥ kṣitim āropya mūrdhani || 10 ||
N11.011a/ yadā ca na syur jñātāraḥ sīmāyā na ca lakṣaṇam |
N11.011c/ tadā rājā dvayoḥ sīmām uddhared iṣṭataḥ svayam || 11 ||
N11.012a/ etenaiva gṛhodyānanipānāyatanādiṣu |
N11.012c/ vivādavidhir ākhyātas tathā grāmāntareṣu ca || 12 ||
N11.013a/ avaskarasthalaśvabhrabhramasyandanikādibhiḥ |
N11.013c/ catuṣpathasurasthānarathyāmārgān na rodhayet || 13 ||
N11.014a/ parakṣetrasya madhye tu setur na pratiṣidhyate |
N11.014c/ mahāguṇo 'lpabādhaś ca vṛddhir iṣṭā kṣaye sati || 14 ||
[Page 171 ]
N11.015a/ setus tu dvididho jñeyaḥ kheyo bandhyas tathaiva ca |
N11.015c/ toyapravartanān kheyo bandhyaḥ syāt tannivartanāt || 15 ||
N11.016a/ nāntareṇodakaṁ sasyaṁ naśyed abhyudakena tu |
N11.016c/ ya evānudake doṣaḥ sa evābhyudake smṛtaḥ || 16 ||
N11.017a/ pūrvapravṛttam utsannam apṛṣṭvā svāminaṁ tu yaḥ |
N11.017c/ setuṁ pravartayet kaścin na sa tatphalabhāg bhavet || 17 ||
N11.018a/ mṛte tu svāmini punas tadvaṁśye vāpi mānave |
N11.018c/ rājānam āmantrya tataḥ prakuryāt setukarma tat || 18 ||
N11.019a/ ato 'nyathā kleśabhāk syān mṛgavyādhānudarśanāt |
N11.019c/ iṣavas tasya naśyanti yo viddham anuvidhyati || 19 ||
N11.020a/ aśaktapretanaṣṭeṣu kṣetrikeṣv anivāritaḥ |
N11.020c/ kṣetraṁ ced vikṛṣet kaścid aśnuvīta sa tatphalam || 20 ||
N11.021a/ vikṛṣyamāṇe kṣetre cet kṣetrikaḥ punar āvrajet |
N11.021c/ khilopacāraṁ tat sarvaṁ dattvā svakṣetram āpnuyāt || 21 ||
N11.022a/ tadaṣṭabhāgāpacayād yāvat sapta gatāḥ samāḥ |
N11.022c/ samprāpte tv aṣṭame varṣe bhuktaṁ kṣetraṁ labheta saḥ || 22 ||
[Page 172 ]
N11.023a/ saṁvatsareṇārdhakhilaṁ khilaṁ tad vatsarais tribhiḥ |
N11.023c/ pañcavarṣāvasannaṁ tu syāt kṣetram aṭavīsamam || 23 ||
N11.024a/ kṣetraṁ tripuruṣaṁ yat syād gṛhaṁ vā syāt kramāgatam |
N11.024c/ rājaprasādād anyatra na tadbhogaḥ paraṁ nayet || 24 ||
N11.025a/ utkramya tu vṛtiṁ yatra sasyaghāto gavādibhiḥ |
N11.025c/ pālaḥ śāsyo bhavet tatra na cec chaktyā nivārayet || 25 ||
N11.026a/ samūlasasyanāśe tu tatsvāmī samam āpnuyāt |
N11.026c/ vadhena pālo mucyeta daṇḍaṁ svāmini pātayet || 26 ||
N11.027a/ gauḥ prasūtā daśāhāt ca mahokṣājāvikuñjarāḥ |
N11.027c/ nivāryās tu prayatnena teṣāṁ svāmī na daṇḍabhāk || 27 ||
N11.028a/ māṣaṁ gāṁ dāpayed daṇḍaṁ dvau māṣau mahiṣīṁ tathā |
N11.028c/ ajāvike savatse tu daṇḍaḥ syād ardhamāṣakaḥ || 28 ||
N11.029a/ adaṇḍyā hastino 'śvāś ca prajāpālā hi te smṛtāḥ |
N11.029c/ adaṇḍyā garbhiṇī gauś ca sūtikā cābhisāriṇī || 29 ||
[Page 173 ]
N11.030a/ proktas tu dvir niṣaṇṇānāṁ vasantyāṁ tu caturguṇam |
N11.030c/ pratyakṣacārakāṇāṁ tu cauradaṇḍaḥ smṛṭas tathā || 30 ||
N11.031a/ yā naṣṭāḥ pāladoṣeṇa gāvaḥ kṣetraṁ samāśritāḥ |
N11.031c/ na tatra gomino daṇḍaḥ pālas taṁ daṇḍam arhati || 31 ||
N11.032a/ rājagrāhagṛhīto vā vajrāśanihato 'pi vā |
N11.032c/ atha sarpeṇa daṣṭo vā giry agrāt patito 'pi vā || 32 ||
N11.033a/ siṁhavyāghrahato vāpi vyādhibhiḥ caiva pātitaḥ |
N11.033c/ na tatra doṣaḥ pālasya na ca doṣo 'sti gominām || 33 ||
N11.034a/ gobhis tu bhakṣitaṁ dhānyaṁ yo naraḥ pratimārgati |
N11.034c/ sāmantasya śado deyo dhānyaṁ yat tatra vāpitam |
N11.034e/ gavatraṁ gomine deyaṁ dhānyaṁ tatkarṣikasya tu || 34 ||
N11.035a/ grāmopānte ca yat kṣetraṁ vivītānte mahāpathe |
N11.035c/ anāvṛte cet tannāśe na pālasya vyatikramaḥ || 35 ||
[Page 174 ]
N11.036a/ pathi kṣetre vṛtiḥ kāryā yām uṣṭro nāvalokayet |
N11.036c/ na laṅghayet paśur nāśvo na bhidyād yāṁ ca sūkaraḥ || 36 ||
N11.037a/ gṛhaṁ kṣetraṁ ca vijñeyaṁ vāsahetuḥ kuṭumbinām |
N11.037c/ tasmāt tan nākṣiped rājā tad dhi mūlaṁ kuṭumbinām || 37 ||
N11.038a/ vṛddhe janapade rājño dharmaḥ kośaś ca vardhate |
N11.038c/ hīyate hīyamāne ca vṛddhihetum ataḥ śrayet || 38 ||

