ṣaṣṭho+adhyāyaḥ/
Ca.8.6.1 athā+ato vamanavirecanavyāpatsiddhiṃ vyākhyāsyāmaḥ/
Ca.8.6.2 iti ha smāha bhagavānātreyaḥ//
Ca.8.6.3 atha śodhanayoḥ
samyagvidhimūrdhvānulomayoḥ/
asamyakkṛtayoścaiva doṣān vakṣyāmi sauṣadhān//
Ca.8.6.4 atyuṣṇavarṣaśītā hi
grīṣmavarṣāhimāgamāḥ/
!tadantare prāvṛḍādyāsteṣāṃ sādhāraṇāstrayaḥ//
Ca.8.6.5 prāvṛṭ śucinabhau jñeyau
śaradūrjasahau punaḥ/
tapasyaśca madhuścaiva vasantaḥ śodhanaṃ prati//
Ca.8.6.6 !etānṛtūn vikalpyaivaṃ dadyāt
saṃśodhanaṃ bhiṣak/
svasthavṛttamabhipretya vyādhau vyādhivaśena tu//
Ca.8.6.7 karmaṇāṃ
!vamanādīnāmantareṣvantareṣu ca/
snehasvedau prayuñjīta snehaṃ cānte prayojayet//
Ca.8.6.8
!visarpapiḍakāśophakāmalāpāṇḍurogiṇaḥ/
abhighātaviṣārtāṃśca nātisnigdhāt virecayet//
Ca.8.6.9 nātisnighdaśarīrāya dadyāt
snehavirecanam/
snehotkliṣṭaśarīrāya !rūkṣaṃ dadyāvirecanam//
Ca.8.6.10 snehasvedopapannena jīrṇe
mātrāvadauṣadham/
ekāgramanasā pītaṃ samyagyogāya kalpate//
Ca.8.6.11 snigdhāt pātrādyathā
toyamayatnena praṇudyate/
kaphādayaḥ praṇudyante snigdhāddehāttathauṣadhaiḥ//
Ca.8.6.12 ārdraṃ kāṣṭhaṃ yathā
vahnirviṣyandayati sarvataḥ/
tathā snigdhasya vai doṣān svedo viṣyandayet sthirān//
Ca.8.6.13 kliṣṭaṃ vāso yathotkleśya
malaḥ saṃśodhyate+ambhasā/
snehasvedaistathotkleśya śodhyate !śodhanairmalaḥ//
Ca.8.6.14 ajīrṇe vardhate
glānirvibandhaścāpi jāyate/
pītaṃ saṃśodhanaṃ caiva viparītaṃ pravartate//
Ca.8.6.15 alpamātraṃ mahāvegaṃ
bahudoṣaharaṃ sukham/
laghupākaṃ sukhāsvādaṃ prīṇanaṃ vyādhināśanam//
Ca.8.6.16 avikāri ca vyāpattau
nātiglānikaraṃ ca yat/
gandhavarṇarasopetaṃ nidyānmātrāvadauṣadham//
Ca.8.6.17 vidhūya mānasān doṣān
&kāmādīnaśubhodayān/
ekāgramanasā pītaṃ samyagyogāya kalpate//
Ca.8.6.18 naraḥ śvo vamanaṃ pātā
bhuñjīta kaphavardhanam/
sujaraṃ dravabhūyiṣṭhaṃ, laghvaśītaṃ virecanam//
Ca.8.6.19 utkliṣṭālpakaphatvena kṣipraṃ
doṣāḥ sravanti hi/
pītauṣadhasya tu bhiṣak śuddhiliṅgāni lakṣayet//
Ca.8.6.20 ūrdhvaṃ kaphānuge pitte
viṭpitte+anukaphe tvadhaḥ/
hṛtadoṣaṃ vadet kārśyadaurbalye cet salāghave//
