131
daṭṭhūṇa a taṃ ṇintaṃ pīā maṅgala-maṇāhi raaṇiarīhiṃ
jatto ccia uppaṇṇā tehiṃ cia loaṇehi bāha-tthavaā
to teṇa kara-ala-ṭṭhia-selojjhara-salila-ṇivvaria-vaccha-aḍaṃ
diṭṭhīhi a bāṇehi a tuliaṃ jāi lahuaṃ pavaṃgama-seṇṇaṃ
pāsāvaḍiammi vi se vihīsaṇe pavaa-seṇṇa-kaa-parivāre
dīṇo tti soaro tti a amarisa-rasa-saṃdhio vi ullalaï saro
visahia-paḍhama-ppaharo ṇavari a roseṇa saṃdhiubbhaḍa-bāṇo
indāsaṇīa va dumo sattīa urammi lakkhaṇo ṇibbhiṇṇo
so vi a pavaṇa-suāṇia-dharāharosahi-viiṇṇa-jīabbhahio
taha-saṃdhia-cāva-saro ṇisāarehi saha jujjhiuṃ āḍhatto
kulaaṃ
aha rāmo vi ṇiacchaï turaa-khura-ppahara-vihala-jalahara-vaṭṭhaṃ
ṭhia-vajjaharālambia-kaṇaa-dhaa-kkhambha-ṇimmahanta-parimalaṃ
vāma-bhua-gahia-paggaha-māali-bhara-ṇamia-dīhara-dhurā-daṇḍaṃ
bhijjanta-meha-sīhara-taṇṇāoṇaa-ṇisaṇṇa-cāmara-pamhaṃ
sasi-ṇihasa-tusārollia-ravi-ara-vasuāa-dhaa-vaḍa-sihaddhantaṃ
uṇṇaa-pacchima-taḍimaṃ ṇivaḍantaṃ khaa-vaïṃ va saggāhi rahaṃ
to rāmo māaḍiṇā paḍhama-darābhāsaṇummuha-pasaṇṇa-muho
tiasa-bahumāṇa-garuaṃ dūraaroṇāmiāṇaṇeṇa paṇamio
dei a raha-puñjaïaṃ uhaa-kara-kkhivaṇa-pāaḍia-vitthāraṃ
kavaaṃ tihuaṇa-vaïṇo abbhantara-lagga-ṇimmahanta-parimalaṃ
taṃ ca kavaaṃ surāhiva-savvaṅga-pahutta-loaṇa-suha-ppharisaṃ
sīā-viraholugge jāaṃ thoa-siḍhilaṃ rahuvaïssa ure