102
vahaï vivalāa-ṇiddaṃ biiovāsa-pariattaṇāvaddha-suhaṃ
visama-sua-maṅgala-ravaṃ ohīanta-paalāiaṃ dahavaaṇo
to mahu-maa-muccantāmasiṇohīranta-lohiacchi-ṇihāaṃ
dhaṇu-saddāmarisa-haaṃ ṇiddā-sesaṃ dasāṇaṇassa vialiaṃ
tuṅga-maṇi-toraṇāi va ekkakkama-laṅghiaṅguli-karālāiṃ
uddhaṃ bhua-jualāiṃ muaï valeūṇa ṇiaa-saaṇucchaṅge
aha bhaa-calierāvaṇa-bhajjanta-kkhambha-diṇṇa-sura-saṃkhohaṃ
āhammiuṃ paattaṃ raṇa-saṃṇāha-pisuṇaṃ dasāṇaṇa-tūraṃ
raṇa-saṇṇā-paḍiuddhā gahia-jahāsaṇṇa-paharaṇā raaṇiarā
mīlanta-kaṇṭha-laggaṃ thoaṃ ghettūṇa ṇiggaā juvaï-jaṇaṃ
āucchamāṇa-gahiā suammi atthekka-samara-saṇṇā-vaḍahe
juaï-muhāhi piāṇaṃ ṇenti amukka-siḍhila-ṭṭhiā aharoṭṭhā
piaama-kaṇṭholaïaṃ juaīṇa suammi samara-saṃṇāha-rave
īsi-ṇihaṃ ṇavara bhaaṃ suraa-kkheeṇa galaï bāhā-jualaṃ
sua-saṇṇā-rava-turiā paḍivaṇṇāuha-vihattha-valia-kara-alā
uvvellanti ṇisiarā vaccha-valanta-tthaṇaṃ piāveḍha-suhaṃ
rumbhantīṇa piaame akkaa-uvve vi paṇaa-bhaṅgammi kae
juaīṇa cira-parūḍho bhaa-hitthammi hiae ṇa laggaï māṇo
jaha jaha piāi rubbhaï saṃbhāvia-sāmiāvamāṇabbhahiaṃ
taha taha bhaïssa vaḍḍhaï saṃmāṇia-macchareṇa samarucchāho