ṣaṣṭho+adhyāyaḥ /
Ca.1.6.1 athātastasyāśitīyamadhyāyaṃ
vyākhyāsyāmaḥ //
Ca.1.6.2 iti ha smāha bhagavānātreyaḥ //
Ca.1.6.3ab tasyāśitādyādāhārādbalaṃ
varṇaśca vardhate /
Ca.1.6.3cd yasyartusātmyaṃ viditaṃ
ceṣṭāhāravyapāśrayam //
Ca.1.6.4 iha khalu saṃvatsaraṃ
ṣaḍaṅgamṛtuvibhāgena vidyāt /
tatrādityasyodagayanamādānaṃ ca trīnṛtūñchiśirādīn grīṣmāntān vyavasyet
varṣādīn punarhemantāntān dakṣiṇāyanaṃ visargaṃ ca //
Ca.1.6.5 visarge punarvāyavo nātirūkṣāḥ
pravānti itare punarādāne somaścāvyāhatabalaḥ
śiśirābhirbhābhirāpūrayañjagadāpyāyayati śaśvat ato visargaḥ saumyaḥ /
ādānaṃ punarāgneyaṃ tāvetāvarkavāyū somaśca kālasvabhāvamārgaparigṛhītāḥ
kālarturasadoṣadehabalanirvṛttipratyayabhūtāḥ samupadiśyante //
Ca.1.6.6 tatra ravirbhābhirādadāno jagataḥ
snehaṃ vāyavastīvrarūkṣāścopaśoṣayantaḥ śiśiravasantagrīṣmeṣu yathākramaṃ
raukṣyamutpādayanto rūkṣān rasāṃstiktakaṣāyakaṭukāṃścābhivardhayanto nṛṇāṃ
daurbalyamāvahanti //
Ca.1.6.7 varṣāśaraddhemanteṣu tu
dakṣiṇābhimukjhe+arke kālamārgameghavātavarṣābhihatapratāpe śaśini
cāvyāhatabale māhendrasalilapraśāntasantāpe jagati arūkṣā rasāḥ
pravardhante+amlalavaṇamadhurā yathākramaṃ tatra balamupacīyate nṛṇāmiti //
Ca.1.6.8 bhavati cātra
Ca.1.6.8ab ādāvante ca daurbalyaṃ
visargādānayornṛṇām /
Ca.1.6.8cd madhye madhyabalaṃ tvante
śreṣṭhamagre ca nirdiśet //
Ca.1.6.9ab śīte
śītānilasparśasaṃrūddho balināṃ balī /
Ca.1.6.9cd paktā bhavati hemante
mātrādravyagurukṣamaḥ //
Ca.1.6.10ab sa yadā nendhanaṃ yuktaṃ
labhate dehajaṃ tadā /
Ca.1.6.10cd rasaṃ hinastyato vāyuḥ
śītaḥ śīte prakupyati //
Ca.1.6.11ab tasmāttuṣārasamaye
snigdhāmlalavaṇān rasān /
Ca.1.6.11cd audakānūpamāṃsānāṃ
medyānāmupayojayet //
Ca.1.6.12ab bileśayānāṃ māṃsāni
prasahānāṃ bhṛtāni ca /
Ca.1.6.12cd bhakṣayenmadirāṃ śīdhuṃ
madhu cānupibennaraḥ //
Ca.1.6.13ab gorasānikṣuvikṛtīrvasāṃ
tailaṃ navaudanam /
Ca.1.6.13cd
hemante+abhyasyatastoyamuṣṇaṃ cāyurna hīyate //
Ca.1.6.14ab abhyaṅgotsādanaṃ mūrdhni
tailaṃ jentākamātapam /
Ca.1.6.14cd bhajedbhūmigṛhaṃ
coṣṇamuṣṇaṃ garbhagṛhaṃ tathā //
Ca.1.6.15ab śīteṣu saṃvṛtaṃ sevyaṃ
yānaṃ śayanamāsanam /
Ca.1.6.15cd
prāvārājinakauṣeyapraveṇīkuthakāstṛtam //
Ca.1.6.16ab gurūṣṇavāsā digdhāṅgo
