aṣṭamo+adhyāyaḥ/
Ca.2.8.1 athāto+apasmāranidānaṃ
vyākhyāsyāmaḥ//
Ca.2.8.2 iti ha smāha bhagavānātreyaḥ//
Ca.2.8.3 iha khalu catvāro+apasmārā bhavanti
vātapittakaphasannipātanimittāḥ//
Ca.2.8.4 ta evaṃvidhānāṃ prāṇabhṛtāṃ
kṣipramabhinirvartante;
tadyatā---rajastamobhyāmupahatacetasāmudbhrāntaviṣamabahudoṣāṇāṃ
samalavikṛtopahitānyaśucīnyabhyavahārajātāni
vaiṣamyayuktenopayogavidhinopayuñjānānāṃ tantraprayogamapi ca
viṣamamācaratāmanyāśca śarīraceṣṭā viṣamāḥ samācaratām-&atyupakṣayādvā
doṣāḥ prakupitārajastamobhyāmupahatacetasāmantarātmanaḥ śreṣṭhatamamāyatanaṃ
&hṛdayamupasṛtyopari tiṣṭhante, tathendriyāyatanāni ca/
tatra cāvasthitāḥ santo yadā hṛdayamindriyāyatanāni ceritāḥ
kāmakrodhabhayalobhamohaharṣaśokacintodvegādibhiḥ sahasā+abhipūrayanti, tadā
janturapasmarati//
Ca.2.8.5 apasmāraṃ punaḥ
smṛtibuddhisattvasaṃplavādbībhatsaceṣṭamāvasthikaṃ tamaḥpraveśamācakṣate//
Ca.2.8.6 tasyemāni pūrvarūpāṇi bhavanti;
tadyathā---bhrūvyudāsaḥ satatamakṣṇorvaikṛtamaśabdaśravaṇaṃ
lālāsiṅghāṇaprasravaṇamanannābhilaṣaṇamarocakāvipākau hṛdayagrahaḥ
kukṣerāṭopo daurbalyamasthibhedo+aṅgamardo mohastamaso darśanaṃ mūrcchā
bhramaścābhīkṣṇaṃ svapne ca madanartanavyadhanavyathanavepanapatanādīnīti//
Ca.2.8.7
tato+anantaramapasmārābhinirvṛttireva//
Ca.2.8.8-1 tatredamapasmāraviśeṣavijñānaṃ
bhavati; tadyathā---abhīkṣṇamapasmarantaṃ, &kṣaṇena saṃjñāṃ
pratilabhamānam, utpiṇḍitākṣam, asāmnā vilapantam, udvamantaṃ phenam,
atīvādhmātagrīvam, āviddhaśiraskaṃ, viṣamavinatāṅgulim,
anavasthitapāṇipādam, aruṇaparuṣaśyāvanakhanayanavadanatvacam,
anavasthitacapalaparuṣarūkṣarūpadarśinaṃ, vātalānupaśayaṃ, viparītopaśayaṃ
ca &vātenāpasmarantaṃ vidyāt//
Ca.2.8.8-2 abhīkṣṇamapasmarantaṃ,
&kṣaṇena saṃjñāṃ pratilabhamānam, avakūjantam, āsphālayantaṃ bhūmiṃ,
haritahāridratāmranakhanayanavadanatvacaṃ,
rudhirokṣitograbhairavādīptaruṣitarūpadarśinaṃ, pittalānupaśayaṃ,
viparītopaśayaṃ ca pittenāpasmarantaṃ vidyāt//
Ca.2.8.8-3 cirādapasmarantaṃ, cirācca
saṃjñāṃ pratilabhamānaṃ, patantam, anativikṛtaceṣṭaṃ, lālāmudvamantaṃ,
śuklanakhanayanavadanatvacaṃ, śuklagurusnigdharūpadarśinaṃ,
śleṣmalānupaśayaṃ, viparītopaśayaṃ ca śleṣmaṇā+apasmarantaṃ vidyāt//
