116
kuvieṇa vijjumālī cira-jujjhia-harisio suseṇeṇa kao
calaṇa-jualāvalambia-ṇakkhukkhitta-khuḍiohaa-bhua-pphaḍiho
sahia-paharaṃ ṇaleṇa vi tavaṇassa talāhighāa-moḍia-kaṇṭhaṃ
ṇihiaṃ dehammi siraṃ deho addha-ṇimio mahi-alammi kao
hantūṇa jambumāliṃ jhatti vihiṇṇo aïñcio pavaṇa-suo
saala-tala-gāḍha-tāḍaṇa-bhiṇṇucchalia-sira-mea-sitta-dasa-disaṃ
aha geṇhaï aïbhūmiṃ indaï-vāli-taṇaāṇa raṇa-soḍīraṃ
ṇihaekkamekka-pariaṇa-sa-hattha-paḍivaṇṇa-saṃsaa-tulārohaṃ
bāṇandhaāria-disaṃ dhaṇu-maṇḍala-parigaaṃ visesei paraṃ
āloiukkhaāṇia-mukka-paḍantehi giri-sahassehi kaī
ṇivaḍanti kusuma-ṇibbhara-milia-valanta-viḍavovaūḍha-mahuarā
vivaïṇṇa-pphala-lahuā dhua-majjha-kkhuḍia-pallavā duma-ṇivahā
vāli-taṇaaṃ ṇa pāvaï gaaṇe guppaï dumehi sara-saṃghāo
chijjanti addha-vanthe entā dahamuha-suaṃ ṇa laṅghanti dumā
vikkhitta-loddha-kusumaṃ sara-daliuddhāamāṇa-candaṇa-gandhaṃ
uddhua-mandāra-raaṃ sarasa-lavaṅga-dala-gabbhiṇaṃ hoi ṇahaṃ
āikulaaṃ 7
ia taṃ sama-paḍihatthaṃ vāraṃ-vāra-bala-diṇṇa-sāhukkāraṃ
indaï-vāli-suāṇaṃ paraṃ pamāṇaṃ gaaṃ pi vaḍḍhaï jujjhaṃ
duma-kusuma-majjha-ṇiggaa-sara-puṅkhālagga-ṇijjamāṇa-mahuaraṃ
ṇivvāvārosaria-ṭṭhiohaāvigga-seṇṇa-vimhaa-diṭṭhaṃ
dahamuha-taṇaa-visajjia-sara-bharia-ṇahaṅgaṇuppaïa-vāli-suaṃ
vāli-sua-rosa-pesia-sāla-silā-sela-ruddha-dahamuha-taṇaaṃ