aṣṭādaśo+adhyāyaḥ/
Ca.1.18.1 athātastriśothīyamadhyāyaṃ
vyākhyāsyāmaḥ //
Ca.1.18.2 iti ha smāha bhagavānātreyaḥ //
Ca.1.18.3 trayaḥ śothā bhavanti
vātapittaśleṣmanimittāḥ te punardvividhā nijāgantubhedena //
Ca.1.18.4
tatrāgantavaśchedanabhedanakṣaṇanabhañjanapicchanotpeṣaṇaprahāravadhabandhanaveṣṭanavyadhanapīḍanādibhirvā
bhallātakapuṣpaphalarasātmaguptāśūkakrimiśūkāhitapatralatāgulmasaṃsparśanairvā
svedanaparisarpaṇāvamūtraṇairvā viṣiṇāṃ
saviṣaprāṇisaṃṣṭrādantaviṣāṇanakhanipātairvā
sāgaraviṣavātahimadahanasaṃsparśanairvā śothāḥ samupajāyante //
Ca.1.18.5 te punaryathāsvaṃ
hetuvyañjnairādāvupalabhyante nijavyañjanaikadeśaviparītaiḥ
bandhamantrāgadapralepapratāpanirvāpaṇādibhiścopakramairupakramyamāṇāḥ
praśāntimāpadyante //
Ca.1.18.6 nijāḥ punaḥ
snehasvedavamanavirecanāsthāpanānuvāsanaśirovirecanānāmayathāvatprayogānmithyāsaṃsarjanādvā
chardyalasakavisūcikāśvāsakāsātisāraśoṣapāṇḍurogodarajvarapradarabhagandarārśovikārātikarśanairvā
kuṣṭhakaṇḍūpiḍakādibhirvā
chardikṣavathūdgāraśukravātamūtrapurīṣavegadhāraṇairvā
karmarogopavāsādhvakarśitasya vā
sahasā+atigurvamlalavaṇapiṣṭānnaphalaśākarāgadadhiharitakamadyamandakavirūḍhanavaśūkaśamīdhānyānūpaudakapiśitopayogānmṛtpaṇkaloṣṭabhakṣaṇāllavaṇātibhakṣaṇādgarbhasāpīḍanādāmagarbhaprapatanāt
prajātānāṃ ca mithyopacārādudīrṇadoṣatvācca śophāḥ prādurbhavanti ityuktaḥ
sāmānyo hetuḥ //
Ca.1.18.7.-1 ayaṃ tvatra
viśeṣaḥ+asītarūkṣalaghuviśadaśramopavāsātikarśanakṣapaṇādibhirvāyuḥ
prakupitastvaṅmāṃsaśoṇitādīnyabhibhūya śophaṃ janayati sa
kṣiprotthānapraśamo bhavati tathā śyāmāruṇavarṇaḥ prakṛtivaṛno vā calaḥ
spandanaḥ kharaparuṣabhinnatvagromā chidyata iva bhidyata iva pīḍyata iva
sūcībhiriva tudyata iva pipīlikābhiriva saṃsṛpyate sarṣapakalkāvalipta iva
cimicimāyate saṃkucyata āyamyata iveti vātaśothaḥ ;
Ca.1.18.7-2
uṣṇatīkṣṇakaṭukakṣāralavaṇāmlājīrṇabhojanairagnyātapapratāpaiśca
pittaṃ prakupitaṃ tvaṅmāṃsaśoṇitānyabhihbūya śothaṃ janayati sa
kṣiprotthānapraśamo bhavati kṛṣṇapītanīlatāmrāvabhāsa uṣṇo ṃrduḥ
kapilatāmraromā uṣyate dūyate dhūpyate ūṣmāyate svidyate klidyate na ca
sparśamuṣṇaṃ ca suṣūyata iti pittaśothaḥ ;
Ca.1.18.7-3
gurumadhuraśītasnigdhairatisvapnāvyāyāmādibhiśca śleṣmā
