ṣoḍaśo+adhyāyaḥ/
Su.6.16.1 athātaḥ †pakṣmakopapratiṣedhaṃ vyākhyāsyāmaḥ//
Su.6.16.2 yathovāca bhagavān dhanvantariḥ//
Su.6.16.3 yāpyastu yo vartmabhavo vikāraḥ
pakṣmaprakopo+abhihitaḥ purastāt/
tatropaviṣṭasya narasya carma vartmopariṣṭādanutiryageva//
Su.6.16.4 bhruvoradhastāt parimucya bhāgau pakṣmāśritaṃ
caikamato+avakṛntet/
kanīnakāpāṅgasamaṃ samantādyavākṛti snigdhatanornarasya//
Su.6.16.5 utkṛtya śastreṇa yavapramāṇaṃ bālena
sīvyodbhiṣagapramattaḥ/
dattvā ca sarpirmadhunā+avaśeṣaṃ kuryādvidhānaṃ† vihitaṃ vraṇe
yat//
Su.6.16.6 lalāṭadeśe ca nibaddhapaṭṭaṃ†
prāksyūtamatrāpyaparaṃ ca baddhvā/
sthairyaṃ gate cāpyatha śastramārge bālān vimuñcet kuśalo+abhivīkṣya//
Su.6.16.7 evaṃ na cecchāmyati tasya vartma nirbhujya
doṣopahatāṃ valiṃ ca/
tato+agninā vā pratisārayettāṃ kṣāreṇa vā samyagavekṣya dhīraḥ//
Su.6.16.8 chittvā samaṃ vā+apyupapakṣmamālāṃ samyaggṛhītvā
baḍiśaistribhistu/
pathyāphalena pratisārayettu ghṛṣṭena vā tauvarakeṇa samyak//
Su.6.16.9 catvāra ete vidhayo vihantuṃ pakṣmoparodhaṃ
pṛthageva śastāḥ/
virecanāścyotanadhūmanasyalepāñjanasneharasakriyāśca//
iti suśrutasaṃhitāyāmuttaratantrāntargate śālākyatantre
pakṣmagatarogapratiṣedho nāma ṣoḍaśo+adhyāyaḥ //16//