48
keśarañjanārthaṃ nīlyādiyogaḥ |
nīlīpatrāṇi kāsīsaṃ bhṛṅgarājarasaṃ dadhi || 29 ||
lohacūrṇaṃ samaṃ piṣṭvā tallapaṃ keśarañjanam |
keśarañjanārthaṃ cūrṇādiyogaḥ |
cūrṇaṃ sindūramaṅgāraṃ kadalīkandasaṃyutam || 30 ||
lohapātre lohamuṣṭyā mardyaṃ jambīrajairdravaiḥ |
dinaikaṃ ca tato lepyaṃ keśānāṃ rañjanaṃ bhavet || 31 ||
keśarañjanārthaṃ kuraṇṭakapatrādiyogaḥ |
kuraṇṭakasya patrāṇi nāgamuṣṭyā vimardayet |
tallepaṃ tridinaṃ kuryājjāyate keśarañjanam || 32 ||
keśarañjanārthamāmrāsthyādiyogaḥ |
āmrāsthi triphalā bhṛṅgī priyaṅgurmātuluṅgakam |
niśā nīlī mṛṇālāni nāgaṃ lohaṃ ca cūrṇitam || 33 ||
samaṃ kalkaṃ kāntapātraṃ nimbatailena bhāvayet |
māsamātraṃ tatastena lepādbhavati rañjanam || 34 ||
keśarañjanārthaṃ kākamācyādiyogaḥ |
kākamācīyabījāni samāḥ kṛṣṇatilāstathā |
tattailaṃ grāhayedyantre tannasyaṃ keśarañjanam || 35 ||
keśarañjanaṃ ghṛtam |
goghṛtaṃ bhṛṅgajaṃ drāvaṃ mayūraśikhayā saha |
mṛdvagninā pacettena syānnasyaṃ keśarañjanam || 36 ||
keśarañjanārthaṃ japāpuṣparasanasyam |
japāpuṣpadravaṃ kṣaudraṃ karṣaikaṃ nasyamācaret |
saptāhādrañjayetkeśān sarvanasyeṣvayaṃ vidhiḥ || 37 ||
keśarañjanārthaṃ triphalādatailam |
triphalā lohacūrṇaṃ tu vāriṇā peṣayetsamam |
tattulyena ca tailena bhṛṅgarājarasena ca || 38 ||
pacettailāvaśeṣaṃ tatsnigdhabhāṇḍe nirodhayet |
māsaikaṃ bhūgataṃ kuryāttena śīrṣaṃ pralepayet || 39 ||