prakupitastvaṅmāṃsaśoṇitādīnyabhibhūya śothaṃ janayati sa
kṛcchrotthānapraśamo bhavati pāṇḍuśvetāvabhāso guruḥ snigdhaḥ ślakṣṇaḥ
sthiraḥ styānaḥ śuklāgraromā sparśoṣṇasahaśceti śleṣmaśothaḥ;
Ca.1.18.7
yathāsvakāraṇākṛtisaṃsargāddvidoṣajāstrayaḥ śothā bhavanti
yathāsvakāraṇākṛtisannipātāt sānnipātika ekaḥ; &evaṃ saptavidho bhedaḥ
//
Ca.1.18.8
&prakṛtibhistābhistābhirbhidymāno dvividhastrividhaścaturvidhā
saptavidho+aṣṭavidhaśca śotha upalabhyate &punaścaika evotsedhasāmānyāt
//
Ca.1.18.9 bhavanti cātra
Ca.1.18.9ab śūyante yasya gātrāṇi
svapantīva rujanti ca /
Ca.1.18.9cd pīḍitānyunnamāntyāśu
vātaśothā tamādiśet //
Ca.1.18.10ab yaścāpyaruṇavarṇābhaḥ
śotho naktaṃ praṇaśyati /
Ca.1.18.10cd snehoṣṇamardanābhyāṃ ca
praṇaśyet sa ca vātikaḥ //
Ca.1.18.11ab yaḥ pipāsājvarārtasya
dūyate+atha vidahyate /
Ca.1.18.11cd svidyati klidyate
gandhī sa paittaḥ śvayatuḥ smṛtaḥ //
Ca.1.18.12ab yaḥ pītanetravaktratvak
pūrvaṃ madhyāt praśūyate /
Ca.1.18.12cd tanutvak cātisārī ca
pitaśothaḥ sa ucyate //
Ca.1.18.13ab śītaḥ saktagatiryastu
kaṇdūmān pāṇḍureva ca /
Ca.1.18.13cd nipīḍito nonnamati
śvayatuḥ sa kaphātmaḥ //
Ca.1.18.14ab yasya
śastrakuśacchinnācchoṇitaṃ na pravatate /
Ca.1.18.14cd kṛcchreṇa picchā
sravati sa cāpi kaphasaṃbhavaḥ //
Ca.1.18.15ab
nidānākṛtismāsargācchvayathuḥ syāddvidoṣajaḥ /
Ca.1.18.15cd sarvākṛtiḥ
sannipātācchotho vyāmiśrahetujaḥ //
Ca.1.18.16ab ystu pādābhinirvṛttaḥ
śothaḥ sarvāṅgago bhavaet /
Ca.1.18.16cd jantoḥ sa ca sukaṣṭaḥ
syāt prasṛtaḥ strīmukhācca yaḥ //
Ca.1.18.17ab yaścāpi guhyaprabhavaḥ
striyā vā puruṣasya vā /
Ca.1.18.17cd sa ca kaṣṭatamo jñeyo
yasya ca syurupadravāḥ //
Ca.1.18.18ab chardiḥ
śvāso+arucistṛṣṇā jvaro+atīsāra eva ca /
Ca.1.18.18cd saptako+ayaṃ
sadaurbalyaḥ śophopadaravasaṃgrahaḥ //
Ca.1.18.19ab yasya śleṣmā prakupito
jihvāmūle+avatiṣṭhate /
Ca.1.18.19cd āśu saṃjanayecchothā
jāyate+asyopajihvikā //
Ca.1.18.20ab yasya śleṣmā prakupitaḥ
kākale vyavatiṣṭhate /
Ca.1.18.20cd āśu saṃjanayecchophaṃ
karoti galaśuṇḍikām //
Ca.1.18.21ab yasya śleṣmā prakupito
galabāhye+avatiṣṭhate /
Ca.1.18.21cd śanaiḥ
saṃjanayecchophaṃ galagaṇḍo+asya jāyate //
Ca.1.18.22ab yasya śleṣmā
