154
BRP038.018.1 devaiḥ sahendrair muniyakṣasiddhair |
BRP038.018.2 gandharvavidyādharadaityamukhyaiḥ |
BRP038.018.3 anyaiś ca sarvair vividhair vṛto 'sau |
BRP038.018.4 tasmin nage harṣam avāpa śambhuḥ || 18 ||
BRP038.019.1 nṛtyanti tatrāpsarasaḥ sureśā |
BRP038.019.2 gāyanti gandharvagaṇāḥ prahṛṣṭāḥ |
BRP038.019.3 divyāni vādyāny atha vādayanti |
BRP038.019.4 kecid drutaṃ devavaraṃ stuvanti || 19 ||
BRP038.020.1 evaṃ sa devaḥ svagaṇair upeto |
BRP038.020.2 mahābalaiḥ śakrayamāgnitulyaiḥ |
BRP038.020.3 devyāḥ priyārthaṃ bhaganetrahantā |
BRP038.020.4 giriṃ na tatyāja tadā mahātmā || 20 ||
ṛṣaya ūcuḥ:
BRP038.021.1 devyāḥ samaṃ tu bhagavāṃs tiṣṭhaṃs tatra sa kāmahā |
BRP038.021.2 akarot kiṃ mahādeva etad icchāma veditum || 21 ||
brahmovāca:
BRP038.022.1 bhagavān himavacchṛṅge sa hi devyāḥ priyecchayā |
BRP038.022.2 gaṇeśair vividhākārair hāsaṃ sañjanayan muhuḥ || 22 ||
BRP038.023.1 devīṃ bālendutilako ramayaṃś ca rarāma ca |
BRP038.023.2 mahānubhāvaiḥ sarvajñaiḥ kāmarūpadharaiḥ śubhaiḥ || 23 ||
BRP038.024.1 atha devy āsasādaikā mātaraṃ parameśvarī |
BRP038.024.2 āsīnāṃ kāñcane śubhra āsane paramādbhute || 24 ||
BRP038.025.1 atha dṛṣṭvā satīṃ devīm āgatāṃ surarūpiṇīm |
BRP038.025.2 āsanena mahārheṇa 'sampādayad aninditām |
BRP038.025.3 āsīnāṃ tām athovāca menā himavataḥ priyā || 25 ||
menovāca:
BRP038.026.1 cirasyāgamanaṃ te 'dya vada putri śubhekṣaṇe |
BRP038.026.2 daridrā krīḍanais tvaṃ hi bhartrā krīḍasi saṅgatā || 26 ||
BRP038.027.1 ye daridrā bhavanti sma tathaiva ca nirāśrayāḥ |
BRP038.027.2 ume ta evaṃ krīḍanti yathā tava patiḥ śubhe || 27 ||
brahmovāca:
BRP038.028.1 saivam uktātha mātrā tu nātihṛṣṭamanā bhavat |
BRP038.028.2 mahatyā kṣamayā yuktā na kiñcit tām uvāca ha |
BRP038.028.3 visṛṣṭā ca tadā mātrā gatvā devam uvāca ha || 28 ||
pārvaty uvāca:
BRP038.029.1 bhagavan devadeveśa neha vatsyāmi bhūdhare |
BRP038.029.2 anyaṃ kuru mamāvāsaṃ bhuvaneṣu mahādyute || 29 ||
deva uvāca:
BRP038.030.1 sadā tvam ucyamānā vai mayā vāsārtham īśvari |
BRP038.030.2 anyaṃ na rocitavatī vāsaṃ vai devi karhicit || 30 ||