navamo+adhyāyaḥ/
Ca.7.9.1 athātastilvakakalpaṃ vyākhyāsyāmaḥ//
Ca.7.9.2 iti ha smāha bhagavānātreyaḥ//
Ca.7.9.3 tilvakastu mato lodhro
bṛhatpatrastirīṭakaḥ/
tasya mūlatvacaṃ śuṣkāmantarvalkalavarjitām//
Ca.7.9.4 cūrṇayettu tridhā kṛtvā dvau
bhāgau ścotayettataḥ/
lodhrasyaiva kaṣāyeṇa tṛtīyaṃ tena bhāvayet//
Ca.7.9.5 bhāgaṃ taṃ daśamūlasya
&punaḥ kvāthena bhāvayet/
śuṣkaṃ cūrṇa punaḥ kṛtvā &tata ūrdhvaṃ prayojayet//
Ca.7.9.6
&dadhitakrasurāmaṇḍamūtrairbadarasīdhunā/
rasenāmalakānāṃ vā tataḥ pāṇitalaṃ pibet//
Ca.7.9.7 meṣaśṛṅgyabhayākṛṣṇācitrakaiḥ
salile śṛte/
marujān sunuyāttacca jātaṃ sauvīrakaṃ yadā//
Ca.7.9.8 bhavedajjalinā tasya
loghrakalkaṃ pibet sadā/
surāṃ lodhrakaṣāyeṇa jātāṃ pakṣasthitāṃ pibet//
Ca.7.9.9 dantīcitrakayordroṇe
salilasyāḍhakaṃ pṛthak/
samutkvāthya guḍasyaikāṃ tulāṃ lodhrasya cāñjalim//
Ca.7.9.10 āvapettat paraṃ
&pakṣānmadyapānāṃ virecanam/
&kampillakakaṣāyeṇa daśakṛtvaḥ subhāvitām//
Ca.7.9.11 mātrāṃ kampillakasyaiva
kaṣāyeṇa punaḥ pibet/
caturaṅgulakalpena leho+anyaḥ kārya eva ca//
Ca.7.9.12 triphalāyāḥ kaṣāyeṇa
sasarpirmadhuphāṇitaḥ/
lodhracūrṇayutaḥ siddho lehaḥ &śreṣṭho virecane//
Ca.7.9.13 tilvakasya kaṣāyeṇa kalkena
ca saśarkaraḥ/
saghṛtaḥ sādhito lehaḥ sa ca &śreṣṭho virecane//
Ca.7.9.14 aṣṭāṣṭau trivṛtādīnāṃ
muṣṭīṃstu sanakhān pṛthak/
droṇe+apāṃ sādhayet pādaśeṣe prasthaṃ ghṛtāt pacet//
Ca.7.9.15 piṣṭaistaireva bilvāṃśaiḥ
samūtralavaṇairatha/
tato mātrāṃ pibet kāle śreṣṭhametadvirecanam//
Ca.7.9.16 lodhrakalkena
mūtrāmlalavaṇaiśca pacedghṛtam/
caturaṅgulakalpena sarpiṣī dve ca sādhayet//
Ca.7.9.17 tatra ślokau---
pañca dadhyādibhistvekā surā sauvīrakeṇa ca/
eko+ariṣṭastathā yoga ekaḥ kampillakena ca//
Ca.7.9.18 lehāstrayo ghṛtenāpi catvāraḥ
saṃprakīrtitāḥ/
yogāste lodhramūlānāṃ kalpe ṣoḍaśa darśitāḥ//
ityagniveśakṛte tantre carakapratisaṃskṛte+aprāpte dṛḍhabalasaṃpūrite
kalpasthāne tilvakakalpo nāma navamo+adhyāyaḥ//9//