prakupitastiṣṭhatyantargale sthiraḥ /
Ca.1.18.22cd āśu saṃjanayechophaṃ
jāyate+asya galagrahaḥ //
Ca.1.18.23ab yasay pittaṃ prakupitā
saraktaṃ tvaci sarpapi /
Ca.1.18.23cd śophaṃ sarāgām
janayedvisarpastasya jāyate //
Ca.1.18.24ab yasya pittaṃ prakupitaṃ
tvaci rakte+avatiṣṭhate /
Ca.1.18.24cd śothaṃ sarāgaṃ janayet
piḍakā tasya jāyate //
Ca.1.18.25ab yasya prakupitaṃ pittaṃ
śoṇitaṃ prāpya śuṣyati /
Ca.1.18.25cd tilakā piplavo vyaṅgā
nīlikā tasya jāyate //
Ca.1.18.26ab yasya pittaṃ prakupitā
śaṅkhayoravatiṣṭhate /
Ca.1.18.26cd śvaythuḥ śaṅkhako nāma
dāruṇastasya jāyate //
Ca.1.18.27ab yasya pittaṃ prakupitaṃ
karṇamūle+avatiṣṭhate /
Ca.1.18.27cd jvarānte durjayo+antāya
śothastasyopajāyate //
Ca.1.18.28ab vātaḥ plīhānamuddhūya
kupito yasya tiṣṭhati /
Ca.1.18.28cd śaniḥ paritudana
pārśvaṃ plīhā tasyābhivardhate //
Ca.1.18.29ab yasya vāyuḥ prakupito
gulmasthāne+avatiṣṭhate /
Ca.1.18.29cd śophaṃ saśūlaṃ janayan
gulmastasyopajāyate //
Ca.1.18.30ab yasya vāyuḥ prakupitaḥ
śophaśūlakaraścaran /
Ca.1.18.30cd vaṅkṣaṇādvṛṣaṇau yāti
vṛddhistasyopajāyate //
Ca.1.18.31ab yasya vātaḥ
prakupitastvaṅmāṃsāntaramāśritaḥ /
Ca.1.18.31cd śothaṃ saṃjanayet
kukṣāvduaraṃ tasya jāyate //
Ca.1.18.32ab yasya vātaḥ prakupitaḥ
kukṣimāśritya tiṣṭhati /
Ca.1.18.32cd nādho vrajati
nāpyūrdhvamānāhastasya jāyae //
Ca.1.18.33ab
rogāścotsedhasāmānyadadhimāṃsārbudādayaḥ /
Ca.1.18.33cd viśiṣṭā nāmarūpābhyāṃ
nirdeśyāḥ śothasaṃgrahe //
Ca.1.18.34ab vātapittakaphā yasya
yugapat kupitāstrayaḥ /
Ca.1.18.34cd jihvāmūle+avatiṣṭhante
vidahantaḥ samucchiritāḥ //
Ca.1.18.35ab janayanti bhṛśaṃ śothaṃ
vedanāśca pṛthagvidhāḥ /
Ca.1.18.35cd taṃ śīghrakāriṇaṃ rogaṃ
rohiṇīti vinirdiśet //
Ca.1.18.36ab trirātraṃ paramaṃ tasya
jantorbhavati jīvitam /
Ca.1.18.36cd kuśalena tvanukrāntaḥ
kṣipraṃ saṃpadyate sukhī //
Ca.1.18.37ab santi hyevaṃvidhā rogāḥ
sādhyā dāruṇasaṃmatāḥ /
Ca.1.18.37cd ye hanyuranupakrāntā
mithyācāreṇa vā vā punaḥ //
Ca.1.18.38ab sādhyāścāpyapare santi
vyādhayo mṛdusaṃmatāḥ /
Ca.1.18.38cd yatnāyatnakṛtaṃ yeṣu
karma sidhyatyasaṃśayam //
Ca.1.18.39ab asādhyāścāpare santi
vyādhayo yāpyasaṃjñitāḥ /
Ca.1.18.39cd susādhvapi kṛtaṃ yeṣu
karma yātrākaraṃ bhavet //
