dviṣaṣṭitamo+adhyāyaḥ/
Su.6.62.1 athāta unmādapratiṣedhamadhyāyaṃ vyākhyāsyāmaḥ//
Su.6.62.2 yathovāca bhagavān dhanvantariḥ//
Su.6.62.3 madayantyuddhatā(madayantyudgatā) doṣā
yasmādunmārgamāśritāḥ†/
mānaso+ayamato vyādhirunmāda iti kīrtitaḥ†//
Su.6.62.4 ekaikaśaḥ† samastaiśca doṣairatyarthamūrcchitaiḥ/
mānasena ca duḥkhena sa pañcavidha ucyate//
Su.6.62.5 viṣādbhavati ṣaṣṭhaśca yathāsvaṃ tatra
bheṣajam/
sa cāpravṛddhastaruṇo madasaṃjñāṃ bibharti ca//
Su.6.62.6 mohodvegau svanaḥ śrotre
gātrāṇāmapakarṣaṇam/
atyutsāho+aruciścānne svapne kaluṣabhojanam†//
Su.6.62.7 vāyunonmathanaṃ cāpi †bhramaścakragatasya
vā/
yasya syādacireṇaiva unmādaṃ so+adhigacchati//
Su.6.62.8 rūkṣacchaviḥ paruṣavāgdhamanītato vā †śītāturaḥ kṛśatanuḥ
sphuritāṅgasandhiḥ/
āsphoṭayasyaṭati gāyati nṛtyaśīlo vikrośati bhramati cāpyanilaprakopāt//
Su.6.62.9 tṛṭsvedadāhabahulo
bahubhigvinidrāśchāyāhimānilajalāntavihārasevī/
tīkṣṇo himāmbuni caye+api sa vahniśaṅkī pittāddivā nabhasi paśyati
tārakāśca//
Su.6.62.10 chardyagnisādasadanārucikāsayukto
yoṣidviviktaratiralpamatipracāraḥ/
nidrāparo+alpakathano+alpabhuguṣṇasevī rātrau bhṛśaṃ bhavati cāpi
kaphaprakopāt//
Su.6.62.11 sarvātmake pavanapittakaphā yathāsvaṃ
saṃharṣitā iva ca liṅgamudīrayanti//
Su.6.62.12
caurairnarendrapuruṣairaribhistathā+anyairvitrāsitasya
dhanabāndhavasaṃkṣayādvā/
gāḍhaṃ kṣate manasi ca priyayā riraṃsorjāyeta cotkaṭataro manaso
vikāraḥ//
Su.6.62.13 citraṃ sa jalpati manonugataṃ visaṃjño
gāyatyatho hasati roditi †mūḍhasaṃjñaḥ/
raktekṣaṇo hatabalendriyabhāḥ sudīnaḥ śyāvānano viṣakṛto†+atha bhavet
parāsuḥ//
Su.6.62.14 snigdhaṃ svinnaṃ tu manujamunmādārtaṃ
viśodhayet/
tīkṣṇairubhayatobhāgaiḥ śirasaśca virecanaiḥ//
Su.6.62.15 vividhairavapīḍaiśca sarṣapasnehasaṃyutaiḥ/
yojayitvā tu taccūrṇaṃ ghrāṇe †tasya prayojayet//
Su.6.62.16 satataṃ dhūpayeccainaṃ śvagomāṃsaiḥ
supūtibhiḥ/
sarṣapānāṃ ca tailena nasyābhyaṅgau hitau sadā//
Su.6.62.17 darśayedadbhutānyasya vadennāśaṃ priyasya
vā/
bhīmākārairnarairnāgairdāntairvyālaiśca nirviṣaiḥ//
Su.6.62.18 bhīṣayet saṃyataṃ pāśaiḥ kaśābhirvā+atha
tāḍayet/
