87
aṇṇeṇa samāraddhaṃ vaaṇaṃ aṇṇeṇa harisa-gahia-pphiḍiaṃ
aṇṇeṇa addha-bhaṇiaṃ muheṇa aṇṇeṇa se kaha vi ṇimmaviaṃ
to uggāhia-soaṃ teṇa bhaṇanteṇa muha-paholira-dhūmaṃ
saṃtāviekka-hiaaṃ dasa-kaṇṭha-kkhalia-palahuaṃ ṇīsasiaṃ
āhāsaï a ṇisiare āṇā-sama-kāla-diṇṇa-paḍisaṃlāve
mahi-ṇimiohaa-kara-ala-taṃsa-ṭṭhia-tia-bharuṇṇamia-dehaddhe
taṃ māā-ṇimmaviaṃ riu-daṃsaṇa-visama-valia-ṇiccala-ṇaaṇaṃ
dāveha kaṇṭha-rahiaṃ sīāi vioa-paṇḍuraṃ rāma-siraṃ
to amarisa-melāvia-bhumaüggāhia-taraṃgia-ṇilāḍa-aḍaṃ
chiṇṇāṇiaṃ va taṃ cia tāhe ccia tehi ṇimmiaṃ rāma-siraṃ
saṃpatthiā a saṃbhama-calaṇovaḍaṇa-visamuṭṭhiā pamaa-vaṇaṃ
kaha vi samattappāhia-dahavaaṇāṇatti-vāvaḍā raaṇiarā
pattā a phuḍia-maṇi-aḍa-vivaruṭṭhia-salila-baddha-paṅkaa-maülaṃ
pavaṇa-sua-bhagga-pāava-bhaṅguggaa-bāla-kisalaaṃ pamaa-vaṇaṃ
āikulaaṃ
pecchanti a saï-saṃṭhia-vaaṇa-visaṃvaïa-thaṇa-ṇisaṇṇa-kara-alaṃ
dahavaaṇāgama-saṅkia-paa-sadduppittha-loaṇaṃ jaṇaa-suaṃ
piaama-sahattha-pesia-maṇi-suṇṇaïa-siḍhiladdha-veṇī-bandhaṃ
dhoa-kaladhoa-paṇḍura-paḍanta-bāha-pahaüṇṇaa-tthaṇa-alasaṃ
ajamia-pamhala-veṇiṃ bāha-jala-pahāviālaotthaïa-muhiṃ
rasaṇā-suṇṇa-ṇiambaṃ vicchaḍḍia-maṇḍaṇagghavia-lāvaṇṇaṃ