Ca.8.6.21 vāmayettu tataḥ śeṣamauṣadhaṃ
na tvalāghave/
staimitye+anilasaṅge ca nirudgāre+api vāmayet//
Ca.8.6.22 ālāghavāttanutvācca
kaphasyāpat paraṃ bhavet/
vamite vardhate vahniḥ śamaṃ doṣā vrajanti hi//
Ca.8.6.23 vamitaṃ laṅghayet
samyagjīrṇaliṅgānyalakṣayan/
tāni dṛṣṭvā tu peyādikramaṃ kuryānna laṅghanam//
Ca.8.6.24 saṃśodhanābhyāṃ śuddhasya
&hṛtadoṣasya dehinaḥ/
&yātyagnirmandatāṃ tasmāt kramaṃ peyādimācaret//
Ca.8.6.25 kaphapitte viśuddhe+alpaṃ
madyape vātapaitteke/
tarpaṇādikramaṃ kuryāt peyā+abhiṣyandayeddhi tān//
Ca.8.6.26 anulomo+anilaḥ svāsthyaṃ
kṣuttṛṣṇorjo manasvitā/
laghutvamindriyodgāraśuddhirjīrṇauṣadhākṛtiḥ//
Ca.8.6.27 klamo dāho+aṅgasadanaṃ bhramo
&mūrcchā śirorujā/
aratirbalahāniśca sāvaśeṣauṣadhākṛtiḥ//
Ca.8.6.28 akāle+alpātimātraṃ ca purāṇaṃ
na ca bhāvitam/
asamyaksaṃskṛtaṃ caiva vyāpadyetauṣadhaṃ drutam//
Ca.8.6.29 ādhmānaṃ parikartiśca srāvo
hṛdgātrayorgrahaḥ/
jīvādānaṃ savibhraṃśaḥ stambhaḥ sopadravaḥ klamaḥ//
Ca.8.6.30 ayogādatiyogācca daśaitā
vyāpado matāḥ/
preṣyabhaiṣajyavaidyānāṃ vaiguṇyādāturasya ca//
Ca.8.6.31 yogaḥ samyakpravṛttiḥ
syādatiyogo+ativartanam/
ayogaḥ prātilomyena na cālpaṃ vā pravartanam//
Ca.8.6.32 śleṣmotkliṣṭena
durgandhamahṛdyamati vā bahu/
virecanamajīrṇe ca pītamūrdhvaṃ pravartate//
Ca.8.6.33 kṣudhārtamṛdukoṣṭhābhyāṃ
svalpotkliṣṭakaphena vā/
tīkṣṇaṃ pītaṃ sthitaṃ kṣubdhaṃ vamanaṃ syādvirecanam//
Ca.8.6.34 prātilomyena doṣāṇāṃ
haraṇātte hyakṛtsnaśaḥ/
ayogasaṃjñe, kṛcchreṇa &yāti doṣo navā+alpaśaḥ//
Ca.8.6.35 pītauṣadho na śuddhaścejjīrṇe
tasmin punaḥ pibet/
auṣadhaṃ na tvajīrṇe+anyadbhayaṃ syādatiyogataḥ//
Ca.8.6.36 koṣṭhasya gurutāṃ jñātvā
laghutvaṃ balameva ca/
ayoge mṛdu vā dadyādauṣadhaṃ tīkṣṇameva vā//
Ca.8.6.37 vamanaṃ na tu duśchardaṃ
&duṣkoṣṭhaṃ na virecanam/
pāyayetauṣadhaṃ bhūyo hanyāt pītaṃ punarhi tau//
Ca.8.6.38 asnīgdhāsvinnadehasya
rūkṣasyānavamauṣadham/
doṣānutkliśya nirhartumaśaktaṃ janayedgadān//
Ca.8.6.39 vibhraṃśaṃ śvayathuṃ hikkāṃ
tamaso darśanaṃ &bhṛśam/
piṇḍikodveṣṭanaṃ kaṇḍūmūrvoḥ sādaṃ vivarṇatām//
