21
viaḍāharantarālaṃ kaaṃ suseṇassa rosa-hasieṇa phuḍaṃ
uppāa-ruhira-ambaṃ majjha-pphuḍia-raï-maṇḍalaṃ miva vaaṇaṃ
harisa-pariambhieṇa a addhullasia-raï-bimba-amba-cchaviṇā
purao-huttārambho muheṇa divaso vva pāaḍo vāli-suo
ṇecchaï ṇivvūḍha-bharo lahuaṃ dappuddhaattaṇaṃ pavaṇa-suo
kaa-pesaṇassa sohaï dhīraṃ cia mahaï rakkhiuṃ vaaṇijjaṃ
ṇibbhacchioahi-ravaṃ phuḍiāhara-ṇivvaḍanta-dāḍhā-hīraṃ
hasaï kaï-dappa-pasamia-rosa-virajjanta-loaṇo suggīvo
ṇavari sumittā-taṇao āsaṅghanto gurussa ṇiaaṃ ca balaṃ
ṇa a cintei ṇa jampaï uahiṃ sadasāṇaṇaṃ taṇaṃ va gaṇento
rahuṇāhassa vi diṭṭhī vāṇara-vaïṇo phuranta-vidduma-ambaṃ
vaaṇaṃ vaaṇāhi calā kamalaṃ kamalāhi bhamara-panti vva gaā
antyakulaaṃ 3
to vaa-pariṇāmoṇaa-bhumaā-vali-rubbhamāṇa-diṭṭhi-cchoho
āsaṇṇa-dhavala-mihiā-parikkhalantosahi-ppaho vva mahiharo
kara-vāria-kaï-loo suggīva-viiṇṇa-bhāsuracchi-cchoho
jālāhaa-duma-ṇivaho phuliṅga-piṅgalia-mahiharo vva vaṇa-davo
jampaï ricchāhivaī uṇṇāmeūṇa mahi-aladdhanta-ṇihaṃ
khalia-vali-bhaṅga-dāvia-vitthaa-bahala-vaṇa-kandaraṃ vaccha-aḍaṃ
saggaṃ apārijāaṃ kotthuha-lacchi-rahiaṃ mahumahassa uraṃ
sumirāmi mahaṇa-purao a-muddha-andaṃ ca hara-aḍā pabbhāraṃ
mahumaha-hatthammi mae ṇakkhukkhuḍia-sarasaṃ mahāsura-hiaaṃ