32
cira-saṃṇiroha-masiṇā dukkheṇa ṇahaṃ samuppaanti mahiharā
jalaï jalanta-jalaaraṃ bhamaï bhamanta-maṇi-vidduma-laā-jālaṃ
rasaï rasantāvattaṃ bhijjaï bhijjanta-pavvaaṃ uahi-jalaṃ
āvatta-vivara-bhamiro malaa-maṇi-silā-ala-kkhalia-saṃcāro
gholira-taraṃga-visamo jaha dīsaï sāaro tahea huavaho
rahasa-palittucchalio je ccia paḍivei malaa-vaṇa-vitthāre
vijjhāa-ṇiattanto te ccea puṇo vi vijjhavei samuddo
utthambhia-maaraharo maara-vasāmisa-visaṅkhala-sihā-ṇivaho
ṇivaha-ṇisuddha-mahiharo mahihara-kūḍa-viaḍo viambhaï jalaṇo
jalaṇutthaṅghia-mūlā bāṇukkhitta-paḍiattaṇa-ṇisumbhantā
ṇivaḍanti jaluppīḍā paḍilomāgaa-paḍanta-viaḍāvattā
dhūmāi jalaï vihaḍaï ṭhāṇaṃ siḍhilei malaï malaücchaṅgaṃ
dhīrassa paḍhama-iṇhaṃ taha vi hu raaṇāaro ṇa bhañjaï pasaraṃ
bhuaïnda-loaṇāṇaṃ phuṭṭantāṇa a timīṇa sāara-majjhe
saṃvatta-jalaharāṇa va rāma-sarāṇala-haāṇa ṇīharaï rao
muha-puñjiaggi-ṇivahā dhūma-sihā-ṇiha-ṇirāa-aḍḍhia-salilā
ṇivaḍanti ṇahukkhittā palaükkā-daṇḍa-saṃṇihā ṇaï-sottā
aṭṭanta-salila-ṇivaho thoa-tthoa-paḍimukka-puliṇucchaṅgo
dīsaï osakkanto maggāhutto paaṃ paaṃ va samuddo
jalaṇa-ṇivahammi salilaṃ sāṇala-ṇivahucchalanta-salilammi ṇahaṃ
salila-ṇivahotthaammi a atthāaï ṇaha-ale dasa-disā-akkaṃ
sihiṇā paavijjante āaṭṭantammi vitthae jala-ṇivahe