बहिर्देशविशिष्टेऽर्थे देशे वा तद्विशेषिते ।
प्रमेये यो गृहाभावः पक्षधर्मस्त्वसौ कथम् ॥
तदभावविशिष्टं हि गृहं धर्मो न कस्यचित् ।
गृहाभावविशिष्टस्तु तदासौ नैव गम्यते ॥
पूर्वं न चाविशिष्टस्य धर्मिणः स्यात् प्रमेयता ।
न चात्र बाह्यदेशो वा चैत्रो वा गम्यते पुरा ॥
स्थिते सद्भावविज्ञाने गेहाभावधियाऽत्र तु ।
गेहादुत्कालिता सत्ता बहिरेवावतिष्ठते ॥
पक्षधर्मात्मलाभाय बहिर्भावप्रवेशितः ।
तद्विशिष्टोऽनुमेयः स्यात् पक्षधर्मत्ववादिभिः ॥