Sarvāṅgasundarā

apāmevāyaṃ svābhāviko guṇo yat dravatvam| ato yāni kānicit dravarūpāṇi dravyāṇi tāni sarvāṇi āpyānyeva kṣīradadhyādīni| tadarthaṃ dravadravyaśabdaḥ sāmānyena sarvadravavyaktiparigrahārthaḥ śāstrakṛtā prayuktaḥ| dravāṇi ca tāni dravyāṇi ca dravadravyāṇi, teṣāṃ vijñānaṃ-avabodhaḥ, tasmai hito dravadravyavijñānīyo+adhyāyaḥ, taṃ vyākhyāsyāmaḥ-prathayiṣyāmaḥ|