82
abbhuṭṭhaṇa-turiāṇaṃ sohaï daïovaūhaṇa-virāāṇaṃ
asamatta-maṇḍaṇāṇaṃ tahea saaṇa-gamaṇaṃ vilāsavaīṇaṃ
avasāia-diṇṇa-suho sahīhi thira-diṭṭhi-ṇihua-vāria-viḍio
hittha-hiao muṇijjaï piehi alia-kuvio vilāsiṇi-sattho
saha vaḍḍhiaṃ sahiṃ miva vaḍḍhantiṃ piaamāhisāraṇa-vigghe
vārei cireṇa mao lajjaṃ vicchuhaï vammaho ccia paḍhamaṃ
sahi-aṇa-hatthāhi muhaṃ dara-raïa-visesaaṃ samakkhettūṇa
juvaīhi valia-visamaṃ appāhijjaï sasaṃbhamaṃ dūi-jaṇo
aṇṇaṃ sahi-aṇa-purao appāhento a aṇṇahā dūi-jaṇaṃ
jampaï vimukka-dhīraṃ aṇṇaṃ cia daïa-daṃsaṇe juvaï-jaṇo
kaha vi samuhāṇiaṅke kaha kaha vi valanta-cumbiovatta-muhe
dei khalantullāve ṇava-vahu-satthe visūria-raaṃ pi dhiiṃ
sāsaï vimukka-māṇo bahalubbhiṇṇa-pulaüggameṇa piāṇaṃ
purao-hutta-ṇisaṇṇo gaoṇiatta-hiao vilāsiṇi-sattho
ṇa piaï diṇṇaṃ pi muhaṃ ṇa paṇāmei aharaṃ ṇa moei balā
kaha vi paḍivajjaï raaṃ paḍhama-samāgama-paraṃmuho juvaï-jaṇo
avalambijjaü dhīraṃ ṇa a so ehii ihuggae vi paose
ia dūīhi tulijjaï paḍhamāṇia-piaamo vilāsiṇi-sattho
dei vilāsavaīṇaṃ suhe a dukkhe a pāaḍia-sabbhāvā