2.12. Chapter 12 :: Strīpuṁsayogaḥ (Relations between Men and Women)

[Page 175 ] [Note: [ L tr. 141-167 :: cf. J tr. 81-94]
N12.001a/ vivāhādividhiḥ strīṇāṁ yatra puṁsāṁ ca kīrtyate |
N12.001c/ strīpuṁsayoganāmaitad vivādapadam ucyate || 1 ||
N12.002a/ strīpuṁsayos tu sambandhād varaṇaṁ prāg vidhīyate |
N12.002c/ varaṇād grahaṇaṁ pāṇeḥ saṁskāro 'tha dvilakṣaṇaḥ || 2 ||
N12.003a/ tayor aniyataṁ proktaṁ varaṇaṁ doṣadarśanāt |
N12.003c/ pāṇigrahaṇamantrābhyāṁ niyataṁ dāralakṣaṇam || 3 ||
N12.004a/ brāhmaṇakṣatriyaviśāṁ śūdrāṇāṁ ca parigrahe |
N12.004c/ svajātyā śreyasī bhāryā svajātyaś ca patiḥ striyāḥ || 4 ||
N12.005a/ brāhmaṇasyānulomyena striyo 'nyās tisra eva tu |
N12.005c/ śūdrāyāḥ prātilomyena tathānye patayas trayaḥ || 5 ||
N12.006a/ dve bhārye kṣatriyasyānye vaiśyasyaikā prakīrtitā |
N12.006c/ vaiśyāyā dvau patī jñeyāv eko 'nyaḥ kṣatriyāpatiḥ || 6 ||
N12.007a/ ā saptamāt pañcamād vā bandhubhyaḥ pitṛmātṛtāḥ |
N12.007c/ avivāhyāḥ sagotrāḥ syuḥ samānapravarās tathā || 7 ||
[Page 176 ]
N12.008a/ parīkṣyaḥ puruṣaḥ puṁstve nijair evāṅgalakṣaṇaiḥ |
N12.008c/ pumāṁś ced avikalpena sa kanyāṁ labdhum arhati || 8 ||
N12.009a/ subaddhajatrujānvasthiḥ subaddhāṁsaśirodharaḥ |
N12.009c/ sthūlaghāṭas tanūrutvag avilagnagatisvaraḥ || 9 ||
N12.010a/ viṭ cāsya plavate nāpsu hlādi mūtraṁ ca phenilam |
N12.010c/ pumān syāṁl lakṣaṇair etair viparītais tu paṇḍakaḥ || 10 ||
N12.011a/ caturdaśavidhaḥ śāstre sa tu dṛṣṭo manīṣibhiḥ |
N12.011c/ cikitsyaś cācikitsyaś ca teṣām ukto vidhiḥ kramāt || 11 ||
N12.012a/ nisargapaṇḍo vadhriś ca pakṣapaṇḍas tathaiva ca |
N12.012c/ abhiśāpād guro rogād devakrodhāt tathaiva ca || 12 ||
N12.013a/ īrṣyāpaṇḍaś ca sevyaś ca vātaretā mukhebhagaḥ |
N12.013c/ ākṣipto moghabījaś ca śālīno 'nyapatis tathā || 13 ||
N12.014a/ tatrādyāv apratīkarau pakṣākhyo māsam ācaret |
N12.014c/ anukramāt trayasyāsya kālaḥ saṁvatsaraḥ smṛtaḥ || 14 ||
[Page 177 ]
N12.015a/ īrṣyāpaṇḍādayo ye 'nye catvāraḥ samudāhṛtāḥ |
N12.015c/ santyaktavyāḥ patitavat kṣatayonyā api striyāḥ || 15 ||
N12.016a/ ākṣiptamoghabījābhyām patyāv apratikarmaṇi |
N12.016c/ patir anyaḥ smṛto nāryā vatsaraṁ sampratīkṣya tu || 16 ||
N12.017a/ śālīnasyāpi dhṛṣṭastrīsaṁyogād bhajyate dhvajaḥ |
N12.017c/ taṁ hīnavegam anyastrībālādyābhir upakramet || 17 ||
N12.018a/ anyasyām yo manuṣyaḥ syād amanuṣyaḥ svayoṣiti |
N12.018c/ labheta sānyaṁ bhartāram etat kāryaṁ prajāpateḥ || 18 ||
N12.019a/ apatyārthaṁ striyaḥ sṛṣṭāḥ strī kṣetraṁ bījinaḥ prajāḥ |
N12.019c/ kṣetraṁ bījavate deyaṁ nābījī kṣetram arhati || 19 ||
N12.020a/ pitā dadyāt svayaṁ kanyām bhrātā vānumate pituḥ |
N12.020c/ mātāmaho mātulaś ca sakulyā bāndhavās tathā || 20 ||
N12.021a/ mātābhāve tu sarveṣāṁ prakṛtau yadi vartate |
N12.021c/ tasyām aprakṛtisthāyāṁ dadyuḥ kanyāṁ svajātayaḥ || 21 ||
[Page 178 ]
N12.022a/ yadā tu naiva kaścit syāt kanyā rājānam āvrajet |
N12.022c/ anujñayā tasya varaṁ pratītya varayet svayam || 22 ||
N12.023a/ savarṇam anurūpaṁ ca kularūpavayaḥśrutaiḥ |
N12.023c/ saha dharmaṁ caret tena putrāṁś cotpādayet tataḥ || 23 ||
N12.024a/ pratigṛhya ca yaḥ kanyāṁ naro deśāntaraṁ vrajet |
N12.024c/ trīn ṛtūn samatikramya kanyānyaṁ varayed varam || 24 ||
N12.025a/ kanyā nartum upekṣeta bāndhavebhyo nivedayet |
N12.025c/ te cen na dadyus tāṁ bhartre te syur bhrūṇahabhiḥ samāḥ || 25 ||
N12.026a/ yāvantaś ca rtavas tasyāḥ samatītā patiṁ vinā |
N12.026c/ tāvatyo bhrūṇahatyāḥ syus tasya yo na dadāti tām || 26 ||
N12.027a/ ato 'pravṛtte rajasi kanyāṁ dadyāt pitā sakṛt |
N12.027c/ mahad enaḥ spṛśed enam anyathaiṣa vidhiḥ satām || 27 ||
N12.028a/ sakṛd aṁśo nipatati sakṛt kanyā pradīyate |
N12.028c/ sakṛd āha dadānīti trīṇy etāni sakṛt sakṛt || 28 ||
N12.029a/ brāhmādiṣu vivāheṣu pañcasv eṣu vidhiḥ smṛtaḥ |
N12.029c/ guṇāpekṣaṁ bhaved dānam āsurādiṣu ca triṣu || 29 ||
[Page 179 ]
N12.030a/ kanyāyām prāptaśulkāyāṁ jyāyāṁś ced vara āvrajet |
N12.030c/ dharmārthakāmasaṁyuktaṁ vācyaṁ tatrānṛtaṁ bhavet || 30 ||
N12.031a/ nāduṣṭāṁ dūṣayet kanyāṁ nāduṣṭaṁ dūṣayed varam |
N12.031c/ doṣe tu sati nāgaḥ syād anyonyaṁ tyajatos tayoḥ || 31 ||
N12.032a/ dattvā nyāyena yaḥ kanyāṁ varāya na dadāti tām |
N12.032c/ aduṣṭaś ced varo rājñā sa daṇḍyas tatra coravat || 32 ||
N12.033a/ yas tu doṣavatīṁ kanyām anākhyāya prayacchati |
N12.033c/ tasya kuryān nṛpo daṇḍaṁ pūrvasāhasacoditam || 33 ||
N12.034a/ akanyeti tu yaḥ kanyāṁ brūyād dveṣeṇa mānavaḥ |
N12.034c/ sa śataṁ prāpnuyād daṇḍaṁ tasyā doṣam adarśayan || 34 ||
N12.035a/ pratigṛhya tu yaḥ kanyām aduṣṭām utsṛjed varaḥ |
N12.035c/ vineyaḥ so 'py akāmo 'pi kanyāṁ tām eva codvahet || 35 ||
N12.036a/ dīrghakutsitarogārtā vyaṅgā saṁsṛṣṭamaithunā |
N12.036c/ dhṛṣṭānyagatabhāvā ca kanyādoṣāḥ prakīrtitāḥ || 36 ||
N12.037a/ unmattaḥ patitaḥ klībo durbhagas tyaktabāndhavaḥ |
N12.037c/ kanyādoṣau ca yau pūrvau eṣa doṣagaṇo vare || 37 ||
N12.038a/ aṣṭau vivāhā varṇānāṁ saṁskārārthaṁ prakīrtitāḥ |
N12.038c/ brāhmas tu prathamas teṣāṁ prājāpatyas tathaiva ca || 38 ||
[Page 180 ]
N12.039a/ ārṣaś caivātha daivaś ca gāndharvaś cāsuras tathā |
N12.039c/ rākṣaso 'nantaras tasmāt paiśācas tv aṣṭamaḥ smṛtaḥ || 39 ||
N12.040a/ satkṛtyāhūya kanyāṁ tu brāhme dadyād tv alaṅkṛtām |
N12.040c/ saha dharmaṁ carety uktvā prājāpatyo vidhīyate || 40 ||
N12.041a/ vastragomithune dattvā vivāhas tv ārṣa ucyate |
N12.041c/ antarvedyāṁ tu daivaḥ syād ṛtvije karma kurvate || 41 ||
N12.042a/ icchantīm icchate prāhur gāndharvo nāma pañcamam |
N12.042c/ vivāhas tv āsuro jñeyaḥ śulkasaṁvyavahārataḥ || 42 ||
N12.043a/ prasahya haraṇād ukto vivāho rākṣasas tathā |
N12.043c/ suptamattopagamanāt paiśācas tv aṣṭamo 'dhamaḥ || 43 ||
N12.044a/ eṣāṁ tu dharmyās catvāro brāhmādyāḥ samudāhṛtāḥ |
N12.044c/ sādhāraṇaḥ syād gāndharvas trayo 'dharmyās tv ataḥ pare || 44 ||
N12.045a/ parapūrvāḥ striyas tv anyāḥ sapta proktā yathākramam |
N12.045c/ punarbhūs trividhā tāsāṁ svairiṇī tu caturvidhā || 45 ||
N12.046a/ kanyaivākṣatayonir yā pāṇigrahaṇadūṣitā |
N12.046c/ punarbhūḥ prathamā soktā punaḥ saṁskāram arhati || 46 ||
N12.047a/ kaumāraṁ patim utsṛjya yānyaṁ puruṣam āśritā |
N12.047c/ punaḥ patyur gṛham yāyāt sā dvitīyā prakīrtitā || 47 ||
[Page 181 ]
N12.048a/ asatsu devareṣu strī bāndhavair yā pradīyate |
N12.048c/ savarṇāyāsapiṇḍāya sā tṛtīyā prakīrtitā || 48 ||
N12.049a/ strī prasūtāprasūtā vā patyāv eva tu jīvati |
N12.049c/ kāmāt samāśrayed anyaṁ prathamā svairiṇī tu sā || 49 ||
N12.050a/ mṛte bhartari yā prāptān devarān apy apāsya tu |
N12.050c/ upagacchet paraṁ kāmāt sā dvitīyā prakīrtitā || 50 ||
N12.051a/ prāptā deśād dhanakrītā kṣutpipāsāturā ca yā |
N12.051c/ tavāham ity upagatā sā tṛtīyā prakīrtitā || 51 ||
N12.052a/ deśadharmān apekṣya strī gurubhir yā pradīyate |
N12.052c/ utpannasāhasānyasmai sāntyā vai svairiṇī smṛtā || 52 ||
N12.053a/ punarbhuvāṁ eṣa vidhiḥ svairiṇīnāṁ ca kīrtitaḥ |
N12.053c/ pūrvā pūrvājaghanyāsāṁ śreyasī tūttarottarā || 53 ||
N12.054a/ apatyam utpādayitus tāsāṁ yā śulkato hṛtā |
N12.054c/ aśulkopanatāyāṁ tu kṣetrikasyaiva tat phalam || 54 ||
N12.055a/ kṣetrikasya yad ajñātaṁ kṣetre bījaṁ pradīyate |
N12.055c/ na tatra bījino bhāgaḥ kṣetrikasyaiva tad bhavet || 55 ||
[Page 182 ]
N12.056a/ oghavātāhṛtaṁ bījaṁ kṣetre yasya prarohati |
N12.056c/ phalabhug yasya tat kṣetraṁ na bījī phalabhāg bhavet || 56 ||
N12.057a/ mahokṣo janayed vatsān yasya goṣu vraje caran |
N12.057c/ tasya te yasya tā gāvo moghaṁ syanditam ārṣabham || 57 ||
N12.058a/ kṣetrikānumataṁ bījaṁ yasya kṣetre pramucyate |
N12.058c/ tadapatyaṁ dvayor eva bījikṣetrikayor matam || 58 ||
N12.059a/ narte kṣetraṁ bhavet sasyaṁ na ca bījaṁ vināsti tat |
N12.059c/ ato 'patyaṁ dvayor iṣṭaṁ pitur mātuś ca dharmataḥ || 59 ||
N12.060a/ nāthavatyā paragṛhe saṁyuktasya striyā saha |
N12.060c/ dṛṣṭaṁ saṅgrahaṇaṁ tajjñair nāgatāyāḥ svayaṁ gṛhe || 60 ||
N12.061a/ praduṣṭatyaktadārasya klībasya kṣamakasya ca |
N12.061c/ svecchayopeyuṣo dārān na doṣaḥ sāhaso bhavet || 61 ||
N12.062a/ parastriyā sahākāle 'deśe vā bhavato mithaḥ |
N12.062c/ sthānasambhāṣaṇāmodās trayaḥ saṅgrahaṇakramāḥ || 62 ||
[Page 183 ]
N12.063a/ nadīnāṁ saṅgame tīrtheṣv ārāmeṣu vaneṣu ca |
N12.063c/ strī pumāṁś ca sameyātāṁ grāhyaṁ saṅgrahaṇaṁ bhavet || 63 ||
N12.064a/ dūtīprasthāpanaiś caiva lekhāsampreṣaṇair api |
N12.064c/ anyair api vyabhicāraiḥ sarvaṁ saṅgrahaṇaṁ smṛtam || 64 ||
N12.065a/ striyaṁ spṛśed adeśe yaḥ spṛṣṭo vā marśayet tathā |
N12.065c/ parasparasyānumate tac ca saṅgrahaṇaṁ bhavet || 65 ||
N12.066a/ bhakṣair vā yadi vā bhojyair vastrair mālyais tathaiva ca |
N12.066c/ sampreṣyamānair gandhaiś ca sarvaṁ saṅgrahaṇaṁ smṛtam || 66 ||
N12.067a/ darpād vā yadi vā mohāc chlāghayā vā svayaṁ vadet |
N12.067c/ mameyaṁ bhuktapūrveti sarvaṁ saṅgrahaṇaṁ smṛtam || 67 ||
N12.068a/ pāṇau yaś ca nigṛhṇīyad veṇyāṁ vastrāntare 'pi vā |
N12.068c/ tiṣṭha tiṣṭheti vā bruyāt sarvaṁ saṅgrahaṇaṁ smṛtam || 68 ||
[Page 184 ]
N12.069a/ svajātyatikrame puṁsāṁ uktam uttamasāhasam |
N12.069c/ viparyaye madhyamas tu prātilome pramāpaṇam || 69 ||
N12.070a/ kanyāyām asakāmāyāṁ dvyāṅgulasyāvakartanam |
N12.070c/ uttamāyāṁ vadhas tv eva sarvasvaharaṇaṁ tathā || 70 ||
N12.071a/ sakāmāyāṁ tu kanyāyāṁ savarṇe nāsty atikramaḥ |
N12.071c/ kintv alaṅkṛtya satkṛtya sa evaināṁ samudvahet || 71 ||
N12.072a/ mātā mātṛṣvasā śvaśrūr mātulānī pitṛṣvasā |
N12.072c/ pitṛvyasakhiśiṣyastrī bhaginī tatsakhī snuṣā || 72 ||
N12.073a/ duhitācāryabhāryā ca sagotrā śaraṇāgatā |
N12.073c/ rājñī pravrajitā dhātrī sādhvī varṇottamā ca yā || 73 ||
N12.074a/ āsām anyatamāṁ gatvā gurutalpaga ucyate |
N12.074c/ śiśnasyotkartanaṁ daṇḍo nānyas tatra vidhīyate || 74 ||
N12.075a/ paśuyonyām atikrāman vineyaḥ sa damaṁ śatam |
N12.075c/ madhyamaṁ sāhasaṁ goṣu tad evāntyāvasāyiṣu || 75 ||
N12.076a/ agamyāgāminaḥ śāsti daṇḍo rājñā pracoditaḥ |
N12.076c/ prāyaścittavidhāv atra prāyaścittaṁ viśodhanam || 76 ||
N12.077a/ svairiṇy abrāhmaṇī veśyā dāsī niṣkāsinī ca yā |
N12.077c/ gamyāḥ syur ānulomyena striyo na pratilomataḥ || 77 ||
[Page 185 ]
N12.078a/ āsv eva tu bhujiṣyāsu doṣaḥ syāt paradāravat |
N12.078c/ gamyā api hi nopeyās tāś ced anyaparigrahāḥ || 78 ||
N12.079a/ anutpannaprajāyās tu patiḥ preyād yadi striyāḥ |
N12.079c/ niyuktā gurubhir gacched devaraṁ putrakāmyayā || 79 ||
N12.080a/ sa ca tāṁ pratipadyeta tathaivā putrajanmataḥ |
N12.080c/ putre jāte nivarteta viplavaḥ syād ato 'nyathā || 80 ||
N12.081a/ ghṛtenābhyajya gātrāṇi tailenāvikṛtena vā |
N12.081c/ mukhān mukhaṁ pariharan gātrair gātrāṇy asaṁspṛśan || 81 ||
N12.082a/ striyaṁ putravatīṁ vandhyāṁ nīrajaskām anicchantīm |
N12.082c/ na gacched garbhiṇīṁ nindyām aniyuktāṁ ca bandhubhiḥ || 82 ||
N12.083a/ aniyuktā tu yā nārī devarāj janayet sutam |
N12.083c/ jārajātam arikthīyaṁ tam āhur dharmavādinaḥ || 83 ||
N12.084a/ tathāniyukto bhāryāyāṁ yavīyāñ jyāyaso vrajet |
N12.084c/ yavīyaso vā yo jyāyān ubhau tau gurutalpagau || 84 ||
N12.085a/ kule tadavaśeṣe tu santānārthaṁ na kāmataḥ |
N12.085c/ niyukto gurubhir gacched bhrātṛbhāryāṁ yavīyasaḥ || 85 ||
[Page 186 ]
N12.086a/ avidyamāne tu gurau rājño vācyaḥ kulakṣayaḥ |
N12.086c/ tatas tadvacanād gacched anuśiṣya striyā saha || 86 ||
N12.087a/ pūrvoktenaiva vidhinā snātāṁ puṁsavane śuciḥ |
N12.087c/ sakṛd ā garbhādhānād vā kṛte garbhe snuṣaiva sā || 87 ||
N12.088a/ ato 'nyathā vartamānaḥ pumān strī vāpi kāmataḥ |
N12.088c/ vineyau subhṛśaṁ rājñā kilbiṣī syād anigrahāt || 88 ||
N12.089a/ īrṣyāsūyasamutthe tu saṁrambhe rāgahetuke |
N12.089c/ dampatī vivadeyātāṁ na jñātiṣu na rājani || 89 ||
N12.090a/ anyonyaṁ tyajator nāgaḥ syād anyonyaviruddhayoḥ |
N12.090c/ strīpuṁsayor nigūḍhāyā vyabhicārād ṛte striyāḥ || 90 ||
N12.091a/ vyabhicāre striyā mauṇḍyam adhaḥśayanam eva ca |
N12.091c/ kadannaṁ vā kuvāsaś ca karma cāvaskaroñjhanam || 91 ||
N12.092a/ strīdhanabhraṣṭasarvasvāṁ garbhavisraṁsinīṁ tathā |
N12.092c/ bhartuś ca vadham icchantīṁ striyaṁ nirvāsayed gṛhāt || 92 ||
[Page 187 ]
N12.093a/ anarthaśīlāṁ satataṁ tathaivāpriyavādinīm |
N12.093c/ pūrvāśinīṁ ca yā bhartuḥ striyaṁ nirvāsayed budhaḥ || 93 ||
N12.094a/ vandhyāṁ strījananīṁ nindyāṁ pratikulāṁ ca sarvadā |
N12.094c/ kāmato nābhinandeta kurvann evaṁ sa doṣabhāk || 94 ||
N12.095a/ anukūlām avāgduṣṭāṁ dakṣāṁ sādhvīṁ prajāvatīm |
N12.095c/ tyajan bhāryām avasthāpyo rājñā daṇḍena bhūyasā || 95 ||
N12.096a/ ajñātadoṣeṇoḍhā yā nirgatā nānyam āśritā |
N12.096c/ bandhubhiḥ sā niyoktavyā nirbandhuḥ svayam āśrayet || 96 ||
N12.097a/ naṣṭe mṛte pravrajite klībe ca patite patau |
N12.097c/ pañcasv āpatsu nārīṇāṁ patir anyo vidhīyate || 97 ||
N12.098a/ aṣṭau varṣāṇy udīkṣeta brāhmaṇī proṣitaṁ patim |
N12.098c/ aprasūtā tu catvāri parato 'nyaṁ samāśrayet || 98 ||
N12.099a/ kṣatriyā ṣaṭ samās tiṣṭhed aprasūtā samātrayam |
N12.099c/ vaiśyā prasūtā catvāri dve same tv itarā vaset || 99 ||
N12.100a/ na śūdrāyāḥ smṛtaḥ kālo na ca dharmavyatikramaḥ |
N12.100c/ viśeṣato 'prasūtāyāḥ saṁvatsaraparā sthitiḥ || 100 ||
N12.101a/ apravṛttau smṛtaḥ dharma eṣa proṣitayoṣitām |
N12.101c/ jīvati śrūyamāṇe tu syād eṣa dviguṇo vidhiḥ || 101 ||
[Page 188 ]
N12.102a/ prajāpravṛttau bhūtānāṁ sṛṣṭir eṣā prajāpateḥ |
N12.102c/ ato 'nyagamane strīṇām evaṁ doṣo na vidyate || 102 ||
N12.103a/ ānulomyena varṇānāṁ yaj janma sa vidhiḥ smṛtaḥ |
N12.103c/ prātilomyena yaj janma sa jñeyo varṇasaṅkaraḥ || 103 ||
N12.104a/ anantaraḥ smṛtaḥ putraḥ putra ekāntaras tathā |
N12.104c/ dvyantaraś cānulomyena tathaiva pratilomataḥ || 104 ||
N12.105a/ ugraḥ pāraśavaś caiva niṣādaś cānulomataḥ |
N12.105c/ uttamebhyas trayas tribhyaḥ śūdrāputrāḥ prakīrtitāḥ || 105 ||
N12.106a/ brāhmaṇyā api cāṇḍālasūtavaidehakā api |
N12.106c/ aparebhyas trayas tribhyā vijñeyaḥ pratilomataḥ || 106 ||
N12.107a/ ambaṣṭho māgadhaś caiva kṣattā ca kṣatriyāsutāḥ |
N12.107c/ ānulomyena tatraiko dvau jñeyau pratilomataḥ || 107 ||
N12.108a/ vaiśyāputrās tu dauṣṣantayavanāyogavā api |
N12.108c/ prātilomyena yatraiko dvau jñeyau cānulomajau || 108 ||
N12.109a/ sūtādyāḥ pratilomās tu ye jātipratilomajāḥ |
N12.109c/ te saṅkarāḥ śvapākādyās teṣāṁ triḥ saptako gaṇaḥ || 109 ||
N12.110a/ savarṇo brāhmaṇīputraḥ kṣatriyāyām anantaraḥ |
N12.110c/ ambaṣṭhograu tathā putrāv evaṁ kṣatriyavaiśyayoḥ || 110 ||
[Page 189 ]
N12.111a/ ekāntaras tu dauṣṣanto vaiśyāyāṁ brāhmaṇāt sutaḥ |
N12.111c/ śūdrāyāṁ kṣatriyāt tadvan niṣādo nāma jāyate || 111 ||
N12.112a/ śūdrā pāraśavaṁ sūte brāhmaṇād uttaraṁ sutam |
N12.112c/ ānulomyena varṇānāṁ putrā hy ete prakīrtitāḥ || 112 ||
N12.113a/ sūtaś ca māgadhaś caiva putrāv āyogavas tathā |
N12.113c/ prātilomyena varṇānāṁ tadvad ete 'py anantarāḥ || 113 ||
N12.114a/ anantaraḥ smṛtaḥ sūto brāhmaṇyāṁ kṣatriyāt sutaḥ |
N12.114c/ māgadhāyogavau tadvad dvī putrau vaiśyaśūdrayoḥ || 114 ||
N12.115a/ brāhmaṇy ekāntaraṁ vaiśyāt sūte vaidehakaṁ sutam |
N12.115c/ kṣattāraṁ kṣatriyā śūdrāt putram ekāntaraṁ tathā || 115 ||
N12.116a/ dvyantaraḥ prātilomyena pāpiṣṭhaḥ sati saṅkare |
N12.116c/ cāṇḍālo jāyate śūdrād brāhmaṇī yatra muhyati || 116 ||
N12.117a/ rājñā parīkṣyaṁ na yathā jāyate varṇasaṅkaraḥ |
N12.117c/ tasmād rājñā viśeṣeṇa trayī rakṣyā tu saṅkarāt || 117 ||

