133
to kaḍḍhiūṇa cāvaṃ kuṇḍala-maṇi-kiraṇa-ghaḍia-jīā-bandhaṃ
mukko rāmassa ure paḍhamaṃ haa-bandhuṇā dahamuheṇa saro
vea-paḍieṇa teṇa a taha dhīro vi parikampio rahuṇāho
appāṇa-ṇivvisesaṃ saalaṃ jaha ṇeṇa kampiaṃ tellokkaṃ
rahuṇāhassa vi bāṇo aṇuparivāḍi-ghaḍia-pphuḍia-keūraṃ
dahavaaṇa-bhua-ṇihāaṃ tāla-vaṇa-kkhandha-pariaeṇa aïgao
aṇṇaṃ saṃdhia-bāṇaṃ rahasāaḍḍhia-ṇirāa-vaṭṭhaṃ aṇṇaṃ
samaaṃ rakkhasa-vaïṇo aṇṇaṃ sara-lahuioaraṃ hoi dhaṇuṃ
saï-saṃdhia-ṇinta-saraṃ avaṅga-desa-saï-lagga-jīā-bandhaṃ
dīsaï saï-mukka-saraṃ saï-maṇḍalia-viaḍoaraṃ rāma-dhaṇuṃ
vāmo pasāria ccia dāhiṇa-hattho avaṅga-desa-ṇivaḍio
cāvesu a taha ṇimiā tāṇaṃ dīsanti antarālesu sarā
dahamuha-visajjieṇa a sareṇa sīā-vioa-saï-saṃtattaṃ
hiaaṃ amukka-dhīraṃ ṇihāa-bhiṇṇaṃ pi rāhaveṇa ṇa ṇāaṃ
rahuṇāha-pesieṇa a sareṇa samuhāgaassa rakkhasa-vaïṇo
bhiṇṇo ṇiḍāla-vaṭṭo ṇa a se phuḍa-bhiuḍi-viraaṇā viddaviā
to se mucchā-vihalo lohia-ṇīsanda-bharia-loaṇa-ṇivaho
vāraṃ-vāra-paaṭṭo bhamio bāhu-siharesu muha-saṃghāo
to gaa-mohummillo ṇaaṇa-huāsaṇa-païtta-pattaṇa-pamhaṃ
muaï sarosāaḍḍhia-biia-muhāvaṅga-milia-puṅkhaṃ bāṇaṃ
to so khaāṇala-ṇiho kiraṇa-sahassehi ṇibbharenta-dasa-diso
rahuvaï-sara-rāhu-muhe panthaddhe sūra-maṇḍalo vva ṇiuḍḍo