bījamidaṃ raktagaṇe niṣecitaṃ tena kṛtavāpam /
cāritajāritamātraṃ sūtaṃ rañjayati badhnāti // GRht_11.9 //
viśeṣavidhyantaramāha bījamityādi // GRhtCM_11.9:1 //
idaṃ niṣpannabījaṃ raktagaṇe niṣecitaṃ kuryāt // GRhtCM_11.9:2 //
punastena raktagaṇena kṛtavāpaṃ kṛto vāpo yasmin tat // GRhtCM_11.9:3 //
punastadbījaṃ cāritajāritamātraṃ pūrvaṃ ca paścāt jāritaṃ santaṃ sūtaṃ rañjayati rāgaṃ prāpayati badhnāti ceti // GRhtCM_11.9:4 //