134
rahuṇāho vi sadhīraṃ ukkariseūṇa agga-hattheṇa saraṃ
āsaṇṇa-lāiavvaṃ pecchaï phulla-kamalāaraṃ va dahamuhaṃ
rāmo saṃdhei saraṃ vibhīsaṇanteṇa valaï rakkhasa-lacchī
dahamuha-viṇāsa-pisuṇaṃ phuraï a sīāi takkhaṇaṃ vāmacchaṃ
vāmaṃ ṇisiara-ṇaaṇaṃ rahuvaïṇo dāhiṇaṃ ca phundaï ṇaaṇaṃ
bandhu-vaha-rajja-pisuṇaṃ papphuraï vihīsaṇassa loaṇa-jualaṃ
vaccha-bharantucchaṅge saṃdhia-bāṇe dhaṇummi kaḍḍhijjante
rāma-sara-pattaṇehi va uppusiā sura-vahūṇa bāha-tthavaā
ṇavari a so rahuvaïṇā vāraṃ vāreṇa candahāsa-cchiṇṇo
ekkeṇa sareṇa luo ekkamuho dahamuhassa muha-saṃghāo
avihatta-kaṇṭha-garuo chiṇṇo vi dasāṇaṇassa hoi bhaaaro
dharaṇi-aluttiṇṇassa va ṇiaa-cchea-paḍiuṭṭhio muha-ṇivaho
tassa haassa raṇa-muhe rakkhasa-ṇāhassa ahimuhaṃ appāṇo
dasahi vi muhehi samaaṃ sihā-karālo vva huavaho ṇikkanto
aha ṇihaammi dahamuhe ūsasiammi a samantao tellokke
vaaṇammi a uppusiā bhiuḍī oāriaṃ ca rāmeṇa dhaṇuṃ
ṇiddaa-bandhuppitthā jāṇantī vikkamaṃ ṇisāara-vaïṇo
māa tti parigaṇentī ṇa muaï ṇihaaṃ pi rāvaṇaṃ rāa-sirī
tāhe vibhīsaṇassa vi anto-hiaammi bandhu-ṇehuppaṇṇo
dāsarahiṇo vi purao mukko ccia loaṇehi bāha-tthavao
ṇihaammi a dahavaaṇe vihīsaṇo ṇindiāmarattaṇa-saddo
parideviuṃ paütto maraṇa-samabbhahia-dukkha-diṇṇāāso
jo ccia jeūṇa jamaṃ diṭṭho icchā-suhaṃ tume jama-loo