2.13. Chapter 13 :: Dāyabhāgaḥ (Partition of Inheritance)

[Page 190 ] [Note: [ L tr. 168-180 :: cf. J tr. 94-101]
N13.001a/ vibhāgo 'rthasya pitryasya putrair yatra prakalpyate |
N13.001c/ dāyabhāga iti proktaṁ tad vivādapadaṁ budhaiḥ || 1 ||
N13.002a/ pitary ūrdhvaṁ mṛte putrā vibhajeyur dhanaṁ pituḥ |
N13.002c/ mātur duhitaro 'bhāve duhitÏṛṇāṁ tadanvayaḥ || 2 ||
N13.003a/ mātur nivṛtte rajasi prattāsu bhaginīṣu ca |
N13.003c/ niraṣṭe vāpy amaraṇe pitary uparataspṛhe || 3 ||
N13.004a/ pitaiva vā svayaṁ putrān vibhajed vayasi sthitaḥ |
N13.004c/ jyeṣṭhaṁ śreṣṭhavibhāgena yathā vāsya matir bhavet || 4 ||
N13.005a/ bibhṛyād vecchataḥ sarvāñ jyeṣṭho bhrātā yathā pitā |
N13.005c/ bhrātā śaktaḥ kaniṣṭho vā śaktyapekṣaḥ kule kriyā || 5 ||
N13.006a/ śauryabhāryādhane hitvā yac ca vidyādhanaṁ bhavet |
N13.006c/ trīṇy etāny avibhājyāni prasādo yaś ca paitṛkaḥ || 6 ||
[Page 191 ]
N13.007a/ mātrā ca svadhanaṁ dattaṁ yasmai syāt prītipūrvakam |
N13.007c/ tasyāpy eṣa vidhir dṛṣṭo mātāpīṣṭe yathā pitā || 7 ||
N13.008a/ adhyagnyadhyāvahanikaṁ bhartṛdāyas tathaiva ca |
N13.008c/ bhrātṛmātṛpitṛbhyaś ca ṣaḍvidhaṁ strīdhanaṁ smṛtam || 8 ||
N13.009a/ strīdhanaṁ tadapatyānāṁ bhartṛgāmy aprajāsu ca |
N13.009c/ brāhmādiṣu catuḥṣv āhuḥ pitṛgāmītareṣu tu || 9 ||
N13.010a/ kuṭumbaṁ bibhṛyād bhrātur yo vidyām adhigacchataḥ |
N13.010c/ bhāgaṁ vidyādhanāt tasmāt sa labhetāśruto 'pi san || 10 ||
N13.011a/ vaidyo 'vaidyāya nākāmo dadyād aṁśaṁ svato dhanāt |
N13.011c/ pitṛdravyaṁ tad āśritya na cet tena tad āhṛtam || 11 ||
N13.012a/ dvāv āṁśau pratipadyeta vibhajann ātmanaḥ pitā |
N13.012c/ samāṁśabhāginī mātā putrāṇāṁ syān mṛte patau || 12 ||
N13.013a/ jyeṣṭhāyāṁśo 'dhiko deyaḥ jyeṣṭhāya tu varaḥ smṛtaḥ |
N13.013c/ samāṁśabhājaḥ śeṣāḥ syur aprattā bhaginī tathā || 13 ||
N13.014a/ kṣetrajeṣv api putreṣu tadvaj jāteṣu dharmataḥ |
N13.014c/ varṇāvareṣv aṁśahānir ūḍhājāteṣv anukramāt || 14 ||
[Page 192 ]
N13.015a/ pitraiva tu vibhaktā ye hīnādhikasamair dhanaiḥ |
N13.015c/ teṣāṁ sa eva dharmaḥ syāt sarvasya hi pitā prabhuḥ || 15 ||
N13.016a/ kānīnaś ca sahoḍhaś ca gūḍhāyāṁ yaś ca jāyate |
N13.016c/ teṣāṁ voḍhāpitā jñeyas te ca bhāgaharāḥ smṛtāḥ || 16 ||
N13.017a/ ajñātapitṛko yaś ca kānīno 'nūḍhamātṛkaḥ |
N13.017c/ mātāmahāya dadyāt sa piṇḍaṁ rikthaṁ hareta ca || 17 ||
N13.018a/ jātā ye tv aniyuktāyām ekena bahubhis tathā |
N13.018c/ arikthabhājas te sarve bījinām eva te sutāḥ || 18 ||
N13.019a/ dadyus te bījine piṇḍaṁ mātā cec chulkato hṛtā |
N13.019c/ aśulkopagatāyāṁ tu piṇḍadā voḍhur eva te || 19 ||
N13.020a/ pitṛdviṭ patitaḥ paṇḍo yaś ca syād aupapātikaḥ |
N13.020c/ aurasā api naite 'ṁśaṁ labheran kṣetrajāḥ kutaḥ || 20 ||
N13.021a/ dīrghatīvrāmayagrastā jaḍonmattāndhapaṅgavaḥ |
N13.021c/ bhartavyāḥ syuḥ kule caite tatputrās tv aṁśabhāginaḥ || 21 ||
N13.022a/ dvirāmuṣyāyaṇā dadyur dvābhyāṁ piṇḍodake pṛthak |
N13.022c/ rikthād ardhāṁśam ādadyur bījikṣetrikayos tathā || 22 ||
[Page 193 ]
N13.023a/ saṁsṛṣṭināṁ tu yo bhāgas teṣām eva sa iṣyate |
N13.023c/ ato 'nyathāṁśabhājo hi nirbījiṣv itarān iyāt || 23 ||
N13.024a/ bhrātÏṛṇām aprajaḥ preyāt kaścic cet pravrajet tu vā |
N13.024c/ vibhajeyur dhanaṁ tasya śeṣās tu strīdhanaṁ vinā || 24 ||
N13.025a/ bharaṇam cāsya kurvīran strīṇām ā jīvitakṣayāt |
N13.025c/ rakṣanti śayyāṁ bhartuś ced ācchindyur itarāsu tu || 25 ||
N13.026a/ syād yasya duhitā tasyāḥ pitraṁśo bharaṇe mataḥ |
N13.026c/ ā saṁskārād bhajed enāṁ parato bibhṛyāt patiḥ || 26 ||
N13.027a/ mṛte bhartary aputrāyāḥ patipakṣaḥ prabhuḥ striyāḥ |
N13.027c/ viniyogātmarakṣāsu bharaṇe ca sa īśvaraḥ || 27 ||
N13.028a/ parikṣīṇe patikule nirmaṇuṣye nirāśraye |
N13.028c/ tatsapiṇḍeṣu vāsatsu pitṛpakṣaḥ prabhuḥ striyāḥ || 28 ||
N13.029a/ pakṣadvayāvasāne tu rājā bhartā smṛtaḥ striyāḥ |
N13.029c/ sa tasyā bharaṇaṁ kuryān nigṛhṇīyāt pathaś cyutām || 29 ||
N13.030a/ svātantryād vipraṇaśyanti kule jātā api striyaḥ |
N13.030c/ asvātantryam atas tāsāṁ prajāpatir akalpayat || 30 ||
N13.031a/ pitā rakṣati kaumāre bhartā rakṣati yauvane |
N13.031c/ putrā rakṣanti vaidhavye na strī svātantryam arhati || 31 ||
[Page 194 ]
N13.032a/ yac chiṣṭaṁ pitṛdāyebhyo dattva rṇaṁ paitṛkaṁ ca yat |
N13.032c/ bhrātṛbhis tad vibhaktavyam ṛṇī na syād yathā pitā || 32 ||
N13.033a/ yeṣāṁ ca na kṛtāḥ pitrā saṁskāravidhayaḥ kramāt |
N13.033c/ kartavyā bhrātṛbhis teṣāṁ paitṛkād eva te dhanāt || 33 ||
N13.034a/ avidyamāne pitrye 'rthe svāṁśād uddhṛtya vā punaḥ |
N13.034c/ avaśyakāryāḥ saṁskārā bhrātÏṛṇāṁ pūrvasaṁskṛtaiḥ || 34 ||
N13.035a/ kuṭumbārtheṣu codyuktas tatkāryaṁ kurute ca yaḥ |
N13.035c/ sa bhrātṛbhir bṛṁhaṇīyo grāsāchādanavāhanaiḥ || 35 ||
N13.036a/ vibhāgadharmasandehe dāyādānāṁ vinirṇaye |
N13.036c/ jñātibhir bhāgalekhyaiś ca pṛthakkāryapravartanāt || 36 ||
N13.037a/ bhrātÏṛṇām avibhaktānām eko dharmaḥ pravartate |
N13.037c/ vibhāge sati dharmo 'pi bhaved eṣāṁ pṛthak pṛthak || 37 ||
N13.038a/ dānagrahaṇapaśvannagṛhakṣetraparigrahāḥ |
N13.038c/ vibhaktānāṁ pṛthag jñeyāḥ pākadharmāgamavyayāḥ || 38 ||
N13.039a/ sākṣitvaṁ prātibhāvyaṁ ca dānaṁ grahaṇam eva ca |
N13.039c/ vibhaktā bhrātaraḥ kūryur nāvibhaktā parasparam || 39 ||
[Page 195 ]
N13.040a/ yeṣām etāḥ kriyā loke pravartante svarikthinām |
N13.040c/ vibhaktān avagaccheyur lekhyam apy antareṇa tān || 40 ||
N13.041a/ yady ekajātā bahavaḥ pṛthagdharmāḥ pṛthakkriyāḥ |
N13.041c/ pṛthakkarmaguṇopetā na te kṛtyeṣu sammatāḥ || 41 ||
N13.042a/ svān bhāgān yadi dadyus te vikrīṇīrann athāpi vā |
N13.042c/ kuryur yatheṣṭaṁ tat sarvam īśante svadhanasya te || 42 ||
N13.043a/ aurasaḥ kṣetrajaś caiva putrikāputra eva ca |
N13.043c/ kānīnaś ca sahoḍhaś ca gūḍhotpannas tathaiva ca || 43 ||
N13.044a/ paunarbhavo 'paviddhaś ca labdhaḥ krītaḥ kṛtas tathā |
N13.044c/ svayaṁ copagataḥ putrā dvādaśaita udāhṛtāḥ || 44 ||
N13.045a/ teṣāṁ ṣaḍ bandhudāyādāḥ ṣaḍ adāyādabāndhavāḥ |
N13.045c/ pūrvaḥ pūrvaḥ smṛtaḥ śreyāj jaghanyo yo ya uttaraḥ || 45 ||
N13.046a/ kramād dhy ete prapadyeran mṛte pitari taddhanam |
N13.046c/ jyāyaso jyāyaso 'bhāve jaghanyas tad avāpnuyāt || 46 ||
[Page 196 ]
N13.047a/ putrābhāve tu duhitā tulyasantānadarśanāt |
N13.047c/ putraś ca duhitā coktau pituḥ santānakārakau || 47 ||
N13.048a/ abhāve tu duhitṝṇāṁ sakulyā bāndhavās tataḥ |
N13.048c/ tataḥ sajātyāḥ sarveṣām abhāve rājagāmi tat || 48 ||
N13.049a/ anyatra brāhmaṇāt kintu rājā dharmaparāyaṇaḥ |
N13.049c/ sa strīṇāṁ jīvanaṁ dadyād eṣa dāyavidhiḥ smṛtaḥ || 49 ||