guruṇā+aguruṇā sadā /
Ca.1.6.16cd śayane pramadāṃ pīnāṃ
viśālopacitastanīm //
Ca.1.6.17ab āliṅgyāgurudigdhāṅgīṃ
supyāt samadamanmathaḥ /
Ca.1.6.17cd prakāmaṃ ca niṣeveta
maithunaṃ śiśirāgame //
Ca.1.6.18ab varjayedannapānāni
vātalāni laghūni ca /
Ca.1.6.18cd pravātaṃ
pramitāhāramudamanthaṃ himāgame //
Ca.1.6.19ab hemantaśiśirau tulyau
śiśire+alpaṃ viśeṣaṇam /
Ca.1.6.19cd raukṣyamādānajaṃ śītaṃ
meghamārutavarṣajam //
Ca.1.6.20ab tasmāddhaimantikaḥ sarvaḥ
śiśire vidhiriṣyate /
Ca.1.6.20cd nivātamuṣṇaṃ tvadhikaṃ
śiśire gṛhamāśrayet //
Ca.1.6.21ab kaṭutiktakaṣāyāṇi
vātalāni laghūni ca /
Ca.1.6.21cd varajayedannapānāni
śiśire śītalāni ca //
Ca.1.6.22ab vasante nicitaḥ śleṣmā
dinakṛdbhābhirīritaḥ /
Ca.1.6.22cd kāyāgniṃ bādhate
rogāṃstataḥ prakurute bahūn //
Ca.1.6.23ab tasmādvasante karmāṇi
vamanādīni kāreyet /
Ca.1.6.23cd gurvamlasnigdhamadhuraṃ
divāsvapnaṃ ca varjayet //
Ca.1.6.24ab vyāyāmodvartanaṃ dhūmaṃ
kavalagrahamañjanam /
Ca.1.6.24cd sukhāmbunā śaucāvidhiṃ
śīlayet kusumāgame //
Ca.1.6.25ab candanāgurudigdhāṅgo
yavagodhūmabhojanaḥ /
Ca.1.6.25cd śārabhaṃ śāśamaiṇeyaṃ
māṃsaṃ lāvakapiñjalam //
Ca.1.6.26ab bhakṣayennirgadaṃ sīdhuṃ
pibenmādhvīkameva vā /
Ca.1.6.26cd vasante+anubhavet strīṇāṃ
kānanānāṃ ca yauvanam //
Ca.1.6.27ab mayūkhairjagataḥ snehaṃ
grīṣme pepīyate raviḥ /
Ca.1.6.27cd svādu śītaṃ dravaṃ
snigdhamannapānaṃ tadā hitam //
Ca.1.6.28ab śītaṃ saśarkaraṃ manthaṃ
jāṅgalānmṛgapakṣiṇaḥ /
Ca.1.6.28cd ghṛtaṃ payaḥ saśālyannaṃ
bhajan grīṣme na sīdati //
Ca.1.6.29ab madyamalpaṃ na vā
peyamathavā subahūdakam /
Ca.1.6.29cd lavaṇāmlakatūṣṇāni
vyāyāmaṃ ca vivarjayet //
Ca.1.6.30ab divā śītagṛhe nidrāṃ niśi
candrāṃśuśītalaiḥ /
Ca.1.6.30cd sevyamāno bhajedāsyāṃ
muktāmaṇivibhūṣitaḥ //
Ca.1.6.31ab vyajanaiḥ
pāṇisaṃsparśaiścandanodakaśītalaiḥ /
Ca.1.6.31cd sevyamāno bhajedāsyāṃ
muktāmaṇivibhūṣitaḥ //
Ca.1.6.32ab kānanāni ca śītāni jalāni
kusumāni ca /
Ca.1.6.32cd grīṣmakāle niṣeveta
maithunādvirato naraḥ //
Ca.1.6.33ab ādānadurbale dehe paktā
bhavati durbalaḥ /
Ca.1.6.33cd sa varṣāsvanilādīnāṃ
dūṣaṇairbādhyate punaḥ //
Ca.1.6.34ab bhūbāṣpānmeghanisyandāt
pākādamlājjalasya ca /
Ca.1.6.34cd varṣāsvagnibale kṣīṇe
