ṣaṭpañcāśattamo+adhyāyaḥ/
Su.6.56.1 athāto visūcikāpratiṣedhamadhyāyaṃ vyākhyāsyāmaḥ//
Su.6.56.2 yathovāca bhagavān dhanvantariḥ//
Su.6.56.3 ajīrṇamāmaṃ viṣṭabdhaṃ vidagdhaṃ ca
yadīritam/
visūcyalasakau tasmādbhaveccāpi vilambikā//
Su.6.56.4 sūcībhiriva gātrāṇi tudan
saṃtiṣṭhate+anilaḥ/
yasyājīrṇena sā vaidyairucyate ti† visūcikā//
Su.6.56.5 na tāṃ parimitāhārā labhante viditāgamāḥ/
mūḍhāstāmajitātmāno labhante †kaluṣāśayāḥ//
Su.6.56.6 mūrcchātisārau vamathuḥ pipāsā śūlaṃ
bhramodveṣṭanajṛmbhadāhāḥ/
vaivarṇyakampau hṛdaye rujaśca bhavanti tasyāṃ śirasaśca bhedaḥ//
Su.6.56.7 kukṣirānahyate+atyarthaṃ pratāmyati
vikūjati/
niruddho mārutaścāpi kukṣau† viparidhāvati//
Su.6.56.8 vātavarconirodhaśca kukṣau yasya bhṛśaṃ
bhavet/
tasyālasakamācaṣṭe †tṛṣṇodgārāvarodhakau//
Su.6.56.9 duṣṭaṃ tu bhuktaṃ kaphamārutābhyāṃ pravartate
nordhvamadhaśca yasya/
vilambikāṃ tāṃ †bhṛśaduścikitsyāmācakṣate śāstravidaḥ purāṇāḥ//
Su.6.56.10 yatrasthamāmaṃ virujettameva deśaṃ viśeṣeṇa
vikārajātaiḥ/
doṣeṇa yenāvatataṃ †svaliṅgaistaṃ lakṣayedāmasamudbhavaiśca//
Su.6.56.11 yaḥ
śyāvadantauṣṭhanakho+alpasaṃjñaśchardyardito+abhyantarayātanetraḥ/
kṣāmasvaraḥ sarvavimuktasandhiryāyānnaraḥ so+apunarāgamāya//
Su.6.56.12 sādhyāsu pārṣṇyordahanaṃ praśastamagnipratāpo
vamanaṃ ca tīkṣṇam/
pakve tato+anne tu vilaṅghanaṃ syāt saṃpācanaṃ cāpi virecanaṃ ca//
Su.6.56.13 viśuddhadehasya hi sadya eva
mūrcchātisārādirupaiti śāntim/
āsthāpanaṃ cāpi vadanti pathyaṃ sarvāsu yogānaparānnibodha//
Su.6.56.14 pathyāvacāhiṅgukaliṅgagṛñjasauvarcalaiḥ
sātiviṣaiśca cūrṇam/
sukhāmbupītaṃ vinihantyajīrṇaṃ śūlaṃ visūcīmaruciṃ ca sadyaḥ//
Su.6.56.15 kṣārāgadaṃ vā lavaṇaṃ viṣaṃ vā
guḍapragāḍhānatha sarṣapān vā/
amlena vā saindhavahiṅguyuktau sabījapūrṇau saghṛtau trivargau//
Su.6.56.16 kaṭutrikaṃ vā lavaṇairupetaṃ pibet
snuhīkṣīravimiśritaṃ tu/
kalyāṇakaṃ vā lavaṇaṃ pibettu yaduktamādāvanilāmayeṣu//
Su.6.56.17 kṛṣṇājamodakṣavakāṇi vā+api tulyau pibedvā
magadhānikumbhau/
dantīyuta vā magadhodbhavānāṃ kalkaṃ pibet koṣavatīrasena//
Su.6.56.18 uṣṇābhiradbhirmagadhodbhavānāṃ kalkaṃ
pibennāgarakalkayuktam/
vyoṣaṃ karañjasya phalaṃ haridre mūlaṃ samaṃ cāpyatha mātuluṅgyāḥ//
Su.6.56.19 chāyāviśuṣkā guṭikāḥ kṛtāstā hanyurvisūcīṃ
nayanāñjanena/
suvāmitaṃ sādhuvirecitaṃ vā sulaṅghataṃ vā manujaṃ viditvā//
Su.6.56.20 peyādibhirdīpanapācanīyaiḥ samyakkṣudhārtaṃ
samupakrameta/
āmaṃ śakṛdvā nicitaṃ krameṇa bhūyo vibaddhaṃ viguṇānilena//
Su.6.56.21 pravartamānaṃ na yathāsvamenaṃ
vikāramānāhamudāharanti/
tasmin bhavantyāmasamudbhave tu tṛṣṇāpratiśyāyaśirovidāhāḥ//
Su.6.56.22 āmāśaye śūlamatho gurutvaṃ hṛllāsa
udgāravighātanaṃ ca/
stambhaḥ kaṭīpṛṣṭhapurīṣamūtre śūlo+atha mūrcchā †sa śakṛdvamecca//
Su.6.56.23 śvāsaśca pakvāśayaje bhavanti liṅgāni
cātrālasakodbhavāni/
āmodbhave vāntamupakrameta saṃsargabhaktakramadīpanīyaiḥ//
Su.6.56.24 athetaraṃ yo na śakṛdvamettamāmaṃ jayet
svedanapācanaiśca/
visūcikāyāṃ parikīrtitāni dravyāṇi vairecanikāni yāni//
Su.6.56.25 tānyeva vartīrviracedvicūrṇya
mahiṣyajāvībhagavāṃ tu mūtraiḥ/
svinnasya pāyau viniveśya tāśca cūrṇāni caiṣāṃ pradhamettu nāḍyā//
Su.6.56.26 mūtreṣu saṃsādhya yathāvidhānaṃ dravyāṇi
yānyūrdhvamadhaśca yānti/
kvāthena tenāśu nirūhayecca mūtrārdhayuktena samākṣikeṇa//
Su.6.56.27 tribhaṇḍiyuktaṃ lavaṇaprakuñcaṃ dattvā
viriktakramamācarecca/
eṣveva tailena ca sādhitena prāptaṃ yadi syādanuvāsayecca//
iti suśrutasaṃhitāyāmuttaratantre kāyacikitsātantre visūcikāpratiṣedho
nāma (aṣṭādaśo+adhyāyaḥ, āditaḥ) ṣaṭpañcāśattamo+adhyāyaḥ //56//