2.14. Chapter 14 :: Sāhasam (Violent Acts)

[Page 197 ] [Note: [ L tr. 181-185 :: cf. J tr. 101-104]
N14.001a/ sahasā kriyate karma yatkiñcid baladarpitaiḥ |
N14.001c/ tat sāhasam iti proktaṁ saho balam ihocyate || 1 ||
N14.002a/ tat punas trividhaṁ jñeyaṁ prathamaṁ madhyamaṁ tathā |
N14.002c/ uttamaṁ ceti śāstreṣu tasyoktaṁ lakṣaṇaṁ pṛthak || 2 ||
N14.003a/ phalamūlodakādīnāṁ kṣetropakaraṇasya ca |
N14.003c/ bhaṅgākṣepopamardādyaiḥ prathamaṁ sāhasaṁ smṛtam || 3 ||
N14.004a/ vāsaḥpaśvannapānānām gṛhopakaraṇasya ca |
N14.004c/ etenaiva prakāreṇa madhyamaṁ sāhasaṁ smṛtam || 4 ||
N14.005a/ vyāpādo viṣaśastrād yaiḥ paradārapradharṣaṇam |
N14.005c/ prāṇoparodhi yac cānyad uktam uttamasāhasam || 5 ||
N14.006a/ tasya daṇḍaḥ kriyāpekṣaḥ prathamasya śatāvaraḥ |
N14.006c/ madhyamasya tu śāstrajñair jñeyaḥ pañcaśatāvaraḥ || 6 ||
N14.007a/ vadhaḥ sarvasvaharaṇaṁ purān nirvāsanāṅkane |
N14.007c/ tadaṅgaccheda ity ukto daṇḍa uttamasāhase || 7 ||
[Page 198 ]
N14.008a/ aviśeṣeṇa sarveṣām eṣa daṇḍavidhiḥ smṛtaḥ |
N14.008c/ vadhād ṛte brāhmaṇasya na vadhaṁ brāhmaṇo 'rhati || 8 ||
N14.009a/ śiraso muṇḍanaṁ daṇḍas tasya nirvāsanaṁ purāt |
N14.009c/ lalāṭe cābhiśastāṅkaḥ prayāṇaṁ gardabhena ca || 9 ||
N14.010a/ syātāṁ saṁvyavahāryau tau dhṛtadaṇḍau tu pūrvayoḥ |
N14.010c/ dhṛtadaṇḍo 'py asambhojyo jñeya uttamasāhase || 10 ||
N14.011a/ tasyaiva bhedaḥ steyaṁ syād viśeṣas tatra cocyate |
N14.011c/ atisāhasam ākramya steyam āhuś chalena tu || 11 ||
N14.012a/ tad api trividhaṁ proktaṁ dravyāpekṣaṁ manīṣibhiḥ |
N14.012c/ kṣudramadhyottamānāṁ tu dravyāṇām apakarṣaṇāt || 12 ||
N14.013a/ mṛdbhāṇḍāsanakhaṭvāsthidārucarmatṛṇādi yat |
N14.013c/ śamīdhānyamudgādīni kṣudradravyam udāhṛtam || 13 ||
N14.014a/ vāsaḥ kauśeyavarjaṁ ca govarjaṁ paśavas tathā |
N14.014c/ hiraṇyavarjaṁ lohaṁ ca madhyaṁ vrīhiyavā api || 14 ||
N14.015a/ hiraṇyaratnakauśeyastrīpuṅgogajavājinaḥ |
N14.015c/ devabrāhmaṇarājñāṁ ca dravyaṁ vijñeyam uttamam || 15 ||
[Page 199 ]
N14.016a/ upāyair vividhair eṣāṁ chalayitvāpakarṣaṇam |
N14.016c/ suptapramattamattebhyaḥ steyam āhur manīṣiṇaḥ || 16 ||
N14.017a/ sahoḍhagrahaṇāt steyaṁ hoḍhe 'saty upabhogataḥ |
N14.017c/ śaṅkā tv asajjanaikārthyād anāyavyayatas tathā || 17 ||
N14.018a/ bhaktāvakāśadātāraḥ stenānāṁ ye prasarpatām |
N14.018c/ śaktāś ca ya upekṣante te 'pi taddoṣabhāginaḥ || 18 ||
N14.019a/ utkrośatāṁ janānāṁ ca hriyamāṇe dhane 'pi ca |
N14.019c/ śrutvā ye nābhidhāvanti te 'pi taddoṣabhāginaḥ || 19 ||
N14.020a/ sāhaseṣu ya evoktas triṣu daṇḍo manīṣibhiḥ |
N14.020c/ sa eva daṇḍaḥ steye 'pi dravyeṣu triṣv anukramāt || 20 ||
N14.021a/ gavādiṣu praṇaṣṭeṣu dravyeṣv apahṛteṣu vā |
N14.021c/ padenānveṣaṇaṁ kuryur ā mūlāt tadvido janāḥ || 21 ||
N14.022a/ grāme vraje vivīte vā yatra sannipatet padam |
N14.022c/ voḍhavyaṁ tad bhavet tena na cet so 'nyatra tan nayet || 22 ||
N14.023a/ pade pramūḍhe bhagne vā viṣamatvāj janāntike |
N14.023c/ yas tv āsannataro grāmo vrajo vā tatra pātayet || 23 ||
[Page 200 ]
N14.024a/ same 'dhvani dvayor yatra tena prāyo 'śucir janaḥ |
N14.024c/ pūrvāpadānair dṛṣṭo vā saṁsṛṣṭo vā durātmabhiḥ || 24 ||
N14.025a/ grāmeṣv anveṣaṇaṁ kuryuś caṇḍālavadhakādayaḥ |
N14.025c/ rātrisañcāriṇo ye ca bahiḥ kuryur bahiścarāḥ || 25 ||
N14.026a/ steneṣv alabhyamāneṣu rājā dadyāt svakād dhanāt |
N14.026c/ upekṣamāṇo hy enasvī dharmād arthāc ca hīyate || 26 ||

