81
suraa-suhaddha-maüliaṃ bhamara-darakkanta-mālaī-maüla-ṇihaṃ
sāhaï samaruppesaṃ uppitthummilla-tāraaṃ ṇaaṇa-juaṃ
juggaaṃ
aha sasi-jaṇiāmoe maa-parivaḍḍhia-piāhisāraṇa-sokkhe
maaṇummūlia-māṇe rāa-parāhīṇa-raï-suhammi paose
valaï a dūmia-kuvio avasāia-hirisio aīi sarīraṃ
sasaï a cumbia-suhio maa-pāaḍia-hiao vilāsiṇi-sattho
rosa-pusiāharāṇaṃ daïa-balāmoli-cumbaṇa-paruṇṇāṇaṃ
ṇivvalia-maṇṇu-garuaṃ haraï parā-hutta-jampiaṃ juaīṇaṃ
ahisāraṇaṃ ṇa geṇhaï ṇa saṃṭhavei alaaṃ ṇa pucchaï dūiṃ
candāloa-paḍihao vevaï mūḍha-hiao vilāsiṇi-sattho
avamaṇṇia-rāma-kahaṃ jahā-pura-paaṭṭa-juaï-jaṇa-vāvāraṃ
sohaï raaṇiarāṇaṃ āsaṅghia-dahamuhaṃ paosāgamaṇaṃ
pia-pāsāhi ṇiatto samuhaṃ aliaṃ pi jaṃ bhaṇaï dūi-jaṇo
taṃ cia kāmiṇi-sattho dūmentiṃ pi bahuso ṇiattei kahaṃ
saaṇesu paṇaa-kalahe samuha-ṇisaṇṇa-pia-velavijjantīhiṃ
parivattiuṃ ṇa caïaṃ ṇavaraṃ ṇaaṇesu vialiaṃ bāha-jalaṃ
aṇuṇaa-khaṇa-laddha-suhe puṇo vi saṃbharia-maṇṇu-dūmia-vihale
hiae māṇavaīṇaṃ cireṇa paṇaa-garuo pasammaï roso
alaaṃ chivaï vilakkho paḍisāreï valaaṃ jamei ṇiatthaṃ
mohaṃ ālavaï sahiṃ daïāloa-ṇaḍio vilāsiṇi-sattho