43
hīranta-mahiharāhiṃ maīhi bhaa-hittha-patthia-ṇiattāhiṃ
mohanti khaṇa-vivattia-sasaṃbhamummuha-paloiāi vaṇāiṃ
ummūliāṇa khuḍiā ukkhippantāṇa ujjuaṃ osariā
ṇijjantāṇa ṇirāā girīṇa maggeṇa patthiā ṇaï-sottā
ummuha-sāraṅga-aṇaṃ apphundaï malia-meha-sāraṃ gaaṇaṃ
vivarabbhantara-vihaaṃ giri-ālaṃ sihara-paribhamanta-ravi-haaṃ
aṃsa-ṭṭhavia-mahiharā ubbhia-dāhiṇa-karāvalambia-siharā
uttāṇa-vāma-kara-ala-dharia-ṇiamba-pasarā ṇiattanti kaī
patthāṇa ccia paḍhamaṃ bhua-metta-pahāviāṇa jaṃ ṇa pahuttaṃ
kaha taṃ cia tāṇaṃ cia pahuppaï kaīṇa mahiharāṇa a gaaṇaṃ
vahaï pavaṃgama-loo sama-tuliukkhitta-milia-mūladdhante
ekkakkama-siharuggama-ṇihasuppusia-sariā-muhe dharaṇihare
ṇivvaṇṇeūṇa ciraṃ pavaā bolenti mahihara-bharakkantā
sāara-paḍirūāiṃ paḍhamukkhaa-viaḍa-mahihara-ṭṭhāṇāiṃ
khaṇa-saṃdhia-meha-aḍā veukkhippanta-giriṇirāa-ṭṭhaviā
parivaḍḍhantāāmā vahanti va ṇahaṅgaṇe mahā-ṇaï-sottā
selesu sela-tuṅgā ṇaha-ala-miliesu milia-danta-pphalihā
pavaa-vihuesu vihuā ṇivvaḍiesu vi ṇa ṇivvalanti vaṇa-gaā
vevira-paoharāṇaṃ disāṇa giri-vivara-diṭṭha-taṇu-majjhāṇaṃ
kusuma-raeṇa surahiṇā agghāeṇa va ṇimīliāi muhāiṃ
pavaā kara-ala-dharie ṇaha-muha-ṇibbhiṇṇa-vevamāṇa-visahare
gaï-vasa-visaṭṭa-sihare biïa-karehi parisaṃṭhaventi mahihare