28
jāo aṇṇo ccia se vilaïa-dhaṇu-metta-vāvaḍo vāma-bhuo
aha vāma-bhuapphālaṇa-paḍirava-paḍiuṇṇa-dasa-disā-vitthāraṃ
saṃbharaï jāa-saṅkaṃ palaa-ghaṇabbhahia-pellaṇaṃ tellokkaṃ
geṇhaï a so aṇāara-paraṃmuha-pasāriagga-hatthāvaḍiaṃ
khaa-sūra-maūhāṇa va ekkaṃ uahi-parivattaṇa-sahaṃ bāṇaṃ
to saṃdhanteṇa saraṃ rasantarolugga-bhiuḍi-bhaṅgeṇa ciraṃ
ṇīsasiūṇa pulaïo aṇuampā-dūmiāṇaṇeṇa samuddo
aha kaḍḍhiuṃ paütto ṇikkampa-ṇirāa-diṭṭhi-saccavia-saraṃ
valia-bhua-ruddha-majjhaṃ daḍha-ṇippīḍia-guṇaṃ dhaṇuṃ rahuṇāho
sara-muha-visama-pphaliā ṇamanta-dhaṇu-koḍi-vipphuranta-cchāā
ṇajjaï kaḍḍhijjantā jīā-sadda-gahiraṃ rasanti ravi-arā
phuḍa-jīā-rava-muhalaṃ tajjeï va bāṇa-muha-jalantaggi-sihaṃ
jalaṇihi-vaha-paḍiuddhaṃ āaṇṇāaḍḍhiaṃ viambhaï va dhaṇuṃ
khuhia-jala-siṭṭha-sāro muha-ṇiddhāvia-pasāriukkā-ṇivaho
āaḍḍhijjanto ccia ṇajjaï paḍio tti sāare rāma-saro
dhua-vijju-piṅgalāiṃ sara-muha-ṇiggiṇṇa-huavaha-palittāiṃ
uppāa-loaṇāi va phuṭṭanti disā-muhāṇa ghaṇa-bindāiṃ
to bhua-rahasāaḍḍhia-dhaṇu-vaṭṭha-pphulia-bahala-dhūmuppīḍaṃ
muaï muha-ṇiggaāṇala-sihā-samolugga-sūra-kiraṇaṃ bāṇaṃ
so jaliūṇa ṇaha-ale saliladdhatthamia-huavahāamba-muho
paḍhamoiṇṇa-diṇaaro dīho diaho vva sāarammi ṇivaḍio
gaaṇe vijju-ṇihāo khaanta-kālāṇalo samudducchaṅge
mahi-ampo pāāle hoi paḍanta-paḍia-ṭṭhio rāma-saro