ekonaviṃśo+adhyāyaḥ /
Su.1.19.1 athāto vraṇitopāsanīyamadhyāyaṃ vyākhyāsyāmaḥ //
Su.1.19.2 yathovāca bhagavān dhanvantriḥ //
Su.1.19.3 vraṇitasya prathamamevāgāramanvicchet taccāgāraṃ praśastavāstvādikaṃ karyam //
Su.1.19.4ab praśastavāstuni gṛhe śucāvātapavarjite /
Su.1.19.4cd nivāte na ca rogāḥ syuḥ śārīrāgantumānasāḥ //
Su.1.19.5 tasmin śayanamasaṃbādhaṃ svāstīrṇaṃ manojñaṃ prākśiraskaṃ saśastraṃ kurvīt //
Su.1.19.6ab sukhaceṣṭāpracāraḥ syāt svāstīrṇe śayane vraṇī /
Su.1.19.6cd prācyāṃ diśi sthitā devāstatpūjārthaṃ ca tacchiraḥ //
Su.1.19.7 tasmin suhṛdbhiranukūlaiḥ priyaṃvadairupāsyamāno yatheṣṭamāsīt //
Su.1.19.8ab suhṛdo vikṣipantyāśu kathābhirvraṇavedanāḥ /
Su.1.19.8cd āśvāsayanto bahuśastvanukūlāḥ priyaṃvadāḥ //
Su.1.19.9 na ca divānidrāvaśagaḥ syāt //
Su.1.19.10ab divāsvapnāddraṇe kaṇḍūrgātrāṇāṃ gauravaṃ tathā /
Su.1.19.10cd śvayathurvedanā rāgaḥ srāvaścaiva bhṛśaṃ bhavet ////
Su.1.19.11 utthānasaṃveśanaparivartanacaṅkramaṇoccairbhāṣaṇādyāsvātmaceṣṭāsvapramatto vraṇaṃ saṃrakṣet //
Su.1.19.12ab sthānāsanaṃ caṅkramaṇaṃ divāsvapnaṃ tathaiva ca /
Su.1.19.12cd vraṇito na niṣeveta śaktimānapi mānavaḥ //
Su.1.19.13ab utthānādyāsanaṃ sthānaṃ śayyā cātiniṣevitā /
Su.1.19.13cd prāpnuyānmārutādaṅge rujastasmādvivarjayet //
Su.1.19.14 gamyānāṃ ca strīṇāṃ saṃdarśanasaṃbhāṣaṇasaṃsparśanāni dūrataḥ pariharet //
Su.1.19.15ab strīdarśanādibhiḥ śukraṃ kadāciccalitaṃ sravet /
Su.1.19.15cd grāmyadharmakṛtāndoṣān so+asaṃsarge+apyavāpnuyāt //
Su.1.19.16 navadhānyamāṣatilakalāyakulatthaniṣpāvaharitakaśākāmlalavaṇakaṭukaguḍapiṣṭavikṛtivallūraśuṣkaśākājāvikānūpaudakamāṃsavasāśītodakakṛśarāpāyasadadhidugdhatakraprabhṛtīn pariharet //
Su.1.19.17ab takrānto navadhānyādiryo+ayaṃ varga udāhṛtaḥ /
Su.1.19.17cd doṣasaṃjanano hyeṣa vijñeyaḥ pūyavardhanaḥ //
Su.1.19.18 madyapaśca maireyāriṣṭāsavaśīdhusurāvikārān pariharet //
Su.1.19.19ab madyamamlaṃ tathā rūkṣaṃ tīkṣṇamuṣṇaṃ ca vīryataḥ /
Su.1.19.19cd āśukāri ca tat pītaṃ kṣipraṃ vyāpādayeddraṇam //
Su.1.19.20 vātātaparajodhūmāvaśyāyātisevanātibhojanāniṣṭabhojanāśravaṇadarśanerṣyāmarṣabhayakrodhaśokadhyānarātrijāgaraṇaviṣamāśanaśayanopavāsavāgvyāyāmasthānacaṅkramaṇaśītavātaviruddhādhyaśanājīrṇamakṣikādyā bādhāḥ pariharet //
Su.1.19.21ab vraṇinaḥ saṃprataptasya kāraṇairevamādibhiḥ /
Su.1.19.21cd kṣīṇaśoṇitamāṃsasya bhuktaṃ samyaṅga jīryati //