2.15. Chapter 15-16 :: Vāgdaṇḍapāruṣye (Verbal and Physical Assault)

[Page 201 ] [Note: [ L tr. 186-192 :: cf. J tr. 105-108]
N15-16.001a/ deśajātikulādīnām ākrośanyaṅgasaṁhitam |
N15-16.001c/ yad vacaḥ pratikūlārthaṁ vākpāruṣyaṁ tad ucyate || 1 ||
N15-16.002a/ niṣṭhurāślīlatīvratvāt tad api trividhaṁ smṛtam |
N15-16.002c/ gauravānukramād asya daṇḍo 'py atra kramād guruḥ || 2 ||
N15-16.003a/ sākṣepaṁ niṣṭhuraṁ jñeyam aślīlaṁ nyaṅgasaṁyutam |
N15-16.003c/ pātanīyair upakrośais tīvram āhur manīṣiṇaḥ || 3 ||
N15-16.004a/ paragātreṣv abhidroho hastapādāyudhādibhiḥ |
N15-16.004c/ bhasmādibhiś copaghāto daṇḍapāruṣyam ucyate || 4 ||
N15-16.005a/ tasyāpi dṛṣṭaṁ traividhyaṁ mṛdumadhyottamaṁ kramāt |
N15-16.005c/ avagūraṇaniḥsaṅgapātanakṣatadarśanaiḥ || 5 ||
N15-16.006a/ hīnamadhyottamānāṁ tu dravyāṇām samatikramāt |
N15-16.006c/ trīṇy eva sāhasāny āhus tatra kaṇṭakaśodhanam || 6 ||
N15-16.007a/ vidhiḥ pañcavidhas tūkta etayor ubhayor api |
N15-16.007c/ viśuddhir daṇḍabhāktvaṁ ca tatra sambadhyate yathā || 7 ||
[Page 202 ]
N15-16.008a/ pāruṣye sati saṁrambhād utpanne kṣubdhayor dvayoḥ |
N15-16.008c/ sa manyate yaḥ kṣamate daṇḍabhāg yo 'tivartate || 8 ||
N15-16.009a/ pāruṣyadoṣāvṛtayor yugapat sampravṛttayoḥ |
N15-16.009c/ viśeṣaś cen na dṛśyeta vinayaḥ syāt samas tayoḥ || 9 ||
N15-16.010a/ pūrvam ākṣārayed yas tu niyataṁ syāt sa doṣabhāk |
N15-16.010c/ paścād yaḥ so 'py asatkārī pūrve tu vinayo guruḥ || 10 ||
N15-16.011a/ dvayor āpannayos tulyam anubadhnāti yaḥ punaḥ |
N15-16.011c/ sa tayor daṇḍam āpnoti pūrvo vā yadi vetaraḥ || 11 ||
N15-16.012a/ śvapākapaṇḍacaṇḍālavyaṅgeṣu vadhavṛttiṣu |
N15-16.012c/ hastipavrātyadāreṣu gurvācāryāṅganāsu ca || 12 ||
N15-16.013a/ maryādātikrame sadyo ghāta evānuśāsanam |
N15-16.013c/ na ca taddaṇḍapāruṣye doṣam āhur manīṣiṇaḥ || 13 ||
N15-16.014a/ yam eva hy ativarterann ete santaṁ janaṁ nṛṣu |
N15-16.014c/ sa eva vinayaṁ kuryān na tadvinayabhāṅ nṛpaḥ || 14 ||
N15-16.015a/ malā hy ete manuṣyeṣu dhanam eṣāṁ malātmakam |
N15-16.015c/ api tān ghātayed rājā nārthadaṇḍena daṇḍayet || 15 ||
[Page 203 ]
N15-16.016a/ śataṁ brāhmaṇam ākruśya kṣatriyo daṇḍam arhati |
N15-16.016c/ vaiśyo 'dhyardhaṁ śataṁ dve vā śūdras tu vadham arhati || 16 ||
N15-16.017a/ vipraḥ pañcāśataṁ daṇḍyaḥ kṣatriyasyābhiśaṁsane |
N15-16.017c/ vaiśye syād ardhapañcāśac chūdre dvādaśako damaḥ || 17 ||
N15-16.018a/ samavarṇadvijātīnāṁ dvādaśaiva vyatikrame |
N15-16.018c/ vādeṣv avacanīyeṣu tad eva dviguṇaṁ bhavet || 18 ||
N15-16.019a/ kāṇam apy athavā khañjam anyaṁ vāpi tathāvidham |
N15-16.019c/ tathyenāpi bruvan dāpyo rājñā kārṣāpaṇāvaram || 19 ||
N15-16.020a/ na kilbiṣeṇāpavadec chāstrataḥ kṛtapāvanam |
N15-16.020c/ na rājñā dhṛtadaṇḍaṁ ca daṇḍabhāk tadvyatikramāt || 20 ||
N15-16.021a/ loke 'smin dvāv avaktavyāv adaṇḍyau ca prakīrtitau |
N15-16.021c/ brāhmaṇaś caiva rājā ca tau hīdaṁ bibhṛto jagat || 21 ||
N15-16.022a/ patitaṁ patitety uktvā cauraṁ caureti vā punaḥ |
N15-16.022c/ vacanāt tulyadoṣaḥ syān mithyā dvir doṣatāṁ vrajet || 22 ||
N15-16.023a/ nāmajātigrahaṁ teṣām abhidroheṇa kurvataḥ |
N15-16.023c/ nikheyo 'yomayaḥ śaṅkuḥ śūdrasyāṣṭādaśāṅgulaḥ || 23 ||
N15-16.024a/ dharmāpadeśaṁ darpeṇa dvijānām asya kurvataḥ |
N15-16.024c/ taptam āsecayet tailaṁ vaktre śrotre ca pārthivaḥ || 24 ||
[Page 204 ]
N15-16.025a/ yenāṅgenāvaro varṇo brāhmaṇasyāparādhnuyāt |
N15-16.025c/ tad aṅgaṁ tasya chettavyam evaṁ śuddhim avāpnuyāt || 25 ||
N15-16.026a/ sahāsanam abhiprepsur utkṛṣṭasyāvakṛṣṭajaḥ |
N15-16.026c/ kaṭyāṁ kṛṭāṅko nirvāsyaḥ sphigdeśaṁ vāsya kartayet || 26 ||
N15-16.027a/ avaniṣṭhīvato darpād dvāv oṣṭhau chedayen nṛpaḥ |
N15-16.027c/ avamūtrayataḥ śiśnam avaśardhayato gudam || 27 ||
N15-16.028a/ keśeṣu gṛhṇato hastau chedayed avicārayan |
N15-16.028c/ pādayor nāsikāyāṁ ca grīvāyāṁ vṛṣaṇeṣu ca || 28 ||
N15-16.029a/ upakruśya tu rājānaṁ vartmani sve vyavasthitam |
N15-16.029c/ jihvāchedād bhavec chuddhiḥ sarvasvaharaṇena vā || 29 ||
N15-16.030a/ rājani prahared yas tu kṛtāgasy api durmatiḥ |
N15-16.030c/ śūle tam agnau vipaced brahmahatyāśatādhikam || 30 ||
N15-16.031a/ putrāparādhe na pitā na śvavāñ śuni daṇḍabhāk |
N15-16.031c/ na markaṭe ca tatsvāmī tair eva prahito na cet || 31 ||

2.16. Chapter 17 :: Dyūtasamāhvayam (Gambling and Contests)

[Page 205 ] [Note: [ L tr. 193-194 :: cf. J tr. 109-110]
N17.001a/ akṣavardhraśalākādyair devanaṁ jihmakāritam |
N17.001c/ paṇakrīḍā vayobhiś ca padaṁ dyūtasamāhvayam || 1 ||
N17.002a/ sabhikaḥ kārayed dyūtaṁ deyaṁ dadyāc ca tatkṛtam |
N17.002c/ daśakaṁ tu śataṁ vṛddhis tasya syād dyūtakāritā || 2 ||
N17.003a/ dvirabhyastāḥ patanty akṣā glahe yasyākṣadevinaḥ |
N17.003c/ jayaṁ tasyāparasyāhuḥ kitavasya parājayam || 3 ||
N17.004a/ kitaveṣv eva tiṣṭheyuḥ kitavāḥ saṁśayaṁ prati |
N17.004c/ ta eva tasya draṣṭāraḥ syus ta eva ca sākṣiṇaḥ || 4 ||
N17.005a/ aśuddhaḥ kitavo nānyad āśrayed dyūtamaṇḍalam |
N17.005c/ pratihanyān na sabhikaṁ dāpayet tat svam iṣṭataḥ || 5 ||
[Page 206 ]
N17.006a/ kūṭākṣadevinaḥ pāpān nirbhajed dyūtamaṇḍalāt |
N17.006c/ kaṇṭhe 'kṣamālām āsajya sa hy eṣāṁ vinayaḥ smṛtaḥ || 6 ||

