atha sphūrjakādi tailam /-\-

sphūrjakaṃ hapuṣāpuṣpaṃ haṃsapādī kuraṇṭakam /

karañjārkadalasphūrja-śvetapatrañca kalkitam //

tena saṃsādhitaṃ tailaṃ tenābhyaṅgaṃ carecchiśoḥ // VRs_22.164 //

atha nimbādighṛtaṃ kṣīrañca /-\-

nimbāśvatthapalāśānāṃ vilvakiṃśukayordalaiḥ /

siddhaṃ sarpistathā kṣīraṃ pānādbālagrahān jayet // VRs_22.165 //

śaileyaguggulurasaiḥ sapurapracaṇḍa-

dravyāpahṛtsarasakundurubhiḥ sakuṣṭhaiḥ /

sadhyāmakaiḥ surabhigandharasaiśca dhūpaḥ

saubhāgyabuddhijayakṛdvijayo vivāde // VRs_22.166 //