Ca.2.8.8-4 samavetasarvaliṅgamapasmāraṃ
sānnipātikaṃ vidyāt, tamasādhyamācakṣate//
Ca.2.8.8 iti catvāro+apasmārā vyākhyātāḥ//
Ca.2.8.9 teṣāmāganturanubandho bhavatyeva
kadācit, tamuttarakālabhupadekṣyāmaḥ/tasya viśeṣavijñānaṃ
yathoktaliṅgairliṅgādhikyamadoṣaliṅgānurūpaṃ ca kiñcit//
Ca.2.8.10 hitānyapasmāribhyastīkṣṇāni
saṃśodhanānyupaśamanāni ca yathāsvaṃ, mantrādīni cāgantusaṃyoge//
Ca.2.8.11 tasmin hi dakṣādhvaradhvaṃse
dehināṃ nānādikṣu
vidravatāmabhidraṛvaṇataraṇadhāvanaplavanalaṅghanādyairdehavikṣobhaṇaiḥ purā
gulmotpattirabhūt, haviṣprāśāt pramehakuṣṭhānāṃ, bhayatrāsaśokairunmādānāṃ,
vividhabhūtāśucisaṃsparśādapasmārāṇāṃ, jvarastu khalu
&maheśvaralalāṭaprabhavaḥ, tatsaṃtāpādraktapittam, ativyavāyāt
punarnakṣatrarājasya rājayakṣmeti//
Ca.2.8.12 bhavanti cātra---
apasmāro hi vātena pittena ca kaphena ca/
caturthaḥ sannipātena pratyākhyeyastathāvidhaḥ//
Ca.2.8.13 sādhyāṃstu bhiṣajaḥ prājñāḥ
sādhyanti samāhitāḥ/
tīkṣṇaiḥ saṃśodhanaiścaiva yathāsvaṃ śamanairapi//
Ca.2.8.14 yadā doṣanimittasya
bhavatyāganturanvayaḥ/
tadā sādhāraṇaṃ karma pravadanti bhiṣagvidaḥ//
Ca.2.8.15 sarvarogaviśeṣajñaḥ
sarvauṣadhaviśāradaḥ/
bhiṣak sarvāmayān hanti na ca mohaṃ &nigacchati//
Ca.2.8.16 ityetadakhilenoktaṃ
nidānasthānamuttamam/
nidānārthakaro rogo rogasyāpyupalabhyate//
Ca.2.8.17
tadyathā---jvarasaṃtāpādraktapittamudīryate/
raktapittājjvarastābhyāṃ &śoṣaścāpyupajāyate//
Ca.2.8.18 plīhābhivṛddhyā jaṭharaṃ
jaṭharācchotha eva ca/
arśobhyo jaṭharaṃ duḥkhaṃ gulmaścāpyupajāyate//
Ca.2.8.19 pratiśyāyādbhavet kāsaḥ kāsāt
saṃjāyate kṣayaḥ/
kṣayo rogasya hetutve śoṣasyāpyupalabhyate//
Ca.2.8.20 te pūrvaṃ kevalā rogāḥ
paścāddhetvarthakāriṇaṃ/
ubhayārthakarā &dṛṣṭāstathaivaikārthakāriṇaḥ//
Ca.2.8.21 kaściddhi rogo rogasya
heturbhūtvā praśāmyati/
na praśāmyati cāpyanyo &hetvarthaṃ kurute+api ca//
Ca.2.8.22 evaṃ kṛcchratamā nYṇāṃ
dṛśyante vyādhisaṅkarāḥ/
prayogāpariśuddhatvāttathā cānyonyasaṃbhavāt//
Ca.2.8.23 prayogaḥ śamayedvyādhiṃ
yo+ayamanyamudīrayet/
nāsau viśuddhaḥ, śuddhastu śamayedyo na kopayet//
Ca.2.8.24 eko heturanekasya
tathaikasyaika eva hi/
vyādherekasya cāneko bahūnāṃ bahavo+api ca//
Ca.2.8.25 jvarabhramapralāpādyā
