66
dūrovāhia-mūlaṃ ravi-ara-bolīṇa-sihara-ṇaṭṭhāloaṃ
addhatthamiāāmaṃ jahea uahi-salile tahea ṇaha-ale
pavaṇandolia-candaṇa-saṃghaṭṭuṭṭhia-suandhi-dhūmuppīḍaṃ
dara-pīoahi-garuia-sesaddhanta-jalaāvalambia-siharaṃ
tala-paḍihaa-sāaraaṃ uddhojjhara-vihua-sīha-rosāaraaṃ
gaha-mālā-meliaaṃ sihara-ṭṭhia-canda-maṇḍalāmeliaaṃ
sasi-purao pasariaaṃ kuharesu ṇivāa-ṇippaampa-sariaaṃ
maṇimaa-pāsuttamaaṃ kaṇaa-silāsīṇa-suhia-pāsutta-maaṃ
bhiṇṇukkhitta-paraṃmuha-valanta-saddūla-gahia-gaa-kumbha-aḍaṃ
bila-pāsutta-bhuaṃgama-jala-dhārāāra-ṇiggaa-maṇi-cchāaṃ
aṭṭhia-samudda-sīhara-dupparimāsa-ṇiha-kaṇṭaanta-maṇi-aḍaṃ
ṇaha-lagga-mottiā-phala-gaa-sīsārūḍha-ṇīharanta-maïndaṃ
ovaṭṭha-komalāiṃ vahamāṇaṃ meha-vimalia-vimukkāiṃ
kappa-laā-vasuāia-pavaṇuddhua-dhavala-aṃsuāi vaṇāiṃ
ārūḍhoahi-salile addhukkhaa-sarasa-visama-pāsalla-dume
kusuma-bharie vahantaṃ phaliha-aḍuttāṇa-patthie ṇaï-sotte
ravi-raha-turaṃgamāṇaṃ vāāiddha-siharojjharehi dhuvantaṃ
thoolla-paggahāiṃ lālā-pheṇa-lava-gabbhiṇāi muhāiṃ
dīhara-siharālaggaṃ pajjaliosahi-sihāhaaṃ vahamāṇaṃ