Ca.8.6.40 snigdhasvinnasya cātyalpaṃ
dīptāgnerjīrṇamauṣadham/
śītairvā stabdhamāme vā doṣānutkliśya nāharet//
Ca.8.6.41 tāneva janayedrogānayogaḥ
sarva eva saḥ/
vijñāya matimāṃstatra yathoktāṃ kārayet kriyām//
Ca.8.6.42 taṃ tailalavaṇābhyaktaṃ
svinnaṃ prastarasaṅkaraiḥ/
pāyayeta punarjīrṇe samūtrairvā nirūhayet//
Ca.8.6.43 nirūḍhaṃ ca
rasairdhānvairbhojayitvā+anuvāsayet/
phalamāgadhikādārusiddhatailena mātrayā//
Ca.8.6.44 snigdhaṃ vātaharaiḥ snehaiḥ
punastīkṣṇena śodhayet/
na cātitīkṣṇena tato hyatiyogastu jāyate//
Ca.8.6.45 atitīkṣṇaṃ kṣudhārtasya
mṛdukoṣṭhasya bheṣajam/
hṛtvā++āśu viṭpittakaphān dhātūnvisrāvayeddravān//
Ca.8.6.46 balasvarakṣayaṃ dāhaṃ
kaṇṭhaśoṣaṃ &bhramaṃ tṛṣām/
kuryācca madhuraistatra śeṣamauṣadhamullikhet//
Ca.8.6.47 vamane tu virekaḥ syādvireke
vamanaṃ &punaḥ/
pariṣekāvagāhādyaiḥ suśītaiḥ stambhayecca tat//
Ca.8.6.48 kaṣāyamadhuraiḥ
śītairannapānauṣadhaistathā/
raktapittātisāraghnairdāhajvaraharairapi//
Ca.8.6.49 añjanaṃ
candanośīramajjāsṛkśarkarodakam/
lājacūrṇaiḥ pibenmanthamatiyogaharaṃ param//
Ca.8.6.50 śuṅgābhirvā vaṭādīnāṃ siddhāṃ
peyāṃ samākṣikām/
varcaḥsāṃgrāhikaiḥ siddhaṃ kṣīraṃ bhojyaṃ ca dāpayet//
Ca.8.6.51 jāṅgalairvā rasairbhojyaṃ
picchābastiśca śasyate/
maghurairanuvāsyaśca siddhena kṣīrasarpiṣā//
Ca.8.6.52 vamanasyātiyoge tu
śītāmbupariṣecitaḥ/
pibet &kaphaharairmanthaṃ saghṛtakṣaudraśarkaram//
Ca.8.6.53 sodgārāyāṃ bhṛśaṃ vamyāṃ
mūrcchāyāṃ dhānyamustayoḥ/
samadhūkāñcanaṃ cūrṇaṃ lehayenmadhusaṃyutam//
Ca.8.6.54 vamato+antaḥpraviṣṭāyāṃ
jihvāyāṃ kavalagrahāḥ/
snigdhāmlalavaṇairhṛdyairyūṣakṣīrarasairhitāḥ//
Ca.8.6.55 phalānyamlāni khādeyustasya
cānye+agrato narāḥ/
niḥsṛtāṃ tu tiladrākṣākalkaliptāṃ praveśayet//
Ca.8.6.56 &vāgrahānilarogeṣu
ghṛtamāṃsopasādhitām/
yavāgūṃ tanukāṃ &dadyāt snehasvedau ca buddhimān//
Ca.8.6.57 vamitaśca viriktaśca
mandāgniśca vilaṅghitaḥ/
agniprāṇavivṛddhyarthaṃ kramaṃ peyādikaṃ &bhajet//
Ca.8.6.58 bahudoṣasya rūkṣasya
hīnāgneralpamauṣadham/
sodāvartasya cotkliśya doṣānmārgānnirudhya ca//
