caturdaśa+adhyāyaḥ/
Ca.1.14.1 athātaḥ svedādhyāyaṃ
vyākhyāsyāmaḥ//
Ca.1.14.2 iti ha smāha bhagavānātreyaḥ//
Ca.1.14.3 ataḥ svedāḥ pravakṣyante
yairyathāvatprayojitaiḥ/
svedasādhyāḥ praśāmyanti gadā vātakaphātmakāḥ//
Ca.1.14.4 snehapūrvaṃ prayuktena
svedenāvajite+anile/
purīṣamūtraretāṃsi na sajjanti kathaṃcana//
Ca.1.14.5 śuṣkāṇyapi hi kāṣṭhāni
snehasvedopapādanaiḥ/
namayanti yathānyāyaṃ kiṃ punarjīvato narān//
Ca.1.14.6 rogartuvyādhitāpekṣo
nātyuṣṇo+atimṛdurna ca/
dravyavān kalpito deśe svedaḥ kāryakaro mataḥ//
Ca.1.14.7 vyādhau śīte śarīre ca mahān
svedo mahābale/
durbale durbalaḥ svedo madhyame madhyamo hitaḥ//
Ca.1.14.8 vātaśleṣmaṇi vāte vā kaphe vā
sveda iṣyate/
snigdharūkṣastathā snigdho rūkṣaścāpyupakalpitaḥ//
Ca.1.14.9 āmāśayagate vāte kaphe
pakvāśayāśrite/
rūkṣapūrvo hitaḥ svedaḥ snehapūrvastathaiva ca//
Ca.1.14.10 vṛṣaṇau hṛdayaṃ dṛṣṭī
svedayenmṛdu naiva vā/
madhyamaṃ vaṃkṣaṇau śeṣamaṅgāvayavamiṣṭataḥ//
Ca.1.14.11 suśuddhairnaktakaiḥ piṇḍyā
godhūmānāmathāpi vā/
padmotpalapalāśairvā svedyaḥ saṃvṛtya cakṣuṣī//
Ca.1.14.12 muktāvalībhiḥ śītābhiḥ
śītalairbhājanairapi/
jalārdrairjalajairhastaiḥ svidyato hṛdayaṃ spṛśet//
Ca.1.14.13 śītaśūlavyuparame
stambhagauravanigrahe/
saṃjāte mārdave svede svedanādviratirmatā//
Ca.1.14.14 pittaprakopo mūrcchā ca
śarīrasadanaṃ tṛṣā/
dāhaḥ svarāṅgadaurbalyamatisvinnasya lakṣaṇam/
Ca.1.14.15 uktastasyāśitīye yo
graiṣmikaḥ sarvaśo vidhiḥ/
so+atisvinnasya kartavyo madhuraḥ snigdhaśītalaḥ//
Ca.1.14.16 kaṣāyamadyanityānāṃ
garbhiṇyā raktapittinām/
pittināṃ sātisārāṇāṃ rūkṣāṇāṃ madhumehinām/
Ca.1.14.17 vidagdhabhraṣṭabradhnānāṃ
viṣamadyavikāriṇām/
śrāntānāṃ naṣṭasaṃjñānāṃ sthūlānāṃ pittamehinām//
Ca.1.14.18 tṛṣyatāṃ &kṣudhitānāṃ
ca kruddhānāṃ śocatāmapi/
kāmalyudariṇāṃ caiva kṣatānāmāḍyarogiṇām//
Ca.1.14.19
durbalātiviśuṣkāṇāmupakṣīṇaujasāṃ tathā/
bhiṣak taimirikāṇāṃ ca na svedamavatārayet//
Ca.1.14.20 pratiśyāye ca kāse ca
hikkāśvāseṣvalāghave/
karṇamanyāśiraḥśūle svarabhede galagrahe//
Ca.1.14.21
arditaikāṅgasarvāṅgapakṣāghāte vināmake/
koṣṭhānāhavibandheṣu mūtrāghāte& vijṛmbhake//
Ca.1.14.22
pārśvapṛṣṭhakaṭīkukṣisaṃgrahe gṛdhrasīṣu ca/
mūtrakṛcchre mahattve ca muṣkayoraṅgamardake//
Ca.1.14.23 pādajānūrujaṅghārtisaṃgrahe
śvayathāvapi/
khallīṣvāmeṣu śīte ca vepathau vātakaṇṭake//
Ca.1.14.24 saṃkocāyāmaśūleṣu
stambhagauravasuptiṣu&/
sarvāṅgeṣu vikāreṣu svedanaṃ hitamucyate//
Ca.1.14.25
tilamāṣakulatthāmlaghṛtatailāmiṣaudanaiḥ/
