atha kācāndhyaharāñjanam /--

vījapūrarasairghṛṣṭaṃ viṣatutthasitāyutam /

añjanaṃ kārayedrātrau kācamāndhyañca nāśayet // VRs_23.63 //

atha śambūkādivarttiḥ /--

śambūkaṃ pāradaṃ nāgaṃ kāṃsyacūrṇaṃ rasāñjanam /

samaṃ sarvamidaṃ ciñcā-daladrāveṇa peṣayet // VRs_23.64 //

tāmrapātragatāṃ varttiṃ chāyāśuṣkāntu kārayet /

śuklārmatimiraṃ pillaṃ hanti sā madhunā'ñjitā // VRs_23.65 //

asakṛcchītatoyena siñcennetrābhiṣyandajit // VRs_23.66 //

ajasya kṛṣṇamāṃsāntaḥ pippalīmaricaṃ kṣipet /

sīvayitvā ghṛtaiḥ pacyādghaṭikānte samuddharet //

madhvājyastanyasampiṣṭaṃ rātryandhasyāñjanaṃ hitam // VRs_23.67 //