Ca.8.6.59 bhṛśamādhmāpayennābhiṃ
pṛṣṭhapārśvaśirorujam/
śvāsaviṇmūtravātānāṃ saṅgaṃ kuryācca dāruṇam//
Ca.8.6.60 abhyaṅgasvedavartyādi
sanirūhānuvāsanam/
udāvartaharaṃ sarvaṃ karmādhmātasya śasyate//
Ca.8.6.61 snigdhena gurukoṣṭhena sāme
balavadauṣadham/
kṣāmeṇa mṛdukoṣṭhena śrāntenālpabalena vā//
Ca.8.6.62 pītaṃ gatvā gudaṃ sāmamāśu
doṣaṃ nirasya ca/
tīvraśūlāṃ sapicchāsrāṃ karoti parikartikām//
Ca.8.6.63 laṅghanaṃ &pācanaṃ sāme
rūkṣoṣṇaṃ laghubhojanam/
bṛṃhaṇīyo vidhiḥ sarvaḥ kṣāmāsya madhurastatahā//
Ca.8.6.64 āme jīrṇe+anubandhaścet
kṣārāmlaṃ laghu śasyate/
puṣpakāsīsamiśraṃ vā kṣāreṇa lavaṇena vā//
Ca.8.6.65 sadāḍimarasaṃ sarpiḥ
pibedvāte+adhike sati/
dadhyamlaṃ &bhojane pāne saṃyuktaṃ dāḍimatvacā//
Ca.8.6.66 devadārutilānāṃ vā
kalkamuṣṇāmbunā pibet/
aśvatthodumbaraplakṣakadambairvā śṛtaṃ payaḥ//
Ca.8.6.67 kaṣāyamadhuraṃ &śītaṃ
picchābastimathāpi vā/
yaṣṭīmadhukasiddhaṃ vā snehāstiṃ pradāpayet//
Ca.8.6.68 alpaṃ tu bahudoṣasya
doṣamutkliśya bheṣajam/
alpālpaṃ srāvayet kaṇḍūṃ śophaṃ kuṣṭhāni gauravam//
Ca.8.6.69
kuryāccāgnibalotkleśastaimityārucipāṇḍutāḥ/
parisrāvaḥ sa, taṃ doṣaṃ śamayedvāmayedapi//
Ca.8.6.70 snehitaṃ vā punastīkṣaṇaṃ
pāyayeta virecanam/
śuddhe cūrṇāsavāriṣṭān saṃskṛtāṃśca pradāpayet//
Ca.8.6.71 pītauṣadhasya vegānāṃ
nigrahānmārutādayaḥ/
kupitā hṛdayaṃ gatvā ghoraṃ kurvanti hṛdgraham//
Ca.8.6.72 &sa
hikkākāsapārśvārtidainyalālākṣivibhramaiḥ/
jihvāṃ khādati niḥsaṃjño dantān kiṭikiṭāpayan//
Ca.8.6.73 na gacchedvibhramaṃ tatra
vāmayedāśu taṃ bhiṣak/
madhuraiḥ pittamūrcchārtaṃ kaṭubhiḥ kaphamūrcchitam//
Ca.8.6.74 pācanīyaistataścāsya
doṣaśeṣaṃ vipācayet/
kāyāgniṃ ca balaṃ cāsya &krameṇotthāpayettataḥ//
Ca.8.6.75 pavanenātivamato hṛdayaṃ
yasya pīḍyate/
tasmai snigdhāmlalavaṇaṃ dadyāt pittakaphe+anyathā//
Ca.8.6.76 pītauṣadhasya vegānāṃ
nigraheṇa kaphena vā/
&ruddho+ati vā viśuddhasya gṛhṇātyaṅgāni mārutaḥ//
Ca.8.6.77
stambhavepathunistodasādodveṣṭanamanthanaiḥ/
tatra vātaharaṃ sarvaṃ snehasvedādi &kārayet//
Ca.8.6.78 atitīkṣṇaṃ mṛdau koṣṭhe
laghudoṣasya bheṣajam/
