109
kāyendriyasiddhir aśuddhikṣayāt tapasaḥ //2.43//
tapaḥsiddhisūcakam āha --- kāyendriyasiddhir aśuddhikṣayāt tapasaḥ/ aśuddhilakṣaṇam āvaraṇaṃ tāmasam adharmādi/ aṇimādyā mahimā laghimā prāptiś ca/ sugamam //2.43//
svādhyāyād iṣṭadevatāsaṃprayogaḥ //2.44//
svādhyāyasiddhisūcakam āha --- svādhyāyād iṣṭadevatāsaṃprayogaḥ/ sugamam //2.44//
samādhisiddhir īśvarapraṇidhānāt //2.45//
samādhisiddhir īśvarapraṇidhānāt/ na ca vācyam īśvarapraṇidhānād eva cet saṃprajñātasya samādher aṅginaḥ siddhiḥ kṛtaṃ saptabhir aṅgair iti/ īśvarapraṇidhānasiddhau dṛṣṭādṛṣṭāv āntaravyāpāreṇa teṣām upayogāt/ saṃprajñātasiddhau ca saṃyogapṛthaktvena dadhna iva kratvarthatā puruṣārthatā ca/ na caivam anantaraṅgatā dhāraṇādhyānasamādhīnāṃ saṃprajñātasiddhau/ saṃprajñātasamānagocaratayāṅgāntarebhyo 'tadgocarebhyo+asyāntaraṅgatvapratīteḥ/ īśvarapraṇidhānam api īśvaragocaraṃ na saṃprajñeyagocaram iti bahiraṅgam iti sarvam avadātam/ prajānātīti prajñāpadavyutpattir darśitā //2.45//
sthirasukham āsanam //2.46//
uttarasūtram avatārayati --- uktāḥ saha siddhibhir yamaniyamāḥ/ āsanādīni vakṣyāmaḥ/ tatra --- sthirasukham āsanam/ sthiraṃ niścalaṃ yat sukhaṃ sukhāvahaṃ tad āsanam iti