2.17. Chapter 18 :: Prakīrṇakam (Miscellaneous)

[Page 207 ] [Note: [ L tr. 195-203 :: cf. J tr. 110-116]
N18.001a/ prakīrṇake punar jñeyā vyavahārā nṛpāśrayāḥ |
N18.001c/ rājñām ājñāpratīghātas tatkarmakaraṇaṁ tathā || 1 ||
N18.002a/ purapradānaṁ sambhedaḥ prakṛtīnāṁ tathaiva ca |
N18.002c/ pāṣaṇḍanaigamaśreṇīgaṇadharmaviparyayāḥ || 2 ||
N18.003a/ pitṛputravivādaś ca prāyaścittavyatikramaḥ |
N18.003c/ pratigrahavilopaś ca kopa āśramiṇām api || 3 ||
N18.004a/ varṇasaṅkaradoṣaś ca tadvṛttiniyamas tathā |
N18.004c/ na dṛṣṭaṁ yac ca pūrveṣu tat sarvaṁ syāt prakīrṇake || 4 ||
N18.005a/ rājā tv avahitaḥ sarvān āśramān paripālayet |
N18.005c/ upāyaiḥ śāstravihitaiś caturbhiḥ prakṛtais tathā || 5 ||
N18.006a/ yo yo varṇo 'vahīyeta yo vodrekam anuvrajet |
N18.006c/ taṁ taṁ dṛṣṭvā svato mārgāt pracyutaṁ sthāpayet pathi || 6 ||
N18.007a/ aśāstrokteṣu cānyeṣu pāpayukteṣu karmasu |
N18.007c/ prasamīkṣyātmano rājā daṇḍaṁ daṇḍyeṣu pātayet || 7 ||
[Page 208 ]
N18.008a/ śrutismṛtiviruddhaṁ ca janānām ahitaṁ ca yat |
N18.008c/ na tat pravartayed rājā pravṛttaṁ ca nivartayet || 8 ||
N18.009a/ nyāyāpetaṁ yad anyena rājñājñānakṛtaṁ ca yat |
N18.009c/ tad apy anyāyavihitaṁ punar nyāye niveśayet || 9 ||
N18.010a/ rājñā pravartitān dharmānyo naro nānupālayet |
N18.010c/ daṇḍyaḥ sa pāpo vadhyaś ca lopayan rājaśāsanam || 10 ||
N18.011a/ āyudhāny āyudhīyānāṁ vāhyādīn vāhyajīvinām |
N18.011c/ veśyāstrīṇām alaṅkāraṁ vādyātodyāni tadvidām || 11 ||
N18.012a/ yac ca yasyopakaraṇaṁ yena jīvanti kārukāḥ |
N18.012c/ sarvasvaharaṇe 'py etān na rājā hartum arhati || 12 ||
N18.013a/ anādiś cāpy anantaś ca dvipadāṁ pṛthivīpatiḥ |
N18.013c/ dīptimatvāc chucitvāc ca yadi na syāt pathaś cyutaḥ || 13 ||
N18.014a/ yadi rājā na sarveṣāṁ varṇānāṁ daṇḍadhāraṇam |
N18.014c/ kuryāt patho vyapetānāṁ vinaśyeyur imāḥ prajāḥ || 14 ||
N18.015a/ brāhmaṇyaṁ brāhmaṇo jahyāt kṣatriyaḥ kṣātram utsṛjet |
N18.015c/ svakarma jahyād vaiśyas tu śūdraḥ sarvān viśeṣayet || 15 ||
[Page 209 ]
N18.016a/ rājānaś cen nābhaviṣyan pṛthivyāṁ daṇḍadhāraṇam |
N18.016c/ śūle matsyān ivāpakṣyan durbalān balavattarāḥ || 16 ||
N18.017a/ satām anugraho nityam asatāṁ nigrahas tathā |
N18.017c/ eṣa dharmaḥ smṛto rājñām arthaś cāmitrapīḍanāt || 17 ||
N18.018a/ na lipyate yathā vahnir dahañ chaśvad imāḥ prajāḥ |
N18.018c/ na lipyate tathā rājā daṇḍaṁ daṇḍyeṣu pātayan || 18 ||
N18.019a/ ājñā tejaḥ pārthivānāṁ sā ca vāci pratiṣṭhitā |
N18.019c/ te yad brūyur asat sad vā sa dharmo vyavahāriṇām || 19 ||
N18.020a/ rājā nāma caraty eṣa bhūmau sākṣāt sahasradṛk |
N18.020c/ na tasyājñām atikramya santiṣṭheran prajāḥ kvacit || 20 ||
N18.021a/ rakṣādhikārād īśatvād bhūtānugrahadarśanāt |
N18.021c/ yad eva rājā kurute tat pramāṇam iti sthitiḥ || 21 ||
N18.022a/ nirguṇo 'pi yathā strīṇāṁ pūjya eva patiḥ sadā |
N18.022c/ prajānāṁ viguṇo 'py evaṁ pūjya eva narādhipaḥ || 22 ||
[Page 210 ]
N18.023a/ tapaḥkrītāḥ prajā rājñā prabhur āsāṁ tato nṛpaḥ |
N18.023c/ tatas tadvacasi stheyaṁ vārtā cāsāṁ tadāśrayā || 23 ||
N18.024a/ pañca rūpāṇi rājāno dhārayanty amitaujasaḥ |
N18.024c/ agner indrasya somasya yamasya dhanadasya ca || 24 ||
N18.025a/ kāraṇād animittaṁ vā yadā krodhavaśaṁ gataḥ |
N18.025c/ prajā dahati bhūpālas tadāgnir abhidhīyate || 25 ||
N18.026a/ yadā tejaḥ samālambya vijigīṣur udāyudhaḥ |
N18.026c/ abhiyāti parān rājā tadendraḥ sa udāhṛtaḥ || 26 ||
N18.027a/ vigatakrodhasantāpo hṛṣṭarūpo yadā nṛpaḥ |
N18.027c/ prajānāṁ darśanaṁ yāti soma ity ucyate tadā || 27 ||
N18.028a/ dharmāsanagataḥ śrīmān daṇḍaṁ dhatte yadā nṛpaḥ |
N18.028c/ samaḥ sarveṣu bhūteṣu tadā vaivasvataḥ yamaḥ || 28 ||
N18.029a/ yadā tv arthiguruprājñabhṛtyādīn avanīpatiḥ |
N18.029c/ anugṛhṇāti dānena tadā sa dhanadaḥ smṛtaḥ || 29 ||
N18.030a/ tasmāt taṁ nāvajānīyān nākrośen na viśeṣayet |
N18.030c/ ājñāyāṁ cāsya tiṣṭheta mṛtyuḥ syāt tadvyatikramāt || 30 ||
N18.031a/ tasya vṛttiḥ prajārakṣā vṛddhaprājñopasevanam |
N18.031c/ darśanaṁ vyavahārāṇām ātmanaś cābhirakṣaṇam || 31 ||
[Page 211 ]
N18.032a/ brāhmaṇān upaseveta nityaṁ rājā samāhitaḥ |
N18.032c/ saṁyuktaṁ brāhmaṇaiḥ kṣatraṁ mūlaṁ lokābhirakṣaṇe || 32 ||
N18.033a/ brāhmaṇasyāparīhāro rājanyāsanam agrataḥ |
N18.033c/ prathamaṁ darśanaṁ prātaḥ sarvebhyaś cābhivādanam || 33 ||
N18.034a/ agraṁ navebhyaḥ sasyebhyo mārgadānaṁ ca gacchataḥ |
N18.034c/ bhaikṣahetoḥ parāgāre praveśas tv anivāritaḥ || 34 ||
N18.035a/ samitpuṣpodakādāneṣv asteyaṁ saparigrahāt |
N18.035c/ anākṣepaḥ parebhyaś ca sambhāṣaś ca parastriyā || 35 ||
N18.036a/ nadīṣv avetanas tāraḥ pūrvam uttaraṇaṁ tathā |
N18.036c/ tareṣv aśulkadānaṁ ca na ced vāṇijyam asya tat || 36 ||
N18.037a/ vartamāno 'dhvani śrānto gṛhṇann anivasan svayam |
N18.037c/ brāhmaṇo nāparādhnoti dvāv ikṣū pañca mūlakān || 37 ||
N18.038a/ nābhiśastān na patitān na dviṣo na ca nāstikāt |
N18.038c/ na sopadhān nānimittaṁ na dātāraṁ prapīḍya ca || 38 ||
[Page 212 ]
N18.039a/ arthānāṁ bhūribhāvāc ca deyatvāc ca mahātmanām |
N18.039c/ śreyān pratigraho rājñāṁ anyeṣāṁ brāhmaṇād ṛte || 39 ||
N18.040a/ brāhmaṇaś caiva rājā ca dvāv apy etau dhṛtavratau |
N18.040c/ naitayor antaraṁ kiñcit prajādharmābhirakṣaṇāt || 40 ||
N18.041a/ dharmajñasya kṛtajñasya rakṣārthaṁ śāsato 'śucīn |
N18.041c/ medhyam eva dhanaṁ prāhus tīkṣṇasyāpi mahīpateḥ || 41 ||
N18.042a/ śucīnām aśucīnāṁ ca sannipāto yathāmbhasām |
N18.042c/ samudre samatāṁ yāti tadvad rājño dhanāgamaḥ || 42 ||
N18.043a/ yathā cāgnau sthitaṁ dīpte śuddhim āyāti kāñcanam |
N18.043c/ evam evāgamā sarve śuddhim āyānti rājasu || 43 ||
N18.044a/ ya eva kaścit svadravyaṁ brāhmaṇebhyaḥ prayacchati |
N18.044c/ tad rājñāpy anumantavyam eṣa dharmaḥ sanātanaḥ || 44 ||
[Page 213 ]
N18.045a/ anyaprakārād ucitād bhūmeḥ ṣaḍbhāgasañjñitāt |
N18.045c/ baliḥ sa tasya vihitaḥ prajāpālanavetanam || 45 ||
N18.046a/ śakyaṁ tat punar ādātuṁ yad abrāhmaṇasātkṛtam |
N18.046c/ brāhmaṇāya tu yad dattaṁ na tasya haraṇaṁ punaḥ || 46 ||
N18.047a/ dānam adhyayanaṁ yajñas tasya karma trilakṣaṇam |
N18.047c/ yājanādhyāpane vṛttis tṛtīyas tu pratigrahaḥ || 47 ||
N18.048a/ svakarmaṇi dvijas tiṣṭhed vṛttim āhārayet kṛtām |
N18.048c/ nāsadbhyaḥ pratigṛhṇīyād varṇebhyo niyame 'sati || 48 ||
N18.049a/ aśucir vacanād yasya śucir bhavati puruṣaḥ |
N18.049c/ śuciś caivāśuciḥ sadyaḥ kathaṁ rājā na daivatam || 49 ||
N18.050a/ vidur ya eva devatvaṁ rājño hy amitatejasaḥ |
N18.050c/ tasya te pratigṛhṇanto na lipyante dvijātayaḥ || 50 ||
N18.051a/ loke 'smin maṅgalāny aṣṭau brāhmaṇo gaur hutāśanaḥ |
N18.051c/ hiraṇyaṁ sarpir āditya āpo rājā tathāṣṭamaḥ || 51 ||
[Page 214 ]
N18.052a/ etāni satataṁ paśyen namasyed arcayec ca tān |
N18.052c/ pradakṣiṇaṁ ca kurvīta tathā hy āyur na hīyate || 52 ||

3. Part 3 :: Pariśiṣṭam (Addenda)

[Page 215 ] [Note: [ L tr. 204-228 :: cf. J tr. 45-54 (part)]

