Prakaraṇa 8

aṣṭāvakra uvāca||8||

tadā bandho yadā cittaṃ kiñcidvāñchati śocati|
kiñcinmuñcati gṛhṇāti kiñciddhṛṣyati kupyati||8|1||
tadā muktiryadā cittaṃ na vāñchati na śocati|
na muñcati na gṛhṇāti na hṛṣyati na kupyati||8|2||
tadā bandho yadā cittaṃ saktaṃ kāsvapi dṛṣṭiṣu|
tadā mokṣo yadā cittamasaktaṃ sarvadṛṣṭiṣu||8|3||
yadā nāhaṃ tadā mokṣo yadāhaṃ bandhanaṃ tadā|
matveti helayā kiñcinmā gṛhāṇa vimuñca mā||8|4||