saptapañcāśattamo+adhyāyaḥ/
Su.6.57.1 athāto+arocakapratiṣedhamadhyāyaṃ vyākhyāsyāmaḥ//
Su.6.57.2 yathovāca bhagavān dhanvantariḥ//
Su.6.57.3 doṣaiḥ pṛthak saha ca cittaviparyayācca
bhaktāyaneṣu hṛdi cāvatate pragāḍham/
nānne rucirbhavati taṃ bhiṣajo vikāraṃ bhaktopaghātamiha pañcavidhaṃ
vadanti///
Su.6.57.4 hṛcchūlapīḍanayutaṃ virasānanatvaṃ vātātmake
bhavati liṅgamarocake tu/
hṛddāhacoṣabahutā mukhatiktatā ca mūrcchā satṛḍ bhavati pittakṛte
tathaiva//
Su.6.57.5 kaṇḍūgutvakaphasaṃsravasādatandrāḥ śleṣmātmake
madhuramāsyamarocake tu/
sarvātmake pavanapittakaphā bahūni rūpāṇyathāsya hṛdaye samudīrayanti//
Su.6.57.6 saṃrāgaśokabhayaviplutacetasastu cintākṛto
bhavati so+aśucidarśanācca/
vāte vacāmbuvamanaṃ kṛtavān pibecca snehaiḥ surābhirathavoṣṇajalena
cūrṇam//
Su.6.57.7
kṛṣṇāviḍaṅgayavabhasmahareṇubhārgīrāsnailahiṅgulavaṇottamanāgarāṇām/
pitte guḍāmbumadhurairvamanaṃ praśastaṃ snehaḥ
sasaindhavasitāmadhusarpiriṣṭaḥ//
Su.6.57.8 nimbāmbuvāmitavataḥ kaphaje+anupānaṃ
rājadrumāmbu madhunā tu sadīpyakaṃ syāt/
cūrṇaṃ yaduktamathavā+anilaje tadeva sarvaiśca sarvakṛtamevamupakrameta//
Su.6.57.9
drākṣāpaṭolaviḍavetrakarīranimbamūrvābhayākṣabadarāmalakendravṛkṣaiḥ/
bījaiḥ karañjanṛpavṛkṣabhavaiśca piṣṭairlehaṃ pacet surabhimūtrayutaṃ
yathāvat//
Su.6.57.10 mustāṃ vacāṃ trikaṭukaṃ rajanīdvayaṃ ca bhārgīṃ
ca kuṣṭhamatha nirdahanīṃ ca piṣṭvā/
mūtre+avije dviradamūtrayute pacedvā pāṭhāṃ tugāmativiṣāṃ rajanīṃ ca
mukhyām//
Su.6.57.11 maṇḍūkimarkamamṛtāṃ ca salāṅgalākhyāṃ mūtre
pacettu mahiṣasya vidhānavidvā/
etānna santi caturo lihatastu lehān gulmāruciśvasanakaṇṭhahṛdāmayāśca//
Su.6.57.12 sātmyān †svadeśaracitān vividhāṃśca bhakṣyān pānāni
mūlaphalaṣāḍavarāgayogān/
adyādrasāṃśca vividhān vividhaiḥ prakārairbhuñjīta cāpi
laghurūkṣamanaḥsukhāni//
Su.6.57.13 āsthāpanaṃ vidhivadatra virecanaṃ ca
kuryānmṛdūni śirasaśca virecanāni/
trīṇyūṣaṇāni rajanītriphalāyutāni cūrṇīkṛtāni yavaśūkavimiśritāni//
Su.6.57.14 kṣaudrāyutāni
vitarenmukhabodhanārthamanyāni† tiktakaṭukāni ca
bheṣajāni/
mustādirājataruvargadaśāṅgasiddhaiḥ kvāthairjayenmadhuyutairvividhaiśca
lehaiḥ//
Su.6.57.15 mūtrāsavairguḍakṛtaiśca tathā tvariṣṭaiḥ
kṣārāsavaiśca madhumādhavatulyagandhaiḥ/
syādeṣa eva kaphavātahate vidhiśca śāntiṃ gate hutabhuji praśamāya
tasya//
Su.6.57.16 icchābhighātabhayaśokahate+antaragnau bhāvān
bhavāya vitaret khalu śakyarūpān/
artheṣu †cāpyapaciteṣu punarbhavāya paurāṇikaiḥ
śrutiśatairanumānayettam†//
Su.6.57.17 dainyaṃ gate manasi bodhanamatra śastaṃ yadyat
priyaṃ tadupasevyamarocake tu//
iti suśrutasaṃhitāyāmuttaratantrāntargate
kāyacikitsātantre+arocakapratiṣedho nāma (ekonaviṃśo+adhyāyaḥ, āditaḥ)
saptapañcāśattamo+adhyāyaḥ//57//