3.1. Chapter 19 :: Steyam (Theft)

[Note: [ L tr. 204-219 :: J tr. n/a]
N19.001a/ dvividhās taskarā jñeyāḥ paradravyāpahāriṇaḥ |
N19.001c/ prakāśāś cāprakāśāś ca tān vidyād ātmavān nṛpaḥ || 1 ||
N19.002a/ prakāśavañcakās tatra kūṭamānatulāśritāḥ |
N19.002c/ utkoṭakāḥ sāhasikāḥ kitavāḥ paṇyayoṣitaḥ || 2 ||
N19.003a/ pratirūpakarāś caiva maṅgaloddeśavṛttayaḥ |
N19.003c/ ity evamādayo jñeyāḥ prakāśalokavañcakāḥ || 3 ||
N19.004a/ aprakāśāś ca vijñeyā bahirabhyantarāśritāḥ |
N19.004c/ suptān pramattāṁś ca narā muṣṇanty ākramya caiva te || 4 ||
N19.005a/ deśagrāmagṛhaghnāś ca pathighnā granthimocakāḥ |
N19.005c/ ity evamādayo jñeyā aprakāśāś ca taskarāḥ || 5 ||
[Page 216 ]
N19.006a/ tān viditvā sukuśalaiś cārais tatkarmakāribhiḥ |
N19.006c/ anusṛtya gṛhītavyā gūḍhapraṇihitair naraiḥ || 6 ||
N19.007a/ sabhāprapāpūpaśālāveśamadyānnavikrayāḥ |
N19.007c/ catuṣpathāś caityavṛkṣāḥ samājāḥ prekṣaṇāni ca || 7 ||
N19.008a/ śūnyāgārāṇy araṇyāni devatāyatanāni ca |
N19.008c/ cārair vineyāny etāni cauragrahaṇatatparaiḥ || 8 ||
N19.009a/ tathaivānye praṇihitāḥ śraddheyāś citravādinaḥ |
N19.009c/ carā hy utsāhayeyus tāṁs taskarān pūrvataskarāḥ || 9 ||
N19.010a/ annapānasamādānaiḥ samājotsavadarśanaiḥ |
N19.010c/ tathā cauryāpadeśaiś ca kuryus teṣāṁ samāgamam || 10 ||
N19.011a/ ye tatra nopasarpanti sṛtāḥ praṇihitā api |
N19.011c/ te 'bhisārya gṛhītavyāḥ saputrapaśubāndhavāḥ || 11 ||
[Page 217 ]
N19.012a/ yāṁs tatra caurān gṛhṇīyāt tān vitāḍya viḍambya ca |
N19.012c/ avaghuṣya ca sarvatra vadhyāś citravadhena te || 12 ||
N19.013a/ na tv ahoḍhānvitāś caurā rājñā vadhyā hy anāgamāḥ |
N19.013c/ sahoḍhān sopakaraṇān kṣipraṁ caurān praśāsayet || 13 ||
N19.014a/ svadeśaghātino ye syus tathā panthāvarodhinaḥ |
N19.014c/ teṣāṁ sarvasvam ādāya bhūyo nindāṁ prakalpayet || 14 ||
N19.015a/ ahoḍhān vimṛśec caurān gṛhītān pariśaṅkayā |
N19.015c/ bhayopadhābhiś citrābhir brūyus tathā yathākṛtam || 15 ||
N19.016a/ deśaṁ kālaṁ diśaṁ jātiṁ nāma vā sampratiśrayam |
N19.016c/ kṛtyaṁ karmakarā vā syuḥ praṣṭavyās te vinigrahe || 16 ||
N19.017a/ varṇasvarākārabhedāt sasandigdhanivedanāt |
N19.017c/ adeśakāladṛṣṭatvād vāsasyāpy aviśodhanāt || 17 ||
[Page 218 ]
N19.018a/ asadvyayāt pūrvacauryād asatsaṁsargakāraṇāt |
N19.018c/ leśair apy avagantavyā na hoḍhenaiva kevalam || 18 ||
N19.019a/ dasyuvṛtte yadi nare śaṅkā syāt taskare 'pi vā |
N19.019c/ yadi spṛśyeta leśena kāryaḥ syāc chapathaḥ tataḥ || 19 ||
N19.020a/ caurāṇāṁ bhaktadā ye syus tathāgnyudakadāyakāḥ |
N19.020c/ āvāsadā deśikadās tathaivottaradāyakāḥ || 20 ||
N19.021a/ kretāraś caiva bhāṇḍānāṁ pratigrāhiṇa eva ca |
N19.021c/ samadaṇḍāḥ smṛtā hy ete ye ca pracchādayanti tān || 21 ||
N19.022a/ rāṣṭreṣu rāṣṭrādhikṛtāḥ sāmantāś caiva coditāḥ |
N19.022c/ abhyāghāteṣu madhyasthā yathā caurās tathaiva te || 22 ||
N19.023a/ gocare yasya muṣyeta tena caurāḥ prayatnataḥ |
N19.023c/ mṛgyā dāpyo 'nyathā moṣaṁ padaṁ yadi na nirgatam || 23 ||
[Page 219 ]
N19.024a/ nirgate tu pade tasmin naṣṭe 'nyatra nipātite |
N19.024c/ sāmantān mārgapālāṁś ca dikpālāṁś caiva dāpayet || 24 ||
N19.025a/ gṛhe vai muṣite rājā cauragrāhāṁs tu dāpayet |
N19.025c/ ārakṣakān rāṣṭrikāṁś ca yadi cauro na labhyate || 25 ||
N19.026a/ yadi vā dāpyamānānāṁ tasmin moṣe tu saṁśayaḥ |
N19.026c/ muṣitaḥ śapathaṁ śāpyo moṣe vaiśodhyakāraṇāt || 26 ||
N19.027a/ acaure dāpite moṣaṁ cauryavaiśodhyakāraṇāt |
N19.027c/ caure labdhe labheyus te dviguṇaṁ pratipāditāḥ || 27 ||
N19.028a/ caurahṛtaṁ prayatnena sarūpaṁ pratipādayet |
N19.028c/ tadabhāve tu mūlyaṁ syād daṇḍaṁ dāpyaś ca tatsamam || 28 ||
N19.029a/ kāṣṭhakāṇḍatṛṇādīnāṁ mṛnmayānāṁ tathaiva ca |
N19.029c/ veṇuvaiṇavabhāṇḍānāṁ vetrasnāyvasthicarmaṇām || 29 ||
[Page 220 ]
N19.030a/ śākaharitamūlānāṁ haraṇe phalapuṣpayoḥ |
N19.030c/ gorasekṣuvikārāṇāṁ tathā lavaṇatailayoḥ || 30 ||
N19.031a/ pakvānnānāṁ kṛtānnānāṁ madyānām āmiṣasya ca |
N19.031c/ sarveṣām alpamūlyānāṁ mūlyāt pañcaguṇo damaḥ || 31 ||
N19.032a/ tulādharimameyānāṁ gaṇimānāṁ ca sarvaśaḥ |
N19.032c/ ebhyas tūtkṛṣṭamūlyānāṁ mūlyād daśaguṇo damaḥ || 32 ||
N19.033a/ dhānyaṁ daśabhyaḥ kumbhebhyo harato 'bhyadhikaṁ vadhaḥ |
N19.033c/ nyūnaṁ tv ekādaśaguṇaṁ daṇḍaṁ dāpyo 'bravīn manuḥ || 33 ||
N19.034a/ suvarṇarajatādīnām uttamānāṁ ca vāsasām |
N19.034c/ ratnānāṁ caiva mukhyānāṁ śatād abhyadhikaṁ vadhaḥ || 34 ||
N19.035a/ puruṣaṁ harataḥ pātyo daṇḍa uttamasāhasaḥ |
N19.035c/ sarvasvaṁ strīṁ tu harataḥ kanyāṁ tu harato vadhaḥ || 35 ||
[Page 221 ]
N19.036a/ mahāpaśūn stenayato daṇḍa uttamasāhasaḥ |
N19.036c/ madhyamo madhyamapaśuṁ pūrvaḥ kṣudrapaśuṁ haran || 36 ||
N19.037a/ caturviṁśāvaraḥ pūrvaḥ paraḥ ṣaṇṇavatir bhavet |
N19.037c/ śatāni pañca tu paro madhyamo dviśatāvaraḥ || 37 ||
N19.038a/ sahasraṁ tūttamo jñeyaḥ paraḥ pañcaśatāvaraḥ |
N19.038c/ trividhaḥ sāhaseṣv eva daṇḍaḥ proktaḥ svayambhuvā || 38 ||
N19.039a/ prathame granthibhedānām aṅgulyaṅguṣṭhayor vadhaḥ |
N19.039c/ dvitīye caiva taccheṣaṁ daṇḍaḥ pūrvaś ca sāhasaḥ || 39 ||
N19.040a/ goṣu brāhmaṇasaṁsthāsu sthūrāyāś chedanaṁ bhavet |
N19.040c/ dāsīṁ tu harato nityam ardhapādavikartanam || 40 ||
N19.041a/ yena yena viśeṣeṇa stenāṅgena viceṣṭate |
N19.041c/ tat tad evāsya chettavyaṁ tan manor anuśāsanam || 41 ||
N19.042a/ garīyasi garīyāṁsam agarīyasi vā punaḥ |
N19.042c/ stene nipātayed daṇḍaṁ na yathā prathame tathā || 42 ||
[Page 222 ]
N19.043a/ daśa sthānāni daṇḍasya manuḥ svāyambhuvo 'bravīt |
N19.043c/ triṣu varṇeṣu yāni syur brāhmaṇo rakṣitaḥ sadā || 43 ||
N19.044a/ upastham udaraṁ jihvā hastau pādau ca pañcamam |
N19.044c/ cakṣur nāsā ca karṇau ca dhanaṁ dehas tathaiva ca || 44 ||
N19.045a/ aparādhaṁ parijñāya deśakālau ca tattvataḥ |
N19.045c/ sārānubandhāv ālokya daṇḍān etān prakalpayet || 45 ||
N19.046a/ na mitrakāraṇād rājñā vipulād vā dhanāgamāt |
N19.046c/ utsraṣṭavyaḥ sāhasikas tyaktātmā manur abravīt || 46 ||
N19.047a/ yāvān avadhyasya vadhe tāvān vadhyasya mokṣaṇe |
N19.047c/ bhavaty adharmo nṛpater dharmas tu viniyacchataḥ || 47 ||
N19.048a/ na jātu brāhmaṇaṁ hanyāt sarvapāpeṣv api sthitam |
N19.048c/ nirvāsaṁ kārayet kāmam iti dharmo vyavasthitaḥ || 48 ||
N19.049a/ sarvasvaṁ vā hared rājā caturthaṁ vāvaśeṣayet |
N19.049c/ bhṛtyebhyo 'nusmaran dharmaṁ prājāpatyam iti sthitiḥ || 49 ||
[Page 223 ]
N19.050a/ brāhmaṇasyāparādhe tu catuḥsv aṅko vidhīyate |
N19.050c/ gurutalpe surāpāne steye brāhmaṇahiṁsane || 50 ||
N19.051a/ gurutalpe bhagaḥ kāryaḥ surāpāne dhvajaḥ smṛtaḥ |
N19.051c/ steye tu śvapadaṁ kṛtvā śikhipittena kūṭayet || 51 ||
N19.052a/ viśirāḥ puruṣaḥ kāryo lalāṭe bhrūṇaghātinaḥ |
N19.052c/ asambhāṣyaś ca kartavyas tan manor anuśāsanam || 52 ||
N19.053a/ rājā stenena gantavyo muktakeśena dhāvatā |
N19.053c/ ācakṣāṇena tatsteyam evaṁ kartāsmi śādhi mām || 53 ||
N19.054a/ anenā bhavati stenaḥ svakarmapratipādanāt |
N19.054c/ rājānaṁ tat spṛśed ena utsṛjantaṁ sakilbiṣam || 54 ||
N19.055a/ rājabhir dhṛtadaṇḍās tu kṛtvā pāpāni mānavāḥ |
N19.055c/ nirmalāḥ svargam āyānti santaḥ sukṛtino yathā || 55 ||
[Page 224 ]
N19.056a/ śāsanād vā vimokṣād vā steno mucyate kilbiṣāt |
N19.056c/ aśāsanāt tu tad rājā stenasyāpnoti kilbiṣam || 56 ||
N19.057a/ gurur ātmavatāṁ śāstā śāstā rājā durātmanām |
N19.057c/ atha pracchannapāpānāṁ śāstā vaivasvato yamaḥ || 57 ||
N19.058a/ aṣṭāpādyaṁ tu śūdrasya steye bhavati kilbiṣam |
N19.058c/ dvir aṣṭāpādyaṁ vaiśyasya dvātriṁśat kṣatriyasya tu || 58 ||
N19.059a/ brāhmaṇasya catuḥṣaṣṭīty evaṁ svāyambhuvo 'bravīt |
N19.059c/ tatrāpi ca viśeṣeṇa vidvatsv abhyadhikaṁ bhavet || 59 ||
N19.060a/ śārīraś cārthadaṇḍaś ca daṇḍas tu dvividhaḥ smṛtaḥ |
N19.060c/ śārīrā daśadhā proktā arthadaṇḍās tv anekadhā || 60 ||
[Page 225 ]
N19.061a/ kākaṇyādis tv arthadaṇḍaḥ sarvasvāntas tathaiva ca |
N19.061c/ śārīras tv avarodhādir jīvitāntas tathaiva ca || 61 ||
N19.062a/ kākaṇyādis tu yo daṇḍaḥ sa tu māṣāparaḥ smṛtaḥ |
N19.062c/ māṣāvarādyo yaḥ proktaḥ kārṣāpaṇaparas tu saḥ || 62 ||
N19.063a/ kārṣāpaṇāparādyas tu catuḥkārṣāpaṇaḥ paraḥ |
N19.063c/ dvyavaro 'ṣṭāparaś cānyas tryavaro dvādaśottaraḥ || 63 ||
N19.064a/ kārṣāpaṇādyā ye proktāḥ sarve te syuś caturguṇāḥ |
N19.064c/ evam anye tu vijñeyāḥ prāk ca te pūrvasāhasāt || 64 ||
N19.065a/ kārṣāpaṇo dakṣiṇasyāṁ diśi raupyaḥ pravartate |
N19.065c/ paṇair nibaddhaḥ pūrvasyāṁ ṣoḍaśaiva paṇāḥ sa tu || 65 ||
N19.066a/ māṣo viṁśatibhāgas tu jñeyaḥ kārṣāpaṇasya tu |
N19.066c/ kākaṇī tu caturbhāgo māṣasya ca paṇasya ca || 66 ||
[Page 226 ]
N19.067a/ pāñcanadyāḥ pradeśe tu sañjñā yā vyāvahārikī |
N19.067c/ kārṣāpaṇapramāṇaṁ tu nibaddham iha vai tayā || 67 ||
N19.068a/ kārṣāpaṇo 'ṇḍikā jñeyāś catasras tās tu dhānakaḥ |
N19.068c/ taddvādaśa suvarṇasya dīnāraś citrakaḥ smṛtaḥ || 68 ||
N19.069a/ vārttāṁ trayīṁ cāpy atha daṇḍanītim
rājānuvartet santatāpramattaḥ |
N19.069c/ hanyād upāyair nipuṇair gṛhītān
pure ca rāṣṭre nigṛhṇīyāt pāpān || 69 ||

3.2. Chapter 20 :: Divyāni (Ordeals)

[Page 227 ] [Note: [ L tr. 220-228 :: cf. J tr. 45-54]
N20.001a/ yadā sākṣī na vidyate vivāde vadatāṁ nṛṇām |
N20.001c/ tadā divyaiḥ parīkṣeta śapathaiś ca pṛthagvidhaiḥ || 1 ||
N20.002a/ satyaṁ vāhanaśastrāṇi gobījarajatāni ca |
N20.002c/ devatāpitṛpādāś ca dattāni sukṛtāni ca || 2 ||
N20.003a/ mahāparādhe divyāni dāpayet tu mahīpatiḥ |
N20.003c/ alpeṣu ca naraḥ śreṣṭhaḥ śapathaiḥ śāpayen naram || 3 ||
N20.004a/ ete hi śapathāḥ proktāḥ sukarās svalpasaṁśaye |
N20.004c/ sāhaseṣv abhiśāpe ca vidhir divyaḥ prakīrtitaḥ || 4 ||
N20.005a/ sandigdhe 'rthe 'bhiyuktānāṁ pracchanneṣu viśeṣataḥ |
N20.005c/ divyaḥ pañcavidho jñeya ity āha bhagavān manuḥ || 5 ||
N20.006a/ dhaṭo 'gnir udakaṁ caiva viṣaṁ kośaś ca pañcamaḥ |
N20.006c/ uktāny etāni divyāni dūṣitānāṁ viśodhane || 6 ||
N20.007a/ sandigdheṣv abhiyuktānāṁ viśuddhyarthaṁ mahātmanā |
N20.007c/ nāradena punaḥ proktāḥ satyānṛtavibhāvanāḥ |
N20.007e/ vādino 'numatenainaṁ kārayen nānyathā budhaḥ || 7 ||

3.2.1. Section 1 :: Dhaṭaḥ (The Balance)

[Page 228 ] [Note: [ L tr. 221-222 :: cf. J tr. 46-48]
N20.008a/ caturhastau tulāpādāv ucchrayeṇa prakīrtitau |
N20.008c/ ṣaḍḍhastaṁ tu tayor dṛṣṭaṁ pramāṇaṁ parimāṇataḥ || 8 ||
N20.009a/ pādayor antaraṁ hastaṁ bhaved adhyardham eva ca |
N20.009c/ śikyadvayaṁ samāsajya dhaṭe karkaṭake dṛḍhe || 9 ||
N20.010a/ tulayitvā naraṁ pūrvaṁ cihnaṁ kuryād dhaṭasya tu |
N20.010c/ kakṣāsthānena taṁ tulyam avatārya tato dhaṭāt || 10 ||
N20.011a/ samayaiḥ parigṛhyainaṁ punar āropayen naraḥ |
N20.011c/ tasminn evaṁ kṛte sā cet kakṣe sthāpya suniścalā || 11 ||
N20.012a/ tulito yadi vardheta śuddhaḥ syān nātre saṁśayaḥ |
N20.012c/ samo vā hīyamāno vā na viśuddho bhaven naraḥ || 12 ||
[Page 229 ]
N20.013a/ dharmaparyāyavacanair dhaṭa ity abhidhīyase |
N20.013c/ tvaṁ vetsi sarvabhūtānāṁ pāpāni sukṛtāni ca |
N20.013e/ tvam eva dhaṭa jānīṣe na vidur yāni mānuṣāḥ || 13 ||
N20.014a/ vyavahārābhiśasto 'yaṁ mānuṣas tulyate tathā |
N20.014c/ tad eva saṁśayāpannaṁ dharmatas trātum arhasi || 14 ||

