11
kasaṇa-maṇi-cchāā-rasa-rajjantovari-parippavanta-ppheṇaṃ
hari-ṇāhi-paṅkaa-kkhalia-sesa-ṇīsāsa-jaṇia-viaḍāvattaṃ
saaraṅgaaṃ vidduma-pallava-ppahā-gholira-sāsaa-raṅgaaṃ
ravi-rāiaṃ dharaṇi-alaṃ va mandarāaḍḍhaṇa-dūra-virāiaṃ
muttālaaṃ tiasa-viiṇṇa-jīvia-suhāmaa-jammuttālaaṃ
vitthiṇṇaaṃ palaüvvella-salila-helā-maliuvvi-tthiṇṇaaṃ
cira-parūḍha-seāla-silā-hariantaaṃ pavaṇa-bhiṇṇa-rava-dāruṇa-ṇīhariantaaṃ
mahumahassa ṇiddā-samae vīsāma-aṃ palaï-ḍaḍḍha-vijjhāa-taluvvī-sāmaaṃ
asurovaḍaṇa-vihaṭṭia-jala-vivaruṭṭhia-rasāalumhā-ṇivahaṃ
mahaṇa-vasa-bhiṇṇa-bhāmia-dīvantara-lagga-mandara-aḍa-kkhaṇḍaṃ
esa amaa-rasa-saṃbhavo tti saṃbhāviaṃ ṇaha-ṇihaṃ tameṇa va caüddisaṃ bhāviaṃ
guṇa-mahaggha-sāraṃ vasuhā-rakkhāṇiaṃ ṇiaa-jasa-ṇihāṇaṃ miva saara-kkhāṇiaṃ
pavaṇuggāhia-jala-lava-ṇivaha-pahammanta-muhala-tīra-tala-vaṇaṃ
sasi-sela-maūhojjhara-parivaḍḍhia-salila-malia-puliṇucchaṅgaṃ
mandara-meha-kkhohia-sasi-kalahaṃsa-parimukka-salilucchaṅgaṃ
maragaa-sevālovari-ṇisaṇṇa-tuṇhikka-mīṇa-cakkāa-juaṃ
puṇṇa-ṇaï-sotta-saṃṇiha-jala-majjha-muṇijjamāṇa-calia-timi-vahaṃ
valaā-muha-mūla-samosaranta-masi-rāsi-kajjalia-pāālaṃ