Su.1.19.22ab ajīrṇāt pavanādīnāṃ vibhramo balavān bhavet /
Su.1.19.22cd tataḥ śopharujāsrāvadāhapākānavāpnuyāt //
Su.1.19.23 sadā nīcanakharomṇā śucinā śuklavāsasā śāntimaṅgaladevatābrāhmaṇagurupareṇa bhavitavyamiti / tat kasya hetoḥ hiṃsāvihārāṇi hi mahāvīryāṇi rakṣāṃsi paśupatikuberakumārānucarāṇi māṃsaśoṇitapriyatvāt kṣatajanimittaṃ vraṇinamupasarpanti satkārārthaṃ jighāṃsūni vā kadācit //
Su.1.19.24 bhavati cātra /
Su.1.19.24ab teṣāṃ satkārakāmānāṃ prayatetāntarātmanā /
Su.1.19.24cd dhūpabalyupahārāṃśca bhakṣyāṃścaivopahārayet //
Su.1.19.25 te tu saṃtarpitā ātmavantamk na hiṃsyuḥ / tasmāt satatamatandrito janaparivṛto nityaṃ dīpodakaśastrasragdāmapuṣpalājādyalaṅkṛte veśmani sāṃpanmaṅgalamano+anukūlāḥ kathāḥ śṛṇvannāsīta //
Su.1.19.26ab saṃpadādyanukūlābhiḥ kathābhiḥ prītamānasaḥ /
Su.1.19.26cd āśāvān vyādhimokṣāya kṣipraṃ sukhamavāpnuyāt //
Su.1.19.27 ṛgyajuḥsāmātharvavedābhihitairaparaiścāśīrvidhānairupādhyāyā bhiṣajaśca sandhyayo rakṣāṃ kuryuḥ //
Su.1.19.28ab sarṣapāriṣṭapatrābhyāṃ sarpiṣā lavaṇena ca /
Su.1.19.28cd dvirahnaḥ kārayeddhūpaṃ daśarātramatandritaḥ //
Su.1.19.29 chatrāmaticchatrāṃ lāṅgū(ā.ṅga)līṃ jaṭilāṃ brahmacāriṇīṃ lakṣmīṃ guhāmatiguhāṃ vacāmativiṣāṃ śatavīryāṃ sahasravīryāṃ siddhārthakāṃśca śirasā dhārayet //
Su.1.19.30ab vyajyeta bālavyajanairvraṇaṃ na ca vighaṭṭayet /
Su.1.19.30cd na tudenna ca kaṇḍūyecchayānaḥ paripālayet //
Su.1.19.31ab anena vidhinā yuktamādāveva niśācarāḥ /
Su.1.19.31cd vanaṃ keśāriṇā+ākrāntaṃ varjayanti mṛgā iva //
Su.1.19.32ab jīrṇaśālyodanaṃ snigdhamalpamuṣṇaṃ dravottaram /
Su.1.19.32cd bhuñjāno jāṅgalairmāṃsaiḥ śīghraṃ vraṇamapohati //
Su.1.19.33ab taṇḍulīyakajīvantīsuniṣaṇṇakavāstukaiḥ /
Su.1.19.33cd bālamūlakavātārkapaṭolaiḥ kāravellakaiḥ //
Su.1.19.34ab sadāḍimaiḥ sāmalakairghṛtabhṛṣṭaiḥ sasaindhavaiḥ /
Su.1.19.34cd anyairevaṃguṇairvā+api mudgādīnāṃ rasena vā //
Su.1.19.35ab śaktūn vilepīṃ kulmāṣaṃ jalaṃ cāpi śṛtaṃ pibet /
Su.1.19.35cd divā na nidrāvaśago nivātagṛhagocaraḥ // ^
Su.1.19.35ef vraṇī vaidyavaśe tiṣṭhan śīghraṃ vraṇamapohati /
Su.1.19.36ab vraṇe śvayathurāyāsāt sa ca rāgaśca jāgarāt /
Su.1.19.36cd tau ca ruk ca divāsvāpāttāśca mṛtyuśca maithunāt //
Su.1.19.37ab evaṃvṛttasamācāro vraṇī saṃpadyate sukhī /
Su.1.19.37cd āyuśca dīrghamāpnoti dhanvantarivaco yathā //