65
sasi-bimba-pāsa-ṇihasaṇa-kasaṇa-silā-bhitti-pasariāmaa-lehaṃ
joṇhā-jala-pabbālia-visamumhāanta-muṇia-ravi-raha-maggaṃ
siharālīṇa-miaṅkaṃ virala-ṭṭhia-gahia-salila-jalaa-kkhaṇḍaṃ
khuḍiuvvūḍha-muṇālaṃ ṇisāsu visama-hia-kaddamaṃ va sura-gaaṃ
haria-vaṇa-rāi-pisuṇia-dūraarāloa-sihara-sariā-maggaṃ
pavaṇukkhuḍia-kilāmia-miaṅka-puṭṭhi-paḍiūsasanta-kisalaaṃ
dūruddhāia-siharaṃ jalaṇihi-jala-diṭṭha-viaḍa-pāaḍa-paḍimaṃ
uppāāsaṇi-pahaaṃ uddha-pphuḍia-paḍiekka-pāsaṃ va ṭhiaṃ
guru-bhara-sesāhi-pphaṇa-vāraṃ-vāra-paḍiruddha-mūlucchaṅgaṃ
khaa-māruukkhaāṇia-tuṅga-aḍāvaḍia-bhiṇṇa-sesa-mahiharaṃ
gahia-jala-meha-pellia-ṇivvāanta-ṇihua-ṭṭhia-mahā-mahisaṃ
ṇihaa-gaa-kumbha-lohia-silā-alosukkha-baddha-muttā-vaḍalaṃ
lavaṇa-jala-sīharāhaa-daruvvamanta-duma-muddha-pallava-rāaṃ
sīha-rava-bhīa-patthia-ṇiuñciekka-calaṇa-ṭṭhiukkaṇṇa-maaṃ
kaḍaa-paripelliāṇaṃ raï-ara-pāaḍia-kandarā-bhariāṇaṃ
abbhantara-ṭṭhiāṇaṃ parilla-pāsa-parisaṃṭhiaṃ va disāṇaṃ
raaṇiāsu dūruggaa-siha-raaṇaṃ taaṃ suha-ṇisaṇṇa-maa-khaṇḍia-sihara-aṇantaaṃ
kuvia-rāma-bhiṇṇoahi-daḍha-sara-ṇolliaṃ sihara-lagga-sasi-maṇḍala-ṇīsaraṇolliaṃ