pāyasaiḥ kṛśarairmāṃsaiḥ piṇḍasvedaṃ prayojayet//
Ca.1.14.26
gokharoṣṭravarāhāśvaśakṛdbhiḥ satuṣairyavaiḥ/
sikatāpāṃśupāṣāṇakarīṣāyasapūṭakaiḥ//
Ca.1.14.27 ślaiṣmikān svedayet
pūrvairvātikān samupācaret/
dravyāṇyetāni śasyante yathāsvaṃ prastareṣvapi//
Ca.1.14.28 bhūgṛheṣu ca
jentākeṣūṣṇagarbhagṛheṣu ca/
vidhūmāṅgāratapteṣu svabhyaktaḥ svidyate sukham//
Ca.1.14.29 grāmyānūpaudakaṃ māṃsaṃ
payo bastaśirastathā/
&varāhamadhyapittāsṛk snehavattilataṇḍulāḥ//
Ca.1.14.30 ityetāni samutkvāthya
nāḍīsvedaṃ prayojayet/
&deśakālavibhāgajño yuktyapekṣo bhiṣaktamaḥ//
Ca.1.14.31
vāruṇāmṛtakairaṇḍaśigrumūlakasarṣapaiḥ/
vāsāvaṃśakarañjārkapatrairaśmantakasya ca//
Ca.1.14.32
śobhāñjanakasaireyamālatīsurasārjakaiḥ&/
patrairutkvāthya salilaṃ nāḍīsvedaṃ prayojayet//
Ca.1.14.33 bhūtīkapañcamūlābhyāṃ
surayā dadhimastunā/
mūtrairamlaiśca sasnehairnāḍīsvedaṃ prayojayet//
Ca.1.14.34 eta eva ca niryūhāḥ
prayojyā jalakoṣṭhake/
svedanārthaṃ ghṛtakṣīratailakoṣṭhāṃśca kārayet//
Ca.1.14.35
godhūmaśakalaiścūrṇairyavānāmamlasaṃyutaiḥ/
sasnehakiṇvalavaṇairupanāhaḥ praśasyate//
Ca.1.14.36 gandhaiḥ surāyāḥ kiṇvena
jīvantyā śatapuṣpayā/
umayā kuṣṭhatailābhyāṃ yuktayā copanāhayet//
Ca.1.14.37 carmabhiścopanaddhavyaḥ
salomabhirapūtibhiḥ/
uṣṇavīryairalābhe tu kauśeyāvikaśāṭakaiḥ//
Ca.1.14.38 rātrau baddhaṃ divā
muñcenmuñcedrātrau divā kṛtam/
bidāhaparihārārthaṃ, syāt prakarṣastu śītale//
Ca.1.14.39 saṅkaraḥ prastaro nāḍī
pariṣeko+avagāhanam/
jentāko+aśmaghanaḥ karṣūḥ kuṭī bhūḥ kumbhikaiva ca//
Ca.1.14.40 kūpo holāka ityete
svedayanti trayodaśa/
tān yathāvat pravakṣyāmi sarvānevānupūrvaśaḥ//
Ca.1.14.41 tatra
vastrāntaritairavastrāntaritairvā piṇḍairyathoktairupasvedanaṃ saṅkarasveda
iti vidyāt//
Ca.1.14.42 śūkaśamīdhānyapulākānāṃ
veśavārapāyasakṛśarotkārikādīnāṃ vā prastare
kauśeyāvikottarapracchadepañcāṅgulorubūkārkapatrapracchade vā
svabhyaktasarvagātrasya śayānasyopasvedanaṃ& prastarasveda iti vidyāt//
Ca.1.14.43 svedanadravyāṇāṃ
punarmūlaphalapatraśuṅgādīnāṃ mṛgaśakunapiśitaśiraspadādīnāmuṣṇasvabhāvānāṃ
vā yathārhamamlalavaṇasnehopasaṃhitānāṃ mūtrakṣīrādīnāṃ vā kumbhyāṃ
bāṣpamanudvamantyāmutkvathitānāṃ nāḍyā
śareṣīkāvaṃśadalakarañjārkapatrānyatamakṛtayā gajāgrahastasaṃsthānanā
vyāmadīrghayā vyāmārdhadīrghayā vā
vyāmacaturbhāgāṣṭabhāgamūlāgrapariṇṇāhasrotasā sarvato
vātaharapatrasaṃvṛtacchidrayā dvistrirvā vināmitayā
vātaharasiddhasnehābhyaktagātro bāṣpamupaharet; bāṣpo hyanṛjugāmī&