doṣān hṛtvā vinirmathya jīvaṃ harati śoṇitam//
Ca.8.6.79 tenānnaṃ miśritaṃ
dadyādvāyasāya śune+api vā/
bhuṅkte taccedvadejjīvaṃ na bhuṅkte pittamādiśet//
Ca.8.6.80 śuklaṃ vā bhāvitaṃ
vastramāvānaṃ koṣṇavāriṇā/
prakṣālitaṃ vivarṇaṃ syāt &pitte śuddhaṃ tu śoṇite//
Ca.8.6.81 tṛṣṇāmūrcchāmadārtasya
kuryādāmaraṇāt kriyām/
tasya pittaharīṃ sarvāmatiyoge ca yā &hitā//
Ca.8.6.82 mṛgagomahiṣājānāṃ sadyaskaṃ
jīvatāmasṛk/
pibejjīvābhisandhānaṃ jīvaṃ taddhyāśu &gacchati//
Ca.8.6.83 tadeva darbhamṛditaṃ raktaṃ
bastiṃ pradāpayet/
śyāmākāśmaryabadarīdūrvośīraiḥ śṛtaṃ payaḥ//
Ca.8.6.84 ghṛtamaṇḍāñjanayutaṃ śītaṃ
bastiṃ pradāpayet/
picchābastiṃ suśītaṃ vā ghṛtamaṇḍānuvāsanam//
Ca.8.6.85 gudaṃ bhraṣṭaṃ kaṣāyaiśca
stambhayitvā praveśayet/
sāma gāndharvaśabdāṃśca saṃjñānāśe+asya kārayet//
Ca.8.6.86 yadā virecanaṃ pītaṃ
viḍantamavatiṣṭhate/
vamanaṃ bheṣajāntaṃ vā doṣānutkliśya nāvahet//
Ca.8.6.87 tadā kurvanti kaṇḍvādīn doṣāḥ
prakupitā gadān/
sa vibhraṃśo matastatra syādyathāvyādhi bheṣajam//
Ca.8.6.88 pītaṃ snigdhena sasnehaṃ
taddoṣairmārdavādvṛtam/
na vāhayati doṣāṃstu svasthānāt stambhayeccyutān//
Ca.8.6.89 vātasaṅgagudastambhaśūlaiḥ
kṣarati cālpaśaḥ/
tīkṣṇaṃ bastiṃ virekaṃ vā so+arho laṅghitapācitaḥ//
Ca.8.6.90 rūkṣaṃ virecanaṃ pītaṃ
rūkṣeṇālpabalena vā/
mārutaṃ kopayitvā++āśu kuryādghorānupadravān//
Ca.8.6.91 stambhaśūlāni ghorāṇi
sarvagātreṣu muhyataḥ/
snehasvedādikastatra kāryo vātaharo vidhiḥ//
Ca.8.6.92 snigdhasya mṛdukoṣṭhasya
mṛdūtkliśyauṣadhaṃ kapham/
pittaṃ vātaṃ ca saṃrudhya satandrāgauravaṃ klamam//
Ca.8.6.93 daurbalyaṃ cāṅgasādaṃ ca
kuryādāśu tadullikhet/
laṅghanaṃ pācanaṃ &cātra snigdhaṃ tīkṣṇaṃ ca śodhanam//
Ca.8.6.94 tatra ślokau---
ityetā vyāpadaḥ proktāḥ sarūpāḥ sacikitsitāḥ/
vamanasya virekasya kṛtasyākuśalairnṛṇām&//
Ca.8.6.95 &etā vijñāya
matimānavasthāścaiva tattvataḥ/
&dadyāt saṃśodhanaṃ samyagārogyārthī& nṛṇāṃ sadā//
ityagniveśakṛte tantre carakapratisaṃskṛte+aprāpte dṛḍhabalasaṃpūrite
siddhisthāne vamanavirecanavyāpatsiddhirnāma ṣaṣṭho+adhyāyaḥ//6//