3.2.2. Section 2 :: Agniḥ (The Fire)

[Note: [ L tr. 222-223 :: cf. J tr. 48-50]
N20.015a/ ata ūrdhvaṁ pravakṣyāmi lohasya vidhim uttamam |
N20.015c/ dvātriṁśadaṅgulāni tu maṇḍalān maṇḍalāntaram || 15 ||
N20.016a/ aṣṭābhir maṇḍalair evam aṅgulānāṁ śatadvayam |
N20.016c/ caturviṁśat samākhyātaṁ saṅkhyātattvārthadarśibhiḥ || 16 ||
N20.017a/ kalpitair maṇḍalair evam uṣitasya śucer api |
N20.017c/ saptāśvatthasya pattrāṇi sūtreṇāveṣṭya hastayoḥ || 17 ||
N20.018a/ vidadhyāt taptalohasya pañcāśatpalam sammitam |
N20.018c/ hastābhyāṁ piṇḍam ādāya śanaiḥ saptapadaṁ vrajet || 18 ||
[Page 230 ]
N20.019a/ na maṇḍalam atikrāmen nāpy arvāk pādayet padam |
N20.019c/ na ca pātayetāprāptaḥ yāvadbhūmir prakalpitā || 19 ||
N20.020a/ tīrtvānena vidhānena maṇḍalāni samāhitaḥ |
N20.020c/ adagdhaḥ sarvato yas tu sa viśuddho bhaven naraḥ || 20 ||
N20.021a/ bhayād vā pātayate yas tv adagdho yo vibhāvyate |
N20.021c/ punas taṁ hārayel lohaṁ sthitir eṣā purātanī |
N20.021e/ anena vidhinā kāryo hutāśasamayaḥ smṛtaḥ || 21 ||
N20.022a/ tvam agne sarvabhūtānām antaścarasi sākṣivat |
N20.022c/ sukṛtaṁ duḥkṛtaṁ lokenājñātaṁ vidyate tvayā || 22 ||
N20.023a/ pracchannāni manuṣyāṇāṁ pāpāni sukṛtāni ca |
N20.023c/ yathāvad eva jānīṣe na vidur yāni mānuṣāḥ || 23 ||
N20.024a/ vyavahārābhiśasto 'yaṁ puruṣaḥ śuddhim icchati |
N20.024c/ tad enaṁ saṁśayāpannaṁ dharmatas trātum arhasi || 24 ||

3.2.3. Section 3 :: Jalam (The Water)

[Note: [ L tr. 224-225 :: cf. J tr. 50-51]
N20.025a/ ataḥ paraṁ pravakṣyāmi toyasya vidhim uttamam |
N20.025c/ nātikrūreṇa dhanuṣā prerayet sāyakatrayam || 25 ||
[Page 231 ]
N20.026a/ madhyamas tu śaro grāhyaḥ puruṣeṇa yavīyasā |
N20.026c/ pratyānītasya tasyātha sa viśuddho bhaven naraḥ || 26 ||
N20.027a/ anyathā na viśuddhaḥ syād ekāṅgam api darśayet |
N20.027c/ sthānād anyatra vā gacched yasmin pūrvaṁ niveṣitaḥ || 27 ||
N20.028a/ striyas tu na balāt kāryā na pumān api durbalaḥ |
N20.028c/ bhīrutvād yoṣito mṛtyuḥ kṛśasyāpi balāt kuryāt |
N20.028e/ sahasā prāpnuyāt sarvāṁs tasmād etān na majjayet || 28 ||
N20.029/ toyamadhye manuṣyasya gṛhītvorū susaṁyataḥ || 29
N20.030a/ satyānṛtavibhāgasya toyāgnī spaṣṭakṛttamau |
N20.030c/ yataś cāgnir abhūd asmāt tatas toyaṁ viśiṣyate || 30 ||
N20.031a/ kriyate dharmatattvajñair dūṣitānāṁ viśodhanam |
N20.031c/ tasmāt satyena bhagavañ jaleśa trātum arhasi || 31 ||

3.2.4. Section 4 :: Viṣam (The Poison)

[Note: [ L tr. 225-226 :: cf. J tr. 52-53]
N20.032a/ ataḥ paraṁ pravakṣyāmi viṣasya vidhim uttamam |
N20.032c/ tulayitvā viṣaṁ pūrvaṁ deyam etad dhimāgame || 32 ||
[Page 232 ]
N20.033a/ na pūrvāhṇe na madhyāhne na sandhyāyāṁ tu dharmavit |
N20.033c/ śaradgrīṣmavasanteṣu varṣāsu ca na dāpayet || 33 ||
N20.034a/ bhagnaṁ ca dāritaṁ caiva dhūpitaṁ miśritaṁ tathā |
N20.034c/ kālakūṭam alambuṁ ca viṣaṁ yatnena varjayet || 34 ||
N20.035a/ śārṅgahaimavataṁ śastaṁ gandhavarṇarasānvitam |
N20.035c/ mahādoṣavate deyaṁ rājñā tattvabubhutsayā || 35 ||
N20.036a/ na bālāturavṛddheṣu naiva svalpāparādhiṣu |
N20.036c/ viṣasya tu yavān sapta dadyāc chodye ghṛtaplutān || 36 ||
N20.037a/ viṣasya palaṣaḍbhāgād bhāgo viṁśatimas tu yaḥ |
N20.037c/ tam aṣṭabhāgahīnaṁ tu śodhye dadyād ghṛtaplutam || 37 ||
N20.038a/ yathoktena vidhānena viprān sprṣṭvānumoditaḥ |
N20.038c/ sopavāsaś ca khādeta devabrāhmaṇasannidhau || 38 ||
N20.039a/ viṣaṁ vegaklamāpetaṁ sukhena yadi jīryate |
N20.039c/ viśuddham iti taṁ jñātvā rājā satkṛtya mokṣayet || 39 ||
N20.040a/ tvaṁ viṣa brahmaṇaḥ putraḥ satyadharmaratau sthitaḥ |
N20.040c/ śodhayainaṁ naraṁ pāpāt satyenāsyāmṛtībhava || 40 ||

3.2.5. Section 5 :: Kośaḥ (The Holy Water)

[Note: [ L tr. 226-228 :: cf. J tr. 53-54]
N20.041/ ataḥ paraṁ pravakṣyāmi kośasya vidhim uttamam || 41 ||
N20.042a/ pūrvāhṇe sopavāsasya snātasyārdrapaṭasya ca |
N20.042c/ saśūkasyāvyasaninaḥ kośapānaṁ vidhīyate || 42 ||
[Page 233 ]
N20.043a/ yadbhaktaḥ so 'bhiyuktaḥ syāt taddaivatyaṁ tu pāyayet |
N20.043c/ saptāhād yasya dṛśyate dvisaptāhena vā punaḥ |
N20.043e/ pratyātmikaṁ tu yatkiñcit saiva tasya vibhāvanā || 43 ||
N20.044a/ dvisaptāhāt paraṁ yasya mahad vā vaikṛtaṁ bhavet |
N20.044c/ nābhiyojyaḥ sa viduṣāṁ kṛtakālavyatikramāt || 44 ||
N20.045a/ mahāparādhe nirdharme kṛtaghne klībakutsite |
N20.045c/ nāstikavrātyadāseṣu kośapānaṁ vivarjayet || 45 ||
N20.046a/ yathoktena prakāreṇa pañca divyāni dharmavit |
N20.046c/ dadyād rājābhiyuktānāṁ pretya ceha ca nandati || 46 ||
N20.047a/ na viṣaṁ brāhmaṇe dadyān na lohaṁ kṣatriyo haret |
N20.047c/ na nimajjyāpsu vaiśyaś ca śūdraḥ kośaṁ na pāyayet || 47 ||
[Page 234 ]
N20.048a/ varṣāsu na viṣaṁ dadyāt hemante nāpsu majjayet |
N20.048c/ na lohaṁ hārayed grīṣme na kośaṁ pāyayen niśi || 48 ||
nāradīyadharmaśāstraḥ samāptaḥ

Appendix A Appendix A: Bibliographic Notes

Author: Nārada
Editor: Yasuke Ikari ; Richard Mahoney
Title: The Nāradasmṛti - SARIT transcript
Place: London
Publisher: SARIT: Search and Retrieval of Indic Texts
Year: 2009
Version: 0.1_002
Subject: Hindu law -- Sources
Language: Sanskrit ; English
Citation: The Nāradasmṛti - SARIT transcript, Ikari, Yasuke, compilation, data entry, proof correction, Mahoney, Richard, editing and conversion to TEI markup, (London: SARIT: Search and Retrieval of Indic Texts, 2009), Id. No. 0001-00000004.
Description: UTF-8 encoded XML file ; approx. 260000 bytes
Identifier: 0001-00000004
Remarks: The base e-text was: Ikari, Yasuke, editor, Nāradasmṛti - Kyoto Digital Version, (Kyoto: Kyoto University, 1992), ASCII text file; approx. 119400 bytes.

The source edition for the base e-text was: Lariviere, R.W., editor, The Nāradasmṛti: Part One, Text, (Philadelphia: Department of South Asia Regional Studies, University of Pennsylvania, 1989).

The SARIT transcript of the base e-text was correlated with: 1.) Lariviere, R.W., trans., The Nāradasmṛti: Part Two, Translation, (Philadelphia: Department of South Asia Regional Studies, University of Pennsylvania, 1989); and 2.) Jolly, J., trans., Náradíya dharmasástra or the institutes of Nárada / translated for the first time from the unpublished Sanskrit original by Julius Jolly ; with a preface notes chiefly critical an index of quotations from Nárada in the principal Indian digests and a general index, (London: Trübner, 1876).
Funder: The British Association for South Asian Studies ; The British Academy
Rights: Copyright (C) 1992 Yasuke Ikari. All rights reserved. ; Copyright (C) 2009 Dominik Wujastyk. All rights reserved. For more complete details please refer to the Availability Section of the Text Encoding Initiative (TEI) Header.

Appendix B Appendix B: Text Input System

(1)
Sanskrit diacritics are entered using the Unicode Standard Encoding (utf-8):
vowels and diphthongs:
a, ā, i, ī, u, ū, ṛ, ṝ, ḷ, e, ai, o, au
gutturals:
k, kh, g, gh, ṅ
palatals:
c, ch, j, jh, ñ
cerebrals:
ṭ, ṭh, ḍ, ḍh, ṇ
dentals:
t, th, d, dh, n
labials:
p, ph, b, bh, m
semivowels:
y, r, l, v
sibilants:
ś, ṣ, s
aspirate:
h
anusvāra:
visarga:
avagraha:
'
(2)
Anusvāra is transliterated by:
before gutturals
ñ
before palatals
before cerebrals
n
before dentals
m
before labials
(3)
Members of a compound are sometimes separated by periods.
(4)
External sandhi is decomposed with -.
(5)
Mūla Text rearranged from Prof. Lariviere's critical edition of the text. For the details of the text of critical edition, see Prof. Lariviere's introduction. Mūla text copied from Prof. Lariviere's file for the edition of text with commentary. Critical apparatus is omitted in this version (mūla text with apparatus is also available from Yasuke Ikari).

Appendix C Appendix C: References Declaration

(1)
References to each portion of the Sanskrit text have been placed at the start of each line: e.g., NM01.009c/ refers to Lariviere's edition of the Nāradasmṛti, Mātṛkā 1, Verse 9, Line 2; N01.009a/ refers to Lariviere's edition of the Nāradasmṛti, Chapter 1, Verse 9, Line 1 - Lariviere, R.W., op. cit..
(2)
Mātṛkā and chapter headings are from: Lariviere, R.W., op. cit..
(3)
Page references to Lariviere's edition of the Sanskrit text have been placed in the body of the text: e.g., -- 49 -- refers to Lariviere's edition, page 49 - Lariviere, R.W., op. cit..
(4)
Page references to Lariviere's and Jolly's English translations have been placed below and to the right of the section headings: e.g., [ L tr. 96-99 :: cf. J tr. 55-56 refers to Lariviere's translation, pages 96 to 99, and Jolly's translation, pages 55 to 56 - Lariviere, R.W. and Jolly, J., op. cit..
(5)
``J edn Mā'' refers to the Prolegomena in: Jolly, J., editor, Nāradasmṛtiḥ, (Calcutta: Asiatic Society of Bengal, 1885-86) Bibliotheca Indica: a collection of oriental works, new series, nos 542, 566, 595.


Nārada. Date: Mon Aug 24 14:38:09 NZST 2009