Ca.1.18.40ab santi cāpyapare rogā
yeṣ karema na sidhyati /
Ca.1.18.40cd api yatnakṛtaṃ vālairna
tān vidvānupācaret //
Ca.1.18.41ab
sādhyāścaivāpyasādhyāśca vyādhayo dvividhāḥ smṛtāḥ /
Ca.1.18.41cd mṛdudāruṇabhedena te
bhavanti caturvidhāḥ //
Ca.1.18.42ab ta evāparisaṃkhyeyā
bhidyamānā bhavanti hi /
Ca.1.18.42cd
rujāvarṇasamutthānasthānasaṃsthānanāmabhiḥ //
Ca.1.18.43ab vyavasthākaraṇaṃ teṣāṃ
yathāsthūleṣu saṃgrahaḥ /
Ca.1.18.43cd tathā prakṛtisāmānyaṃ
vikāreṣūpadiśyate //
Ca.1.18.44ab vikāranāmākuśalo na
jihrīyāt kadācana /
Ca.1.18.44cd na hi sarvavikārāṇāṃ
nāmato+asti dhruvā sthitiḥ //
Ca.1.18.45ab sa eva kupito doṣaḥ
samutthānaviśeṣataḥ /
Ca.1.18.45cd sthānāntaragataścaiva
janayatyāmayān bahūn //
Ca.1.18.46ab
tasmādvikāraprakṛtīradhiṣṭhānāntarāṇi ca /
Ca.1.18.46cd samutthānaviśeṣāṃśca
buddhvā karma samācaret //
Ca.1.18.47ab yo hyetastritayaṃ
jñātvā karmāṇyārabhate bhiṣak /
Ca.1.18.47cd jñānapūrvaṃ yathānyāyaṃ
sa karmasu na muhyati //
Ca.1.18.48ab nityāḥ prāṇabhṛtāṃ dehe
vātapittakaphāstrayaḥ /
Ca.1.18.48cd vikṛtāḥ prakṛtisthā vā
tān bubhutseta paṇḍitaḥ //
Ca.1.18.49ab
utsāhocchvāsaniḥśvāsaceṣṭā dhātugatiḥ samā /
Ca.1.18.49cd samo mokṣo gatimatāṃ
vāyoḥ karmāvikārajam //
Ca.1.18.50ab darśanaṃ paktirūṣmā ca
kṣuttṛṣṇā dehamārdavam /
Ca.1.18.50cd prabhā prasādo medhā ca
pittakarmāvikārajam //
Ca.1.18.51ab sneho bandhaḥ
sthiratvaṃ ca gaurvaṃ vṛṣatā balam /
Ca.1.18.51cd kṣamā dhṛtiralobhaśca
kaphakarmāvikārajam //
Ca.1.18.52ab vāte pitte kaphe caiva
kṣīṇe lakṣaṇamucyate /
Ca.1.18.52cd karmaṇaḥ
prākṛtāddhānirvṛddhirvā+api virodhinām //
Ca.1.18.53ab doṣaprakṛtivaiśeṣyaṃ
niyataṃ vṛddhilakṣaṇam /
Ca.1.18.53cd doṣāṇāṃ
prakṛtirhānirvṛddhiścaivaṃ pakrīkṣyate //
Ca.1.18.54 tatra ślokāḥ
Ca.1.18.54ab saṃkhyāṃ nimittaṃ
rūpāṇi śothānāṃ sādhyatāṃ na ca /
Ca.1.18.54cd teṣāṃ teṣāṃ vikārāṇāṃ
śothāṃstāṃstāṃśca pūrvajān //
Ca.1.18.55ab vidhibhedaṃ vikārāṇāṃ
trividhā bodhyasaṃgraham /
Ca.1.18.55cd prākṛtaṃ karma doṣāṇāṃ
lakṣaṇaṃ hānivṛddhiṣu //
Ca.1.18.56ab
vītamoharajodoṣalobhamānamadaspṛhaḥ /
Ca.1.18.56cd vyākhyātavāṃstriśothīye
rogādhyāye punarvasuḥ //
ityagniveśakṛte tantre carakapratisaṃskṛte ślokasthāne triśothīyo
nāmāṣṭādaśo+adhyāyaḥ //
