अत्र मायादीनामिति । न परमेश्वरस्य माया छद्म, न शक्तौ मतिभ्रमः, न ध्वंसो वीर्यस्य, नवार्जुनादेवार्जुनस्यान्यत्वमिति विषयबाधात् ॥
मीलिते भ्रान्तिरस्तीति भ्रान्त्यनन्तरं मीलितलक्षणमाह—
वस्त्वन्तरेति । वस्तूनामिति श्लिष्टषष्ठी । वस्त्वन्तरेण तिरस्कारे इति कर्मणि । वस्त्वन्तरस्य तिरस्कार इति कर्तरि । फलतः स एवार्थः । तथाचोत्कृष्टगुणेनापकृष्टगुणस्य तिरस्करणं न्यग्भावनमिति लक्षणार्थः । पृथग्रूपतिरस्कारेणैकरूपतापत्तिर्मीलितमुच्यते । तथाच कातन्त्रम्—‘मीलितं युक्तमुच्यते’ इति । अभिप्रायपूर्वस्तिरस्कारो द्विविधः—सिद्धाभिप्रायफलोऽसिद्धाभिप्रायफलश्च यथाक्रमं पिहितापिहिते । न चैतावता विशेषेण पृथग्भावः; सामान्यलक्षणव्याप्तत्वादवान्तरभङ्गीनामानन्त्याच्च । स रूपगुणेन तिरस्कारस्तद्गुणो विरूपगुणेनातद्गुणः । एतावपि मीलितविशेषाविति स्फुटम् ॥
अत्र मीलितमभिधीयमानगुणेन प्रतीयमानगुणेन च वस्तुना संभवति । तयोराद्यो(ऽभिधीयमानगुणेन) यथा—
अत्र मज्जनताम्रयोर्लोचनयोर्मदरागो मदताम्रयोः कोपानुरागः साक्षादभिधीयमानेनैव गुणेन तिरस्क्रियमाणो निदर्शित इत्यभिधीयमानगुणेन वस्तुनैतन्मीलितम् ॥
विभागमाह—अत्र मीलितमिति । एन्तोवीति । सच्चविओ दृष्टः । गोसे प्रातः । तस्याः मज्जनं स्नानम् । अत्र ताम्रपल्लवारुणरागपदाभ्यामभिधीयते गुणः ॥