vihatacaṇḍavegastvacamavidahan sukhaṃ svedayatīti nāḍīsvedaḥ//
Ca.1.14.44 vātikottaravātikānāṃ
punarmūlādīnāmutkvāthaiḥ sukhoṣṇaiḥ kumbhīrvarṣaṇikāḥ& pranāḍīrvā
pūrayitvā yathārhasiddhasnehābhyaktagātraṃ vastrāvacchannaṃ pariṣecayediti
pariṣekaḥ//
Ca.1.14.45
vātaharotkvāthakṣīratailaghṛtapiśitarasoṣṇasalilakoṣṭhakāvagāhastu
yathokta evāvagāhaḥ//
Ca.1.14.46 atha jentākaṃ cikīrṣurbhūmiṃ
parīkṣeta --- tatra pūrvasyāṃ diśyuttarasyāṃ vā guṇavati praśaste bhūmibhāge
kṛṣṇamadhuramṛttike suvarṇamṛttike vā parīvāpapuṣkariṇyādīnāṃ
jalāśayānāmanyatamasya kūle dakṣiṇe paścime vā sūpatīrthe
samasuvibhaktabhūmibhāge saptāṣṭau vā+aratnīrupakramyodakāt
prāṅmukhamudaṅmukhaṃ vā+abhimukhatīrthaṃ kūṭāgāraṃ kārayet,
utsedhavistārataḥ paramaratnīḥ ṣoḍaśa, samantāt suvṛttaṃ
mṛtkarmasaṃpannamanekavātāyanam; asya kṛṭāgārasḥyāntaḥ samantato
bhittimaratnivistārotsedhāṃ piṇḍikāṃ kārayedākapāṭāt, madhye cāsya
kūṭāgārasya catuṣkiṣkumātraṃ puruṣapramāṇaṃ mṛnmayaṃ kandusaṃsthānaṃ
bahusūkṣmacchidramaṅgārakoṣṭhakastambhaṃ sapidhānaṃ kārayet; taṃ ca
khādirāṇāmāśvakarṇādīnāṃ vā kāṣṭhānāṃ pūrayitvā pradīpayet; sa yadā jānīyāt
sādhu dagdhāni kāṣṭhāni gatadhūmānyavataptaṃ ca kevalamagninā tadagnigṛhaṃ
svedayogyena coṣmaṇā yuktamiti, tatrainaṃ puruṣaṃ vātaharābhyaktagātraṃ
vastrāvacchannaṃ praveśayaṃścainamanuśiṣyāt --- śaumya! praviśa
kalyāṇāyārogyāya ceti, praviśya caināṃ piṇḍikāmadhiruhya
pārśvāparapārśvābhyāṃ yathāsukhaṃ śayīthāḥ, na ca tvayā
svedamūrcchāparītenāpi satā piṇḍikaiṣā vimoktavyā++āprāṇocchvāsāt,
bhraśyamāno hyataḥ piṇḍivakāvakāśāddvāramanadhigacchan
svedamūrcchāparītatayā sadyaḥ prāṇāñjahyāḥ, tasmāt piṇḍikāmenāṃ na kathaṃ
cana muñcethāḥ; tvaṃ yadā jānīyāḥ --- vigatābhiṣyandamātmānaṃ
samyakprasrutasvedapicchaṃ sarvasrotovimuktaṃ
laghūbhūtamapagatavibandhastambhasuptivedanāgauravamiti, tatastāṃ
piṇḍikāmanusaran dvāraṃ prapadyethāḥ, niṣkramya ca na sahasā cakṣuṣoḥ
paripālanārthaṃ śītodakamupaspṛśethāḥ, apagatasantāpaklamastu muhūrtāt
sukhoṣṇena vāriṇā yathānyāyaṃ pariṣikto+aśnīyāḥ; iti jentākasvedaḥ//
Ca.1.14.47 śayānasya pramāṇena
ghanāmaśmamayīṃ śilām/
tāpayitvā mārutaghnairdārubhiḥ saṃpradīpitaiḥ//
Ca.1.14.48 vyapojjhya sarvānaṅgārān
prokṣya caivoṣṇavāriṇā/
tāṃ śilāmatha kurvīta kauṣeyāvikasaṃstarām//
Ca.1.14.49 tasyāṃ svabhyaktasarvāṅgaḥ
svapan svidyati nā sukham/
&kauravājinakauṣeyaprāvārādyaiḥ susaṃvṛtaḥ&//
Ca.1.14.50 ityukto+aśmaghanasvedaḥ,
