vṛttiḥ --- manasa iti vākyaśeṣaḥ| viṣayā gandharasarūpasparśaśabdāste vidyante phalatvena yasyāḥ sā viṣayavatī pravṛttirmanasaḥ sthairyaṃ karoti| tathāhi nāsāgre cittaṃ dhārayato divyagandhasaṃvidupajāyate| tādṛśya eva jihvāgre rasasaṃbit| tālvagre rūpasaṃvit| jihvāmadhye sparśasaṃvit| jihvāmūle śabdasaṃvit| tadevaṃ tattadindriyadvāreṇa tasmiṃstasminviṣaye divye jāyamānā saṃviccittasyaikāgratāyā heturbhavati| asti yogasya phalamiti yoginaḥ samāśvāsotpādanāt ||35||