kupyanti pavanādayaḥ //
Ca.1.6.35ab tasmāt sādhāraṇaḥ sarsvo
vidhirvarṣāsu śasyate /
Ca.1.6.35cd udamanthaṃ
divāsvapnamavaśyāyaṃ nadījalam //
Ca.1.6.36ab vyāyāmamātapaṃ caiva
vyavāyaṃ cātra varjayet /
Ca.1.6.36cd pānabhojanasaṃskārān
prāyaḥ kṣaudrānvitān bhajet //
Ca.1.6.37ab vyaktāmlalavaṇasnehaṃ
vātārṣākule+ahani /
Ca.1.6.37cd viśeṣaśīte bhoktavyaṃ
varṣāsvanalaśāntaye //
Ca.1.6.38ab agnisaṃrakṣaṇavatā
yavagodhūmaśālayaḥ /
Ca.1.6.38cd purāṇā
jāṅgalaiarmāṃsairbhojyā yūṣaiśca saṃskṛtaiḥ //
Ca.1.6.39ab pibet kṣaudrānvitaṃ
cālpaṃ mādhvīkāriṣṭamambu vā /
Ca.1.6.39cd māhendraṃ taptaśītaṃ vā
kaupaṃ sārasameva vā //
Ca.1.6.40ab
pragharṣodvartanasnānagandhamālyaparo bhavet /
Ca.1.6.40cd laguśuddhāmbaraḥ sthānaṃ
bhajedakledi vārṣikam //
Ca.1.6.41ab varṣāśītocitāṅgānāṃ
sahasaivārkaraśmibhiḥ /
Ca.1.6.41cd taptānāmācitaṃ pittaṃ
prāyaḥ śaradi kupyati //
Ca.1.6.42ab tatrānnapānaṃ madhuraṃ
laghu śītaṃ satiktakam /
Ca.1.6.42cd pittapraśamanaṃ sevyaṃ
mātrayā suprakāṅkṣitaiḥ //
Ca.1.6.43ab lāvān
kapiñjalāneṇānurabhrāñchrabhān śaśān /
Ca.1.6.43cd śālīn sayavagodhūmān
sevyānāhurdhanātyaye //
Ca.1.6.44ab tiktasya sarpiṣaḥ pānaṃ
vireko raktamokṣaṇam /
Ca.1.6.44cd dhārādharātyaye
kāryamātapasya ca varjanam //
Ca.1.6.45ab vasāṃ
tailamavaśyāyamaudakānūpamāmiṣam /
Ca.1.6.45cd kṣāraṃ dadhi divāsvapnaṃ
prāgvātaṃ cātra varjayet //
Ca.1.6.46ab divā sūryāṃśusaṃtaptaṃ
niśi candrāṃśuśītalam /
Ca.1.6.46cd kālena pakvaṃ
nirdoṣamagastyenāviṣīkṛtam //
Ca.1.6.47ab haṃsodakamiti khyātaṃ
śāradaṃ vimalaṃ śuci /
Ca.1.6.47cd snānapānāvagāheṣu
hitamambu yathā+amṛtam //
Ca.1.6.48ab śāradāni ca mālyāni
vāsāṃsi vimalāni ca /
Ca.1.6.48cd śaratkāle praśasyante
pradoṣe cenduraśmayaḥ //
Ca.1.6.49ab ityuktamṛtusātmyaṃ
yacceṣṭāhāravyapāśrayam /
Ca.1.6.49cd upaśete
yadaucityādokaḥsātmyaṃ&{ṅ.okasātmyaṃ} taducyate //
Ca.1.6.50ab deśānāmāmayānāṃ ca
viparītaguṇaṃ guṇaiḥ /
Ca.1.6.50cd sātmyamicchanti
sātmyajñāśeceṣṭitaṃ cādyameva ca //
Ca.1.6.51 tatra ślokaḥ
Ca.1.6.51ab ṛtāvṛtau nṛbhiḥ
sevyamasevyaṃ yacca kiṃcana /
Ca.1.6.51cd tasyāśitīye nirdiṣṭaṃ
hetumat sātmyameva ca //
ityagniveśakṛte tantre carakapratisaṃskṛte ślokasthāne tasyāśitīyo nāma
ṣaṣṭho+adhyāyaḥ //6//