yantrayitvā suguptaṃ vā trāsayettaṃ tṛṇāgninā//
Su.6.62.19 jalena tarjayedvā+api
rajjughātairvibhāvayet/
balavāṃścāpi saṃrakṣet jale+antaḥ parivāsayet/
pratudedārayā cainaṃ marmāghātaṃ vivarjayet/
veśmano+antaḥ praviśyainaṃ rakṣaṃstadveśma dīpayet//
Su.6.62.20 sāpidhāne †jaratkūpe satataṃ
vā nivāsayet/
tryahāttryahādyavāgūśca †tarpaṇān vā pradāpayet//
Su.6.62.21 kevalānambuyuktān vā kulmāṣān vā
bahuśrutaḥ/
hṛdyaṃ yaddīpanīyaṃ ca tatpathyaṃ tasya bhojayet(yojayet)//
Su.6.62.22
(viḍaṅgatriphalāmustamañjiṣṭhādāḍimotpalaiḥ/
śyāmailavālukailābhiścandanāmaradārubhiḥ//
Su.6.62.23 barhiṣṭharajanīkuṣṭhaparṇinīsārivādvayaiḥ/
hareṇukātrivṛddantīvacātālīsakeśaraiḥ//
Su.6.62.24 dvikṣīraṃ sādhitaṃ sarpirmālatīkusumaiḥ
saha/
gulmakāsajvaraśvāsakṣayonmādanivāraṇam//
Su.6.62.25 etadeva hi saṃpakvaṃ jīvanīyopasaṃbhṛtam/
caturguṇena dugdhena mahākalyāṇamucyate//
Su.6.62.26 apasmāraṃ grahaṃ śoṣaṃ klaibyaṃ
kārśyamabījatām/
ghṛtametannihantyāśu ye cādau gaditā gadāḥ//
Su.6.62.27
barhiṣṭhakuṣṭhamañjiṣṭhākaṭukailāniśāhvayaiḥ/
tagaratriphalāhiṅguvājigandhāmaradrumaiḥ//
Su.6.62.28 vacā+ajamodākākolīmedāmadhukapadmakaiḥ/
saśarkaraṃ hitaṃ sarpiḥ pakvaṃ kṣīracaturguṇam//
Su.6.62.29 bālānāṃ grahajuṣṭānāṃ puṃsāṃ
duṣṭālparetasām/
khyātaṃ phalaghṛtaṃ strīṇāṃ vandhyānāṃ cāśu garbhadam//)
Su.6.62.30 brahmīmaindrīṃ viḍaṅgāni vyoṣaṃ hiṅgu surāṃ
jaṭhām/
viṣaghnīṃ laśunaṃ rāsnāṃ viśalyāṃ surasāṃ vacām//
Su.6.62.31 jyotiṣmatīṃ †nāgaraṃ ca
anantāmabhayāṃ tathā/
saurāṣṭrīṃ ca samāṃśāni †gajamūtreṇa peṣayet//
Su.6.62.32 chāyāviśuṣkāstadvartīryojayedvidhikovidaḥ/
avapīḍe+añjane+abhyaṅge nasye dhūme pralepane//
Su.6.62.33 uropāṅgalalāṭeṣu sirāścāsya vimokṣayet/
apasmārakriyāṃ cāpi grahoddiṣṭāṃ ca kārayet//
Su.6.62.34 śāntadoṣaṃ viśuddhaṃ ca
snehabastibhirācaret/
unmādeṣu ca sarveṣu kuryāccattaprasādanam/
mṛdupūrvāṃ made+apyevaṃ kriyāṃ mṛdvīṃ prayojayet//
Su.6.62.35 śokaśalyaṃ vyapanayedunmāde pañcame bhiṣak/
viṣaje mṛdupūrvāṃ ca viṣaghnīṃ kārayet kriyām//
iti suśrutasaṃhitāyāmuttaratantrāntargate bhūtavidyātantre
unmādapratiṣedho nāma (tṛtīyo+adhyāyaḥ, āditaḥ) dviṣaṣṭitamo+adhyāyaḥ
//62//