melāpana of gold and abhra

rasoparasasya hemno dviguṇaṃ śuddhamākṣikaṃ dattvā /
svarasena kākamācyā rambhākandena mṛdnīyāt // GRht_12.9 //

kṛtamityetatpiṇḍaṃ hemābhraṃ milati vajramūṣāyām /

vidhyantaramāha rasetyādi // GRhtCM_12.9:1 //

rasoparasasya vaikrāntagandhakādermadhye śuddhamākṣikaṃ nirdoṣaṃ tāpyaṃ hemno dviguṇaṃ kanakāddviguṇitaṃ dattvā dviguṇamākṣikayutaṃ hema dattvetyarthaḥ // GRhtCM_12.9:2 //

etadrasoparasādikaṃ kākamācyā vāyasyāḥ svarasena mṛdnīyāt mardanaṃ kuryāt // GRhtCM_12.9:3 //

rambhākandena ca kadalīkandenāpītyarthaḥ // GRhtCM_12.9:4 //

etatpūrvauṣadhaṃ piṇḍaṃ golākāraṃ kuryāt // GRhtCM_12.9:5 //

itividhānena hemābhraṃ milati hematāpyaṃ ceti // GRhtCM_12.9:6 //

kva vajramūṣāyām // GRhtCM_12.9:7 //

tathāha /

mṛdastribhāgāḥ śaṇaladdibhāgau bhāgaśca nirdagdhatuṣopalādeḥ /

kiṭṭārdhabhāgaṃ parikhaṇḍya vajramūṣāṃ vidadhyātkhalu satvapāte /

iti // GRhtCM_12.9:8 //