karṣūsvedaḥ pravakṣyate/
khānayecchayanasyādhaḥ karṣūṃ sthānavibhāgavit//
Ca.1.14.51 dīptairadhūmairaṅgāraistāṃ
karṣūṃ pūrayettataḥ/
tasyāmupari śayyāyāṃ svapan svidyati nā sukham//
Ca.1.14.52 anatyutsedhavistārāṃ
vṛttākārāmalocanām/
ghanabhittiṃ kuṭīṃ kṛtvā kuṣṭhādyaiḥ saṃpralepayet//
Ca.1.14.53 kuṭīmadhye bhiṣak śayyāṃ
svāstīrṇāmupakalpayet/
prāvārājinakauśeyakuthakambalagolakaiḥ//
Ca.1.14.54
hasantikābhiraṅgārapūrṇābhistāṃ ca sarvaśaḥ/
parivāryāntarārohedabhyaktaḥ svidyate sukham//
Ca.1.14.55 ya
evāśmaghanasvedavidhirbhūmau sa eva tu/
praśastāyāṃ nivātāyāṃ samāyāmupadiśyate//
Ca.1.14.56 kumbhīṃ
vātaharakvāthapūrṇāṃ bhūmau nikhānayet/
ardhabhāgaṃ tribhāgaṃ vā śayanaṃ tatra copari//
Ca.1.14.57 sthāpayedāsanaṃ vā+api
nātisāndraparicchadam/
atha kumbhyāṃ susantaptān prakṣipedayaso guḍān//
Ca.1.14.58 pāṣāṇān voṣmaṇā tena
tatsthaḥ svidyati nā sukham/
susaṃvṛtāṅgaḥ svabhyaktaḥ snehairanilanāśanaiḥ//
Ca.1.14.59 kūpaṃ śayanavistāraṃ
dviguṇaṃ cāpi vedhataḥ/
deśe nivāte śaste ca kuryādantaḥsumārjitam//
Ca.1.14.60 hastyaśvagokharoṣṭrāṇāṃ
karīṣairdagdhapūrite/
svavacchannaḥ susaṃstīrṇe+abhyaktaḥ svidyati nā sukham//
Ca.1.14.61 dhītīkāṃ& tu karīṣāṇāṃ
yathoktānāṃ pradīpayet/
śayanāntaḥpramāṇena śayyāmupari tatra ca//
Ca.1.14.62 sudagdhāyāṃ vidhūmāyāṃ
yathoktāmupakalpayet/
svavacchannaḥ svapaṃstatrābhyaktaḥ svidyati nā sukham//
Ca.1.14.63 holākasveda ityeṣa sukhaḥ
prokto maharṣiṇā/
iti trayodaśavidhaḥ svedo+agniguṇasaṃśrayaḥ//
Ca.1.14.64 vyāyāma uṣṇasadanaṃ
guruprāvaraṇaṃ kṣudhā/
bahupānaṃ bhayakrodhāvupanāhāhavātapāḥ//
Ca.1.14.65 svedayanti daśaitāni
naramagniguṇādṛte/
ityukto dvividhaḥ svedaḥ saṃyukto+agniguṇairna ca//
Ca.1.14.66 ekāṅgasarvāṅgataḥ snigdho
rūkṣastathaiva ca/
ityetattrividhaṃ dvandvaṃ svedamuddiśya kīrtitam//
Ca.1.14.67 snigdhaḥ svedairupakramyaḥ
svinnaḥ pathyāśano bhavet/
tadahaḥ svinnagātrastu vyāyāmaṃ varjayennaraḥ//
Ca.1.14.68 tatra ślokāḥ --- svedo
yathā kāryakaro hito yebhyaśca yadvidhaḥ/
yatra deśe yathā yogyo deśo rakṣyaśca yo yathā//
Ca.1.14.69 svinnātisvinnarūpāṇi
tathā+atisvinnabheṣajam/
asvedyāḥ svedayogyāśca svedadravyāṇi kalpanā//
Ca.1.14.70 trayodaśavidhaḥ svedo vinā
daśavidho+agninā/
saṃgraheṇa ca ṣaṭ svedāḥ svedādhyāye nidarśitāḥ/
Ca.1.14.71 svedādhikāre
&yadvācyamuktametanmaharṣiṇā/
śiṣyaistu pratipattavyamupadeṣṭā punarvasuḥ//
ityagniveśakṛte tantre carakapratisaṃskṛte ślokasthāne svedādhyāyo nāma
caturdaśo+adhyāyaḥ//14//
