navamo+adhyāyaḥ/
Ca.5.9.1 athāto &yasyaśyāvanimittīyamindriyaṃ vyākhyāsyāmaḥ//
Ca.5.9.2 iti ha smāha bhagavānātreyaḥ//
Ca.5.9.3 yasya śyāve paridhvaste harite
cāpi darśane/
āpanno vyādhirantāya jñeyastasya vijānatā//
Ca.5.9.4 niḥsaṃjñaḥ pariśuṣkāsyaḥ
&samṛddho vyādhibhiśca yaḥ/
uparuddhāyuṣaṃ jñātvā taṃ dhīraḥ parivarjayet//
Ca.5.9.5 &haritāśca sirā yasya
lomakūpāśca saṃvṛtāḥ/
so+amlābhilāṣī puruṣaḥ pittānmaraṇamaśnute//
Ca.5.9.6 śarīrāntāśca śobhante śarīraṃ
copaśuṣyati/
balaṃ ca hīyate yasya rājayakṣmā hinasti tam//
Ca.5.9.7 aṃsābhitāpo hikkā ca chardanaṃ
śoṇitasya ca/
ānāhaḥ pārśvaśūlaṃ ca bhavatyantāya śoṣiṇaḥ//
Ca.5.9.8 vātavyādhirapasmārī kuṣṭhī
&śophī tathodarī/
gulmī ca madhumehī ca rājayakṣmī ca yo naraḥ//
Ca.5.9.9 acikitsyā bhavantyete
balamāṃsakṣaye sati/
anyeṣvapi vikāreṣu tān bhiṣak parivarjayet//
Ca.5.9.10 virecanahṛtānāho
yastṛṣṇānugato naraḥ/
viriktaḥ punarādhmāti yathā pretastathaiva saḥ//
Ca.5.9.11 peyaṃ pātuṃ na śaknoti
kaṇṭhasya ca mukhasya ca/
urasaśca niśuṣkatvādyo naro na sa &jīvati//
Ca.5.9.12 svarasya durbalībhāvaṃ hāniṃ
ca balavarṇayoḥ/
rogavṛddhimayuktyā ca dṛṣṭvā maraṇamādiśet//
Ca.5.9.13 ūrdhvaśvāsaṃ gatoṣmāṇaṃ
śūlopahatavaṅkṣaṇam/
śarma cānadhigacchantaṃ buddhimān parivarjayet//
Ca.5.9.14 apasvaraṃ bhāpamāṇaṃ prāptaṃ
maraṇamātmanaḥ/
śrotāraṃ cāpyaśabdasya dūrataḥ parivarjayet//
Ca.5.9.15 yaṃ naraṃ sahasā rogo
durbalaṃ parimuñcati/
saṃśayaprāptamātreyo jīvitaṃ tasya manyate//
Ca.5.9.16 atha cejjñātayastasya yāceran
praṇipātataḥ/
rasenādyāditi brūyānnāsmai dadyādviśodhanam//
Ca.5.9.17 māsena cenna dṛśyeta
viśeṣastasya śobhanaḥ/
rasaiścānyaibahuvidhairdurlabhaṃ tasya jīvitam//
Ca.5.9.18 niṣṭhyūtaṃ ca purīṣaṃ ca
retaścāmbhasi majjati/
yasya tasyāyuṣaḥ prāptamantamāhurmanīṣiṇaḥ//
Ca.5.9.19 niṣṭyūte yasya dṛśyante varṇā
bahuvidhāḥ pṛthak/
tacca sīdatyapaḥ prāpya na sa &jīvitumarhati//
Ca.5.9.20 pittamūṣmānugaṃ yasya śaṅgau
prāpya &vimūrcchati/
sa rogaḥ śaṅkhako nāmnā trirātrāddhanti jīvitam//
Ca.5.9.21 saphenaṃ rudhiraṃ yasya
muhurāsyāt prasicyate/
śūlaiśca tudyate kukṣiḥ pratyākhyeyastathāvidhaḥ//
Ca.5.9.22 balamāṃsakṣayastīvro
rogavṛddhirarocakaḥ/
yasyāturasya lakṣyante trīn pakṣānna sa jīvati//
Ca.5.9.23 tatra ślokau---
vijñānāni manuṣyāṇāṃ maraṇe pratyupasthite/
bhavantyetāni saṃpaśyedanyānyevaṃvidhāni ca//
Ca.5.9.24 tāni sarvāṇi lakṣyante na tu
sarvāṇi mānavam/
viśanti vinaśiṣyantaṃ tasmādbodhyāni sarvataḥ//
ityagniveśakṛte tantre carakapratisaṃskṛte indriyasthāne
yasyaśyāvanimittīyamindriyaṃ nāma navamo+adhyāyaḥ//9//