552 मूर्त्ता इत्यभ्युपगन्तव्यमिति स्ववचनविरोधं प्रतिज्ञायामाह—लब्धापचयेत्यादि ।
लब्धोऽपचयपर्यन्तो येन रूपेण स्वभावेन, तत्तथोक्तम् । एतदुक्तं भवति—यद्यप
चीयमानावयवविभागेनापचीयमानस्वभावा न भवन्ति, यदि निरंशा इति यावत्,
तदा न मूर्त्ता वेदनादिवत्सिद्ध्यन्ति, विशेषाभावात् ॥ १९७० ॥ १९७१ ॥
तुल्येत्यादिना भदन्तशुभगुप्तस्य परिहारमाशङ्कते ।
स ह्याह—यथा सदृशापरापरक्षणोत्पादाद्विप्रलब्धस्य गृहीतेऽपि प्रत्यक्षेण शब्दादौ
नित्यत्वविभ्रमस्तथा परमाणूनामविच्छिन्नदेशानां सजातीयानां युगपद्ग्रहणे स्थूल इति
मानसो विभ्रमो भवति । ततश्च निरंशानेकमूर्त्तानां प्रत्ययाप्रतिवेदनादित्यसिद्धो
हेतुरिति ॥ १९७२ ॥
स्वव्यापारेत्यादिना दूषणमाह—स्वव्यापारबलेनैवेति ।