802 āpyaṃ ca parābhyām, taijasaṃ ca vāyunā, na caikaikaguṇaṃ gṛhyata iti/ niranumānaṃ tu viṣṭaṃ hy aparaṃ pareṇa ity etad iti/ nātra liṅgam anumāpakaṃ gṛhyata iti yenaitad evaṃ pratipadyemahi/ yac coktaṃ viṣṭaṃ hy aparaṃ pareṇeti bhūtasṛṣṭau veditavyaṃ na sāmpratam iti niyamakāraṇābhāvād ayuktam/ dṛṣṭaṃ ca sāmpratam aparaṃ pareṇa viṣṭam iti, vāyunā ca viṣṭaṃ teja iti/ viṣṭatvaṃ saṃyogaḥ, sa ca dvayoḥ samānaḥ, vāyunā ca viṣṭatvāt sparśavat tejo na tu tejasā viṣṭatvād rūpavān vāyur iti niyamakāraṇaṃ nāstīti/ dṛṣṭaṃ ca taijasena sparśena vāyavyasya sparśasyābhibhavād agrahaṇam iti, na ca tenaiva tasyābhibhava iti//67//
Adhyāya 3, Āhnika 1, Sūtra 68
tad evaṃ nyāyaviruddhaṃ pravādaṃ pratiṣidhya na sarvaguṇānupalabdher iti coditaṃ samādhīyate —
pūrvapūrvaguṇotkarṣāt tat tat pradhānam // 3.1.68 //
tasmān na sarvaguṇopalabdhiḥ, ghrāṇādīnāṃ pūrvaṃ pūrvaṃ gandhāder guṇasyotkarṣāt tat tat pradhānam/ kā pradhānatā? viṣayagrāhakatvam/ ko guṇotkarṣaḥ? abhivyaktau samarthatvam/ yathā bāhyānāṃ pārthivāpyataijasānāṃ dravyāṇāṃ caturguṇatriguṇadviguṇānāṃ na sarvaguṇavyañjakatvaṃ gandharasarūpotkarṣāt tu yathākramaṃ gandharasarūpavyañjakatvam, % bāhyānāṃ ...]