dṛśyante rūkṣahetujāḥ/
rūkṣeṇaikena cāpyeko jvara evopajāyate//
Ca.2.8.26 hetubhirbahubhiścaiko jvaro
rūkṣādibhirbhavet/
rūkṣādibhirjvarādyāśca vyādhayaḥ saṃbhavanti hi//
Ca.2.8.27 liṅgaṃ caikamanekasya
&tathaivaikasya lakṣyate/
bahūnyekasya ca vyādherbahūnāṃ &syurbahūni ca//
Ca.2.8.28 viṣamārambhamūlānāṃ
liṅgamekaṃ jvaro mataḥ/
jvarasyaikasya cāpyekaḥ saṃtāpo liṅgamucyate//
Ca.2.8.29 viṣamārambhamūlaiśca jvara
eko nirucyate/
liṅgairetairjvaraśvāsahikkādyāḥ santi cāmayāḥ//
Ca.2.8.30 ekā śāntiranekasya
&tathaivaikasya lakṣyate/
vyādherekasya cānekā bahūnāṃ bahvya eva ca//
Ca.2.8.31 śāntirāmāśayotthānāṃ
vyādhīnāṃ laṅghanakriyā/
jvarasyaikasya cāpyekā śāntirlaṅghanamucyate//
Ca.2.8.32 tathā laghvaśanādyāśca
jvarasyaikasya śāntayaḥ/
etāścaiva jvaraśvāsahikkādīnāṃ praśāntayaḥ//
Ca.2.8.33 sukhasādhyaḥ sukhopāyaḥ
kālenālpena sādhyate/
sādhyate kṛcchrasādhyastu yatnena mahatā cirāt//
Ca.2.8.34 yāti nāśeṣatāṃ vyādhirasādhyo
yāpyasaṃjñītaḥ/
paro+asādhyaḥ kriyāḥ sarvāḥ pratyākhyeyo+ativartate//
Ca.2.8.35 nāsādhyaḥ sādhyatāṃ yāti
sādhyo yāti tvasādhyatām/
pādāpacārāddaivādvā yānti bhāvāntaraṃ gadāḥ//
Ca.2.8.36 vṛddhisthānakṣayāvasthāṃ
&rogāṇāmupalakṣayet/
susūkṣmāmapi ca prājño dehāgnibalacetasām//
Ca.2.8.37 vyādhyavasthāviśeṣān hi
jñātvā jñātvā vicakṣaṇaḥ/
tasyāṃ tasyāmavasthāyāṃ &catuḥśreyaḥ prapadyate//
Ca.2.8.38 prāyastiryaggatā doṣāḥ
kleśayantyāturāṃściram/
&teṣu na tvarayā kuryāddehāgnibalavit kriyām//
Ca.2.8.39 prayogaiḥ kṣapayedvā tān
sukhaṃ vā koṣṭhamānayet/
jñātvā koṣṭhaprapannāṃstān &yathāsannaṃ haredbudhaḥ//
Ca.2.8.40 jñānārthaṃ yāni coktāni
vyādhiliṅgāni saṃgrahe/
vyādhayaste tadātve tu liṅgānīṣṭāni nāmayāḥ//
Ca.2.8.41 vikāraḥ prakṛtiścaiva dvayaṃ
sarvaṃ samāsataḥ/
taddhetuvaśagaṃ hetorabhāvānnānuvartate//
Ca.2.8.42 tatra ślokāḥ---
hetavaḥ pūrvarūpāṇi rūpāṇyupaśayastathā/
saṃprāptiḥ pūrvamutpattiḥ sūtramātraṃ cikitsitāt//
Ca.2.8.43 jvarādīnāṃ vikārāṇāmaṣṭānāṃ
sādhyatā na ca/
pṛthagekaikaśaścoktā hetuliṅgopaśāntayaḥ//
Ca.2.8.44 hetuparyāyanāmāni vyādhīnāṃ
lakṣaṇasya ca/
nidānasthānametāvat saṃgraheṇopadiśyate//
ityagniveśakṛte tantre carakapratisaṃskṛte nidānasthāne apasmāranidānaṃ
nāmāṣṭamo+adhyāyaḥ/
